Thursday 1 July 2010

صح والله صح.. وغير الازواج كمان لولا الملامة

ميدو جاب لي الخبر ده، وانا شايفة ان عنوان الخبر غلط، مش النساء المصريات الاكثر ضربا لازواجهن
المفروض: المصريون الاكثر استحقاقا للضرب بين الرجال  في العالم
فعلا والله فعلا، اه ستات كتير بيفقدوا اعصابهم وكتر خيرها مش بترميه من الشباك
ورجالة كتير فعلا يستاهلوا الضرب، ازواج وغير ازواج والله في مصر هنا
انا دايما لما اتضايق من حد اقعد اتخيل اني ضربته وللا اتخانقت معاه عشان اهدا، عمري ما تخيلت اني بارمي حد من الشباك او باولع فيه الا اذا كان راجل مصري، عمري ما تخيلتها على ستات مع اني اتخانقت مع ستات كتير في خيالي، بس كل الخناق كان بالكلام واني افهمها غلطها، وعمري ما تخيلتها على رجالة مش مصريين
وكنت فاكرة نفسي فريدة وحيدة، ارتضح ان فيه ناس كتير كده والله، سألت، فيه ناس كتير بتتخيل الانتقام وناس بتنفذه وكلهم بيضربوا الرجالة يا في خيالهم يا في الحقيقة
التقرير بيقول العشوائيات اقل بسبب ان الستات اقل جرأة في العشوائيات انها تقول انها ضربت جوزها
بس كتير قوي في العشوائيات بيضربوا اجوازهم، بيبقى متلقح في البيت، وهي بتشتغل، وياخد فلوسها يشرب بيهم ويضربها، طب تضربه وللا ما تضربوش؟ كتر خيرها انها ما بتقلش عقلها وتقتله عشان ما يتحسبش عليها بني ادم وتتحبس بجريرته
بس جدعان الستات المصريات
keep up
السنة الجاية عايزة النسبة 90 في المية، وبعد كده اقتصروا وربوا ولادكوا، مش تروحي تفهميه انه فرخة بكشك، وان اي ست اجنبية حتشوفه حيغمى عليها
صح حيغمى عليها من ريحة شرابه
بطلوا الدلع اللي بتعملوه في الصبيان ده كله منكوا انتوا كمان وترجعوا تغنوا ظلموه
طلعيه راجل
ويغسل المواعين
ويلم الغسيل
ويتعود يعتمد على نفسه
ولما يغلط يعتذر ويقول انا اسف، ويقول انا اسف قدام الناس
ولما يغلط يواجه اللي غلط في حقهم ما يهربش 
ولما يبقى عامل عملة ما تروحيش تزعقي له وبعد شوية "ما يهونش عليا" وتروحي انت تهزأي نفسك وتصالحيه يقوم يستهتر بيك ولما ما يحترمش امه ما يعرفش يحترم حد في الدنيا بعد كده ولا نفسه حتى
ونزليه الشارع
ويشتري لك حاجات
ومافيش حد حياكله يا امورة بطلي الخضة دي
وماهواش فرخة بكشك ولا حاجة
وما يقعدش على البساط وياخد ست البنات
وفيه زيه كتير على فكرة مافيش حاجة اسمها: هو انت فيه زيك؟ فيه زيه واحسن منه
واي جميلة او خدمة تعمليها معاه ماهياش حق مكتسب ومش واجب عليك
ويتعود يشكر الناس لما حد يعمل معاه دقة جدعنة
وما يتمرعش على الناس اللي بتعامله كويس.. يتأدب معاهم
وما يبقاش شبشب للناس اللي بتديله بالجزمة.. يبقى عنده كرامة
ويحس يحس على دمه
يتعود يبقى حسيس ويحس بغيره وبتعب غيره
ويبقى بني ادم
بني ادم
ربوا عيالكوا يا نسوان بدل ما تيجي نسوان تانية يربوهم وهم شحطة بشنبات
هو مين في الدنيا بتبقى مبسوطة لما بتضرب جوزها؟ 
حاجة تقرف  

17 comments:

مَلَكة said...

تعرفي فعلا مأساة الجواز في مصر
إن الرجالة مابيبقوش متربيين كويس
لو ماماهاتهم ربوهم فعلا على انهم يحترموا نفسهم قبل ما يحترموا الناس
عمر مافي زوجة مصرية هتكره جوزها او هتتطلق أو هتضربه طبعا

ربنا يرحمنا من الأشكال الضالة بقى

tamer.sala7 said...

..

tamer.sala7 said...

7amra


يعني انتي شايفة ان خلاص الست المصرية نازلة من عند ربنا


وفي الاخر تقولي مجتمع ذكوري متعفن
:P

موجة said...

اعتقد ان فيه ستات مش عايزين يعيشوا ان ممهاتهم برضه دلعوهم ماعلموهومش يعيشوا ازاي ويعاملوا اجوازهم ازاي..
خالص تحياتي
موجة

Anonymous said...

اعزب أفدس الحياة الزوجية
اجيد الكنس والمسح والغسل وغسيل المواعين
كما اجيد الشكر والاعتذار والطبطبة وعندي دم وكرامة
:D :D

Unknown said...

dreimi
ههههههههههه

Unknown said...

طيب لو كنتى قولت الاجواز هم اللى بيضربوا كنا قلنا مااشى من حقهم نتعاطف معاهم
انما بتضربونا وعايزين كمان تطلعوا ملايكة ماهى برضة اللى بتربى الواد غلط بتربى البنت كمان غلط!!!
طب الرجالة يعملوا لكوا ايه علشان يرضوكوا ينتحروا؟؟
:))

سجدة said...

هو فين الرجالة ؟؟ دى عملة منقرضة خاااااااااالص

أبو أمير said...

حدانا الست يبقي ولدها طول الباب
وتخاف يروح مشوار
وهناك نساء من لهب
شايفين ولادهم دهب
وعشان ما يلمع زيادة
لازم يدوق النار
وتقولوا أقول أشعار
مش قايل


هشام الجخ

Unknown said...

ههههههههه رجالة وامهم تربيهم

مش لما الاهالى تبقا متربية اصلا عشان تربى عيالها

ola said...

خلطة غير منطقية
لما نشوف الخبر ده
http://www.masrawy.com/News/Egypt/Politics/2010/june/29/marriage.aspx?ref=mostclip

مع الخبر دوكهة هههههه

يعني يموتوا نفسهم علشان يتجوزوهم ولما يتنيلوا ينزلوا فيهم ضرب؟!!هههههههههه

lastcrazyboys said...

هــو انتــوا يا تطلــعوهم عيال سيــس ومسقطين البنطلونـات..وياختشي كميلة وميعرفوش يطبقوا البطانية اللي كانوا مخمودين تحتيها

يا إمــا تطلعيه معقــد نفسيــا .. ومضطهــد وتحسسيــه انك خلفتيــه عشان مش لاقية حد يجيب الحاجات مـ الشــارع

عشــان يبقى عندي حق لما أقــول مفييييش امهــات بعد السبعينــات

مواطن مصري said...

الحمد الله الواحد مش متجوز ولا مظبط ولا على علاقة

بس دة نتيجة ل الدلع الزائد

فين زمن سي السيد الله يرحمها ايام لازم يعيدو عرض الفلم دة مرتين كل أسبوع

و يرجعو قانون الطاعة و يلغو الخلع

:)

utopia said...

بطلوا تشنيع على رجالة مصر

والفيديو ده دليل انهم رجالة وهايفضلوا طوول عمرهم رجالة برغم الحاقدين

http://www.youtube.com/watch?v=b7R89-_jt3c
والبيلد ده طاهر وهايفضل طوول عمره طاهر

مواطن مصري said...

حادث الاسكندرية‏..‏ وأحداث سيناء الحقيقة والأمن لايغيبان في مصر بقلم: أسامه سرايا


http://www.ahram.org.eg/215/2010/07/02/26/27631.aspx

:)

مواطن مصري said...

حادث الاسكندرية‏..‏ وأحداث سيناء الحقيقة والأمن لايغيبان في مصر بقلم: أسامه سرايا


http://www.ahram.org.eg/215/2010/07/02/10/27606.aspx


:)

مواطن مصري said...

حادث الاسكندرية‏..‏ وأحداث سيناء الحقيقة والأمن لايغيبان في مصر بقلم: أسامه سرايا


http://www.ahram.org.eg/215/2010/07/02/10/27606.aspx


:)