Thursday, 31 July 2008

اذا عرف السبب بطل العجب

على اساس ان الحياة مبهجة وسعيدة فنسرين دخلت سابت لي الخبر ده عشان يبقى فيه شوية نكد لافتكر اني في الجنة وللا حاجة
انا عارفة ان وزيرة العمل قبل كده قالت بالنص: احنا بحاول نسفر المصريين ونعمل اتفاقات بس مافيش حد عايز ياخدهم
وعارفة انها قبل كده قالت بالنص: العيب في الشعب مش في الحكومة لان الله لا يغير ما بقوم حتى يغيروا ما بانفسهم وربنا مش ح يعمل كده في الشعب الا اذا كان ده ابتلاء باعمالهم...لكن الحكومة مش غلطانة
والله يا ست الوزيرة ام ابتدائية اذا اعتبرنا ان الحكومة عقوبة ربنا علينا زي الطوفان والزلازل والصيحة والريح الصرصر العاتية فيبقى طبعا العيب مش في الحكومة لانها في الحالة دي جند من جند الله زي الطير الابابيل
طيب ربنا قبل ما بيعذب الناس بيمهلهم وبيبعت لهم بدل الانذار اتنين وتلاتة وخمسة وعشرة...ده سيدنا موسى قعد يوعظ فرعون وقومه اربعين سنة وسيدنا نوح قعد الف سنة، طيب احنا ماجالناش اي تحذيرات...حد جاله تحذيرات يا شباب؟ حد وصله اي اخبار عن تحذيرات؟
اه...ماجلناش...يااااااااااا ده احنا لازم نكون بنعمل حاجة فظيعة جدا لدرجة ان الطير الابابيل هبط علينا مرة واحدة من غير تحذيرات
طيب يا طيرة الابابيلة يا سيادة وزيرة العمل...بما انك جاية في فوج الطير الابابيل فانتوا اكيد عديتوا على فوق قبل ما تيجولنا
يعني ارمي حجارة السجيل زي ما انت عايزة بس الاول - من باب الفضول لا اكثر وليس من باب الاعتراض على القضاء لا سمح الله - فهمينا السجيل ده نازل علينا عشان عملنا ايه؟
طب معاكي اثبات انك جاية من فوق مش جاية من جوف الارض حيث كابتن ابلس؟
مش عارفة يعني شكلكوا كده ما يطمنش..حاسة انكوا منتحلين صخصية الطير الابابيل
المقدمات لا تؤدي الى النتائج والتصرفات غير منطقية وربنا سبحانه وتعالى قبل ما بيعذب حد بيفهمه كويس قوي هو بيتعذب ليه لحد ما الشخص ده يقتنع تماما انه مش مظلوم لان ربنا هو العدل...وقبل ما يفهم ربنا بيمهله
احنا بقى مش فاهمين انتوا بتعذبونا ليه؟ وكل حاجة راكبة بالمشقلب ومافيهاش منطق...عاملة زي كلام الملبوسين والعياذ بالله، الدنيا كلها حوالينا بقت عاملة زي كلام الملبوسين، مين اللي عفرت القعدة كده؟ بت...طلعي البطاقة انا شاكة فيكي...انت مش ابابيل..اعترفي

عيش الحياة وكفنك في جيبك



جابر بقى وكيل اعلانات مجموعات مبارك للحانوتية
مباركفون
عيش الحياة وكفنك في جيبك
:)
جامدة يا جابر عايزين بقى مبارك لاند احجز مدفنك من الان..مباركو للاشلاء والتحمير: استمتع بصحبة اسماك القرش الاليفة على راي مينا...مبارك تور: سكة اللي يروح ما يرجعش...
كده يعني...اتوصى بينا يا جاااااااااااااابر


wanted



Wednesday, 30 July 2008

ياللي مش عامل مدونة اعمل..لجل عيون ضحايا العبارة

اللي حصل ان الاستاذ المحامي ياسر فتحي صرح في المؤتمر النهاردة انه عنده مستندات بتؤكد ان ممدوح اسماعيل وزع رشاوي على الفضائيات والصحف وفيه كتير منهم قبلوا ما عدا الشرفاء وهم قليل والكلام ده كلامه..اظن انا منزلة ده في الفيديو، المهم الاستاذ ياسر قال ان فيه مستندات كتير حب ينشرها في الفضائيات وهم رفضوا
انا كنت دخلت متأخر احمد عبد الفتاح قال لي اني قبل ما ادخل الاستاذ ياسر فتحي قال: احنا ح نعمل حملة على النت ح يقوم بيها المدونين. لما رحت سألته بعد المؤتمر مين المدونين اللي اتفقتوا معاهم قال لي: احنا بندور عليكوا
يعني الراجل اتكلم بثقة اننا ح ناخد الحملة على عاتقنا من قبل ما يلاقينا ولا حتى يكلم حد فينا
متهيالي دي ثقة كبيرة المفروض نبقى قدها، وزي ما قلنا التدوين ده مش رتبة ولا شغلانة اي حد يقدر يبقى مدون، عشان كده باقول لاي مواطن محروق على بتوع العبارة ومش عارف يعمل ايه يعمل مدونة ويشارك في الحملة
الاستاذ فتحي اداني انا واحمد نمرة الاستاذة سمر عشان ننسق معاها، ما اعرفش بصراحة ننسق معاها ايه؟ بس انا ح اتصل بيها عشان لو عندها مستندات من اللي الاعلام رفض ينشره ناخدها وننزلها ونوزعها على المدونات ولو وصلت لاخبار ح اقول لكوا
لحد كده اللي بيسأل نعمل حملة ازاي؟ هي محتاجة فكاكة؟ هو احنا كنا بنعمل ايه قبل كده؟
فيه شقين في القضية
المقتولين والمفقودين، النهاردة الاستاذ ياسر فتحي قال: بالنسبة للمفقودين..انا عايز اقول لهم حاجة ..الشركة لما بتقول لهم ولادكوا ح يرجعوا بعد ما القضية تخلص فهي بتضحك عليهم..الولاد مش ح يرجعوا لانهم عارفين ان لو الولاد رجعوا ح نفتح القضية تاني
واحد من اللي قاعدين من اهالي المفقودين قال: يعني نسيب ولادنا
فطلب منهم انهم يعملوا له توكيل لان فيه كتير يتعمل في قضية المفقودين
احنا ح ننشر صور المفقودين والقتلى وفيديوها على قد ما نقدر وح اتصل بسمر واشوف ممكن نعمل ايه واقول لكوا
طبعا مش ممكن انشر نمرتها على النت...بس نوزعها على بعض حبي كده على الميل او بالتليفون

ده فيديو لاحد اهالي الضحايا...مراته وعياله الاربعة

وده واحد بيقول لنا ليه هو ما اخدش عزا ابوه: اذا كان ممدوح اسماعيل بريء يبقى اهالينا هم المجرمين..ناخد عزاهم ليه بقى

وهو هو نفس الشخص بيتكلم تاني..ابوه اللي راح..وبيتكلم عن اتحاد رأس المال مع السلطة..راجل صعيدي خلوه يتكلم في السياسة...خلوا كل الناس تبقى بتتكلم في السياسة

على رأي ماجدة الرومي: شو خصنا بالسياسة
النظام ده غبي؟ بيعمل للناس وعي سياسي غصب عنهم؟
الناس قلبها محروق

عمالين يقولوا لهم اخدتوا تلتميت الف جنيه ومش مصدقين ان الناس الفقرا دي مش مبهورة بالتلتميت الف جنيه...فاكرين ان ولادهم رخاص عندهم زي ما هم رخاص عند الحكومة

وتاني ح ننزل كلام الاستاذ ياسر فتحي عشان هو موضع حاجات كتير
اول فيديو

وتاني فيديو

وتالت فيديو


ورابع فيديو

اظن هم بس
واي جديد ح اقول لكوا عليه وبرضه احمد عبد الفتاح ح يبقى متابع
النكتة بقى اني لما رحت للاستاذ ياسر فتحي قلت له: استاذ ياسر انا نوارة جبهة التهييس الشعبية واحمد ياللالي..الراجل بص لنا كده وهو مستغرب من الاسامي :) امال لو عرف ان فيه مدونة اسمها شبشب بصباع ومدونة اسمها الزرافة الحسودة ح يعمل ايه؟
-----------
حاجة كمان...بما ان كل يوم نظرية المؤامرة بتثبت واقعيتها وكل مرة اقول لنفسي يا بت ما تبقيش شكاكة كده وفي الاخر تطلع الدنيا فعلا مؤامرة ويطلع شكوكي في محلها لحد ما ح اتجنن زي ميل جيبسون في فيلم كونسبيرسي ثيوري...فاهتمامنا الشديد جدا بالعبارة، وحملة التشهير...وباكرر التشهير على ممدوح اسماعيل لحد ما يندم انه اتولد واللي اتعمل في اسلام نبيه مش ح ييجي نص اللي ح يتعمل في ممدوح اسماعيل ان شاء الله، ده كله ما يعنيش اننا ننسى الاسير المصري اياد ابو حسنة

هم قبضوا على شباب ستة ابريل بعد ما عرفنا اننا لنا اسير في اسرائيل وبعدين طلعوا الحكم في نفس يوم ماتش الاهلي والزمالك وعارفين وقع الحكم ده...كل ده ممكن يبقى له علاقة بانهم عايزين يشتتونا عن اياد ابو حسنة لان طبعا دي اسرائيل وما ينفعش نزعل اسرائيل..يموت الف والقاتل يهرب في ستين داهية بس ما نتخانقش مع اسرائيل
على اي حال...اي حد كلامي مش ح يعجبه براحته، بس افتكروا ان جناني طلع صح في حاجات قبل كده..ما علينا..اياد ابو حسنة اسير مصري في اسرائيل ومش لازم يتنسي..بعيدا عن نظرية المؤامرة دي مسألة مبدأ

على فكرة يا حكومة وسخة
احنا لينا خمسين نفس
ميت نفس
مليون نفس
تمانين مليون نفس بتعداد المصريين
ويا احنا يا انتي

مؤتمر صحفي للتضامن مع اهالي ضحايا العبارة

النت بتتغابى عليا وفجأة لقيت الويرلس متشال من اللاب توب من غير ما اجي ناحيته...وبما انه لينكس فانا مش عارفة اتصرف ازاي
المهم انا جيت نمت ومش عايزة اسمع حد يقول لي: هو انت كل ما تروحوا مشوار لحد المطبخ ترجعي تنامي؟
انا عارفة انكوا عايزين تقولوا كده
الفيديوهات اللي قدرت احملها اهي







ولما ارجع من الشغل نبقى نتكلم بالتفصيل بس اهم حاجة ان المدونين كلهم بلا استثناء مطالبين بحملة شعوذات مع اهالي العبارة...فاكرين اسلام نبيه؟ اهو عايزين حاجة اشد
محامي الاستاذ ياسر فتحي هو اللي طلب مننا بنفسه
اظن ما يصحش محامي الضحايا يطلب المدونين بالاسم واحنا نتأخر
شوفوا كل مدون ح يعمل ايه...زن...بوستات...بانرات...فيديوهات تتعاد وتتزاد عايزين حملة ولعة
على الاقل عشان نبقى قد الثقة اللي المحامي ياسر فتحي منحها لنا
ويمكن فعلا نقدر نعمل لهم حاجة مش بس كده
ده اللي ما عندوش مدونة يعمل مدونة عشان يشارك في الحملة
ارجوكوا...دي اهم قضية عندنا دلوقت...مافيش مصيبة توازي المصيبة اللي احنا فيها دي
فيه فيديوهات مع اهالي الضحايا يارب اعرف احملها في ظل النتي الملعبكة دي
هو الويرلس فين يا مالك؟

امي كاتبة مقال مكيفني قوي

بما اني كاتب المحكمة فهي بتمليني المقال على الكمبيوتر لانها مش بتعرف تستخدم الموبايل
المهم وهي بتمليني المقال ده ابديت اعجابي الشديد واستكنياصي المتشنقط منه جدا قوووووم قلت لها ما تسيبك من الجرانيل واسمحي لي انشره على المدونة...اتنططت عليا شوية وقالت لي لا استني لو عايزة لما يتنشر في الجرنال...طبعا ماحدش ح ينشر مقال زي ده ابدا...يعني هو ح يعجبني ليه؟ انا من امتى بيعجبني حاجات قابلة للنشر في الجرايد؟
المهم اخيرا بقى بعد الحاح واصرار مني سمحت لي امي انشر المقال ده:

كفى: خالد الإسلامبولي ليس مجرما


بقلم: صافي ناز كاظم


عجيب والله أمر المطففين، الذين إذا اكتالوا على الناس يستوفون، وإذا كالوهم أو وزنوهم يخسرون.

لا أريد أن أدخل في سجال حول الرئيس المصري الراحل محمد أنور السادات، وإنني أعطي الحرية كاملة لمن يراه بطل الأبطال وما إلى ذلك. لكن ليس من العدل، على الإطلاق، نعت خالد الإسلامبولي بالمجرم، وإلا يكون من حقنا نعت السادات بالصفة ذاتها لأنه "قاتل" الوزير أمين عثمان في 6/1/1946. وإذا كان أنور السادات قد افتخر كثيرا بأنه قاتل أمين عثمان، وكانت فلسفته في ضرورة الاغتيال السياسي لمن رآهم "خونة"، ومن ذلك مشاركته عام 1945 في محاولة اغتيال الزعيم السياسي مصطفى النحاس باشا، واعتبر نشاطه في مؤامرات الاغتيال السياسي من سجل كفاحه الوطني، فلماذا لا يحق لنا أن نرى خالد الإسلامبولي من هذا المنظور نفسه.

لا أناقش هنا الصواب والخطأ، إنني أناقش هذا النهش غير العادل لشاب مصري أخذته الحماسة الوطنية، وكان عمره 24 سنة فقط لا غير، لكي يقتل السادات متصورا أنه بذلك يخلص وطنه من حليف للصهاينة لم يكف عن احتضانهم وتقبيلهم وإعلان موالاته الكاملة لهم، في الوقت الذي كشر فيه عن أنيابه بوجه مجموعة من أشرف وأفضل أبناء مصر، من مختلف التيارات والتوجهات والأحزاب، وفي ضربة غاشمة ألقاهم، 3/9/1981، جميعا وراء القضبان بلا جريرة ومن دون أي تهمة متذرعا بأنه يتحفظ عليهم حتى ينتهي من عمل ما يريد عمله. ولم نفهم حتى الآن، إذا كان ما أراد عمله هو من خير البلاد، فما هي الحاجة التي دفعته لتكبيل كل هؤلاء، الذين رأى أن من الأفضل إزاحتهم من طريقه؟

لقد كنت واحدة من الذين تم ترويعهم، بالقبض عليهم، قبل الفجر، 3/9/1981، ورأيت في طريقي إلى السجن عمائم الشيوخ والقساوسة تساق إلى الإهانة والبهتان، وعرفت حجم الضربة، التي لم تعتق من تجاوز السبعين من عمره ومن لم يبلغ الخامسة عشر، والجميع في ذهول يتساءل: ماهي الحكاية وماهو مداها؟ هذا الترويع كان يخضع لكل الاحتمالات حتى أننا تصورنا، مع تشديد الإجراءات والتكدير داخل المعتقلات، أنه كان من الممكن أن نقتل جميعا في مذبحة لا تقل في وحشيتها عن مذبحة القلعة التي ارتكبها محمد علي ضد الأمراء المصريين في مطلع القرن 19، تلك المذبحة التي تجد الآن من يطلق عليها “الجريمة الرائعة"!

في ظل ذلك الطقس من 3/9/1981 حتى 6/10/1981، وعلى مدى 33 يوما من الخوف والهلع والترويع والكوابيس، لم يكف السادات عن لغة الشتائم والسباب يقذف بها أسراه ويهددهم بالويل والثبور، فهذا المثقف الأديب والسياسي الجليل فتحي رضوان يقول عنه السادات أنه بلغ السبعين وصار مخرفا، وهذا الشيخ المحلاوي الذي لم يملك إلا منبرا في مسجد، رآه السادات "مرمي زي الكلب"...إلخ...إلخ. كل هذا الاستفزاز، كل هذا الغل والتشفي والتجاوز، كان التحضير لما لم نعلمه...أفلم يكن كافيا ليحرك في نفس شاب مثل خالد الإسلامبولي الحماسة للدفاع عن المظلومين وراء القضبان ليحررهم من قبضة الغول الهيستيرية المتوعد لحرقهم أحياء؟

قد يرى البعض أن خالد الإسلامبولي قد أخطأ، فليكن إذن، قولوا أخطأ، لكنه عندما أقدم على فعلته كانت نيته الخير وتحرير المظلومين من قبضة جبار معتد أثيم، ولم يكن قاصدا ارتكاب "جريمة".

ولنتذكر أن خالد الإسلامبولي مصري، مثلما يرون السادات مصريا، وإهانته: إهانة للمصريين الذين أحبوه وترحموا عليه وهم كثر.

ولنتذكر كذلك أن خالد الإسلامبولي تقبل راضيا القصاص بتنفيذ حكم الإعدام فيه 16/4/1982 ومع أربعة من إخوانه، بينما ظل أنور السادات هاربا حرا طليقا فالتا من العقوبة بعد قتله أمين عثمان ومحاولته اغتيال مصطفى النحاس باشا، حتى قدر الله له نهايته تلك المعروفة، ولعلها كانت من رحمته، سبحانه، حتى يلقاه السادات مسددا مديونيته.


Tuesday, 29 July 2008

نسمع رأي العلم بقى شوية

الله اكبر..ويمكرون ويمكر الله

الخبر ده اهداء لحملة نحكم عقلنا ونتشقلط كلنا
هع هع هع
موظف بسيط...بس بالصلاة ع النبي...وربنا يديكي الصحة يا غزالة...غزالة بس واضح ان جوزها طور
كركركركركركركرررررررررررررر

عاجل عاجل عاجل: نقدر نساعد بتوع العبارة

الحمد لله يا ربي ربنا يخليك يا احمد انت وواحدة مصرية الهي ربنا يفرجها عليكوا ويريح قلوبكوا زي ما ريحتوني وانا قاعدة اهري واكل في نفسي
احمد شقير دخل ساب لي التعليق ده:

نوارة بخصوص فكرة رامز

الناشطة واحدة مصرية عندها رد على سؤالك كاتبة فيه

دعوة عاجلة للمدونيين

للحضور والمشاركة



أسر ضحايا العبارة السلام 98 وهيئة الدفاع عنهم يقيمون مؤتمر صحفي بمناسبة صدور الحكم في القضية يوم الأربعاء الموافق 30 يوليو الساعة 11 صباحا بمقر نقابة الصحفيين لإعلان موقفهم من الحكم والإجراءات القانونية والسياسية التي سيتخذونها في مواجهة حكم البراءة والإعلان عن عدد من الحقائق الفاضحة لخطأ الحكم ولكشف حجم الكارثة والفساد المحيط بها ، ويحضر المؤتمر الصحفي عدد من قيادات العمل الوطني والقيادات السياسية المصرية وسيتم الإعلان عن تأسيس " جبهة محاربة الفساد في قضية العبارة

ان شاء الله انا رايحة من بدري
مين جاي معايا

انا متنكدة قوي

لا لا لا لا لا
انا مش عارفة اتجاوز...مش عارفة انشغل بحاجة تانية...مش عارفة انام ولا عارفة ابطل افكر
براءة ممدوح اسماعيل
اهو اهو..وانا باكتب الكلمة دي حاسة كأن نمل بيجري في عروقي من الغيظ
صورة الاهالي وهي بتتمرمغ في الارض مش عايز تروح من بالي
طيب زي ما رامز قال احنا فعلا نحاول نوصل لاهالي الضحايا ونسجل معاهم وننشر التسجيلات دي
انا ان شاء الله ح اتصل بحد يوصلني بيهم ولو عرفت اوصل لهم ح اقول لكوا ولو حد عرف يوصل لهم قبلي يقول لي متهيالي الوصول لهم مش صعب
انا ما بانامش
كنت متخيلة ان الموضوع ح نتكلم فيه وح يعدي بس انا مش عارفة اعديه
كل حاجة بتعدي في مصر...حتى القفا اللي اخدناه يوم خمسة مايو عدا واتعاملنا
بس انا لحد دلوقت مش قادرة اتجاوز ولا عارفة انام ولا افكر ولا حتى اغير الموضوع كل ماحد يكلمني في حاجة احول الموضوع على العبارة زي الولية الزنانة اللي بتاكل دماغ جوزها بنفس الموضوع كل يوم
ما اكدبش عليكوا انا عايزة اعمل حاجة عشان على الاقل اريح نفسي
مش عارفة ارتاح

فيلم اعدام اكبر مهلفط في تاريخ العرب

افندينا كتر خيره نزل فيلم اعدام الفرعون اللي قايمة الدنيا عليه وما قعدتش
والله انا شفت الفيلم ولقيته مافيهوش اي شتيمة لانور السادات خالص، الفيلم فنيا حلو وشيق، ثانيا هو فيلم تسجيلي جايب كل الاطراف وجايب الرأي اللي بيتكلم عن ايجابياته والراي اللي بيتكلم عن سلبياته فيلم تسجيلي تقريري عادي جدا ومعمول حلو فعلا، وجايب كمان جيهان السادات
يعني حتى مافيش داعي للكلام عن انه انتاج خاص وان ايران منعت عرضه في دور السيما وانه اتعرض في مهرجان الفيلم عادي عادي
ده جايب فؤاد علام يعني فيه اكتر من كده
طبعا الحكومة المصرية خايفة من الفيلم لان بالمفتشر كده حسني خايف يحصل سلفه خصوصا انه عارف ان كل الناس بتكرهه وخايف الفيلم ده يطقق الفكرة في دماغ اي حد وتتجدد في راسه
الفيلم لا بيدين ولا بيؤيد...وكلمة فرعون مش شتيمة هو نفسه السادات كان بيمسك عصا فرعون
فرعون يعني ملك مصر ايه الشتيمة في كده؟ ومش احمد برادة لما كسب البطولة قالوا عليه الفرعون المصري برادة ابن النيل العصري برادة؟
والنبي ومن نبى النبي نبي حد منصف يشوف الفيلم ويقول لي ايه الاساءة اللي للسادات في الفيلم ده
طبعا حسني ما بيحبش السادات حسني زي ما قلنا خايف
طيب انا احب اطمن سيادة السيد الرئيس: اللي قتل السادات رجالة صعايدة وجيش
ايام ما كان عندنا رجالة قبل ما يلبسوا بنطلون ساقط وما يعرفوش يقولوا صباح الخير من غير ما يبلبعوا قرص فياجرا
وايام ما كان عندنا صعايدة قبل ما يبقى الصعيد معمول للسوياحة والمخضروات
وايام ما كان عندنا جيش قبل مناورات النجم الساقط وقبل ما الجيش ينزل للفلاحين عشان يخوفهم ويطردهم من ارضهم
يبقى ايه بقى؟ فيه ايه؟ خايف ليه يا سونة ما الدار امان
اما بالنوسبة للي بيحبوا الرئيس السادات وبيقولوا ان الفيلم فيه اساءات للرئيس الراحل
فوالله الفيلم بيقول حقائق وحقائق على لسان الرئيس الراحل: شتايم وسب ولعن وهلفطة وتخريف ما بعده تخريف الحقيقة كان المفروض يسموه اعدام خريج السرايا الصفرا وصباعه وهو بيحذر شعب بحاله - شوفوا الخطبة: والمصحف حسني لو اتجرأ واتكلم معانا كده كل المتخلفين اللي بيدافعوا عن السادات ح يعملوا له فضحية بجلاجل - واعتقالات وانفشاخ اقتصادي وسلام وسخ مع اسرائيل بندفع تمنه لغاية النهاردة وملبسين حسني كل الليلة والحقيقة وانصافا واحقاقا للحق حسني مش مسئول لوحده عن الاحوال المعيشية المتردية والجيش اللي مشروط ان ماحدش يسلحه ولا يدربه غير امريكا هو بينفذ معاهدة السلام اللي وقعها السادات..بينفذها بذمة صحيح، بس هو مش شخص مبتكر يعني والفيلم بيذكر حقيقة ان كارتر وبيجن قالوا للسادات لو اترشحت في امريكا او اسرائيل ح تكسب...طب ده ذنب الفيلم يعني؟ الكلام ده حصل وللا ما حصلش؟ واكتر منه كمان.
طيب اذا اللي بيحبوا السادات بيعتبروا ان عرض خطبه والتأريخ لفترة حكمه اساءة له
ههههههههههههه
يبقى مش عارفة اقول ايه؟ اذا كان هو نفسه شتيمة لنفسه طب احنا نعمل له ايه؟
كل اللي خوف الحكومة..لا هو خوف حسني بالتحديد، ان اجراءات التحضير للاغتيال متمثلة في الفيلم
وجايبين واحد شبه خالد شوية بس خالد احلى...بس اسم الله عليهم بصراحة صنف منقرض صحيح
احنا ارجل ناس عندنا بينزلوا يهيصوا للاهلي في يوم براءة ممدوح سماعين
قال وخايفين على ممدوح سماعين يتقتل قال...طب غرقوا وشي تفافة ان حد داس له على طرف
هي جات عليه؟
المهم الفيلم اهو انا عرضت النسخة التانية اللي على اليوتيوب على امل انها ما تبقاش ناقصة بس للاسف الحتة الاخيرة ناقصة اللي يعرف يجيبها لنا بقى

ده الجزء الاول

ده الجزء التاني

ده الجزء التالت

ده الجزء الرابع

ده الجزء الخامس

ده الجزء السادس

ده الجزء السابع

ده الجزء التامن

وده
مين علمك يا فتى لعب العصا ع الخيل
وازاي قطفت القمر من فوق شواشي الليل
وطبعت نجم السما بالوشم على زندك
الاسم خالد ولكن عاشق ولك هندك
ام الدلال علمك طبع الاسود عندك
مين علمك يا فتى عشق الملاح والميل

اوسخ حاجة بقى موقف بعض اليساريين دلوقت اللي انا فاكرة كويس قوي انهم - ومنهم ناس في الفيلم - كانوا بيتوافدوا افواجا على بيت ام خالد الاسلامبولي ويبوسوا ايدها وكانوا مسمينها ام الشهيد
وفاكرة اني بعدها - كنت صغيرة طبعا بس فاكرة كويس - رحت حفلة في التجمع وكان زحمة قوي وفيه كل الشخصيات اليسارية وكلهم...كلهم..كللللللللللللهم هتفوا بصوت مدوي: تحية للشهيد خالد الاسلامبولييييييييييي
عشان كلهم ما كانوش ح يخرجوا من السجن لولاه

ايه بقى الوش بتاع التؤ تؤ تؤ تؤ نؤ نؤ نؤ نؤ الاغتيالات السياسية كخ اخ تف بخ ده؟
يعني اذا ما كانش الناس اللي كانوا بيتكلموا كده سامعاهم بودني اللي ح ياكلها الدود وهم بيقولوا الشهيد خالد الاسلامبولي ورايحين لام الشهيد...خدوني معاكوا لام الشهيد وفيلم هندي طويل ومش عايزة اقول مين اللي راحوا لام الشهيد في البيت لان فيه منهم ناس في دار الحق دلوقت بس من فطاحل اليسار وناس لسة عايشين ومن كبار منظرين اليسار والعجيبة بيشتموا دلوقت في خالد وبيقولوا ان مش عارفة قال السادات غذى الجماعات الاسلامية قام حفر قبره بايده والكلام الخرا اللي عمالين يشخوه في دماغ عيال من جيلي واصغر مني وراخرين التانيين عمالين بيبغبغوه وراهم من غير ما يفكروا خالص
يا عيني... كنتوا تيجوا تشوفوهم وهم بيحضنوا ام خالد الاسلامبولي ويبوسوا ايدها ويعيطوا ونسوانهم بيحطوا طرحة على شعرهم عشان ح يقابلوا ام خالد..والله العظيم تلاتة..ده انا من بختي وحظي اني شفتهم في الموقف ده
وبلاش اسامي ربنا حليم ستار
عجايب
شوفوا الفيلم بقى

ابنييييييييييييييي ابنيييييييييييييييييييييييي

"الهي ابنه يتحط مكانه...الهي ابنه يتحط مكانه..ابنييييييييييييييييي"
دي ام ابنها راح في العبارة
وده الفيديو

ارجو من المدونين تعميم الفيديو ده عشان اللي ماعندوش دم يستلف شوية من الجيران
الفيديو اخدته من مدونة خلي ضفايرك ضليلة

قضاء مصر النزيه العظيم العادل المعظم المبارك هاي هئ

وبيتعمل له حساب اكتر ما بيتعمل لربنا...ناس بتكفر بربنا ومش بتتحبس واللي يعلق او يعقب او يعترض او يشكك في احكام القضاء يبقى مجرم اثيم وقاتل لئيم
ايه بقى الحكاية دي؟ ناس بتقول ليه كده يا رب ويجبره الاستغفار وماحدش يقدر يقول ليه كده يا قضاء ولو قال ما يجبروش الا الحبس
انا فتحت دلوقت التلفزيون وشفت محامي ممدوح سماعين وعرفته لوحدي شكله باين عليه انه محامي لواحد زي مندوه سمحون ولابس باروكة وبيتفتف
وبيغمز بعينه وبيقول: كل واحد عارف هو جاي هنا ليه؟
هو جاي هنا ليه؟

Monday, 28 July 2008

بخصوص براءة ممدوح سماعين


ح نعمل ايه؟
الحمد لله بتوع ستة ابريل اخدوا اخلاء سبيل اهو خلصنا من حتة
طب بالنوسبة لبراءة ممدوح سماعين ح نسكت؟ ح نسكت؟ يعني ينفع نعمل ايه..قانونا..حد محامي هنا يقول لنا احنا كمواطنين ينفع مثلا نتقدم ببلاغ للنائب العام، نرفع قضية، وللا ح نفضل نرقع بالصوت كده وخلاص
الا دي ده دم ناس
انا عايزة اعرف مين ممدوح سماعين ده اللي يطبخ له محاضر مخصوص
ويخرج من البلد بالطريقة دي
ويقبض التأمين على العبارة وهو لسة متهم
وتتحول له القضية من جناية لجنحة - ملحوظة مش النائب العام اللي حولها انا اسفتسرت - وفي اول ما العبارة تغرق الموظفين الناجين يطلعوا على الميكروباص ويتصوروا وبعدين يختفوا تماما
وقبطان العبارة بعد ما ينجو يختفي
ويتعمل ماتشات مخصوص عشان الناس تتلهي يوم اصدار الحكم

فيه ايه؟ ايه فيلم الاكشن ده...ده ولا فيلم واحد من الناس
مين ممدوح سماعين ده؟ ايه يعني اتخن من مين يعني عشان يبقى فوق الناس والقانون والدنيا كلها
ده ح يرجع مصر
ح يرجع مصر
احنا ح نسكت؟
حد محامي يكلمني ويقول لي نقدر نعمل ايه؟
امبارح مينا قال لي في الجنح والجنايات لازم يبقى لنا صفة قانونية عشان نتدخل
الكلام ده صحيح وللا مينا بيسرح بيا؟
طب ايه؟ هي الدنيا اسودت كده ليه...احنا ح نلاحق على ايه وللا ايه؟

اهلي ايه اللي بتزيطوا له في الشارع يا شعب وسخ

دي اول مرة اشتم الشعب المصري حتى انا فعلا مستغربة نفسي ومتضايقة من نفسي بس فعلا انا اتخنقت
تصدقوا بلا اله الا الله احنا شعب ما عندوش نقطة من الاحمر...نازلين النهاردة والاخبار الخرا عمالة ترف على دماغنا والناس النهاردة بعد ما سمعت الحكم اتمرمغت في الارض نازلين بعد ماتش الاهلي والزمالك يهيصوا ويزيطوا بالميات في الشارع ومظاهرات عشان الاهلي
ما نحترم نفسنا بقى ده احنا ناس وسخة فعلا ايه الخرا ده؟
فعلا احنا ناس مش محترمين بقى
من فترة مينا كان بيقول لي - تعليقا على احداث خناقات العرب مع الدير -: يعني الاقباط بروح امهم اهو عرفوا ينزلوا عشرتلاف واحد ويقولوا حسني مبارك يا طيار قلب القبطي مولع نار وساعة التعديلات الدستورية وللا ازمة العيش وللا القفا اللي اخدناه يوم خمسة مايو ماحدش شاف خلقتهم
طب يا مينا...يا فتحي...يا زرمبيح
اللي نزلوا النهاردة بالالفات يهبلوا في الشارع عشان الاهلي كانوا مسلمين ومسيحيين
ماحدش ح يحملهم فوق طاقتهم - اللي انا مش فاهمة هي ما بتتحملش حاجة خالص كده ليه - ويقول لهم انزلوا الشارع اعترضوا
بس على الاقل على الاقل والناس قلوبها محروقة على قتلاها يقاطعوا الماتش
بلاش يقاطعوا الماتش
يحطوا في عينيهم حصوة ملح وما يهيصوش الهيصة دي كلها مش كفاية الناس كانت لسة ميتة ونزلوا يهيصوا في الشارع عشان كاس افريقيا
وقلنا معلش كاس افريقيا
لكن ده الاهلي والزمالك...ودايما الاهلي بيغلب الزمالك ايه الجديد الفظيع يعني اللي يخليهم بسماجة وسخافة وغباوة ووساخة وقلة ادب ينزلوا يهيصوا وممدوح اسماعيل واخد براءة الصبح
ماحدش يقول لي ما يعرفوش دي عالم وسخة فعلا
دول الف بني ادم يا بني ادمين
الف بني ادم ماتوا في ست ساعات يا اوساخ يا بهايم
الالف دول ماتوا في لبنان في تلاتة وتلاتين يوم وكان تمن دمهم غالي قوي
احنا الف مننا ماتوا في ست ساعات وراحوا وكأنهم شوية دبان اترشوا مش بس كده
ده القبطان اللي حافظ على حياة اللي كانوا معاه في العبارة اتعاقب عشان حافظ على حياة الناس اللي معاه
يا ولاد الكلب فيه ايه؟ فيه ايه؟ كورة ايه في نهاركوا الخرا ده انا قرفت
قرفت
اول مرة احس اني قرفت
اول مرة ما الاقيش للناس عذر في الخرا اللي عملوه النهاردة
حد نزل الشارع بعد الماتش؟
هو احنا خلاص؟ اخدنا على الذل؟
ايه؟ ايه؟ مالكوش اهل بيركبوا عبارات طيارات اتوبيسات توكتوكات؟ مش خايفين من ربنا؟ مافيش حتى حساسية؟ ده الناس زمان لما كان بيبقى جارهم عنده حالة وفاة كانت لو عندهم فرح بيأجلوه مراعاة لمشاعر جيرانهم اللي في الشارع اللي بعد اللي بعديهم
احنا الف واحد راحوا واهاليهم قلوبهم محروقة والبلد كلها ماعندهاش دم؟
اتفو

Sunday, 27 July 2008

النائب العام يطعن في حكم براءة صاحب العبارة

هو النائب العام راجل عترة وللا حاجة؟
طعن في براءة ممدوح اسماعيل وطعن قبل كده في براءة صاحب هايديلينا
يارب يا معين
نووووور في اخر النفق

الحقوا الحقوا الحقوا الحقوا دار الافتاااااااااااااء

الواحد يقول الحق وانا عارفة ان فيه ناس ح تتصيد في الفقرة الاخيرة بس الفقرة الاخير بتقول اللي مفروض مش اللي حاصل بجد لان اللي حاصل بجد جنان رسمي
حيث ان الفقرة الاخيرة بتقول يقول تغيير الدستور برضاء الناس واجماعهم من خلال الاقتراع
ييجي واحد يقول لي اهو سايب ثغرة
لا مش سايب ثغرة لانه بيشترط الانتخاب الحر المباشر

بس والله المواطن اللي تقدم بالسؤال وورط دار الافتاء في الفتوى دي بميت راجل:

فتوي لدار الإفتاء: الإسلام لا يجيز توريث الحكم

كتبت ـ الشيماء عبداللطيف:

رداً علي طلب مجمع البحوث الإسلامية الذي قدمه لدار الإفتاء حول مشروعية توريث الحكم في مصر، أكدت أمانة الفتوي برئاسة الدكتور علي جمعة ـ مفتي الجمهورية ـ أن الفقه الإسلامي لا يجيز توريث الحكم لأنه لا يجري في إمامة المسلمين، كما أن الفقه الإسلامي لا يمنع من تولية العهد الذي هو عبارة عن اختيار الحاكم لمن يخلفه وهذا كله بلا خلاف بين العلماء، وجاء ذلك في الفتوي الشرعية التي أصدرتها دار الإفتاء المصرية حول قضية توريث الحكم في الإسلام ومدي إمكانية تطبيق ذلك في مصر، وذلك رداً علي طلب فتوي تقدم به أحد المواطنين لمجمع البحوث الإسلامية، وتم إحالته لدار الإفتاء للاختصاص بناء علي توصية لجنة البحوث الفقهية بجلستها الثانية والعشرين في دورتها الرابعة والأربعين والتي عقدت 9 أبريل 2008، كما أوضحت الفتوي أنه إذا كان نظام الحكم جمهورياً ديمقراطياً، كما في الديار المصرية فإن المنظم لهذا الشأن يكون هو ما قرره دستور البلاد الذي اتفقت عليه كلمة المصريين والذي لا يخالف الشريعة الإسلامية، والذي نص في مادته رقم 76 علي أن ينتخب رئيس الجمهورية عن طريق الاقتراع السري العام المباشر، وعليه فإن النظام المتفق عليه بين المصريين لا يجيز توريث الحكم ولا تولية العهد.

كما أشارت الفتوي إلي أن الفقه الإسلامي وإن أجاز تولية العهد من بين بدائل كثيرة في طرق تولي الحكم إلا أنه لم يلزم بها ولم يلتزمها، كما أن الشرع لا يفرض نظاماً معيناً لصورة الحكم سواء كانت هذه الصورة ملكية أو جمهورية أو أي نظام آخر يتفق عليه الناس ويحقق مصالحهم العليا، كما أنه لا يمنع الانتقال من نظام إلي آخر إذا ارتضي الشعب ذلك واجتمعت عليه كلمتهم، وأن انتخاب الشعب لأي شخص توافرت فيه الشروط الدستورية التي تم الاجماع عليها جائز شرعاً ووضعاً.

وانتهت الفتوي بالقول بإن من أراد أن يغير النظام والدستور الذي اتفق عليه الناس فعليه أن يسلك الطرق المشروعة للوصول إلي اتفاق آخر يتحول إليه المصريون باتفاق مشروع تترتب عليه آثاره، وأن الشرع لا يمنع من تغيير الدستور إذا ارتأت الجماعة المصرية ذلك واتخذت الإجراءات المرعية في سبيل تغييره.


زمن

من عند كبر دماغك

يوسف شاهين مات

ارتاح
عقبالي

يلعن ابو اشكالكوا يا ولاد الوسخة



انتوا عايزين مننا ايه؟ عايزين مننا ايه يا ولاد الكلب
قاموس الشتايم كله مافيهوش جملة توصفكوا، نجيب سرور لو عايش ح يحتار فيكوا
اعمل ايه يا ربي
اعمل ايه؟
هاني سرور اخد براءة في عز هوجة ستة ابريل
وابن الكلب بتاع العبارة اخد براءة في عز ما انتوا قابضين على عيال كل جريمتهم انهم رافعين علم مصر
انتوا بتكرهونا في البلد ليه؟
بتكرهونا في عيشتنا ليه؟
بتكفروا الناس ليه؟
انتوا عايزين ايه؟
سرقة وبتسرقوا وماحدش بيهوب ناحيتكوا
ضرايب وقلبتونا وقلعتونا ملط لما بقينا ع الجنط
خدامين امريكا تقول لكوا يمين يمين شمال شمال لما خليتونا فرجة العالم ومنين ما نروح نتعاير بيكوا يا عرة مخاليق ربنا
الشباب وبيرمي نفسه في البحر عشان يطفش من وشكوا
البلد وبعتوها وقبضتوا تمنها
ومطلعين لنا قانون مرور عشان ورقة التوت اللي ساترين بيها عورتنا تلهفوها هي كمان
بتذلونا ليه؟ بتذلونا ليه وتدوا الحيوان براءة عشان تقولوا لنا بالمفتشر: انتوا ما تسووش حاجة
الف انسان منكوا ما يسواش حاجة خالص انتوا شوية صراصير
خلاص عرفنا عرفنا
قلتوا لنا كده يوم ما هاني سرور اخد براءة
وقلتوا لنا كده يوم ما ادتونا على قفانا في علاوة الموظفين
خلاص الضرب في الميت حرام كفاية
كفاية بقى كفاية
نعمل ايه عشان تسيبونا في حالنا؟ بتعملوا فينا كده ليه؟ عايزين مننا ايه؟ انتوا...كنت ح اقول مش خايفين من ربنا؟ انا اسفة انا غبية
انتوا معمولين من ايه؟ بجد ...المادة اللي ربنا خلقكوا منها صنفها ايه بالظبط
ليه كده؟

احنا كده ورانا ستميت حاجة

اولا ح نجيب اسامي المحتجزين بتوع الطيارة الورق من مركز هشام مبارك ونعمل لهم بانرات
يا جاااااااااااااااااابر

ثانيا عايزين نتضامن مع العمال المفصولين للتفاصيل اضغط هنا

ثالثا: يا بتوع حروق اللسان ايها الاخوة المحامييون
الاسرى بتوعنا، اياد ابو حسنة
والنهاردة ندى قصاص بعتت لي تفكرني بعلاء البربري
فاكرينه اللي كان بيشتغل في الكويت وبعد احتلال العراق كان بينقل رايح جاي وبعدين فقد اعصابه من كتر ما شايف الجيش الامريكاني راح دايس فيهم اهو ده ماحدش يعرف هو فين
في العراق؟ الله اعلم، في الجوانتانمو؟ جايز
عايزين نعرف مصيره
معلش ح نتقل على المراكز بتاعتنا احنا عارفين انهم بيجروا ورا الاسرى في الداخل يعني الاتنين دول ما وقعوش من قعر القفة بجملة بقية الاسرى
انا ما عنديش معلومات عن علاء البربري
بس ان حد من المحامين يروح رفح ويسأل عن عيلة ابو حسنة ويعرف تفاصيل دي حاجة سهلة

وعايزين بانرات للحملة دي
يا جاااااااااااااااااااابررررررررررررررر

Saturday, 26 July 2008

سمير القنطار حالا في حوار مفتوح

بيقول كلام رااااااااااااااااااائع وشجاااااااااااااااااااااااع
وضارب الدنيا صارمة ومقطع البطاقة ومش حاسب اي حسابات وكل اللي مؤمن بيه بيقوله بشجاعة
راجل راجل
ينفع نستنسخ منه عشرة عشرين مليون كده؟

هو النظام المصري جاله ذهان؟


طب البوليس وقبض على شباب رافعين علم مصر وبيغنوا اغاني وطنية وقلنا ده البوليس عاتشي...يمكن العيال صوتها وحش وللا بينشزوا او بيغنوا من غير تصريح من نقابة الموسيقيين
لكن النيابة تسكعهم خمستاشر يوم؟
امبارح لما قريت الخبر في الطيارة اول ما وقفت على سلم الطيارة اتصلت بجمال عيد كان تليفونه مشغول اتصلت بمالك ما ردش اتصلت بمينا ما ردش وبعدين اخيرا لقيت جمال عيد، جمال قال لي: يارب ما يكملوش الخمستاشر يوم...قلت له مش عارفة يا جمال...يمكن يكملوها قال لي: لا مش معقول..يعني معقول اتجننوا للدرجة دي
الخبر من الدستور..خبر بيؤكد انهم مش بس اتجننوا دول جالهم ذهان وفصام اضطرابي وفوبيا الاستبحس الهامايوني
تهمة احمد ماهر: التحريض على كراهية النظام وانشاء موقع على الفيس بوك
وده جسم الجريمةطب احمد ماهر بيحرض على كراهية النظام ازاي يعني؟ لاهو انت يا سيادة وكيل النيابة فاكر ان الناس بتحب النظام وهو احمد ماهر اللي جه وقال لهم: ده كخ ...وتف لهم فيه؟
مش مكسوفين من نفسهم؟
سؤال غبي مش كده؟
معلش...مخي لسة ما اشتغلش بسبب هالة الطاقة اللي جيت وجبتها معايا

Friday, 25 July 2008

لبنان الكرامة والشعب العنيد...والمطرقع


وحشتوني يا عيال ويومين عدوا ووحشتني مصر وهدوء مصر وتهييس مصر :) وحشتني كلمة: يا عم احنا مالنا ما تخلينا في اللي احنا فيه...هو ايه اللي احنا فيه؟ ما اعرفش..اي موضوع يوجع الدماغ يبقى احنا مالنا خلينا في اللي احنا فيه
اوادم اللبنانيين والله، من ساعة ما توصل وهم بيبتسموا لك. طريق المطار منطقة انصار حزب الله، طريق المطار صور سماحة السيد، عماد مغنية، بعدها بشوية صور هيفاء وفضل شاكر، بعدين يافطة صفراء مكتوب عليها "لو جاء الكون كله...لن يعود الجنديين الا بالتفاوض غير المباشر والتبادل" وبعدها على طول صورة كبيرة قوي لنانسي عجرم وبعدين صور السيد وعماد مغنية وشهداء المقاومة وبعدين صور ملحم بركات وصابر الرباعي وهلم جرا.
ما اعرفش هم الفقرا هم انصار حزب الله وللا عشان هم انصار حزب الله هم فقرا، بس اكيد اكيد كل "المعترين" بلا استثناء من اول السواق والشيال والبياع الغلبان والجرسون اللي قال لي: الف ليرة متل الجنيه...الجنيه بيعمول شي بمصر؟ كمان الالف ليرة ما بتعمول شي...
كلهم بيحبوا حزب الله والسيد حسن بصرف النظر عن اساميهم طوني او علي: بتحبي السيد؟ يللي بيحب السيد منخدمه بعيونا
مش عارفة ليه الكرم الحاتمي المنار نزلوني في الماريوت، وكنت في نص هدومي...قاعدة في الاودة كأني نايمة على دم الشهدا ومكسوفة اطلب حاجة: ما سوينا شي..انت نورتينا بالمصري..هيدا اقل من الواجب
ظروف المعيشة صعبة كتير...تمانميت دولار ما بيعيشوا اسرة..كل شي غالي
كل حاجة سعرها كام في مصر؟ طب اضربها في اربعة وساعات خمسة وساعات....وااااااو
قميص نوم بالفين دولار...بيعمل ايه قميص النوم ده؟ بيقول ماما وبابا وبيروح المدرسة وبيضرب صواريخ على اسرائيل؟ برضه لو كده مش ح يسوى الفين دولار
قالوا لي جمال مبارك قبل العرس اجا هوني هوى وخديجة...واشتروا اشيا كتيييييير
بس انتوا مش باين عليكوا...شكلكوا بهواتي والالاطة واكلاكوا...يعني فقرا بهوات
يضحكوا: ايه والله...اللبناني لبسه ولا تأكله
سهام حيدرون اتصلت اول ما وصلت الفندق...بعدها بشوية اتصلت زينب رحال: بامرق عليك وبنضهر؟


انا عرفت زينب من الفيس بوك...لحد قبل ما اسافر ما كنتش اعرف انها صاحبة مدونة تأملات تافهة: انت يا ستي عايشة لي في دور عماد مغنية وطالعة لي بكذا شخصية؟ انت مش ع الفيس بوك قلتي لي انك صحفية؟ بتشتغل محاسبة وكان عندها مشاكل في الشغل لاسباب...طائفية واشياء اخرى...الجيب بتاعتها مش قصيرة...مش ضاربة شعرها في الخلاط...ومن برج البراجنة...بس الحمد لله المشاكل اتحلت وربنا نصفها وهي بتحكي لي تراكم المشاكل والاضطهاد اللي مالوش اي معنى لواحدة معاها شاهدتين جامعيتين وكفء وماعملتش اي جريمة وبعدين ربنا بعت لها مدير هندي حل المشاكل ضحكت وقلت لها: انت قريتي عليهم ورد وللا ايه؟ زينب طيبة قوي، لطيفة قوي، ذكية قوي، مثقفة قوي، شخصية مسئولة قوي، مرحة قوي، دمها خفيق قوي
قلبها محروق قوي، متألمة قوي، شايلة الهم قوي تحكي تحكي وابقى مش عايزاها تسكت
رحنا على المنارة، حاجة زي الفنار اللي عندنا في اسكندرية


اليومين اللي كانوا في لبنان كانوا مكثفين قوي ومليانين مشاعر متناقضة كتير وعرفت فيهم معلومات فوق طاقة مخي وفوق طاقة اليومين، عشان كده اول ما رجعت نمت...كان لازم افصل الفيشة
مش عارفة الحالة اللي متلبساني دي ح تفضل على طول وللا ده بس تأثير اليومين وبعدين ارجع زي ما كنت
اول ما رحت لبنان مريت بالمشاعر التالية
الترقب
الصدمة
صدمة جامدة موت
اكتشافات
نوة عياط (عياط بالمصري مش باللبناني)
ازبهلال
سعادة لدرجة البله
رايحة وانا ناوية اسمع كل الاطراف
راجعة وانا لابسة صورة السيد حسن ومش عايزة اشوف خلقة واحد يفتي في المقاومة وهو مش عارف حاجة
اتاريهم يا عيني عمالين يقولوا: انتو ما بتعرفوا شي...نحنا منعرف
تعرفوا ايه؟
.....الشأن اللبناني معقد
ولا معقد ولا حاجة....بس ..بس الكلام ما يتقالش يا ناس...حتى بجحة زيي مش عارفة ح اقوله ازاي
اللبنانيين عاملين كده

وشفت واحد مصري..في المنارة، اول ما بصيت في وشه عرفت انه مصري...زي ما بنعمل دايما بصيت له بفرح قلت له: انت مصري؟ ابتسم وفضل يدلع فينا عشان انا مصرية...وبعدين ابتدينا وصلة الندب اللي دايما نغنيها في كل حتة في العالم
الجرسون المصري بيقول للجرسون اللبناني: حاسب توقع القهوة...وقعها على المصرية تستحمل
انا: اه ما احنا حمالين قسية
الجرسون المصري: ما احنا غلابة...
صعبان علينا نفسنا بالقوي...واحسن حاجة اننا بنتكلم
تيجي تسأل في العلن اللبناني عن اللي واجعه يجاوب اجابة واحدة: الشأن اللبناني معقد
لما تقعد معاهم قعدة صفا ويفضفضوا تعرف ان لهم حق ما يتكلموش، مش عارفة اقول ايه؟ بس ح احكي لكم حدوتة
عويس وجعضيض اخوات وساكنين في شقة واحدة ايجار قديم وارثينها عن المرحوم والدهم، امهم واختهم معاهم. جعضيض تاجر شاطر، بس بيتاجر في كل حاجة، وعويس مش معترض على جعضيض بس: يا عمي تركني لحالي وعمول يللي بدك اياه
لا...يا تعمل زيي يا تبقى عدوي
عويس قال لجعضيض طيب انا ح ادفع ايجار الشقة، وح اخد اودة في الشقة وادفع لك ايجارها كمان من الباطن واقعد فيها مع امي واختي وانت: عمول يللي بدك اياه بباقي البيت
يا تعمل زيي يا تبقى عدوي
جعضيض عامل البيت كراخنة: كيف ما بدك...بس تركني وامك وخيتك لحالنا...
يا تعمل زيي يا تبقى عدوي
الجيران بيطلعوا الكرخانة بتاعة جعضيض وبيقضوا وقت لطيف يسكروا ونسوان وعيشة، وعويس قافل على نفسه وامه واخته الاودة، يسكر واحد من الجيران ويدخل على اودة عويس وامه واخته وراسه والف جزمة قديمة الا ينام مع اخته: طلع طلع
ييجي جعضيض: بتطرد ضيوفي؟ ما كانش العشم يا عويس...لو كان بابا عايش ما كنتش عملت كده
جعضيض ما عندوش مانع الجيران يناموا مع اخته وكمان امه لو ح يدفعوا...ما عندوش مانع؟ لا جعضيض كل ما اخته وامه يلاقوا لقمة حلال يسعى من وراهم عشان يقطع عيشهم ويجبرهم على الحرام
عويس ما يخلصوش...جاب قفل وحطه على باب اودته عشان يحمي امه واخته
كل ليلة جعضيض يسلط الجيران يتحرشوا بعويس ولما عويس يرد يرقع جعضيض بالصوت: شايفين؟ شايفين عويس بتاع مشاكل ازاي؟ كل يوم والتاني عامل لنا خناقة مع جار شكل
الجزار قال لجعضيض: طب وانت ايه اللي جابرك ع الحال ده...طفش امه..لك عليا كل يوم والتاني اخليه فرجة العالم لحد ما يطفش خالص من الحارة ومن البلد كلها
نزل جعضيض على القهوة اللي تحت البيت وقعد يعيط لاهل الحارة: اخويا...ابن امي وابويا...تصوروا واخد اودة من الشقة ومانعني ادخلها وحارمني اشوف امي واختي وبيوقع بيني وبينهم..وكل يوم متخانق مع الجزار وعامل مشاكل مع طوب الارض، وفيه ناس زي حضراتكوا كده طيبين..لكن الجزار كل يوم يطلع يكسر لنا الشقة...طب انا ذنبي ايه؟ اذا كان عويس شكلي وبتاع مشاكل
وعويس راجع من الشغل نداه معلم القهوة: ده اخوك...ابن امك وابوك...بقى تحرم عليه يدخل في ورثه؟ الاودة دي بتاعته زي ماهي بتاعتك...اتقي ربنا
عويس: والنبي يا معلم انت مش عارف حاجة
المعلم: عارف ايه؟
ح يقول ايه عويس؟ ح يقول اخويا بيشتغل في الدعارة؟ عيب...يتفها تنزل في عبه
في يوم جعضيض وواحد من الجيران كسروا القفل اللي على الاودة وداخلين على ام عويس وجعضيض واختهم جري عويس وقعد يقول: انت اتجننت يا جعضيض؟
وجعضيض ابدا مافيش..سكران و..أراب توب عليا
راح عويس قلع الحزام وهوش جعضيض بيه راح جعضيض باطح نفسه في الحيطة وهاتك يا صويت: يا ناس يا عالم اخويا بيضربني..سيح دمي
الناس اتلمت: هي حصلت يا عويس
عويس: كداب..ده هو اللي معور نفسه...هو اللي كسر القفل ودخل
الناس: وايه اللي يخليك تحط قفل على الاودة...البيت ده بيته زي ماهو بيتك بقى عشان كسر قفل تقوم تبطحه وتسيح دمه
عويس: انا اللي بادفع ايجار الشقة وبادفع له كمان ايجار الاودة
الناس: قصدك ايه من الكلام ده؟ عايز تطرد اخوك من الشقة؟ هي حصلت؟
عويس: اقول ايه...يا ناس..يا عالم...اخويا بيسرح نسوان...وعايز يسرح امي واختي، وعشان كده كل الجيران واقفين جنبه عشان بيستفيدوا منه
الناس: تؤ تؤ تؤ تؤ تؤ عيب يا عويس تقول على اخوك شقيقك كده..تتفها تنزل في عبك يا عويس
وطلع عويس هو الغلطان
---
احمد عز بيعمل ايه في البلد؟
طب احمد عز ملاك ينقصه الجناحين مقارنة باللي عرفته عن بتوع اربعتاشر اذار..بالمناسبة كلهم بتوع بزنس... وبزنس من الوسخ قوي...قوي...قوي.. لا لا ..انتو مش عارفين...قويييييييييييي، آه عشان كده المعترين بيحبوا السيد حسن، بدنا نعيش شعار شبه نحكم عقلنا كده
لا نحكم عقلنا؟ ده نحكم عقلنا ده قمر...بدنا نعيش يعني بدنا نشتوغل بالدعارة ونسكر ليل نهار
والكرخانة لازمها جو ملائم للابداع الفني
والمقاومة مش بتوفر الجو الملائم
بس..والله العظيم بس...والله العظيم بس...والله العظيم دي كل حكاية الشأن اللبناني المعقد
ناس عايزة الوطن كرخانة، وناس بتقول طب نقسم البلد نصين، خدوا حتة اعملوها كرخانة وسيبونا احنا برة الكرخانة...لا، يا تعمل زينا يا تبقى عدونا
-------
هنا الضاحية:
بالليل سهام عزمتني انا وبشرى من البحرين على العشا
بشرى ناشطة من البحرين...دمها خفيف قوي، والله حكت لي عن البحرين كلام
الا قولوا لي، هو اوسني عامل ايه؟
يا ترى عامل: مدرسة اوسني السرية لشلل الشعوب العربية؟
رجال الاعمال عاملين ايه في البلد في مصر؟
اهم هم والامراء في البحرين تافين في بق بعض، لدرجة ان فيه واحد من العيلة المالكة بنى سور جوة البحر...البحر بتاع ربنا، بنى فيه سور وقال: الحتة دي بتاعتي...ماحدش يصيد هنا
البياعين اللي بيقعدوا على الرصيف..واحد من العيلة المالكة معدي عليهم لقاهم بيبيعوا قال: ودول قاعدين كده؟ كل واحد عشان يقعد على الرصيف يدفع لي فلوس..ثم..ثم الارض دي بتاعتي بقى...امشوا من هنا
قعدنا في مطعم الضاحية مع سهام وبشرى، سهام ضحوكة وحبوبة وحنونة كأنها ام مع انها صغيرة في السن
جه بعد شوية بسام المذيع اللي المفروض يعمل معانا الحوار عشان يتكلم معانا
مين قال ان اللبنانيين عكس المصريين في كل حاجة؟ فيه حاجات اللبنانيين شبهنا فيها بالمللي
وفيه حاجات هم عكسنا تماما
شبهنا في ايه؟ دايما مبتسمين، كل حاجة يسخروا منها حتى نفسهم، مأفئفين ومتضايقين، دايما متضايقين بس دايما بيضحكوا عشان هم متضايقين، كل حدث مهما كان دامي طالع عليه عشر نكت يوجعوا بطنك من كتر الضحك...يضحكوا ويعيطوا في نفس الوقت (يعيط بالمصري مش باللبناني)
عكسنا في ايه؟ مش صعبان عليهم نفسهم زينا، يمكن بيحملوا نفسهم مسئولية اي حاجة طول الوقت
كل لبناني براسه، الاخبار بتقول ان في لبنان فريقين: فريق سلطة وفريق معارضة
بس اللي شفته ان فيه تلاتة مليون فريق، كل لبنان فريق لحاله على رأيهم
في القعدة الواحدة شخصية كل لبناني بتتغير زي البحر
لما قريت عن عماد مغنية انه كان عايش كذا حياة وكل مرة بوجه مختلف وسلوك مختلف وطبيعة معيشة مختلفة قلت: دي عيشة صعبة قوي..ممكن يكونوا بيبالغوا
بس لما تعرف اللبنانيين تعرف انهم بسهولة ممكن كل واحد فيهم يبقى عماد مغنية
حتى بسام وسهام كده
اللبناني لما بياخد موقف ما بيبقاش ماشي ورا حد...بيبقى ماشي ورا دماغه هو وبس ولو جابوا له ميت دماغ على دماغه مش ح يمشي غير ورا دماغه
اللبناني عمره ما يقول خلينا في اللي احنا فيه، ولا يقول وانا مالي يا عم انت ح توجع دماغي...كل حاجة اللبناني حاشر مناخيره فيها، كل حاجة في الدنيا تخصه
عشان فعلا كل حاجة تخص كل حد
طبعا احنا مش كده
نتكلم عن الانتخابات الامريكية يقولوا واحنا مالنا ما تخلينا في انتخابات مصر
وكأنه مثلا اللي بيقول كده بيستعبط...يعني هو مش عارف ان امريكا هي اللي بتحكم العالم؟
نتكلم عن الحريات في العالم يقولوا احنا مالنا
نتكلم عن كل حاجة يبقى واحنا مالنا....مع انه مالنا ومالنا...مع ان كل حاجة بتحصل في العالم بتخصنا وخاربة بيتنا..
- ليش ساكتين؟ مصر عظيمة ونحنا بنحبا...انتوا تمانين مليون..صابرين والله...بس ليش؟
الله الله...انتوا ح تتنططوا عليا وللا ايه؟
احنا مش ساكتين...بس نبقى زي العراق يعني؟
- اممممممممم وليش؟
معاهدة السلام... مش ساكتين...بس لازم ناخد حذرنا ..بنحاول تاتا تاتا ناخد ولو حق صغير بحرص... اللي عشاناه تحت قصف السلام تلاتين سنة اكبر بكتير من القصف اللي عشتوا تحتيه
تسعة وتسعين في المية من اوراق اللعبة كانت في ايد امريكا؟
بعد معاهدة السلام بقت مية في المية من اوارق اللعبة في جيب امريكا...بس احنا مش ساكتين
- الله يعينكوا
الناس في مصر...حتى سواق التاكسي اللي وصلني للمطار كلهم بيقولوا لي سلمي لنا على حسن نصر الله
زي ما العرب كل ما يشوفوا مصري يقولوا له: قول لنا نكتة...سلم لنا على عادل امام
بعد كده كل اللي ح يشوف لبناني ح يقول له: اضرب صاروخ...طلع اسير من جيبك...سلم لنا على حسن نصر الله
-------
شفت سمير القنطار ازاي؟
صحيت الصبح اتصلت بالمنار وطلبت نمرة غسان بن جدو لانه صاحبنا وقلت اسلم عليه
اتصلت بيه قال لي: تكوني باللوبي بعد عشر دقائق...بتجيلك سيارة تجيبك لهون
السيارة اللي جات مش بتاعة سواق، ده مراسل صحفي بس عملها خدمة وحكي شوية بس بحرص: يعني فيكي تعيشي بتمانميت دولار..بس مافي سيارة، مافي ساليلور، بس ع القد
وفيه ناس عايشين بعشرتلاف دولار...بس هني مانن اغنيا كتير...وفيه ناس...ناس..وكيف مصر بقا؟
دخلت مكتب غسان بن جدو وما كانش هو فيه ولقيته عامل معرض لغنائم حرب تموز الاخيرة









بس الخوذة والقميص بتوع قناة الجزيرة


الله يعز المقاومة...لولاها كان زمان راس غسان محطوطة في معرض اسرائيلي
اسرائيل عايزة تقفل مكتب الجزيرة في فلسطين المحتلة عشان غسان عمل لقاء مفتوح مع سمير القنطار، واحنا قاعدين وبشكل عابر غسان قال: ده سمير فوق
- سمير مين؟
- سمير القنطار
رقعت بالصوت: ايه؟ فوق فين؟
- فوق بيسجل..شو؟ بدك تشوفيه؟
- انت بتتكلم ازاي
- خلص...قعودي هون لانه بلش تسجيل
شوية وغسان قال لي تعالي نطلع، قبل ما يقول لي نطلع ابتديت افيد، بقى يتكلم معايا وانا اجاوب على حاجات تانية، قال لي مالك قلت له متوترة شوية، طلعنا وكان سمير القنطار لسة بيسجل
طول ما انا طالعة في الاسانسير عمالة احضر في خطبة طويلة عريضة استقبل بيها البطل ومش عارفة ركبي بتخبط في بعض وبطني بتكلبش وابتديت ادوخ..اول ما شفته ما حسيتش غير وحنفية مية سخنة اتفتحت في عينيا الاتنين وكلي بيترعش
قعدت وعمالة ابص له وهو بيتكلم ومش سامعة بيقول ايه خالص
انا بابص على تلاتين سنة من العذاب والالم والبطولة والتحمل
انا بابص على تلاتين سنة من "ما بدلوا تبديلا"
انا بابص على انتصار
انا بابص على عند وعزيمة
انا بابص على مناخير اسرائيلي معقوفة...مدعوكة في التراب ومكسورة والبطل دايس عليها
اول مرة اشوف بطل وانا كبيرة
وانا عندي تمن سنين شفت فتحي الشقاقي...ومع اني كنت طفلة مش فاهمة حاجة بس الهوا كان بيئز
الجو حواليه كان بيعمل كده: ازززززززززززز، وكان فيه احساس بالخفة كأن الواحد طاير وكأنك واقف على الفاصل ما بين العالم ده وعالم تاني كله انوار والوان
كنت طفلة والطفولة بريئة شفافة عشان كده الازيز بيبقى خفيف على نفس الاطفال
نفس الجو كان حوالين سمير القنطار، بس انا كبيرة، حسيت اني فقدت توازني واني ح اقع
اول ما خلص وقفت كان بسام القنطار وبسام القادري واقفين قلت لهم اسلم عليه
اول ما قرب وسلمت عليه اعصار من العياط وهو اتخض وبعدين ابتسم لي عشان يخفف عني: قعودي...جيبولا كاسة مي ...ارتاحي..ارتاحي
مش عارفة قلت ايه...يا رب ما اكنش خرفت، اكيد اكون خرفت لانه كان بيضحك
انا مش فاكرة غير جمل متقطعة: انا مش عارفة اقول ايه...انا مش مصدقة نفسي..انا شفتك خلاص اموت بقى
ضحك: لاااااااااا شالله بتعيشي مية وعشرين سني
- انا كنت محضرة كلام كتير...انا بابص على النصر..على بطل...على ولي من اولياء الله... ادعي لي... ادعي لي..ادعي لي (ييييي اديني عيطت تاني)
- الله يوفقك اهم شي...الله يوفقك
بسام القادري: اذا معك كامير ما تنسي تتصوري...
- اه صحيح...اتصور
وزي ما انتوا شايفين شكلي في الصورة مفحوتة من العياط

اه..افتكرت...الاسير المصري...انت عارف كل بني ادم في الدنيا له بلد تسأل عليه الا احنا...مالناش غير ربنا
سمير ما ضحكش..بان عليه الحزن والتأثر
ايه حكاية الاسير المصري: اياد ابو حسنة، من رفح المصرية، سنة 1989 دخل مع ايمن يونس الاراضي المحتلة لوحدهم من غير ما ينظموا ولا ينسقوا مع حد...دخلوا يعملوا عملية كده من دماغهم، اتقبض عليهم، وهم جوة السجن المساجين قالوا لهم: فيكوا تلتزموا مع حدا..لازم، ايمن يونس التزم مع فتح، وعشان كده طلع اياد ابو حسنة اختار حماس وعشان كده ما طلعش لحد دلوقت، هو مش من حماس، بس جوة السجن لازم يتبع لاي فصيل سنه دلوقت حوالي 39 سنة يعني كان عنده عشرين سنة لما اتقبض عليه
خلص سمير
مش عايزاه يمشي...وخايفة يقعد اكتر من كده يبقى فيه خطر عليه
انا ما مسحتش ايدي فيه واخدت بركة على وشي...متهيالي...متهيالي ما عملتش كده...يا رب اكون ما عملتش كده...يا نهار اسود..لا لا لا لا لا اكيد اكون ما عملتش كده
اه اه..افتكرت..معلش يا شباب صح افتكرت، هو انا مخي وزني اعمل كده، بس ربنا الهمني اني بدل ما اعمل كده اقول له: ممكن اسلم عليك تاني
سلمت عليه وبعد ما مشي استنيت ماحدش بيبص عليا ورحت ماسحة وشي وراسي مطرح ما سلمت عليه
مش ح تحسوا بالوقوف على الخط الفاصل ما بين عالم المادة وعالم الانوار غير لما تشوفوا سمير او حد زي سمير
الكلام ده حقيقة مش خيال

كنت اتمنى اشوف السيد حسن، بس انا كنت قاعدة يومين، لو شفت سمير الصبح والسيد بعد الضهر كان ممكن ارجع لكوا في صندوق اثر سكتة قلبية
مافيش انسان يستحمل كل الازززززززززز ده
------
هنا الضاحية...من جوة:
نصر الله ده مش السيد حسن...ده نصر الله تاني

رجعت على الفندق والاززززززززززززززز لسة حواليا...رجليا خفيفة على الارض..لسة هالة الطاقة لاحقاني، لقيت بشرى والسواق بتاع المنار مستنيني وبيأفئفو: وين كنتي
كنت مع سمير القنطار
بشرى: يا خااااااااااااااااااااااايييييييييييييييييييييييينننننننننننننننننننننةةةةةةةةةةةةةةة
طلعت بسرعة غيرت هدومي ورحنا على البرنامج هناك كان فيه شاب فلسطيني وشاب لبناني اسمه سليمان فرنجية بس مش سليمان اللي كان وزير واحد من نفس العيلة وبيشتغل المسئول الاعلامي في تيار المردة
خلصنا البرنامج ورحنا على المنار...التصوير ممنوع...المنار مستهدفة
طلعنا وكان اليوم خلصان والموظفين مشيوا مش باقي الا بتوع الهوا
عايزة اروح قبور الشهداء
زينب كلمتني على المنار: وينك؟
رايحة قبور الشهداء
خلص..بشوفك هونيك
تاني الاززززززززززززززززززززز
في قبور الشهداء

كان فيه زيارة...اهالي كتير كانوا موجودين
كل ما تدخل اكتر..الاززززززززززززز بيزيد وحنفيات المية السخنة اللي نازلة من عيني بقت مواسير

هنا

يرقد عماد مغنية بسلام

لا مؤاخذة...الموبايل وقع من ايدي...قعدت جنب القبر متربعة والمواسير طفحت من عينيا
امال ادهم الصفتي قال لي انصار حزب الله بيضربوا البنات عشان يتحجبوا في الضاحية ليه؟
امال دول ايه؟

لولا ان التصوير ممنوع في الضاحية كنت وريتكوا غيرهم...وعاملين تاتو كمان
طب امال فين انصار نصر الله عشان يضربوا دول

ليه يا ادهم كده؟ عموما انا فضحتك يا حبيبي :)) وقلت لهم فيه مدون اسمه ادهم الصفتي بيقول انه شاف كذا كذا بان عليهم الخنقة: نحنا ملينا والله

خفف الوطء
وامشي الهوين
هنا

يرقد عريس المقاومة
هادي نصر الله
اززززززززززززززز كتير عليا في لبنان
خصوصا اني جاية من وشششششششششششششش كتير في مصر
مشينا في الضاحية وكان ابتدا العمار
امممممممممم العمار اللي بيقولوا: المقاومة واخدة فلوسه من ايران
طيب وفلوس السوليدير؟
ششششششششششش اسكت يا لساني اسكت يا لساني ماهو انا ما رحتش يومين عشان الخبط لهم الدنيا
الشأن اللبناني معقد
ايه اللي مضايق فريق السلطة ان المقاومة بتعمل الاعمار؟
مع انها بتعمله سلف لحد ما السلطة تصرف التعويضات وهم ياخدوها ولو فيه فرق المقاومة تتحمله
بس لان فريق السلطة كان عايز يعمل الضاحية زي سولدير ويعمل عليها مناقصة واسهم والعبي يا مدرسة العاب
اسهم سعودي..اسهم امريكاني...اسهم..............اسرائيلي
وبيع يا جعضيض واكسب
والله ده مش بس له علاقة بالكرامة ده له علاقة بالامن
الضاحية بتاعة المقاومة والتصوير فيها ممنوع دلوقت، لما تتباع الضاحية اسهم وكل اللي ما يشتري يتفرج عليها يبقى السيد حسن - بعد الشر عليه انشالله اللي يتمناها له يا رب - يتنش بمنتهى السهولة، سيبك من السيد، المقاومة كلها تتنش، لان المنطقة بقت مكشوفة، مكشوفة على كل مستوى...والبضاعة تتباع بالفين دولار لقميص النوم، وطبعا ماحدش يشتري، ولما محدش يشتري صاحب المحل ياكل منين؟
ما علينا ما علينا كل واحد ونباهته بقى
لما مشينا في الضاحية ما كناش نعرف ان ممنوع التصوير صورت انا وبشرى وبعدين شاور لنا واحد من الحرس انه لا، نزلنا من العربية ورحنا لهم: احنا صورنا خدوا الكاميرات والصور وشوفوا ايه اللي عايزين تمسحوه وامسحوه
- والله منعتذر منكن بس هيدي احتياطات امنية
على قلبي عسل...اعملوا احتياطات امنية اكتر واكتر...التربص من جوة ومن برة
جعضيض عايز ياكل عيش
واسرائيل عايزة السيد
والصور احداثيات ممكن يستفيد منها الاعداء
بشرى قالت لي: اول مرة احب الاحتياطات الامنية
- لا خدي انت وامحيها...صورتي الشباب شي؟
لا انا مش مجنونة للدرجة دي هم عمارتين اللي صورتهم...واهم مسحتهم
- والله منعتذر منكن
لا احنا اللي بنعتذر
وليد جنبلاط زعلان من القفل اللي على الاودة...مع اني شفت بيته وهو عبارة عن ثكنة عسكرية
وبعدين رحنا مطعم الساحة..حاجة كده زي مبرة تبع السيد محمد حسين فضل الله الريع بتاعها بيروح للايتام
امال فين اللي بيضربوا الستات يا ادهم؟

هع هع هع معلش يا ادهوم
------
صحيح في مصر عشان تكره المقاومة لازم تكون غيران او مضحوك عليك والاتنين حالات انسانية يمكن التعاطف معاها
بس في لبنان عشان تكره المقاومة لازم تكون قواد بالمعنى الحرفي للكلمة، بكل تفاصيلها
مش عارفة ينفع الواحد يتعاطف مع الحالة دي وللا لا؟
-------
انا بطبعي مش باتعاطف مع القواد...ممكن اتعاطف مع العاهرة، تصعب عليا، لكن ما اقدرش اتعاطف مع حد بياكل من اعراض الناس، عشان كده وانا رايحة المطار في رحلة الرجوع لبست صور السيد حسن
في المطار
لبنانيين اغنيا قوي، قوي، قوي، تمانميت دولار يدوها بقشيش للسواق
بيبصوا لي من فوق لتحت
في المطار
شيالين وكناسين ومعترين وجيش يبصوا لي ويبتسموا ابتسامة بغمزة وكأنهم بيقولوا لي: أميه أميه
ولما اتكلم مصري قلبهم يبقى ح يقف من الفرحة ويبقى هاين عليهم يلفعوني على كتافهم ويوصلوني مصر مشي وهم شايليني
المساكين عندهم بوصلة انا باثق فيها
وكلهم زي بعض....في كل حتة في العالم
مساكين هناك زي مساكين هنا
والمساكين دايما صح، والا ما كانش الرسول صلى الله عليه وسلم يقول: اللهم احيني مسكينا وامتني مسكينا واحشرني في زمرة المساكين
اللهم آمين

خدوا دي تصبيرة هع هع هع


يعني يا اوسني ماهانش عليك ارجع مبسوطة من رحلتي؟

دول هم يومين ياربي ارجع الاقي اربعتاشر واحد معتقل عشان كانوا عاملين طيارة ورق عليها علم مصر وبيغنوا اغاني وطنية؟
ده ايه النحس ده يا ربي..ده ايه النكد ده؟
وانا اللي راجعة مبسوطة وحاملة لكوا اخبار كتييييييييييير حلوى وعمالة احضر في دماغي واسنجف ح احكي لكوا على الرحلة ازاي من طأطأ لسلامو عليكو وكنت عاملة لكوا مفاجأة مش ح تصدقوها
بس عشان مخكوا ما يروحش لبعيد ما شفتش السيد حسن ولا حاجة يعني...ومشيت وانا باعيط عشان كده
بس عندي مفاجأة بمليون جنيه
كانت بمليون جنيه قبل الخبر النكد اللي قريته في الطيارة وانا راجعة
اففففففففففففففففففففففففففف
تاني تاني تاني...راجعين للهم تاني
هم العيال عملوا ايه غير انهم بيحبوا مصر؟ وللا مصر جوزها بيغير عليها؟ دول في سن اولادها يعني
انام واصحى بقى واعرف الحكاية بتفاصيلها
واما نشوف ح احكي لكوا ازاي على الاخبار والمفاجئات الحلوة في جو النكد اللي ام الدنيا مستقبلاني بيه
كده برضه ياما؟ وانا اللي راجعة باقول وحشتيني؟

Tuesday, 22 July 2008

لبنان بكرة ان شاء الله

انا مسافرة لبنان بكرة ان شاء الله ح اسافر الاربع واقعد الخميس وارجع الجمعة ان شاء الله
عادة لما باسافر بابقى قلقانة لاموت
بس لو مت في لبنان ح ابقى فرحانة
ان شاء الله المفروض فيه برنامج يوم الخميس ح اصوره في المنار مش عارفة ح يبقى هوا وللا تسجيل ولا عارفة ح يتذاع الساعة كام ولا عارفة اي حاجة
كل اللي عارفاه اني احاول اخليهم يسألوا لي على اياد ابو حسنة ولو رجعت ان شاء الله ابقى اقول لكوا
دعواتكوا بقى اعرف اتكلم وما ازهقش واسكت كالعادة
:)

ويا ترى طباخ بن لادن كمان مجرم حرب؟

مجرم حرب؟ سواق...سوووااااااااق مجرم حرب؟
وعلى كده الدادا اللي ربت بن لادن كمان مجرمة حرب لازم يجيبوها ولو ميتة يطلعوا رفاتها ويعذبوه
والطباخ..مش هو اللي كان بيأكله ويقوته؟ يبقى مجرم حرب
والبقال اللي كان بيبيع له الشاي...هو اللي كان بيمده بالمزاج عشان يشرب الشاي ويمخمخ
وبياع الجرايد اللي كان بيجيب له الجرايد...هو اللي السبب في ان بن لادن يقرا الجرايد ويعرف الاخبار ويقرر يعمل عملية
والواد اللي ظبط له الدش على السطوح
والبواب
وبياع الخضار
والحلاق
والترزي
وصاحب المحل اللي باع له نضارة الشمس كان المفروض يسيبه يتعمي في الشمس
والكشك اللي كان بيشتري منه كارت الموبايل اتكلم براحتك
هو السبب في اتصال بن لادن بالشبكات الارهابية المهلبية
وظابط المرور اللي فتح الاشارة للسواق اللي كان بيسوق لبن لادن
كان المفروض يفضل مخلي الاشارة حمرا
كل واحد من دول مجرم اثيم وقاتل لئيم قتل الحضارة قتل المدنية والمعمار ولهذا ولكل هاتيك المجالي اطالب باعدام المذكور شنقا مع سبق الاصرار والترصد

Monday, 21 July 2008

مش انا الدكتورة شرين ابو النجا كتبت عني في الدستور؟

وفرحت قوي
فرحت قوي قوي قوي
فرحت قوي قوي قوي قوي قوي قوي قوي قوي قوي قوي قوي قوي قوي قوي قوي قوي قوي
اكتر من اي مرة اتكتب عني فيها
لسة قارياها حالا وانبسطت اكتر من اي حاجة خالص
الدستور بتاعة بكرة
ياااااااااااااا انا فرحانة جدا ان د.شرين ابو النجا عاجباها مدونتي
انا ح انام وانا فرحانة النهاردة
:)
تصبحوا على خير

يعني يسرا وهشام سليم احسن مني؟

انا كمان زيهم بقيت متخصصة في المرور عشان اليومين دول ورايا مشاوير كتير باخلص ورق
النهاردة في اشارة زحمة كنت فاتحة السبيكر بتاع التليفون وباتكلم قام امين الشوربة وقفني وقال لي ح تدفعي غرامة قلت له انا فاتحة السبيكر قال لي بس ماسكة التليفون بايدك قلت له ما انا ممكن ابقى ماسكة كوباية شاي في ايدي قال لي لا كوباية الشاي مش ح تشغلك زي الموبايل
قلت له: طيب انا ح ادفع الغرامة بس والنبي ترد على سؤالي
قال لي: والله العظيم ح ارد على سؤالك
قلت له: رئيس الجمهورية ورئيس الوزراء بيدفعوا كام غرامة لما بيعدوا في التشريفة ويعطلوا الناس؟
قال لي: اقول لحضرتك...(وركزوا والنبي في الكلام اللي ح يقوله عشان كلام مهم) انا ما اقدرش اقول لرئيس جمهورية انت ليه بتعمل تشريفة وتعطل الناس...اما بالنسبة لرئيس الوزراء فده راجل وراه شغل مهم ولازم يوصل له بسرعة
ههههههههههههههههه
يعني حتى امين الشرطة عارف ان الريس ما وراهوش شغل.... المهم
قلت له: بس رئيس الوزراء بياخد مننا ضرايب عشان يعمل الشغل ده مافيش داعي يعطلني...مش انت بتدفع الضرايب؟
قال لي: انا مش بادفع ضرايب انا باقف تسع ساعات في الشمس المفروض تدفعوا لي انتوا ضرايب
قلت له: ما انت بتدفع ضرايب انت مش عارف؟ وبعدين انت بتقف في الشمس تسع ساعات...انت بيتعمل لك تشريفة
قال لي: بصي يا انسة (طبعا وقعت في غرامه عشان قال لي يا انسة زي ما انتوا عارفين ) بصي يا انسة....احنا مسيرين مش مخيرين...هو حضرتك بتشتغلي فين؟
قلت له: في التلفزيون
قال لي: في التلفزيون وتدفعي غرامة؟ ده انا ممكن اخد الفلوس منك واحطها تحت البنورة للذكرى...لا خلاص بس انت في انهي دور..قلت له في التالت...قال لي: خلاص تبقى تنشري صورتي في التلفزيون..ح ابقى اجيلك..ح تديني كارت؟ وللا ح تفتكريني لما اجيلك
قلت له: لا ح افتكرك
طبعا لو قلت لي اني باشتغل في القناة اللي بتشتغل بدل الوشششششششش كان دفعني الغرامة دوبل

Sunday, 20 July 2008

اخيرا وقع في ايدي ظباط التشريفة

والله ما اعرف مين ابن الكلب اللي كان معدي المرة دي بس وقفونا على مطلع كوبري اكتوبر مع اني نزلت من الشغل فور انتهاء الماشت عشان عربيتي بيضا وخفت حد يكسرها لي الدنيا كانت فاضية وعلى المطلع لقيت عسكري وامين شوربة بيوقفونا اول ما طلعنا لقيت ظابط بتلات نجوم وظابط تاني مش عارفة بقى رتبته ايه رحت مطلعة راسي وقلت له: انتوا مش ح ترحمونا من التشريفات دي بقى؟ اللي معدي في التشريفة ده بياخد مرتبه من ضرايبنا...كل يوم متعطلين كده؟
الظابط ابو تلات نجوم فضل يبص لي ويبتسم ابتسامة بلهاء والتاني كان بيبص لي بغيظ ونفسه يضربني والاتنين ما ردوش عليا وانا ما استنيتهمش قلت الكلمتين الواقعين بتوعي دول وانا متنرفزة ورحت طالعة بالعربية
وكل ما ح اشوف ظابط تشريفة ح اقول له كده
بس نسيت اقول لهم اننا بندعي عليهم هم واصحاب التشريفات
ملحوقة ما انا كل يوم متعطلة في تشريفة
الا مين المسئول النشط قوي ده اللي بيروح السيما كل يوم حفلة اتناشر ده؟

Saturday, 19 July 2008

جلد اسود اقنعة بيضاء: الجزء الرابع من الفصل السادس

التهديد اليهودي بيستبدل بالقدرة الجنسية عند الزنجي. مانوني بيقول:


فيه منطق بيتكلم بيه العنصريين عشان يهاجموا المختلفين معاهم في الرأي

وانا شايف ان ذكره مهم لانه بيعكس سمة العنصريين:

نعم؟ يعني لو عندك بنت ح تجوزها لزنجي؟

انا اعرف ناس مش عنصريين ابدا اول ما يتواجهوا بالكلام ده بيفقدوا اي

حس نقدي وبيتلبخوا، لان السؤال ده بيعمل عدم ارتياح بداخلهم. (شبه احساس زنا المحارم) وبيرجعوا للعنصرية كنوع من رد الفعل الدفاعي.


قبل ما نكمل مهم قوي اننا نقول النقطة الاتية: بما اننا عارفين ان ميول زنا المحارم موجودة في اللا وعي، عايزين نعرف ليه الاحساس بيه مرتبط بالزنجي؟ يعني ايه الفرق ما بين جوز البنت الاسود وجوز البنت الابيض؟ هل القرف من زنا المحارم اللي شبه القرف من الزواج من زنجي الاتنين خارجين من اللا وعي؟ طب ليه ما نستنتجش ان الاب بيثور لما بنته تتجوز زنجي لان الزنجي ح يعرفها على عالم جنسي ما يعرفوش الاب ولا يملك مفاتيحه ولا صفاته؟

مع كل تقدم فكري بيحصل تضييق في مجال الممارسات الجنسية، الرجل الابيض عنده اشتياق لعصور الجنس المرخص، مشاهد الطقوس الجنسية، الاغتصاب اللي لا يستتبعه عقوبة، زنا المحارم غير المقموع. بشكل ما الميول دي هي استجابة لغريزة البقاء اللي بيتكلم عليها فرويد. وباسقاط كل الرغبات الجنسية اللي عند الرجل الابيض على الزنجي، الرجل الابيض بيمثل كأن الزنجي عنده كل ده. لما نيجي لمسألة اليهودي، المشكلة واضحة: هو مشكوك فيه لانه عايز يستحوذ على المال والسلطة. لكن الزنجي مثبت على الاعضاء التناسلية، وتم تثبيته عليها مهما حاول وفي اي مجال. مملكتين: الفكرية والجنسية. الانتصاب في كتاب "المفكر" لرودين هو تفكير صادم. البني ادم المحترم مش معقولة يبقى مثار جنسيا طول الوقت. الزنجي بيشكل الخطر البيولوجي، واليهودي بيشكل الخطر الفكري.

فوبيا الزنجي هي فوبيا بيولوجية. لانه هو بيولوجي وبس. الزنوج حيوانات. بيمشوا عريانين، والله اعلم بقى...مانوني بيقول: “في محاولاته لتشخيص انسان الغاب، كاليبان، الزنجي، وحتى اليهودي بصورة الاله ساتير الاسطورية (اللي نصه حصان نصه انسان) الانسان الابيض بيبان ان فيه نقاط حساسه في نفسه لدرجة ان التفكير بيتلخبط والرغبة الجنسية بتتصل بشكل غريب بالعدوانية والعنف.” مانوني ضمن اليهودي في المسألة وشايف ان ده ممكن يكون ملائم، لكن في المجال ده الزنجي هو الرئيسي، هو المتخصص، اول ما تقول اغتصاب يبقى زنجي.

(هامش من المؤلف: لما بنشوف نتائج علاج احلام اليقظة، ح نلاقي النموذج الاسطوري ده موجود في العمق، النموذج النمطي موجود في عمق التفكير الانساني، كل ما نغوص في العمق بنلاقي الزنجي يا اما بتجسيده يا اما برمزه/ انتهى هامش المؤلف)

في خلال تلات او اربع سنين سألت حوالي 500 ابيض اوروبي، فرنسيين، انجليز، المان، طلاينة، (وايه الطلاينة دول كمان؟ دول بينضربوا بالشبشب من بقية اوروبا وبيتقال عليهم طباخين/جبهة) وعرفت احوز على ثقتهم وارتاحوا لي: في كل حالة كنت باستنى لحد ما الشخص هو اللي يثق فيا ويتكلم معايا لوحده. يعني ايه يثق فيا؟ يعني يبقى متأكد ان الكلام اللي ح يقوله ليا مش ح اتضايق منه. واحيانا في الاختبارات النفسية كنت باحط كلمة "زنجي" ضمن ستين كلمة مثلا، وكان الربط ما بين الزنجي وبين المفاهيم كده:

الزنجي: بيولوجي، عضو ذكري، قوة، رياضة، قدرة، ملاكم، جو لويس، جيسي اونس، القوات السنغالية، متوحش، حيوان، شيطان، خطيئة.

وكلمة عسكري سنغالي استخدمت كمحفز، اثارة الرعب، دموي، قاسي، قوي


من المثير للاهتمام ان حوالي واحد كل خمسين رد فعلهم على كلمة زنجي كان: نازي، اس اس. لما نعرف معنى رمزية شكل

SS

النفسية، ح نعرف ان مافيش فرق بين الكلمة دي وبين الاجوبة التانية. (الاس اس دي وحدة لحراسة هتلر وبعد كده بقت مسئولة عن المخابرات والامن المركزي والسياسات والقتل الجماعي لمن اعتقدوا انهم اقل او غير مرغوب فيهم/ جبهة/ المصدر: ويبستر) كمان فيه اوروبيين ساعدوني بانهم ادوا الاختبار لمعارفهم: في الحالات دي النسبة ارتفعت قوي. ولازم اعترف ان النتائج دي اثرت عليا كزنجي: بقى عندي حالة من النفور.

الزنجي هو رمز بيولوجي. بيدخل البلوغ وهو عنده تسع سنين وبيبقى اب وهو عنده عشر سنين، دمه حامي، ودمه قوي، قاسي. زي ما واحد ابيض قال لي بمرارة: “تكوينكوا قوي ..كلكوا". ياله من جنس جميل، بصوا على السنغال...كانوا اسمهم "شايطيننا السوداء" اثناء الحرب. بس هم متوحشين، ما اقدرش اتخيل انهم يحطوا ايديهم الكبيرة دي على كتافي، انا بارتجف لمجرد تفكيري فيهم.

طيب خلينا واعيين بقى ان التفسير في احيان كتير لازم يبقى بالضد، انا فاهم السيدة الهشة اللي قالت لي انها في اعماقها نفسها زنجي قوي يضربها في كتافها الضعيفة لحد ما يصيبها بالكدمات. سارتر بيقول لما بتذكر كلمة "يهودية شابة" بيبقى فيه دخنة من الخيال اللي مليان اغتصاب وسلب. في المقابل، نقدر نقول لما بيذكر كلمة "زنجي وسيم" بيبقى فيه تلميح من نفس النوع. انا كنت دايما باستغرب من سرعة تحول جملة "زنجي وسيم شاب" الى جمل شبه "المهر الصغير" او الحصان. في فيلم "الصباح اصبح الكترا" جزء كبير من القصة مبني على الصراع الجنسي. اورين بيوبخ اخته فيني لانها معجبة بسكان جنوب البحر العراة الرائعين. ومش قادر يسامحها على الموضوع ده. (هامش من المؤلف اللي هرا امي هوامش: خلينا نتذكر ان الموقف الى حد كبير غامض. اورين برضه بيغير من خطيب اخته، على المستوى النفسي ممكن شخصية اورين تتحلل كده: اورين اللي بيعاني من عقدة التخلي متعلق بامه ومش قادر ينفس عن رغباته الجنسية. لاحظ، مثلا، معاملته لخطيبته. اخته فيني بقى متعلقة بابوها وبتثبت لاخوها ان امهم كانت ست خاينة. بس عشان ما نعملش اخطاء، تصرفاتها هي مشروع اتهام. ولما اورين بيحصل على دليل خيانة امه بيقتل عشيقها. وكرد فعل هي بتنتحر، رغبات اورين الجنسية المقموعة اللي بينفسها بطريقته بتتوجه ناحية اخته، فيني بسبب تصرفاتها وشكلها بتحل محل امه. بعد كده اورين بيتحول لاوديب بس بالنسبة لاخته – والفيلم بيعالج النقطة دي بطريقة كويسة قوي – عشان كده اورين بيثور ويندب ويلوم اخته لما بتعلن جوازها. بس صراعه مع خطيبها عاطفي، بينما صراعه مع الزنوج السكان الاصليين بيبقى صراع على المستوى التناسلي والبيولوجي/ انتهى هامش المؤلف..ما كان يضمنه في الكتاب وخلاص) تحليل الواقع دايما صعب. اللي بيبحث ويحقق ممكن يختار ما بين تصرفين تجاه الموضوع بتاعه. ممكن يكتفي بالوصف زي طريقة التشريحي اللي بيوصف عضم قصبة الرجل وبيصاب بالذهول لما حد يسأله وانت عندك كام عضمة؟ وده لان ابحاثهم دايما على غيرهم، عمرهم ما بيفكروا انهم هم نفسهم مادة للبحث. في بداية دراستي للطب، بعد عدد من الجلسات اللي تغمم النفس في غرفة التشريح، سألت زميل ليا اقدم شوية ازاي اتجنب احساسي بالغثيان، "صديقي..تظاهر بانك بتشرح قطة...وكل حاجة ح تبقى كويسة" (يا سلااااااام يعني هم القطط ما لهمش دية يعني؟ مش بني ادمين زينا زيهم؟/جبهة). لكن لو اختار المحلل اسلوب تاني وهو الاول يوصف الواقع وبعدين يحاول يغيره. من حيث المبدأ، قرار انك توصف الواقع يبدو انه نوع من انواع التناول النقدي، ولذلك فيه احتياج اننا مدام انتقدنا يبقى لازم نوجد حل. الادب السردي والادب التحليلي الاتنين خلقوا قصص كتير عن الزنوج المقموعين. لكن تجميعهم مش ح يساعدنا في مهمتنا الحقيقية، وهي ان نكشف عن الياتهم. احنا ما يهمناش اننا بس نجمع حقائق ونرصد سلوك، ولكن اننا نعرف معانيهم. وهنا نقدر نشير لكاسبر لما كتب: “الفهم العميق لمثال معين ح يمكنا من اننا نعمم الظاهرة ونفهم عدد كبير من الحالات. عادة اللي بنفهمه كويس مرة بنقابله كتير. المهم في دراسة الظواهر اننا ندرس عدد قليل من الافراد ونفهمهم بعمق وده اهم من دراسة سطحية لعدد كبير من الافراد. السؤال هو: هل يقدر الابيض انه يتصرف بشكل صحي تجاه الاسود والعكس؟

ممكن حد يقول ده سؤال مزيف. بس لما نتأكد من ان الثقافة الاوروبية عنده صورة معينة للزنجي ومنها بيخرج كل الصراعات يبقى احنا لما بنتكلم كده مش بنبعد عن الحقيقة. في فصل اللغة شفنا ان على الشاشة صورة الزنجي النمطية بتتأكد. حتى اكثر الكتاب جدية ادوا نفسهم الحق انهم يتكلموا نيابة عن الزنجي، ونلاقي مايكل كورنوت بيكتب:


سيف الزنجي هو سيف حقيقي، لما بيطعن بيه زوجتك بتحس بشيء مختلف، وهو اكتشاف الحقيقة.

وفي الهوة اللي بيسيبها السيف لعبتك الصغيرة تتوه، مهما ضخيت لحد ما الاودة تتملي

بعرقك وممكن تبقى كأنك بتغني. دي نهايتك...لان اعضاء الزنجي التناسلية ممكن تدخل

في كاتدرائية، ولن يتركوا المبنى حتى تخمد شهوتهم، وفي المربعات الضيقة لن يكون

الامر بسيطا

(لامؤاخذة يعني..ايه الخيال العلمي ده)

وعشان يبقوا مرتاحين من غير مشاكل بيفضلوا الهواء الطلق، لكنهم بيتواجهوا باهانة مستمرة:

النخلة، شجرة العيش، وكل الاشجار الكبيرة السامقة واللي عمرها ما بتخضمع لامبراطورية، منتصبين للابد وبيوصلوا لارتفاع لا يمكن بلوغه باي حال من الاحوال


(انتهى مقتطف الراجل المجنون)


لما الواحد يقرا المقتطف ده عدة مرات ويسيب نفسه للفكرة اللي فيها يبقى مش ح يشوف الزنجي خالص، لكن ح يشوف عضوه التناسلي. الزنجي نفسه ح يتلاشى. وح يتحول لعضو تناسلي، وسهل قوي تتصور ايه اللي ممكن صورة زي دي تثيره في نفس فتاة صغيرة من ليون. الرعب؟ الشهوة؟ مش اللا مبالاة على كل الاحوال. دلوقت، ايه الحقيقة؟ متوسط طول العضو التناسلي للرجل الاسود كما يقول دكتور باليه نادرا ما يزيد عن 120 ميلي متر (4.6244 بوصة). تيستات في كتابه خصائص الانسان التشريحية بتقول نفس الكلام عن الرجل الاوروبي. لكن الحقائق دي مش بتقنع حد. الرجل الابيض مقتنع ان الزنج وحش، ولو مش ح ينبهر بطول العضو التناسلي يبقى ح ينبهر بالقدرة الجنسية للزنجي. لما بيواجه الراجل اللي هو "مختلف عنه في كل حاجة" بيحس انه محتاج يدافع عن نفسه. بقول اخر، هو بيجسد الاخر. الاخر هو دعامة افكاره ورغباته. (ام هامش من ام المؤلف: فيه كتاب قبلوا فكرة التحامل على الاسود وحاولوا يفسروا ليه الرجل الابيض مش قادر يفهم الحياة الجنسية للرجل الاسود وبنلاقي دي بيدرال كاتب كلام وان كان صحيح الا انه مش بيوصل لعمق اسباب الرجل الابيض في التحامل على الاسود وبيقول: الطفل الزنجي لا بيتفاجئ ولا بيتكسف من الحقائق التناسلية، لان اهله بيقولوا له كل حاجة، وده واضح، من غير ما نقع في غموض التحليل النفسي، وعشان كده الطريقة المختلفة دي في التربية بتأثر على طريقة تفكيره ومن ثم طريقة تصرفه، وبما ان الجنس بيتقدم له على اساس انه اكتر حاجة طبيعية واكتر حاجة جديرة بالثناء، لانها هي السبب في الحمل، فالافريقي ح يفضل يحتفظ بالنظرة دي لاخر لحظة في حياته، بينما الاوروبي طول حياته بيفضل محتفظ بعقدة الذنب تجاه الجنس اللي ولا التجربة ولا العقل ح يفلحوا في محوها، وبالطريقة دي الافريقي بيميل لانه يشوف حياته الجنسية انها جزء من حياته السيكولوجية بالظبط زي الاكل والشرب والنوم، وطريقة التفكير دي بتتفادى التشتيت اللي الاوروبي بيعاني منه عشان يتصالح مع ضميره واحساسه بالذنب وعقله المتردد وغريزته المقموعة (كل اللي بيعملوه ده ومقموعة؟/جبهة) وعليه فالاختلاف الاساسي مالوش علاقة بالطبيعة او التكوين الجسدي، ولكن له علاقة بالمفهوم، وعليه كمان فان غريزة التكاثر واللي نزعت الهالة المقدسة اللي موجودة في ادبنا القديم المزرخرف، ماهياش فكرة مسيطرة على دماغ الافريقي زي ماهي مسيطرة على دماغنا، بالرغم من كلام الكتير من تلامذتنا اللي شرحوا اللي شافوه من خلال منهج احادي في تحليل انفسهم/ انتهى هامش المؤلف) العاهرة اللي كنت جبت سيرتها قبل شوية، بتقول لي ان بحثها عن الزنجي ابتدى لما سمعت حكاية: في ذات ليلة امرأة كانت مع زنجي في السرير واتجننت، وفضلت مجنونة لمدة سنتين، ولما خفت رفضت انها تنام مع حد تاني، العاهرة ما تعرفش ايه اللي جنن الست، لكنها بتحاول تحقق اللي حصل مع الست دي معاها هي. عشان تعرف السبب اللي لم يذكر. يبقى لازم نلاحظ انها بتدور على التدمير والذوبان لذاتها على المستوى الجنسي. كل تجربة مع اي زنجي بتؤكد محدوديتها، هذا الهذيان الخاص بالنشوة الجنسية عمره ما اتحقق. مش عارفة توصل للي هي عايزاه فبتنتقم من نفسها بانها تسيب نفسها فريسة للاحتمالات.

فيه حاجة بس لازم نذكرها: الست البيضا اللي بيبقى لها صديق اسود بتلاقي صعوبة في انها تصاحب بعد كده راجل ابيض، او على الاقل الرجالة البيض مؤمنين بكده: “مين يعرف هم ممكن يدوا ايه للست؟" صحيح مين يعرف، ماحدش يعرف فعلا. انا ما اقدرش اتجاهل تعليق ايتيامبل:

الغيرة العنصرية هي اللي بتنتج جرائم العنصرية:

بالنسبة لرجال بيض كتير الرجل الاسود هو عبارة عن هذا السيف الهائل اللي

ما ان يلبث ان يطعن زوجاتهم حتى يجعلهم يبدون صغارا، احصاءاتي

لم تفلح في ان تمدني بالوثائق في هذه النقطة، بس انا عرفت زنوج وبعض

النساء البيض اللي عملوا علاقات مع زنوج، واخيرا سيدات زنجيات عملوا

علاقات مع رجالة بيض وسمعت اسرارهم وعرفت منهم اللي يخليني أحزن على السيد

كورنوت اللي استخدم موهبته عشان يجدد اساطير بتدي للرجل الابيض

مبررات مزيفة: احساس بالعار، التشكك، وبالتالي فعال بشكل مضاعف.


معرفة الحقيقة مهمة لا تنتهي، بنراكم الحقايق، ونناقشها، ولكن مع كل سطر بيتكتب، ومع كل مقولة بنقولها، برضه الواحد حاسس ان فيه حاجة ناقصة. جابريل داربوزيه كتب يهاجم سارتر ويقول:


هذه المقتطفات اللي بتحط الانتيل والغانيين والسنغال والملاجاش كلهم زي بعض، بتخلق حالة من

الارتباك. بالطريقة دي هو بيقرر المشكلة الثقافية للبلاد اللي عبر البحار باجتزائها من

حقيقتها الاجتماعية والتاريخية الخاصة بكل واحدة فيهم، ومن شخصيتها القومية

والاختلافات في الظروف اللي فرضت عليهم من قبل الاحتلال بالاستغلال والظلم.

وعليه فلما كتب سارتر "لما يبحث الزنجي في عمق ذاكرته ويفتكر

انه كان عبد هو كده بيأكد ان المعاناة هي قدر الانسان وانها ذات قيمة بهذا المفهوم" هل سارتر اخد

في اعتباره معنى الكلام ده بالنسبة لواحد من الهوفا؟ او مغربي؟ او توريج؟ او بويل؟ او من الكونغو؟

او من ساحل العاج؟


والله اعتراض الراجل معقول، وينطبق عليا انا كمان، في البداية كنت عايز احدد نفسي في الانتيل، بس بصرف النظر عن التبعات، الجدل اخد مداه وكنت مدفوع باني اشوف ان الانتيل هو نموذج لكل الزنوج. ومع ذلك مش ممكن نتجاهل ان فيه زنوج اللي جنسيتهم بلجيك وللا انجليز وللا فرنساويين وكمان فيه جمهوريات للزنوج. ازاي الواحد يدعي انه مسك الجوهر بينما حقايق زي دي محتاجة ان الواحد يلاحظها؟ الحقيقة ان العرق الزنجي تم بعثرته، وما نقدرش ندعي وحدته. لما قوات إيل ديوس غزت اثيوبيا حصلت حركة وحدة بين كل الملونين، لكن بالرغم من ان طيارتين او تلاتة ارسلتهم الولايات المتحدة الامريكية للبلد اللي عانت من الغزو، مافيش اسود واحد اخط اي خطوة عملية. الزنجي عنده بلد، بياخد مكانه في الكومونويلث. وكل وصف لازم يتاخد على انه ظاهرة متفردة، بس تاني برنجع للمفاهيم المطلقة. الوضع العالمي للزنجي فيه غموض، لكنه بيتحل بوجوده المادي. وده تشابه بينه وبين اليهودي، اللي ح اقوله ده ضد كل الجدليات اللي طرحتها: اينما ذهب الزنجي فهو زنجي وفقط.

في بعض البلاد الزنجي دخل في الثقافة. وزي ما قلنا قبل كده، ح يبقى صعب اننا ننسب اهمية كبيرة للطريقة اللي الاطفال البيض بيتعاملوا بيها مع حقيقة الزنجي. في الولايات المتحدة مثلا، حتى الطفل الابيض اللي مش عايش في الجنوب واللي فيه سود كتير، الا ان الاطفال البيض حتى اللي في الشمال بيتعرفوا على الزنجي من خلال اسطورة انكل ريموس. (في فرنسا موازي له انكل توم/المؤلف) (انكل توم وانكل ريموس هو الاسود اللي بيعمل قرد عشان ينال رضا الرجل الابيض/جبهة) ابن سالي وجون بيقعد يسمع بخليط من الخوف والاعجاب لقصص الارنب برير (اه كده ح اضطر احكي لكوا الحكاية من الاول، بقى فيه زمان قصص من الفلكلور الامريكي عاملة زي كليلة ودمنة كده، الراوي كان انكل ريموس العبد اللي من الجنوب، والقصص كلها عن الحيوانات والشخصية الرئيسية فيها كانت الارنب برير/جبهة). برنارد وولف بيقول ان التناقض اللي موجود في الرجل الابيض ده هو اهم سمة في الشخصية الامريكية. واستنادا على قصة حياة جويل تشاندلر هاريس (اللي هو مؤلف مجموعة قصص انكل ريموس/ جبهة) وولف بيقول ان الاعجاب بالاسود بيوصل عند الابيض لدرجة التوحد معاه.

فحوى القصص دي واضح قوي، الارنب برير بيتصارع مع كل الحيوانات اللي في الدنيا، وطبعا هو دايما الكسبان. القصص دي بترجع للتراث الشفهي للزنجي المزارع. عشان كده من السهل اننا نلاحظ ان الزنجي متخفي في الارنب، وبيبان ده من طريقة سخريته. عشان يحموا نفسهم من مازوخيتهم اللا واعية، واللي بيدفعهم للاعجاب المبهور بالارنب او الاسود، حاول البيض انهم يصرفوا القصص دي في امكانياتهم العدوانية. وبالطريقة دي عرفوا يقنعوا نفسهم ان "الرجل الاسود بيخلي كل الحيوانا تتصرف كأنهم التنظيم الاقل للذكاء الانساني، النوع اللي بيفهمه الزنجي. الانسان الاسود بيحس انه على اتصال اكثر حميمية بالحيوانات الطيبة اكتر من الرجل البيض، واللي هو احسن منه على كل مستوى". وفيه بقى منهم ناس طوروا النظرية دي، وببجاحة بيقولوا ان القصص دي مش نتاج الاحوال السيئة اللي بيمر بيها الزنجي في الولايات المتحدة الامريكية، لكن دي اثار من القصص الافريقية. وولف بيشرح لنا التفسير ده:


واضح بالدليل القطعي ان الارنب برير حيوان لان الزنجي لازم يبقى حيوان

الارنب غريب لان الاسود لازم يبقى موسوم بانه غريب وده موجود في

الكروموزومات بتاعته. من بداية العبودية، ذنب الجنوبي المسيحي والديمقراطي

اللي نتج عن استعباده للاسود بيدفعه دايما انه يعمل حيلة دفاعية ويصف

الاسود بانه حيوان، وعمره ما ح يتغير، افريقي وح يفضل افريقي. ولو

الاسود لقى نفسه متصل بفصيلة الانسان باي وسيلة يبقى هو ضحية

صفاته الوراثية اللي جابها من جدوده في الادغال مش ضحية الرجل الابيض


عشان كده الجنوبي بيرفض يشوف في القصص دي العدوان اللي بيوجهه الاسود ناحيته. لكن وولف بيقول ان مؤلفات هاريس كانت سايكوباتية:


هو كان ماهر في الكتابة دي لانه كان مفعم لدرجة الانفجار بامراض العنصرية

اللي كانت بتعذب الجنوبي وكل الامريكان بدرجة اقل. بالنسبة لهاريس زي ماهو

بالنسبة لبيض كتير الاسود هو النموذج العكسي للذات القلقة للابيض، الاسود:

مش قلق، مستأنس، سلس، عضلاته مسترخية، ما بيزهقش ابدا،

او سلبي، بيستعرض اعضاءه التناسلية من غير ما يتكسف، ماعندوش احساس

بالشفقة على الذات بالرغم من معاناته الضخمة


لكن هاريس كان دايما عنده احساس انه معوق، عشان كده وولف كان دايما شايفه مقموع – لكن مش بالمفهوم التقليدي: هو ماقدرش يتصرف بالشكل "الطبيعي" بتاع الزنجي بسبب جوهره الانساني. ماحدش منعه؛ بس هو ده كان مستحيل بالنسبة له. مش محرم، بس لكن غير مدرك. لانه حاسس انه مقموع من تصرفات الزنجي التلقائية فهو عايز يقمع الزنجي، وبيحاوطه بالممنوعات من كل نوع. وبكده يبقى الرجل الابيض ضحية اللا وعي، وولف بيقول:


قصص ريموس هي رمز للتناقض اللي موجود في الجنوب.

هاريس، وهو النموذج النمطي للجنوبي، بيدور على حب الزنجي

وبيدعي انه حصل عليه من خلال ابتسامة الزنجي

(فاكرين رواية ذهب مع الريح؟/جبهة)

وفي نفس الوقت كان بيناضل عشان يحصل على كراهية الزنجي من خلال

شخصية الارنب برير، واعلنها بشكل صاخب، بطريقة مازوخية غير واعية – وممكن

جدا يكون بيعاقب نفسه على انه مش هو الرجل الاسود، الزنجي النمطي، المعطاء بشكل

مذهل. ومن الممكن ان الابيض الجنوبي ويمكن كل البيض

بيتصرفوا تجاه الاسود بنفس الطريقة