التلفزيونات بتتبارى تعلمنا ازاي نضرب بعض

انا كنت باتفرج على صباحك سكر زيادة في او تي في، وكانوا بيجيبوا لنا واحد يعلمنا ازاي نضرب! دلوقت على قناة نايل لايف طبعا زي ما احنا عارفين التلفزيون المصري بينقل نقل مسطرة من اي تلفزيون معدي فعاملين حاجة اسمها نهارك سعيد، هو هو بنفس البنطلون بنفس الفالنة صباحك سكر زيادة، وبرضه جايبين لنا واحد يعلمنا ازاي نضرب ونكسر الدراع والكوع والرسغ.
ويقولوا ده عشان البنات اللي واحد بيتحرش بيها او عايز يخطف منها الشنطة او شاب فيه واحد اتعرض له في الشارع!
هي بقت كده؟ خلاص يعني مش ح نعرف نمشي في الشارع الا لما نتعلم ازاي نكسر دراع ورجل ونقلع عين؟
امر وائع يعني؟
طيب لما واحد بيتعلم فنون قتالية في النادي وللا في مركز شباب الحقانية بيبقى فيه تدريب نفسي وحاجة كده زي ميثاق الشرف غير المكتوب للي بينضم للعبة دي انه ما يضربش حد الا في حالة الدفاع عن نفسه، حتى في الالعاب القتالية الصينية واليابانية بيبقى من شروطها ان لو المعتدي واحدة ست - حتى لو كانت ماهرة في الفنون القتالية - والمعتدى عليه واحد راجل ما يردش عليها ودي من الحالات القليلة اللي بيعتبر فيها الهروب من المعتدي شجاعة ولو طاردته مسموح له يتفادى انه يتقتل بس وما يردش عليها الضربات، وده بيلتزم بيه اللي بيلعب الالعاب دي، لكن لما يعلموا البشريات في التلفزيون ازاي يكسروا دراع البيني ادمين ويقولوا لنا كده في وشنا يبقى كل واحد ماشي في الشارع نفسه يجرب الحركة اللي اتعلمها من التلفزيون دي
بلاش
انا لما كنت في ابتدائي كنت عيلة شرانية قوي وحاجة زي دي لو كانت على ايامي كان زمان المدرسة كلها دراعاتها ورجليها مكسرة، ده انا مرة انا وواحدة صاحبتي رمينا واد زميلنا من الشباك، الحمد لله اننا كنا في الدور الاولاني والواد الظاهر كان راضع رضاعة طبيعية لمدة سنتين ما حصلوش حاجة
اكيد دلوقت فيه عيال شرانية زيي انا وصاحبتي
يعني التلافزيون خلاص بيقول لنا مافيش امن في الشارع ومافيش حد ح يحميكوا واللي خايف على نفسه يتعلم ازاي يكسر دراع البيني ادمين؟ طيب انا على قد ما كنت شرانية وانا عيلة دلوقت لو حد اتعرض لي على ما دماغي تجمع زي الواد منصور وافتكر الحركة دي ح اكون في مشرحة زينهم
طيب يعني مش البوليس احسن يعمل شغله اللي بندفع له عشانه مرتبه من ضرايبنا بدل ما ينزل ضرب فينا؟ مش ده يعني منطقي اكتر في كل حتة في الدنيا بدل ما التلفزيون يعلمنا ازاي نضرب بعض؟