آه..ويعني ايه قيمة فنية بقى؟

انا بادخل مدونة كريكاطظ بانتظام لانها لطيفة ومبتكرة، والابتكار ان الواحد يبقى مختلف، شوية يعني، اصل مهما الواحد اختلف هو في النهاية انسان ومافيش حاجة جديدة قوي في الانسان، كلنا عندنا حامض نووي بيعود بينا لنفس الاصل، وكويس ان الواحد يبقى مختلف طول ماهو في سكة انه بيبدع، لكن فيه حاجات بقى ما بيبقالهاش منطق يعني، او عايزة افهم المنطق اللي فيها غير ان الانسان يقع ما يحطش منطق
صاحب المدونة مع كامل احترامي له كتب عن جورج بهجوري - اللي دلوقت في اسرائيل - بيقول انه وسط صراخ الناس وتنديدهم بجورج بهجوري يحب يتكلم بصوت هادئ ويبين قيمة جورج بهجوري الفنية
اولا انا مسمعتش صراخ
ثانيا انا مش شايفة صراخ غير ان يبقى كل الناس مستاءة من ريحة براز مثلا واجي انا اقول لهم لا البراز حلو، حتى بصوا...انا باكله اهو
ده اسمه صراخ
صاحب المدونة مش محتاج يعمل كده لان مدونته مميزة فعلا ومافيش وسط المدونات واحدة شبهها خالص
مش عشان متخصصة في الكاريكاتير بس عشان فعلا مختلفة في كل حاجة وحلوة قوي بشكل استثنائي
ثم يا سيدي العزيز - بالمناسبة انا ما اعرفش اسمه انا اعرف مدونته بس - تقدر تقول لي يعني ايه قيمة فنية؟
فيه فرق ما بين الموهبة وما بين القيمة، جورج بهجوري موهبة كبيرة اه، بس قيمة ازاي يعني؟ ازاي يعني وهو بيزور اسرائيل دلوقت؟ ودلوقت بالذات؟ طب ما علي سالم فنان مسرحي وموهبته في كتابة المسرح قد موهبة بهجوري في الكاريكاتير عشر مرات وهو اللي كاتب اغنية على الممر ولما راح اسرائيل راحها في وقت كانت الظروف اهدا من كده بكتير وكان فيه محادثات سلام ما بينهم وبين الفلسطينيين ومع ذلك ده فعل مشين وبرازي واللي يوافق عليه يبقى بياكل براز عشان يبقى مختلف عن كل الناس اللي مش راضية تاكله
مشين لان الفنان لو كبير مش محتاج يرخص نفسه ويتحدى مشاعر الناس اللي وثقت فيه وحبته
مشين لان الفنان اللي ما يحترمش ثقافة ناسه يبقى
house negro
ويبقى ما يسواش تلاتة نكلة طول ماهو بيحتقر ناسه، لانه ببساطة بيحتقر نفسه
مشين لان اقدامه على خطوة يكسر فيها نفس الناس الغلابة اللي مافيش في ايدها حل ولا ربط مش شجاعة باي حال من الاحوال ولا بطولة باي حال من الاحوال ولا ابداع باي حال من الاحوال
ايه النكتة يعني في انه يروح اسرائيل؟ ايه الموقف؟
طب ما الحكومة المصرية عاملة سلام مع اسرائيل، عمل ايه هو يعني مبتكر وللا ابداعي وللا مختلف؟ عمل ايه غير انه اخد صف العولمة وديمقراطية القنابل العنقودية ضد الناس الغلابة اللي المفروض انه منهم وليهم، والفنان اذا ما كانش من الناس وليهم يبقى مش قيمة ولا حاجة
ولا يسوى قرش ماسح وخلي العولمة تنفع
يعني ايه راح اسرائيل اللي نازلة قتل في غزة دلوقت حالا وقتلت لنا ناس مدنيين على الحدود وهي شئتم ام ابيتم عدوة الشعب المصري وح تفضل عدوته ومش ح يحصل صلح نفسي معاها ابدا عشان يدعم السلام بالفن وتقول عليه بس قيمة فنية؟
الكلام ده بيحسسني ان واحد دخل على مراته لقاها نايمة مع راجل تاني فقالت له: بس ما تنساش اني باعمل مكرونة بشامل بتاكل صوابعك وراها، وباخلي الغسيل الابيض يشف، والالوان ح تنطااااااااااااااااااااااااااااق
تنسى ده كله وتقول لي نايمة مع راجل غيري؟
اذا كانت الحكومة المصرية بتكسر نفس المصريين في سياستها الداخلية والخارجية
الفنان الحقيقي، اللي يبقى قيمة بجد، دوره انه يطيب خاطر الناس ويبقى في حضنهم وهم في حضنه وياخد صف الضعفا والمكسورين ويتكلم باسمهم ويحمي حماهم ويحسوا انه ممثلهم اللي قادر ينطق بدالهم
لما ينضم للقوى اللي بتسحق الناس وتدوس عليهم ما حدش يقول لي ده قيمة لان قيمته من ناسه ولما يكسر ناسه يبقى خليه مع اللي هو راح لهم احنا مش عايزينه
الكلام ده صحيح نظريا وواقعيا وشوفوا علي سالم بقى مرمي زي سبت الزبالة ماحدش بيستعناه مع ان الحكومة مش واخدة موقف منه، لكن حكومات العالم كله، بما فيها حكومة امريكا الغراء ملكة الدنيا، ما تقدرش تدي قيمة لفنان الناس بتحتقره
واحنا لا حبسناه ولا قدمناه لمحاكمة عسكرية
احنا بنحتقر بهجوري وسالم
هم من حقهم يحقرونا ويروحوا اسرائيل
واحنا من حقنا نبادلهم التحقير، ودي كل سلطاتنا، لا عندنا سجون ولا عندنا جوانتانمو ولا عندنا قنابل عنقودية، ولا نقدر ندكهم زي ما اسرئيل دكت غزة، ولا نقدر نقلعهم ملط زي ما امريكا قلعت العراقيين في ابو غريب ولا في ايدنا اقتصاد العالم والبورصة ولا حيلتنا حاجة
حيلتنا قلوبنا بس
ح تشاركونا في قلوبنا كمان؟