ردود افعال دلاديل اسرائيل

يعني البني ادم لما يبقى موكوس مش يتنيل على عين امه ويتلط ويخرس حتى عشان ما يبقاش شكله وحش؟
يعني اسرائيل ادت اوامر ان الاحتفالات وكلمة سماحة السيد ما تتذاعش ، حقهم، كسر حقهم ان شاء الله واحد واحد بنظام
يعني مش عايزين دمهم يتحرق الناس معذورين برضه كفاية ان الاسيرين راجعين لهم في صناديق بعد ما قعدوا يتدلعوا على ما افتكروهم، طب بالذمة حد يسيب حد في لبنان سنتين؟ وينزلوا في الناس ضرب وفاكرين يعني انهم ح يلاقوا الاسيرين عايشين؟ ده مخ ايه ده
ما علينا، اسرائيل معذورة في نفسيتها يعني بعد ما قعدت تتسفخ بالكفوف على قفاها بقالها سنتين وتقول: ما تقدرش
انما بقى هلبت التلفزيون المصري وقناة العربية السعودية بيتضامنوا مع اسرائيل ليه؟ يعني ايه المشترك بناتهم عشان ما يجيبوش سيرة النصر ده ولا كأن فيه ايتها حاجة
كل الناس - حتى البيبسي سي - بتذيع كلمة سماحة السيد الا العربية والتلفزيون المصري
مش بس كده
ده النايل سات شوش على الجزيرة والعالم اللي كانوا بيذيعوا كلمة السيد حسن والقناتين جات لهم شرقة طول ما السيد حسن بيتكلم
وفي وسط الهلولة دي بقى مين كمان يطلع لنا بظرطة مالهاش اي معنى؟
ايوة اسم الله عليكوا
وليد جنبلاط
اسم الله على شبابه وهروينه وحقن الماكس بتاعته طالع يقول: على المعارضة ان تعطي التطمينات لجميع الاطراف
نعم؟ خير؟ فيه ايه؟
وصول الاسرى المحررين بالسلامة قالقه في ايه البعيد عشان عايز تطمينات
وما شفناش خلقته الموكوس
ولا هان عليه كلمة: حمد الله على السلامة، هو عايز ايه؟ يعني كان يبقى احسن لو الاسرى دول ما طلعوش؟ كان ح يبقى مطمن؟ زي ما قال ايام حرب تموز 2006 لو اسرائيل انتصرت ح تبقى كارثة ولو حزب الله انتصر سوف تكون كارثة اكبر؟ ولما الواحد يقول عميل ابن كلب يقولوا مافيش داعي للتخوين
امال ايه؟ حد يديني عقله
الناس لما تتبنى وجهة نظر العدو تبقى ايه؟
الناس لما تحزن يوم فرح اهلها وتفرح يوم حزنهم تبقى ايه؟
الناس لما تحصل لنا مصيبة تشمت ولما ننتصر تتخض وتطلب تطمينات تبقى ايه؟
حد يقول لي ده يبقى اسمه ايه عشان ابقى مؤدبة وما اخونش حد وما اشتمش عشان انا اصلي مسلمة والمسلمين قلالات الادب زي ما واحد سايب لي تعليق يقول لي كده
طب الواحد لما يوصف فعل يقوم يطلع وصف الفعل ده شتيمة يبقى العيب في الشتيمة وللا العيب في الفعل؟
عجايب والله