لبنان الكرامة والشعب العنيد...والمطرقع

وحشتوني يا عيال ويومين عدوا ووحشتني مصر وهدوء مصر وتهييس مصر :) وحشتني كلمة: يا عم احنا مالنا ما تخلينا في اللي احنا فيه...هو ايه اللي احنا فيه؟ ما اعرفش..اي موضوع يوجع الدماغ يبقى احنا مالنا خلينا في اللي احنا فيه
اوادم اللبنانيين والله، من ساعة ما توصل وهم بيبتسموا لك. طريق المطار منطقة انصار حزب الله، طريق المطار صور سماحة السيد، عماد مغنية، بعدها بشوية صور هيفاء وفضل شاكر، بعدين يافطة صفراء مكتوب عليها "لو جاء الكون كله...لن يعود الجنديين الا بالتفاوض غير المباشر والتبادل" وبعدها على طول صورة كبيرة قوي لنانسي عجرم وبعدين صور السيد وعماد مغنية وشهداء المقاومة وبعدين صور ملحم بركات وصابر الرباعي وهلم جرا.
ما اعرفش هم الفقرا هم انصار حزب الله وللا عشان هم انصار حزب الله هم فقرا، بس اكيد اكيد كل "المعترين" بلا استثناء من اول السواق والشيال والبياع الغلبان والجرسون اللي قال لي: الف ليرة متل الجنيه...الجنيه بيعمول شي بمصر؟ كمان الالف ليرة ما بتعمول شي...
كلهم بيحبوا حزب الله والسيد حسن بصرف النظر عن اساميهم طوني او علي: بتحبي السيد؟ يللي بيحب السيد منخدمه بعيونا
مش عارفة ليه الكرم الحاتمي المنار نزلوني في الماريوت، وكنت في نص هدومي...قاعدة في الاودة كأني نايمة على دم الشهدا ومكسوفة اطلب حاجة: ما سوينا شي..انت نورتينا بالمصري..هيدا اقل من الواجب

ظروف المعيشة صعبة كتير...تمانميت دولار ما بيعيشوا اسرة..كل شي غالي
كل حاجة سعرها كام في مصر؟ طب اضربها في اربعة وساعات خمسة وساعات....وااااااو
قميص نوم بالفين دولار...بيعمل ايه قميص النوم ده؟ بيقول ماما وبابا وبيروح المدرسة وبيضرب صواريخ على اسرائيل؟ برضه لو كده مش ح يسوى الفين دولار
قالوا لي جمال مبارك قبل العرس اجا هوني هوى وخديجة...واشتروا اشيا كتيييييير
بس انتوا مش باين عليكوا...شكلكوا بهواتي والالاطة واكلاكوا...يعني فقرا بهوات
يضحكوا: ايه والله...اللبناني لبسه ولا تأكله
سهام حيدرون اتصلت اول ما وصلت الفندق...بعدها بشوية اتصلت زينب رحال: بامرق عليك وبنضهر؟

انا عرفت زينب من الفيس بوك...لحد قبل ما اسافر ما كنتش اعرف انها صاحبة مدونة تأملات تافهة: انت يا ستي عايشة لي في دور عماد مغنية وطالعة لي بكذا شخصية؟ انت مش ع الفيس بوك قلتي لي انك صحفية؟ بتشتغل محاسبة وكان عندها مشاكل في الشغل لاسباب...طائفية واشياء اخرى...الجيب بتاعتها مش قصيرة...مش ضاربة شعرها في الخلاط...ومن برج البراجنة...بس الحمد لله المشاكل اتحلت وربنا نصفها وهي بتحكي لي تراكم المشاكل والاضطهاد اللي مالوش اي معنى لواحدة معاها شاهدتين جامعيتين وكفء وماعملتش اي جريمة وبعدين ربنا بعت لها مدير هندي حل المشاكل ضحكت وقلت لها: انت قريتي عليهم ورد وللا ايه؟ زينب طيبة قوي، لطيفة قوي، ذكية قوي، مثقفة قوي، شخصية مسئولة قوي، مرحة قوي، دمها خفيق قوي
قلبها محروق قوي، متألمة قوي، شايلة الهم قوي تحكي تحكي وابقى مش عايزاها تسكت
رحنا على المنارة، حاجة زي الفنار اللي عندنا في اسكندرية

اليومين اللي كانوا في لبنان كانوا مكثفين قوي ومليانين مشاعر متناقضة كتير وعرفت فيهم معلومات فوق طاقة مخي وفوق طاقة اليومين، عشان كده اول ما رجعت نمت...كان لازم افصل الفيشة
مش عارفة الحالة اللي متلبساني دي ح تفضل على طول وللا ده بس تأثير اليومين وبعدين ارجع زي ما كنت
اول ما رحت لبنان مريت بالمشاعر التالية
الترقب
الصدمة
صدمة جامدة موت
اكتشافات
نوة عياط (عياط بالمصري مش باللبناني)
ازبهلال
سعادة لدرجة البله
رايحة وانا ناوية اسمع كل الاطراف
راجعة وانا لابسة صورة السيد حسن ومش عايزة اشوف خلقة واحد يفتي في المقاومة وهو مش عارف حاجة
اتاريهم يا عيني عمالين يقولوا: انتو ما بتعرفوا شي...نحنا منعرف
تعرفوا ايه؟
.....الشأن اللبناني معقد
ولا معقد ولا حاجة....بس ..بس الكلام ما يتقالش يا ناس...حتى بجحة زيي مش عارفة ح اقوله ازاي
اللبنانيين عاملين كده

وشفت واحد مصري..في المنارة، اول ما بصيت في وشه عرفت انه مصري...زي ما بنعمل دايما بصيت له بفرح قلت له: انت مصري؟ ابتسم وفضل يدلع فينا عشان انا مصرية...وبعدين ابتدينا وصلة الندب اللي دايما نغنيها في كل حتة في العالم
الجرسون المصري بيقول للجرسون اللبناني: حاسب توقع القهوة...وقعها على المصرية تستحمل
انا: اه ما احنا حمالين قسية
الجرسون المصري: ما احنا غلابة...
صعبان علينا نفسنا بالقوي...واحسن حاجة اننا بنتكلم
تيجي تسأل في العلن اللبناني عن اللي واجعه يجاوب اجابة واحدة: الشأن اللبناني معقد
لما تقعد معاهم قعدة صفا ويفضفضوا تعرف ان لهم حق ما يتكلموش، مش عارفة اقول ايه؟ بس ح احكي لكم حدوتة
عويس وجعضيض اخوات وساكنين في شقة واحدة ايجار قديم وارثينها عن المرحوم والدهم، امهم واختهم معاهم. جعضيض تاجر شاطر، بس بيتاجر في كل حاجة، وعويس مش معترض على جعضيض بس: يا عمي تركني لحالي وعمول يللي بدك اياه
لا...يا تعمل زيي يا تبقى عدوي
عويس قال لجعضيض طيب انا ح ادفع ايجار الشقة، وح اخد اودة في الشقة وادفع لك ايجارها كمان من الباطن واقعد فيها مع امي واختي وانت: عمول يللي بدك اياه بباقي البيت
يا تعمل زيي يا تبقى عدوي
جعضيض عامل البيت كراخنة: كيف ما بدك...بس تركني وامك وخيتك لحالنا...
يا تعمل زيي يا تبقى عدوي
الجيران بيطلعوا الكرخانة بتاعة جعضيض وبيقضوا وقت لطيف يسكروا ونسوان وعيشة، وعويس قافل على نفسه وامه واخته الاودة، يسكر واحد من الجيران ويدخل على اودة عويس وامه واخته وراسه والف جزمة قديمة الا ينام مع اخته: طلع طلع
ييجي جعضيض: بتطرد ضيوفي؟ ما كانش العشم يا عويس...لو كان بابا عايش ما كنتش عملت كده
جعضيض ما عندوش مانع الجيران يناموا مع اخته وكمان امه لو ح يدفعوا...ما عندوش مانع؟ لا جعضيض كل ما اخته وامه يلاقوا لقمة حلال يسعى من وراهم عشان يقطع عيشهم ويجبرهم على الحرام
عويس ما يخلصوش...جاب قفل وحطه على باب اودته عشان يحمي امه واخته
كل ليلة جعضيض يسلط الجيران يتحرشوا بعويس ولما عويس يرد يرقع جعضيض بالصوت: شايفين؟ شايفين عويس بتاع مشاكل ازاي؟ كل يوم والتاني عامل لنا خناقة مع جار شكل
الجزار قال لجعضيض: طب وانت ايه اللي جابرك ع الحال ده...طفش امه..لك عليا كل يوم والتاني اخليه فرجة العالم لحد ما يطفش خالص من الحارة ومن البلد كلها
نزل جعضيض على القهوة اللي تحت البيت وقعد يعيط لاهل الحارة: اخويا...ابن امي وابويا...تصوروا واخد اودة من الشقة ومانعني ادخلها وحارمني اشوف امي واختي وبيوقع بيني وبينهم..وكل يوم متخانق مع الجزار وعامل مشاكل مع طوب الارض، وفيه ناس زي حضراتكوا كده طيبين..لكن الجزار كل يوم يطلع يكسر لنا الشقة...طب انا ذنبي ايه؟ اذا كان عويس شكلي وبتاع مشاكل
وعويس راجع من الشغل نداه معلم القهوة: ده اخوك...ابن امك وابوك...بقى تحرم عليه يدخل في ورثه؟ الاودة دي بتاعته زي ماهي بتاعتك...اتقي ربنا
عويس: والنبي يا معلم انت مش عارف حاجة
المعلم: عارف ايه؟
ح يقول ايه عويس؟ ح يقول اخويا بيشتغل في الدعارة؟ عيب...يتفها تنزل في عبه
في يوم جعضيض وواحد من الجيران كسروا القفل اللي على الاودة وداخلين على ام عويس وجعضيض واختهم جري عويس وقعد يقول: انت اتجننت يا جعضيض؟
وجعضيض ابدا مافيش..سكران و..أراب توب عليا
راح عويس قلع الحزام وهوش جعضيض بيه راح جعضيض باطح نفسه في الحيطة وهاتك يا صويت: يا ناس يا عالم اخويا بيضربني..سيح دمي
الناس اتلمت: هي حصلت يا عويس
عويس: كداب..ده هو اللي معور نفسه...هو اللي كسر القفل ودخل
الناس: وايه اللي يخليك تحط قفل على الاودة...البيت ده بيته زي ماهو بيتك بقى عشان كسر قفل تقوم تبطحه وتسيح دمه
عويس: انا اللي بادفع ايجار الشقة وبادفع له كمان ايجار الاودة
الناس: قصدك ايه من الكلام ده؟ عايز تطرد اخوك من الشقة؟ هي حصلت؟
عويس: اقول ايه...يا ناس..يا عالم...اخويا بيسرح نسوان...وعايز يسرح امي واختي، وعشان كده كل الجيران واقفين جنبه عشان بيستفيدوا منه
الناس: تؤ تؤ تؤ تؤ تؤ عيب يا عويس تقول على اخوك شقيقك كده..تتفها تنزل في عبك يا عويس
وطلع عويس هو الغلطان
---
احمد عز بيعمل ايه في البلد؟
طب احمد عز ملاك ينقصه الجناحين مقارنة باللي عرفته عن بتوع اربعتاشر اذار..بالمناسبة كلهم بتوع بزنس... وبزنس من الوسخ قوي...قوي...قوي.. لا لا ..انتو مش عارفين...قويييييييييييي، آه عشان كده المعترين بيحبوا السيد حسن، بدنا نعيش شعار شبه نحكم عقلنا كده
لا نحكم عقلنا؟ ده نحكم عقلنا ده قمر...بدنا نعيش يعني بدنا نشتوغل بالدعارة ونسكر ليل نهار
والكرخانة لازمها جو ملائم للابداع الفني
والمقاومة مش بتوفر الجو الملائم
بس..والله العظيم بس...والله العظيم بس...والله العظيم دي كل حكاية الشأن اللبناني المعقد
ناس عايزة الوطن كرخانة، وناس بتقول طب نقسم البلد نصين، خدوا حتة اعملوها كرخانة وسيبونا احنا برة الكرخانة...لا، يا تعمل زينا يا تبقى عدونا
-------
هنا الضاحية:
بالليل سهام عزمتني انا وبشرى من البحرين على العشا
بشرى ناشطة من البحرين...دمها خفيف قوي، والله حكت لي عن البحرين كلام
الا قولوا لي، هو اوسني عامل ايه؟
يا ترى عامل: مدرسة اوسني السرية لشلل الشعوب العربية؟
رجال الاعمال عاملين ايه في البلد في مصر؟
اهم هم والامراء في البحرين تافين في بق بعض، لدرجة ان فيه واحد من العيلة المالكة بنى سور جوة البحر...البحر بتاع ربنا، بنى فيه سور وقال: الحتة دي بتاعتي...ماحدش يصيد هنا
البياعين اللي بيقعدوا على الرصيف..واحد من العيلة المالكة معدي عليهم لقاهم بيبيعوا قال: ودول قاعدين كده؟ كل واحد عشان يقعد على الرصيف يدفع لي فلوس..ثم..ثم الارض دي بتاعتي بقى...امشوا من هنا
قعدنا في مطعم الضاحية مع سهام وبشرى، سهام ضحوكة وحبوبة وحنونة كأنها ام مع انها صغيرة في السن
جه بعد شوية بسام المذيع اللي المفروض يعمل معانا الحوار عشان يتكلم معانا
مين قال ان اللبنانيين عكس المصريين في كل حاجة؟ فيه حاجات اللبنانيين شبهنا فيها بالمللي
وفيه حاجات هم عكسنا تماما
شبهنا في ايه؟ دايما مبتسمين، كل حاجة يسخروا منها حتى نفسهم، مأفئفين ومتضايقين، دايما متضايقين بس دايما بيضحكوا عشان هم متضايقين، كل حدث مهما كان دامي طالع عليه عشر نكت يوجعوا بطنك من كتر الضحك...يضحكوا ويعيطوا في نفس الوقت (يعيط بالمصري مش باللبناني)
عكسنا في ايه؟ مش صعبان عليهم نفسهم زينا، يمكن بيحملوا نفسهم مسئولية اي حاجة طول الوقت
كل لبناني براسه، الاخبار بتقول ان في لبنان فريقين: فريق سلطة وفريق معارضة
بس اللي شفته ان فيه تلاتة مليون فريق، كل لبنان فريق لحاله على رأيهم
في القعدة الواحدة شخصية كل لبناني بتتغير زي البحر
لما قريت عن عماد مغنية انه كان عايش كذا حياة وكل مرة بوجه مختلف وسلوك مختلف وطبيعة معيشة مختلفة قلت: دي عيشة صعبة قوي..ممكن يكونوا بيبالغوا
بس لما تعرف اللبنانيين تعرف انهم بسهولة ممكن كل واحد فيهم يبقى عماد مغنية
حتى بسام وسهام كده
اللبناني لما بياخد موقف ما بيبقاش ماشي ورا حد...بيبقى ماشي ورا دماغه هو وبس ولو جابوا له ميت دماغ على دماغه مش ح يمشي غير ورا دماغه
اللبناني عمره ما يقول خلينا في اللي احنا فيه، ولا يقول وانا مالي يا عم انت ح توجع دماغي...كل حاجة اللبناني حاشر مناخيره فيها، كل حاجة في الدنيا تخصه
عشان فعلا كل حاجة تخص كل حد
طبعا احنا مش كده
نتكلم عن الانتخابات الامريكية يقولوا واحنا مالنا ما تخلينا في انتخابات مصر
وكأنه مثلا اللي بيقول كده بيستعبط...يعني هو مش عارف ان امريكا هي اللي بتحكم العالم؟
نتكلم عن الحريات في العالم يقولوا احنا مالنا
نتكلم عن كل حاجة يبقى واحنا مالنا....مع انه مالنا ومالنا...مع ان كل حاجة بتحصل في العالم بتخصنا وخاربة بيتنا..
- ليش ساكتين؟ مصر عظيمة ونحنا بنحبا...انتوا تمانين مليون..صابرين والله...بس ليش؟
الله الله...انتوا ح تتنططوا عليا وللا ايه؟
احنا مش ساكتين...بس نبقى زي العراق يعني؟
- اممممممممم وليش؟
معاهدة السلام... مش ساكتين...بس لازم ناخد حذرنا ..بنحاول تاتا تاتا ناخد ولو حق صغير بحرص... اللي عشاناه تحت قصف السلام تلاتين سنة اكبر بكتير من القصف اللي عشتوا تحتيه
تسعة وتسعين في المية من اوراق اللعبة كانت في ايد امريكا؟
بعد معاهدة السلام بقت مية في المية من اوارق اللعبة في جيب امريكا...بس احنا مش ساكتين
- الله يعينكوا
الناس في مصر...حتى سواق التاكسي اللي وصلني للمطار كلهم بيقولوا لي سلمي لنا على حسن نصر الله
زي ما العرب كل ما يشوفوا مصري يقولوا له: قول لنا نكتة...سلم لنا على عادل امام
بعد كده كل اللي ح يشوف لبناني ح يقول له: اضرب صاروخ...طلع اسير من جيبك...سلم لنا على حسن نصر الله
-------
شفت سمير القنطار ازاي؟
صحيت الصبح اتصلت بالمنار وطلبت نمرة غسان بن جدو لانه صاحبنا وقلت اسلم عليه
اتصلت بيه قال لي: تكوني باللوبي بعد عشر دقائق...بتجيلك سيارة تجيبك لهون
السيارة اللي جات مش بتاعة سواق، ده مراسل صحفي بس عملها خدمة وحكي شوية بس بحرص: يعني فيكي تعيشي بتمانميت دولار..بس مافي سيارة، مافي ساليلور، بس ع القد
وفيه ناس عايشين بعشرتلاف دولار...بس هني مانن اغنيا كتير...وفيه ناس...ناس..وكيف مصر بقا؟
دخلت مكتب غسان بن جدو وما كانش هو فيه ولقيته عامل معرض لغنائم حرب تموز الاخيرة

بس الخوذة والقميص بتوع قناة الجزيرة

الله يعز المقاومة...لولاها كان زمان راس غسان محطوطة في معرض اسرائيلي
اسرائيل عايزة تقفل مكتب الجزيرة في فلسطين المحتلة عشان غسان عمل لقاء مفتوح مع سمير القنطار، واحنا قاعدين وبشكل عابر غسان قال: ده سمير فوق
- سمير مين؟
- سمير القنطار
رقعت بالصوت: ايه؟ فوق فين؟
- فوق بيسجل..شو؟ بدك تشوفيه؟
- انت بتتكلم ازاي
- خلص...قعودي هون لانه بلش تسجيل

شوية وغسان قال لي تعالي نطلع، قبل ما يقول لي نطلع ابتديت افيد، بقى يتكلم معايا وانا اجاوب على حاجات تانية، قال لي مالك قلت له متوترة شوية، طلعنا وكان سمير القنطار لسة بيسجل
طول ما انا طالعة في الاسانسير عمالة احضر في خطبة طويلة عريضة استقبل بيها البطل ومش عارفة ركبي بتخبط في بعض وبطني بتكلبش وابتديت ادوخ..اول ما شفته ما حسيتش غير وحنفية مية سخنة اتفتحت في عينيا الاتنين وكلي بيترعش
قعدت وعمالة ابص له وهو بيتكلم ومش سامعة بيقول ايه خالص
انا بابص على تلاتين سنة من العذاب والالم والبطولة والتحمل
انا بابص على تلاتين سنة من "ما بدلوا تبديلا"
انا بابص على انتصار
انا بابص على عند وعزيمة
انا بابص على مناخير اسرائيلي معقوفة...مدعوكة في التراب ومكسورة والبطل دايس عليها
اول مرة اشوف بطل وانا كبيرة
وانا عندي تمن سنين شفت فتحي الشقاقي...ومع اني كنت طفلة مش فاهمة حاجة بس الهوا كان بيئز
الجو حواليه كان بيعمل كده: ازززززززززززز، وكان فيه احساس بالخفة كأن الواحد طاير وكأنك واقف على الفاصل ما بين العالم ده وعالم تاني كله انوار والوان
كنت طفلة والطفولة بريئة شفافة عشان كده الازيز بيبقى خفيف على نفس الاطفال
نفس الجو كان حوالين سمير القنطار، بس انا كبيرة، حسيت اني فقدت توازني واني ح اقع
اول ما خلص وقفت كان بسام القنطار وبسام القادري واقفين قلت لهم اسلم عليه
اول ما قرب وسلمت عليه اعصار من العياط وهو اتخض وبعدين ابتسم لي عشان يخفف عني: قعودي...جيبولا كاسة مي ...ارتاحي..ارتاحي
مش عارفة قلت ايه...يا رب ما اكنش خرفت، اكيد اكون خرفت لانه كان بيضحك
انا مش فاكرة غير جمل متقطعة: انا مش عارفة اقول ايه...انا مش مصدقة نفسي..انا شفتك خلاص اموت بقى
ضحك: لاااااااااا شالله بتعيشي مية وعشرين سني
- انا كنت محضرة كلام كتير...انا بابص على النصر..على بطل...على ولي من اولياء الله... ادعي لي... ادعي لي..ادعي لي (ييييي اديني عيطت تاني)
- الله يوفقك اهم شي...الله يوفقك
بسام القادري: اذا معك كامير ما تنسي تتصوري...
- اه صحيح...اتصور
وزي ما انتوا شايفين شكلي في الصورة مفحوتة من العياط

اه..افتكرت...الاسير المصري...انت عارف كل بني ادم في الدنيا له بلد تسأل عليه الا احنا...مالناش غير ربنا
سمير ما ضحكش..بان عليه الحزن والتأثر
ايه حكاية الاسير المصري: اياد ابو حسنة، من رفح المصرية، سنة 1989 دخل مع ايمن يونس الاراضي المحتلة لوحدهم من غير ما ينظموا ولا ينسقوا مع حد...دخلوا يعملوا عملية كده من دماغهم، اتقبض عليهم، وهم جوة السجن المساجين قالوا لهم: فيكوا تلتزموا مع حدا..لازم، ايمن يونس التزم مع فتح، وعشان كده طلع اياد ابو حسنة اختار حماس وعشان كده ما طلعش لحد دلوقت، هو مش من حماس، بس جوة السجن لازم يتبع لاي فصيل سنه دلوقت حوالي 39 سنة يعني كان عنده عشرين سنة لما اتقبض عليه
خلص سمير
مش عايزاه يمشي...وخايفة يقعد اكتر من كده يبقى فيه خطر عليه
انا ما مسحتش ايدي فيه واخدت بركة على وشي...متهيالي...متهيالي ما عملتش كده...يا رب اكون ما عملتش كده...يا نهار اسود..لا لا لا لا لا اكيد اكون ما عملتش كده
اه اه..افتكرت..معلش يا شباب صح افتكرت، هو انا مخي وزني اعمل كده، بس ربنا الهمني اني بدل ما اعمل كده اقول له: ممكن اسلم عليك تاني
سلمت عليه وبعد ما مشي استنيت ماحدش بيبص عليا ورحت ماسحة وشي وراسي مطرح ما سلمت عليه
مش ح تحسوا بالوقوف على الخط الفاصل ما بين عالم المادة وعالم الانوار غير لما تشوفوا سمير او حد زي سمير
الكلام ده حقيقة مش خيال

كنت اتمنى اشوف السيد حسن، بس انا كنت قاعدة يومين، لو شفت سمير الصبح والسيد بعد الضهر كان ممكن ارجع لكوا في صندوق اثر سكتة قلبية
مافيش انسان يستحمل كل الازززززززززز ده
------
هنا الضاحية...من جوة:
نصر الله ده مش السيد حسن...ده نصر الله تاني

رجعت على الفندق والاززززززززززززززز لسة حواليا...رجليا خفيفة على الارض..لسة هالة الطاقة لاحقاني، لقيت بشرى والسواق بتاع المنار مستنيني وبيأفئفو: وين كنتي
كنت مع سمير القنطار
بشرى: يا خااااااااااااااااااااااايييييييييييييييييييييييينننننننننننننننننننننةةةةةةةةةةةةةةة
طلعت بسرعة غيرت هدومي ورحنا على البرنامج هناك كان فيه شاب فلسطيني وشاب لبناني اسمه سليمان فرنجية بس مش سليمان اللي كان وزير واحد من نفس العيلة وبيشتغل المسئول الاعلامي في تيار المردة
خلصنا البرنامج ورحنا على المنار...التصوير ممنوع...المنار مستهدفة
طلعنا وكان اليوم خلصان والموظفين مشيوا مش باقي الا بتوع الهوا
عايزة اروح قبور الشهداء
زينب كلمتني على المنار: وينك؟
رايحة قبور الشهداء
خلص..بشوفك هونيك
تاني الاززززززززززززززززززززز
في قبور الشهداء

كان فيه زيارة...اهالي كتير كانوا موجودين
كل ما تدخل اكتر..الاززززززززززززز بيزيد وحنفيات المية السخنة اللي نازلة من عيني بقت مواسير

هنا

يرقد عماد مغنية بسلام

لا مؤاخذة...الموبايل وقع من ايدي...قعدت جنب القبر متربعة والمواسير طفحت من عينيا
امال ادهم الصفتي قال لي انصار حزب الله بيضربوا البنات عشان يتحجبوا في الضاحية ليه؟
امال دول ايه؟

لولا ان التصوير ممنوع في الضاحية كنت وريتكوا غيرهم...وعاملين تاتو كمان
طب امال فين انصار نصر الله عشان يضربوا دول

ليه يا ادهم كده؟ عموما انا فضحتك يا حبيبي :)) وقلت لهم فيه مدون اسمه ادهم الصفتي بيقول انه شاف كذا كذا بان عليهم الخنقة: نحنا ملينا والله

خفف الوطء
وامشي الهوين
هنا

يرقد عريس المقاومة
هادي نصر الله

اززززززززززززززز كتير عليا في لبنان
خصوصا اني جاية من وشششششششششششششش كتير في مصر
مشينا في الضاحية وكان ابتدا العمار
امممممممممم العمار اللي بيقولوا: المقاومة واخدة فلوسه من ايران
طيب وفلوس السوليدير؟
ششششششششششش اسكت يا لساني اسكت يا لساني ماهو انا ما رحتش يومين عشان الخبط لهم الدنيا
الشأن اللبناني معقد
ايه اللي مضايق فريق السلطة ان المقاومة بتعمل الاعمار؟
مع انها بتعمله سلف لحد ما السلطة تصرف التعويضات وهم ياخدوها ولو فيه فرق المقاومة تتحمله
بس لان فريق السلطة كان عايز يعمل الضاحية زي سولدير ويعمل عليها مناقصة واسهم والعبي يا مدرسة العاب
اسهم سعودي..اسهم امريكاني...اسهم..............اسرائيلي
وبيع يا جعضيض واكسب
والله ده مش بس له علاقة بالكرامة ده له علاقة بالامن
الضاحية بتاعة المقاومة والتصوير فيها ممنوع دلوقت، لما تتباع الضاحية اسهم وكل اللي ما يشتري يتفرج عليها يبقى السيد حسن - بعد الشر عليه انشالله اللي يتمناها له يا رب - يتنش بمنتهى السهولة، سيبك من السيد، المقاومة كلها تتنش، لان المنطقة بقت مكشوفة، مكشوفة على كل مستوى...والبضاعة تتباع بالفين دولار لقميص النوم، وطبعا ماحدش يشتري، ولما محدش يشتري صاحب المحل ياكل منين؟
ما علينا ما علينا كل واحد ونباهته بقى
لما مشينا في الضاحية ما كناش نعرف ان ممنوع التصوير صورت انا وبشرى وبعدين شاور لنا واحد من الحرس انه لا، نزلنا من العربية ورحنا لهم: احنا صورنا خدوا الكاميرات والصور وشوفوا ايه اللي عايزين تمسحوه وامسحوه
- والله منعتذر منكن بس هيدي احتياطات امنية
على قلبي عسل...اعملوا احتياطات امنية اكتر واكتر...التربص من جوة ومن برة
جعضيض عايز ياكل عيش
واسرائيل عايزة السيد
والصور احداثيات ممكن يستفيد منها الاعداء
بشرى قالت لي: اول مرة احب الاحتياطات الامنية
- لا خدي انت وامحيها...صورتي الشباب شي؟
لا انا مش مجنونة للدرجة دي هم عمارتين اللي صورتهم...واهم مسحتهم
- والله منعتذر منكن
لا احنا اللي بنعتذر
وليد جنبلاط زعلان من القفل اللي على الاودة...مع اني شفت بيته وهو عبارة عن ثكنة عسكرية
وبعدين رحنا مطعم الساحة..حاجة كده زي مبرة تبع السيد محمد حسين فضل الله الريع بتاعها بيروح للايتام
امال فين اللي بيضربوا الستات يا ادهم؟

هع هع هع معلش يا ادهوم
------
صحيح في مصر عشان تكره المقاومة لازم تكون غيران او مضحوك عليك والاتنين حالات انسانية يمكن التعاطف معاها
بس في لبنان عشان تكره المقاومة لازم تكون قواد بالمعنى الحرفي للكلمة، بكل تفاصيلها
مش عارفة ينفع الواحد يتعاطف مع الحالة دي وللا لا؟
-------
انا بطبعي مش باتعاطف مع القواد...ممكن اتعاطف مع العاهرة، تصعب عليا، لكن ما اقدرش اتعاطف مع حد بياكل من اعراض الناس، عشان كده وانا رايحة المطار في رحلة الرجوع لبست صور السيد حسن
في المطار
لبنانيين اغنيا قوي، قوي، قوي، تمانميت دولار يدوها بقشيش للسواق
بيبصوا لي من فوق لتحت
في المطار
شيالين وكناسين ومعترين وجيش يبصوا لي ويبتسموا ابتسامة بغمزة وكأنهم بيقولوا لي: أميه أميه
ولما اتكلم مصري قلبهم يبقى ح يقف من الفرحة ويبقى هاين عليهم يلفعوني على كتافهم ويوصلوني مصر مشي وهم شايليني
المساكين عندهم بوصلة انا باثق فيها
وكلهم زي بعض....في كل حتة في العالم
مساكين هناك زي مساكين هنا
والمساكين دايما صح، والا ما كانش الرسول صلى الله عليه وسلم يقول: اللهم احيني مسكينا وامتني مسكينا واحشرني في زمرة المساكين
اللهم آمين