حصلت حاجة غريبة

دلوقت واحد صاحبي امبارح، هو مالوش في السياسة خالص بالمناسبة هو راجل اكاديمي وبيدرس في الجامعة الامريكية لغة عربية للاجانب، امبارح قال لي حاجة غريبة قوي، قال لي فيه واد كان بيدرس عندي من سنتين يهودي واسمه ستيف فاينبرج، الواد ده بيشتغل مع كوندوليزا، وقال لي يا دكتور - من سنتين - افتكر الاسم ده: باراك اوباما، قلت له اشمعنى يا ستيفن قال لي عشان ده اللي ح يبقى رئيس الولايات المتحدة كمان سنتين،طبعا انا - ده صاحبي اللي بيقول - ما حطتش في بالي وما افتكرتش اسمه غير لما قالوا المرشح باراك اوباما

طيب
الايام بينما، لو كلام ستيف اللي قاله لتامر طلع صح، يبقى الانتخابات الامريكية فيها حاجة، والله لو كلامه طلع صح ناري ح تبرد شوية، على الاقل ابقى حاسة ان السي اي ايه هي اللي بتقرر مين اللي ح يحكم مش الانتخابات الحرة المستقلة وعليه فانا ح احس بالونس على رأي فانون، على الاقل لما مش بانتخب وعارفة اني مش بانتخب احسن ما ابقى مش بانتخب وانا فاكرة نفسي بانتخب
انما الواد ستيف ده، لو كلامه صح، يبقى اهبل قوي يعني، بيقول لدكتور مصري الكلام ده؟