مصر هي غمي
تخيل يا افندم لو حضرتك هواري أبا عن جد صاحب اراضي يرمح فيها الخيال ويرد
قول يا رب، عقبال كده ما اشوفك باش تومرجي قد الدنيا
وتخيل انك جبت ناظر زراعة وجبت له مساعدين
وبتدفع لهم مرتباتهم طبعا من مالك الخاص عشان يراعوا شئون الارض
وجبت شيخ غفر وشوية غفر كتير كده
عشان يحموك ويحموا الارض
وعرفت ان الموظفين اللي انت صارف عليهم من الابرة للصاروخ
بيسرقوك
وطنشت..ياللا خلي الشعب يعيش
ولكن
اذ بيك يا محترم تفاجئ او توفوجأ
ان الغفر مش بيحموك ولا بيحموا الارض
بيحموا ناظر الزراعة ومساعديه
بس
مش بس كده
دول بيغطوا ضهر بعض في السرقات
مش بس كده
ده نظار الزراعة والغفر شالوك هيلة بيلة انت وعيالك
ورموك في السكة
وقعدوا مكانك في السرايا
لا وايه
كل شوية الغفر يطلعوا عليك وينزلوا فيك انت وعيالك
ضرب
وبهدلة
وتعذيب
وحبس
وياكلوا قوتك وقوت عيالك يا عبد الهادي
وكمان بقيت تشتغل في الارض يا سعادة عين أعيان الناحية كلتها
بالاجرة
ومش بتاخد الاجرة
بياخدوا فلوس المحصول اللي انت شقيان فيه
ويضربوها في كروشهم
وكل شوية ناظر الزراعة بتاعك يطلع لك من شباك سرايتك اللي انت مطرود منها
ويقول لك: طيب وانا ح اكلك منين؟
هو انت على طول همك على بطنك؟
مش انت بس اللي حالك كده
ده ملاك الاراضي في العزب اللي جنبنا كلهم بقوا بيشتغلوا عند نظار الزراعة، ح تعترض بقى على حكمة ربنا؟
وبعدين يا سيدي لما انت
خدوا منك السلاح وبالتوكيل اللي انت بهبلك عملته ليهم
باعوا الارض كلها
شوية كتبوها باسمهم وباسماء صحابهم
وشوية كتيرة
باعوها لعيلة الدهاشنة اللي فيه بينك وبناتهم تار بايت ما ينمحاش الا بالدم
اما انت بقى يا هواري
اتعفقت من قفاك
ومسكوك وحطوا في مؤخرتك عصايا
وصوروك بالموبايل
وكمان سجنوك عشان بتتهرب من عصاية السلطات
والمخلل
ايه يا هواري
ع تلطم على راسك ليه يا ولا
مش انت اللي هملت ارضك لحدت ما هجامة بلعوها في كروشهم
جاي تحزن على مؤخرتك دلوكيت؟
امال كنت فاكر ايه اياك؟
ع يهملوك لمن تفوج لروحك وتطالب بحجك؟
جاك خابط
خليت رجبتنا كيه السمسمة
وما عملتش كيف أبويا محمد ابو سويلم اللي كلبش في ارضه
علمت كيف سي عواد اللي باع ارضه
وجالوها زمان يا ولدي
اللي يفرط في ارضه يفرط في عرضه يا خال
سلامة جلبك الابيض من الوجع
وعيونك السود من البكا
اسم الله عليك يا حبة جلب اختك
روحي يا دمعة من عين الهواري
الاصيل ولد الاصلا
اللي همل حجه من طيبة جلبه
وكلبشي يا دمعة بنارك في الجلوب الحجر اللي هان عليها تعض اليد اللي اتمدت لها بالخير
17 comments:
يانوارة
ماهو أصل العيب مش في الهواري الصغير
الحق على الهواري الكبير اللي ساب حقه
وولاده اتولدوا على الأسفلت
ماشافوش غير الأسفلت ومايعرفوش غير الأسفلت
وشافيين ابوهم الهواري الكبير مططاي وخايف وكمشان في نفسه
قال و يقولهم: شايفين ياولاد السرايا اللي هناك دي ..دي بتاعتي وبتاعتكم
وأكيد رد ولاده هيكون سلامة عقلك يابا.. وطي صوتك لايسمعوك يطينوا عيشتك.. زي ماكان بيقولهم زمان وزي ماعودهم ورباهم على كده
ماحدش من عياله هيصدقه
دي اسمها وكسة مش طيبة يانوارتي
العيب اكيد فى الهوارى الكبير بس اكيد الولاد لازم يحاولوا يسمعوه يحاولوا يفهموا والا مش هايلاقوا مكان تحت الشمس لان الخوف فات اوانه ماعدش فيه حاجه ممكن نخسرها بعد كل الخراب ده الامل دلوقت فى انهم يعرفوا ويفهموا قبل الطوفان طول ما فيه شمس لسه الامل موجود حبى للجميع
ححاية قديمة
من غير زعل
التكرار كان بيعلم الحمار
بس يظهر ان الحمير المعششة جوة عقولنا
ما بتتعلمش
الحمير اللى جوانا مستنيين الفلاح يموت عشان يهربوا
ميعرفوش ان الفلاح لما يموت ها يجى ابنة
وبعد ابنة جاى ابنة وهاكذا
إنتى نسيتى أغنية التتر فى المسلسل الصعيدى ده يا نواره.
"ولابد عن يوم معلوم تترد فيه المظالم، يوم أبيض على كل مظلوم و أسود على كل ظالم"
من أغنية التتر دى نفهم إن لسه الحكايه مخلصتش، يعنى المفروض يعنى المفروض إن النهايه سعيده، بس يا ترى حنلحق نشوفها؟
مشكلة هوارى انه إتسحب خطوه خطوه لغاية اما إنتهى بره عالاسفلت
بس اللى اتعلمناه من كتب التاريخ انه هايفوق لما يتخبط خبطه جامده ترجعه لرشده و لأرضه و تبين معدنه الحقيقى
تحياتى
إزيك يا بت يانوارة..........
أنا هاأختلف معاكى المرةدى
الكلام دة ينفع لما يكون صاحب الأرض هو شخص واحد أو إثنين أو أسرة من كذا فرد ودة بالكثير
ويكون الناظر ومعاه شيخ الغفر والعسكر وطبعا هايكون عددهم كبير وبكدة يقدروا يسيطروا على الموقف ويتحكموا فى هذة الأسرة الساذجة
لكن لما يون الناظر والعسكر عبارة عن عدة ألاف على أعلى التقديرات
ويكون السادة أصحاب الأرض هم أكثر من
70مليون
يبقى مالهومش حجة لما ياخدوا على قفاهم من الناظر والحاشية بتاعتة
وكمان يحطو السيخ المحمى فى ...!!!!
طبعا كلكم عارفين فين
أكيد لازم الأولاد يتعبوا عشان يرجعوا حقهم لكن عندي سؤال مش الجماعة الغفر دول طالعين من عندنا يعني ولدنا وأصحابنا بيخشوا شرطة ثم يبقوا من صنف الجماعة إياهم طب مش لو إحنا علمناهم الأدب ودخلناهم شرطة مش ممكن مع الوقت يتغير حالنا لوحده
incomplete
فشر
ايه انكومبليت دي ما تقوليش عن نفسك كده
ده انت ست الكاملين
:)
صحيح الحق ع الهواري الكبير
بس اهو اللي حصل
ما هو راخر حالته كانت واعرة جوي
زي ما
viva egypt
ع تجول
النفر من دولم
بيخلف الرجالة لجل ما يبجوا عزوة وسند
لابد من كل بد
يسندوا ابوهم وبسهم عاد الملامة
العايط في الفايت نجصان عجل
وللا اه؟
مش فاهم حاجة
يعني يروح ناظر الزراعة ويجيب لنا ولده واحنا جاعدين كده
ده احنا نبجى شين
جوي خالص
believer
شوف اصلا انت شخص محبوب جدا على فكرة
على الاقل انا استنتجت كده من التعليقات اللي ع المدونة
بص
انا شخصيا شايفة انك محبوب كده عشان روحك فعلا حلوة
والدليل قالوا له
عندك امل ما شاء الله ربنا يديمه عليك
لولا الامل كان زمانا رمينا نفسنا من برج القاهرة
البتاع
برضه متفائل
هو ح يتخبط اكتر من كده ايه؟
كل مواطن ماشي يقول: استر على مؤخرتي يا رب
اللامؤاخذة المخصي
يا راجل غير اسمك خدشت حيائي
المهم
العدد في اللمون يا كابتشن
تمانين مليون مع فقهر وجهل ومرض ويأس ورعب ما يعملوش واحد صحيح
شباب روش طحن
والله انت قلت الكلمة اللي كانت في بالي
صحيح الشرطة دول ولادنا
ايه مالهم
بينسوا ليه؟
مريم
اه
والمصيبة ان الهواري الكبير يا شيخة مش عايز يعترف انه هو السبب في كل اللي حصل
بسبب طغيانه وظلمه
اخرتها الغفر اتجرأوا علينا
مش هو اللي جابهم وملا الارض بيهم
وقال كان فاكر انه ح يقدر يسيطر عليهم
اهو مات
وساب لنا الغفر يبهدلوا فينا
وكمان جاب لنا ناظر زراعة وسخ قبل ما يموت جاب اللي اوسخ منه
ايه ذنبنا احنا؟
والله مالناش ذنب
بس الهواري الكبير مات
والميت ما تجوزش عليه الا الرحمة
مافيش غير اننا نحاول نرجع ارضنا ونعرف كل واحد مقامه
مش بااااااااارضه؟
okai ya Nawara ana ma3aki fe fekretek bas ana 3iza as2alek so2al...Hawari ba3 ardouh we 3amal da kolo tab eih zanb awlad Hawari ele we3yeou 3la el donia la2ou el mawqef kda...
ai na3amfe menhoum ele estaslem bas fe keteer menhoum bey3mel ele 3aleeh... !!
eih zanb awladou ama yesma3 men asa7ab aradi tania beytray2o 3alehoum we ye2olelhoum: Hawari ba3 ardou ya wlad, shofo tolo we 3ardo ya awlad !!???
eih zanbena e7naaaaaa
zanbena enena awlad 3awad ??!!!
nel3an fe abou Hawari 3la abou el youm ele fakar yebe3 feeeh ardo ??
netbara menoo ??
wala ne3mel a??
mahi el 3asaia mab2etsh fe mo25ert Hawari bas... lamou25za de ba2eet fe mo25erto howa we 3eyalou we a7fadooooo !!!
we bardo beysma3ou nafs el 2ou3'nia : Hawari ba3 ardo ya wlad,shofo tolo we 3ardo ya wlaad !!!
azoun ya Nawara that we r on it...a2sod en e7na adena ben7awel we bens3a en e7na nerga3 ardena... wel 3awaqeb ele bet2abel el 7amdoullah bensta7melha...bas 3rfa ana 5ifa men a?? la yege 7ad ye2ol ana te3bt we yene5 weybee3 el adia zi maby2olo......
و الله يافندم أنا مش قد الكلام ده
لو كلامك فعلا صح، فده الحمدلله نعمه من عند ربنا، و ربنا يديمها.
بخصوص الامل، أنا شامم ريحة حقد كده فى كلامك. لو عايزه قولى و انا اجبلك شويه بلاش يعنى نبص لحاجة بعض
:)
دائماً يكون الحق في احتياج مستمر للقوة
لا لتحميه فقط
ولكن ليبسط بها سيطرته على مراتع الظلم المنتشرة بيننا
تحياتي
الغلطة بس يا نوارة في البوست ده ان الهوراي جاب الناظر من بره الارض
لكن الحقيقي ان حكومتنا الجميلة مجتش من المريخ دي حكومة مصرية خارجة من جوا الشعب المصري
و الشعب المصري راضي عن الحكومة مع انه عارف كل بلاويها و محدش يقولي عكس كده لانه لو مش راضي طيب سايبها ليه مبيثورش ليه؟؟
الاسلام السياسي جه مصر من برا لكن الحكومات الفاسدة دي اختراع مصري بيتم تصديره
تحياتي
من زمان وانا كل ما حد يسألني طب ايه العمل
ارد علي طول العمل عمل الشعب المصري
اكيد في امل
الناس اللي طردت الهكسوس
والشعب اللي وقف المغول عند حدهم واللي العالم كله يدين لهم بالفضل في ذلك والابطال اللي ردوا الصليبين والجيش الوحيد اللي انتصر علي اليهود
اكيد الحل في ايده
بس واه من بس
اليومين دول بتكسف اقول الكام بق دول
حاسس ان الجينات اتغيرت
لعبوا في اساس الشعب
غيروه من جوه
اصلي مش شايف الحاجات اللي كانت جوه الشعب ده الكرامة وعزة النفس والجدعنة والمروءة
احنا اتسرقنا من جوه واللي سرقنا برضه من جوه
بحري من اسكندرية
محمد ابو سويلم مكلبش فى الأرض راجعى القصه الأصليه
هوارة باع(طيب أن هافرج الواد أحمد) أو مبعش لازم أولاد الكلب ولاده(لأ هو الكلب ذنبه ايه) يعني يبطلوا سلبية و نواح(الصبر حلم العواجز) وقرف اوووووف
و كل واحد فيهم يحدد لنفسه هدف و مهمة
جتكوا القرف مليتوا البلد
ولا هنقعد زي عوكل تايهين في الميادين تحت التماثيل و نندب و نقول يادي البطاطا اللي أكلها يا ضنايا
Post a Comment