Saturday 14 April 2007

بعد عبد الكريم..أكيد ح يبقى منعم

لسة حالا عارفة موضوع منعم

عبد المنعم صاحب مدونة
أنا إخوان

عرفته من جيمي

آه...للي ما يعرفش الموضوع

منعم الأمن داهم بيته وهو مش موجود

واتعمل له قضية

ومطلوب

بس لسة هربان

بيقول انه ح يسلم نفسه عشان اهله ما يتبهدلوش

ووالده اصلا مريض

منعم من الشباب اللي زي الفل على فكرة

اول ما ابتديت ادور في المدونات

لقيت واحد داخل كده بصدره وكاتب على مدونته: أنا إخوان

قلت يا حلاوتك

وحياة عينيك ما ح يسيبوك

وروحي يا ايام وتعالي يا ايام

وحصل موضوع عبد الكريم

وقلت لصديق عزيز كان بيجادلني كتير في موقفي المساند لعبد الكريم

قلت له باللفظ: إيه رأيك ان تاني مدون ح يتعمل له قضية هو منعم بتاع أنا إخوان؟

والليلة دي قلت له: أنا بعد كده ح اعمل النبوءة بنص جنيه

طبعا هي مش نبوءة ولا حاجة

بس ربنا عرفوه بالعقل

عبد الكريم ما يسواش حاجة عند الحكومة

والحكومة ماهياش حريصة قوي على الدين

وما حدش يقول لي شتم حسني مبارك عشان فيه غيره كتير

مدونين تقال بيشتموا حسني مبارك

بس الدولة ما ابتدتش بيهم عشان تقال

وبصراحة كده

حسني مبارك مش بيزعل من الشتيمة

هو قال كده بنفسه

لكن المدونين دول وجع دماغ

وفاضحين الدنيا

ومدخلين ظباط الداخلية في القفص

من ضمن المدونين اللي واجعين دماغ الدولة

منعم

بالذات عشان اسم مدونته : ما تقدرش...قصدي أنا إخوان

الطبيعي إن الدولة، بحبس كريم، بتحط رجل في النت

وبعدين تبرتع بعد كده

وبما انها عندها هسهس إخوان

فأول واحد، بعد كريم، ح يتعمل له قضية هو

"ما تقدرش"
وبعدين

وللا بلاش اقول مين التالت

احسن ابقى بافول عليه

بس فيه واحد تالت

أنا شخصيا مستنتجة هو مين

وانا مش ست الشيخة ولا حاجة

بس ده المنطقي

الدولة لما جات تحط رجل في النت اختارت حد ما عليهوش اجماع

وبعدين

بعد ما عملت سابقة قانونية

تختار ما بدا لها

ويبقى ساعتها ينفعه الاجماع

عشان كده كان لازم يبقى على عبد الكريم اجماع

عشان منعم ما يبقاش مطلوب دلوقت

معلش يا منعم

انت واد زي الفل

وفيه غيرك كتير زي الفل

بنات وولاد

وكلكوا

ضحية ناس بتبص تحت رجليها وبس

ربنا يستر

50 comments:

Anonymous said...

نواره انت عارفه التالت ميين انا خايف عليكى
بس بصراحه تغطيه ميه ميه
وحلقات التعذيب بصراحه انا بكيت فيها هاتلاقوها موجوده كلها على مدونه انسى

Anonymous said...

ممممم
تفتكرى ابو شرور كان بيتوقع صح
قال إنهم حيحطوا مادة فى القانون تحبس الصحفى اللى بيدعم الارهاب والتنظيمات المحظورة
هوبا الواد منعم لابس لابس فى التصريح الشرورى ده
ياخوفى عليك يا منعم
على فكره تحليلك لسبب البدء بعبكريم تحليل فى الجون هما طول عمرهم فعلا كده يبدأوا بالهايف اللى معلهوش اجماع عشان يبقى لهم سابقة يقيسوا عليها سابقة محدش وقف ضدها وكتير شافوا انها مبررة ودلوقتى بيفتحوا الباب على وسعه
قاضى فاضل عاوز يقفل المدونات وعامل تخريجه قانونية زى الفل كفيلة باغلاق الجنه نفسها ومباحث كهربا عماله تراقب وتخترق وتتوغل وتشغل مخبرين وعندها ناس فاضية بترد على التدوينات كمان
طب فاضل ايه بقى
سلومه الاقرع ميعرفش مين اللى ولدته
حاااسسسسسسسسسسسسيب
انتى اللى سألتى السؤال ابن الجزمه اللى هايبقى عامل زى النمل اللى بينخرب فى النافوخ
ياترى مين هو اللى جاى عليه الدور
هوز نيكست
؟؟
حد خايف
انا موش خايف أنا مرعوب
طب هاعمل ايه
هادى الباس ورد بتاع مدونتى لحد تانى يحدثها
ليه يا هبل هو انتم فاكرينى عشان خايف شويه اقفل المدونه
طب اقفلها واروح فين
هما يومين حد تانى يكمل المسيرة فيهم وبعدين نرجعلها ونظبط فى اصحابنا
وبعدين دى محبه بينا وبينهم هما يلطشوا واحنا جرى ع الكى بورد وهاتك رزع
وبكره هاييجى ويقول دولم اللى حاربوا الظلم بزرارين
والله ممكن

Anonymous said...

على فكره جلالة القاضى بتاع المعلقة كاتب فى شروط المدونات ان على صاحبها الا يحذف منها شئ باعتبار ذلك من اخلاق التدوين وحفظا لتاريخها وانا رحت وبأدب رديت على تعريفه للمدونة وفكرة اخلاق التدوين دى وبينتله بكل ادب والله العظيم إنه غلطان وباسلوب اكاديمى فراح جلالته حاذف التعليق بتاعى بعد ما طلع فى معلقته
شفتم اخلاق الاستئناف حلوة ازاى

Anonymous said...

ربنا مع الجميع ويرحمنا من عنده
وفى مثل بيقول اضرب المربوط يخاف السايب هنقول ايه بس لايوجد كلمات ولا تعليق على حالنا
وطالما هو اخوانى على ما اعتقد اكيد اتعود على كده لانهم بصراحة هما اكتر ناس الداخلية بيحبوهم زي عيناهم
ربنا يفك كرب المكروبين ويطلعه منه على خير
يــااااااااااارب امـــــــــين

Anonymous said...

منعم مش الاخير
بعيد عن كريم وليس عبد الكريم
اظن والله اعلم ان منعم عندما بدأ كان عارف احتمالية القبض عليه عالية جدا خاصة اليومين الكحلي دول وعموما تحليل حضرتك عن ضرب واحد مش عليه اجماع علشان يضربوا اللي عليهم شبه اجماع وانتي واحدة منهم
اظن هذا التحليل جانبه الصواب
لانهم ببساطة مبيفكروش كده ده لو كانوا بيفكرو اساسا
هما مش محتاجين مبرر للوساخة
علي فكرة انا مش فرحان او متشفي في كريم هذا (ربنا يهديه )ولكن برضه مش متعاطف مع واحد بيقول علي نفسه ملحد ومتعاطف مع الدنمرك وحاطط لنك ساندوا الدنمرك كل ده علشان ياخد فيزا لاي بلد والسلام وإلا مطلوب مني اتعاطف مع عزام عزام وايضا العطار الجاسوس الجديد
عموما انا عارف اني الرأي ده ممكن يزعلك بس هو ده رأيي
مرة أخري احنا ساعات اللي بندلهم المبرر ليضربوا حرية الرأي
(ساعات بحس ان احنا بعاد عن طبيعة الشعب المصري وثقافته) ساعات
بحري من اسكندرية

Anonymous said...

نوارة

بعد كده اللى هيفكر هيتقبض عليه
انما الاعمال بالنيات

واللى هتكون عنده النية انه ينتقد الحكومة هيتقبض عليه خالى بالك بأه من نفسك

Anonymous said...

لم يعجبنى الربط

بس فى سنه اسمها واحد وثمانين شهر سبتمبر كان فى السجن الشامى والمغربى وابن بلاد تركب الكتاكيت

تفتكرى اقتربنا

Anonymous said...

انا مش هقدر اقول حاجة غير ربنا يحميه وحسبنا الله ونعم الوكيل وهروح اقف على سلم النقابة وربنا يستر :(

Anonymous said...

y3ne b3d kda 2y wa7ed 7faker bsooot 3alee, 7yt2bad 3leh..zay ma 3omar 2al b2a..2rhab fakree..
tab el 7al eh??
bathy2lee 2ham 7aga dlw2tee hya el nas
nawara shofte el 23lan bta3 mobinil ele feh nas kteeeeer 2wee 3mleeen mozhra, lama shofto 2olt 2mta y7sal 3ndna mozhra kda bgad yb2a feha el 3ddad da..da tamer hosny bygelo 2omam..
bathy2lee el mafrood nabtdee nw3ee el nas we lw bal 3afya..inshala n3mlhoom 7afla whmya we nbtdee nklmhom ...
lazm el nas tfoo2 b2a.. da l 7abat shabab male byro7o el 7flaat dool 3mlo mozhra el dnya 7at2of fe masr...
bas maho tool mal wa7ed 3ndo floos takfy yomo we 2kl we shorb we 3yalo naymeen mart7een, m7dsh 7yfakr y3meal 7aga..7y2olak we ana maly y3ne ana ele 73'yer 7aga

rabna ystor 3la man3am we 3lena kolna..

Anonymous said...

انا متفق مع بـحرى ولبنا فى كلامهم ، ومهما كان الغباء العقاب مش كده و ربنا يفك سجنه مقدمـا :s

Anonymous said...

أنا عرفت موضوع منعم من مدونة "أحمد عبد الفتاح" و بعدين لقيت باقى الأخبار على "زنزانه"أنا طبعا معاكى إنهم إبتدوا يشتغلوا على المدونين واحد ورا واحد، بس أنا مش معاكى فى النظرية بتاعتك لأن معتقدش إن الحكومه بالذكاء ده بصراحه.

إللى شاغلنى دلوقتى نقطه واحده، يا ترى الإخوان فهموا ليه كان فيه ناس بتدافع عن كريم و هيه مش مقتنعه بيه أصلا، لكنها كانت بتدافع عن حريته فى إبداء رأيه، لأن الناس ديه هى اللى بتدافع عن منعم دلوقتى و كتير أصلا مش مقتنعين بيه، بس برضه بتدافع عن حقه فى إبداء رأيه.
على العموم ربنا يستر على كل الناس اللى بتفكر

أما بخصوص الدور على مين، أنا محتار أختار بصراحه، الخير كتير و الحمد لله
:)

Anonymous said...

التالت هيبقي بالنسبة لهم ضربة معلم
و لأنهم اتبعوا أسلوب سلق الضفدعه
مع المدونين
و هو الأسلوب الأمثل في رأيي
سلق الضفدعه
هو عدم القائها في الماء الساخن مرة واحدة حتي لا تقفز و تهرب و انما وضعها في ماء بارد لتعوم و يسخن من تحتها رويدا رويدا لتستمتع بالعوم في المياه الدافئه حتي تموت و هي غير مدركة لما يحدث لها
المشكلة مش فالتالت أو الرابع
المشكله هيلاقوا أماكن ل 7000 مدون فين
كل اللي أقدر أقوله يا نوارة
أنه
جمر الهوي جوا القلوب والع
لو غاب قمر مليون قمر طالع

Anonymous said...

نواره في تظاهره امام نقابة الصحفين الساعه 5

انا نازل بس اقسم بالله لو نزلت و ملإتش مشاركه من الاخوان تهز الارض والله لأف مع الامن المركزي و اطلب بإعتقال الاخوان كلهم

وانا بسأل اين مساندة الاخوان منعم و والده اللي على فراش الموت الان ...

Anonymous said...

انا بصراحة فكرت بنفس الطريقة تقريبا

قلت ليه الحكومة تمسك عبد الكريم .. ملقتش سبب غير كده

لانه شتم الريس و شتم كمان فى الاسلام و كمان ابوه واهله متبريين منه

يعنى من الاخر محدش فى الدنيا هيقف جنبه و تعمل السابقة القضائية علشان بعد كده يتقاس عليها

وربنا يستر

هانت ان شاء الله

Anonymous said...

قبا مـا أقول حاجـه عارف انكم هاتفهمونى غـلط
أقول بقه الحاجه
الـنهارده يوم الأخوان وهما اللى منـظمـين المظـاهرة وهمـا اللى بعتوا لكل المدونين المكان والمعاد ، طيب ليه مانخـليهمش يدافعوا عن قضيتهم بنفسهم ( ومش هايدافعوا ولا هايروحوا )
مـنعم محتاجنـا بمحـامى بتقديم حاجه تـساعده فى القضيه بتاعتـه، المظـاهرة مش هـتفيده بل ممكن تـضرة

Anonymous said...

لو اتقبض على واحد ها يطلع الف واحد شكلها النهاية قربت يا جدعان النظام كل يةم بيتخبط اكتر من اللى قبله احتمال وائل اللى عليه الدور عاملهم قلق كتير خصوصا كل الفيديوهات بتاعة التعذيب اللى بيعرضها

Anonymous said...

السلام عليكم

اولا عاوز اقولك انى متابع جيد لمدونتك
و من زمان و بحيكي على شجاعتك و اسلوبك الماذج بين السخرية و النقد

من زمان و نفسي اعلق عندك
و بكلم كل اصحابي عنك و عن كلامك و جرائتك ووجهة نظرك

بليز تدخلي مدونتي و تشوفي اخر بوست لانها مشكلة بالنسبالي و بالنسبة لناس كتير تانية

اما تعليقا على الموضوع بتاعك
فبجد بجد مبقتش عارف
الناس دي عاوزة ايه
يعنى حتى الكلام مبقاش من حقنا

ربنا يحفظ المدونين كلهم

محمد

Anonymous said...

هسأل سؤال و والنبي طولو بالكو عليا و خدوني علي قد عقلي احنا ندافع عن حريه التعبير كده من غير ما نحط ليها تعريف؟ فكرة ان كل واحد من حقه يفتح بقه و يقول مابداله دي سلاح ذو حدين..انا متصوره و ده رأى شخصي تماما ان مش كل كتكت تطلع في دماغه يعمل بلوج و يقول فيها اي بطيخ كل الناس تمشي وراه عمياني و تسانده علي اساس ان حريته دي جزء من حريتنا لأن للأسف بتطلع مدونات كتير من نوعية الردح لبعض و الشاب اللي فرحان بشتيمتين و الاخت اللى بتحكيلنا صاحبها بيبوسها ازاي و البقيه تأتي.... المشكله ان الناس دي بتتحط مع الباقي في نفس السله و بيبقوا حجه ضدنا...فهل تفتكروا ان في طريقه نقدر ننظم بيها افكارنا بشكل افضل علشان ما نبقاش عاملين زي الهبله اللي مسكوها طبله.. اول ماانفتح لينا باب لطريقه نعبر فيها عن نفسنااستغليناها غلط و فتحنا احن بأدينا باب للكره بينا
واخر حاجه عايزه اقولها هي ان الغرب مش متفتح و متسامح قوي زي م الناس فاكره في موضوع حرية التعبير برده ليهم خطوط حمرا كتير و الامثله.اكثر..فهل فيه وسيله لتنظيم الموضوع ده عشان اما نساند اي مدون نكون بنسانده من قلبنا مش عشان خايفين ان يوم يجي دورنا

Anonymous said...

ياجماعه انا من رأيي ان من حق كل مواطن انه يقول رأيه ومن حق الحاتي انه يديله بالجزمه اذا شتم الحاتي مدام بيأكلنه ويشربه وكمان بيجوزه وبيشغله وكمان بيجبله عيال لو حب ويحددله النسل عشان الزياده السكانيه وكمان بيرشحله الميه ومانع عنه انفلونزا الطيور وكمان الدم الملوث ومظبطله الموصلات وبعد دا كله عايز المواطن يشتم دا حتي يبقي بتر علي النعمه واخيرا انا بمسي التماسي اجدع تماسي يحسن تقولو اني انا ناسي علي سياده الحاتي اللي مأكل الشعب الواطي بالجزمه ومخليه مطاطي
انـــــــاhttp://www.toto3alakaboto.blogspot

Anonymous said...

و الله يا نواره..أنا منت متأكد ميه الميه أنهم حيخدوه ككبس الفدا نمره 2 لان الراجل كاتب بصراحه أنه اخوان و فاضحهم علي طول...بالرغم من اعتراضي علي الاخوان بس الصراحه أنا نتعاطف معاه جدا و ربنا يستر علي الجميع و بالذت أنتي يا نواره لانك في الفتره الاخيره مروقاهم جامد و فاضحه الدنيا..بجد ربنا يستر و يحافظ عليكي و علينا جميعا
تحياتي لكي

Anonymous said...

لا حول و لا قوة الا بالله
كويس اننا برة البلد
بجد حاجة تحزن

Anonymous said...

طيب اللى بيقول انا خايف ليمسكوه بسبب التدوين

دة بقة احنا نعرفه و لا حد يعرفه منين

لما الواحد فيكوا الواحد ما يعرفوش اصلا

خايف و هايشخ على روحه كدة ليه ؟

Anonymous said...

هدّي اعصابك يا جمي انت راجل صاحب مرض
هههههههههه
دا التطبيق الرسمي ل الشعب اللي تجمعه زغروطه وتفرقه عصايه

انا بطلب طلب رسمي بالقبض علي كل افراد كوادر الاخوان اللي مش مسلمين لانهم جعجاعين وكلمنجيه ولا ليهم حضور ولا لزمه

من الاخر ولاد ميتين كلب خونه بيجروا ورا مصالحهم

Anonymous said...

asib u ur blog 2 days ala2i kda :D
meen l talet ya Nawara?
Rabena m3ahom kolohom w m3 men3em :S

Anonymous said...

أنا خاايف عليكى


:(

Anonymous said...

اعتقلوا منعم يااااااابشر
والله العظيم ده حرام
دى بلادنا
اعتقلوه من على الطيارة....نزلوه بعد ماركب..
يعنى هو قال يمشى لحد ماالجو يهدى وقصر الشر
لالالا دى مش بلادنا... دى بقيت بتاعتهم
ابوه هيموت من الحسرة عليه وهو اصلا تعبان
وانا هامووووووووووووووووووووووووووت من الحسرة على اللى كنت بقول عليها بلدى....
حد يقول حاجة ...هاتجنن
قومى يا مصر بقى.....قومى

Anonymous said...

مصر ماتت يا نونو

Anonymous said...

الاخ اللي بيتكلم عن كوادر الاخوان انهم جعجعين وكلامنجيه هو بيتكلم بجد؟؟؟
والله العظيم انا مش أخوان ولا حاجه
بس الاخوان هما الناس مش حقول الوحيدة بس أكثر ناس بتتبهدل خاصة الرموز والكوادر
ممكن تقولي عصام العريان اتقبض عليه كام مرة خلال السنتين اللي فاتوا طب تعرف هو كان فين قبل السنتين دول (5سنين في السجن الحربي(من المحاكمات العسكرية الاولي طب فين خيرت الشاطر وحضرتك قاعد امام شاشة الكمبيوتر وبتكتب الكلام ده وغيرهم كتيييير جدا يا ريت منتفرعش ونقول اي كلام
واحب اختم بحاجة جميلة قوي كتير منكم عارفنها
انا يا باشا مش معاهم انا حزب تجمع

Anonymous said...

جبهة
بعد مهزلة امبارح
قصدي وقفة امبارح المسخرة اللي بدأت باعتصام الي ماشاء الله علي مدونات الاخوة الاخوانجية
وبعدين نزل عليها التخفيض وبقت مظاهرة كيبوردات
وبعدين كشت لوقفة رمزية
تفتكري الاخوان باعوا الورد المرة دي بكام؟
قال ايه مجالهومش تكليف م الجماعة ينزلوا
كان نفسي اول اللفظ الشهير المختصر ف تلات حروف لكن طبعا مش هقولها هنا علي مدونتك
تحياتي

Anonymous said...

هما باعوه قبل كده امتي؟؟؟؟؟؟؟؟؟؟؟

Anonymous said...

الي الاخت نوارة إليكي هذا الخبر
مدينة سورية تلجأ إلى"صوت فيروز" لمنع
ضجيح الباعة المتجولين
معلش بعيد عن الموضوع بس عجبني اوي الخبر ده من موقع العربية

Anonymous said...

bahry

بص انا هقولك حاجه اللي بيترمي في المعتقل ولا بيصادروا امواله زي الشاطر نفسه بيكونوا بايعينه متلاحظش مسانده من عاكف ليه اخره الان حوار اطفال من اجل التغير شوية عيال لبسين تيشرتات بيضه
بس الاخوان الان بيعملوا صفقه جديده مع الحكومه

زي صفقة الاستفتاء ابسط حاجه

همه اللي دعوا للمظاهره واديهم بيقولوا مجتلهمش توجيهات ياخي احه
ومغلش يانوارا للاباحه انا دامي محروق

الكامين دا كانوا عايزن فيه حد زي جمي ولا سيزر ولا حد من الرجاله ينزل عشان يشدوهم
ولاخوان اللي جابوا وارا دول قوام عددهم كبييييييير لو حببوا يهزوا وسط البلد هيعملوها
بس خلاص

يامصر انشقي ارضك وابلعيهم بقى تعبنا ... ولا قرفانا تبلعي اوسخ ناس مشيت على ارضك ...ياتارى في اوسخ جاي ؟؟

Anonymous said...

انا والله مابقتش عارف هم ناوين علي ايه وكفايه بقي ديموقراطيه لحد كده كفايه بقي حتي الكلام هيمنعونا منه.
تحياتي

Anonymous said...

و انا ناقصة يا نوارة !!!
دايما كدة بتجيبلنا اخبار فل !!!

Anonymous said...

مممممممممم
كما قال عبدالغفار في تعليقه نحن بالفعل نقترب من سنة واحد وتمانين
فالحكومة وصلت للقاع وبدات تحفر آخر أيامها قد تطول قليلا قد تقصر ولكن النهاية فعلا قريبة
فهكذا علمنا التاريخ
المشكلة ان ينتهي هذا الكابوس بكابوس آخر وتاريخنا ملئ بذلك فنحن لا نتعلم ولا نطور نفسنا

وربنا يستر

مع تحياتي

Anonymous said...

الي الاخ يساري مصري
بلاش والنبي لهجة العلم ببواطن الامور وكأنك لسه جاي حالا من عند احمد موسي يعني حضرتك عرفت منين ان هما باعوا الشاطر وطب ومحمد علي بشر طيب ايمن عبد الغني طيب فلان طيب علان
عدد المقبوض عليه من قيادات الاخوان حاليا 300كادر اخواني لو عايز اسمائهم موجودة
الحاجة التانيه وديه برضه مش رأي نختلف حولها لا ديه معلومة
مين اللي دعي لمظاهرة؟؟؟
الكلام كان واضح جدا ان في من شباب الاخوان وخاصة المدونين دعي لوقفة احتجاجية ووسعت شويه من البعض لاعتصام مفتوح
وحكاية الكمين ديه مسخخخخخخخخة اوووووي مع احترامي للاخوة اللي حضرتك ذكرتهم اتحدك تذكر اسم اي حد من كوادر الاخوان لم يدخل سجون مبارك علي الاقل مرتيين اسم واحد بس
سؤال برئ جدا كام واحد من رموز اليسار داخل السجن الان
اسم واحد بس؟
واحد!!؟
طب نص !!؟
مع احترامي الشديد لكل رموز اليسار المحترمين - علي فكرة جد مش هزار

Anonymous said...

أنا معاكم إن الإخوان هما أكتر ناس بتعتقل، لكن برضه إنتم مش ملاحظين إنهم أقل ناس بتتحرك ضد حركات الإعتقال دى.
يعنى انا شفت إن أكتر ناس كانت مهتمه بالوقفه الإحتجاجيه إمبارح مش إخوان، بالعكس دوله كانوا معظمهم يساريين.

طيب الإخوان منزلوش ليه؟ مجلهمش أوامر من القياده؟ أمال الأوامر حتيجى إمتى؟
تعتقد لو اللى أعتقل ده من القيادات، كانت الاوامر حتيجى ولا مش حتيجى؟

و بعدين فيه نقطه تانيه، إيه موضوع الاوامر ديه؟ يعنى الواحد مينفعش يقوم بتحرك من نفسه؟ يعنى على كده القيادات كان عندها علم بالعرض العسكرى"المسرحى زى ما بيقولوا" اللى كان فى جامعة الأزهر، أمال إتبروا منه ليه؟ و إتبروا من الطلبه اللى عملوه ليه؟

بص، أنا فيه ناس فى جماعة الإخوان بحترمهم جدا، زى عصام العريان، و محمد عبد القدوس، عبد المنعم ابو الفتوح و كتير غيرهم. بس الجماعه فى حد ذاتها هى رمز للتفرد بالرأى و الوصوليه، بصراحه زيها زى اى حزب سياسي فى مصر، كله بيلعب لمصلحته، هيه بس عندها بنط زياده إنها بتلعب على وتر الدين

المهم، إن منعم معتقل علشان هو إخوان، على الاقل أسمع حد من الإخوان غير المدونين يطلع يقول كلمه فى حقه.

Anonymous said...

bahry
يافرحت قلبي بالاخوان المسلمين اللي بيترموا في المعتقلات و ملهمش وجود ولا بيعملوا اي شئ يذكر بتتكلم جد طيب نتكلم جد

منعم اخوان واتمسك و طلعان ميتينه عشان ينتمي لهذا التنظيم العقيم

طب عيزاك تقولي علك موقف قام بيه الاخوان و يحسب لهم هما بيتمسكوا عشان محظورين و اعملهم في السر و مصادر تمويلهم مجهوله

اما اليسار اللي سعتك بتتربق عليه فوجوده في الشارع واضح و مواقفه ظاهره
هتكلم عن نفسي
لم افوت فرصه للمشاركه

فين الاخوان يوم اعتصام ليلة الاستفتاء ؟؟؟؟
فين الاخوان من المظاهرات
فين موقف الاخوان

قوللي موقف واحد اتخذوه و صمدوا عليه حتى النهايه وانا اتراجع عن موقفي
منعم ابنهم و رموه و لا سألوا فيه في حين ان لما الشباب كانوا معتقلين بعد الاعتصام و قبلها المظاهره
كان اليسار اللي بتتريق على مواقفه مساندهم و معتصم امام قسم الضاهر و اضربوا عن الطعام حتى خرجهم و خرجوا
قولي الاخوان عملوا ايه لمنعم ولا الشاطر

انا بتكلم جد !!!!!

Anonymous said...

lazem taree2 el bou7 ye3oud tar2 marmar...2alb el watan majrou7 la ye7temel aktar...
says mounir !!!

Anonymous said...

محمد يسارى هدى اعصابك الكل بيغتى على ليلى واكيد انت فهمنى كويس اقصد ايه .
-----
الكل فى مصر متهم الكل مدان الكل محظور لا عصمة لانسان الكل امام قهر السلطة سواء

Anonymous said...

هو كالعادة ح تتحول مساندة مدون مصري لخناقة ما بين اليساريين والاخوان؟

امبارح الاستاذ احمد سيف الاسلام والدكتورة عايدة سيف الدولة

قالوا كلمة حكمة

اطياف المعارضة تواطأت مع الحكومة ضد بعض

والنتيجة ان كلهم بيتعذبوا

والدكتورة عايدة قالت: مافيش داعي للجمل الاعتراضية اللي من قبيل: انا ضد اللي بيحصل للاخوان مع تحفظاتي على الاخوان

وكمان اقول انا ضد ان عبد السميع ينضرب في القسم مع اني ما اعرفش عبد السميع

اصلها كانت بتعقب على كلام نجاد البرعي

والظاهر بقى ان المعارضة المصرية مش ح ينفعها غير سيفين

سيف الاسلام

وسيف الدولة

عشان يعلموهم يبقوا بني ادمين ازاي

Anonymous said...

ربنا يستر...انا لسة فاتح المدونة بتاعتي من اسبوع بس.. :S

Anonymous said...

مرة أخري انا مش اخوان الحاجة التانية بدون انفعال يا يساري
انا لا استطيع التريقة علي فيصل محترم زي اليسار وانا قلت مع احترامي الشديد لرموز اليسار المحترمة ووالله ما كنت بتريق وديه مش خناقة يا نوارة وان كنت انا شايف ان احنا تقلنا عليكي شوية
معلش يا ست الكل
بس برضه حضرتك يا اخ يساري مرددش علي الاسئلة اللي طرحتها
اما بخصوص اسئلة حضرتك احب اوضح بعض النقاط
منعم ده من الاخوان ومحرر للموقع بتعهم بالانجليزية ولا اريد ان ارد علي موضوع باعوه لانه اتقبض عليه مع 20واحد غيره منهم دكتور في الجامعة
وقبله 300 واحد وقبلهم مئات وده كله ليه علشان ملهمش مواقف
غلاسة يعني او فاضا او يمكن صفقة
لكن القوي الوطنية ذات المواقف الحراقة
الحكومة طبعا مش قدرة تيجي جنبهم
خايفة من مظاهرتهم الجبارة
اللي بتهز وسط البلد
مين اللي وقف مع القضاة وانضرب واتسحل في كل المحافظات ؟
مين اللي تحمل الوقف ضد تيار الحكومة في انتخابات مجلس الشعب ؟؟
مين اللي نظم مظاهرات الطلبة في كل جامعات مصر فقبل الاستفتاء ؟
معلومة بسيطة
الاخوان لم يدعوا للاعتصام قبل يوم الاستفتاء ومقلوش لحد يروح وباعهم
اللي دعي لذلك شباب زي الفل بتوقيع شباب بيحلم ببكرة
وبعض التيارات حولت تسرق الحدث ولم يكن للاخوان اي دخل لانهم لهم طرقهم الخاصة
اسسسسف جدا علي الإطالة بس كان لازم اوضح وجهة نظري
يا رب نتجمع علي حاجة كويسة بدل اللي احنا فيه ده
كل التقدير لليسار المصري اللي نفسي يبطلوا خناقات مع دبان وشهم

Anonymous said...

يا نواره الفكره مش فكرت جبهتين من المعارضه بيقطعوا فبعض
انا بسأل فين الاخوان المسلمين من المشاركه ؟
هل الاخوان المسلمين بيبيعوا كوادلرهم ولا في ايه بظبط ؟
دا لو كان كلب حراسه عندهم كانوا اتحركوا عن كدا شويه

انا عايز حد يفهمني ...

Anonymous said...

اعذروني لو كنت منفعل انا لا اقصد الانفعال بس اللي بنوصل له دا من خراب كتير انا تعبت

وبعدين احنا بنتقل على نواره دايماً و هي اتعودت
مدونة نواره دايماً بتستقبل المناقشات عندها ( بدبسها بالادب :D)

Anonymous said...

يا عم يساري مساءك زي العسل
متخفش يا عم كده ويكون قلبك خفيف علي كوادر وشباب الاخوان
انا لسه سائل واحد منهم وقال لي انهم مبيبعوش كوادرهم ولا حاجة بس هما متعودين علي كده
وكل واحد يخلي باله من كوادره بأه ويلمهم
صباح الفل

Anonymous said...

كل الموجودين فى الشارع السياسى المصرى بيدوروا على مصالح شخصية وفى المقدمة الاخوان وطبعا الاحزاب الهلامية كلهم تنطبق عليهم مقولة انى اسمع جعجعة ولا ارى طحنا كلام وبس فى الهوا عند الافعال والمواقف اللى محتاجة وقفة جادة وتحرك فعال كله بيدخل الشقوق والفردية بتسود وده اللى مطمع الحكومة ومديها الفرصة انها تصطاد براحتها اهتقد ان الاخوان حتى لو كانوا كلهم خارج السجون وواخدين راحتهم على الاخر مش هايعملوا اى حاجة غير الكلام مجرد كلام للاستهلاك المحلى ودمتم سالمين

Anonymous said...

ايه يامه الهيصة اللى عندك دى؟!!...خير اللهم اجعله خير إشاء الله

تصدقى يا نوارة ان لسه فيه ناس شغالة معاهم حكاية عبد الكريم لغاية النهاردة؟! آه والنعمة...قهروا قلبى يا اختشى بجد...لا وايه الاخ يسارى اللى مش عاجبه وشغال تريقة...فيه عالم شغالة تنظير فى حد الردة...والله العظيم...اظن هو لو دخل فى الموضوع...حتلاقيهم نازلين له بالسكاكين بيدوروا عليه...:))

طيب بجد بأة ومش بهزار...انت مش ملاحظة معايا ان تون الجنان عالى اوى...فيه جنونة كدة شغالة فى الجو عاملة زى ايام سقوط بغداد
تعرفى يا نوارة انا مش خايفة من حكاية مين الثالث...لان الحكومة بتاعتنا دى كبيرها تعض لكن مفيهاش سنان تاكل..المشكلة بس ان كلنا احوالنا مش ناقصة عض...فبتبقى غلسة حبتين..بس بصراحة يعنى عضتها فى الاخوان والاسلاميين عموما بتطول اوووووى....

وعلى العموم حلها بسيط...وانتم عارفينه...لمة حلوة مرتين تلاتة..بس والنبى محدش يقولى دى قضية اخوان...عيب اوى يعنى..احنا طلع تلاتينا علشان نشرح للاخوان ان قضية عبد الكريم فى الاصل قضية "حرية"...وأخيرا نشكر الحكومة انها ساعدتنا وفهمتهم "عمليا" احنا كنا نقصد ايه...ياريت متجوش دلوقت وتقولوا "فين الاخوان"...بدل ما يبقى الثالث "مستقل"...علشان تحرموا تقولوا المعتقل تبع مين؟!
حكومتنا بقت يا حرام مش ناقصة هرشة وفضايح..وهيه بس ديتها شوية دوشة حتتلم..خصوصا فى قصة الاعتقالات والمدونين دى..بس هو القاضى الحمار اللى مش عاوز يجيبها لبر...اصلها وجعاه اوى حكاية انه مدون وانتم زيه دى...:))
فطبعا حيستمر التضيق على المدونين...لكن الكارثة الحقيقية فى النخب الرقاصة...فيه نغمة جديدة حتطلع اليومين الجايين دول...اغنية حتفرقع...معنديش معلومات يعنى...بس بما ان الحال عامل زى ايام سقوط بغداد...والجنونة شغالة...يبقى لازم يطلع حاجة على وزن كفاية...تشغل بال الناس حبتين...المهم انها تفضل محكومة ومخنوقة فى وسط النخبة..برضه زى كفاية..بس يا ترى حتكون ايه؟!

الله اعلم
ندى القصاص

Anonymous said...

ندى

شفتشي يا اختشي

لهم حق يهيصوا

ماهي حاجة تجن

والنبي يعني انا مش شايفة ان المدون على راسه ريشة ولا حاجة زي ما الحاج جرجس اتهمني وقال لي اشمعنى يعني لما مدون يجرا له حاجة تتصرفي على اساس ان المدونين على راسهم ريشة

والنبي ابدا

دولم هم الوحيدين اللي مافيش على راسهم اي حاجة

وعشان كده مافيش اي مبربر للي بيحصل ده

يعني حتى ما نتنفسش؟!

ايه يا ندى

ايه حكاية جنان ما قبل غزو العراق ده

والنبي بلاش تفويل الله لا يسيئك

ان شاء الله خير

وهي امريكا ح تحتلنا ليه بس

ما الحكومة عاملة لها خدها مداس اهه

Anonymous said...

تحياتي لصاحبة المدونة على الموضوع و لتدى القصاص على التعليق المميز

كريم ابن كلب كافر لكن عبد المنعم من حقه يتكلم

سجناء الإخوان معتقلين بس أيمن نور و الناس اللي اترمت في السجن 3 شهور السنة اللي فاتت من الغد و غيره مع علاء و ندى دول كانو بيصيفوا في السجن

و إذا ماكانتش المظاهرة ليهم لوحدهم و كلها مصاحف مرفوعة يبقى بلاها و يبعتولك 2 -3 للتمثيل المشرف

يعني زي الحزب الوطني , يا نلعب بطريقتي يا هآخد الكورة بتاعتي و مانتوش لاعبين

يا شيخة دي حاجة تفلق

الحرية لكريم و أيمن نور و عبدالمنعم