Monday 2 April 2007

هام وعاجل: واجب وطني..غصب عن بوزنا ح نعمله

الحقيقة أنا باكتب دلوقت وانا تعبانة جدا لأني لسة راجعة

من محاكمة الوغد اسلام نبيه

المحاكمة كانت كلها عبارة عن شهادة عماد الكبير بالتفصيل

وسؤاله سؤال الملكين من قبل القاضي

اللي عصره عصر

ومن قبل محامي اسلام نبيه

جيمي جاب اسم محامي اسلام نبيه وبيقول انه ده المحامي اللي

اترافع ضد الضحايا في قضية العبارة

المهم

تفاصيل المحاكمة ح اكتبها بكرة ان شاء الله

ومعاها الفيديو والصور

بس دلوقت

وانا تعبانة ومعيطة لما مفوحتة

وانا عارفة بقى ان فيه ناس ح تتريق عليا عشان باعيط

بس عماد الكبير قال شهادته كلها وهو بيعيط

الرسالة اللي عايزة اقولها واللي مسيطرة عليا دلوقت

احنا مش لازم نسكت لحد ما نرجع لزمن صلاح نصر

ويا احنا يا هم في البلد

عايزين البلد يموتونا الاول قبل ما ياخدوها

انت مواطن وعليك واجب

اوعى تقبل اهانة

حتى لو كانت مجرد شتيمة

اوعى تقبل انك تبقى راكب تاكسي أو أي مواصلة وتشوف ظابط وللا امين ركب معاك وما دفعش

اوعى تقبل ان ظابط او امين يدخل عند بقال قدامك وما يدفعش

البلاغات والشكاوى ضد الناس اللي بتستخدم سلطاتها في قهر الشعب

مش لازم تسكت لحد ما يبطلوا هم اللي بيعملوه ده

هم فاكرين نفسهم ايه عشان يعملوا في الناس كده؟

ويا هم يبطلوا اللي بيعملوه

يا يبطلوا اللي هم بيعملوه

مافيش حل تالت

واذا انت مش غالي عند الحكومة

انت غالي عند اهلك

وعندنا

وعندي انا شخصيا

ومش ح نسكت لحد ما نجيب لك حقك

أي شكوى ضد أي حد في الشرطة يتعرض لك

او يتعرض لمواطن تاني قدامك (بالذات لو غلبان: سواق، بياع، راجل على باب الله، عيل من الشارع) بالسب او الضرب او الاعتداء من أي نوع

اتصل على

مركز هشام مبارك

القاهرة : 1ش سوق التوفيقية - الدور الخامس - وسط البلد - القاهرة
ص ب 11111 الأزبكية
تليفون :
5758908

و

مركز الحرية لدعم الديمقراطية
87
شارع الشيخ ريحان - عابدين - القاهرة

ت/ 3959394 – 3961552

احنا علينا واجب ناحية نفسنا واولادنا

لو ترضى ان حد من ولادك يحصل له اللي حصل لعماد الكبير

اسكت على أي اهانة تتعرض لها او يتعرض لها أي مواطن قدامك

من قبل العاملين بجهاز الامن المصري
مين قال الشتيمة مش بتلزق

الشتيمة بكرة تبقى ضرب

والضرب بكرة يبقى هتك عرض

والسقف عمال يعلا

واحنا عمالين نطاطي نطاطي نطاطي

فيه مراكز صحيح كتير لحقوق الانسان

بس انا بامانة حاطة المركزين اللي انا شخصيا باثق فيهم

واللي لو لا قدر الله حصل لي او لحد عزيز حاجة

هم اول ناس ح اتصل بيهم

على ضمانتي يعني

ده مؤقتا لحد ما اوافيكم بتفاصيل المحاكمة

وانطباعاتي

وملاحظاتي

بس لحد ما ابطل عياط عشان الناس ما تتخنقش مني

ملحوظة: طبعا احنا في النت بنغني ونرد على نفسنا

بس كلنا عارفين ان سواق الميكروباص والتوك توك وبياع المناديل في الشارع

لو شاف كمبيوتر في الضلمة ح يستخبى تحت السرير

عشان كده لازم نعمل على ان النمر دي تبقى في ايد كل مواطن مصري

مش كفاية نوزعها على النت

لازم تتنشر في الجرايد

وفي التلفزيون

وفي كل مكان

ونطبعها كمان بوسترز صغيره

أي حد من اللي بيعملوا البوسترز يقدر يعملها

وتبقى حملة عشان نشجع كل المواطنين

مش لازم نستنى لما الشرطي يصور نفسه وهو بيعذب عشان نتحرك

لازم المواطن البسيط يتعلم ما يخافش ويتحرك وناخد له حقه

يا اما كده

يا اما نقول لمصانع الملابس الداخلية تعملنا موديلات اسمنت

14 comments:

Anonymous said...

بما انك صحبتى فى العياط هجبلك محبس معايا لان اللى عايز يتعامل مع دول لازم يشوفله محبس الاول ويكون يعرف بيجح معاهم
انا على العموم هما دلوقتى اصحابى كده وكده بينى وبينك يعنى اصلهم عملاء المعمرين عندى اصلى اول ما الواحد منهم يجى بأتعامل معاهم بكبرياء على الرغم انى بأكره الكبرياء بس بصراحة مضطرة وهما المرة اللى بعدها بيحترموا نفسهم وبيجوا ملكى طبعا الاول ميرى وانا بينى وبينهم عداء فظيع من ايام الجامعة
المهم انا ححاول ان شاء الله اطبعهم واعمل منهم استكرز بس ياريت هما الناس يقدروا ده لانى لما بأتكلم بالنيابة عنهم بصراحة قبل كده اتبهدلت منهم المهم ربــنا يستر ونتمنى اننا نتعامل ونتفاعل مع الناس وننزل لارض الواقع شوية
و الاستاذ حنتكلم عامل موضوع وكان عايز الناس تشارك معاه وممكن ده يكون اول طريق لينا وربنا يعينك ويعين كل واحد همه خدمة مصر لوجه الله فقط انا الايام بقيت رغاية اووووى الظاهر من كتر العلاج
:D
وهاطلب معلش يعنى بعد اذنك اقول حاجة للناس اللى بتعلق عندك بلاش شتيمة اصلى بأحب ادخل عندك وهما بصراحة بيشتموا شتايم وحشة اوووى
وده رجــــاء

Anonymous said...

أهلا نواره ...قبل ما النمر تكون فى أيد كل واحد وتكون نمرة لكل مواطن كمان، لازم المواطن أصلا يعرف هايعمل بيها ايه وإزاى ؟
النــاس فاكره انها طول ما هى ماشيه جنب الحيط محدش هايعملها حاجه
مع إنهم بقوا ماشين جوه الحيط كمان ويا ريت عاجب!! فمن رأيــى إن لو تفكير النـاس متغيرش يبقى النمر ماحدش هايطلبها غيرنا... وسلام

Anonymous said...

لأول مره أقرالك فكره كويسه من غير صريخ .. يمكن عشان تعبانه .. عن نفسى سيجلت النمر و الميل .. و جديا بافكر اطبعها بوسترات عند حد من اصحابى و تتلزق على عربيات الميكروباصات و التاكسيات و حتى على شبابيك الأوتوبيسات و المترو .. زيها زى أى أعلانات عن الحجاب فريضه كالصلاه كده .. لو وصلت لحاجه هابلغك
ياريت كمان المراكز دى تفكر ازاى تعمم خدماتها بشكل الناس تعرفها بيه
ياريت ماتكتبيش ألا و انتى تعبانه ..ببقى دمك أخف و بتفكرى أحسن

Anonymous said...

هههههههههههههههههههههههه كلاكيت تانى مره.يحيى

Anonymous said...

انا شفت عماد الكبير وهو بيعيط وشفت المحاكمه فى العاشره مساء
كنت عاوز اخده فى حضنى
واقوله هجبلك حقك
ولاد الوسخه محامى بتاع اسلام نبيه قال ايه بيستشهدوا بسجلات البوليس الى هى
اصلا متفبركه ومحامى عماد قال انها كده
وقال ايه اقول عماد متناقضه يعنى مش فاهم واحد زى عماد الكبير ده عمل كل ده ليه مش فاهم
يعنى مثل فيلم و شهد زور و كل ده انتقاما من جوز امه ااسلام الضابط الشريف
عموما بدون خوض فى التفاصيل القاضى اجل الجلسه ليوم 6 مايو الى جاى
ولما نشوف هترسى على ايه
.يحيى

Anonymous said...

اتمنى نشر هذا الاعلان فى شكل حملات دعائيا على البريد الالكترونى وعلى المدونات فى شكل اعلان ( بنر ) و وضعها امام الشعب فى كل الطرق .

ليتم فى المراحل المقبلة تسليط الضوء على أبرز انتهاكات المرتكبة في مصر ، ومقاومة الجهود الحكومية في التغطية عليها أو تشجيع مرتكبيها على الإفلات من العقاب. او حدوث انتهاكات جسيمة لم يحاسب أي من المسئولين عنها، كالاعتداء على المتظاهرات والصحفيات، أو قتل اللاجئين ، أو التعذيب حتى الموت داخل أقسام الشرطة

هايل يا نوارة

Anonymous said...

ياااااما ناس شاربة ومضروبة وساكتة ..
فكرة التعميم ده حلوة اوى .. انا عن نفسى هنشرها وكان نفسى استعملها بس انا ظروفى مش هتسمحلى غير انى انشرها على الاقل دلوتى

يلا بطلى عياط ...
ويا ريت 6 مايو نبقى كلنا جنب عماد الكبير

Anonymous said...

يا ترى ايه تاني ممكن يكون مفيد للضحايا السابقين والضحايا القادمين في موضوع التعذيب؟؟؟ حد عنده اقتراحات تانية...انا كنت بقترح انع في الأربعين بتاع الضابط ... محمد كريم المتناوي الي اتقتل اثناء محاولة انقاذ مواطنة ننظم حملة زيارات لاقسام الشرطةمع بعض الحلوى المنزلية الصنع..نقول فيها للضباط...من منطلق ان المعارضة مش مع الخطا وبس لكن كمان مع الصح...و زي ما اخطاءهم بتتبروز و تكبر كمان محاسنهم هتتبروز و تكبر...انا عارفة ان ده مش وقتة..لكن عندي كده احساس عالى بحبوا اعداءكم باركوا لاعنيكم...

Anonymous said...

ه انا شفت حته من الممحاكمه وكمان اسلام نبيه السفاح بيجري وبيرزق الكاميرات ومش عايز حد يصورواو وعماد الكبير عيط عياط
لاحول ولا قوه الا بالله يارب اشوف في السفاح ده يوم
تحياتي لنواره ولازم نعيط معندناش غيره

Anonymous said...

وجعتي قلبي
:(
نوارتي.. انا شايفة(كطريقة لنشر الرقمين وتوعية الناس في مصر بحقوقها بشكل عام) اننا نعمل مجموعة بريدية..ننشرها.. لتوعية الناس بحقوقها..زي مجموعة افعل شئ ما.. وتكون فيها حملات منظمة علشان تعّرف الناس الجرائم اللي بتحصل في البلد.. وكمان لتوعية الناس بحقوقها .. وكمان لتوضيح طرق التعامل مع أوساخ الشرطة
واللي يخاف من ربنا بس مش هيخاف من أي حاجة تانية
لنا الله.. وحسبنا الله ونعم الوكيل

Anonymous said...

انا كنت رايحة بس كان عندى امتحان شفوى المفروض يخلص 12 والدكتور المنيل على عنيه خلانى اتاخرت لحد الساعة تلاتة
المهم... والنبى يا جماعة حد يقولى ايه اللى حصل اتاجلت لامتى ولا اتقال حكم
اى حاجة بس اعرف

Anonymous said...

نسيت اقول لنواره انك انسانة جميلة جميلة اوى

Anonymous said...

نوارة

ايه الجمال ده انا موافق على اللى انتى قولتيه نفسى فعلا كل الظباط اللى بيخالفوا القوانيين يتحاكموا هيا البلد بتاعتنا زى ما هيا بتاعتهم وبنخاف عليها زيى ما لو فى ظابط شريف بيخاف عليها

بس تفتكرى ان فى ظابط هيحاكم ظابط
قصة اسلام نبيه ده بس علشان اتفضح على الجرايد لكن لو حاجة تانية معتقدش انهم هيعملوا كده

بالمناسبة فرح الوريث الشهر اللى جاى بنفكر نلمله علشان نجيب هدية كويسة تشتركى معانا بكام مليون علشان نظبط الهدية اللى تليق بمقامه

Anonymous said...

kalamek gameel gdan ya Nawara..we law 7ad etrya2 3la 3yatek yeb2a naw3an ma 2albou gamed le2n ele 7asal fe 3emad da msh shouwia...ana asasan gali enhayar lama shouft el clip..omal law kunt shouft shahdto we howa bey3yat kaman kan haygrali eih ?!!1
domo3ek deeh 3'alia ya Nawara we nabeela kaman..
about zaman sala7 nasr e7na already ba2eena feeh....bas e7na 3aleena nel3'eeh we be2i taree2a...ana ha3mel bekalamek ya Nawara le2enou 3agbni gedan we basta2zenek ene a3mel copy lele ente katbah da we ab3atouh 2 all my friends on mail as some of them bey5afou yed5olo 3ala el blogs :oS
zayohum zai keter 3'erhoum 5ayfeen men galad el dawla ( aw ele beys2olo 3aleeh amn el dawla)
kEEp on The gr888 work Nawara