Thursday 5 April 2007

ايها المواطنون..اشتروا جريدة المخبر اليوم

من ساعة ما المصري اليوم كتبت تقرير أمني عن طلبة الأزهر

وفيه ناس بتنادي بمقاطعتها

بس بما إن جريدة "المخبر اليوم" كتبت تقرير أمني عن اليسار

فأنا أدعو كل المواطنين لشراء جريدة المصري اليوم

او المخبر اليوم

لمعرفة

حظك اليوم

بدل ما نقعد نضرب أخماس في أسداس و: يا ترى الحكومة ح تضرب مين النهاردة

نقدر نعرف الهدف القادم من تقارير جريدة المخبر اليوم

على الاقل وقوع البلا ولا انتظاره

وبجد

لازم تغير اسمها

المصري اليوم ده اسم مش مناسب ابدا

هي المخبر اليوم

جريدة المخبر اليوم راحت للدكتور محمود أمين العالم

وضغطت عليه "برقة" عشان يقول كلام لا يصدر إلا عن رجل في الخامسة والثمانين

أطال الله في عمره

وهداه إلى أن يكف عن الإدلاء بالتصريحات العجيبة اللي قالها

طبعا

الحكومة المفداة بتاكل المعارضة راق ورا راق

ويقول وزير الثقافة تصريحاته المدروسة عن الحجاب

توطئة لضرب الاخوان

وتنشر جريدة المخبر اليوم تقرير امني عنهم

والعايط في الفايت نقصان عقل

مافيش داعي يعني إلى لوم اليسار على موقفه المساند

لوزير الثقافة وجريدة المخبر اليوم

لاني فعلا مفترضة خلو النية

وانا باختار كلامي بعناية

انا مقلتش حسن النية

انا قلت خلو النية

كمان الاخوان واليسار خالصين

لانه لما الحكومة اللي فجأة بقت بتغير على الدين

وحبست كريم عامر

توطئة لضرب اليسار

الاخوان عملوا نفسهم مش سامعين وبصوا في السقف

وخلاص

مافيش داعي لتبادل اللوم

دولم كان ذهنهم خالي

ودوكهمه عذرهم معاهم اللي هو اذا ما كانش الغيظ

يبقى على الاقل الوحلة اللي هم فيها لحد دلوقت

ولسة الناصري جاي

والليبرالي

وحنفي ابو دقة

وغير ابو دقة

وغيره وغيره

لحد ما الجو يبقى رااااااايق وزي الفل

والبلد تتغسل بالديتول

وياللا بقى بلا معارضة بلا قرف
اصل البيه الصغير مش بيحب الكركبة
طول عمره منظم ونضيف

اذا كانوا المعارضين بياكلوا في بعض

دخلهم السجن وخليهم يأزأزوا جوة

خلينا بقى نفضى للافراح والليالي الملاح

اللي جاية على البلد

في ظل الدستورات الحولانية

واهو اسم جمال ده اسم بنتفائل بيه والله

مش الناصريين بيحبوا جمال عبد الناصر؟

اهم جالهم جمال اهو

عشان ما يقعدوش يزنوا

بس امانة على جمال بيه

يسمي ولي العهد

انور

عشان العداد كده شكله قلب
ملحوظة: يجي واحد يقول لي قال ايه محمود امين العالم
اقول له اللنك عندي
بس والله انا لسة ما اشتغلتش مخبر
ومش ناوية اساهم في الترويج لتخاريف غيري
كفاية عليكوا تهييسي

30 comments:

Anonymous said...

هيهيهيهيهييييييييي
أنا بقى هاعمل عريضة زي بتاعت جيمي هوود واطالب الناس تتضامن مع المصري اليوم ضد الارهاب اليساري..
هيهيهيهيهيييييييييي

إلا زعيع..إيه حكاية الناس اللي بقت بتنسى نفسها كتير اليومين دول، ويشتغلوا مخبرين ببلاش؟..
هي المصري اليوم نسيت نفسها ولا إيه؟
ولا إدارتها اتغيرت ولا إيه بالضبط والله انا مش فاهم!!

عضو مجلس شعب شوية، وجرنال شوية، ورئيس جامعة شوية..جتكم القرف مليتوا البلد!!

بست..إلا العالم قال إيه؟

Anonymous said...

والله يا نورة الناس ديه خنقتنا
انا عن نفسي مش عارف اخد موقف
ولما الاخوان قطعو الجريدة انا كنت ضد هذا الموقف وان كان ده حقهم وكان رد الفعل معقول ( مجدي الجلاد لم نفسه واعتذر )والحقيقة انا فرحت جدا ان الدستور بقت يومية ومن ساعتها وانا مابشتريش المخبر اليوم وباكتفي بقرأتها علي النت
بس علي فكرة محمود العالم وسعها اوي
اضرابات ايه اللي الشيوعيين وراها
واسكندرية واسوان ايه
وتنظيم ورموز وديوله
امال الحاجات ديه فين
فكرني بالعشرة مليون اللي خرجوا الاستفتاء واحنا مكناش هنا
بحري من اسكندرية

Anonymous said...

نوارة
سعادتك البلد ديه محدش عارف فيها اى حاجة هيا ماشية ازاى اصلا ولا مين اللى بيحكمها
اليسار بيضرب فى الاخوان والاتنين بيضربوا الحكومة والحكومة تقبض على الاخوان وكفاية تسيب شبابها يتقبض عليهم والقيادات بتاعتهم محدش يسمع صوتهم

احلى حاجة جرنال الاهرام بتاع امبارح كاتبين فيه خبر ظريف اوى فى الصفخة الاولى
ان جمال مبارك بيستعرض نظام التامين الصحى الجديد
السطر اللى بعدة نظيف يبحث تنمية دخل المواطن

يعنى جمال مبارك قبل نظيف فى الاهمية وبيتكلم فى شغل الحكومة

هوا جمال مبارك بيشتغل وزير اليومين دول ولا وظيفته ايه بالظبط مال امين السياسات بنظام التامين الصحى هيا ديه وظيفة الحكمة والريس ولا وظيفة امين السياسات علشان يتكلم فيها

وكل ده ومش عاجبك ان البلد ملخبطة

Anonymous said...

ههههههههههه تنظيم شيوعي من امبابة للتلاتينيي يا لهوييي الراجل دا ايه اللي حصل له؟

انا مريحة الطاسة من اربع سنين لا للجرايد الا ع النت احيانا مش ناقص كمان الا انفع جرايد الجزارين اللي بيبيعوا فيها اللحمة حتي الدستور يا وكسة وخيبة اول عدد يومي شفته رفع لي الضغط قال ايه سيادته ساب كل حاجة ومسك في حفلة شاكيرا
طب تحيا شاكيرا بالعند ف الدستور


انور؟ انتى متخيلة انه بيعرف؟
ولا بتتكلمى علي خلفية ان كل حاجة ممكن نشتريها من سوق الخضار؟ في هذه الحالة هيبقي فيه انور و جلالة حسنى كوبري الثاني واحتمال احمد عز الرابع وهلمجرا

Anonymous said...

احمد

بتضحك على ايه

يا احمد والنبي معلش يعني

انا قايلة في البوست ان الكل خالص

وان كل الاطراف في المعارضة داخلين ضد بعض لعبة

الكسبان فيها خسران يا احمد

والنبي والنبي والنبي

ماهو وقت شماتة دلوقت

زي ما بقول لك

الكسبان خسران



بحري

يا ابني الدكتور العالم ربنا يشفيه عنده زهايمر ربنا يعافينا

وهو يا حبيبي بيتكلم عن حاجات حصلت في شبابه واختلط عليه

بس العيب مش عليه

العيب والعار على الصحفية اللي ما تحترمش شرف المهنة ولا مرض مصدرها وتنشر على لسانه كلام هو مش واعي له



مصر هي امي

كل ده والمعارضة بتضرب في الحكومة؟

هي الحكومة دي حد عارف يضربها خالص

ياللا تيجي من عند ربنا


زنزانة

يا اوربة

صحيح احنا بقى عشان ما نتلخبطش لازم نسمي السيد جمال الرئيس جمال الثاني

وابنه يبقى انور الثاني

وللا بقى بلا خوتة يسميه جمال

ويبقى فيه جمال الثالث والرابع لحد

السادس عشر

ودقي يا مزيكا

Anonymous said...

هي فعلا المخبر اليوم


من ساعة الحملة السمجة على طلبة الازهر ووصفهم بالميليشيات وانا قلبي واكلني منها

وكل شوية والتانية يطلع لنا خبر غريب زي البلاغات بالضبط

ومن فترة في العاشرة مساء كان رئيس مجلس ادارتها ضمن مجموعة من الضيوف عندما ثارت قضية شراء احد رجال الاعمال المنتمين للحزب الوطني لجريدتي الدستور وصوت الامة وكان ابو العينين ووائل الابراشي ضمن ضيوف الحلقة

وقام السيد رئيس تحرير المخبر اليومي بقول كلام هلامي لالون له ولاطعم ولا رائحة عن عدم رضاه عما تنشره الصحف والمح إلي تكدير الصفو العام ولكن من بعيد مؤكدا عدم تدخل مجلس الادارة في سياسة الجريدة وان مجلس الادارة لايتدخل في اي امر من امور التحرير بتاتا

ولكن بصفته رجل اعمال يهمه بالتأكيد تحسن علاقته بالحكومة والا تكون جريدته جريدة معارضة حقيقية

ولكن يبدو انهم اكتفوا بدور المخبر بعد ان وجدوا ان دور الصحيفة المستقلة صعب القيام به

بلانيلة

قال جريدة مستقلة قال

Anonymous said...

هههههه
انتي يا نواره جايه تقولي كده بعدما ابتديت اشتريها امبارح, وعلي فكره هينشروابكره اقصه الكامله بالمستندات لحوار الدكتور امين العالم,,,ومش عارف الحوار م داخل دماغي شيوعين ايه بس دي تبقي خريت !!!
تحياتي

Anonymous said...

ايه ده شيوعين!!!!!!!!!!!!!!!!!!
دستورررررررررررررررررررررررررررررر
مش بقولكم حابس حابس يكفينا شر الملابس بردوا
الله الله الله اشى شيوعين و اشى يسارين و اشى ملحدين و اشى مسلمين و اشى مسيحين واشى واشى واشى يا سلام التوكتيل بقى جامد قوى طيبو النبى الى زى حلاتى كده يعنى مش تبع اى تيار يروح فين ؟؟
ياخدله تيار الى راح المرج ولا رمسيس؟
ولا بتاع الدمرداش احسن!!!!
ولا يقف ضد التيار و يضيع فى الرجلين
ولالالالالالالالالالالالالا
يدستر و يبقى تبع الدستور و تبع الحكومه هو ده الحل صح
واحب اهدى الاغنيه دى للسيد جمال مبارك كبارتنا و حبيبنا اغنيه الدنيا ربيع و الجو بديع قفلى على كل المواضيع قفل قفل قفل قفل والنبى اعزمونا فى الفرح حاكم انا بحب الاوبن بوفيه كتير اوى واحلى سلام و تحيه لجمال وعرسنا سيد الرجال عرسنا عين الاعيان اخوكم .يحيى

Anonymous said...

يا جماعة الراجل عنده 85 سنة يعنى فى تخاريفه خالص ... يعنى انا حاسة ان الريبورتاج دا اهبل بجد اوى .. ايه اللى قام وشفت الورق على الترابيزة وضغطت عليه وبتاع
ايه الافلام دى ؟؟
وسعت شوية منهم كلهم وشكلنا كده كلنا هنطلع من التنظيم ده ... والراجل قال بيقلك عاملين خط قيادى تانى وخط قيادى تالت ... عشان لو انقبض على الخط الاول .. كان ناقص يقول
الاسم الجديد للتنظبم هو المدونين فى الارض واهو يبقى شارك بحاجة فى المولد
ليه الهجص ده .. بجد الراجل ده خرف والمصرى اليوم بتهجس وكان احسن لها تروح تعمل حوار مع دارات المسنين بالمرة ومرضى الزهايمر والشيخوخة

Anonymous said...

مين قال لك بس اني باضحك شماتة يا حجة تهييس؟
أنا باهيس برضو من ضمن التهييس..باحكي الحكاية بتهييس بمعنى أصح!!

ولو اني حاسس انه الموضوع ده بالذااااات لو تطور لضربة أمنية يبقى هطل على أصوله..على أصوله!!

وبرضو لأني شايف انه الحكومة المصرية مش محتاجة لتمهيد إعلامي ولا تبرير قدام الشارع عشان يضربوا اليسار!!

يعني أصلا مفيش حاجة ممكن اشمت فيها ناهيك عن اني مش هافرح في اليسار يعني لو انضرب!!

Anonymous said...

ازيكو
بصوا بقى اصلا مصر مفيهاش اى حاجة كويسة وانا على فكرة ضد كل الاحزاب المعارضة والحكومة لانه بصراحة كل اناء ينضح بما فيه يعنى نظام فاسد ومعارضة فاسدة والبلد عايصة فى الفساد يعنى ماشى الحال
اما حكاية الشيوعيين وان الراجل خرف عيب كده من حقه انه يقول اللى يريحه لان من المفروض محدش يغلط فى حد ده رايى الشخصى حتى لو انا ضد فكره
ثانيا بقى والاهم ان التنظيم اللى بيقول عليه من الاسكندرية لاسوان انا بقى اتحدى اتحدى اى حد يقول
اسوان اصلا فيها اى حركات بـجد لانناناس عســــل اه يعنى احنا قريبين من السودان ومش بنحب نتعب نفسنا خاااااااالص يعنى استنوا بقى احنا اللى هنعدل الجمهورية دى
هههههه
يااااااارب ارحمنا من الفتن وكن مع وطنى الجريح ولنـا الله

Anonymous said...

طب يعني هوا مين ممكن يصدق كلام زي الي بيقوله الدكتور العالم ده؟؟

و هل هوا فعلا لو في تنظيم بالشكل ده كانو هيسيبو راجل مهيس زي الدكتور العالم يفضحهم كده ؟؟

و بعدين ايه دلالات وجود تنظيم زي ده ؟ داحنا الحمد لله بنعيش ازهى عصور الجهل و التخلف و الرجعية و الاسلام هو الحل..

و لا وجود اطلاقا لاي شيئ يمكن ان يسمى تيار يساري مصري يهتم فقط بحقوق طبقة العمال و الفلاحين و الموظفين المطحونين

طب يا ريت يكون امين العالم بيتكلم صح و لو انه شيئ بعيد تماما عن التصديق و انا متهيئلي انو غلط في الاسسم و يقصد تنظيم الاخوان مش تنظيم يساري

Anonymous said...

بمناسبة المخبر اليوم و االمخبرين الي بقوا أكتر من المواطنين اسمحيلي أحكيلك موقف لسه حاصلي امبارح :
امبارح انا قررت أعيش دور البنات و أروح أعمل باديكير في سنتر..و قد كان..روحت و قعدت و بدات اتكلم مع احد العاملين هناك ( هما عرفيني نوعا ما) المهم سألني ليه أنا بفضل الدستور عن المصري اليوم..و قولتلوا وجهة نظري قصاد حوالي 15 بنت و ست من الزباين و الخمس عاملين الموجودين...الي لفت انتباهي ان في زبونة كانت مركزة معايا جدااا و كانت بتبوصلي شزراا..المهم مركزتش معاها قوي لغاية ما زبونة تانية اسمها ايمان قالتلي: يا موزموزيل الظاهر المدام الي هناك بتشتغل فيها اصلها هتقوم تضربك كمان شوية..ضحكنا و العامل راح مغير الحوار على عماد الكبير, ومن هنا كل الي في المكان اشترك في الحديث ؛ الي قرا حاجة يحيكي و الي شافت الكليب تفتكر و تدمع...الى اخره..
الكل اتكلم ما عدا الست الي كانت هتضربني, لغاية م قولت حسبي الله و نعم الوكيل ان الله هو المنتقم العزيز الجبار..يا رب انتقم من كل طاغية و كل ظالم..
الناس الي في المكان قالوا امين...الا الست دي..برقت قوي و قامت نحيتي و بصيتلي بقرف و قالت للعامل الي كان معايا: أنا مدام فلانة مرات المستشار فلان الفلاني وكيل النيابة فاشتروا نفسكم و خلص للانسة ( الي هيا أنا) عشان تشتغل معايا..
أنا و الله ماحسيتش بنفسي الا و أنا بزغرط و بقولها ألف مبروك...
معرفش ليه يس حسيت ده انسب رد..
الي في المكان قعدوا يضحكوا و هي اتزرزرت اكتر و برقتلي و خدت بعضها و مشيت...!!!!!
ايمان قالتلي : كنت فاكراها من المصري اليوم أتاريها مخبر !!!!

Anonymous said...

بعد اذنك يا استاذة نوارة
الاستاذ تحوتمس
الاسلام يعنى الرجعية يعنى التخلف طيب ليه الغلط ده
يعنى تفتكر حضرتك ان الناس يكونوا ملحدين كويس ونلغط فى بعض برضو كويس يعنى
اصلا الاحزاب والحركات والتنظيمات دى ما هى اللى مكاسب فقط لاشخاص معينين وبتنسوا فيها البلد والناس الضغاف يعنى كده فشــنك اصل اللى بيكون عايز خدمة وبيحب الوطن مش بيستنى المقابل ومش بيدوس على الناس
ولــنا الله وربنا يرحمنا لانه هو ارحم علينا من الناس كلهم

Anonymous said...

أماني أظن ان تحوتمس بيقول ان احنا عايشين في عصر الرجعية و التخلف
و ان الاسلام هو الحل ....
بيقول ان الاسلام هو الحل للتخلف و الرجعية الي احنا بقينا عايشين فيها مش السبب لده كله ...

Anonymous said...

mariam

لا انتي فهمتيني غلط انا مقصدتش ان الاسلام معناه رجعية و تخلف ,,و مقصدتش برضو اني اقول ان الاسلام حل للرجعية و التخلف طبعا

و انا اصلا مقولتش اسلام انا بتكلم عن الشعار (الاسلام هو الحل)فممكن تعتبريني بربط بين التخلف و الجهل و الرجعية و الاسلام السياسي و ليس الاسلام كدين

Anonymous said...

الاول السلام عليكم
انا بس كان ليا تعليق صغير
بالنسبه لجملة الاسلام هو الحل فلو اتفهم معناها صح هيتعرف ليه هو الحل
والاجابه يا عزيزى
انه ارجع بالتاريخ شويه لورا
لما كانت الدنيا دول
دوله فرس
دولة روم
ودولة الاسلام
كانت دولة الاسلام ند قوى بيتعمله الف حساب وكان المسلمين مجرد وجودهم كخصم فاى حرب طالت المده او قصرت فالنتيجه معروفه مسبقا انه النصر للمسلمبن
وده كان بيحصل لانه كان فى تطبيق شريعه صح والشريعه لا تتعارض باى حال مع الحياه بالعكس بتدعمها وتخليها احسن
ومن خلال اللى عرفته ان الدول ذات القوى الاقتصاديه العظمى بتطبق قوانين الاسلام فى المجال ده
واحنا اقتصادنا ماشاءالله عليه متخلف لابعد حد
وبيقولو علينا دول ناميه مع اننا كان الاول يتفاتلنا بلاد وانا مش بقول نعيش فامجاد زمان وننسى دلوقتى
بس لازم نعتبر ولكل عصر مشاكله والبلاوى اللى بتحصل فيه
واظن لو حطينا رجلينا على بداية الطريق اننا لازم نغير ونصلح ما افسده النظام هيكون له صدى لانه ربنا سبحانه وتعالى بيقول ( ان الله لا يغير ما بقوم حتى يغيرو ما بانفسهم)
واحنا زى محنا كل اللى بنعمله نرفض**نشجب**نستنكر!!!
ودى طبيعه فينا كشعب كلامنجى من الدرجه الاولى
معلش طولت عليكم
ودمتم:)

Anonymous said...

صباح التهييس احنا خلصنا من بلوة انور الاول لما هايجيلنا انور تانى مش هوا اللى بلانا بالمنيل على عينه ابو جمال الاول دا غير بالاويه التانيه والاكاده يا ستى انك ما هالبت عاوزه معاه عثمان احمد عثمان وتوفيق عبد الحى ورشاد عثمان الله يسامحك

Anonymous said...

انتي جايبة الاخوان والشيوعيين يتعاركوا هنا؟

آدي آخرة المخبر اليوم

Anonymous said...

الاخت نواره
يسعدنى متابعة كتاباتك الشيقة وارائك
وارجو ان تسمحى لي بلفت انتباهك لنقطة
اذا كان سيادته يسمح لنا ان نأكل ونشرب في بلده وسايبنا قاعدين
فيها وكمان مش عاجبنا.
طب افرضي ياستي انه صحى الصبح وقال كل المعارضين
يمشوا من بلدى كنا حنروح فين.
اهي بلد لمانا وسترانا والسلام. ويجعله عامر
سامى

Anonymous said...

ايه يا شباب

بقى اصحى من النوم وافتح المدونة الاقيكوا بتتخانقوا؟

طيب كويس

عشان نشوف نموذج مصغر من الحوار بين فصائل المعارضة المصرية

احنا بنتكلم فيه ايه وانتوا بتتناقشوا في ايه؟

باقول لكوا المخبر اليوم بتبلغ عن كل فصائل المعارضة

زي ما بيللا بتقول

وباقول لكو الحكومة عايزة تنضف البلد عشان تعدها للمحروس

اتفضل يا استاذ احمد نصر

عشان ما ترجعش تقول عليا باتجنى على المعارضة المصرية

تخيل بقى القيادات بيتكلموا مع بعض ازاي

بالنسبة ليحيى اللي بيسأل على غير المصنفين من أمثاله وأمثالي

انا خايفة يعملوا لنا تنظيم التهييس العالمي

فيفا ايجبت

اه والنبي وعايزين كمان شحنة فراخ فاسدة بالمرة عشان الصورة تكمل


انونميس

صحيح البلد مش بلدنا

Anonymous said...

اناعارفه ان كلامي شكله رومانسي بحت لكن انا بحلم ببكره اجمل, برغم كل اختلافتنا دي لكن ما نقدرش ننكر ان في صحوه ,جايز تاخدوقت لكن يكفي ان الناس ابتدت تفوق من العوم في البطيخ , مش مهم كل واحد فينا تصنيفه ايه المهم يكون هدفنا واحد

Anonymous said...

أنا معجبة بيكي قوي يانوارةو بجو المناقشة

Anonymous said...

بعيداً عن الرومانسه اللي اتكلمت بيها " اتفضلوا عندنا "
بس كلمها صح احنا بنخرج من مرحاة العوم في البطيخ
احنا في مرحاة المخاض و وليد المعارضه المصريه مسيره هيخرج للنور
اينعم احنا في حالة تخبط الان و لكن لازم نعدي المرحله دي و نستفيد منها
و اكيد بكرا احسن

Anonymous said...

خيتي نواره.. انتي بتخبطي الناس ببضعها ليه بس؟
انا مش مطلعه ع المخبر اليوم دي بس على الاقل قرات الحوار لمحمود العالم و كنا بنحكي انا و الوالد في استغرب بعدين حكالي انه في شروط للنشر بتراعي حالة المتكلم ( معلش اصل الوالد قانوني حبتين)
بس الفعل لا يعتب ع د. العالم مش لاني مش بحترمه لا بالعكس بس لانه لكل مقام مقال ..و مش اي حد قال اشي اعتبره تصريح و اهز في البلد؟؟

ع كلن بغض النظر عن كل ما قيل و سيقال عن المقال .. تعالي عندنا شوفي نموذج مصغر للنقاش بين الاحزاب المعارضه اذا فضل في معارضه.. بس عجبتني قصة العداد بيقلب دي .. يعني حيكون بعد انور الصغير زمرة جديده بالصلاه ع النبي..
دمتي بسلام

Anonymous said...

ماشى يا غاليه يا بنت الغالى مادام هاترجع ايام الناس الحلوه دى بس المرة دى مش ها يرجعوا بفراخ فاسده هايرجعوا بالفساد نفسه معلب اقف فى الصف منك ليه الفساد عندنا وهايفيض وكل واحد هاياخد علبه

Anonymous said...

بحييكى على الموضوع ده وانا بصراحة مع رأى محمد عادل مصر هى امى
فعلا محدش بقى عارف راسه من رجليه ولا وشه من قفاه فى البلد دى ومحدش بقى متوقع الضربة الجاية هتبقى من مين ولا حتى فين
وادينا عايشين وماشيين وبنتفرج

Anonymous said...

يا جماعة صحصحوا واقروا صح اللى بين السطور واللى وراها كمان كل دى بالونات اختبار وخلق لصراعات او محاولة لخلق حالة من البلبلة والتشتيت بين الناس كلها علشان تبقى حالة من الفوضى وعدم الفهم استعدادا لاستقبال المنقذ والمهدى المنتظر الفرعون الجديد.... زمان لو تفتكروا ايام السادات لما كان التيار الشيوعى سايد اوى فى مصر السادات عمل ايه خلق ليه تيار مضاد اللى هو الجماعات الاسلامية صحيح هم تمردوا عليه لكنه نجح فى القضاء على التيار الشيوعى بالضبط زى اللى انتوا شايفينه دلوقتى بيكبروا وبيضخموا فى الاخوان وبيصوروهم اكبر من حجمهم الطبيعى الاف المرات علشان كلنا نفهم ونؤمن ان الاخوان هايبقوا الغول اللى هاياكلنا كلنا وده طبعا هتكون نتيجته اننا كلنا هانقف قصادهم وهانحاربهم كل المقصود فى رأييى ان مصر كلها تتحط فى صراعات داخلية كلنا مع بعض وضد بعض زى لعبة شد الحبل بس دى موش هاتبقى بين طرفين هاتبقى بين الاف الاطراف افتكروا قبل ما تنزل قرارات التعديلات الدستورية كام بالونة تم اطلاقها علشان بلبلة الرأى العام فاروق حسنى والحجاب الاخوان والميليشيات هالة سرحان وموضوعها كل ده اخد مساحة كبيرة من الرأى العام وماكانش فيه وقت علشان ننتبه للموضوع الاخطر فى تاريخ مصر فى الخمسين سنة الاخيرة تفصيل الدستور حتى مجلس الشعب اتسلق بسرعة والاستفتا بسرعة رهيبة علشان موضوع ويتقفل بسرعة ويبقى امر واقع غصب عن كل الناس خلاص اما الاحزاب فمافيش حاجة اسمها احزاب فى مصر دول على الورق وبس مافيش لهم وجود فى الشارع ولا حتى ليهم برامج واضحة كله كلام انشا افهم ان البلد مليانة مشاكل فين اللى قدم اى حل ليها احنا شاطرين فى الكلام وبس لكن فعل مافيش اللى عاوز تكون ليه قاعدة عريضة ينزل الشارع واعماق القرية المصرية ويكون عنده حلول جزرية لمشاكل الناس محسوبة بالورقة والقلم وبالسحتوت كمان مين عمل ولا هايغمل كدا اتحدى لو كان حتى الوزرا عارفين برنامج الحكومة اللى هم مقدمينه ايه اهو كلام فض مجالس وخلاص للاستهلاك المحلى مع تحياتى (وش بيغمز)

Anonymous said...

الاستاذ وش بيغمز انونيمس

انا اعرفك...صح؟

Anonymous said...

الاستاذة نوارة معلهش دى طلعت اوت لأ موش صح دى اول مرة اعلق عندك هنا احتمال شفتي تعليقات ليا فى مدونات تانى تحياتى