Sunday 26 June 2011

تحت امرك يا.. يا دكتوووووور

احنا اول شعب دكتور في الدنيا.. جامعة سان فرانسيسكو منحت الدكتوراه الفخرية للشباب المصري وتسلمها نيابة عنا محمود ساندمانكي، ومن هنا ورايح احنا مش حنكلم بعض غير بدكتور
ما عادش حد بقى يقول: انا مش شباب الثورة دي تاني والنبي احسن بتنقطني، حضرتك تعرف نفسك اما بالدكتور فلان، او لو مش مع الثورة تبقى الفلول فلان
يبقى البلد دي فيها دكاترة وفلول، بالنسبة للفلول، المفروض ان المجلس العسكري يبقى عنده تقدير سليم للامور ويتضامن مع الدكاترة اللي نزلوه بنفسهم وقالوا له واحد اتنين الجيش المصري فين... ويخلص لنا على الفلول واحنا حنغني له الاغنية دي



وبالنسبة لمبارك.. بما اننا ضكاطرة، فاحنا عملنا قونصولطو وقررنا ان مبارك صحته زي البمب ويقدر يروح طرة يمسح الكبينيهات
وبخصوص تأجيل محاكمة العادلي، يا ريت تيجوا دوغري معانا وتفهمونا انكم ناويين تأجلوا الحساب ليوم الحساب وربنا احسن من الكل عشان نعصركم تنزلوا غوغاء صغيرين
احنا ضكاطرة ونفهم في الصحة اكتر منكم، تأجيل المحاكمات ده بيتسبب في تسلخات خطيرة قد تؤدي الى مرض الايدز وتعرض المريض للذبحة الصدرية... وبعد كده اي روشتة نكتبها تتصرف دوغري، ما توجعوش قلبنا بقى، وما تقطعوش كورس الدوا اللي احنا كاتبينه من نصه، عارفين احنا الطريقة دي... ما خلصتش كورس الدوا ليه؟ يقولك ما انا بقيت كويس.. ماهو انت كده حتتنكس
كان كابير السوايدة قال اننا نستاهل جايزة نوفل.. فين؟ ولا هو كلام وخلاص؟ احنا بنتكلم كلام علمي هنا وما نحبش بقى كلام في الهوا كده
بعد ما خدنا الضكطرة عايزين جايزة نوفل عشان بقى نعرف نتفرغ لشغلنا وابحاثنا ونعرف نساعد طلبة المؤهلات العليا اللي حوالينا ونبتكر لهم طريقة لاستئصال الاورام الاستبدادية تبقى احسن وتوفر جهد احسن ده اليمن وسوريا وليبيا والبحرين الورم عندهم عضال
وبعدين فين الدكتوراه بتاعة تونس؟ دول مقدمين عليها من بدري، هو ده خيار وفقوس.. لما ناخد جايزة نوفل حندي الدكتوراه لتونس ونعمل لنا جايزة باسمنا ونديها لهم ولا الحوجة للخواجات بقى... ادونا فرصتنا بقىىىىىىىىىىىىى
وبعد الفحص اتضح ان حالة ابناء مبارك اسفين يا ريس خطيرة محتاجين عملية تحويل نوع وزرع مخ، احنا جربنا في القرد وطلع فيه تشابه كبير بينه وبين ابناء مبارك وان شاء الله ربنا يوفقنا نسبة نجاح العملية - 90 وان شاء الله نعمل لهم العملية وتنجح ويفيصوا
والله الموفق

16 comments:

Unknown said...

فينك يا عبدالقادر تسمع وتنجنا بئا مينفعش نبئا دكاتره ونصقط برضو

عبدالقادر ده عميد الكليه :d

hayat ank said...

حلوه قوىىىىىىىىىى يا نونو

elzahraamegahed said...

هههههه
عسل يا نواره
بس أنا نفسيتى تعبانه اوى من موضوع الغاز وكنت متعشمه انه يتفجر المره دى برضه
فعلا الموضوع ده ضاغط اوى على اعصابى

Anonymous said...

التدوينه جميله والفيديو اللى معاه جميل وأنتى جميله وربنا يحفظك ويكرمك ..

ahmed rizk said...

ايه الجمال والحلاوة ديه

Sherif said...

شربات ورد مصفى

arabian_faithful said...

ضاكاترة أيه بس دول مورينى الذل علشان يتهببوا ويرضوا يسيبونى أكمل ماجيستير
طيب والنبى متعرفلناشى واسطة من البشوات دول يزق معانا زفة أحنا فى عرض زقة خصوصاً أن الوقت اللى ضاع فى الشارع ده الكلية مبتعترفشى بيه تقولهم ثورة ماثوراشى يقولولك مالناش فيه :( الجزم نقول أيه بس

بالمناسبةبقى أنا فعلاً معجب جداً بكلامك بس مش عارف ساعات بأحس أنك عندك نص ضارب :) أنا يمكن عندى ربع ضارب بس مش نص نص يبقى كتير حتى :)
عموماً ربنا يخليك ويهديك ويرزقك السعادة يا أستاذتنا :)

garahamira said...

تصدقى بالله اللى انتى اصلا مش عارفاه زى ابوكى ان انتى انسانه حقودة وغير وطنية ولا تعرفى حاجة عن الوطن اللى انتى عايشة فى خيرة وعايزة تخرية وبتحرضى الناس انها تحرق بليمكن ترتاحى ونارك تبرد ولو انى اشك فى كده لان الظاهر ان التار اللى بينك وبين الداخلية سببة واحد ظابط ضحك عليكى ولبسك فى الحيط وعاشن كدة عاوزة تنتقمى من البلد كلها حسبى الله عليكى وعلى كل اللى زيك

بهيج الشرير said...

والنبي ياأبلتي أنا طول عمري عارف أني أبو الدكاتير بهيج الشرير ومن غير فان سرانسيكو قصدي سان فرانسيكو ولايحزنون

BORG HMAM said...

garahamira
هو البعيد ميري ولا المنيل فل ولا الموكوس واقع من مخه حته ولا انت ايه بضيق افقك
خدلك انت بس نفسين من فليت العسكري وانت تبقا تمام

NAGWA said...

طمنتيني أصل انا أخدت الماجيستير بذل العبيد بعيد عنك من غطرسة الدكاترة كدا ابقى أتدكترت من غير مروح الجامعة واتذل لهم تانى ؟
هييييييييييييييييييييييه
عموما مكناش مستنيين من حد حاجة بس أدينا بنفرح

انا من شعب ثار وحما الديار

http://www.facebook.com/pages/%D9%86%D8%A7%D8%B4%D8%B7%D8%A9-%D9%85%D9%86-%D8%B9%D9%84%D9%89-%D8%A7%D9%84%D9%83%D9%86%D8%A8%D8%A9/155410777858328?ref=ts

احلام جوليا said...

حلوة قوي حكاية عملية لابناء مبارك دي هههههههههههههههههههههههههههههه بصراحة ده راي برضه محتاجين زرع مخ ههههههههههههه يارب عليك بالظالمين يارب

احلام جوليا said...

حلوة قوي حكاية عملية لابناء مبارك دي هههههههههههههههههههههههههههههه بصراحة ده راي برضه محتاجين زرع مخ ههههههههههههه يارب عليك بالظالمين يارب

freedom4ever25 said...

اتفق معاكي يا دكتوره نواره في كل حاجه كتبتيها الا حاجه واحده وهي وصف ابناء مبارك بالقرود وانك بتتمني انهم (يفيصوا ) . لأ يا دكتوره انتي عارفه ان ال 800 واحد اللي نزلوا في يوم غضب ابناء مبارك دوول مش لوحدهم وان على الاقل في ناس كبيرة في السن بتتفق معاهم وبتفكر بنفس تفكيرهم . بس يمكن يكونوا مش اوفياء اوي لفكرتهم زي الشباب اللي نزلوا . لأنهم 30 سنه اتعودوا على عدم الوفاء لاي فكره ولا اي شخص .والمشكله الأكبر ان المصابين بمرض مبارك الخبيث اللي هوه (الاستعداد لقبول الزل والظلم والاستبداد والاهانه في مقابل الامن الشخصي ولقمة الخبز ولو كان الرغيف ابو شلن وكوب المياه وان كانت ملوثه) للأسف المرضى دوول كتييير اوي وبالتأكيد هيكونوا كتله مؤثرة جداا في انتخابات مجلس الشعب اللي جايه وفي انتخابات الرئاسه . وعشان تتأكدي احسبي الناس اللي مع عمرو موسى واحمد شفيق وعمر سليمان وطلعت السادات ومرتضى منصور واللي عايزين شخصيه عسكريه تحكمهم. فأرجوا بدل ما نشتم ابناء مبارك ونوصفهم بالقرود ونقعد نألس عليهم . يبقى الاولى اننا ننوفر لهم العلاج المظبوط ونوصل لهم بيه في كل مكان لأن (قناة التحرير لوحدها مش كفايه) وشكراا

محمد نور الدين said...

ليس كل الدكاترة يا

NAGWA

عم مينا said...

يعني العالم بيقول علي الثوار انهم دكاترة وفيه ناس في مصر لسة بتقول عليهم صيع