Saturday 18 June 2011

توكلنا على اللي بيأكلنا

مبدئيا: طوني بلير اتحشر وبيقول لنا اجلوا الاستنخابات... مين الحمار ده؟ صنعته ايه يعني؟ هو مال امه؟ 
ثم... أأمن حاجة لضمان الديمقراطية ان شاء الله، اننا نعمل انتخابات، وبعدين نكتب الدستور
ولما نكتب الدستور، الجيش بتاعنا حيبقى وضعه زي سابق، يعني حبة علينا وحبة عليه، يعني مش حنتدخل في مالياته، وهو ما يتدخلش في سياستنا
الحقيقة اقتراح ان جيش مصر يبقى زي جيش تركيا يرقى الى الخيانة العظمى
الجيش المصري عقيدته حماية الوطن وسلامة اراضيه وحماية الشعب.. الجيش التركي زي الداخلية، شغلته حماية الدولة والنظام، الجيش التركي انقلب على الديمقراطية اكتر من مرة، الجيش التركي له صلاحيات حماية علمانية الدولة والدستور لإن اتاتورك عمل انقلاب.. الاتراك ما بيعملوش ثورة كل تلاتين سنة زينا... ما بيعملوش ثورة خالص، اللي بيقلب نظام الحكم هو اللي حقه يبقى له الصلاحيات
واللي قلب نظام الحكم عندنا هو الشعب.. وبالتالي هو اللي يبقى له الصلاحيات
الجيش وقف جنب الشعب يوم 11 فبراير، وعشان كده ما قبل 11 فبراير احنا ما نعرفش عنه حاجة ومش عايزين نعرف عنه حاجة، واللي بيهدد بفتح ملفات ما قبل 11 فبراير مش عايز يفتح الملفات دي الحقيقة، هو عايز يقعد الجيش لحد ما يعمل معاه الصفقة الآتية، بمساندة وموافقة من امريكا
انا حالخص لكم الموضوع ايه بالظبط على لسان واحد قال لي كده في وشي وما اتكسفش يصارحني، والحمد لله ان كان فيه شاهد قاعد، الحكاية وما فيها كما يلي:
رحنا للشخص الفلاني ده، انا وصديق، ضمن لفة كنا بنلفها بحثا عن الاجماع الوطني وتوحيد الصف. الشخص الفلاني ده الظاهر انه اهم مما يبدو.. ده شخص يبدو انه حد مالوش سلطات كتير، وفيه ناس بتثق فيه، بس يعني مش الموفي ستار ولا حاجة، لكن هو هو نفس الشخص ده قابلته كذا مرة وقال لي على كذا حاجة بعدها بيومين لقيتها بتتحقق، بعدها بشهر لقيتها بتتحقق، بعدها باسبوع لقيتها بتتحقق، طبعا انا واحدة سليمة النية، نقية السريرة، مرهفة الانف والاذن والحنجرة قلت سبحان الله.. راجل عنده بعد نظر
بس بعد اللي هو قاله، ثم اللي عرفته بعد كده، يبدو ان الراجل ده بعيد النظر، طايل الايد، مسموع الحس مشرئب الفلنكات شلولخ، وهو ما يفسر التكبر اللي كان بيكلمنا بيه
قال لنا الآتي:
اهم حاجة فك الارتباط بين المجلس وبين الاخوان، دلوقت المجلس متخوف من فتح الملفات المالية بتاعته، ففريق القوى الوطنية اللي مش اخوان المفروض يقدم للمجلس حاجتين، اول حاجة انه ما يتحاسبش ماليا، تاني حاجة ان يبقى له سلطات حماية علمانية الدولة والدستور فهو كده حيلاقي نفسه كسبان، ودي حتبقى قضية اجماع وطني... من غير الاخوان طبعا. والاخوان حيضطروا يسكتوا والا حيبقى قدامهم انهم يواجهوا الجيش وهم مش حيواجهوه
انتهى
ههههههههههههههه
اجماع وطني من غير الاخوان ده بيبقى فيه مين؟ انا وتلاتة صحابي صح؟
طبعا انا ما اعرفش صاحبي اللي حضر معايا حيزعق لي اني قلت الكلام اللي دار ده ولا لا.. بس عادي يعني، علقة تفوت ولا حد يموت بجملة خنقته مني، المهم اني احذر من خطورة الكلام ده، لإنه خطر على مصلحة الوطن وعلى مصلحة القوات المسلحة وعلى مصلحة الثورة وعلى مصلحة اي حاجة في الدنيا وما بيصبش غير في مصلحة امريكا 
اولا: الفرق بين القوات المسلحة المصرية وبين الداخلية زي ما قلنا ان القوات المسلحة بتحمي الشعب والوطن والداخلية بتحمي النظام، واحنا عايزين نعيد بناء الداخلية بحيث انها تحمي الشعب مش تحمي النظام، مش اننا نغير عقيدة الجيش بحيث يبقى الداخلية والجيش ضد الشعب لصالح النظام
ثانيا: يعني ايه الاخوان حيضطروا يسكتوا والا حيواجهوا الجيش؟ هي بقت كده؟ تهديد بالسلاح يعني؟
ثالثا: عجبك ولا ما عجبكش المؤسسة العسكرية المصرية مؤسسة وطنية.. وطنية يعني ايه؟ يعني ولاءها للوطن مش للدولة. وده اللي نفعنا. وده اللي احنا عايزينه يستمر.. ولازم يستمر، ليه؟ لإن بقى بجد مصر ليست تركيا، احنا شعب بيعمل ثورة كل تلاتين سنة:
1882
1919
1952
1977
2011
يعني على الفين حاجة واربعين عيالنا حيعملوا ثورة كمان.. 1882 كانت هوجة عرابي، شعب وجيش، 52 كانت اعتصامات شعبية ثم الحركة المباركة للجيش، 77 السادات نزل لنا الجيش وفضل يبوس في الناس والناس تبوس فيه، 2011 مبارك نزل لنا الجيش فخلعه، بس تغيير عقيدة الجيش بالطريقة دي - وهو ما تسعى له الولايات المتحدة بقالها تلاتين سنة وما عرفتش في عز ايام المخلوع - حيخلي عيالنا لما يعملوا ثورة سنة 2046 الجيش يضربهم، لان شغلته يحمي الدستور بقى.. مش يحميهم هم
يعني مبارك ما يعرفش يغير عقيدة الجيش واحنا اللي نغيرها له بعد الثورة؟
رابعا: ماحدش عايز يفتح ملفات الجيش المالية.. الرغي ده مجرد تهديدات لاجبار الجيش انه يفضل قاعد، لكن ساعة الجد ما عملنهاش قبل كده ومش حنعملها، دي حاجة كده زي المادة التانية، ماحدش قابل اي تغيير فيها
خامسا: احنا في التوقيت الحالي لنا وضع حرج.. احنا موقعين اتفاقية حاطانا كلنا في مزنق ابن كلب، واللي يقرا ويكيليكس يعرف ان الجيش فضل يتحايل على الضغوط الامريكية من خلال تذرعه بالرغبة الشعبية، وولاء الظباط الصغيرين، وعقيدته اللي تنص على حماية الوطن فقط... و"كان على عيني والله يا امريكا... بس ما باليد حيلة بقى وآدي الله وآدي حكمته، لو نفذنا اللي بتقولي عليه الظباط الصغيرين والشعب المصري اللي ولاءنا له حينقلبوا علينا.. والله لنسيبها لكم ونستقيل ومنكم للناس بقى، احنا مافيش في ايدنا حاجة نعملها"... وشغالين على كده بقالهم تلاتين سنة، وده اللي نفعهم وخلاهم ما يشاركوش في الحرب على الارهاب، ويفضلوا يتدربوا على الجبهة الشرقية، وما يتعاونوش عسكريا مع اسرائيل.. الخ الخ الخ.. تعالى انت بقى لبس الجيش بتاعنا في الحيط واديله صلاحيات تعريه قدام امريكا: على عينك فين بقى؟ ما انت عندك صلاحيات اهي، استخدمها ونفذ اللي احنا طالبينه ماذا والا حطربقها والله.. 
سادسا: ايه الهوس بتركيا ده؟ ايه تركيا دي معلش؟ انتوا صدقتوا نفسكم؟ ايه تركيا؟ ايه تركيا؟ ايش جاب لجاب يعني ما تخلوناش نقول كلام شوفيني، هي تركيا عملت ثورة عمرها؟ احنا كل ما حد يكلمنا نعمل ثورة، ايه الشعب اللي زاهد في الحكم ده؟ يعمل ثورة وعايز غيره يحكم ليه؟ وبعدين الشعب ملزوم يحمي قواته المسلحة، مش يعريها قدام الاجانب
يا اما بقى عايزين تعملوا العمايل دي في الدستور يبقى تلغوا اتفاقية كامب ديفيد.. مش تعدلوها، تلغوها... خالص، لان ده اسمه تسليم اهالي ده
السلطة تبقى في ايد الشعب
حماية الدستور مهمة الشعب
حماية القوات المسلحة وعقيدتها مهمة الشعب
البلد دي بلد الشعب ومافيش مؤسسة مهما علا شأنها يبقى لها سلطة على الشعب، الشعب هو اللي له سلطة على كل المؤسسات وهو حر فيها يفردها ويتنيها، بفلوسه وشقاه وضرايبه وتعبه، وبمزاجه بيسيب حاجة ويقول مش عايز اعرفها، وبكيفه يقول لا كده ما ينفعش... ما تحكموش على رقبته حد.. ابدا، مافيش غير ربنا بس هو اللي يتحكم على رقبته، ولا عايزينا نبقى زي الجزائر؟
واللي خايف من الشعب بقى يروح
ايه يا اخواتي ده؟
هو الشعب ده عفريت بيطلع لكم بالليل؟
النخبويين خايفين من الشعب لينتخب الاسلاميين
والجيش خايف من الشعب لينتخب لهم واحد خاين يعمل فيهم اللي عمله مبارك
وامريكا وبلير خايفين من الشعب لينتخب لهم واحد ضد اسرائيل
بالنسبة للنخبويين، يقدروا يشوفوا لهم شعب تاني مدام احنا مش لادين عليهم... والشعب ده ينتخب اللي هو عايزه، والبلد حتتعمل زي ما هو عايز، وبطلوا تفضلوا تقولوا حنبقى ايران.. يا كدابين يا كدابين يا كدابين يا كدابين.. احنا حنبقى ايران؟ هو فيه بلد في الدنيا فيها محجبات بيرقصوا في زفة في الشارع غير عندنا؟ حنبقى ايران ازاي يعني؟ حيعملوا ايه؟ واحنا من امتى بنسمع كلام حد اصلا؟ البنات بتلبس حجاب لوحدها، لو الدولة طلعت قرار بفرض الحجاب البنات كلها حتمشي بالمايوه في الشارع... ويافطة ممنوع الوقوف قطعيا اللي تحتها عربيات راكنة صف اول وتاني وتالت وعربية كارو تشهد على كده... حيعملوا لنا ايه الاسلاميين؟ 
والمسيحيين اللي خايفين من الاخوان.. وحياة اعتصام ماسبيرو اللي عملتوا فيه قسم رجالي وقسم نسائي ولما جيت اولع سيجارة فضحتوا امي وواحدة ست لابسة تايير اسود وطرحة سودا وجزمة ريم سودا قالت لي: احنا في مكان محترم يا انسة اطفي السيجارة، فيه ست محترمة تشرب سجاير؟ وكمان قدام الناس؟
انا؟
طب بذمة النبي انت بالذات الاخوان حيعملوا فيكي ايه اكتر من اللي انت عاملاه في نفسك؟ حبست لي دمي وقعدت اقول يا رب جوزها يكون بيخونها مع طوب الارض وهي مسودة عليه عيشته كده، بعد شوية جوزها جه ياخد منها ساندوتشات عبر الحاجز اللي بين الحريم والرجالة وشفته بقى الحاج... يخون مين؟ ده يوم ما يحب ينحرف حيتفرج على ليلى الشايب في قناة الجزيرة 
طب الاسرة دي السلفيين حيصوروهم من كل الزوايا ويكتبوا تحت صورتهم: اسرة من اهل الجنة، ويعلقوها على المنبر 
بالنسبة للجيش اللي خايف منا ننتخب له حد خاين يعمل فيه اللي مبارك عمله فيه
طيب على فكرة احنا عمرنا ما انتخبنا حد خاين.. احنا خلعنا الخاين.. اللي عمرنا في حياتنا ما كنا انتخبناه، لا هو ولا الخاين اللي قبله، ومش احنا اللي يتخاف منا فيما يخص الخيانة دي ابدا.. ابدا.. ده احنا فللي 
بالنسبة لامريكا.. نعم؟ مين دخلكوا علينا اودتنا واحنا بقميص النوم؟ ايه دول اصلا؟ 
-------
الاخوان بيتصرفوا بغباوة؟ عادي.. طول عمرهم، بس لهم حق النصيحة علينا
حوار الدستور اولا ده حوار فاكس وما حدش مهتم بيه ولا يهم اي حد من الناس، بس فيه خطورة ان امريكا تضغط في سكته والناس بتوع الدستور اولا صوتهم عالي، ما بيوصلش للشارع، لكن بيوصل لبلاد الفرنجة
ضغط بلاد الفرنجة مالوش اي وزن لو الشارع صاحي
والشارع مش حينزل يقول: الدستور مش اولا
العودة لقضايا الاجماع الوطني هي الاساس
فيه قضايا اجماع وطني كتير جدا، زي الامن الوطني، الداخلية، الحد الادنى والاقصى للاجور، محاكمة مبارك اللي ضربوا عليها طناش، استرداد الفلوس، حتى ممكن المجلس العسكري يساعدنا ويعمل بالونة من بالونات الاختبار، زي مثلا انه يقول انه حيفرج  عن جمال مبارك مثلا.. قوم الناس تسخن، كده يعني، لاغونا، انشالله حتى فتح المعبر بشكل طبيعي يا اخي، ولما قضايا الاجماع الوطني صوتها بيعلا الخوازيق اللي بتزرعها امريكا بتتلاشى، خصوصا ان البرادعي حلها حل لطيف وكويس ورخيص وابن ناس وقال نعمل وثيقة فوق دستورية.. اهو عداه العيب اهو الراجل، حتى لو مش عاجباك يا سيدي كل المواد اللي هو اقترحها، نتناقش فيها، انما من حيث المبدأ وماله، اظن دي تخرس بتوع الدستور اولا خالص.. ولا هه؟
كل الاطراف دلوقت غلطت... واما البشر يتفرقوا تلقي السما بتنفض.. كده السما انفضت كده
يوم 8 يوليو جاي، وعايزين نعمله للداخلية، بلا دستور اولا بلا دستور ثانيا بلا دستور خالص... احنا عشنا 18 يوم من غير دستور، حصل ايه؟ انجلترا عايشة من غير دستور
احنا حنولع في امه الدستور ده.. مش عايزين حد يمضينا على كومبيالات، من النهاردة مافيش دستور.. احنا الدستور.. احنا الدستور
وبلا اسلامية بلا علمانية بلا نيلة
احنا نتكلم في التفاصيل ثم التفاصيل ثم التفاصيل، تفاصيل بناء الدولة دي، عايزينه يبقى ازاي؟
اول تفصيلة: عايزين وزارة الداخلية بتاعتنا يبقى شكلها ايه؟
ومن هنا لحد 8 يوليو الاخوان يبطلوا غباوة والا حيلبسوا في الحيط، والقوى الوطنية الاخرى تبطل حركات قرعة واتصالات مش تمام، والنشطاء يسيبوا الجيش في حاله، هو من ايد الشعب دي لايد الشعب التانية بس انتوا وضحوا للشعب نفسكوا يعني وهو يكلمهولكوا... احنا عايزين نستعيد قدرتنا على الحشد
وعايزين حوار مجتمعي في تفاصيل بناء الدولة، مش عناوين لا تودي ولا تجيب ولا لها اي اثر مباشر على حياة المواطن وعاملة كده كأن حد بيحاول يجرنا نمضي على كامب ديفيد تاني
لا يا عم يفتح الله.. ما بنمضيش على ورق، احنا بنايين مش كتبة
نبتدي باعادة بناء الداخلية اول حاجة، ونحشد ليوم 8 يوليو على كده، ثم ننتقل بقى الى تفصيلة اخرى، الناس مش حتتصالح عشان قلبها على البلد، الناس حتتصالح عشان مصلحتها، والاخوان من ناحية، وبقية القوى الوطنية من ناحية تانية بيضروا بمصالحهم هم المباشرة... وانا عارفة انهم ما تهمهمش مصلحة البلد، بس مصلحتهم في خطر، وحسبي الله ونعم الوكيل
اه نسيت
بالنسبة للمسيحيين.... ماحدش يعملهم حجته، المسيحيين مش عايزين حاجة غير يصلوا بس، على فكرة، سيبوا لهم كنايسهم، وسيبوهم يبنوا كنايس ويفضلوا يصلوا يصلوا يصلوا... ما بيعملوش حاجة في حياتهم غير الصلاة، ما تسيبوهم يصلوا، اهي بركة

70 comments:

طبيب بيطري said...

حمدلله علي السلامة
اخيرا مقال تاني
ابقي خليكي ع الخط اصلي روحت التلفزيون مصر ومبتفرجش ع الاخبار اصلها بقت تنكد عليا
يارب مصر تتحسن الاوضاع فيها لان موسم السياحة السنة دي انضرب حتي ف الصيف وربنا يهدي الشرطة اللي بتستعبط دي

qqq said...

بقت ستميت حته و كله من تحت راس النخبة الخائنة بتاعة لجنة الحكماء و الخروج الامن، شكله كدة عليه العوض و منه العوض نلقاكم في ثورة 2042 عليكم بخير، موش عارف إيه المجرمين دول اللي بيلتفوا على شرعية الاستفتاء، طيب خلينا نشوف إيه اللي هايحصل لما يبتدوا في الدستور أولا، أتوقع هبة شعبية بس دموية المرة دي ممكن تخلي الثورة الفرنسية حاجة سلمية خالص بالمقارنة باللي ممكن يحصل، و المرة دي الناس عارفة طريقها كويس و جماعة الحكماء و الدستور أولا سوف يتم نصب المقاصل ليهم، عموما يحي الجمل و أعضاء لجنة الحكماء مصممين يلعبوا بالنار و خلينا نشوف اللي هايحصل و ربنا يسترها.

semozone said...

المجلس خايف من فتح ملفاته المالية

ابصملك عالكلام ده

والدليل القطعي هو ده

http://twitpic.com/5cc2x5

بالنسبة للجيش والاخوان

لو اكتر واحد المجلس بيعمله حساب هو البرادعي .. فإن اكتر حد المجلس بيكره هو الاخوان .. والوضع بينهم الان هو مهادنة بين عائلة الاسود وقطيع الذئاب من اجل استقرار الغابة مش اكتر .. والهدنة دي ممكن تتقطع في اي لحظة

احد التسريبات اللي خرجت من داخل المجلس ايام الثورة .. ان الجيش لو اتأكد ان غالبية اللي في ميدان التحرير هما الاخوان .. فان الجيش هايفض الميدان بالقوة

علي مصر السلام .. يحيا الشعب

متفائل said...

أولاً : النخبويين (اللي تاعبينك قوي دول وكأنك بياعة بطاطا ولست واحدة منهم) لا يخيفهم أبداً مجيء الإخوان إلى الحكم ولا يريدون أو يملكون مصادرة حق الشعب في أن يختارهم عبر إنتخابات حرة ديموقراطية نزيهة متكافئة الفرص .. كل ما هنالك أنهم يريدون (ضماناً) يضمن للشعب كله ألا ينقلب الإخوان على تداول السلطة حال وصولهم للحكم محولين أياه إلى بيعة وخلافة مدى الحياة .. وماتقوليليش إن الشعب ساعتها حيثور عليهم .. لسبب بسيط هو أنهم سيوهمون الشعب المتدين أن تداول السلطة هو مبدأ علماني كافر يجدر بهم نبذه وتأييد البيعة والخلافة مدى الحياة .. وطبعاً شعبنا الطيب لا يريد أن يكون (كافراً) من ثم سيؤيد خطوتهم الإنقلابية تلك .. وسلميلي بقى على الديموقراطية
ثانياً : أن يتكفل الجيش بحماية الدستور خصوصاً مبدأ تداول السلطة فيه ليس تغييراً لعقيدته الخاصة بحماية الشعب لأن حماية الدستور (وليس النظام كما تستعبطين) هي حماية للشعب الذي توافق على الدستور وأرتضاه
ثالثاً : تصورك أنه لا خطر من الإخوان ما دام المحجبات يرقصن في الشوارع في الأفراح ومادام المسيحيون يفصلون بين الرجال والنساء في تجمعاتهم .. هو تصور طفولي ساذج وعبيط وأهبل أخر حاجة .. ليه ؟ .. لأن هناك ملفات أخرى في الدولة ينبغي أن يديرها الإخوان غير الملف الأخلاقي .. ملف العلاقات الخارجية .. ملف الإقتصاد .. ملف السياحة .. ملف مياه النيل .. ملف الثقافة .. إلخ .. وهي ملفات تحتاج إلى حنكة وخبرة لا تتوفران للإخوان وهذا واضح من فكرهم الذي تشي به تصريحاتهم المضحكة التي يتحفوننا بها ليل نهار
رابعاً : تصورك إن المسيحيين لا يريدون شيئاً إلا أن يصلوا ويصلوا فقط فمعك حق فيه (حتى لو كنتي بتهزري) فقد نجحوا بانسياقهم الساذج وراء أجندات كهنتهم في أن يصلك - وغيرك - هذا الإنطباع ... يستاهلوا

mohosamaa said...

الانتخابات هى اللى هتخلينا نعرف راسنا من رجلينا ونعرف نحاسب الحكومة على أى غلطة بتغلطها ...والكلوتات بتوع الزنقور أولا هم أساسا عندهم تسلخات فى النفسية بتخليهم ميعرفوش يتواصلوا مع الناس فى الشارع وعايزين أى حد ياخدهم على حجره ولما الجيش رفض شغالين له فى الأزرق زى ملك الكدب المراهق للأبد عادل حمودة هو والبت رشا عزب اللى شبه عبد الشافى المخبر اللى الزلنطحية عاملينه مانديلا وهو ملك الابتزاز وسابوا أحمد الصاوى اللى المصرى اليومين دول كسرت قلبه علشان خاطر السيئ البدوى صاحب صلاح دياب الأنظيز وجايين يقلبوا الدنيا علشان عادل حمودة ونبيل شرف الدين سايق عليكى النبى يا نوارة تتأكدى من موضوع أحمد الصاوى ده لأنه صعبان على شاب وقلمه حلو وهرسوه علشان المصالح ولو غلط قولى ولو صح اقفى جانبه واعلنى اللى خاف اللى عندهم مصالح يعلنوه...توتة:يظل الإنسان محترما حتى يظهر فى دريم وأون تى فى ...وسلام الله علينا أجمعين

mohosamaa said...

مدونة حلوة

MarwaGoogle said...

بجد بقى ماتقوليش انم بتدخني تاني في وشي تاني .. يا رب يحرمو المدخنين من كل حاجة كويسة زي ما بيحرمونا من الهوا اللي بنتنفسه .. شكرا على نصايحك الجليلة انتي بتفهمي بس برضة كرهت ناس كتيير فيكي و بتتصرفي بغباوة

Anonymous said...

حبيبة قلبى نوارتى المنوره عقلى وحياتى بصى الله ينور عليكى انتى كده صح فليحيا العقل المستقل النقدى ولتسقط الديماجوجيه اللعنه نسيت اقولك ان الشعب والله جاى جاى وفاهم كل حاجه ومش حاسس بإن رزقه وسع ولا حاله اتغير استنوا السرسجيه هتشوفوا هيعملوا بجد خلى بتوع الدستور اولا واللى بيعملوا صفقات يعملوا اللى هما عايزينه الشعب جااااااااااااااااااااااااااااااااااى
عيش....حريه.....عدالة اجتماعية
بحبك يانوارتى
مجنون نوارة

sum_1_ said...

ممكن سؤال:
ليه الجيش لما ثار على حاكم فاسد اللي هو فاروق خاضع لقوة استعمارية كبرى اللي هي بريطانيا جعل الشرعية هي شرعية الثورة تحسين الاقتصاد بدأ باعادة رسم الخريطة الاجتماعية عن طريق تأميم الثروات المنهوبة من أصغر اقطاعي لحد بريطانيا ذات نفسها و لما لقى ان تحقيق مصالح مصر و شعبها هيدخل البلد في حرب قال يا حرب فلقى الشعب بيقول احنا ملايين بندق الكعب كلنا جاهزين
و كلنا عارفين مين اللي قام بالواجب مع محاولات الاقتحام البري في السويس و الاسماعيلية و من عدوان ثلاثي ل67 ل 73
حرب كل كام سنة, و البلد ما باظتش بأمارة الاسكندرية اللي بقى فيها عشوائيات في ظل 30 سنة سلام كانت أحلى مدينة على حوض المتوسط
بأمارة الاستعراض الصناعي اللي ابتدا بالنسيج و الجزمة الباتا و انتهى بالعربيات
كلنا عارفين ان نهضة مصر و تطهيرها هدف مقدس يتعارض مع مشاريع القوى العظمى اليومين دول اللي هما أمريكا و بنتها المسخ
و ادي الشعب قام بثورة أقل هدف فيها يتعارض مع مصالح اسرائيل و أمريكا و تحقيقه قد يتطلب الدخول في حرب أظن جه الوقت ان الجيش يرد الجميل, ولا ايه؟

لله الأمر من قبل و من بعد و حسبي الله و نعم الوكيل

Unknown said...

السلطة تبقى في ايد الشعب"
حماية الدستور مهمة الشعب
حماية القوات المسلحة وعقيدتها مهمة "الشعب
.......
حوار الدستور اولا ده حوار فاكس وما حدش مهتم بيه ولا يهم اي حد من الناس، بس فيه خطورة ان امريكا تضغط في سكته والناس بتوع الدستور اولا صوتهم عالي، ما بيوصلش للشارع، لكن بيوصل لبلاد الفرنجة

10/10

انا عايزك تمسكي في الكلام ده..و تقوليه في كل حته و لكل الناس المهمة أو اللي مش مهمة اللي انت بتشفيهم..لأن الفترة اللي جاية أنسب فترة للناس اللي بتلعب و اللي ليها مصالح انها تبوظ كل حاجة و ضيع الحلم الجميل بالمستقبل السعيد

Unknown said...

نوارة زينة الناس
نوارة بنات مصر
ربنا يبارك لنا فيكي

حياة الظل said...

في شغلتين لفتوا انتباهي وحده مهم وحقولها والثانية كمان مهمة بس مش حقولها المهمه الناس بدت تزهق ومشاكلها بتزيد والنخبة ولا هامهم وامريكا واسرائيل والغرب والفلول اكثر ناس مستفيدين من هذا الوضع لازم يسير تركيز على قضايا الاجماع الوطني الي ذكرتيهم يا خالتو نوارة في الاعلام الضمانة الوحيدة الشعب وبعدين هذا الكلام حيفيد في تاسيس المرحلة القادمة في مصر ان المواطن يحس انه مؤثر وله دور
ده مش عشان ده علشان مصر

arabian_faithful said...

سلام عليكم
والله العظيم أنا فرحت خالص لما لقيتك كتبت تانى والنبى بلاش الغيبة الطويلة دى تانى وأنا متفق معاكى فى أغلب النقط ماعدا نقطتين
أولاً أنتى بتقولى الناس مش حتنزل علشان تقول الدستور مش أولاً أنا بأقلك لأ الناس حتنزل وبالملايين والله مش علشان الدستور لأ علشان مش حنقبل من أولها كده ميسمعوش كلامنا وملعون أبو أى أبن كلب مفكر نفسه حيمشى كلامه علينا مش أحنا اللى أختارنا وأحنا اللى أستفتينا خلاص القائمين على الأمر دلوقتى ينفذوا وبس واللى مش عاجبه حكم الشعب يتفضل يدورله على شعب تانى

ثانياً بالنسبة للأخوان يمكن أنا ما أعرفهمشى كويس بس أنا والله العظيم حأكلمك بجد أنا أقرب أصحاب ليا أخوان ولو كل الأخوان زيهم فأنا أرجو من الله أن يتولوا الحكم وبصراحة والله العظيم اللى لمسته من الأخوان أن دول ناس أصحاب قضية ويتمنوا الموت فى سبيل الله يمكن أكون أنا غلطان بس فعلاً اللى أنا عرفته عنهم أن أغلى أمانيهم الموت على أبواب الأقصى فى سبيل الله وعلشان كده أنا بأحب الأخوان ما أعرفشى بقى هما فى السياسة شاطرين ولا لأ لأن أنا مبحبش السياسة وأنا عمرى ماشاركت فى مظاهرات من قبل الثورة علشان فعلاً مبحبش السياسة ولما نزلت أيام الثورة كان علشان اللى فى الشارع كانوا زى حالاتى مبيحبوش السياسة بس كانوا بيحبوا بلدهم وكانوا مؤمنين بقيمة ما يعملون لدرجة إستعدادهم للموت فى سبيل قضيتهم
أه بالمناسبة عندنا فى دمنهور اللى حمانا وأحنا بنصلى فى الشوارع أيام الثورة الأخوان المسلمين واللى عمل اللجان الشعبية أيام الثورة الأخوان المسلمين وأنضرب منهم أكتر من واحد سواء بمطاوى أو حتى بمسدس
علشان كدا أنا بأحب الأخوان علشان عملهم أنما أنا فعلاً ماأقدرشى أحكم على منهجهم السياسى

وألف حمدلله على سلامتك ياأستاذة وربنا يرزقك السعادة بفضله تعالى :)

hardway said...

احنا عايزين نستعيد قدرتنا على الحشد
..................................
عارفة يا نـرنـر..لو تعرفي وتتأكدي من حجمك...تستريحي جدا جدا...قدرة ايه يا بنت الموجودة دي وعايزين تعود اليكم بأمارة ايه...انت صدقتي نفسك انك وصحيبينك..حشدوا الملايين في مصر المحروسة
أنت فايئة..و لا سطل..اوعي تكون ايدك طولت علي تموين الريس نجم...النوع المنتشر دلوقتي مضروب..مضروب..مضروب..يا بنتي

hardway said...

احنا عايزين نستعيد قدرتنا على الحشد
..................................
عارفة يا نـرنـر..لو تعرفي وتتأكدي من حجمك...تستريحي جدا جدا...قدرة ايه يا بنت الموجودة دي وعايزين تعود اليكم بأمارة ايه...انت صدقتي نفسك انك وصحيبينك..حشدوا الملايين في مصر المحروسة
أنت فايئة..و لا سطل..اوعي تكون ايدك طولت علي تموين الريس نجم...النوع المنتشر دلوقتي مضروب..مضروب..مضروب..يا بنتي

dr ahmed said...

حمد لله على السلامة اخيرا قهمتى

محمد نور الدين said...

ست الكل مساء الخير
كلام ينطوي على الكثير من الخلط و الغلط
نبدأ من الغلط ، أولا لم تفرقي بين الدولة و النظام فقلت الجيش يحمي الشعب و ليس الدولة. إيه الكلام الغريب هل توجد دولة بدون شعب. الجيش يا النوارة يحمي الدولة و ليس النظام . وحتى لما يكون نظاما ديمقراطيا ونابع من الإرادة الشعبية الجيش مجبر على حماية هذا النظام .
نعود إلى الغلط الكبير والذي تفوح منه رائحة الشوفينية ولقد وصلت رائحتها إلى حد بيتي . هذه اعراض جديدة يا النوارة أتمنى ان تكون عابرة
تركيا قامت بأكبر ثورة في العالم الإسلامي لا تضاهيها أي ثورة بما فيها ثورة 52 وهناك من كتب عن ذلك سنة 2008 بعد فوز الإسلاميين في أول انتخابات . وإذا شئت ازودك بالرابط .
أما بخصوص الخلط الذي يصل يا النوارة حد التدليس ، وحتى لا أثير شوفينيتك التي بدت لي هذه الأيام ضغطها عال جدا سأتحدث عن جماعتنا وهذا ما قلته في ندوة بالمكتبة الوطنية، يعني على عينك يا تاجر كان ذلك بعد تعديل الدستور الذي كان يحدد الفترة الرئاسية مرتين فقط . قلت بالحرف: إن الجيش الذي يسمح بتزوير الدستور ، هذا الجيش يكون قد فقد صفته الوطنية وأصبح في خدمة النظام وليس الدولة وهنا لابد من الإشارة حتى لا يقع الخلط وفي الكثير من الأحيان يكون مقصودا ، يجب التفريق و بوضوح تام ، بين الجيش كمؤسسة وبين الفئات العليا المتحكمة فيه و الذين يتحدثون عن المحاسبة لا يتحدثون عن الجيش في المطلق إنما عن الفئات العليا المتورطة التي تدافعين عنها .
ويبدو يا النوارة انك لم تتعظي مما سبق من أخطاء التي جلبت لك الكثير من العداوات حتى من شباب الثورة . وإذا واصلت على هذا المنوال فلا أستغرب أذا سمعتك تقولين الجيش قدس الله سره. .

hardway said...

يعني مش حنتدخل في مالياته، وهو ما يتدخلش في سياستنا
دلوقت المجلس متخوف من فتح الملفات المالية بتاعته،
...............................
بلاش شغل الحواري ده....ورمي كلام و ردح حواري..علشان يكش الزبون..........
لا..لا..لا ياأمورة الجيش ده جيش مصر..
ممكن الشعب المصري كله يضحي بك و بأصحابك
كلهم أصحاب بوتيكات الثورجة..كلهم..
عارفة يعني ايه كلهم...علشان عسكري واحد سهر علي حماية حدود مصر......
بطلي ردح الحواري ده

hardway said...

يعني مش حنتدخل في مالياته، وهو ما يتدخلش في سياستنا
دلوقت المجلس متخوف من فتح الملفات المالية بتاعته،
...............................
بلاش شغل الحواري ده....ورمي كلام و ردح حواري..علشان يكش الزبون..........
لا..لا..لا ياأمورة الجيش ده جيش مصر..
ممكن الشعب المصري كله يضحي بك و بأصحابك
كلهم أصحاب بوتيكات الثورجة..كلهم..
عارفة يعني ايه كلهم...علشان عسكري واحد سهر علي حماية حدود مصر......
بطلي ردح الحواري ده

dahabhospital said...

يا نوارتنا ويانور عنين المغتربين اللي بنشوف بيها مصر المحروسة جهزي من دلوقتي لشباب 2046 خليهم هم اللي يحكموا وهم اللي يسيطروا علي الاعلام....وعليه العوض في 30 سنة تاني

dr_hamadasalah said...

مقال أكثر من رائع وشجاعة تحسدي عليها يا بنت الأصيل

dr_hamadasalah said...

مقال أكثر من رائع وشجاعة تحسدي عليها يا بنت الأصيل

Anonymous said...

لو كنت فهمت حاجة من الرغى ده كله يبقى انا موافق على مايلى:
1-منح القوات المسلحة صك غفران شرعى وعصمة من المسئولية بالعافية والذوق وقانون المحاسبة اللى يحميهم بعد ماأقروه بدون علم الشعب
2-اتباع خطوات الشيطان(الاعلان الدستورى اللى عمله الجيش مخالفا لما استفتى الشعب عليه
3-النشطاء والاخوان والامريكان والانجليز يخرسوا ويبطلوا غباوة
4-نسمع كلام الحكيم اللى انتى روحتيله بالرغم من انه طلع بتاع لوز
طبعا مواغفة----------هاهاهاهاهاهاها

hayat ank said...

اقطع دراعى من لغلوغه يا نواره ان ما كان الراجل الى بتقولى عليه هو عزمى بشاره مييييييييييييين غيره يا قمر مشرءب

Unknown said...

يا مصر هانت وبانت كلها كام يوم.... نهاردنا نادى ونهار النخبة مش باين دى نخبة وشها على مصر اصبح شوم..لو مش مصدق تعالى على الصحف عاين

مع الاعتذار لتميم

heeba_alrahib said...

بت يا زفت انتى
يعنى ماصعبش عليكي كل العيال اللى ماتت دي
مش مكفيكي كل الدم الطاهر اللى روى ارض مصر
مش مكفيكي الزهزر اللى اتسحلت والواد اللى دماغه اتفعصت تحت البوكس
انتى اتعدمتى الاحساس لدرجة انك مابقيتيش شايفة
بصي ياخرة
ده انقلاب على الثورة
وعلى دم العيال اللى ماتت
العيال دي مش ماتت علشان ييجى الحوينى يفتح لنا سوقة النخاسة ابو بتاع واجعه ده
ولا ماتت علشان ناكل الطظ بتاع المرشد اللى فات ولا ماء السماء الطهور اللى المرشد بتاع اليومين دول عايز يحمينا بيها على اساس ان انا حنظلة والا تستحم يا رجل
الثورة قامت علشان عيش حرية عدالة اجتماعية واي حد ابن وسخة هيقول كلمة زيادة يضرب بالجزمة ويرجع البلاعة اللى كان مستخبي فيها وطالع يطرش علينا بحجة قال الله وقال الرسول وكلمنى شكرا ساويرس
كل الزبالات دي لازم تخرس تانى
فوقى يا نوارة
وارجعى للشارع اللى جينا منه كلنا
وماتخلنيش اقول كلام نتعاقب عليه كلنا ويخلى مرتضى منصور يعملنا تسجيل او سى دي
فووووووووووووووووووووووووووقى وانزلى معانا الشارع خللى عندي ديك اهلك دم

Unknown said...

يا مصر هانت وبانت كلها كام يوم.... نهاردنا نادى ونهار النخبة مش باين دى نخبة وشها على مصر اصبح شوم..لو مش مصدق تعالى على الصحف عاين

مع الاعتذار لتميم

تامرحمدى

haroon said...

http://gedarea.blogspot.com/2011/06/normal-0-false-false-false.html?spref=tw

haroon said...

http://gedarea.blogspot.com/2011/06/normal-0-false-false-false.html?spref=tw

ياسر كامل said...

الله عليكى
كل ما ابدأ اتخنق منك
ترجعى وتقولى كلام زى الفل
حيرتينى والله

Ahmed-Rahal said...

ربنا يكرمك على كلامك اللي فيه الخلاصة .. دايما فيه الخلاصة
بس للأسف الكلام الموزون مش بياكل مع الناس اليومين دول , لازم الكلام يميل ناحية طرف من الأطراف عشان يعجب

يا رب الناس تفهم

عائشة said...

ينصر دينك يا نوارة انا من يوم ما شوفت خلقتك وانا بقول محي الدين العضل اهو يا جدعان
تعرفي انا مستعدة بناء على تلك المقال والمطالبات اعمل اي حاجة معاكي
ايو كدا اصحي انت والشباب القمر من الوقفة النحس اللي وقفناه على الدستور اولا يخرب بيت الخونة والمصلحجية وبتوع الملايين الناس قربت تطق من جنابها المحاكمات كلها عمالة تتأجل لشهر 9
ومبارك نسيوه على باب المستشفى
وفلوسنا بتطير مرة في اسبانيا ومرة في لندن
ومشروع القمح المستوردين الخبثا وقفه حاله وهنرجع لحالات انتظار الجوع واخوانا البعدا بيتحركوا اخر روقان وعايزين يقلبوا الصورة ويطلع الثوار عملا وخونة واعوان جواسيس
فاضل ايه تاني علشان البس اسود على روح الثورة
ابوس ايدك انت وكل اللي ماشي وراك يا نوارة تجمعوا بعض من دلوقت على يوم 8 يوليو وتقسموا انكم نازلين لمصلحة الغلابة ومصر وبس لا علمان ولا اخوان لا دستور ولا تأجيل ابوس ايدكم كل الصفحات تتكلم عن مصلحة البلد وبسسسسسسسسسسسسسسسسس

عائشة said...

نسيت اقولك
بحبك يا مجنووووووووووووووووونة

thirteenoclock said...

سؤال برئ
هو مشرئب الفلنكات شلولخ ده كان شغال مباحث فى الكارنجى انداومنت فور انترناشيونال سلام؟؟؟

kabou said...

وتمر ليلة من التوجس والقلق

وننام ونصحى تاني يوم

ترجع سما لما البشر يتجمعوا مع بعض


الليلة بس المرادى طالت مش زى ليالى الميدان بس هترجع سما تانى انشاء الله

thirteenoclock said...

سؤال برئ
هو مشرئب الفلنكات شلولخ ده كان شغال مباحث فى الكارنجى انداومنت فور انترناشيونال سلام؟؟؟

Unknown said...

اكيد مشرئب الفلنكات شلولخ مش هو عزمي بشارة خالص، عزمي مش بيقول الكلام الفارغ ده

mohosamaa said...

متنسيش يا نوارة السلام أمانة للست المحترمة صافيناز كاظم اللى بتكتب والله أحسن من أى حد فى البرتيتة المسيطرة على الإعلام والصحافة سلام أمانة وخلى بالك منها ربنا يخليها لنا كلنا

thirteenoclock said...

عزمى ايه بس؟؟ انا اقصد عمرو

nevine said...

جامدة جدا يا نوارة ده الكلام الصح ايوة كده بقى فكروا فيها شوية مش كل شوية دستور دستور و احنا مش عارفين حتة نجتمع على رأي في اي حاجة ... الاجماع الوطني هو ده اللي هيوصلنا لدستور صح قبل الانتخابات بقى بعد الانتخابات مش دي القضية

thirteenoclock said...

رقابة دى ولا ايه -- فين الحرية؟

Tamer said...

مين مشرئب الفلنكات ؟

Tamer said...

مين الاخ مشرئب ده بالظبط؟

ظل الشمس said...

انا مش عارفة انتى مش بتنشرى ليه وعاملة موديريت ليه لما انتى اصلا مش بتحذفى الالفاظ البذيئة من التعليقات
باقولك ايه
الدستور اولا او مش اولا
انا عايزة اعرف احنا سايبين كلاب الوطنى برا السجن ليه وقاعدين نقول ثورة مضادة؟.
وليه مركزتيش فى تجميع اجماع وطنى
وليه مش بتتكلمى عن المسنين اللى ماسكين البلد وقالبينها دار الفؤاد؟
والقطرااااااااااان عمر سليمان اللى عايز يبقى رئيس جمهورية وهو رد سجون وكلب ولا يسوى اساسا ايه موقفنا منه؟
ركزى فى الاجماع الوطنى الله يرضى عليكى
ولو البلد دى بقت نضيفة ومرتاحة وعيشة اهلها ارتاحت شوية هتلاقى ستات شايفين الستات اللى بيدخنوا ومش محجبات وليهم اكونتات على الفيس ستات محترمين ومن بيوت محترمة
وانشرى بقى

thirteenoclock said...

سؤال صريح
هو مشرئب الفلنكات شلولخ ده اسمه عمرو حمزاوى؟

mido said...

مفيش حاجة اسمها نسيب الجيش فى مالياته دى

كل المؤسسات تدخل تحت الرقابة البرلمانية والشعبية

Unknown said...

اكيد بنتكلم عن الماليات اللي قبل 11 فبراير، احنا مالناش دعوة هم عملوا ايه ايام المخلوع حيث ان وقفتهم معانا تجب ما قبلها. لما بقى نبقى ننتخب برلمان، يبقى هم يتقاعدوا زي الابطال القوميين، ومافيش محاسبة ليهم، ونبقى نشوف احنا حنعمل ايه ساعتها، بس الشخصيات دي اللي وقفت جنبنا يوم 11 فبراير وكانت على علاقة بالنظام السابق لها خروج آمن وما حدش يمسها مدام مش حيلعبوا بديلهم معانا

snowwhite said...

السلام عليكم
بنت الوز عوااااااااااااااااام
ربنا يخليكي لينا وتنوري عقولنا

snowwhite said...

السلام عليكم
بنت الوز عوااااااااااااااااام
ربنا يخليكي لينا وتنوري عقولنا

thirteenoclock said...

من الذى قال ان "الشارع مش حينزل يقول: الدستور مش اولا" على العكس تماما -- الموضوع ده بالذات اخطر الموضوعات التى قد تؤدى الى انفجار كبير جدا جدا جدا -- و انسوا بقى كميلية و عبير و لعب العيال ده -- و لكن تقديرى ان بالمجلس العسكرى من الحكماء الذين لن يطوعوا يحي الجمل فى تحقيق حلمه و محاولة فرض دستور اتاتوركى غصبا عن عين الشعب -- و الادهى موضوع المبادئ فوق الدستورية الغير قابلة للتغيير مطلقا!!! يعنى قمة الاستبداد النخبوى -- يعنى لو الشعب كله فرد فرد زنجة زنجة اجمع على تغييرها ميقدرش !!! -- بامارة ايه طيب : نزلة من السما: على كده بقى الى بنعتقد انه فعلا نازل من السما اولى -- فوق دستورية قال بيجيبوا منين الافكار دى -- ناس مرضى و الله

prof-osama said...

بداية موفقة لارجاع شعبيتك مرة تانية يانوراة ..مدونة جامدة وكلها احساس ..وانتى عارفة انى من اشد المعارضين ليكى من شهرين كدة .بس دخلتى قلبى تانى وصافى يا لبن ..:))))))))

مهندس مصري بيحب مصر said...

انتي اتهرشتي في دماغك في موضوع الجيش ده
مش حنعمل بعد الثورة العظيمة دي ديموقراطية إلا ربع
ثم المال السايب يعلم السرقة
لو عايزة تعفي عن جنرالات المجلس الأعلى يبقى يتحاكموا محاكمة عادلة عن فسادهم المالي و الإداري و اي جرائم يكونوا إرتكبوها طوال مدة خدمتهم في الجيش و بعدها مجلس الشعب المنتخب يقدم توصية للرئيس المنتخب بالعفو عن الأحكام الصادرة عليهم
حيث إن العفو بيكون عن العقوبة مش عن الجريمة

و ساعتها يبقى الشعب المصري هو اللي عفا عنهم

إنما لما نسيب للجيش مالياته يبقى مش بس بنسيب اللي فات بل و بنقول للجاي إسرق براحتك

الجيش لازم يكون تحت الرقابة الشعبية عن طريق البرلمان و الصحافة و النشطاء
و ما تنسيش إن اللي فضح ابو غريب و جوانتانمو كانوا الصحفيين و مقالوش دي أسرار عسكرية و لا حاجة

و لجنة الدفاع و الأمن القومي في البرلمان المنتخب لازم تعتمد تفاصيل ميزانية الجيش بالقرش و المليم زي ما ميزانية البنتاجون بتعتمد من الكونجرس بعد مناقشة كل سنت رايح فين

إنما نصلح البلد و نسيب الجيش فاسد ده يبقى إستهبال

و لازم يتحط قانون لحرية تداول المعلومات و تصنيف الوثائق و درجة سريتها و تواريخ كشف السرية عنها لإن في إنجلترا مثلاً أقصى سرية لوثيقة بيكون 75 سنة و بعدها لازم يتكشف عنها
مش تبقى كل حاجة سرية كده

romancy said...

احنا مالناش دعوة بماليات الجيش
و هما ملهمش دعوة بسياستنا
هههههههههههههه لا والله ملناش دعوة بماليات الجيش ازاى دانتى غلبتى بتوع فكرة الخروج الامن انتى لسة بردو ف ام ضلالك دا وبتقولى ع مجلس الحرامية دول الجيش

ده كلام ناس شبعت و باعت!!!!
لن ننسي جمايل
لحاسين بيادة المجلس
...فبعد الثورة الحقيقية
سيكون لكل مقامٍ مقاال

بساطه said...

ايه القنابل الي بتفجريها دي يانواره ؟؟ حمد الله عالسلامه .. انا اسف مش فاهم جزئية الاخوان خالص هيضطروا يسكتوا على ايه ومواجهه بينها وبين الجيش ليه ؟؟ بجد مافهمتش

وبالنسبه طبعا للملف المالي للجيش الكلام ده كله نتكلم فيه واحده واحده بعدييييين

وياريت بقه ياعسل تكلمينا اكتر بعديييين بردو عن الاتفاقيه الي حطت الجيش بتاعنا في مزنق يبقى كتر خيرك

وبالنسبه للكوى الوثنيه انا كرهتهم كرهتهم كرهتهم هما وما يسمي بالنخبه دول نكبه بس مش واخدين بالهم
هيخربوها يخرب بيوتهم

Unknown said...

بوركت كلام عين العقل
الذين يريدون الدستور أولا بيقولوا للشعب وبكل بساطة احنا بنقتل تجربة ممارستك للديموقراطية في مهدها وان الحماس اللي نزلت بيه علشان تدلي بصوتك وانت حاسس ان انت بتغير مصير بلدك مالهوش أي لازمة وانت حمار ما تعرفش تفكر لنفسك احنا اللي هنفكرلك ، يعني لا يوجد أي فرق بينهم وبين أي نظام استبدادي
وزي ما قلت قبل كدة فاكرين لما نظيف قال الشعب المصري غير ناضج سياسيا لممارسة الديموقراطية عملنا فيه إيه ؟!! أمال اليومين دول كل من يدعون النخب بيقولوا كدة في كل مناسبة وبدون مناسبة ليه ؟؟!!! فيه إيه بقي إرحمونا شوية

mahmoud said...

نفسي اصدق كلامك بس بعد اللي الصحفية اللي في جريدة الفجر قالته عن التعذيب ورا المتحف والكلام اللي قالوه وبالمناسبة اتحولت للنيابة العسكرية حاسس اني متلغبط بتجيلي افكار غريبة يعني مرة شوفت الشرطة العسكرية في التليفزيون بتفض اعتصام باليل في التحرير حسيت ان شكلهم زي الانسان الالي نصهم مصري ونصهم ومعلش في اللفظ اسرائيلي حتي البنات يكونوا بيخطفوا مصريين زي بتوع السفينة بدر وبيخدوا منهم حاجات ويستنسخوا ناس يزرعوهم في الجيش وغيره او الاطفال اللي من اب مصري وام اسرائيلية بيتزرعوا تاوي في مصر مش بقولك حتجنن ماهو ازاي يتقتل ضباط طيران زي الورد في حادثة مشبوهة وكفائات تانية تموت في حادث اوتوبيس وحوادث اخري بعد تحديدهم عن طريق المناورات والجيش يتفرج واصدق انه وطني بشكل كامل مش مخترق واللوا اللي انتي عارفاه لما قال قوام الجيش من الشعب قلقني اكتر اصل النظام لما يقول حاجة بيبقي وراها نصيبة ممكن يكون فيه شبيحة زي سوريا بس الظروف ماسماحتش بظهورهم طب تاوي الطماطم الاسرائيلي ماتحققش فيها ليه ليه كل بلاوي التخريب الاسرائيلي داخل مصر الجيش ساكت عليه والله لو جاوبتي السؤال ده انا حطمن طب اللي اتقال من الجيش عند المتحف تفسيره ايه انا مش قادر اكون راي حاسم ومش عايز اسيب العواطف بس تكون حكم وانسي ان الجيش سكت سنين والشعب بيتم تحويله لحيوانات بالمعني الحرفي ولما مسك عاملهم زي الحيوانات ورا المتحف

mahmoud said...

من الاخر لو عمل وزارة داخلية محترمة سهل كان اول ناس سعوا لكده هم الاخوان اللي اتبهدلوا من الداخلية ولو فرضنا حسن نية الجيش بشكل كامل يبقي ايه اللي مانعهم من عمل ثورة تصحيح كبيرة وقوية اكيد فيه اطراف تانية في البلد عاملة توازن مع الجيش عشان كده هو بيغير بالراحة زي الحرس الجمهوري وميليشيات الداخلية اللي ولائها للنظام يعني لازم نغير ونعيد هيكلة اكبر دراع للنظام وللغرب للاسف في مصر وهو وزارة الداخلية الهمجية باوامر الغرب لان الداخلية هي عنوان البلد لو محترمين يبقي دي دولة قانون محترمة اما لو زينا يبقي دي دولة قهر وظلم وعدم ديموقراطية وده باوامر امريكا وده يفسر الصلة بين الغرب والداخلية واعادة هيكلتها في تصوري اساس بناء الدولة اللي بنحلم بيها ولازم المطلب ده نصمم عليه

mahmoud said...

تنكر المجلس العسكري من احداث المتحف دليل علي حاجة من اتنين يا اما احنا في خديعة كبري والفرعون الحقيقي هو الجيش ولازم نواجه ده من غير تهرب او الحقيقة التانية ان الجيش منقسم بين محترمين وفراعنة والمحترمين بيلموا الدور وبيحاولوا يعملوا انتقال سلمي للسلطة بس الاكيد ان احنا ماشفناش رحمة وعدل من ايام عبد الناصر والخلق بتتغير وبتاخد هي التهم والظلم هو هو عشان كده بقول يمكن فيه فرعون متداري احنا مش شايفينه شوية يشد وشوية يرخ بس هو الملك ومش بيقبل بحكم غيره دي مجرد افكار لكن افعال الجيش بتاكد انه علي الاقل منقسم لان الوحشية والاهانة لشباب الثورة عند المتحف وفي السجن الحربي حيث البواسل يهتكون الاعراض شيء غير مريح وبياكد علي الاقل الانقسام داخل الجيش ان لم تكن الحقيقة افظع

mahmoud said...

اخر تعليق انا حاسس رغم كده بوطنية الجيش وده ملغبطني وشتان الفرق بينهم في العموم وبين الداخلية في العموم انا مش عارف الحقيقة الكاملة ومش عارف التغيير يبقي سريع احسن ولابطيء ربنا بقي يلهمنا الصواب في التفكير وفي الحكم علي الجيش وغيره

Passant said...

http://www.facebook.com/l.php?u=http%3A%2F%2Fwww.almasry-alyoum.com%2Farticle2.aspx%3FArticleID%3D300906&h=8d264
أهو محدش حيفتح ملفاتهم المالية اهو

محمد على طيلون said...

الله ينور يا عم والله من الاخر
الفقرا اولا يا ولاد الكلب بلا دستور بلا محشى
ربنا يشلك يا مبارك
ربنا يولع فى رموش عينك يا بن الكلب

ملكش دعوة said...

بجد بجد حمدله علي سلامتك ولو اني شكه فيكي برضه ايوه كده شوفي لما بتعقلي وبتلمي شعرك لورا بتبقي فله ازاي
مع اني لسه مخصماكي بس الشهاده لله ابتديتي مرحله الشفا
انتي كنتي في مرحله الانسحاب وكانت صعبه عليكي اوي ولو انك لسه مخفتيش تماما بس يلا الشافي موجود
واحب اقول من موقعي هذا لكل النخب والقوي الوطنيه الزائفه الكرتونيه التي نمت شيطانيا بعد الثوره احب اقولهم كلهم ........... يلعن ابو شكلكوا حلوا عنا ولو غبي منهم فكر انه ممكن يبلف الشعب يبقي بيحلم و .... عريانه لامؤاخذه بقي وسواء الانتخابات في معادها ولا لا معروف مين القوي ومين الضعيف وخلي اللي يهرتل يهرتل .. المهم الشارع مع مين خوفكوا من الاخوان خلاكوا شايفين ان المخرج الوحيد هو الدستور اولا
طب دستوركوا معاكوا والغلبه للاخوان وده مش كلام .. احلموا بأه

ملكش دعوة said...

بجد بجد حمدله علي سلامتك ولو اني شكه فيكي برضه ايوه كده شوفي لما بتعقلي وبتلمي شعرك لورا بتبقي فله ازاي
مع اني لسه مخصماكي بس الشهاده لله ابتديتي مرحله الشفا
انتي كنتي في مرحله الانسحاب وكانت صعبه عليكي اوي ولو انك لسه مخفتيش تماما بس يلا الشافي موجود
واحب اقول من موقعي هذا لكل النخب والقوي الوطنيه الزائفه الكرتونيه التي نمت شيطانيا بعد الثوره احب اقولهم كلهم ........... يلعن ابو شكلكوا حلوا عنا ولو غبي منهم فكر انه ممكن يبلف الشعب يبقي بيحلم و .... عريانه لامؤاخذه بقي وسواء الانتخابات في معادها ولا لا معروف مين القوي ومين الضعيف وخلي اللي يهرتل يهرتل .. المهم الشارع مع مين خوفكوا من الاخوان خلاكوا شايفين ان المخرج الوحيد هو الدستور اولا
طب دستوركوا معاكوا والغلبه للاخوان وده مش كلام .. احلموا بأه

ملكش دعوة said...

العفاريت اللي شغالين وقيعه بين الشعب والجيش ............. عيب عيب عيب طب حتي كل واحد فيكوا يفتكر انه صور ابنه عند الدبابه عيييبببب

someone80 said...

الأخ qqq

لو بتوع الدستور أولا اتعلقوا على المقاصل الدور الجاي هايبقى على بتوع الانتخابات أولا. افهموا بقى

عمر said...

يااخت نوارة انا مع جمعة محاكمة الفاسدين من الداخلية لكن ارجوك خليها يوم تاني غير 8 يوليو عشان بتوع الدستور اولا يعرفوا حجمهم الحقيقي لانهم اعتبروا كل اللي نزل يوم جمعة الغضب التانية راحوا عشان الدستور اولا وانتو اول واحدة عارفة انهم كانوا اقلية الجمع كتير الله يعمر بيتك بتكتريلهم الناس ويحسبوهم كلهم بتوع الدستور اولا

Mohammed Hassan said...

يعني منين اللي بيهدد بفتح ملفات الجيش قبل 11 فبراير هيخلي الجيش ميسلمش ابدا
يعني الجيش ملفاته كلها فساد واغﻻط وحاجات ضد البلد ومحاكمات عسكرية لمدنيين وغيره
ومنين قاعدة كل شوية مؤسسة وطني واللي هيجيب سيرته هقطع لسانه والهجص ده

saleh11143 said...

متفائل :
أولا- النخبويون هم في الحقيقة خائفون من الشعب وليس من الإخوان، لإدراكهم أن قوة الإخوان مستمدة من تأييد الشعب. ولو حصل أن انقلب الإخوان على ما يُريده الشعب فإن الشعب سينقلب على ما يُريده الإخوان. وبالتأكيد إرادة الشعب ستقهر إرادة الإخوان. وهذه هي ضمانة الشعب في أن لا يُصادر حقه أحد. فما هي الضمانة الأخرى التي يُريدها النخبويون لحفظ حق الشعب في استمرار إمتلاكه للسلطة غير الشعب نفسه ؟!
أما أن الإخوان سيوهمون الشعب بأن تداول السلطة مبدأ علماني كافر، فأولاً هذه هواجس نابعة من رعب النخبويين من توجهات الشعب . وثانياً بما أن من طبيعة عملية إيهام الشعب أن تتم بوسائل سلمية ولا يُستخدم فيها العنف فهي عملية إيهام ديمقراطية تماماً كما يحصل في كل ديمقراطيات العالم . وإذا كانت العملية ديمقراطية فليس هناك من حاجة لأن تسلملك نوارة على الديمقراطية. وثالثاً أين هو دور النخبويين في توعية الشعب من إيهامات الإخوان، أم أن دور النخبويين هو إستخدام الجيش كأداة قهر لإرادة الشعب ؟! هنا أقول لمتفائل : سلملي بقى على الديمقراطية ! ورابعاً في الإسلام السلطة أو الحكم ملكٌ للأمة وحدها، وليس لأحد كائناً من كان أخذه من غير رضى واختيار من الأمة، وحكم غاصب السلطة في الشرع جواز قتاله حتى تسترد الأمة سلطانها فتعطيه من تشاء . وفي الإسلام إذا أظهر الناس عدم رضاهم عن الوالي وهو الحاكم في ولايته وجب على رئيس الدولة عزله فوراً . أما كيفية عزل رئيس الدولة المُنتَخَب من قبل الأمة فله تفصيل في الشرع الإسلامي . وخامساً موضوع تداول السلطة في الديمقراطية لا يعني أن يحكم الإخوان اليوم ثم يأتي دور جورج إسحق في الحكم غداً وإنما يعني أن يحكم الشعب من يختاره الشعب، فإذا لم ينتخب الشعب عمرو حمزاوي مثلا فلا يجوز للنخبوييين الإعتراض بحجة وجوب تداول السلطة !
ثانياً- يتكفل الجيش بحماية الدستور المُعبر عن إرادة الشعب في حال جرت محاولة تغييره بالقوة رغماً عن إرادة الشعب، وهذا ما يُمكن أن يحدث في حال الغزو الخارجي .
ثالثاً- بالنسبة لما تتصوره من خطر الإخوان بسبب عدم الحنكة والخبرة في الملفات الأخرى كالعلاقات الخارجية والسياحة والإقتصاد وغيرها فلا أدري ما هي تصريحاتهم المُضحكة التي وشت لك بذلك !
وبهذه المناسبة أقول لك : إذا لم تكن تؤمن بالإسلام كنظام شامل للحياة فمن الطبيعي أن لا تتفق مع الإخوان في شيء، وهذا شأنك، لكن ليس لك الحق في أن تفرض ما يُضحكك أو ما يُبكيك على الشعب بأسره !
رابعاً- إرادة " المسيحيين " للصلاة فقط ليس سببه إنسياقهم الساذج وراء كهنتهم كما زعمت بل سببه أن دينهم ليس فيه نظام يُعالج كافة مناحي الحياة ، فما يهمهم من أمر دينهم هو موضوع دينهم . ولو كانت السياسة جزأً من دينهم أو كان في دينهم أنظمة للحياة لوجدتهم حريصين على الإنخراط في العمل السياسي أو على التأثير في الشأن العام بحسب أحكام دينهم !

مكتبة حياتي My Life's Library said...

كلام لوز و الله نوارة
و اضيف عليه اي حد خايف من اختيار الشعب المصري او مش عاجبه اختيار الشعب المصري يتفضل مع السلامة مطارات مصر و موانيها و معابرها البرية تفوت لواء دبابات بحاله
اما بقى عن الخواجات اللي خايفي من اختيار المصريين او مش عاجبهم فاللهم اني صايمة

Divergent Mind said...

نيتك سليمة يا نوارة و حاسة فيكى خوفك على مصلحة البلد لكن مشكلتك لسانك نفسى يبقى حلو زى نيتك إن شاء الله
قَالَ رَسُولُ اللهِ صَلَّى اللهُ عَلَيْهِ وَسَلَّمَ : مَا مِنْ شَيْءٍ أَثْقَلَ في مِيزَانِ الْعَبْدِ يَوْمَ الْقِيَامَةِ مِنْ خُلُقٍ حَسَنٍ ، وَإِنَّ اللهَ تَعَالى لَيُبْغِضُ الْفَاحِشَ الْبَذِيءَ »
أخرجه أبو داود والترمذي

هل تريدين أن تكونى ممن يبغضهم الله عز وجل!