Friday 24 June 2011

التذكرة: 28 يناير/ كربلاء المصرية... يا شعب ياللي دفع تمن الشوارع دم، احفظ اسامي اللي ماتوا في الشوارع صم

ده يوم 28 يناير.. برضه اللي صورته
اوعى وشك.. الشلل الرعاش على اصله، ما عرفتش اصور اللي فرفر جنبي لاني كنت باشيل بطارية الموبايل وارجعها قال ايه كده بقى الشبكة حترجع.. حترجع اعمل بيها ايه؟ اطلب الاسعاف
ايييييييييييييه الغباوة اللي انا فيها دي؟ مخي كان فين ساعتها؟ البطارية مالها ومال الشبكة، ثم اسعاف ايه اللي حطلبها في المقتلة دي؟ 
بس حتسمع صوتي وانا باسرسع، مش حتقول ابدا اني روحت وهدومي غرقانة دم جرحى وناس ماتت.. ما تفهمش ايه الهلاهوطة اللي كانت نازلة عليا دي.. ما اعرفش كانت سرقاني السكينة ولا ايه؟
المرة الجاية ابقوا فكروني بحاجتين: اولا ما اسرسعش وانا باصور، ثانيا لما الضرب يبتدي ما ابطلش تصوير
انا مسمية اليوم كربلاء المصرية، وتميم قال لي ما تسميهوش كده، سميه بدر المصرية.. الا هو عدد اللي مات من الشرطة قد ايه؟ قلت له هو احنا كان معانا حاجة نموتهم بيها؟ احنا كنا بنرفع ايدينا ونقول لا اله الا الله فكانوا بيضربوا علينا
فيه حكاية تانية بقى، بما اني باحكي حكاياتي الشخصية ومغامراتي مع امي.. امي كانت كوميدية جدا في المرحلة دي
فيه يوم عمر عفيفي طلع وهبش مخ كل الامهات.. فجأة لقينا امهاتنا بتتصل بينا كلنا، انا وفاطمة وبنات كتير، وولاد كمان، وبيقولوا لنا الكلام اللي عمر عفيفي قاله.. امي اتصلت بيا: يا نوارة.. الراجل التخين بيقول ان اسرائيل حتيجي تضربكم دلوقت
قلت لها: يا ماما بيخرف..
قالت لي: وافرضي ماب يخرفش؟
قلت لها: افرضي يا ماما.. حاعمل ايه يعني؟ حاسيب الميدان؟
سكتت شوية وقالت لي: لا طبعا.. ما تسيبيش الميدان.. صليتي العصر؟ 
قلت لها: اه 
قالت لي: كويس.. تصلي بقى اول ما الادان يدن عشان احنا مش ضامنين ايه اللي حيحصل
قلت لها: يا ماما لو مت وعليا صلاة او اتنين وانا ميتة شهيدة اكيد ربنا حيسامحني
قالت لي: وليه نجازف؟ ما تصلي صلاة الخوف...
صوتها كان بيترعش، قلت لها: انت بتعيطي يا ماما؟
قالت لي: واعيط ليه؟ هي حاجة وحشة انك تروحي الجنة؟ انا جدعة لعلمك..
ههههههههههههه امي حبيبتي
نسيت احكي لكم بقى على بابا.. كان يوم 25 يناير، اتصل بيا وانا في الشارع على الضهر كده وقال لي: ايه نوارة انت فين؟
قلت له: يا بابا انا في وسط البلد
قال لي: بتعملي ايه؟
قلت له: بنحرر مصر..
فسكت حبة كتير.. وبعدين راح قافل من غير ما يقول لي حاجة
ام زينب بتقول لي انه قعد يعيط بعد ما قفل معايا.. ما اعرفش عيط ليه؟ باقول له بنحرر مصر.. يقوم يعيط؟ ولا عيط على هبلي ساعتها ولا ايه؟ 


يوم 28 بقى... كل الناس بلا استثناء واحد كانت نازلة تموت... تموت بس، مافيش حاجة تانية في دماغها.. وكل واحد كان فاكر ان اللي مستعد يموتوا زيه مش كتير.. وما كانش فاكر ان كل دول عايزين يموتوا

انا مش حاتفرج تاني عشان تعبت قوي وانا بانزلهم.. اتفرجوا انتوا بقى واتعبوا زيي: 
يا موتي قوم امتحني اعتذر منهم، اشمعنى يا كلب تستثنيني من بينهم، يوم الخطر قبلها ما كنت اجبنهم، يا موت تعالى اعوض غربتي ومنفاي، يا موت تعالى احاسبك ع القديم والجاي، يا موت تعالى ونتقاسمك انا وعداي، ولا تطال عزوتي وانا بعيد عنهم

37 comments:

yussuf elka7ky said...

رحم الله شهداء الثورة المصرية في جنة الخلد باذن الله

saleh11143 said...

====================================================
يوم 28 بقى... كل الناس بلا استثناء واحد كانت نازلة تموت... تموت بس، مافيش حاجة تانية في دماغها.. وكل واحد كان فاكر ان اللي مستعد يموتوا زيه مش كتير.. وما كانش فاكر ان كل دول عايزين يموتوا
====================================================
صدق القائل : إحرص على الموت تُوهَب لك الحياة

yosef200077 said...

كفاية بقى كفاية قولوا كلمة الحق اصرخوا فى وش الظلم احنا متنا فى الشوارع و اضربنا عشان ايه عشان يفضل الفقر و الفساد و العواجيز الرمم وزرا و محافظين و الخاين المخلوع فى شرم الشيخ و الحيزبون مراته تروح لالالالالالالا
تونس حكموا على الكلب بتاعهم انما احنا لالالالالالالا كلبنا عيان نفسيا بجد اى سفالة اى نجاسة وقذارة
الفقرا المرمين عند ماسبيرو و الموظفين اللى بيشحتوا حقهم عند شرف باشا تقدرى تقوليلى حقهم فين يا ست نوارة
الشرطة الحثالة عارفة مين اللى رجع منهم المرور طبعا عاوزين يلموا الجباية تانى و يقسموها على نفسهمة عامة دى فئة احقر من انى اتكلم عليها
اوعى تقولى انى مستعجل تبقى كدابة يا نوارة
ارجوكى انا اتخنقت لو قريتى رسالتى ردى و جاوبينى
احنا كنا فى ثورة و لا كنا بنهرج؟؟؟؟؟؟؟؟؟؟؟؟؟؟؟؟

Anonymous said...

لا اله الا الله
اللهم تقلهم والحقنا بهم

Haby said...

صحيح كل واحد فجأة كان حاسس إنه مش خايف يموت..بس مكناش ناويين نموت بالساهل..لأ ده دم المصرى غالى قوى، ونفدى مصرنا بيه بس لازم الخاين يدفع تمنه غالى

freedom4ever25 said...

فعلاّ كربلاء المصرية مش بدر لأنه لم يحدث في بدر قتل للنساء والأطفال زي ماحصل في ثورة الأمام الحسين وثورة 25 يناير وسبحان الله التاريخ بيعيد نفسه (نفس المطالب الامام الحسين قال "ما خرجت أشرا ولابطرا ولاظالما ولامفسدا وأنما خرجت لطلب الإصلاح في أمة جدي رسول الله كي آمر بالمعروف وأنهى عن المنكر" وسبحان الله نفس منهج الطغيان والظلم(يزيد بن معويه= حسني مبارك) ونفس اسلوب القادة العسكريين (جهازالداخليه وامن الدوله) في التعامل مع الثورات و المعارضين :في 2011 حبيب العدلي وفي 61 هجري كان عبيد الله بن زياد.
منهج حبيب العدلي كان تصفية المعارضين بطريقه وحشيه(قضية خالد سعيد) هوه نفس منهج عبيد الله بن زياد (قضية مسلم بن عقيل وهانئ بن عروه) سبحان الله صحيح التاريخ بيعيد نفسه
أخيراّ بسم الله ماشاء الله الله ينور عليكي على الكلام اللي قلتيه النهارده في مناظرة الجزيرة 100%100

Unknown said...

انتي جدعه و انا زعلان منك عشان مارضتيش تقبلي اضافه اخوكي الصغير عالفيس دا انا ماصدقت عرفت اول للأكونت بتعاك بالصدفه و اديني مش عارف اجيبو تاني

عائشة said...

انا بعيط من غير ما اتفرج ودموعي نزلت 18 يوم متواصل من غير انقطاع ساعة ما شفتكم يوم 25 قلت عيال مجانين دلوقت يجيوا يلموهم واحد ورا التاني وتكتم مصر باهلها تاني
لكن بعد ما سقط اول واحد قتيل قلت لااااااااااا مش شباب مصر اللي يتعمل فيه كدا محدش فيكم قاعد فيها تاني يا نظام خونة بتعرفوا ترفعوا السلاح على عيالنا طب لما انتم رجالة كدا سايبين اسرائيل تمرمط فينا ليييييه
بكرر لك ان كان النزول ليوم 8يوليو علشان حق الغلابة والشهداء ومحاكمة مبارك وقتلة الثوار انا معاكم
هتترفع لافتة واحدة فيها مطالب الدستور اولا الانتخابات اولا او طلب خاص بجهة ما او حزب ما
يبقى اخر يوم هعرفكم واخر مرة اثق فيكم

عائشة said...

ما تقلويش تاني كربلاء
قولي زي تميم
بدر
معركة بدر المصرية

ali said...

منذ شهور ومع ضياع طريق الثورة وعملية الكوولينج داون الحاصلة ، قلت وأقول ( على كل من شارك فعلا وكان موجود فعلا أن يحدثنا ويسجل ما حدث ، ولهذا نشكر نوارة لأنها أول المبادرين ) عليكم سلام من الله ياثوار السليم منكم والجريح والشهيد ، فقد كنا من القاعدين وأنتم فى حومة الوغى.............حلوة حومة الوغى؟ طيب سامحونا بقى على تخاذلنا.

sharno said...

والدي الدكتور سامح الشرنوبي يتعرض لهدم البيت الذي يسكن فيه بواسطة اتنين مستشارين بسبب وقائع فساد .. هل فيه أي طريقى أقدر أوصل بيها الفساد اللي حصل لقناة التحرير ؟
نمرته
0104859222

elzahraamegahed said...

طب ما قولتيش لنا وقفتى العياط ازاى
هه...أصلى مش عارفه أوقف العياط
بس إن شاء الله ربنا هيتم فضله ونعمته علينا وهيكرمنا أوى

محمد نور الدين said...

ست الكل صباح الخير

لا كربلاء و لا بدر

شوفي يا النوارة استدعاء التاريخ وأحداث التاريخ مسألة على غاية من الخطورة المعرفية، و حتى الأيديولوجية ، لأن بعض تلك الأحداث ليست محل إجماع بين أبناء الأمة . لازلت أذكر تلك الصديقة العراقية كيف اندهشت لما عرفت أننا نحتفل بيوم عاشوراء واندهشت أكثر لما علمت أنه يوم عطلة رسمية .
ذاك تاريخ يا النوارة واستدعاءه في هذه اللحظة التاريخية قد سيء للحاضر أكثر من الماضي .
مصر صنعت تاريخ جديد يجب أن ننحت له مصطلح جديد. أعمليلك همة يا شاطرة وانحتينا مصطلح جديد
أما دموع شاعرنا الكبير، وكما قلت لك في التعليق السابق، لقد حققت له حلم العمر، الحلم الذي من اجله قضى أجمل سنوات العمر يتنقل بين سجون مصر .لقد كنت يا النوارة الداية التي ولدت على يدها سلمى نور وخلت مصر تعوم في النور. كيف لا يبكي فرحا أبو النجوم .
تحياتي الخالصة

ملحوظة
لقاء رفح لي تعليق عليه

صالح الأخرس said...

نواره انتى جدعه اوى
وبحبك لما يكون مزاجك رايق

khaled Bassim said...

الاخت الفاضلة نوارة هانم
تابعت تصديك الشجاع بالامس لهؤلاء المجادلين و اتمنى لك التوفيق و الثبات

lastcrazyboys said...

ايييه التغريــد ده كله

أم كلثــوووم .. يا خواتشي

:))

محمد العربي said...

تحياتي

dr ahmed said...

ياريت يانورة تقولى بيان مجلس العالى لائتلاف الثورة اليوم (صرح المجلس العالى للائتلاف الثورة انه لاصحة لما تردد بان يوم 8 يوليو تم حذف مطلب الدستور اولا منه وان هناك 36 ائتلاف مصمون على رفع طلب الدستور اولا مطلب رئيسى وان هناك نية للاعتصام ايضا حتى يتحقق مطلب الدستور اولا ) البسو بقا مش نازلين مش نازلين مش نازلين

شمس العصارى said...

ربنا يخليهملك
ما قلنالك سلفينيهم كام يوم بس ههههههههه
فعلا معاكى حق المشاعر اللى كانت بتاجيلنا فى ايام الثورة وفى التحرير بعد كام شهر اهه من الثورة تلاقيها بتيجى على بالك وفاكرها اكتر من الاول
اه وكفاية ان عم احمد نزل التحرير بنفسه رغم اننا معرفناش نسمعه من كتر هتاف الناس ليه وكلامهم معاه

محمد نبيل said...

اعتصام “المصير” يكمل أسبوعه الأول تأكيدا على أن مصير الثورة التونسية لم يحسم بعد

http://elbadil.net/%D8%A7%D8%B9%D8%AA%D8%B5%D8%A7%D9%85-%D8%A7%D9%84%D9%85%D8%B5%D9%8A%D8%B1-%D9%8A%D9%83%D9%85%D9%84-%D8%A3%D8%B3%D8%A8%D9%88%D8%B9%D9%87-%D8%A7%D9%84%D8%A3%D9%88%D9%84-%D8%AA%D8%A3%D9%83%D9%8A/

أحمد نصير said...

نواره مصر, احب اهديلك المقطوعه دي, جميله كدا زيك, رحم الله شهدائنا

http://7orreyati.blogspot.com/2011/05/blog-post_14.html

nosseir said...

اية رأئيك يا نوارة فى الوجه القبيح اللى ظهر بة حسن نصر الله فى اخر كلام لة عن ثورة السوريين ضد بشار؟

Rasha Ahmed said...

امك دي عسل وجدعه قوي!!!!!!!!!!!!!

Mohamed kharoub said...

صحيح الابهات و الامهات بيخافو جدا علينا مع انهم مؤمنين اكتر مننا بالقضاء والقدر و بحكمة ربنا .... كان حوارك مع والدتك جميل جدااا

BORG HMAM said...

نجوي ابراهيم في فيلم الرصاصه لا تزال في جيبي كانت بتجسد مصر في ضعفها وقوتها وكبريائها وعزه نفسها ومن كرم ربنا ليكي وحبه فيكي محبب خلق الله فيكي وشايفينك بتمثلي مصر في كبريائها وعزه نفسها وقوتها انتي يا نواره شبهها اقسم بالله لما بتحفزنا ع الظلم ولما بتزقنا في اول صف بيحميها وبيصونها ونفسه يموت علشانها روحي يا شيخه ربنا يباركلك وقبل ما يباركلك يبارك لابوكي ولامك

عائشة said...

شفت بقى اعلان الهيئة العليا للثورة المصرية
الدستور اولا
ممكن اعرف الهيئة العليا العالية المعلية ده تبع ميييييييييييييييين

طيوري said...

ايه يانوارة يا اختشي شليتيني ده تصويرده؟ ايه معندكيش اخوات صغننين تخافي على عنيهم؟
المهم بردك تسلم ايدك يا اوختشي
بس ابوس ايدك واحلفك بالله الفيديوهات دي بشللها بعبلها بسلطاتها ببابا غنوجها تنزل في قناة التحرير واظن هيما مش هايزعل بدل الاغاني اللي بتنزل كل شوية
ماشي اغاني اه بس مش لوك لوك لوك لوك خلي شوية اغاني وشوية تاريخ اربببببببوكي اتوسم اليكي خلي العيال تحفظ وتنضف مخها من الوساخة ال اتعلمتها طول السنين الل فاتت
دي مصر ياعبلة امانة في اديكي

محمد العربي said...

نوارة يعجبني وضوح فكرتك
لا لف ولا دوران
في الوجه على طول

Atef Soliman said...

فيه خبر غريب جدا نشرته صوت الامة و نشره موقع محيط بس تم حذفه و هو
"بالوثائق . نظام مبارك تستر على تورط عصام شرف في قضية "مخلة بالشرف" (محيط) "(جديد!)
مش عارف اقول ايه
امن الدولة رجع يا رجالة

Atef Soliman said...

فيه خبر غريب نشرته صوت الامة و نشره موقع محيط و بعدين اتحذف مش عارف اقول ايه ؟
الخبر
بالوثائق . نظام مبارك تستر على تورط عصام شرف في قضية "مخلة بالشرف" (محيط) (جديد!)

امن الدولة رجع يارجالة

hardway said...

أيه يا نـرنـر.....؟؟؟؟؟؟
أنت أفلست فكريا..!!!!!!!!!

hardway said...

أيه يا نـرنـر.....؟؟؟؟؟؟
أنت أفلست فكريا..!!!!!!!!!
أنت خايفة تنزلي التعليق...
يا خسـارة

prof said...

ربنا يحفظك يا نورة يارب ويرحمنا من الراجل التخين اصله تخين وغتيت كمان ده بلوه ههههههههههههه

prof said...

ربنا يكرمك يا نورة الميدان
وربنا يرحمنا من الراجل التخين الغتيت كمان ده

Unknown said...

ربنا يرحمهم جميعا ويشفى المصابين ويفرج عن الظباط المحبوسين وان شاء الله دم الشهداء والمصابين والسنين اللى دفعها الشعب المصرى تحت الذل والانكسار والخوف هناخد بحقه وهنحاكم كل اللى شارك ف ده
وياريت كلنا ننزل 8/7 واعتصام حتى يسقط النظام ونحقق اهدافنا
تحياتى

م.محمد الحسيني said...

كنت هكتب كتير قوي بس ايدي مش مالكها من الهم والغم بعد ماشفت ورغم ان اللي شفته كان اكتر بس حسيت ان دماغي مكنتش بتسجل شئ ولم سمعت تاني افتكرت واتغمت

وملقتش غير
يا شعب ياللي دفع تمن الشوارع دم، احفظ اسامي اللي ماتوا في الشوارع صم"

مونتي بوكيه ورد said...

ليه بقينا زي العسكر والحرامي
الشرطة العسكر والشعب الحراميه؟
ليه كله بقي بيتلكك للتاني وفي النهايه بقت مصر الضحيه؟
مين ابتدي ومين ظلم ربنا علي الظالم والمفتري
ربنا علي ال قال بكل عزم وقوه علي ال حصل امبارح احنا ... معناها وحش اوي لما ظابط يقول لفظ زي دا علي الشعب
و برضه لما واحده تدخل علي جروب وت هدي النفوس و تحسس الشرطه ان الشعب دا مش حته منهها وتسخنهم عشان يغلطوا فيهم و ال ايه ارجعوا ومتستسلموش زي المره اللي فاتت
وطبعا دا عغير ال قريته عن نواره ال اعرفها من زمان و لاول مره اقوم بزيارتها الان من كتر ما قريت عن ال عملته امبارح

انا كدا قولت ال حصل م الشرطة .. لكن زي ما الشرطة تجاوزت ليه الناس تنول المنتفعين و الشامتين و الحاقدين هدية رجوع الفوضي من جديد .. ايه ال حصل ما ال يكرم يكرم و ال ميكرمش ميكرمش ربنا الوحيد ال قادر يكرم و يجيب حق كل شهيد .. مش عاوزين مسلسل الدماء يستمر مننا فينا و في النهايه لن نحصد شيء سوي زراعة فتنه كبيرة غرضها اجمل بلد بلدنا العظيمة مصر ويارب ما تنولها لمخلوق ابدا يارب