Wednesday 22 June 2011

فإن الذكرى تنفع المؤمنين: 25/1 يوم الإخلاص.. والخلق كانوا مدركين لكنهم مش كلهم متأكدين

انا كنت صورت فيديوهات في الثورة، مش دايما كنت باقدر اصور، مش دايما كنت بابقى عايزة اصور، احيانا كنت باعمل حاجة او ببساطة الشحن قاطع
غير اني باصور وحش، تصويري سريالي
ما فتحتش الفيديوهات من ساعتها، كل ما احاول افتحها يجيلي انهيار بمعنى الكلمة وما اقدرش اكمل، النهاردة واحد على التويتر انب لي ضميري وقال لي نزليهم.. ده واجب وطني، فتحتهم، ونوة عياط وصويت افتحت... المشاهدة اصعب كتير من المشاركة، انا ما كنتش باعيط وانا في الشارع، بس الفرجة جابت لي اكتئاب وتعب
المهم.. انا شايفة اننا محتاجين نشوف يومياتنا تاني في الثورة.. عشان الظاهر نسينا
ما تنسوش يا مصريين... انا اتفرجت على الفيديوهات وجالي اللي جالي، فكرت اخد مهدئ وانام، وبعدين لقيت نفسي اتمليت غل تاني، قلت لا، انا مش حاخد مهدئ، ومش حانام، انا حافضل بالحالة دي لحد ما اجيب حق شقانا وتعبنا على الاقل اذا ما كناش حنجيب حق الشهدا
اجيب حق قلق امي اللي يوم تمانية وعشرين وانا نازلة قعدت تقول لي: خلي بالك بقى من نفسك، لو لقيتي حاجة خطر ارجعي على طول.. مش شطارة انك تتصابي ولا تتحبسي.. انت بتعملي دور و..
قلت لها: ماما... انا نازلة واحتمال تسعين في المية ارجع لك جثة.. واحتمال عشرة في المية ما يلاقوش جثتي
سكتت شوية وبعدين قالت: وانت احسن من مين؟ اكتبي إن الذي فرض عليك القرآن.. يمكن ترجعي.. لا إله إلا الله
محمد رسول الله
بس يوم 25 كان مختلف خالص.. يوم 25 ده يوم الاخلاص، يوم ما كل واحد فينا كان نازل وفاكر ان هو الوحيد اللي نازل وان الباقيين خافوا من تهديدات الداخلية
وما كانش حد فينا جواه لوم على الباقيين اللي كان متأكد انهم مش نازلين.. لإن اكيد خايفين ولهم حق.. بس كل واحد فينا قال في نفسه، هم معاهم حق يخافوا.. لكن انا زهقت واتخنقت.. ويا رب ما ارجع بيتنا تاني
وحياة قلق امي عليا وهي مالهاش غيري ما سايباك يا مبارك، لا انت، ولا داخليتك، ولا حزبك الوطني، ولا دلاديلك، ولا اللي بيحموك كمان
ابتدينا اولنا يوم 25.. يوم ما قلنا يا مبارك يا مبارك جدة جدة في انتظارك.. خبز حرية كرامة وطنية.. يا محمد قول لبولس بكرة مصر تحصل تونس.. الكلام ده كان الساعة واحدة الضهر.. قبل ما نقول اسقاط النظام الساعة خمسة العصر
نعتذر عن تصويري السيريالي... وعن صوتي المسرسع :)

استفتحنا: ارقينا وارقيهم يا عم الشيخ، فى حاجة خلت يشمك التاريخ، ينزل عن الوجه الجميل فيبان



































22 comments:

Rasha said...

allah allah allah ya nawara, ahalm klaam, we ahlaa videos.

Rasha said...

وبكرة جاية حروب فيها بكا وصريخوبكرة نصرك يخض الشمس من لهبهسايق عليك النبي ما تقول كفاية كدهمن النهاردة انتصاراتك حتبقى كدهيا شعب مصر اللي رجالته وبناته كدهحلال عليه لبن العصفورة لو طلبهسايق عليك النبي ما تقول كده كفايةإفرح وكمل وما تقولشى كده كفاية
الثورة دى بداية زى الهجرة والميلاد
الثورة دى بسملة كمل بقى الآية

خواطر المصري said...

wallahi kan men aktar el7agat ali far7tni yom 25 tab3an ba3d matamnt 3ala masr wa nasha ani shoftik wa7na banry7 fel sanya 7awali el sa3a 5 aw 6 :)
rabana yatmaha 3ala 7'air
Ahmed elhamalawy

Anonymous said...

فلتحيا ثورة البانجو عاش خالد سعيد ملك البانجو ولازم نعمل مليونية الجمعة الجاية للمطالبة بكيلو بانجو لكل مواطن وايضا نطلب من حكومة شرف اعتبار يوم 25 يناير من كل عام عيدا للبانجو وان يتم صرف كيلو بانجو لكل مواطن حتي يعيش الشعب في هناء وسرور ( ملحوظة مكلبظة يراعي صرف 3 كيلو بانجو لنوارة عشان دورها المحوري في 25 يناير ) ومطالبة حكومة شرف بتغيير النشيد الوطني الي نشييد الفوضي الخلاقة وان يكون تحيا الفوضي الخلاقة شكرا ماما امريكا بانجو بانجو الشعب عايز بانجو

مشبِّك said...

تم الشحن بنجاح وبعياط وبقلب معصور حزن

Ahmad Sadek said...

رهيب. ثورة حقيقية. فريدة من نوعها. انها تثير الرعب والقشعريرة في اوصالهم، من البيت الابيض وحتى جنرالات مدينة نصر، وحكام الرياض، وحكام تل ابيب. جميع الشياطين فقدت قدرتها على النوم منذ ٢٥ يناير الرهيب. يحاولون باستماتة اخماد هذه الثورة المصرية بالذات، لكنهم غير واثقين من انفسهم على الاطلاق، فالشعب المصري قد علم على مؤخراتهم علامة تبدو أبدية، مؤلمة جدا، أحدث فيهم الشعب المصري عاهة دائمة، ربما يذكرهم بطريقة أخرى بالعاهة التي أحدثها فيهم جميعا شعب فييتنام، في سياق آخر. الامريكيون وحلفاؤهم الكبار والصغار وباقي العالم والصهاينة، جميعهم، في زمن ازمة طاحنة تمسك برقبة نظامهم الاقتصادي الاجتماعي السياسي الثقافي بكامله. كل ثوابتهم وجبروتهم وغرورهم وعجرفتهم وادعاءاتهم الزائفة، تتمرغ في الوحل منذ السقوط المدوي لحرب بوش على الارهاب، وانهيار النظام المالي للصوص الدوليين. وطرح كل النظام الغربي وفلسفته وافكاره وواقعه الاجتماعي والاقتصادي للنقاش من جديد، بعد أن روجوا لاطمئنانهم الهزلي بالتنظير لنهاية التاريخ بعد سقوط سور برلين وانهيار المحاولة الاولى للبشرية لبناء نظام اجتماعي اكثر انسانية وعدلا، تجىء الثورة المصرية ودلالاتها العابرة للحدود في وقت قاتل بالنسبة لهذا النظام العالمي الذي يتفكك وينهار ويدخل في الفوضى. الثورة المصرية مزعجة في موسكو، وحتى في بكين ونيودلهي، والاتحاد الاوروبي، ناهينا عن عاهات المنطقة العربية كلها.الاسبان واليونانيون والانجليز عبروا بوضوح عن الالهام الذي منحته اياهم ثورة المصريين. جزء من المشكلة التي تواجه الثورة المصرية هو حيرتها، وهي ترى أن المنجزات الكبيرة للبشرية تبدو عاجزة، وبعيدة عن أن تكون نموذجية وملهمة. فالديمقراطية والنظام الانتخابي، حسبما آل اليه الحال على يد العصابات المالية في الغرب، يأتي بجورج بوش بدلا من المرة مرتين في البيت الأبيض، ويأتي ببرلسكوني عدة مرات، ويأتي بأمثال نيكولا ساركوزي في بلد كفرنسا. والنظام الاجتماعي يصبح أقل عدلا وأكثر عداء لمصالح وحياة الغالبية الكبرى من سكان البلاد المتطورة والمتخلفة على حد سواء. يتدهور مستوى معيشة الملايين من الناس في العالم بسرعة، تحت وطأة النظام الذي يتحكم فيه اندماج عصابات المال والاحتكارات الصناعية الكبرى، بما فيها احتكارات الطاقة والميديا، والعسكر علي قمة هذه المجتمعات، وقمة العالم. فالثورة المصرية ترى النموذج الديمقراطي الغربي الملهم، وقد أصابه العطب، والنظام الاجتماعي الغربي القائم على اقتصاد السوق والبورصة والمضاربة وهو أكثر عجزا وابتعادا عن أن يقدم للناس حياة كريمة انسانية. أي أن الثورة المصرية عليها أن تجتهد مع المجتهدين في العالم لتصلح فساد النظام الديمقراطي في السياسة، ولتنظم الامور بطريقة أخرى في الاقتصاد ليكون المجتمع أكثر عدالة وانسانية لكل الناس. اي ان على المصريين أن ينجزوا ثورة مركبة: في السياسة وفي الاقتصاد الاجتماعي وفي الافكار. وأظن أن مصر تعيش اختمارا تاريخيا لذلك كله. والجانب العسكري في الوظائف الاجتماعية سوف يناله تغيير شامل في هذا الاطار بدون ادنى شك، بطبيعة الحال. أتيح لي أن أشهد نقاشا أداره المبجل بلال فضل على قناة التحرير، مع مجموعة من الشباب، ولفت نظري أن أحدهم، واسمه على الأغلب وائل خليل، قد استخدم تعبيرا ملهما ينتمي الى موقف سيارات أحمد حلمي، فقد قال هذا الشاب، وهو يبتسم بهدوء ويقين: ان الشعب المصري قد ركب، وقضي الأمر، ولن تنزله أية قوة، مرة أخرى. وأشعر أن هذا الشاب قد أصاب كبد الحقيقة، وبما يفقع مرارة حكام مدينة نصر، الذين يلهون في الفاصل مابين شوطين. فنحن رأينا فحسب الفصل الأول من كتاب الثورة المصرية، ولن تستطيع قوة على الأرض أو السماء أن توقف هذه الملايين الباسلة عن كتابة باقي فصول الكتاب. وأن نشهد هذا في عمرنا، آو بعد أن نموت، شهداء أو موتة البعير، فذلك أمر أقل أهمية، أيتها المبجلة نوارة نجم

elzahraamegahed said...

إلهى يا مبارك تتمنى الموت ما تلاقيه يارب
يااااااااااااااارب بحق جاه حبيبك سيدنا النبى وأهل بيته تشفى غليلنا فيه هو كل اللى آذنا وكسر نفسنا بااااااااارب
وأكتب نجاح ثورتنا وتممه على خير يارب

متفائل said...

ليس فقط تصويرك سريالي .. بل أفكارك وقناعاتك أيضاً .. السر في أم الشبورة اللي إنتي عملاها دي هو تصورك السريالي المريض أن الثورة ضاعت وأنتهت .. من قال هذا ؟ أو ما دليلك على هذا ؟ إن ظابط بوليس ضرب سواق توك توك بالرصاص في رجله عشان كان ماسكله سنجة وعايز يقتله ؟ أن سواق ميكروباس ضرب عميد شرطة بالقلم على وشه قام المخبرين ضربوه بغشومية لغاية ما مات وهو ما أرفضة تماماً (الضرب بغشومية أقصد) ؟ فيه أيه ؟ هو أنتي متخيلة إن فساد تلاتين سنه يخلص في أربعة شهور ونصير سويسرا فجأة لمجرد أن الثورة قامت ؟ متصوره إن أذناب النظام السابق ممكن تختفي وتتلاشى في أربعة شهور وإلا تبقى الثورة باظت ؟ شوفتي ثورة في الدنيا بتحقق أهدافها في أربعة شهور ؟ .. عماله تولولي وتشدي في شعرك زي اللي مات جوزها ليه ؟ لم يمر على خلع المخلوع سوى أربعة شهور فقط .. طبيعي جداً تكون الثورة المضادة لا تزال نشطة .. طبيعي جداً ألا تتطهر الداخلية بالكامل .. طبيعي جداً أن تظل هناك بقايا نشطة من فلول النظام البائد .. طبيعي .. وطبيعي .. وطبيعي .. عملية الإصلاح الحقيقية لن تبدأ في البلد دي إلا لما يكون لها مجلس شعب ورئيس منتخبين .. قبل كده لأ .. فأهمدي شوية وأستني لما يحصل ده .. والله لو بعد ما يحصل لقيتي تباطؤ في الإصلاح أو نوايا سيئة من أي طرف إبقي ولولي زي مانتي عايزة وإعملي مليونيات وإعتصامات زي مانتي عايزة .. أما الآن فمثل هذه المليونيات والإعتصامات تضر ولا تنفع ولا محل لها من الإعراب إذ لا سلطة رسمية هناك توجهين لها مثل هذه التظاهرات والإحتجاجات

saleh11143 said...

يريدون تحويل إنتصار إرادة شعوب هذه المنطقة إلى هزيمة بإقناعنا بأن ثورات تحررنا من ربقة الإستعمار الغربي إنما هي من صنع الغرب نفسه !

drkishk said...

https://www.facebook.com/photo.php?fbid=153877384683780&set=a.128551687216350.25720.127793077292211&type=1&ref=nf
اتفضلوا نقولوا شوفوا مطالب يتفق عليها الكل يجيبوا ايه

احلام جوليا said...

للاسف الفيديوها بتاعتك مش بتفتح عندي وده مزعلني لاني كان نفسي اشوف يوميات الثورة نواره عوزة اقول لك وجه نظري عن الاستفتاء المطروح على النت عن الرئاسة شوفي الكل عارف ان الاستفتاء لا يمثل الشعب المصري لان اغلبية المصريين لا يستخدمون النت والي بيستخدموا النت هم غالبا اما الثوار او البعض من الكتلة الساكنة والشباب خارج وداخل مصر لكن برضه عددهم قليل يبقى الاستفتاء الي مش بيمثل مصر كان المقصود به ايه ربما واقول ربما احتمال يكونوا عاوزين يعرفوا اتجاه الاكبر للقلة المستخدمة النت والي جزء منها الثوار اتجاهم فين او يكونوا عاوزين يعرفوا مين المنافس للمرشح المفضل حاليا والي الكل بيقول انه في طريقه للرياسة علشان يعرفوا يوضبوا له حمله تخرجه بره المنافسه احتمال برضه مش عارفة حسه في حاجةغلط بس مش عارفة فين نظرية المؤامرة هي كل ما افكر به اظن فقدنا الثقة بالجميع

Jameel said...

ست نوارة صباح الخير
أحلى ما في هذا البوست إنو بيخلينا نتذكر إحنا كنا فين و بقينا فين .
إللي حصل في مصر ممكن يصنف على الأقل إنو ثورة عظيمة و قد يكون معجزة تاريخية و هذا ما أرجحه.
لازم االناس ترجع تتذكر كل إللي حصل في الأربعة شهور الماضية كلما أصابها إحباط من التباطؤ و الضبابية الموجودةحاليا.
مين كان يتصور يوم 24 يناير إنو المخلوع و كل ذيوله ينسجنوا و يتحقق معاهم و يترموا في السجون .
حتى يوم 11 فبراير مكانش حد متوقع يتحقق كل إللي صار.
بس أكيد لازم نفضل حريصين على إستمرار الثورة و تحقيق تقدم و مكاسب كل يوم و لازم إستعادة القدرة على الحشد و المطالبة بالحريات و العدالة كمطالب لا يمكن المساومة عليها

lastcrazyboys said...

عشــان كنــا رجــااالة .. ووقفنــا وقفــة رجــالة

Anonymous said...

قال ثورة قال روحي يابت وياود انت وهي وهو العبوا حاجة تنفعكم بلاش لعب عيال تتكم نيلة في مخكم الا عايز ضرب الجزمة الفوضي بتسموها ثورة ياولاد التييت

متفائل said...

إلى الأخ أحمد صادق .. سعادتك تقول

فالديمقراطية والنظام الانتخابي، حسبما آل اليه الحال على يد العصابات المالية في الغرب، يأتي بجورج بوش بدلا من المرة مرتين في البيت الأبيض، ويأتي ببرلسكوني عدة مرات، ويأتي بأمثال نيكولا ساركوزي في بلد كفرنسا. والنظام الاجتماعي يصبح أقل عدلا وأكثر عداء لمصالح وحياة الغالبية الكبرى من سكان البلاد المتطورة والمتخلفة على حد سواء

فياريت تعرفنا ما هو (النظام البديل) الذي تقترحه - بخلاف الديموقراطية والإنتخابات - للوصول إلى السلطة وتداولها ؟ هيا .. كلنا آذاناً صاغية

حياة الظل said...

يا سلام والله حاجة بترفع الراس
مافيها اشي بيخلي الواحد يعيط بالعكس

sum_1_ said...

لحد ما اجيب حق شقانا وتعبنا على الاقل اذا ما كناش حنجيب حق الشهدا?!!!!!!!!!!

ما تحسبوش الشهيد اداكوا بس حياة
ما موتوش هو وحده اللى برصاصة رماه
ده طخ ابنه اللى لسه ما اتولدش معاه
وطخ أولاد ولاده لآخر الأيام
موت معاه بشرية كاملة محتملة
عدوا بقى فيها كام شاعر وكام رسام
وكام طبيب عبقرى بين الأطبة إمام
وفيلسوف له على حكم الليالى كلام
وبنت نظرتها تشفى القلب من داؤه
فى شعب كامل رحل ما عرفش أسماؤه
فيجسم كل شهيد فيه مصر مكتملة
فخلوا مصر اللى فاضلة تعيش كما شاؤا


أيها الناس إنما أهلك الذين قبلكم أنهم كانوا إذا سرق فيهم الشريف تركوه وإذا سرق فيهم الضعيف أقاموا عليه الحد وأيم الله لو أن فاطمة بنت محمد سرقت لقطعت يدها
حديث شريف

محمد نور الدين said...

ست الكل مساء الخير

العكس يا النوارة

يجب أن تشعري بالفخر و الاعتزاز و الكبرياء و الشموخ . شعب بكل مكوناته و كل فئاته يقاتل من أجل الحرية و السيادة و الاستقلال الوطني .كم كنت رائعة وأنت تقودين المظاهرة وصوتك يا بنت كله نحاس. لقد حققتم حلم ثلاث أجيال على الأقل .وأنت تحديدا حققت حلم أبيك

ali said...

هناك تعليق غريب بإسم مستعار يتهكم على الثورة والبانجو.ندعو كاتب التعليق لتأمل كل شوارع مصر قبل وبعد الثورة ويشاهد تجار المخدرات والمدمنين الذين يمارسون نشاطهم من عشرات السنين ولم يقبض عليهم البوليس(صدقنى هم لا يتعرضون للمدمن وتاجر المخدرات أقولها بأمانة لا تزيد ذنوبك فى الدفاع عن هذا الموضوع

nada_cherecoco said...

الشاحن متصل والشحن مستمر ولم يتوقف

nada_cherecoco said...

الشاحن متصل والشحن مستمر ولن ينقطع

dahabhospital said...

مش عارف اقول لك ايه؟؟؟ انت اروع مما كنت اتخيل بس يارب ماتتغيريش يابنتي انا كنت معكي لحظة بلحظة وسمعت ماما في يوم 28 علي الجزيرة ما لناش غيرك يا بنتي المغتربون بالخارج