Saturday 28 August 2010

عدم اللا مؤاغذة

اصل قهوة كتكوت كان كاتب لي تعليق وكنت حارد على التعليق بتعليق وبعدين قلت لا اكتبه بوست احسن، بيقول لي ليه جبتي سيرة السلفيين في مقال كاميليا شحاتة مع انهم هم المجني عليهم باين
حنتكلم حنتكلم ثانية واحدة
بس عدم اللا مؤاغزة انا يحق لي اخزق عينيكوا واحد واحد عشان بصراحة انا اتخنقت من ام البلد على الشعب ونفاقكوا
انا بالذات يحق لي ليه؟ عشان عدم اللا مؤاغزة انا ما قصرتش في حق
لا قصرت في حق مسلمين ولا مسيحيين ولا ملحدين ولا سنة ولا شيعة ولا سلفيين عشان الحق حق 
اللي مقصرين ومزدوجي المعايير ونصابين سواء اللي بيبثوا خطاب كراهية من اي طائفة.. ماحدش يفتح بقه معايا
عدم اللا مؤاغزة يعني
اما عن السلفيين، انا مش فاهمة السلفيين ضحايا ازاي في موضوع كاميليا شحاتة؟ ام التجارة واستثمار الموقف اللي هم فيه، وعلى فكرة انا مش ضد استثمار المواقف، بس اكيد اهداف السلفيين اهداف لا شريفة ولا محترمة ولا مخلصة ولا انسانية ولا اسلامية ولا اخلاقية ولا نيلة خالص في اي داهية.. الواحد بيدافع عنهم لما يتقبض عليهم عشان هم انسان والحق حق وغير مقبول تعذيبهم او القبض عليهم او منعهم او المصادرة على رايهم، لكن هم ما عندهمش اخلاق.. خالص يعني واهدافهم دايما طائفية ومذهبية وتفريقية واشعال فتن عشان يلهوا الناس عن الحاكم.. انتوا ليه بتضغطوا عليا وتخلوني اقول كلام مش عايزة اقوله، انا لو قلت كل شكوكي ناحية السلفيين حازعل ناس كتير، بس هم مش مظبوطين واهدافهم مش مظبوطة ووراها حاجة، مش هم بنفسهم، لكن اللي بيحركهم والاسطوات بتوعهم، ومن الاخر كده الاتجاه السلفي ما بيخدمش غير اهداف الامبريالية والصهيونية
فيه مسيحيين بيستثمروا المواقف طبعا.. طبعا، ولا اخلاقيين ومش محترمين ومش عادلين ولا وطنيين ولا يتبص في خلقتهم وبيبثوا خطاب كراهية، وحتى اللي فيهم عامل علماني عايز العلمانية على المسلمين انما هو يفضل مسيحي وطائفي ومخه قفل وشرير جدا.. إلخ .. بس هم عددهم كام وتأثيرهم ايه؟ تأثير الكنيسة جاي من القوة اللي بتديها لها الدولة مش من قوة الاقباط، ثم ان الكنيسة عمالة تخرف مؤخرا بزيادة، الظاهر ده بشوي ولا ايه، لانهم عاملين زي الهابلة اللي مسكوها طبلة وبيلطشوا، ولا ده مبارك اللي ملبسهم ولا ايه؟ المهم يعني بتصرفوا بغباوة فوق الفاشية يعني
لكن المناخ الطائفي ده نحمله لمين؟ الواحد بقى يبقى حقاني ولا يبقى منافق؟ 
ايوة الكنيسة طائفية وكتير جدا مسيحيين طائفيين طبعا، ده بقى الاتجاه السائد، ده مؤخرا اتجننوا رسمي ومخهم لسع تماما.. بس مين المسئول عن المناخ الطائفي؟ المنطق بيقول ان الاغلبية هي المسئولة عن اي مناخ في الدنيا طائفي او سلمي، والحقيقة ان الاقلية هي اللي بتتعدي من الاغلبية مش العكس، والاقلية هي اللي بتعمل رد فعل للاغلبية مش العكس، والاقلية هي اللي بتقلد الاغلبية مش العكس، ما تخليكوا حقانيين عشان ربنا يكرمكوا ولا ياخدني ويريحني منكوا بقى ايه القرف ده؟ ما تعملوا قياس كده على المسلمين في العالم عشان تفهموا غباوة المسيحيين المصريين جاية منين؟ ماهو انت لو حتعذر المسلمين بسبب الاضطهاد العالمي وتقول ان ده رد فعل تعرف برضه ان المسيحيين المصريين ده رد فعل، وزي ما فيه مسلمين بيعملوا غباوات وانا باتعاطف معاهم عشان مقدرة موقفهم، المسيحيين المصريين بقوا يعملوا غباوات كتير، طب الاغلبية بتعمل كده ليه؟ عشان على راسها نظام بيسلط عليها ناس مش شريفة ومش محترمة ومش مخلصة بتستغل الدين عشان تحفز المشاعر الطائفية
خلاص بقى اجني ما زرعت يداك، او ما زرعت أيدي الحويني وحسان والمصري ويعقوب الخ الخ الخ
يعني الهرم كده: المسيحيين المصريين اتجننوا عشان المسلمين المصريين اتجننوا، ليه اتجننوا عشان على راسمهم مشايخ مجانين، مين اللي جنن المشايخ امن الدولة، امن الدولة بيجنن المشايخ ليه؟ عشان بينفذ اوامر النظام، النظام بيدي الاوامر دي ليه؟ عشان دي اوامر "الغرب المتحضر" طب دي اوامر الغرب المتحضر ليه؟ عشان مافيش حاجة تخدم اهداف الامبريالية والراسمالية غير ان المسلمين يطابقوا الصورة اللي هم بيصدروها عنا وان يبقى فيه بينهم شقاق ونزاع وان يتم عزل المسيحيين الموجودين في المجتمعات اللي فيها اغلبية اسلامية عشان حينفعوا بعدين، يا يتجندوا طابور خامس، يا يتحيدوا وما يحسوش بانتماء، يا يبقوا حصان طروادة، اهم ينفعوا، طب ازاي يعني نخلي ناس بقالها الاف السنين عايشة في بلدها تعمل كده؟ نكرههم في بلدهم، ويحسن ان عداوته بقت مع المسلم وكذلك المسلم يحس ان عداوته بقت مع المسيحي
الموضوع ده معقد قوي لدرجة انه محتاج كل الشرح ده؟ انا بقيت اكرهكوا خلاص.. كلكوا على فكرة
بكرة تقعدوا على الحيطة وتسمعوا الظيطة، وادي دقني ان الموضوع ده عدى على خير
بصوا بقى.. بصوا.. الموضوع مش حيعدي على خير
انا باقول لكوا.. الموضوع الطائفي ده مش حيعدي على خير، ومش حنخرج منه بسلام، ومش زعبوبة وخلصت.. وبكرة تقولوا نوارة قالت
احترموا نفسكوا بقى ولايموها، لا، مسلمين ومسيحيين، مش مسلمين بس ولا مسيحيين بس، واياك حد يقول لي بقى بتساوي بين الضحية والمش عارف اي الكلام الطين ده
انا اللي ماسكة الموضوع من اوله وانا اللي عارفة امتى دول كانوا ضحية وامتى دوكهمة كانوا جلاد
خلاص يا بشوات
دلوقت كلكوا مسئولين وكلكوا محتاجين تلايموها، وما عادش فيكم ضحية لا من دول ولا دول، انتوا الاتنين دلوقت بتستعبطوا وتستهبلوا.. ولا ما عادوش ضحية، لا المسيحيين عادوا ضحية ولا المسلمين عادوا ضحية في اللحظة دي كلكم مسئولين
واسمعوني بقى
سرقة الجزم من قدام الجوامع لسه ماحدش يعرفها.. فلوس السعودية مش حتنفعكوا بحاجة
سرقة مستودع الانابيب انا بس اللي اعرفها.. ووعود امريكا برضه مش حتنفعكوا بحاجة لو بتنفع كانت نفعت غيركوا
والسعودية وامريكا الاتنين بيشتغلوا مع بعض، مش حاجة غريبة ان واحدة منهم تدي فلوس لاتجاه والتانية بتدي فلوس لاتجاه تاني قال يعني ده الاتجاه المغاير له؟ يا سلااااام يا سلااااام
لايموها بقى، وما تخلونيش افسر اكتر من كده واقول اللي لسه ماحدش يعرفها.. عشان انا ست جدعة.. وانت عارف ان انا ست جدعة 
يا فرحة امكوا بيكوا وانتوا قاعدين تتخانقوا على الحريم وتخطفوهم من بعض ... بصراحة اتفو
واتفو على الحقوقيين النصابين كمان.. ماهم دول كمان راخرين هابلة ومسكوها طبلة مش عايزين نفسر
بس خلاص ما عادش.. ما عادش الموضوع مستحمل، وما عادش فيه وقت نطنش ونقول معلش اهو احسن من قلته، معلش اصلهم مظلومين، معلش اصلهم مذعورين
لا بقى.. الكل بقى حاجة مقرفة خالص، والكل وصل لمرحلة الاستعباط 

22 comments:

lastcrazyboys said...

متزعليش مني .. وربنا كمان ما يفــسدش صيــامي

انا ســاعات ..ساعاااااات

بحس انك الوحيــدة اللي في البــد دي اللي هبــلة وعبيــطة وام بــدوي

اعذريني على لغتي اللي ماتعودش اتكلم بيها

لكن صدقيني دورت على رد ينفع البوست ده ..مالقيتش غير الكلمتين دول

يمكن عشــان كل اصدقائي المناضليييين ..عرفوني ان الحيــاة ... فرص

Unknown said...

نوارة تسلملنا جدعنتك والله
انا ولا سلفى ولا باقبل السلفيين
ولا بطيق اشوفهم ومش معترف حتى بان فى حاجة اسمها دعاة اسلاميين وكلهم بيقلبوا عيشهم بالامور دى والامر ده واضح من غير ما اعرف اسرار ومستخبى
وعارف انهم بيسخنوا المسلمين على المسيحيين لغرض فى نفس يعقوب
وبرضه عارف ان اغلب المسيحيين زيهم زى المسلمين غلابة وكلمة تجبهم وكلمة توديهم
وانتى عارفة الميديا ممكن تعمل ايه
بس لازم لما حد يغلط ما نقولوش انت غلطان وكمان كلنا غلطانين
الكنيسة فجرت ومن زماااان
وواضح اوى ان مصلحتهم مش نفس مصلحة المصريين وكمان عارفة
ان واحدة اختارت دينها زى كاميليا او حتى المسلمين اللى اتنصرواليهم حق عندنا
كمسلمين اولا وكبشر ثانيا
يعنى كان نفسى تجيبى من الاخر وتقولى للكنيسة تلم نفسها
وتقولى للمسيحيين ان الكنيسة هاتوديهم فى داهية
انتى عارفة ان الكنيسة واحدة واحدة بتحاول تبنى دولة مسيحية داخل مصر
والحكومة بتساعدها بسؤ نية ومش بعيد
تكون الاوامر دى جاية من
الاشقاء فى امريكا واسرائيل
يعنى لازم الكل يفوق
انما المشكلة ان المسلمين ابتدوا يقولوا المسيحيين كلهم هما الكنيسة وهما اعدائنا
والمسيحيين مفهمينهم ان المسلمين عاملين عصابات لخطف البنات المسيحية
يبقى بيتهيالى الاحسن نجيب من الاخر ونقول للاعور انت اعور فى عينه
انتى مش سمعتى كمان ان الاخوة فى اسرائيل باعتين متفجرات وسلاح للكنيسة؟؟؟
والله خايف علينا كلنا مافيش مسلم حق
هايكره كل الناس زى ما السلفيين بيعملوا انماالبلد كده ماشية ناحية تخطيط صهيونى معلن والظاهر ان الصهاينة قادمون قريب
ياريت تكونى فهمتى قصدى
ورمضان كريم

Unknown said...
This comment has been removed by the author.
Unknown said...
This comment has been removed by the author.
Unknown said...

نوارة عايز اقولك كمان ان موضوع الفتنة الطائفية فى مصر ده اختراع انجليزى من ايام حمار الملطى بتاع اسكندرية
وطبعا الامريكان ماشيين على خبرة الانجليز
يبقى ليه مانفهمش الاتنين مسيحيين ومسلمين
ان ده هايبقى فوق دماغ الاتنين
المسلمين من الاخر كده مالهمش كبير فى الدين وسهل لو اثبتى غلط بتوع الفضائيات
انما اللى مش عارفه ازاى المسيحيين يفهموا انهم بيتنصب عليهم
والمشكلة الاكبر ان مصر هاتولع ومفيش حد يطفيها لغاية دلوقتى
وكله بيدور على مصلحته من اليسار لليمين
معلش انا باقول الكلام ده لانك تقريبا الوحيدة اللى كتبت فى الموضوع ده
بالاضافة لبلال فضل وبلال ماقلش حاجة مفيدة...انتى اللى قربتى من الموضوع اكتر
ربنا معاكى

سواح في ملك اللــــــــــــــــــه- said...
This comment has been removed by the author.
Anonymous said...

نوارة هو في مفاجاة
الي اعرفه ان قهوة كتكوت لو كان هو نفس الشخص الي اقصده بذاته
فهو مش سلفي
هو علي خلاف مع سلفية محمد حسان وغيره
هو سلفي اشعري

Unknown said...

صحيح انت ما جبتش سيرة السلفيين بس انا ما جبتش غير سيرة السلفيين في المقال وهم الوحيدين اللي بيتجاروا بالموضوع ده وقال ايه بيتكلموا عن حرية العقيدة

والباقي مش بيتاجر
بيستعبط مش فاهمة ليه؟
الست ضاعت

Unknown said...

انا ما قلتش ان قهوة كتكوت سلفي خالص

انا باقول انه قال لي ليه جبتي سيرة المسلمين مع ان المرة دي هم مظلومين

بس انا ما جبتش سيرة المسلمين انا جبت سيرة السلفيين عشان هم اللي بيستثمروا الموضوع

والسلفيين دول انا شاكة فيهم وناوية في الرايحة والجاية الطش لهم

amr said...

بصى بما نك ست جدعه ودا طبعا بشهادتك انت مش شهادة اى حد تانى وانك ب100 الف سلفى

وحياة اغلى حاجة عندك تقوليلى ايه حكاية سرقة الجزم من قدام الجوامع ومش هاسئلك عن مستودع الانابيب
لانى اتسرقت منى من كام سنه جزمه كنت لسه شاريها من قدام الجامع
وكانت جزمة بنى برباط بالله عليكى قوليلى مين اللى سنجفنى واخد الجزمة

منظور شامل للحياة السعيده said...

عدم اللامؤاغذه

يسلم فمك

Anonymous said...

أستغرب كلامك يا أستاذة نوارة
هل قابلت أحدا من السلفيين ؟.
هل حدث بينك وبين أحدهم نقاش ؟
لصالح من هذه الصورة الشيطانية التى تقومين برسمها لهم
لصالح الله
أم لصالح الوطن
أم لصالح الوجاهة الثقافية التى ترى فى مهاجمة أصحاب اللحى والجلباب والسواك -يااااى -نوع من الحداثة والتمدن
يعنى أزاى يكون مسلم مودرن يتعاطى مع الثقافة العامة ويقرء بالأنجليش ويشارك فى فعاليات حقوق الأنسان ويتعاطف مع هذه الكائنات التى ترتدى الجلباب وتطلق لحاها
أقسم لكى بالله يا أستاذة نوارة أننى فى حياتى لم أنتمى للتيار السلفى ولم يحدث أننى توافقت معهم فى رأى أو قضية ولكن الحقيقة أننى أعلم علم اليقين أن مثلهم مثل أى تيار يبحث عن الحقيقة ويحمل الهم العام بشكل كلى أو جزئى
منهم من هو أمن تماما مثل مجموعات المثقفين ومنهم من هو مخلص وشديد الأخلاص
مثلهم مثل أى تيار مصرى صميم لذا فالوجوه التى تتحدث بأسمهم مثل يعقوب وغيره هى أسوء النماذج الموجودة به

Unknown said...

انا كنت في فترة سلفية يا امور.. بس ما استحملتش اكتر من سنتين.. حاجة فظيعة يعني ربنا ما يوري حد

وعارفة الحالة اللي انت فيها والله عشان مريت بيها كنت حاسة اني باكره البشريات كلها

بهيج الشرير said...

والنبي ياأبلتي سيبيك منهم ومن هبل العيال اللي مش عارفين الفرق بين الهاء والتاء المربوطة دول ومن البلد واللي فيها، وتعالي عندنا هنا وهاتشوفي البطيخ والتفاح الأمريكاني اللي بصحيح واللي بيزرعوه في الصالحية هنا جنب كاليفورنيا؛ وعلى فكرة ياأبلتي عندنا برضه البطيخ النمس

Anonymous said...

لا ستى
أنا لا أمور ولا شطور
ومش محتاج أحلفلك أنى عمرى ما كنت سلفى ولا هكون أن شاء الله
ومع ذلك أعرف كثير من السلفيين المتوازنين نفسيا وعقليا حتى مع عوار المنهج الذى يحملونه
لأن المشكلة دائما ليست فى المنهج ولكن فى المشاكل النفسية والعقلية لأتباع هذا المنهج
نحن نؤمن أن هناك الكثير من المنهاج والعقائد والأديان غير صحيحة وغير صائبة ولكن ذلك لا يمنعنا أن نقول أن هناك من أتباع هذه المناهج والعقائد من هو ممتاز ونافع لنفسه ولغيره وهو متسق مع نفسه ومع عقيدته ومع الحياة من حوله
أما التعمييم يا أستاذة نوارة بأن كل السلفيين عالم واطية وعملاء لأمريكا والسعودية فهو أسلوب لا يختلف عن عن أساليب محمد على أبراهيم وممتاز القط و جميع الأساليب المتحفية التى نكرهها كما تكرهينها

Unknown said...

باختصار يا خالد عشان بس ما نتعبش بعض كتير

مشكلة السلفية الجديدة

ودي غير اي سلفية نعرفها طول عمرنا

مشكلتها في المنهج نفسه.. زي ما مشكلة الصهيونية في منهجها وفكرتها اساسا

المنطلق الفكري اساسا للمنهج السلفي الجديد هو احنا شعب الله المختار احنا اللي فاهمين القرآن والسنة احنا الصح احنا اللي بعيد عن البدع احنا اللي بنفهم وغيرنا يا ضالين يا مبتدعين يا كفار يا ولاد وسخة الطيب اللي فيهم بيدعي للضالين امثالنا بالهداية واللي سلفي على ابوه بيدعي علينا عشان احنا القرية الظالم اهلها

Unknown said...

نوارة السلفيين محتاجين بديل علشان الناس تنفض من حولهم والبديل هو الازهر
والازهر الشيخ الأبعد الله يرحمه ضيعه
وكاميليا لو اسلامها صادق ربنا مش هايسيبها
واللى بيقولوا انهم سلفية دول اللى كعبتهم فى الرياض مش مكة ربنا
يخلصنا منهم
متزعليش بس كلنا بقينا زى الولايا
ومش عارفين نعمل ايه
مابقاش فى حاجة تسر

Anonymous said...

وهل تعتقدى يا ست نوارة أن أسلوب الضرب على الدماغ والتخوين والتجهيل هو الأنسب فى التعامل مع التيار السلفى
عموما أنصحك بمتابعة أخبار مظاهرة مسجد النور التى تمت اليوم بعد صلاة التراويح وهى بالمناسبة تمت لأول مرة بتنظيم التيار السلفى حتى تعلمى أن هناك تطور فى عقلية هذا التيار سيدفعه لمراجعة مناهجه وألياته التى ظل لفترة طويلة متمسكا بها

Mohammed Gamal said...

بصراحة يا نوارة و من غير زعل. مقالك في الدستور أفضل بكتير من البوست دة.

سواح في ملك اللــــــــــــــــــه- said...

كاميليا انتوا فضحتوا كاميليا انتوا خليتوها فرجه حتي لو كانت هي قررت ترجع ولا حتي خدوها بالعافيه بيتها وتكتم اسلامها مثلا وهذا اضعف الايمان والغبي افندي ده اللي خدها الازهر في وسط المظاهرات ده لو ده حصل فعلا سلمهالهم بايده ياتري بقي بعد الدوشه دي هتقدروا تعملولها حاجه لا يبقي كل واخد يسكت احسن

Early bird said...

بصى انت كلامك فى العموم صحيح

انا مش احتكلم علىمدعيين اتباع السلف ولا على الاخوان لانى صدمت فيهم ناس نص عمرهم فى السجون طيب ليه ماقلوش كلمه حق فى موضوع كاميليا

انا ماليش دعوه ولا اتكلم من منطلق حريه العقيده اللى هى زى ما شفت مصطلح بيخدم ترك الدين اما الواحد يفطر فى رمضان او يرتد عن دين الاسلام او يبقى بهائى او حتى من اتباع مسيلمه الكذاب يبقى حر عقائديا اما واحد تسلم يبقى لا
انا اعرف انه لا اكراه فى الدين لكن لو حد اسلم احميه واوفرله مناخ يعبد ربنا فيه بحريه واعرف برضه ان الدين عند الله الاسلام ولازم ابين ده والا ربنا حيحاسبنى واعرف برضه ان من اذى ذميا_اى واحد من اهل الكتاب _فقد اذى النبى عليه الصلاه والسلام

المسيحين المصريين غلابه وقعوا بين مطرقه التتطرف الكنسى ودى حاجه مش ممكن تنكريها وانهم بيقولوا عن المصريين المسلمين عرب غزاه مكنوش بيبينوهواما طلع زكريا بطرس يشتمنبى الاسلام والصحابه شنوده قال مش حاقدر اسكته تفتكرى بقى المسلميين حتى العقلاء منهم واللى بيكرهوامدعى اتباع السلف ودول على فكره كتيرمش حيغيروا على دينهم

الناس دى فاكره ان المسلميين هم السبب الرئيسى فى تخلفهم وانهم مش زى امريكا طب مالمسيحيين فى العراق كانوا فاكرين كده برضه وبعديين ايه اللى بيحصل لهم دلوقت ولسه لما جنوب السودان ينفصل عن الشمال

العجيبه بقى ان الناس بتحقق وتدقق فى مقتل الحريرى لانه يخدم الفتنه فى لبنان لكن محدش جاب سيره جون جرنج اللى اتفجرت بيه الطائره بعد توقيع الاتفاق بينه وبين حكومه السودان لان دوره خلص

Early bird said...

حاقولك على حاجه كمان يمكن ملهاش علاقه بالموضوع انتى عارفه ربنا مسلط علينا حسنى واعوانه ليه

لاننا لا نتحرى مالنا جبناه من حلال ام من حرام _ الا من رحم ربى طبعا

اما تشوفى شركات المحمول بتكسب قد ايه من مال الشعب ده طيب يبقى فعلا الشعب معاه فلوس ومدعى الفقر
طيب بيجيب فلوس منين وتقريبا الدخول كلها على قدها تفتكرى من بركه ربنا لو كانت بركه ربنا مكنش ربنا سلط علينا شله الحراميه اللى بيخربوها بالطول وبالعرض

طيب فى مقوله بتقول كيفما تكونوا يولى عليكم

وفيه مقوله تانيه بتقول اطب مطعمك تكن مستجاب الدعوه يمكن ده يكون حل لتجنب الفتنه ان كل واحد يراجع نفسه بصدق عن مصدر امواله ويدعوا الله ان يطهر امواله من السحت والربا والحرام _