Wednesday, 11 August 2010

أغاية الإلحاد أن تهروا كبدكمو يا أمة ضحكت من سيسها الأمموووووووووووووو

وزي ما المسلمين والمسيحيين المصريين مالهمش زي في العالم كلللللله
الملحدين المصريين مالهمش زي في العالم كللللله
انا والله عارفة، وقلت لكوا من زمان المشكلة في المصريين مش في اي عقيدة ولا فكرة
انا والله يابني كنت في الشارع من ساعة ما صحيت، بس بما اني العمدة الالي زي ما ياسمين مسمياني، الناس اشتكوا لي من اللي حصل النهاردة على التويتر من مجموعة من الملحدين
ايه التخلف ده؟ فيه ملحد سلفي؟ 
بقى هالله هالله ع الجد والجد هالله هالله عليه، بنتي لازم تطلق
البني ادم المقتنع بحاجة، اي حاجة، ما بيتضايقش من وجود اشخاص مش مقتنعين باللي هو مقتنع بيه، خالص
ليه بقى؟ لأنك ولنفرض انك مؤمن، لما بتشوف واحد ملحد وتضايق ده معناه انك مش مؤمن ولا حاجة، لأن وجود الملحد في الحياة بيوترك، ومعنى انه يوترك انك مش مقتنع تماما بايمانك، اصل حيوترك ليييييه الا اذا كان جواك خالص حاسس انه ممكن يبقى معاه حق وعشان كده وجوده حواليك بيقلقك ويخليك حاسس انه ممكن يخليك تفكر في اللي هو مؤمن بيه ويقلب لك دماغك
البني ادم بطبعه بيحب يستقر على حاجة وخلاص، مش عايز حواليه بقى ناس تاكل دماغه
بس البني ادم المقتنع تماما بايمانه ما عندوش مشكلة ان ناس تانية تبقى مش مقتنعة بيه، اقصى حاجة حيصعبوا عليه 
ونفس الحكاية بالنسبة للملحدين، بقى كل السلفيين اللي في كون ده كله كوم، والملحدين المصريين وعدم تسامحهم مع المؤمنين كوم تاني، ده ولا اللي لابسهم بس الله الرحمن الرحيم، يتضايقوا لما يشوفوا كلمة الله، يتضايقوا لما يسمعوا الادان، يتضايقوا لما بيشوفوا واحد بيصلي، يتضايقوا من رمضان، يتضايقوا من الحجاب، ده انا كان فيه واحد بيعمل معايا زي كفار مكة كل ما يشوفني باصلي وما كانش ناقص غير يحط حجر عليا وانا باصلي ويقول لي اذكر الهتنا بخير واله محمد بسوء
عارفين ليه؟ عشان حاسس بالذنب.. حاسس من جواه خالص انه المفروض يصلي، وشكلي وانا باصلي بيفكره بانه مقصر
وعشان بس ما ابقاش متجنية انا اعرف كام ملحد مصري ما عندهمش المشكلة دي، بس هم تلاتة بس اول عن اخر، مافيش مشكلة فعلا، لانهم فعلا مصدقين ان مافيش ربنا، وعشان كده وجود مؤمنين في الحياة مش بيضايقهم، ولا بيفتحوا سيرة الدين اساسا، ولا بتجيلهم الحالات الهيستيرية لما بيشوفوا واحد بيصلي اللي بتيجي لمعظم الملحدين المصريين، القبلة فين يا فلان؟ كده.. وخلاص، لا بيتجنن ولا بيفضل يلف حوالين نفسه، ولا بيشتموا ربنا، ولا بينهم وبين سيدنا محمد ضديات، لسبب بسيط، هو مؤمن ان ربنا مش موجود حيشتم حد مش موجود ليه؟ مجنون؟ وبعدين يشتم سيدنا محمد ليه؟ بالنسبة له ده راجل مات من زمان قوي وما اذاهوش بشكل شخصي، ويتضايق من رمضان ليه؟ ده حتى رمضان فوانيس، ومسلسلات، وكنافة، وعزومات، ومش بيصوموا من زمان ومش ماشيين في كل حتة يقولوا انا مش باصوم انا مش باصوم زي العيل اللي بيعاند ابوه وبيبجح، وممكن يكون بيشرب بس مش سكري، عشان وراه حاجات يعملها، وهو مش محدث صياعة ولا الحاد ولا عايش في دور الواد الكول الملحد بقى السكري بتاع النسوان
كل حاجة تتعمل في ام البلد دي بتتعمل باحداث، الاسلام باحداث والمسيحية باحداث والالحاد باحداث والليبرالية باحداث والشيوعية باحداث
محدثين كل حاجة.. ومراهقين في كل حاجة.. ومتطرفين ومبالغين في كل حاجة
ايه بقى ناس تقعد على التويتر تقول لنا انها متضايقة من رمضان عشان مش حتلاقي خمرة؟ اللي للدرجة دي مش حيقدر يستحمل شهر ما يشربش خمرة محتاج مصحة ادمان يتعالج فيها مش تويتر يشكي لنا عليه همه انه مدمن خمرة، مدمن الخمرة ده كائن فاشل، وبيتبص له انه فاشل ومالوش لازمة في الحياة في كل حتة في الدنيا، دي حاجة حد يفتخر بيها؟
ايه ناس محدثة الحاد تفضل تقول لنا: احنا مش حنصوم، زي الواد اللي طفشان من بيت ابوه وكل شوية يتصل باخوه الكبير ويقول له: قول لابوك اني دخلت ادبي مش علمي زي ما هو كان عايز.. عشان حاسس باالذنب
دي ناس كلها حاسة بالذنب، ومش مقتنعين بجد باي حاجة بيعملوها، والا ما كانوش هللوا عليها بالطريقة دي زي المراهقين اللي فرحانين انهم بيشربوا سجاير 
كلهم منافقين.. وعندهم مشاكل، يابني لو انت زعلان من ربنا في حاجة حلها معاه، لو انت نفسك تبقى كول قص قصة تامر حسني والبس شورت وامشي بيه في الشارع، الالحاد والايمان ما بيخلوش الواحد كول
وانتوا اخرتكوا يا حتموتوا بهرية الكبد من الخمرة اللي بتعبوا فيها دي كأنها عرقسوس، يا اما حتربوا دقنكوا وتلبسوا جلابية قصيرة وبرضه حتشتموا في الكفار زي ما بتشتموا في المؤمنين دلوقت
حاجة تقرفففففففففففففففففففففف

40 comments:

utopia said...

رمضان كريم يا نوارة
ظلمتى المصريين المرة دى ..صحيح احنا من ساعة الخواجة نابليون واحنا بنتهطل ونجرى ورى اى حاجى بيعملها الخواجة ابو شعر اصفر واكننا بنى ادمين درجة تالتة ودى عايزة علاج نفساوى لشعب بحاله
بس الملحدين فى كوكو الارض كلهم كده
وغالبا تحليلك مظبوط مع تعديل بسيط
ان الملحد اللى مش بيشتم ده جواه حاسس انه غلطان وسايب خط رجعة يعنى ولا بيشتم ولا بيمدح
انما البعدا اللى بيشتموا دول حاسيين انهم صح وكمان انهم مخلصين البشرية من ضلال الاديان زى الحاج ماركس
العواطلى كده
:)

- أحمد صبحي - مصرى فى فرنسا said...

الإنسان اللي خاض تجربة روحية حقيقية،وسواء وصل منها ليقين الإيمان أو قناعات الملحد، مش هتكون عنده أبداً هذة "السوقية الروحية" اللي بيتميز بها هؤلاء المحدثين

Khaled Khalil said...

لا طبعاً مش معاكي أبداً في موضوع الخمر ده
ماش واحد مدمن, انتي مالك ؟ ليه تجبريه على كود هو ماختارهوش, و المفترض إن الصايم هو اللي بيقاوم الشهوات, بدافع شخصي مش العكس

بالمناسبة عشان محدش يلزق كلام في بقي, أنا مليش دين, لكن مش مشكلتي الصوم, عادي أنا مش باكل ولا أشرب بين الفجر للمغرب في رمضان, و أنا لغايت اللحظة دي عمري ما جربت أشرب خمور لحسن تقولي إن صعبان عليا نفسي

الحرية حق, مش رفاهية

Khaled Khalil said...

و بالمناسبة للي بيشتم اللي بيشتموا و بيشتم ماركس عشان حاول يلاقي حلول حقيقية لمشاكل البشرية
للأسف الشتيمة عن جهل مسلية, و بتدي للشخص احساس بالتفوق مش ممكن يوصله لو عرف أكتر عن اللي هو بيتكلم عنه

Khaled Khalil said...

و بمناسبة البوست ده
أحب أدعي الصادقين مع نفسهم في احترام حرية غيرهم في العقيدة و في التصرف
للجروب ده
http://www.facebook.com/pages/nhn-almsryyn-mn-kl-almtqdat-dd-qanwn-almjahrt-balaftar/120201258027952?ref=mf
نحن المصريين من كل المعتقدات ضد قانون المجاهرة بالإفطار

جبهة التهييس الشعبية said...

مين اللي شتم ماركس؟
والادمان امتى كان حرية شخصية؟ امال بيعالجوه ليه؟

حسن على said...

كل سنة وانتم جميعا بخير وبصحة وسعادة يا نوارة

Khaled Khalil said...

الإدمان كان إمتى حرية شخصية ؟
انت بتتكلمي على اعتبار ما هو كائن ؟ الوضع الراهن إن مفيش حرية شخصية, أو حسب الدايرة الاجتماعية اللي انتي فيها
أما عن العلاج, إيه علاقة ده بالحرية ؟ انتي شايفة إن قمة الحكمة إنك تعالجي حد غصب عنه عشان انتي كوصية عليه عارفة مصلحته و كده ؟
طيب متزعليش لما تلاقي زميل فاشي عايز يقفل جبهة التهييس بقى
ثم أكل البطيخ بيجيب إسهال, و شرب الملوخية بيجيب حموضة, قوليلي بقى إنك ناوية تعملي عليهم حظر دول كمان
ولا الأسهل إنك توفري على نفسك ليستة الممنوعات و تعملي ليستة أصغر بالمسموحات, و ممكن إسرائيل تساعد في وضع الليستة دي

الغريب إنك ابتديتي البوست بحاجة و وصلتي لعكسها تماماً في نهايتها
عايزة غيرك يحترمك و انتي مش بتحترمي أبسط حقوقه المختلف فيها عنك

عاشــــــ النقاب ـقــــة"نونو" said...

))
رمضان كريم
ربنا يهدي يا أستاذة نوارة
ولا ضحكتيني ماركس العواطلي

qrique said...

"كلهم منافقين"
حرام عليكي

جبهة التهييس الشعبية said...

خالد

انت بتقول اي كلام على فكرة

اهدا كده شوية.. انت عصبي ليه؟

عاشقة النقاب

مين اللي قال على ماركس عواطلي؟

هو حد شتم ماركس هنا؟

khalil said...

نواره يا ست الكل ،كل سنه وانتى طيبه. انا معلوماتى عنك من زمان انك خريجه كليه الاداب قسم انجليزى من جامعه عين شمس ،ما اعرفش انك دارسة علم نفس للدرجه دى ،التحليل اللى قولتيه تحليل طبيب نفسى بقاله 50 سنه بيعالج مرضى،.تملى بتعرفى تقولى ،وبتقولى الصحيح فى الوقت المناسب، الله ينور عليكى

مصطفى said...

عجبني أوي الكلام..
خصوصًا حتة إن أنا لو مؤمن مقتنع بإيماني
مش هضايق من وجود ملحدين

كل سنة وانتي طيب..وتقبل الله منا ومنكم.

Kontiki said...

نوارة صباح الخير
well said !
المشكلة هنا الاكستريم و التطرف فى كل حاجة المبالغه عموما وعدم قبول الاخر
كل واحد يخلية فى حالة احسن
كل واحد يحترم الحرية الفردية لغيرة و اختيارات غيرة فى الحياة وافكارة عموما من غير ما نعين نفسنا قضاه على بعض

utopia said...

هو ماركس ما كانش عواطلى؟؟؟؟
وأدمان الخمرة والكوكايين والبودرة
بقم حرية شخصية؟؟؟
وبالمرة الانتحار يبقى حرية شخصية
واللى عايز يمشى ملط فى الشارع يمشى!!!!
ههههههههههههههههههههههههههه

israaelsakka said...

عسل و النبي يا نوارة
العيب في مصر ..مش في الفكر ..أنا جالي معايدات من ملحدين أجانب بنماسبة شهر رمضان :)) خشي على المدونة و حتلاقي المسحراتي ..أسمعيها و روقي
أنا مش ماركسية خالص ..بس لا أفهم الأشخاص اللي بيشتموا في ماركس من غير ما يقرأوا فكره و يقيموه زي أي فكر إنساني في حوانب قوة و جوانب مغلوطة
بيفكروني بالمعاتيه الإسلاموفوبيك اللي بيشتموا الإسلام مع أنهم مقرأوش آية قرآن

علي الزيبق المصري said...

هما الملحدين العرب عموما مش بس المصريين ،،،او ملحدين الانترنت الجدد دي طبيعتهم ، اتحولوا من ملحدين الى معادين للأديان
Anti-Religious Extremists

، وفي منتدياتهم اتحولوا من معاديين للأديان الى معاديين للإسلام تحديداً دوناً عن باقي الملل، تخيلوا ان يكون الدليل على صحة التوجه الإلحادي هو إن الرسول راجل وحش !

بيرددوا كلام قديم قوي وعفا عليه الزمن في نظريات المعرفة والاخلاق ، و" بيبغبغوا" عن حقوق الانسان والتنوير والتقدم والعلم وهما مالهومش فيها خالص !

عموماً هما كده عاجبيني قوي ، لأنهم من خلال الشتيمة بيعملوا تسويق سلبي لفكرهم والأغلبية العظمى بتطنشهم وتتجاهلهم وتعاديهم عاطفياً وما بيلتحقش بيهم الا الغلابة .

أنا مش ضد الالحاد كفكر شخصي يطالب بحقه في التواجد ويتعايش مع باقي الافكار لكن ضد الالحاد لما يكون قناع للطائفية والعنصرية.وكمان لما يكون الملحد فاكر نفسه رسول الحضارة والناس كلها كخة .

والله اعلم ورمضان كريم وكل سنة وانتم طيبين ..

Ahmed Mosallam said...

Gahla gedan

lastcrazyboys said...

يا سلاااااام .. بجد وحشــاني يا اسمــك ايه
مش عشــان بقالك فــترة بتروحي وبتيجي

لكن من زمــاااان ماقريتلكيش حــاجـة بالجمال ده

بتفكريني بالبدايــات .. وبالحرب على غـزة .. وكتاباتك عن الشيخ حسن نصر الله " اللي رغم موقفي احب قراءة ما تكتبين عنه" ..والله زمااان يا ست نوارة

انا كنت داخل أعيّــد عليك والسلام بغض النظر عن اللي كاتبــاه..وأقــولك كل سنة وانتي طيبــة .. وتقبل الله منا ومنك
بس لقيت نفسي بقول : ياربي ليه ماتبقــاش كل أيام السنة رمضان وكل واحــد يبدع في اللي بيتخصص فيه كده
!!!!!!
صحييييح بالنوسبة للمصريين بقى عايزين نعمل مقارنة صغنتوتة كده بين الريادة المصرية بسبعين مسلسل وازواج زهرة .. وبين الدراما السورية -الدخيييلة علينا-بالقعقاع بن عمرو التميمي فارس فرسان العرب في وقته

مهيج الجماهير said...

احيي حضرتك على البوست

بصراحة قولتى اللى انا بفكر فيه فعلاً

اسمحيلى بس أرد على استاذ خالد فى نقطة

الادمان مينفعش يبقى حرية شخصية0 يا باشا
المدمن دا خطر على المجتمع

المدمن ممكن يأذينى أو يأذى اللى انا بحبهم لما مايلاقيش اللى هو بيدمنه

عشان كدة مينفعش يبقى حرية شخصية

زى المريض بمرض خطير معدى
من حقى أعزله عن الناس
عشان ميعديش غيره

the magnificent ninja said...

أولا طبيعي في الملحد انه يعادي الدين , لأنه يظن أن الدين أفيون الشعوب و الخ الخ الخ و كل الكلام الفارغ بتاع كارل ماركس و اخوته أحرقهم الله .
ثانيا لما بشوف واحد ملحد طبيعي أتضايق و مافيش تسامح مع الملحدين , فالالحاد مش دين ده فكر فاسد فهم لا يؤمنون باله و لا آخرة و لا حساب و لا أي حاجة , يعني حسب فكرهم الواحد يقضيها في الدنيا و يعيش مبسوط في المعاصي حيث أن مافيش آخرة على حسب كلامهم الفاضي . يعني لما ألاقي واحد مسيحي أو حتى بوذي , باتعامل معاه عادي خالص و حسابه عند ربنا , لكن الملحد أنا أقرف أتعامل ممعاه لأنه شخص واطي وبلا قيم و ما ينعش معاه نقول "لكم دينكم و لي دين" لأنهم ماعندهمش دين من الأصل.
من الآخر الملحدين أقل من أن يصنفوا كبشر حيث أنهم أقل درجة من الحشرات

جبهة التهييس الشعبية said...

ملحوظة بس

ماركس عواطلي؟ ده كلام يتقال على واحد من اهم اللي اثروا في البشرية؟ عواطلي ازاي؟

معلش هو انا ما جبتش سيرة ماركس في البوست
بس مش عارفة ليه فيه ناس جابت سيرة ماركس؟ هو مالوش ذنب على فكرة، وماركس عمره ما شتم المتدينين ولا قال المفروض كل ما تشوف واحد مؤمن تسب له الدين بالطريقة دي
وما اعتقدش ان مراهقين الالحاد قروا ماركس اساسا

soreal said...

ينصر دينك!!!!!
بس تصحيح صغنن... الظاهره دي مش مصريه... دي يونيفرسال .... و تحليلك ليها يونيفرسال كمان....


المهم
رمضان كريم علي الجميع.... و كل عام و إنتي بخير و مالية الدنيا بحسك :)

جبهة التهييس الشعبية said...

بالنسبة لملحوظة ان اللي بيشتم مش بيشتم الاديان كلها وانما بيشتم الاسلام بس

ده مفهوم، امال انا عمالة اقول في ايه من الصبح

هم مسلمين، وعاملين زي الواد اللي طفشان من ابوه وبيعاند فيه، الطبيعي انه يشتم ابوه بس، حيشتم كل الابهات ليه؟ هو متخانق مع ابوه بس

وبعدين هم مسلمين فعلا، مش ملحدين ولا حاجة، هم بس زعلانين

اقصد اللي بيشتموا كتير دول

ولو كان مسيحي وبيعاني من نفس الاعراض حيشتم في المسيحية بس لانه زعلان منها هي بس وهكذا

ملحوظة تانية

الكلام بخصوص ان كل الملحدين في العالم كده مش صحيح

اولا مش صحيح ان كل الملحدين المصريين حتى كده، هو الاتجاه العام في الملحدين المصريين كده عشان المصريين ما بيعرفوش يلحدوا بجد

لكن فيه اقلية مش كده

وانا شفت ناس كتير مش كده، وبصراحة اللي باشوفه في مصر ما شفتوش في اي حتة تانية

ولا حتى في لبنان بلد العجايب

utopia said...

نوارة انا قلت عواطلى على ماركس
لانه اسف كان عايش على قفا انجلزكتير
ورغم انى مش موافق على ارائه ككل
لكن باعترف انه نظريته فى راس المال صحيحة بدرجة كبيرة
زى برضه ما انا باحترم علم داروين انما مش موافق على كل اللى بيقوله
انا بس جبت سيرة ماركس لان الملحدين فى مصر اغلبهم بيقولوا انهم ماركسيين
انما والله صدقينى الملحد الواضح اللى ما بيعيبش فى غيره
احسن مليون مرة من المنافق اللى ماعندوش دين ومش عاوز يعترف بكده
ده بس للتوضيح
رمضان كريم

مواطن مصري said...

مين قال أن ماركس مش عواطلي بالعكس انا

شفت ماركس و هو بيقوم من قبرة رايح لسيد البدوي عشان يعلن التوبة و ينضم لحزب الوفد بعد ما شاف نزاهة الأنتخابات الأخيرة في حزب الوفد

"_"

مواطن مصري said...

مين قال أن ماركس مش عواطلي بالعكس انا

شفت ماركس و هو بيقوم من قبرة رايح لسيد البدوي عشان يعلن التوبة و ينضم لحزب الوفد بعد ما شاف نزاهة الأنتخابات الأخيرة في حزب الوفد

"_"

Dr.Online said...

اتفاق مع في المقال و أحييك عليه
رااائع

و اتفاق مع :

علي الزيبق

و مهيج الجماهير

و أختلف مع من يقول انها ظاهره عالميه:
ملحدين أجانب كثيرون يخترمون فكر بعض الاديان في التعامل مع الحياه مع رفض مبدأ الالوهيه

الحمد لله على نعمة الاسلام و كفا بها نعمه

ramy1313 said...

عندك حق فعلا قولتى اللى كان فى نفسى أحد المشاكل فى رأى الشخصى انهم مش ملحدين على اساس علمى مش فاهمين حاجة فى قوانين الطبيعة وملحدين على أساس الهوى عشان الأسلام فى حاجة من وجهة نظرهم معيبوبه فى الأسلام أو بمعنى أخر دلاديل لأفكار اخرى نقاشهم بالنماسبة لا يمتاز بأى موضعيه بالمرة وكلها فى الشبهات البانة الماسخه اللى فى بقهم كلهم وفهمهم الخاطىء لأمور الدين وبعض الهبل من رجال الدين وفى بعض الأحيان بيدخلوا فى نقاش مع ناس بتدافع على أساس عاطفى وده ما ينفعش معاهم

المهم هما ناس مستفزة جدا وكل يوم لازم دمى يتحرق بسببهم وبالمناسبة هما لسة بيتكلموا لغاية هذه اللحظة بنفس السخافة وأخر حاجة طبقا لكلامهم لازم تلحد بسببها الخوشاف
http://www.ahl-alquran.com/arabic/show_news.php?main_id=11881

kamal said...

اسئلة اوجهها والاجابة عليها تحدد احنا فين
هل لو قامت حرب مع اسرائيل تانى
الناس الملاحدة يوافقوا يحاربوا ولا الحادهم يمنع
هل اذا اراد الملحد ان يتزوج ابوه هيقعد يفتخر عند اهل العروسة ويفخر بان ابنه ملحد ولا هيقول انه شايف امر دينه
طيب الملحد لو جاله ملحد يتجوز بنته
هيوافق ولا لأ

دعاء فتحى said...

كان فيه مقولة إن الذى يبتسم فى وجه العاصى هو العارف بالله حقيقة
يعنى لما تلاقى نفسك زعلان منه مش عليه يبقى فيه عندك مشكلة

سواح في ملك الله [خالد المصري] said...

من شاء فليؤمن ومن شاء فليكفر- صدق الله العظيم

lioishmind said...

نوعاً ما الكلام ده أغلبه صح وأتفق معاه .. النقطة المحور في التدوينة دي إن القناعة هتولد تعايش سواءاً من المتدين أو من اللاديني .. وواضح جداً بالتجربة وجود ملحدين متعرفيش إنهم ملحدين أصلاً .. لأن بالضرورة مش المفروض البني آدم المسلم يمشي يقول أنا مسلم أنا مسلم في الشارع لو هوّا حاسس إنه فعلاً مسلم ونفس الموقف للملحد .. ديني إيه ده لنفسي .

ملحوظة على ماركس :
عن إنه عواطلي ماركس ما بطلش شغل غير لما انجلس عرض عليه تفريغه لكتابة رأس المال وكتب أخرى .. زي بالظبط ما عبد الله ابن المبارك فرغ أربعة من أئمة المؤمنين في الحديث وكان بيشتغل عشان يصرف عليهم =]
ما أظنش هتقول عليهم عواطلية .. لأن ده مش إنصاف !
كمان ماركس قال : عدو الدين عدو الشعب ..
ورفض أن يكون الدولة ليها دين ولو كان الدين ده الإلحاد

القرآن بيقول " وا تقف ماليس لك به علم " يا ريت نقرا قبل ما ننقد .

Abdelhameed Gamal said...

كل التعميمات ساذجه
:)

التطرف طبع فى الإنسان - مشاكل نفسيه
ملهوش علاقه بالفكر أو بالعقيده

أنا لادينى ومع ذلك هنئت كل أصحابى المسلمين برمضان
والفيسبوك عندى مليان تهنئات واغانى وحجات لطيفه خالص
ومعنديش مشاكل فى رمضان بأى شكل
_
اما بالنسبه للشرب
فمين قال إن الملحد لازم يكون بيشرب ؟
:)

إنتو ليه بتدخلو الأخلاق والمبادىء فى العقيده

غير كدا الشرب فعلاً حق من حقوق البنى أدم
انا مقولتش الإدمان
بس فرضاً إنى بشرب مثلاً انا من حقى إنى ألاقى اللى أنا عايزه بدام متوفر فى أى وقت

رابعاً خالص عذائى لعقول للمتخلفين والمهللين - إن وجدت -

وأه .. إنتى مصريه علفكره
:)

السلام الآن said...

ارجوا ان لا يكون هذا الموضوع والردود الخاصة به هي بداية حملة لفرض قانون خاص ضد غير المتدينين

lastcrazyboys said...

الحاج عبحميد اللاديني " واللي كلنا لاحظنا انه الوحييييد اللي حاطط اسمه المسلم " يمكن عشان يثبت نظرية الأستاذة ..!!؟

المهم انه الظاهر ملحقش يقرا الوبست ..عشان نوارة موضحة فيه ان اصدقاءها "الغير مفوتين" ما بيتصادموش مع حد عشان طقوسه الدينية

ولا هم مدمني خمور كما الحال مع المحدثين

Abdelhameed Gamal said...

@lastcrazyboys :
ههه لما حبت تبقى محايده قالتلك تلاته أصحابى ؟

إنتى تعرفى مين ملحدين فى مصر أساساً ؟

يعنى أنا أجى أكتب المؤمنين كلهم ولاد دين كلب .. ولما احب الينها شويه .. عدا تلاته أصحابى

هو فى إيه بقى يا جدعان
هو كل حد ملوش شغلانه يمسك موضوع الإيمان والإلحاد ويلم شويه مهللين حوليه ويقعد يشتم عشان يقلوله الله عليك
مكل واحد يلم نفسه بقى ويخلص مشاكله النفسيه دى فى حته تانيه
واللى عايز يعمل لنفسه قيمه مبتتعملش كدا يا حمار

اما بالنسبه للست نواره نجم اللى عاملالك بلوج نشره أخبار وطبعاً الناس كلها داخلين على حس السيد الوالد
إلا صحيح هو مش السيد الوالد دا اللى طلع فى التلفزيون وقال على روبى بز وطيز ؟

Nicholas Urfe said...

لفت نظري تعليق الزميل أو الزميلة " السلام الآن"
تقول :

"ارجوا ان لا يكون هذا الموضوع والردود الخاصة به هي بداية حملة لفرض قانون خاص ضد غير المتدينين"

تعليق حضرتك مع كل احترامي بيفكرني بمجموعة ملحدين انترنت من النوعية اللي بتتكلم عنها الاستاذة نوارة . عايزين يفهموا نفسهم ويفهموا الناس انهم مضطهدين ومهددين بالموت ومحرومين من حرية العقيدة !

طبعا حرية العقيدة عندهم لا تعني إلا شتم العرب والخلق وسب الانبياء والمقدسات واتهام المؤمنين عامة والمسلمين خاصة بالجهل والتخلف

من خلال تجربتي وحياتي اليومية لا احد يكترث ..الحد او اؤمن او اعتنق اي دين واحترم الناس هتلاقي الناس
بتحترمك وبتسيبك ف حالك.

عايز تأذي نفسك روح في وسط ناس متدينة ومؤمنة واشتم مقدساتهم وازعجهم واقرفهم اكثر ما هما قرفانين من العيشه الصعبة ، اكيد هتلاقي رد فعل سلبي بدءا من كراهيتك انتهاءا الى ايذاءك جسدياً.

سلام صديقي

Abdelhameed Gamal said...

السلام الآن said...

ارجوا ان لا يكون هذا الموضوع والردود الخاصة به هي بداية حملة لفرض قانون خاص ضد غير المتدينين

Nicholas Urfe said...

من خلال تجربتي وحياتي اليومية لا احد يكترث ..الحد او اؤمن او اعتنق اي دين واحترم الناس هتلاقي الناس
بتحترمك وبتسيبك ف حالك.

_

إنت أهطل .. وإنت أهطل منو

@السلام الأن :
الحريه مبتتشحتش
والأمان إديه لنفسك
ودى ضريبه الخروج عن القطيع
والموضوع مش بالدرجه يعنى

أما بالنسبه للأخ التانى دا
يبقى إنت مش فـ دوله عربيه أصلاً بقى
مسمعتش عن كريم عامر ؟
ولا مسمعتش عن نجح حمادى ؟
ولا مسمعتش عن أى فتنه طائفيه بتحصل ؟
ولا متعرفش السلفيين بيعملو إيه فى الشوارع وعلى إعلانات شركات المحمول حتى ؟
ولا مسمعتش عن حديث " من بدل دينه فأقتلوه " ؟
ولا متعرفش إن كل واحد بيتعين بأمر نفسه كدا واصى عليك ويجى ينصحك ويهيدك
والتانى يبصلك بتكشيره أوى كدا
والتالت يبصلك ويقول لا حول ولا قوه إلا باللله
والرابع يجى يناقشك
ولما ميعرفش يتكلم معاك يطلعلك سكينه ؟

Nicholas Urfe said...

Abdelhameed Gamal ٍsaid:

إنت أهطل .. وإنت أهطل منو

----------------------------
ايه يا راجل السئافة والتحضر ده كلو !
انت فعلاً عجيب وادهشتني ، عندك جرأة على التعدي على الآخرين بكل برود ! نموذج تستحق الدراسة..

قبل ما تفتح مدونة وتتكلم في الحريات والحقوق رقي نفسك شوية يا محترم.

عموماً ردك ده يدل على عينة البشر اللي الموضوع بيتكلم عليهم !

التطرف ثم التطرف ثم التطرف


دلوقتي أعيد عليك ما قلت أنا :


"من خلال تجربتي وحياتي اليومية لا احد يكترث ..الحد او اؤمن او اعتنق اي دين واحترم الناس هتلاقي الناس
بتحترمك وبتسيبك ف حالك."


يعني أنا كنت دقيق في كلامي وتكلمت عن نفسي وقلت أني "شخصيا" سواء خلال حياتي في مصر أو خارجها قابلت ملحدين كتير والناس بتتعامل معاهم عادي ..

فإذا انت مش بتعرف تقرا يبقى انت حر ، واذا انت عايز تعمل مناحة على حقوق الملحدين الضايعة ياحبة عيني فمتعملهاش على حسابي يا حدق ..

والملحد اللي مش بيحترم مقدسات الأغلبية وبيطالب بحريتو في شتم مقدساتهم يبقى بيضحك على نفسه مش على غيرو.وبيتصرف بغباء لأنه ازاي الناس هتقبل تتعايش مع واحد بيغلط في دينهم !!!!

سلام يا محترم ..