Saturday, 21 August 2010

ربنا يسلط عليك مخك كمان وكمان يا حامض

حد يجيب اياد نصار يعمل دور حسن البنا في مسلسل بيهاجم الاخوان؟ ده مين الاخواني اللي عمل الكاستينج ده؟ اهو كلللللللللللل البنات دلوقت وقعوا في غرام حسن البنا ومن بكرة الصمح الساعة حداشر صباحا الخامسة عصرا حينضموا للاخوان
ده الاخوان نفسهم لو كانوا عملوا المسلسل ما كانش حيخطر في بالهم ابداااااا يجيبوا اياد نصار.. دول غلابة دول ما يفهموش في الكلام ده، اخرهم كانوا حيجيبوا مجدي كامل ويكرهوا الكون كله في حسن البنا
وطبعا حسن البنا طلع شعوعي في المسلسل
الحمد لله الحمد لله... ربنا جبر خاطري واهو شتم اليسار في السكة الحمد لله وطلع حسن البنا شعوعي والشيخ حب يهديه ويقول له يا شيخ حسن ده الشيوعية كفر قام بمنتهى الفجر والبلمبم قال له: فيه كتب كافرة وكتب مؤمنة؟  وما رضيش يسمع نصيحة الراجل
ههههههههههههههههههههههه الله يحظك يا حامض
وسلفي.. عميل للسعودية وتبع رشيد رضا
ومسيحي واخد من فرنسا فلوس عشان يبني جامع
كل ده وهو اياد نصار... ولا الهوا يا حامض، والله لو قلت عليه اسرائيلي، اللي عمل الكاستينج عمل فيك مقلب
وزي ما قلت لهم على التويتر في نهاية المسلسل حيطلع ان حسن البنا ما اتقتلش، حسن البنا مات باسفكسيا الخنق بعد ما بلع طربوشه
اتاري الاخوان بقالهم تمانين سنة بيحسبنوا... صبروا ونالوا وحسبنتهم جابت نتيجة
ولاد المحظوظة
انا باتابع على فكرة مسلسل الجماعة... حلو حلو تابعوه، احلى حتت بتاعة حسن البنا طبعا 
;)

6 comments:

أحمد العطار said...

لكن هل يا أستاذة نوارة ممكن - بغض النظر طبعاً عن اختيار اياد نصار - هل ممكن نقيم تجربة العمل على انها محاولة لاستفزاز الاخوان وتعجيل الصدام مع النظام قبل 2011 ولا انها تجربة عادية لا علاقة لها بالتوقيت ؟

Shaimaa said...

سؤال حلو ، جاوبى ؟

soreal said...

السنه اللي فاتت خليتني أتابع جرب الحاسحيس .. و السندي شكلك حتخلييني أتابع الجماعه...

في حدا يعمل فيأ ثواب و يقولي وين ممكن أشوفه أن لأين ؟

بوبو said...

ههههههه.. لسه والله يا نوارة كنت بفكر في كدة وانا قاعدة قدام المسلسل امبارح.. اياد نصار بصراحة حاجة تفطر.. انا حاسة اصلا ان اللي عامل المسلسل اخواني مستتر.. عامل نفسه مش اخواني عشان المسلسل يتوزع ولا ايه؟ هو لغاية دلوقت عامل دعاية فل للاخوان .. كل سنة وانتي طيبة

مش فاهمه said...

انا باتفرس يوميا دول مطلعينه انتهازى و راشى و كل العبر فيه ولا عزت العلايلى ده روخر مستغرب جدا والواد بيسأله الا ليه حسن البنا كان بيخطب فى القهاوى مش فى الجوامع شوف ازاى بنتى اللى فى اولى اعدادى ردت و قالت هم اللى فى الجوامع محتاجين دعوة قوم عزت العلايلى المسقف يقول علشان القهاوى بدل الأعلام دلوقتى و هم طول عمرهم يحبوا الأعلام زى عينيهم الهى ربنا يجيب لوحيد حامد اسهال فى رمضان علشان العكننه اللى معكننها عليا دى

utopia said...

ربنا يحظك يا نوارة
وموضوع مقالك فى الدستور اليومين دول رائع..ربنا يخليكى للمسلمين الغلابة
ياريت تحودى بقى على موضوع عقدة الخواجة
اصلها استفحلت قوى وليها علاقة بالموضوع بتاعك.
ربنا يباركلك