مهلا يا دكتور محمد عمارة

يعني انا باحب الدكتور محمد عمارة جدا

وباحترمه وباحترم علمه وقوته جدا

وكانت اسعد لحظات حياتي وانا باصلي وراه

واول معرفتي بالدكتور عمارة

- اقصد كتاباته -

كانت من خلال ابن رشد لاني برضه باحب ابن رشد جدا

واللي حببني فيه هو الدكتور محمد عمارة وعمري ما كنت ح افهم

وانا لسة طالبة في تانية جامعة اي كلمة من ابن رشد لو ما كانش

الدكتور عمارة شرح وقدم فكر ابن رشد

وعشان يا دكتور عمارة باحبك وباحرص عليك وباحترمك باكتب لك

الرسالة دي اللي مش عارفة ح توصلك وللا لا

يا دكتور عمارة من كان منكم يؤمن بالله واليوم الآخر فليقل خيرا او ليصمت

النهاردة سمعتك في اذاعة القرآن الكريم

وبعد تلات ايام من شتيمة احمدي نجاد في جامعة كولومبيا

وكل حيثيات شتيمته كانت انه ضد اسائيل والشواذ جنسيا

سمعتك النهاردة في الاذاعة بتكفر الشيعة وبتقول عليهم كلام يندى له الجبين

ولا يخرج من هم مثلك في العلم

ومثلك قليلون

هو ايه الحكاية يا دكتور عمارة الانسان لما يبقى بحر علم زيك

لما يفتح البحر عشان يتكلم ينقي الكلام اللي ح يقوله بما فيه مصلحة الاسلام والمسلمين

قبل كده كتبت سلسلة مقالات عن الفرس والترك والديلم والعجم

وقعدت تشتم فيهم وانت تعلم ان الاسلام ضد العرقية والعنصرية

وتعلم ان الرسول قال على العصبية القبلية: اتركوها فإنها منتنة

ثم ايه الفائدة العظيمة اللي ح تعود على المسلمين العرب

- واللي بالفعل بقى نصهم مخلط باتراك بالذات -

انهم يكرهوا المسلمين من غير العرب

قلنا معلش ماهو مش اي حد بيقرا مقالات محمد عمارة واللي ح يقراها

مخه ح يبقى كبير وح يفوت الحكاية دي

وبعدين تقتبس من الامام الغزالي كلام عن قتل المسيحيين حتى وان كانوا من اهل الذمة

وتنزلها في كتاب وتتسبب في تغريب المسيحيين عن مجتمعهم وزيادة احساسهم بالرعب

وكفاية ان واحدة مسيحية قالت لي: يعني الكلام ده معناه انكوا عايزين تقتلونا بس سايبينا منة كده منكوا

وبرضه مافهمتش ايه الفائدة العظيمة اللي ح تعود على الناس من انهم

يحسوا ان واجبهم المقدس انهم يستحلوا اموال ودماء الجيران

من امثال ام مايكل وام جورج وام مريانة

دول حتى بيعملوا احلى كحك في الدنيا

وبعدين رجعت اعتذرت وقلت ده اقتباس ومش قصدي

وكنت اظن ان الامام الغزالي لا يراجع

وهي هفوة علمية ابلعها لك وابلع لك زيها عشر مرات عشان بحبك

لانك تعلم ان الامام مالك قال: كل يؤخذ من قوله ويرد عليه الا صاحب هذه الروضة

وتعلم ان كلمة ذمي اللي هي فيه ناس كتير بتكرهها وبتتضايق منها

معناها في منتهى الجمال: الذمي من له ذمة الله ورسوله

يعني بالبلدي في حمى الله والرسول

وبرضه قلنا ده في كتاب ومش كل الناس بتقرا كتب

الحقيقة قليلين اللي بيقروا كتب ولولا الضجة الاعلامية اللي اتعملت على الكتاب

ما كانش حد سمع عن الموضوع

ودابب خناقة مع البابا شنودة من غير اي مناسبة وانت تعلم انه راجل

وطني وحريص على وحدة البلد ومش معنى انه ما بيحبش الخناق

اننا نحط في ودانه شطة وهو ما يفتحش بقه

دلوقت في الراديو اللي كل الناس بتسمعه

خاصة الناس انصاف المتعلمين

طالع تقول الشيعة بيألهوا الائمة وبيتحدثوا حديث افك عن السيدة عائشة

يالهول الصاعقة

يعني وكأني محتاجة اذكرك بكتاب المراجعات اللي فيه عالم من اهم

علماء الشيعة بيقول عن السيدة عائشة: عرض الرسول وشرفه

وام المؤمنين ولكن ليس ذلك يعني انها لا تخطئ ولا يحق لنا مراجعتها

وقد اخطأت في حربها لعلي

واذا كانت السيدة عائشة بعد واقعة صفين قالت: يا ليتني لم اخلق

وهي على ذلك ام المؤمنين وعرض الرسول

هو يعني الشيخ شلتوت والشيخ الغزالي كانوا عارفين انهم كفرة

وعملوا لجنة تقريب المذاهب كنوع من القوادة الدينية مثلا؟

وانت اعلم الناس بان فرقة المسلمين الى سنة وشيعة

سببها سياسي متعلق بالفتنة الكبرى

واهم درس من دروس الفتنة اللي انا شخصيا شايفاها من احسن

الاحداث اللي حصلت في تاريخ الاسلام

اهم درس فيها اننا نعرف ان الناس ممكن تختلف وممكن تقتتل

وتظل كل الاطراف لها عذرها واحترامها ومكانتها وحسانتها تذهب

سيئاتها وانجازاتها تفوق اخطائها واننا في الاسلام لا نقدس اشخاص

والله وحده هو القدوس وبخلاف الانبياء لا احد معصوم

وان الله هو الحقيقة المطلقة الوحيدة وما دونه نسبي ويختلف باختلاف

وجهات النظر التي قد تصل الى حد الاقتتال ومع ذلك لا يعني ان حد في

الاطراف المقتتلة وحش او حد فيهم كويس

زي ما ممكن الطرفين يبقوا مخطئين زي الفتنة مابين السنة والشيعة في العراق

ممكن الطرفين يكونوا على حق كل من وجهة نظره

وهي اكبر مثال على حرية الاختلاف وعلى ان الحقيقة نسبية

تقوم حضرتك دلوقت

سايب التطهير العرقي اللي بتعمله اسوأ وأخس وأحط قوة

عرفها التاريخ الانساني الا وهي امريكا

وبدل ما تصلح ذات البين تشعل من النار الفتنة اكثر

وبدل ما نحمد ربنا اننا مش زي العراق

نزج بأنفسنا في الفتنة اللي ما بينهم

وبدل ما نساند راجل كل تهمته انه بيكره اسرائيل وعايز يعمل كرامة للمسلمين

وبيتشتم عشان كده

نتهمه بالكفر وننسب لمذهبه ماليس منه

غفر الله لك يا دكتور عمارة

يعني ده اللي يشتم شافيز دلوقت يبقى بيتكلم كلام مالوش لازمة

ثم ايه الفائدة

ايه فايدة الكلام ده دلوقت

بلاش الكلام عن الترك والمسيحيين والشيعة

ايه فايدة انك في اذاعة القرآن الكريم تعمل برنامج تشتم البوذيين مثلا

احنا في احلك مراحل تاريخنا

ولا عمرنا مر علينا ذل وهوان اكبر من اللي بيمر علينا دلوقت

ولا عمرنا واجهنا قوة بهذه الدموية والخسة واللا انسانية

ولا تتار والمغول كانوا بالحقارة والدموية دي

ايه لزوم الكلام ده كله دلوقت

انا صغيرة وجاهلة

وانت كبير وعالم

ولكن عمر سمع من امرأة جاهلة

وابو بكر كان بيقول: اطيعوني ما اطعت الله ورسوله فيكم

فإن أخطأت فقوموني ولا طاعة لي عليكم الا في طاعة الله ورسوله

والعلم ان لم ينتفع به لصالح الانسانية كافة

ولصالح المسلمين خاصة

يبقى غثاء كغثاء السيل

ربنا يسامحنا كلنا ويهدينا كلنا الى ما فيه الخير والصالح ووحدة الصف