ده استقصاد بقى
انهم ينكدوا علينا في اول رمضان
وينكدوا علينا في اول العيد
يا سلام على الفتوى بتاعة التمانين جلدة
انا عندي كام سؤال كده
لحضرة شيخ الازهر الجليل
مين المحصنات اللي قذفهم الصحفيين ويستحقوا على الخوض في عرضهم تمانين جلدة؟
هل سبق ان ابراهيم عيسى او عادل حمودة او عبد الحليم قنديل او وائل الابراشي او انور الهواري
انهم كتبوا ان السيدة الاولى ماشية مع الطباخ بتاعها مثلا؟
وللا هو توريث الحكم بقى يساوي الاعراض في قدسيتها؟
وللا التساؤل عن مرض الرئيس كلمة قبيحة توازي سب الدين والميتين؟
طيب بقى مين اللي بيخوض في الاعراض بل وبيعتدي عليها
يعني ما سمعناش عن صحفي حط عصايا في مؤخرة ظابط
ولا سمعنا عن صحفي مسك واحد من الحزب الوطني ورنه علقة في القطامية وقلعه هدومه
ولا سمعنا عن صحفي لفق تهم تمس بالشرف الوطني والاخلاقي
لمجرد ان هازوها الصخص مختلف معاه
السؤال التاني
هئ هئ هئ
مين المحصنات؟ ما تخلوناش نقبح بقى واحنا لسة خارجين من العيد
فين المحصنات؟ فين المحصنات؟
طب هو فين الظابط؟
السؤال الاخير
بالنوسبة للشباب
ولادك
اللي اترفدوا واتحبسوا وضاع مستقبلهم واهاليهم اتقهروا عليهم
بعد ما تعبوا فيهم وصرفوا عليهم دم قلبهم
الولاد دول اللي اتظلموا من غير سبب
يا ترى ايه الحد اللي مفروض يقام على اللي ظلمهم؟
No comments:
Post a Comment