انا واخواتي وام زينب حطينا صوابعنا في الشق خلاص
اولا اللي حصل ان زينب يوم الاربع كلمتني وهي بتصوت
وبتقول بابا مغمى عليه ومش بيرد عليا
كلمنا الاسعاف ام زينب كلمت الاسعاف ماجوش
كلمتهم تاني حطوني على المزيكا وبعدين الراجل قال لي ببطئ شديد
هم...نممممرة...تليييفوووونهم....كا..ا..ا..ام؟
قلت له النمرة
قال لي: ثانية واحدة
وسابني
رجع وقال لي بنفس البطئ والهدوء: آه..مش...العنوا..ا..ا..ان
كذا..كذا
-ايوة
- طيب ثانية واحدة
وسابني
رجع وقال لي: طيب تبع قسم ايه
طبعا انفجرت فيه: انت ح تحقق معايا؟ انا ايش عرفني تبع قسم ايه
باقول لك ده الشاعر احمد فؤاد نجم وتعبان محتاج اسعاف دلوقت حالا
على العنوان اللي عندك
طبعا الاسعاف ما جتش لحد اللحظة دي
ولولا صاحبه الاستاذ محمد صحصاح جه وشاله وحطه في العربية
ما كناش عرفنا نتصرف
وراح بيه المستشفى
وانا طالعة المقطم ام زينب كلمتني وقالت لي لفي وارجعي
محمد صحصاح اخدنا المعادي
رحت المستشفى لقيت محمد صحصاح والاستاذ سيد عنبه وسعيد عبيد
وحسن شرشر وولاء سعدة واقفين هناك مع ام زينب وزينب
مع ملحوظة ان فيه منهم ناس زي ولاء مثلا
مش باشوفهم غير من السنة للسنة لكن ساعة ما بابا تعب لقيتهم قبلي في المستشفى
وصحصاح وعنبه هم اللي سلفونا الفلوس لحد ما ام زينب تجيب الفلوس بتاعة بابا من
قناة دريم
ومع ملحوظة ان الناس اللي هو بيقعد معاهم كل يوم
بل الناس اللي كان قاعد معاهم قبلها بليلة ورجع من عندهم تعبان
ما شفتش وشهم ولا سمعت حسهم مافيش غير واحد اتصل وقال لي بالاطة
قولي لي الحالة باختصار
وزي ما انتوا عارفين دخل الانعاش يومين
وتاني يوم ليه وهو لسة في الانعاش الاقي الناس اللي ما شفتهمش امبارح
بدون ذكر اسماء كده محمد هاشم جاي وجايب معاه اتنين صحفيين
معاهم كاميرات وعايزين يخشوا بالكاميرات دي عند بابا في الانعاش
ولما قلت له مافيش زيارة مشي يعيط في كل حتة ويقول نوارة طردتني
وبعدين الاقي المصري اليوم كاتبه تاني يوم ان اسرة الاستاذ نجم اتصلت بمحمد هاشم
واستنجدت بيه
!!!!!!!
ولا شفنا وشه غير تاني يوم وهو جاي مع الصحفيين عشان يصوروا ابويا في الانعاش
ولما اتقمص ومشي الصحفيين طبعا باعوه وقالوا لي لا طبعا احنا مالناش دعوة
احنا مش ممكن نعمل معاه شغل وهو في الانعاش
وبعدين طلعوا بابا من الانعاش
الخميس بعد الفطار
وكان مصمم يخرج الجمعة الصبح راح له صاحبه اللواء نور غازي وقعده في المستشفى
غضب عنه
ورغم اننا قلنا مافيش زيارة
جوله صحابه وفضلوا قاعدين لابدين ولما نقول لهم كفاية كده
يبصوا لنا بقرف
وبعدين روحت يوم الجمعة قبل الفطار وسبت ام زينب وزينب معاه
وفجأة لقيت زينب بتتصل بيا وتقول لي صحاب بابا ادوله سجاير
وقبلها كان الاستاذ الصحصاح قال له: طيب يا نجم ح اروح اجيب لك سجاير
وخرج وقف برة عشان يهديه
راح واحد صاحب بابا اللي هو حسنين رسام الكاريكاتير بدون ذكر اسماء
اداله سجاير
ولما اتصلت واتخانقت وزينب اتخانقت معاهم
واحد تاني صاحب بابا اللي هو مجدي احمد علي بدون ذكر اسماء
قال قدام بابا: هي نوارة عايزة تمشي كلامها على ابوها وتحكمه
ما تحكم نفسها قبل ما تحكمنا
وما اعرفش "نا" دي عايدة على مين بالظبط
انا لا عندي نية ولا رغبة ولا يهمني اني اخاف على حد غير ابويا
وبعدين الساعة تلاتة صباح السبت بابا ساب المستشفى عشان
ام زينب ظبطته وهو بيدخن ورمت السجارة من الشباك
طيب اعمل ايه انا دلوقت
بابا بالنسبة لناس كتير شاعر عظيم وحبيبهم ومناضل وووو
وبالنسبة لصحابه صاحبهم
وفيه منهم شايفينه صاحبهم المفيد على صعيد ما
لكن انا واخواتي بابا بالنسبة لنا هو اللي كل اللي لينا في الدنيا بعد ربنا
احنا كلنا بنات وكلنا ما نتخيرش عن بعض في العبط
ومالناش سند في الدنيا دي غيره وكلنا متعلقين في رقبته
وهو كل حاجة لينا
والناس بتتعامل مع بابا على انه ملكية عامة
مع ان انا واخواتي ومراته الوحيدين اللي محتاجين له بجد ومتعلقين في رقبته بجد
طبعا بابا بعد الحقن اللي اخده من صحابه الجمال
اول ما مشيوا قال لام زينب انا ح اشرب سجاير انتوا عايزين تمشوا كلامكوا عليا وتحكموني؟
طيب اعمل ايه انا دلوقت؟
طبعا في البيت ح ينطوا له ويجيبوا له سجاير وما يهمهمش اي حاجة
لان ماحدش يهمه بابا غير بناته اللي مالهمش في الدنيا غيره
واحنا اللي اخدنا الخضة كلها
انا شخصيا قلقت على بابايا كتير قوي طول حياتي
طول طفولتي بابا في السجن وانا قلقانة عليه هو عامل ايه جوة
ولما يخرج
- وللا يهرب -
ابقى قلقانة عليه ليقبضوا عليه تاني
ونفسي اتهنى بيه بقى
حتى لو فيه ناس بتستفيد منه وعشان كده بيسايروه
ياريت يسبوني انا واخواتي ومراته نحافظ لهم على صحته
عشان على الاقل يعرفوا يستفيدوا منه كويس
المهم اعمل ايه دلوقت عشان يبطل سجاير
No comments:
Post a Comment