وح يرجع بقى سي ابليس تاني ينط لنا
وارجع اتعفرت على الناس وابطحهم
وريحة رمضان ح تروح من مناخيري
ليل رمضان له ريحة تانية عمرك ما تقدر تشمها في اي شهر من شهور السنة
وده الشهر الوحيد اللي مش بيجيلي فيه كوابيس
وده الشهر الوحيد اللي مهما حصل باحس فيه بسكينة وراحة
اول رمضان الناس كلها بتبقى متعفرتة ومتعصبة
على ما يبتدي نصه الناس بتهدا وتبقى لطيفة
على الاواخر الواحد بيبقى حاسس كأنه طاير
يمكن عشان كده اوله رحمة عشان الناس بتقى عصبية وربنا بيرحمها
وما بياخدهاش بذنوبها
واوسطه مغفرة عشان يمسح لهم الذنوب اللي كانت في اول الشهر
واخره عتق من النار عشان كده الواحد بيبقى حاسس انه طاير؟
طبعا انا ما عنديش سند فقهي بالموضوع ده عشان ما حدش يطلع لي
زي الخازوق ويقول لي ايه سندك وايه الحديث اللي بيأكد كلامك
دي تأملات صخصية يعني من حقي برضه وللا ايه؟
بس انا زعلانة انه ماشي
حاجة غريبة
اصل انا عادة باجي على اخر شهر رمضان واقول
الحمد لله انستنا مع السلامة بقى الواحد هلك
بس ليه المرة دي زعلانة انه ماشي؟
احساس الطيران ده مخليني مش عايزاه يمشي
ومين ضامن يلحق رمضان الجاي؟
No comments:
Post a Comment