- أمريكا تعيد ترتيب أولوياته وتقرر أن خطر إيران أكبر من خطر الأصولية السنية والقاعدة
أمريكا شايفة إن النظام الإيراني الحالي بيدعم قتل الأمريكيين في العراق
وبيدعم قتل الإسرائيليين في الكيان الصهيوني
إيران دولة قوية وعندها خطة نووية
وده بيهدد إسرائيل الحليف الأول
وياللعجب: نظام الحكم السعودي وهو الحليف الثاني
- أمريكا شعرت بأنها بالغت حين راهنت على العراقيين الشيعة "المعتدلين" وتريد أن تصلح ذلك الخطأ بتغذية الأصولية السنية
حيث تمكن الحليف الثاني لأمريكا وهو السعودية بإقناع الولايات المتحدة أنهم هم الذين حضروا عفريت الأصولية السنة المتشددة
وهم القادرين على صرفه في أي وقت شاءوا، أما بالنسبة لإيران، فنظام الحكم السعودي يرى أن السيطرة عليها أولى في المرحلة الحالية
المختصر المفيد من كل المقال الطويل اللي مليان وقائع وأدلة وشهادات شهود
أمريكا شايفة إن احتواء الأصوليين الخارجين من عباءة نظام الحكم السعودي هو وارد
ولو بشكل مؤقت لحد ما يخلصوا من خطر إيران
إيه هو خطر إيران؟
أن إيران لا تعترف بإسرائيل
وتهدد بمحوها من الوجود
وأنها تدعم حركات المقاومة في فلسطين ولبنان، والعراق، وبالنسبة للعراق دي معلومة جديدة بالنسبة لي
أنا كنت فاكرة إن إيران بتدعم الفتنة الطائفية
لكن مقال هرش بيقول إن إيران: بتدفع فلوس للي بيقتلوا الأمريكان
طبعا موقف أمريكا وإسرائيل مفهوم
مين بقى الحليف الأول للأمريكيين؟
العائلة المالكة في الجزيرة العربية، اللي سموها السعودية كأنها محل بقالة مش بلد
بتعمل إيه العائلة المالكة؟
بتمول الجماعات الأصولية بعلم من أمريكا
بتمول حكومة السنيورة "الموالية لأمريكا" ده هو اللي بيقول كده
بتستقطب التيارات السياسية المختلفة في كل أنحاء المنطقة
زي استقطابها للإخوان المسلمين في سوريا
من خلال تمويلهم
واحتواءها لحماس
بهدف إقصاء إيران و"فكرها الجهادي" عن الصراع العربي الإسرائيلي
وتسييس حماس وإثنائها عن خيار المقاومة
دعم الأصولية السنية في العراق
المقال بيقول: الأمير السعودي بندر بن سطان مهندس المصالح الأمريكية
الولايات المتحدة تنفذ عمليات سرية مشتركة مع السعودية لإضعاف حزب الله وإيران وسوريا
قام الأمير بندر بن سلطان بزيارة إلى طهران كان هدفها اختلاق مشكلة بين إيران وسوريا
إسرائيل والسعودية ينظران لإيران بوصفها العدو الأول
التخطيط لاغتيال حسن نصر الله
محاور التفاهم الإسرائيلي السعودي: أولا أمن إسرائيل
ثانيا تنازل حماس عن خيار المقاومة واعترافها بإسرائيل
ثالثا وقف ما يسمى بالمد الشيعي، والمقصود منه مش الشيعي والسني اللي نعرفه ولكن فكرة مقاومة الاحتلال
رابعا: إضعاف حكومة بشار الأسد
وبيصرح أحد المسئولين الأمريكيين قائلا: ليست قضيتنا هي منع السلفيين من إلقاء القنابل
ولكن قضيتنا هي على من يلقون هذه القنابل؟
علينا أم على إيران وسوريا وحزب الله؟
المقال بيقول إن أمريكا وإسرائيل تقاطعت مصالحهم مع السعودية والأردن
على أساس إن السعودية لها مصالح مع إسرائيل وأمريكا
ولأنها بتضطهد الشيعة في المنطقة الشرقية فهي خايفة انهم يستقووا بإيران ويسيطروا على منابع النفط وطبعا أمريكا مش ح تشم ريحته ساعتها
وطبعا العائلة المالكة ح تبقى في الباي باي ساعتها لأن المقال بيقول إن استمرار آل سعود في الحكم مرهون بانتصار أمريكا في المنطقة
الغريبة بقى ان المقال لا يذكر مصر الا في جملة عابرة لما اشار لنصيحة وليد جنبلاط للامريكان باستقطاب الاخوان المسلمين السوريين
ولو ان ده ح يغضب مصر
على اساس طبعا ان مصر بقت تابعه قفة
المقال كمان ذكر ابداعات سعد الحريري اللي استغل سلطاته لاستجلاب عفو للسفاح جعجع عن قتل رشيد كرامي
وعدد كبير من اللبنانيين
واستغل سلطاته وامواله لاستصدار عفو عن اعضاء جماعة متطرفة - هو اللي بيقول عليهم كده انا مش باحب الكلمة دي - من اللي كانوا بيخططوا لاغتيال نصر الله
هيرش الشهادة لله ولا خايف على السنة ولا على الشيعة
زي ما الامريكان بالظبط لا يهمهم سنة ولا شيعة
هيرش بصراحة شديدة بيؤكد خوفه على مصالح امريكا
وبيقول ان تغذية التيار الاصولي السني الذي لا يقل كراهية لامريكا واسرائيل عن ايران وحزب الله هو مجازفة ولعب بالنار
يعني بيقول بصراحة ان امريكا واسرائيل والانظمة العربية باستثناء النظام السوري مصالحهم كلها في سلة واحدة
ورغم ان ايران بتعادي المصالح الامريكية والاسرائيلية وبالتبعية بتعادي مصالح الانظمة الاعربية المعتمدة اعتماد كلي على امريكا واسرائيل
الا ان محاولة تحضير العفريت الاصولي - على حد قوله - فيه خطورة كبيرة
لان الاصوليين كمان، ورغم كراهيتهم للشيعة الا انهم بيكرهوا اسرائيل وامريكا والانظمة العربية
والرهان الامريكي على ان هذه الحركات الاصولية هي افضل وسيلة لضرب ايران وسوريا وحزب الله
ممكن يبقى خاسر لانهم ممكن، وفجأة ينداروا على امريكا وينزلوا فيها ضرب لما يبان لها صحاب
مش عارفة الكلام ده صحيح وللا لا؟
لان السعودية كتر خيرها بتستصدر فتاوى مفادها ان الجهاد في فلسطين ليس فرضا
وان الفتنة الطائفية فريضة لتطهير الجبهة الداخلية من الانجاس والمشركين من الروافض وعباد الصليب
والمقال بيقول ما معناه ان مسيحيين المنطقة شكلهم كده ح يتفعصوا في النص
وان الحماية الوحيدة ليهم بتجيلهم من حزب الله بس
طبعا انا ماليش دعوة بامريكا واسرائيل
انا ليا دعوة بالاخوة المتورطين في هذه المؤامرة الحقيرة
واللي هدفها في النهاية اننا نموت بعض
الحكومات العربية المذكورة انفا
بما فيهم حماس الهابلة
والحركات السياسية المذكورة ايضا
بما فيهم اخوان سوريا وحزب البعث العراقي
اخص
اخص
اخص
اتفوووووووووووووووووووووووووووووووووووووووه
ده في حال ان كلام هيرش صحيح ويارب ما يبقاش صحيح
وكلامي للبقية الباقية من المخلصين في هذا الوطن
لو مشيتوا ورا حكوماتكوا ح تبقوا زي العراق
العراق الحلوة الجميلة جنة الله على الارض
اتقلبت بقت جحيم
مش عارفة يعني الناس كتر خيرهم يوضحوا لنا مخططهم اكتر من كده ايه؟
دول بيتعاملوا مع المنطقة بوصفها خلاص اتقسمت تقسيم طائفي وعرقي ومذهبي
وعمالين يلعبوا بينا ويبسونا على بعض
وفي الاخر نهاية كل حاكم عربي تعاون مع امريكا واسرائيل وباع الاهل ووطنه وناسه وربه
ح تبقى زي نهاية الشاه وصدام
الله يخرب بيوتهم
الله يخرب بيوتهم
الله يخرب بيوتهم
يعني احنا ما نساويش عندهم اكتر من كرسي حكم؟
هم متخيلين انهم لما يساعدوا امريكا في تدمير المنطقة ح يلاقوا حاجة يحكموها
السؤال اللي عمال يلح على دماغي: ليه؟
ليه يبيعوا وطنهم ودنيتهم واخرتهم؟
ليه بيحكمونا اصلا لما احنا بنكرههم وهم بيكرهونا
بنكرهكوا يا حكام العرب
وبنقرف منكوا
لانكوا كائنات كريهة
ومقززة
انتوا وكل اللي بيتعاون معاكوا باي شكل كان
واشهد ان لا اله الا الله وان محمدا رسول الله
17 comments:
الجواب بسيط يا نوارة، لأنهم مفروضون على شعوبهم من الخارج وليس لشعوبهم لذلك فان ولائهم الأول والأخير للسيد الأمريكي الذي اجلسهم على عروشهم ، ولكن دعينا نتذكر دائما قصة حاكم كان يسمى الشاه وكان جيمي كارتر يسميه حارس امريكا الأمين على الخليح وبعد اقل من اسبوعين على هذه التسمية ،كان شعب ال"حارس الأمين"قد عصف به
لا عزاء للحالمين
هذا باختصار راينا . فلن نبكي مع الباكيين و لن نصرخ مع الصارخين ، كفانا استعراضات . استعراضات محبة و استعراضات عواطف و استعراضات انفعالية و استعراضات وطنية و استعراضات قومية . فالجراح يقوم بعمله و كل تلك الاستعراضات مجــانية .
عندها تصبح المقاومة وطنية حقيقية لصالح وطن هو ملك الجميع و خيره للجميع ستتكون الكرامة التى سيرتجف منها امريكا وامراء امريكا وفوارس خدام البيت الامريكى وطيور الظالم التى تهبش بين الطوائف.
مقال شيمور هيرشى صادق بما يحتوى وهذا المقال نسخة مصغرة بما يدور فى الواقع ومن يستطلع على الصحافة الغربية سيكتشف ان هذا المقال ليس ببعيد عن ما يدور من احداث
الامل فى المقاومة
Hersh in his speech repeated alto the word "fetna "quoting NasraAllah and verymusch sounding like he si convinced
he was saying it isn't just supporting Sunni against shi`ite but also in other places supporting Shi'ite against sunnies
ya3ney turning it in to a fire ball that we ll take us all in its way ,he si concerned it might most probably take USA too ,he has all the right to
tayeb
el mohem we know that now
ha ba2a
what are we doing about it ????????
alzaher
طيب وهم مش بيصدقوا
مش بيصدقوا قول الرسول: اعمل ما شئت فكما تدين تدان
مش بيصدقوا الاحداث التاريخية
مش بيصدقوا غير وعود امريكا بانها ح تخليهم قاعدين ع الكرسي لحد ما يعفنوا
سكرة الملك تاولة دماغهم
حنتكلم
والله كمان احنا مهمتنا ننشر الحقائق وننبه للخطر
وده اقل واجب ينفع نقوم بيه
مش استعراض
بس افضل الجهاد كلمة حق عند سلطان جائر
عايزين يسمعوا يسمعوا مش عايزين يسمعوا يبقى حسبنا الله ونعم الوكيل الله يخرب بيوتهم والبيوت اللي جنب بيوتهم
علا
نعمل ايه؟
اقل واجب اننا نقاوم
مش ح نمسك سلاح انا وانت ونروح نقتل بوش
بس احنا عرفنا اهه المخطط
مخطط تقسيمي طائفي عرقي
يبقى اي واحد يعمل فرقة ما بين المسلمين والمسيحين ما بين السنة والشيعة ما بين العربي والعجمي يبقى عميل
بعلمه وللا بغير علمه
اللي ما يعرفش نعرفه خطورة اللي بيعمله
واللي عارف ما نستجيبش ليه
ده اضعف الايمان يا علا
اننا نتمسك بوحدتنا
مافيش وسيلة للمقاومة بالنسبة للي زينا غير اننا نلزق في بعض ونتمسك ببعض لاخر نفس عندنا
مقال فهمي هويدي في الأهرام الثلاثاء اللي فات عن نفس الموضوع و بقدر كبير من التحليل. سيمور هيرش بالمناسبة هو أول من تحدث عن البرنامج النووي الإسرائيلي و له كتاب كامل عن ذلك نشر في الثمانينات إسمه
The Samson Option
فهو صحفي متميز يتمتع بقدر كبير من المصداقية بعيدا عن حكاية أميريكي و يهودي و التصنيفات دي
هو انا فاهم ومتفهم الفكرة اللي عايزة توصلي لها يا ست نوارة بس المشكلة اني عموما قربت اتنقط من المؤتمرات دي!!
السنة -خصوصاالسلفية- في مواقعهم وجروباتهم بنسمع منهم الكلام ده بالضبط بالعكس، والشيعة في جروباتهم ومواقعهم (وانا مشترك في بعضها) بنسمع منهم برضو نفس الكلام!!
لغاية ما قربت اقتنع انها كلها أخبار بتتسرب لتوجيه الأدمغة، دول عشان يقولوا انه السنة أولياء الأمريكان، ودول عشان يقولوا الشيعة المش عارف إيه..
بالمناسبة يا طنط نوارة، أكيد شفتي الرسالة بتاعت مؤتمر روبرت فيسك عن كون الأمريكان هم من وراء السيارات المفخخة في العراق، الرسالة دي كانت اتبعتت في جروب المخروسة، حدش يتأكدلنا من الأغبار دي؟
دي بجد تبقى نمرة بنت ستين كلب لو الكلام ده مضبوط!!
أنا رفعت يدي على النظام السعودي منذ أن قال : أن بعض الأطراف عليها تحمل مسؤولياتها وعدم التهور في اشارة لحزب الله....
شعب لبنان كان يموت تحت القصف الاسرائيل والسيد خادم الحرمين يقول له انت اللي تهورت موووتووو... يعني الدولة اللي تحتضن أشرف بقاع الأرض بالنسبة للمسلمين تكون اول من تدعم الصهاينة في فكرتهم في حين أن بعض الدول الأوربية التي لا تعرف عن الاسلام سوى أنه دين الارهاب والقنابل بادرت في دعم لبنان ولو معنويا
هذا دون الحديث عن ال 20 مليون حجرة اللي أنتجها النظام السعودي طيلة القرن العشرين أقول أحجار لأن أي سعودي الان مستعد لقطع رأسك ان خالفته في العقيدة.
ارحم دماااااااغك
انت فين يا راجل؟
وبعدين لما باعمل تعليق عندك مش بيطلع ليه انت عامل لي حظر؟
عموما مين اللي جاب سيرة السنة والشيعة
اعضاء المخطط لا سنة ولا شيعة دول خونة
الحكومة العراقية محسوبين ع الشيعة
والحكومة السعودية محسوبين ع السنة
بل ان المعارضة السورية محسوبة كمان ع الاخوان
والبعث الصدامي محسوب على القوميين
لا دول سنة ولا دولم شيعة ولا دوكهمه اخوان ولا دولت قوميين
شوية ناس عندهم شره للسطلة حتى ولو على جثث اهلهم
تالف
يا ريتهم بيدافعوا عن العقيدة
minesweeper
مش عارفة هيرش المهم عنده هو مصلحة بلده
يعني مش حاسة يعني انه راجل مبدئي ولا مهتم بانسانيتنا
هو اللي يهمه مصلحة بلده وشايف ان سياسة بوش بتضر بمصلحة بلده
مش عيب
العيب اننا مهتمين بمصلحة بلده برضه وبنضحي بمصلحة بلدنا احنا عشان خاطرها
للأسف يانواره .. كل كلام هيرتش صحيح .. و معلش سامحينى فى الأخبار الوحشه .. كلام هيرتش مايجيش نصف المؤامره .. مقدر انفعالك و صعبانه عليا فعلا .. زى ما أنا صعبان عليا كل الشعوب المغيبه تماما .. لكن هو ده الوضع و هى دى الحقيقه .. احنا أصبحنا قطعان داجنه جارى سحبها مسلوبة الأراده لخدمة الكيان المتفوق ..
و على فكره .. بمناسبة تعليقك على الزاهر .. أنتى بتهرجى يا مدام ؟ بتسألى لسه هم مش بيصدقوا قول الرسول ؟ رسول مين اللى بتسأليهم عنه يا حاجه ؟
لما تسألى دول عن الرسول تبقى كأنك بتتكلمى بالعربى مع واحد يابانى .. لغتك غير مفهومه و منطقك غير مقبول بالنسبه للحكومات العربيه .. شكلك كده بتهيسى بجد
يا جماعه قبل ما نتكلم عن الحكومات، نتكلم عن الشعوب اللى مصدقاها دى!!!!
أنا إتخضيت لما شوفت الحملات ضد الشيعه فى كل البلاد العربيه مؤخرا!!! قد كده الناس مش فاهمه حاجه؟!! ده الموضوع واضح من سنين، من ساعة ما دخلوا العراق و إخترعوا النسب الطائفيه هناك، لدرجة إن خللوا نسبه للأشوريين!!! أنا كنت اول مره أعرف إن فيه حاجه لسه إسمها أشوريين و مضطهده!!! مع إن لو كانوا مضطهدين يعنى كان زمان خلصوا من بدرى!!
الموضوع واضح من ساعة ما اعلنت "مزمزيل رايس" نظرية الفوضى الخلاقه!! من ساعة مبقت فيه مشكلة نوبيين و أقباط فى مصر!!
كل ده و الشعوب دى مخدتش بالها؟!!! و الأدهى بقى إن لسه عمالين يخبطوا فى بعض!!
كده ضربت فى مخى
تفتكروا اللى حصل فى أفغانستان
أفكركوا
فى البدايه الأمريكان بيساعدوا
الأفغان ضد الروس
و اسألوا رامبو
و بعدين حكمتيار ساد الوطن
و بدأ يأخذ جنب من الأمريكان
فبدؤوا يساعدواالأخ مش عارف اسمه ايه
علشان يبهدل حكمتيار
و بعدين جابوا طالبان علشان
تبعد اسمه ايه أمير الحرب
و كل دى حروب جامده طحن
بتاكل فى البلد و ناسها
و نهجا لمنهج مديرى
لما يقول لى
"و كمان بتقول صباح الخير"
و بسبب تمثالين
احتلوا أفغانستان
و جابوا العميل قرضاى
انتوا واخدين بالكوا
و اللا هو أنا بس
اللى كده
سلام يا نوارة
ازيك؟
انا دايما معجبة بعقلك الجميل وتحليلاتك الذكية
معاك حق في كل كلمة
والمشكلة ان العرب لسة مش قادرين يطلعوا من جاهليتهم ويصدقوا الكلام اللي بقالنا بنزعق وبنقولو ولسة مصرين على الغباء والتعصب وقتل بعض وان "الفرس" عايزين يدمروا العرب
مش لما يبقوا عرب بجد يبقوا يتكلموا
جاتهم القرف كل الزعماء القتلة
وكل عربي غبي لسة مصر يدفن نفسوا بقوقعة الجهل والتعصب
تحياتي ليكي دايما
انا شاركت بالتوقيع عشان الأسرى المصريين
على أمل ان العرب يصحوا بقى من غفلتهم ويتحركوا
Post a Comment