Friday 16 March 2007

مسجونين ومختطفين بلا حدود

الحكومة الصومالية بتهدد الصحفيين هناك بالقتل
ده طبعا غير سامي الحاج اللي خزز في جوانتانمو
وغير الصحفي الانجليزي المخطوف النهاردة
الناس سابوا الصحافة وراحوا للنت
بقوا يتسجنوا
طيب اللي عنده كلمتين بيمغصوا في قلبه يعمل ايه؟
يقولهم في الحمام؟
النهاردة مراسلون بلا حدود عملوا اقتحام لمعرض كانت مشاركة فيه مصر وتونس
وعلقوا بوسترات على جناح مصر وعلى جناح تونس عشان بيسجنوا المدونين والصحفيين
المعرض ده طبعا مش في مصر
ده في فرنسا
معرض سياحي
يسجنوا الناس ويروحوا يسترزقوا يعني
ولهم نفس
عمالة ابص حواليا عشان اشوف مكان واحد فيه حرية صحيح
مش ادعاء حرية مش لاقية
حتى فرنسا اللي سمحت لمراسلي بلا حدود بالاقتحام
يا ترى كانت ح تسمح لمحجبات مثلا باقتحام معرض اسرائيلي احتجاجا على المجازر الاسرائيلية
صحيح مافيش حرية حقيقية في بقعة في العالم
ومافيش حاجة في الدنيا اسمها بالنسبة لنا هم عندهم حرية اكتر
ربنا خلق البني ادم اساسا عشان ده المخلوق الوحيد اللي له اختيار حر
والحرية حدودها تقف عند اذية الاخرين
والاخرين ساعات يستهبلوا
ويقول لك: انت بتقول عز؟ انت اعتديت على حريتي!!! ازاي تقول حاجة تجرحني
اي حاجة، وفي اي حتة
عندنا تبقى وزي ما مجدي الدقاق بيقول: احنا عندنا اقصى سقف للحرية
وتاريخنا بيشهد بذلك
- ايوة قال كده ماهو اذا لم تستح فاصنع ما شئت -
واستطرد مجدي الدقاق قائلا: لكن فيه حدود يعني اهانة رمز الدولة او اهانة الاديان لازم لها وقفة
وانا مش عارفة لما حد يقول رأيه يبقى بيهين رمز الدولة بتاعه في ايه؟
ولما نطالب بالحرية يقولوا لنا: مش احنا بس اللي كده
ده حتى امريكا واوربا فيها قانون ضد معاداة السامية وفرنسا فيها قانون ضد ارتداء الحجاب في المدارس
طيب معلش واحنا مالنا يعني؟
هو مين قال ان امريكا واروربا هم مرجع الحريات
ومدام هم مزيفين ونصابين وكدابين
يبقى لازم نبقى زيهم
اظن كتير عارفين ان كريم اتأكد الحكم عليه في الاستئناف
وكتير عارفين ان تاني يوم فيه قضية لحجب بعض المدونات والمواقع
الحقيقة أنا كنت شايفة تحرك الدولة ناحية النت
وكنت متوقعة خطوة الحجب دي
بس الشهادة لله ما كنتش عارفة انهم مجري ولعة كده
يعني على ايه الاستعجال ده
ما احنا قاعدين مع بعض ح نروح من بعض فين؟
الإخوة اللي كانوا بيأسسوا لقاعدة: كريم عامر يولع بجاز
يا ترى ح يفضلوا يقولوا كده لحد امتى؟
لحد ما يلاقوا نفسهم محجوبين وللا مسجونين؟
ملحوظة: أغبى ناس شفتهم في حياتي اللي بيقولوا: لازم نلعب سياسة
حد يعرف ليه؟
تحديث

اتقبض على عدد من المتظاهرين اليوم ومنهم اتنين مدونين اقرا التفاصيل عند
منال وعلاء

عندي اقتراح

أغنية يا قبضتي دقي على الجدار

نعملها تظاهرة تدوينية وشعار المدونين وكل المدونين يعمموها على مدوناتهم

لحد ليلنا ما يتولد له نهار

الاكواد بتاعتها اهه

كنت أخدتها من غزالي


موجودة تحت


1 comment:

Anonymous said...

مين قال إن دول أوروبا ولا أمريكا دى فيها حريه 100%؟ مفيش مكان فى العالم فيه حريه كامله. أنا بقى فعلا أكتر حاجه بتغيظنى إن دايما بيقارنونا ببره فى الحاجات اللى هما عايزينها و الحاجات اللى إحنا عايزنها تبقى "كخه"، يعنى تقولى عايزين نغير مادة الدستور بتاعة مدة الرياسه، يقولك ليه؟ ما هو فى فرنسا المده مفتوحه!!! و مين قال إنى عايز أبقى زى فرنسا؟ هو إحنا عايزين نقلدهم و خلاص و لا عايزين الشعب اللى نحكمه يبقى مرتاح؟ طيب ما هو فى فرنسا و أوروبا بيمشوا عريانين فى الشارع و بيعملوا مظاهرات و محدش بيقبض عليهم، و بيعملوا كرنفال للمثليين جنسيا، إشمعنا يعنى فى الحاجات دى منبقاش زيهم؟!!!

ليه عايزين نبقى دايما "زىّ"؟ و كل مرة بنقلد ، و اللى بيطلع تقليد مشوه، حاجه من غير طعم و ريحه، بيطلع "مسخ".

يا حكومه، يا بشر، يا ريس، يا بنى آدمين... إحنا عايزين نبقى إحنا، صعبه قوى يعنى الحكايه دى؟
بس سيبونا نبقى إحنا، من غير خطف ولا إعتقالات ، سيبونا نقول إحنا عايزين إيه ، و أتفرجوا الشعب ده ممكن يعمل إيه.