Wednesday 21 March 2007

يا ناس ارحموني


ح ارمي الدش
مش بتاع الحموم
بتاع التلفزيون
وح ارمي الجرايد
واتفرج على القناة الرابعة
وقت ما تطلبنا معاك ع الخط
النهاردة واحد من قلعة الكبش لطم على وشه وهو بيقول: رجعت
لا لقيت البيت ولا الكشك اعمل ايه؟ انتوا الحكومة وانتوا العدل..(بيقول لحسين عبد الغني بتاع الجزيرة) أعمل ايه؟
أولع فيهم وللا في نفسي
طيب
يعني احنا عايزين نتفاهم بقى
ما هو ما ينفعش كده
منطقة قلعة الكبش اللي حسين عبد الغني عرضها وهو بيقول: هذا ليس مخيما للاجئين
تعد من أرقى - إن جاز التعبير - المناطق العشوائية في مصر
يعني الناس اللي عايشة فيها هم "الإليت" بتوع العشوائيات
طيب يعني يا خوانا كده ما ينفعش
أنا ح الحق اقول الكلمتين اللي في قلبي قبل اقرار قانون محاربة الإرهاب
يا سعادة الرئيس احنا عايزين نحل
مش عايزين مشاكل مع سعادتك ولا مع سعادة البشوات
يعني ما ينفعش جوع
وبطالة
وعطالة
وسكن في اكشاك خشب
ومياه بالمجاري او مجاري عليها شوية مية
وطفح لبقية المجاري اللي ما لحقتوش ترموها في البحر
وضرب في الاقسام
وفي الشارع
والناس لا عارفة تقعد في بيتها
ولا عارفة تنزل الشارع
ولا عارفة تشتغل
ولا عارفة تشحت
ولا عارفة حتى تسرق
وكمان تعملوا لنا قانون للي يفتح بقه
يتفشخ
وفشخي سرور يقول: لا بأس بالتضحية بقليل من الحرية من اجل الامن
امن ايه حضرتك؟
اذا كان فيه سفاح
وتحرش جنسي جماعي
وعصابات في اخر الهرم بترفع المواطنين
وتوربيني
ولحد دلوقت الامن ما عملش حاجة في قضية التحرش
واللي بيروح يبلغ عن العصابات اللي في اخر الهرم
البوليس بيقول لهم بالحرف الواحد: لا احنا مش قدهم
وقبضتوا على عشرميت معاق ذهنيا بتهمة انه سفاح المعادي
حتى عصابة التوربيني ما كنتوش ح تعرفوا عنها حاجة
لولا الواد السويسي اللي طق في دماغه فجأة
انه يعترف على نفسه ويبلغ عن زمايله من غير سبب واضح لحد دلوقت
طيب ايه؟
طيب نتفاهم...والله يعني احنا عايزين الخير
احنا بندفع اربعين في المية من دخلنا ضرايب
غير الفكة: ضريبة مبيعات على التليفون
ضريبة على زبالة
زبالة ع الكهربا
والتيتة في الننة
في المقابل مافيش حمام عمومي
مافيش شارع متسفلت
مافيش امن
مافيش اكل
مافيش صرف صحي
مافيش مياه
مافيش ستر
مافيش صحة
مافيش تعليم
يعني ايه المقصود بالظبط؟
لو القصد تطفشونا برة البلد
طيب احنا ما عندناش مانع
هاتوا لنا تأشيرة وتذكرة واحنا نخلع
بدل ما تقارفونا ونقارفكوا
اما بخصوص حرية الرأي والتعبير
طيب وربنا وربنا وربنا كمان مرة
أنا عن نفسي مستعدة اتنازل عنها خالص
ومستعدة كمان اكتب ببلاش في كل الجرايد
عمود يومي اقول : تعيش الحكومة
يحيا الرئيس...بالروح بالدم
ياخد من عمري ويديكي يا روزيتا
في مقابل ان كل مواطن يبقى عنده وظيفة مناسبة لتعليمه وقدراته
وتبقى وظيفة واحدة ومرتبها يكفيه
يعني مش يبقى خريج حقوق ويشتغل الصبح سواق توك توك
وبعد الضهر عامل بنزينة
وبالليل رقاصة
وبرضه ما يلاقيش اللضا
يعني ياريت تبقى وظيفة واحدة ومرتبها
يكفيه انه يأجر شقة ويتجوز فيها
وياريت المرتب كمان يكفيه
انه يخلف ويأكل ولاده كل يوم على الاقل وجبة واحدة
وما يضطرش يضرب مراته عشان ياخد فلوسها
كان زمالن فيه حالجة اسمها
مجانية تعليم
وحاجة تانية اسمها تأمين صحي
راحوا فين الدولتين دول؟ ها؟
يعني يا ريت لو التأمين الصحي يعالج الناس ما يموتهمش
ولو مجانية التعليم ترجع تاني
ويا سلام لو المدارس المجانية كمان تعلم
يعني مش لازم قوي بس على الاقل
خريج الاعدادية يبقى بيعرف يكتب اسمه
ويا سلام لو المرتب كمان يكفي المواصلات
ولو فيها رزالة يبقى فيه حنفيه في المسكن
والحنفية تنزل مية
ويبقى فيه مفتاح نور...مش سلك تلمسه عشان ينور اللمبة
ويا سلام لو لما تدوس على مفتاح النور ينور
وتبقى خدمة جليلة لو يبقى فيه في المسكن صرف صحي
يعني يشد السيفون الحاجات تروح المواسير
مش الناس تعملها وتشيلها بايدها بعد كده
لو كل مواطن يبقى عايش الحياة المرفهة دي
وبالنسبة للاقسام..يعني يا ريت يكتفوا بالشتيمة وقلمين كده
مافيش داعي للعصيان اللي بتدخل في مناطق معينة
انا لا عايزة حرية
ولا ديمقراطية
وان شالله يولع الدستور بجاز وسخ
وفتشونا
ان شالله كل يوم
ان شالله تفتشونا في الشارع وفي كل اشارة
بس الناس تاكل وتشرب وتسكن وتتعالج وتعلم عيالها وما تشيلش شختها بإيديها
واللي يفتح بقه بعد كده
انا اللي ح ابلغ عنه

9 comments:

Anonymous said...

يا ريس يا بن الكلب

يا ريس يا رافع الشعب

معلون ابو اللى يطاطى ليك

يخرب بيت معاليك

..... ويالا باه .. انا جبت اخرى .. ايه القرف ده .. ملعون ابو اهلك على ابو الدستور اللى انت فاكره قماش بدلة .. يا خى غور باه

معلش يا نوارة اصلى لسه جاية من خنائة مع ظابط مرور فى الشارع .. وبعدين انا بتكلم عن الريس اللى كان بيبع حرنكش على ناصية شارعنا ... اوعى تفهمونى غلط يا جماعة

Anonymous said...

نواره حببتشى انت ماشفتيش حلقه امبارح من 90 دقيقه و البنت الى عندها 9 سنين اغتصبوها لغايه ماشلوها مابقتش عارفه تتحرك و كان ابوها برده قاعد فى حته وسخه و مش لاقى لقمه العيش و هاجر من بلده و جه المحروسه و برده مش لاقى ياكل فاكر زى الافلام هايجى القاهره و يغتنى و هو بيقول قاعد فى سكن كله فران وزباله يعنى من الاخر ياريت الحكومه ترحمنا حبتين لاننا خلاص اتفشخنا بجد و مش قادرين نستحمل اكتر من كده يعنى كله راح خلاص و مجانيه التعليم هتتلغى و المرضى الدكاتره بيلطاشولهم فى التامين الصحى و ده حصل اما عين والدتى و هى دكتوره فى التامين الصحى يعنى حاسب من الاخر من الفشخ.يحيى

Anonymous said...

هما كانوا خلفوهم ونسيوهم ولاايه

Anonymous said...

حاجه تقرف بجد...أحسن حاجه أن الغلابه يحفروا لنفسهم حفرة كبيرة و يردموا عليها عشان الحكومه تنبسط

Anonymous said...

ايه ياشيخه دا ياشيخه ياخرب بيت سنينك دا انتي مشكله دا نا لو دفعت الف جنيه في مسرحيه مكنتش هضحك علي بوست بالشكل دا ايه دا دا بوست مسخره وربنا وربنا لو اللي عمل فيلم الكيف كان شاف البوست بتاعك كان لاغي السيناريو بتاعه وكتب البوست بتاعك دا بوست مشكله انا كتبت واحد ابن عمه كده بس بالامانه غلبتيني في خفه الدم وبعدين انتي نسيتي حاجه مهمه اوي علبه السردين اللي بنركبها كل يوم الصبح عشان نروح الشغل والعذاب بتاع الشعلقه والشألطه والمليطه اللي الواحد بيصتبح بيها ولا كأنها سوفت درينك علي الصبح اما بالنسبه للميه والتعليم والشغل والتامين سيبك انتي مفيش احسن من لبن الام ومكتبه ماما سوزان اللي مثقفه الشعب ابن ملاديع ال**ب واخيرا سلامي للحاتي اللي مأكل الشعب الواطي بالجزمه ومخليه مطاطي
أنـــــــــــــــا
www.toto3alakaboto.blogspot.com

Anonymous said...

جبهتنا العاليه

آه لو كات سمعك الحاج مازلو
عارفاه؟؟
الراجل بتاع الحاجات الإنسانيه
و السلالم اللى عملها علشان البنى آدمين
طظ فيك يامازلو و فى سلاليمك
و ألفين سلام و تحية
للمصرى كريم العنصرين
أظن اللى لحنها كان قصده
الماء(الميه) و الطين
النهارده سألت البنت ايناس
(زميلتى تجاره أنجليش و أخصائى استيراد محترم)
ازاى الواحد من الشعب ممكن
يعنى لو ممكن
بعرق جبينه يركب عربيه تبقى بتاعته
قالت لى:
"فتشح مخك"
"أو هج و اطفش بره البلد"
-------------------------
يابلدنا يابلد
آه لو ماكانش فى رقبتى كومة لحم
كنت عملت عمايل
ده أنا كنت مشيت جنب الحيط
و غمضت عنيه
و سديت ودانى
كان زمان فى الستينات
لما يقبضوا على واحد من الإخوان
يخيروه السجن و عذابه
و اللا "تؤيد"
عمو "محمد هلال" أيد
و طلع براءه و ربى ولاده
أبويا عبد الرحمن قال حرام أخالف ضميرى
انطس ثمان حجج و اتربيت يتيم
و أبويا على قيد الحياه
ياااااااااااااااااااه!!!!!!
عارفه ياجبهه
أنا مؤيد مؤيد مؤيد
من غير احم و لا دستور
--------------------------------
أصل الخيل بقت بتجر كارو
و الفار مطلع عنين القط مشمش
والقط مشمش خربش الكلبه لولو
و الكلبه لولو بتقرا فى جرنان مكشكش
و الجرنان فيه خبر.... ياخبر!
حطوا نقطه بدل الفصله
جابو نقطه للمساكين
سلامات ....طيبين

Anonymous said...

بجد بجد موضوع و كلام جرىء
بجد انتي اتكلمتي بلسان اى مصري عايش ف الزمن ده

سعيد بمعرفتك و ربنا يحميكي

و ربنا معاكي و يستر بجد

كريم

Anonymous said...

جميللللللل
التهيس

Anonymous said...

مش عارهف اقول ايه
بس المقال بجد تحفهاجمل من رائع حقيقي
الله معاكي