Wednesday 7 March 2007

وحياة المرسيدس ما تلعبوا اللعبة دي


: معطيات عالمية
الولايات المتحدة الأمريكية وإسرائيل عندهم مشروع الشرق الأوسط الجديد، واللي نشروا خريطته على العالم
المشروع ده بيهدف إلى تقسيم المنطقة تقسيما طائفيا ومذهبيا وعرقيا
قلت لي ليه؟
من باب كلم الـ...الشاطرة، مشيها الشاطرة، تلهيك واللي فيها تجيبه فيك
"انتوا رجالة يعني؟ وعمالين تقولوا احنا رافضين الكيان الصهيوني لأنها دولة عنصرية؟ طيب احنا بقى ح نخلي لكوا المنطقة كلها عنصرية"
طول عمرنا بنقول اسرائيل جسم غريب على المنطقة، بدل ما نشيل الجسم الغريب، نغير طبيعة المنطقة بحيث تتجانس مع الجسم الغريب، هارش؟
لا مش هارش، عشان كيان صهيوني كبير، ودويلات طائفية عرقية عنصرية حواليه، وابقوا ورونا اسرائيل ح تبقى عدو ازاي، هارش؟
يعني بيأيفوا المنطقة على مقاس إسرائيل
: معطيات داخلية مصرية
وضع اقتصادي مهبب بستين نيلة
قانون طوارئ وانا مش ح افسر بقى
نتج عنهما وضع لا انساني ومظالم مهولة تقع على كافة فئات الشعب
واذا الاغنيا مش بيعانوا من سوء احوال المعيشة
فهم بيعانوا من قانون الطوارئ وازمة حرية الرأي
هارش؟
مصر بقالها تلاتين سنة عاملة سلام حكومي مع الكيان الصهيوني وعداء شعبي متزايد ضد هذا الكيان
مصر تتميز بان تكوينها البشري لا يعرف العنصرية
مصر تاريخها بيخليها منتمية لكل حضارات وثقافات المنطقة
مصر كانت نقطة الالتقاء لكل بلاد وشعوب المنطقة
هارش؟
: تحركات غريبة
حركة نوبية بتستعرض المظالم اللي واقعة على النوبيين
أقباط المهجر بيعملوا حاجات معينة كده
اضطهاد الإخوان المسلمين بشكل مريب بيؤدي لتكتيل أتباع الديانة الاسلامية في جهة واحدة واحساسهم بالظلم
شوية ناس مسميين نفسهم المثقفين دلوقت بالذات بيطالبوا بإلغاء المادة التانية من الدستور غير المعمول به أصلا
منع البهائيين من تسجيل ديانتهم في البطاقة عشان هم كمان يتكتلوا في جبهة واحدة بسبب تعرضهم للاضطهاد الحكومي والشعبي
شوية ناس مسميين نفسهم السلفية دخلونا في معركة ما نعرفش عنها حاجة مع الشيعة
: تعقيب
معلش
احنا مش ح نهرج
سوء أحوال المعيشة اللي نوبيين بيقولوا انهم بيعانوا منها، بيعاني منها كل المواطنين في الصعيد، والطبيعي ان فقراء مصر يطالبوا بتحسين أحوالهم المعيشية
مش حاجة غريبة انهم يقولوا النوبيين بيعانوا من سوء أحوال المعيشة، مع إنهم ما يفرقوش حاجة عن أي مواطن في الصعيد؟
ما يعنايه الأقباط هو تماما ما يعانيه المسلمين، وكلهم مواطنين مصريين مضطهدين زي ما البابا شنودة قال، والمفروض إن مطالب الأقباط هي مطالب مواطنية عادية زي مطالب المسلمين بالظبط
مش غريبة إن أقباط المهجر بالذات، دونا عن بقية أقباط البلد يتكتلوا ويطالبوا بمطالب مواطنية بس بوصفهم أقباط مش بوصفهم مصريين؟
تعديل مواد الدستور المفروض لا يتم الا باستفتاء ، وهو ده الطبيعي، مش غريب ان اللي مسميين نفسهم مثقفين وبيدعوا انحيازهم للديمقراطية يوجهوا كلامهم لرئيس الجمهورية بإلغاء المادة التانية، واكرر غير المعمول بها، دون حتى الاشارة لعمل استفتاء عليها؟
وبعدين هو الدستور كله بيطبق؟
اشمعنى المادة التانية؟
واشمعنى بيطالبوا رئيس الجمهورية؟ مش بيطالبوا باستفتاء على المادة التانية؟
واشمعنى دلوقت؟
واشمعنى الحملة دي تتعمل على الإخوان المسلمين اللي الدولة قبل كده بثانية ادتهم فرصة يدخلوا الانتخابات وينجحوا فيها؟
وايه اللي طلع البهائيين دلوقت بالذات؟
ومن امتى بلد الازهر بتتعلم الدين من ناس مش معروف لهم مصدر ؟ من امتى بلد الازهر اللي بتوحد المسلمين وبتأسس لاحترام الاختلاف بين المذاهب والاخذ بها جميعا بتنساق ورا المعارك المذهبية؟ من امتى بلد الوسطية بقت بلد التطرف؟
: استنتاج
الغرض من كل ما يحدث هو تقسيم المصريين إلى طوائف وأعراق ومذاهب
يعني مصر اللي ما تعرفش العنصرية من ايام الفراعنة
مطلوب منها دلوقت انها تتقسم تقسيم عنصري
اضطهاد الاخوان يهدف الى تكتيل المواطنين المسلمين كجبهة واحدة، من خلال شعورهم بالظلم
اقباط المهجر بيسعوا لتكتيل الاقباط لجبهة مقابلة، وربنا يخلي لنا البابا شنودة اللي بيقاوم المخطط ده بكل ما اوتي من قوة وبيتعرض مع ذلك للهجوم من قبل المتعصبين من اتباع الديانتين
وادي النوبيين منهم اللي بيطالب بالاستقلال، ومنهم اللي بيعرض مظالمه بوصفه نوبي مش بوصفه مصري بيتعرض لما يتعرض له كل المصريين من غبن
وايقاع الظلم بالبهائيين برفض الدولة لتسجيل ديانتهم في البطاقة، وعليه فنخلق كتلة تالتة بهائية
مطالبة من يسمون أنفسهم بالمثقفين دلوقت حالا مش قبل كده ولا بعد كده بتعديل المادة الثانية للدستور عشان يقدموا نفسهم بوصفهم علمانيين
الاصرار على خلق الفتنة بين السنة والشيعة عشان حتى لو بقى فيه دويلة اسلامية ضمن الدويلات المطروحة ما يبقاش فيه بينها وبين اي مسلم خارج مصر اتصال غير على اساس مذهبي.
وعليه، وبعد تقسيم المصريين إلى فئات، يبقى من حق كل فئة ان يكون لها دويلة داخل مصر، لان لها بالفعل قاعدة شعبية كبيرة بقى وللا صغيرة مش مهم
سواء الحكومة، أو الاطراف الاخرى ممكن يكونوا مش واعيين قوي للي هم بيعملوه
زي ما محمد هاشم كان بيقول لي: دول اقصى امالهم انهم يركبوا عربية مرسيدس
كان بيرد على تخوفاتي بان امريكا بتخطط لضرب مصر
الكلام ده ما طمنيش، بالعكس ده قلقني اكتر
صحيح كل واحد فيهم أقصى آماله انه يركب عربية مرسيدس ومعتمد على اعتقاد محمد هاشم: لا مصر مش ممكن يحصل فيها كده
ما اعرفش الثقة دي جايبينها منين
على فكرة
العراقيين عمرهم ما كانوا طائفيين ولا مذهبيين، والعائلة الواحدة كان بيبقى فيها مختلف الاديان والمذاهب ومتجوزين من بعض
اما اعتماد البعض على ان الحكومة المصرية حلوة وشاطرة وبتنفذ الاوامر بالمللي
فده برضه اعتماد عبيط
لان الخطة الجديدة بالنسبة للشرق الاوسط الجديد ان يبقى نظام الادارة جديد
يعني امريكا اكتفت من العملاء وخطتها دلوقت انها تدير مصالحها بنفسها في المنطقة
ما حك جلدك مثل ظفرك فتول انت جميع امرك
يعني حتى الحكومة اللطيفة الاميرة دي مالهاش مكان في الشرق الاوسط الجديد
مصر دي....مصر
مالهاش مكان، عايزين يرجعوها زي زماااااااااااااااان لما كانت كلمة مصر تعني المملكة الشمالية
والتانية باين كان اسمها مملكة طيبة
ده غير السواحل
انا مش باحاول اخض حد
ولا كمان باحاول اثبط من عزيمة المعارضين الحقيقيين مش المتأبجين اللي عايزين يعملوا حراك سياسي حقيقي
كل اللي عايزة اقوله
ان اي مطالب سياسية او مواطنية او اقتصادية تتحط تحت اي مسمى غير "مصري" يبقى بتصب في مجرى الشرق الاوسط الجديد
اما بخصوص المطالب الدستورية، فبطلوا تهريج بقى، عشان دي نكتة مش لطيفة خالص وما تضحكش
دستور ايه اللي انت عايزين تعدلوه؟
هو فيه دستور اساسا؟
هو فيه حاجة اسمها تعديلات دستورية من غير استفتاء شعبي على تعديل كل مادة؟
يعني انتوا متخيلين ان تعديل المادة التانية لو اتعمل عليه استفتاء شعبي الناس ح توافق؟ وللا ناويين تفرضوا عليهم التعديل ده؟
يعني البابا شنودة، في حالة الاستفتاء، ح يدي تعليمات ان صوتوا: بلا، فيه ناس ح تسمع الكلام وفيه ناس مش ح تسمع الكلام مش ده المهم
بس ليه كده؟ لعبة الاقباط والمسلمين دي لعبة فيها نار ودم ودمار، ما فيهاش هزار
العربية المرسيدس ح تتحرق لو قامت حرب اهلية، وللا قبل الحرب الاهلية ح تهاجروا وتسيبوانا؟
انا باحب بنت الكلب دي
زي ما هي كده
ويا رب قبل ما تتقسم طائفيا وعرقيا وقبل ما تضربها امريكا اكون مت، مت بكتير قوي وما شوفش اللحظة دي ولا حتى التمهيد بتاعها.
مافيش داعي للمساجلات السياسية والطائفية وكمان العرقية، والنبي حاجة تضحك من امتى عندنا اعراق؟
مافيش داعي للعبة دي، مش هزار، مهما كانت العربية المرسيدس شيك، ومجهزة
مهما زاد الحساب في البنك
اللعبة دي خطر

56 comments:

Anonymous said...

حلو البوست ده يا نوارة ..طول عمري باقول انه الأقباط لو وافقوا يكونوا ورقة بيتلعب بيها ... في نهاية الجيم تتحرق ... ورقة و فقدت دورها
بس أحب أوضح لك نقطه
الأشياء المطلقة غير موجودة مافيش ملائكة و شياطين عالأرض يعني مش كل أقباط المهجر خونه و برضه مش كل أقباط اللي عايشين في مصر وطنيين
أقباط المهجر ده مصطلح أكرهه بشدة
أنا متفق معك علي أنه الدستور لا يعمل به و كل الكلام ده كلام ناس واهمين
لكن برضه كنت أتمني لو في يوم من الأيام عندنا دستور و يعمل به أن يشار الي وجود المسيحيين في مصر فالمادة التانيه فالدستور و أنه يوجد تشريعات مسيحيه في الأحوال الشخصيه و ف أشياء أخري
الأقليات دائما تعاني من وجود مشكلات في كل المجتمعات
و هو ده سبب الديمقراطيه
و تعريف من تعريفاتها
أن يطبق رأي الأغلبية دون أهدار لحقوق الأقلية
لكن تقولي لمين أنه في أختراع أسمه ديمقراطيه النوبيين عندهم مشاكل و الاقباط عندهم مشاكل و الاخوان عندهم مشاكل و القضاة و الموظفين عندهم مشاكل و المهندسين كمان و الأطباء و الصحفيين و المدونين و المعلمين و الصيادلة و عمال الغزل و النسيج و سائقي القطارات و مفتشيها
و عمال النظافة و أهالي الجيزة و أهالي القاهرة و أهالي المنصورة و أهالي الأسكندرية و أهالي المحروسة كلها عندهم مشاكل
مش كل فئة من دول تعتبر أقلية عددية و لازم تطالب بحقوقها
الحل مش بتعديل الدستور أنا متأكد من ده لأنه دي كلها أحلام انا واحد من الناس شايف أنه ألغاء المادة التانية شيء غريب لكن أضافة نص يشير الي وجودي كمسيحي اليها طلب معقول جدا
وعلي فكرة اللي الأمريكان بيحاولوا يعملوه في مصر ده هيفشلوا فيه مش عنتريات و لا حاجه مش المسلمين بيقولوا خير أجناد الأرض و لا أيه ؟ ده غير أنه الكتاب المقدس بيقول مبارك شعبي مصر
يعني أحنا مباركين من الله و لو حصل أيه يا نوارة ما ينفعش يفرقوا الشعب ده لأنه من عرقيه واحدة ... أكيد لو الناس ما فاقتش هيبقي في خسائر كبيرة و المرسيدس أكيد تتحرق :) لكن ده مش هيستمر لو حدث البلد لسه فيها ناس عاقلين كتير
الجنون لم يصل لهذه الدرجة
و الأمريكان مش هينولوا اللي عايزينه بأنهم يفرقوا الأخوات عن بعض هنا طول ما أحنا فايقين لهم
و ربنا يستر

Anonymous said...

Nawara,

Sorry ya Darling, this subject is far and beyond my understanding.....This is too political & complicated..... I'll see you in the donkey shit. This is where I find my true entity.

Anonymous said...

ناس بتضرب ناس
الناس اللى بتتضرب بتتعور
وكل شغلتهم يعيطوا
ضربونا ضربونا
هات ميكروكروم
هات صبغه يود
الحق يا جدع الطوبه اللى جايه من وراك
والزلطه اللى نازله من فوقك

طيب امتى حيبنوا دروع
امتى حيضربوا هم كمان

اقباط ايه ونوبيين ايه
واكراد ايه وتركمان ايه
وعرب ايه وبربر ايه
ما كله نفس الناس وعندهم نفس العدو

ما تركزوا شوية
طيب ما كان عندهم فى امريكا لغايه الستينات سود مضطهدين وعلنا وقانونا ممنوع يخشوا اماكن هم والكلاب

طيب ما فيه تفرقه دلوقتى وزمان فى اسرائيل بين اليهود وعرب اسرائيل وبين اليهود الشرقيين والغربيين والاثيوبيين

اشمعنى احنا مش بنستغل مشاكلهم
اشمعنى احنا مش بنحاربهم بسلاحهم

يا ناس
سيبكم من العياط والشكوى بقى
اعملوا حاجه فى عرض النبى

Anonymous said...

سونيا حيااااااااتشي

موووووووواه

Anonymous said...

هاني

ماهي دي اول سلمة على المصيبة

احنا ما عندناش اقليات

وكلمة اقليات دي في منتهى الخطورة

قول لي يا هاني ايه الفرق بين مشاكلي ومشاكلك

كلنا كحيانين لامؤاخذة

كلنا بنجري ورا لقمة العيش

كلنا ضد اسرائيل

كلنا بنعاني من قانون الطوارئ

كلنا بنطالب بحرية الراي والتعبير

ايه الخصوصية اللي عند مجموعة من المصريين؟

عارف وانا باقرا التعليق بتاعك شفت كلمة اقليات

الدنيا لفت بيا وحسيت اني عايزة اموت

مافيش طبعا ملائكةوشياطين

واساسا المجموعة اياها مديين نفسهم الحق انهم يتكلموا نيابة عن الاقباط سواء في الداخل او المهجر

وانا وانت عارفين المجموعة دي كويس

وعارفين هم ايه

احنا عندنا مشاكل بوصفنا مصريين

مش بوصفك مسيحي ولا بوصفي مسلمة

اول ما حنبتدي نتكلم كده يبقى امريكا في طريقها لتحقيق اللي هي عايزاه

Anonymous said...

harmless

ماهو ده بقى اللي مجنني

الامريكان دول اصلا شوية صيع ومجرمين هربانين من بلادهم واستعبدوا الافارقة والسكان الاصليين وسرقوا ارضهم

وفي الاخر بقوا بلد واحدة

واحنا اللي نفس الجنس ونفس اللغة ونفس التاريخ زي العبط عمالين نقطع في بعض

انا عايزة اعرف بس بص في وش اي انسان مصري

ح تعرف دينه وللا اصله؟

حاجة تقرففففففففففففففف

انا مرعوبة

Anonymous said...

تحياتي لك أولا من قلب الأطلس النابض.
و دعائي لك بالتوفيق و النجاح
مقالك رائع و ضع اليد على الجرح، و لكن أين الدواء؟؟؟
كلما يمكن أن أقول هو أن الظلم ظلمات يوم القيامة

Anonymous said...

الدواء إننا ما نتخلاش عن مطالبنا المواطنية والسياسية

بس عنوان المطالب يبقى مصري

مصري وبس

وكلنا نبقى حاجة واحدة

Anonymous said...

بصى نواره من الاخر فى دول الشرق الاوسط اى وضع بيتفرض على الشعةب يعنى من الاخر الاشتراكيه قامت علشان عبدالناصر فرضها ومن بعديه السدات و من بعديه موبارك اسس الدوله الظلنطحيه زى موضوع العلمانيه و الماده التانيه من الدستور اتاتورك فرض العلمانيه على تركيا بدون اى استفتاء ولااى شىء و قضى على كل معارضيه من الواضح ان دى سمه فى شعوب الشرق الاوسط كل واحد يجى يفرض نظام على الشعب و يروح على بيته ويقعد فى عزبه ابوه الى هى مصر من الاخر طول ما الشعب مش دارى بالحواليه مش هتقوم قومه وواحد هيجى بكل بساطه و يفرض النظام الى عايزه بدون اى استفتاء او خرا زى عبد الناصر و اتاتورك و هلم جره من الاخر لو مافقش الشعب من نومه مصر هتتقسم يا اما تبقى علمانيه يا امى سلفيه يا اما مهلبيه وتحيا جنهوريه نصر العروبيه و الحقنى على قمر الهوا سات الى فيه بتترقص الستات وهى لابسه السلبات وارقص معاهم وانسى الى فات.يحيى

Anonymous said...

dear iam not here to post a dame comment on your writting >> iam here to try to get some of our dignity that you have taken away apart of it >>>
our friends in JEERAN have complaints about what you are posting as comments on their posts >> they are very offensive >>
so please write good words or just shut up >>
my e-mail is
cutevirus2003@yahoo.com
if you have any thing to say >> i wish they will be nice words for once!!

Anonymous said...

اسف طبعا والله مش عادتي اني اتكلم خارج سياق الموضوع

لكن انا قريت الاسم في صفحة التوقيع

نوراة نجم

لذلك اردت فقط التاكد
وهل هناك صلة اصلا بين

نوراة نجم

و

ونوارة نجم

ولا ما فيش

وشكرا

Anonymous said...

ازيـــك
اصلا هما عارفين كويس احنا صغيرين اد ايه وممكن يتلعب بينا وممكن كمان يعملوا بينا مسرح لذيذ اوووووووووى للعرائس لاننا بجد بجد شاطريين اووووى نضيع روحنا
الناس اصلا مش عارفه ولا سمعت عن الشرق الاوسط الجديد والاكثر اثارة الناس مش عارفه ان فى تغيير دستورى بس عارفيين ازاى نتكلم عن المادة التانية وناس شطارة اوووووى والمنح بالكوم عندهم علشان يتكلموا وبما اننا بقى من صعيد مصر ومن اسوان تحديدا انا كمان ليا وجهة نظر عايزين نعمل اسوان جمهورية او ممكن نخلى العاصمة عندنا مش كل الناس عايز تتكلم وخلاص
اشمعنه انا
والله شئ محزن للغاية الدنيا خربانة والناس لسه نايمة فى العسل
كلامى غريب اصلى معدش فاهمة حاجة ولا شكلى هافهم ياريت تفهمنى او تشوفى حد يفهمنى ولكى الاجر والثواب

Anonymous said...

تقسيمات طائفيا مذهبيا عرقيا عنصرية اى كانت كلها امراض يحاولو غرزها ونشرها فى الكيان العربى بالكامل وليس مصر بتحديد
وعندما نكتب في نقد الظواهر المرضية في العالم العربي يجب ان لا نخاف اسماك القرش الفكرية، التي تحاول ان تبتلعنا تحت مسميات جديدة فوضه خلاقة او تقسيمات ايجابيات الخ

يجب ان نستبدل بعض العقليات الموميائية بعقليات منفتحة ،تكتشف مواقع النورفي الامم والشعوب، لتعمل علي توطين ثمار الاصول العربية بمختلف الاعراق والاديان،فلقد شبعنا من الندب، وجلد الذات، كماشبعنا من انتفاخات الوهم
ارجو من كل علماء الدين ورجال السياسة ، ان يفتحوا عقل الجمهور علي الحب والسلام والانسانية وتقديس الابداع والمساهمة في بناء الحضارة واحترام التعددية ،لان هذا الجمهور ان لم يفتح علي الحياة بدلا من الموت، غدا يلتف حتي علي معلميه ووعاظه، وكمايقول غوستاف لوبون الهيبة الشخصية تختفي دائما مع الفشل، فالبطل الذي صفقت له الجماهير بالامس قد تحتقره علنا في الغذ اذاما ادار الحظ له ظهره .
اسف على الاطالة
اتمنى من يسعى لهذا ولكن للاسف الواقع سلبى ومحبط

Anonymous said...

قررررب .....قرررب
اتفرج على عجب العجايب
مولد..... مولد ياولد
مولد و صاحبه غايب
قلت له ايه علمك تسرق
شوح لى بدراعه و قال لى
اصله مال كتير سايب
سألته ايه فرق الصحبه
دول كانوا ايد واحده
دول كانوا بجد حبايب
بص لى من فوق لتحت و من تحت لفوق
و ادانى قفاه ماعبرنيش
من غير حتى مايجاوب
.................
سنى أو شيعى على راسنا
نوبى صباحو ماسكاجينا
قبطى مهجر تبقى تسامحنا
مثقف انسى دستورنا
احنا غلابه و النبى سيبونا
نعيش كده كلنا فى حالنا
...............
طفل رخم و طفله بريئه
ولد شقى و بنت جميله
راجل طيب وواحده ست أميره
جدو خنشور عسل و ستو حيزبونه لذيذه
احنا كلنا عيله واحده
مصرى أنا و هيه مصريه
...............
كلنا مصـــريين
سلامات....طيبين

Anonymous said...

انت ياللي مسمي نفسك صديق جيران

انا مش فاهمة انت بتتكلم عن ايه اساسا

اكيد انت تقصد حد تاني

وعلى كل انت قليل الادب

ما تجيش هنا تاني

Anonymous said...

ادم المصري

اه

Anonymous said...

اماني

على رايك احنا ناس مؤدبة وبنسمع الكلام

Anonymous said...

حنتكلم

باقول لك ده مخطط ما حدش يقدر ينجينا بعد ربنا غير دماغنا

Anonymous said...

الضارب

ما تطلع ديوان

Anonymous said...

خلاص يا نوارة

فى يوم كدا اكون فاضى وافكارى الاستراتيجة نشطة

هعملهم عندى فى البلوج خطة مضادة

Anonymous said...

أة
احنا عندنا دستور
ومن قديم الأزل
ومتغلغل فى الفلكولور المصرى كمان

عندنا

دستور يا أسيادى
أنا جاية لكم الناحية دى
أزعق وأنادى

أشتاتااا أشتوووت



يبقا ازاى معندناش دستور؟؟

=========
طيب قولى الكلام دة بقا للشعب على اللع يعقلون
بدل ما كل واحد يتصب له خلطة جلّة من دى جوة مخه
وهو يقفل عليها ويمشى بيها كأنها قرآن منزل من السماء ويلغى منحة ربنا اللى زرعها تحت فروة راسه
اللى اسمهاا.....اسمهااا
اسمهااا


اة
عقل

تحياتشى

Anonymous said...

إحترمت واحد صاحبي قال لي قبل كده مافيش حلجة إسمها مشكلة مسلمين و لا مشكلة مسيحيين إسمها مشكلة مصرية و بس

و انا قلت لوالدي في مناقشة قبل كده مافيش حلجة إسمها خطر شيعي في بس خطر صهيوني

المشكلة و التهديد بيهددونا كلنا المسدس في متوجه ناحية دماغنا كلنا و كلنا في مركب واحد لو غرقت هانغرق كلنا لا أقلية و لا أغلبيه هاتنفع

Anonymous said...

جميل .. طيب ما انتى صاحيه و هارشه الفوله أهو .. أمال عملتى مفزوعه ليه لما قريت عندى فكرة المؤامره ؟
أكتر حاجه عجبتنى هى يقظتك ووعيك و انتى بتعقبى على تعليق العزيز هانى .. عفارم عليكى بجد .. الخطه بتاعتهم أننا نفكر بطريقة احنا و انتم و دوكهم .. الخطه المضاده بقى أننا نفضل نفكر بطريقة أحنا وبس .. يعنى أحنا كيان واحد .. حتى اختلافاتنا وخلافاتنا ما تفرقناش
الحاجه الأهم بقى .. أنك حطيتى أيدك صحيح على خطه مرعبه .. بس الخبر الكئيب أن الخطه دى ماتجيش واحد فى الميه من اللى بيتعمل فعلا .. الحرب أصبحت حرب على المنطق كله .. من العراق للبنان لفلسطين للسودان للصومال حتى المغرب و الجزاير .. بمكن اللى نجى من المسأله دى أفقر شعوب المنطقه و أقلهم فى الموارد .. موريتانيا .. طبيعى مالهاش لازمه عندهم .. و مطلوب الأحتفاظ بيها كيان قوى يشكل منطقه عازله بين غرب أفريقيا الفرنسى و دول شمال الصحراء
المهم ..راقبى بقى اللى حماس مثلا بتعمله فى فلسطين و هم بيصادروا كتاب تراث فلسطينى بحجة أن فيه ألفاظ خارجه غير شرعيه
راقبى كمان بيان هيئة الأمر بالمعروف و النهى عن المنكر و بالعكس فى السعوديه اللى بيكفروا فكرة معرض الكتاب .. باعتباره بيعرض كتب مؤلفينها غير مسلمين أو زنادقه .. و كمان بيسمح بالاختلاط
و طبعا ماتنسيش اللى بيحصل فى لبنان من تحويل الأنتصار الشعبى الوحيد على أسرائيل لبعبع بيهدد استقرار الدوله الأقرب للتحرر فى المنطقه
و ليبيا و صاحبها العبقرى اللى قرر بعد تلاتين سنه أنه يفكر فى تطوير صناعة بلاده بعد مادفع الفديه عن لوكربى و هو صاغر و لا مؤاخذه موطى .. و فى الآخر طرد عمال مصريين من ليبيا عشان خايف من أنفلونزا الطيور !!!!شوفى .. عندك حق جدا .. اللعبه لعبة عقل .. و الحرب حرب ضد العقل .. و السلاح الوحيد للمقاومه هو بناء عقول الأمه مره تانيه عشان تتصدى للجهل و التطرف و الخداع
عفارم يا نواره
و الله العظيم انتى زى الفل .. بس لو تتحكمى فى انفعالاتك شويه و تراجعى ألفاظك ؟

Anonymous said...

حنتكلم

الخطة المضادة زي ما قلت لك اننا نبقى مصريين وبس لا لون ولا عرق ولا دين يفرقنا

ولو اني متغاظة قوي من حكاية عرق دي

ما لكنا عندنا نفس البلاهة مرسومة على وشنا

ده انا لما باسافر اي حتة تلاقي المصري ح يفضل طول عمره مصري تطلعه من وسط الف

عنينا يا عيني كلها بله كده مش عارفة ليه؟

Anonymous said...

شهروزة حبيبتي

انت اللي ح تفهميني

ح اطق يا ختشي ح اطق

اول مرة تبقى ميولي ديكتاتورية

قعدت النهاردة اقول - رغم اني مش ناصرية خااااااااااااااااااااااااااااااااااااااااالص وبانتقد عبد الناصر - قعدت اقول لو عبد الناصر عايش كان رباكوا يا ولاد الكلب

كان حط كل الفتنويين دول في السجن وظبطهم


وقعدت اتخيل شكل البوكس وهو بيلم ائمة الجمعة اللي بيدعوا على المسيحيين كل جمعة ويشتموا فيهم واللي بيقولوا الاقباط يستقلوا بالصعيد واللي بيقولوا النوبيين يستقلوا بالنوبة ويحطهم في السجن ويعذبهم وقعدت اتخيل وهم بيتكهربوا وبيتشنقوا

وبعدين قلت: ايه ده ايه ده يا بتش يا نوسة؟ انتش اتجننتشي يا بتش

وبعدين استغفرت ربنا وقلت ربنا يهديهم كلهم

Anonymous said...

يحيى

للاسف كلامك اليائس هو الوحيد اللي بيتحقق

Anonymous said...

ادم المصري

وانا باحترمك

Anonymous said...

lastknight

الظاهر حكاية ان جالك الطوفان حط ابنك تحت رجليك دي صحيحة

يعني انا كنت مشغولة قوي باللي بيحصل في العراق ولبنان وفلسطين والصومال والسودان

بس اول ما حسيت ان التهديد جه لحد مصر اتلهيت وبقيت عاملة زي اللي ابنها جوة الحريقة وعايزة تطلعه هو بس ومش مهم عيال الناس

فاهمني

انا عارفة ان التفكير ده غلط

وعارفة ان اللي بيحصل هناااااااااااك توطئة للي ح يحصل هنا

بس الظاهر اللي ح يحصل هنا قرب وللا انا اللي مخضوضة وللا ايه؟

لا مش باتحكم في انفعلاتي

ربنا خلقني كده

بص يا استاذي العزيز

البلد الوسخة دي لامؤاخذة باحس انها بنتي وانا امها

طول عمر الناس تقول مصر هي امي

بس انا حاسة ان مصر هي بنتي

وعشان كده سامحة لنفسي اني اقول عليها البلد الوسخة

المهم

ما حدش بيحافظ على انفعلاته لما بنته بيجي ناحيتها خطر

وللا ايه؟

Anonymous said...

موضوع جديد أتحدث عنه علي صفحتي أتمني منك المشاركة فيه وهو يدور حول الإجابة علي هذا السؤال بماذا تفسر وجود الأديان والعقائد في تاريخ البشر؟؟؟

Anonymous said...

الجبهه العزيزه
رائع شعورك بالأمومه ناحية بلدنا .. و فعلا مستحيل حد يلوم أم بتحمى أولادها .. حطيتى أيدك تانى على حقيقه مفزعه ( بس مش لازم نتخض عشان نعف نفكر) فعلا كل اللى بيحصل هناك من العراق للصومال للجزاير مرورا بتشاد و زيمباوى ( باتكلم جد و الله مش باهرج ) هدفه النهائى أو نقول الجايزه الكبرى فيه هى انهيار مصر تماما .. و بدون مبالغه .. فكرى حضرتك كده كمستعمر عينه على مية النيل .. و امشى بعينك مع الخريطه .. كل دول النيل يسهل جدا السيطره عليها بل و استتباعها ( و ليس احتلالها ) دون أى داع لتغييرات جذريه فيها ألا مصر .. لابد من تدمير الكيان المصرى كله و بالكامل ليتمكن المستعمر أيا كان اسمه من السيطره على دولة المصب .. و صاحبة الحصه الأكبر فى مياه النيل مصر .. بمعنى .. تدمير مصر و هدم كيانها و تفتيتها و ليس تفكيكها .. واجب قومى للمستعمر اياه أيا كان اسمه
يبقى حماية بنتنا الغاليه ( مش بنتك لوحدك ) تبتدى من مواجهة كل القرف اللى بيحصل من بره الأول .. أو عل الأقل قرايته بشكل سليم و الأستعداد ليه.. متفق معاكى جدا .. و مازلت لا أرى طريق سوى أعمال العقل لمواجهة حملة تغييب العقول .. لو فيه اقتراحات تانيه ياريت اعرفها

Anonymous said...

انت متفائلة اوى

مرسيدس اية اللى انت بتتكلمى عليها دى
فى ناس دخلت المناقصة ووصل السعر دلوقتى لكيلو الضمير الحى بحتة وظيفة كحيانة
فراش مثلا
للمزيد ممكن نطلع على حالة واحد زى ممتاز القط او الحمار اللى اسمة الدقاق
ودول مش مجرد فراشين دول نزلوا بالمهنة الى درجة المفرشاتية
وجاية تقولى مرسيدس
طب واللة فية ناس مستعدة تقوم باى دور فى سوق النخاسة المنصوب على اخرة حتى لو كان التمن فيات 128

Anonymous said...

انا سيبتك شوية علشان نفسياوتك تتحسن ومافيش فايده
قوليلى انتى عامله اشترك فى مستشفى ؟
يابنتى روقى مش كده خالص مالص
واعصابك تفلت ليه؟
كله مقدر ومكتوب
انا بس جاى أوضح نقطتين ونفسى ترتاحى شوية من السياسه علشان صحتك اولا
أولا ياستى
الوفد أنضم للرافضين لتعديل الدستور ودى حركه جريئة منه
مكنتش متوقعه يعنى
أصل ليه واحد وفدى قال ان الوفد هايوافق على تعديل الدستور علشان الحزب الوطنى هايفوت ليه مقاعد فى انتخابات مجلس الشورى
طيب أهه الحزب أثبت انه كويس
ويظهر الحكومه قررت ترد ليه الصفعه فيظهر هايرجعوا نعمان جمعه للحزب تانى
مش مهم
المهم ان دلوقتى فى جبهة قوية معارضه تعديل الدستور
الاخوان والتجمع
ألاخوه الاعداء
الاخوان معارض علشان المرجعية الدينية
والتجمع معارض علشان عايز يغير كل الدستور كله مش المواد المذكورة بس
بس كويس أخيرا اتفقوا على حاجه اهه
وانضم الوفد فاضل بقى بقية الاحزاب
لسه كنت برد على الاخ صاحب مدونة ماعلينا (اللى بالعربى علشان فى واحده بالانجليزى)
http://ma-3lina.blogspot.com/
بقوله المعارضه لو نظمت نفسها كويس وحاصل تناغم هايدوا الحكومه درس كويس جدا
تانى نقطه بقى هموا شادين قوى على الاخوان علشان انتخابات مجلس الشورى
ويمكن كانوا مزنوقين فى قرشين علشان كادر المعلمين الجديد

على كل حال أهم حاجه دلوقتى ان المعارضه حتى لو أهدافها مش واحده انها تتوحد على حاجه واحده علشان بس توقف الحكومة
اذا عملوا كده يبقى خلاص فى أمل فى البلد دى

ودمتى بخير وصحة
وأهم حاجه الصحة
وشوفى مارضتش أقولك ان القمر الصناعى اللى ايران طلعته وقع علشان مازعلكيش بس يظهر الزعل بقى هو الطبيعى بتاعك
ربنا يعينك
سلام

Anonymous said...

نوارة
فارس قديم
أنا قصدي بكلمة أقلية أقلية عددية و ليست نوعيه أكيد
طول عمرنا أخوات و هنفضل كده و ده مش بمزاجهم و أعتقد صعب أوي نتفرق طول ما في ناس زيكم فالبلد
نوارة يا ريت تردي عليا فالموضوع اللي بعته ليكي

مصرى
أو بشمهندس يحيي العزيز جدا اللي أنت بتقوله ده كان مقولة سعد زغلول لا توجد مشكلة أقباط توجد مشكلة مصريين
باحترم فيك درجة الوعي اللي عندك
مش لسه باقول البلد بخير طول ما فيها نوعية ناس زيكم يا صاحبي

Anonymous said...

ايه يا بنتي رغم اني عارفة وساكتة الا ان لما قريت البوست والتعليقات كلها الضغط زاد ولا نقص مش عارفة
لكن كفاية أن المواد المطروحة للتعديل تخطت التلاتين
يا لهويي دا نوى يقلبها مراجيح بجد
خلتيني اقول نفس تعليقك عن ناصر رغم اني مش خالصصصصصصصصص ولا أطيق سيرة اسمها الزعيم ولا القائد ولا البتنجان
شكرا البوست قوي

Anonymous said...

رغم انى انا كمان مش ناصرية خاااااااالص
الا اوقات اقعد اقول أهو كان انصر أرحم من الوساخة اللاى احنا فيها دلوقتى
أقله كان رابط زمام كل كلب يطلع يقول احنا أو احنا أو هم

يا بنتشى انتشى مش واخدة بالك؟؟؟
لازم لاصراعات دى تكون موجودة فى مصر يا حبيبتشى
علشان تبقا جو مناسب لاستمرار قانون الطوارىء
وقانون الطوارىء يا حلاوته يا محلاه لواحد زى مبارك وديوله لما يحب يبرطع فى أم المخروبة دى

أهو كل من هب ودب دلوقتى بيتحاكم محاكمة عسكرية حتى لو مدنى

يعنى فى كلمة ونص

الطقم الموجود دلوقتى
مينفعش يتوجد الا بالفساد

الفساد هو بيئته الملائمة
يبقا من مصلحته وجود الصراعات والفساد المطلق دلوقتى

فهمتشى؟؟

تحياتشى بقا

Anonymous said...

عارفه لولا أني بحبك
لكنت بطلت قرايه البوست ده
وجعت لي قلبي وانا نفسي انسي شويه مشكلات المصريين
تعرفي انا عايشه بره مصر بس مخنوقه من كل اللي بيحصل فيها ربنا يعين الشعب الغلبان ده

تعرفي مثلا النهارده الصبح وانا بامر بعربيتي من شارع علشان اروح الشغل لقيت واحد هندي واقف وماسك يافطه مكتوب عليها ستوب ولقيت العربيات كلها وقفت وخلت اولاد مدرسه الشويفات يعدوا الشارع
بجد الدموع نزلت من عيني
وبعدها في شارع تاني سمعت اصوات مرتفه لعربيه الأسعاف ولقيت كل الناس في الأشاره بتوسع لها الطريق علشان تمشي برضه عيط بصوت مسموع وانا بافتكر شكل الفوضي في بلدي
وافتكرت اغنيه شاديه

ياام الصابرين

Anonymous said...

نواره
هههههههه
ههههههههه
أنا بضحك على أحد التعليقات .. ح قولك بعدين
ـ كيفك يا صديقتي
ـأولا وقبل كل شيْ أنا جيت أقولك وانبهك اني احتمال انتحر قريبا ..
بقول احتمااال .. يعني لو لقيتيني هنا بعد فترة .. ماتقوليش انت جبان وضحكت علينا ومش عارف ايه .. بس قلت بحكم الاحترام والصداقة ..لازم أقولك من دي الوقت...ممكن تكوني عايزه توصيني حاجة ...
ـ أما صاحب التعليق صديق جيران .. أعتقد انه جاي من جهة مدونتي ..
وبيقصد تعليقك اللي كتبتيه عندي قبل كام يوم وفي ناس ما فهمته وفسرت ضحكتك غلط ..أعتقد كده .. مش متأكد
ـ أنا كنت متوقع ألاقي عندك مقال عن ابن عمنا بنيامين بن اليعازر اللي قتل هو وفرقته الأسرى المصريين ..قال كان جايي عندكم مصر اليومين دول ..وأجـّل الزياره ليه ؟؟ خايف من إيه ؟ خايف للبوليس المصري يمسكه ويديله علقة ..
ما تقولي حاجة يا نوارة
ـ بخصوص مقالك ده ..انت عارفة رأيي..أنا معاك بكل كلمة وبكل لحظة قلق وخوف .. وبكل كرهي للمرسيدس اللي بفلوس امريكية واسرائيلية وبدم عربي
ـ صحيح يا نوارة . العراق ماكان فيها أي أثر للطائفية والان انت شايفه ايه اللي بيحصل هناك وأي بلد عربي ..قابل انه يصير فيه كده لو لا سمح الله المخطط مشي عليه ..لأنه ببساطة شديدة ..ماكان فيه عراقي واحد يقول ان ده ممكن يحصل في العراق.. وانت شايفه عندنا في لبنان..كنا بنقول لايمكن بقى ترجع ايام زمان والكره الطائفي .. الأمر ما احتاج سوى مظاهرة واحدة ومطالبة بحق دستوري .. حتى ظهرت الأنياب.. وربنا يستر.. دي أمة لايمكن تضمني فيها حاجة ..
مش بقلك احتمال انتحر قريبا ..
ـ هو ينفع انتحار معنوي ؟؟زي القتل المعنوي مثلا ؟.. عشان أكون قد كلامي يعني

Anonymous said...

نوارة
ايه ده انتى غاوى تنكدى علينا ليه يا بنتى المصريين بقوا كده بيضربوا فى بعض وكل واحد بيبص على مصلحته بس للاسف مبقيناش نهتم بالبلد ولا بحالها المهم المصلحة بص


عندنا اجتماع فى الاوبرا يوم الجمعة الساعة 6 بالليل طبعا مش الصبح
كافتريا مركز الابداع بعد مسرح الهناجر لازم تيجى انتى هتنورى الاجتماع انا بقولك قبليها اه بيوم علشان مبيبقالكيش اى حجة

Anonymous said...

نواره
تحليلاتك كلها في الصميم....أمريكا بقت عامله زي الحاوي اللي ماسك الورق كله في ايده و عمال يلعب بيه عيني عينك..يعني شويه الواحد يسمع أمريكا بتأييد الاخوان و بتتكلم عن اضطهادهم و لو مسكوا الحكم حيقولوا مش عاوزين دوله اسلاميه في مصر...و مره تلاقي أمريكا بتدعم بعض تنظيمات أقباط المهجر بهدف تكوين جبهه قبطيه مستقله...و مرة تانيه تلاقي الامريكان بيمهدوا لجمال مبارك للتوريث....ايه الفوضس و العك اللي احنا فيه ده...بصي يا بنتي من الاخر امريكا عاوزاها نار والعه بين كل الاطراف و ربنا يستر
تحياتي لكي

Anonymous said...

ادهم

اه انا عارفة الناس الجرابيع دي

طب ح اقول لك حاجة مش ح تصدقها

فيه ناس بتشتغل جواسيس للامريكان بخمسميت دولار في الشهر

اه وربنا

وربنا كمان مرة

والله والمصيبة انهم بيشتغلوا جواسيس بالنت وعاتشي يعني

بس الشهادة لله الشخصية اللي اكتشفتها كانت بتشتغل جاسوسة بخمسميت دولار ايام ما كان الدولار بستة جنيه يعني

قبل ما ينزل

Anonymous said...

حسن محمود

والنبي انت عثل عثل

وكل الاخبار المهببة دي ومصمم تبقى متفائل

والغريبة ان انت اللي بتجيب الاخبار دي
وبرضه متفائل وعايزني اتفائل

طيب بتجيب الاخبار دي ليه؟ عشان يلسعني

Anonymous said...

هاني

ما انا فهمتك بس احنا لازم ناخد بالنا من تعبيراتنا الظاهر بقى يا هاني اننا ماشيين في حقل الغام

وصلني الميل بتاعك بس لسة بامخمخ

Anonymous said...

راندا

وكاتمة في قلبك ليه يا ختشي؟

غلط على صحتشك

Anonymous said...

شهروزة

ماهي المصيبة اللي مش عارفاها الحكومة ان استمارة ستة امريكا ح تديها لها قريب

بس تقولي ايه حلاوة روح

ادينا ابتدينا نترحم على ايام عبد الناصر

خايفة يجي اليوم اللي نترحم فيه على قانون الطوارئ

يا دهوتييييييييييييييييييي

Anonymous said...

مكسوفة

انت عايشة برة مصر؟ ما اعرفش والله حاجة غريبة كأنك لسة هنا الغربة على فكرة عادة بتغير الروح المصرية بس اللي يقرا مدونتك يلاقيكي مصرية حتى النخاع

Anonymous said...

جو

اولا ما تنتحرش ويا ريت تطلع عيل ومش قد كلامك

وياريت لو بتهزر ما تهزرش الهزار ده عشان انا اعصابي خفيفة

ثانيا موضوع الاسرى المصريين ده حاجة تخنق

من زمان واحنا بنتكلم فيه وما اخدناش حاجة والدولة مش ح تاخد لنا حقنا وانا حاسة ان اسرائيل اذاعت الفيلم ده عشان تذلنا وتنكل بينا

اسرى ايه يا عم اللي من اربعين سنة

ده من سنتين تلات شباب زي الورد واقفين يحرسوا الحدود قتلهم الصهاينة واسرائيل حتى ما اعتذرتش

ح تعتذر عن ايه وللا ايه؟

ومين يعتذر لنا عن تلاتين سنة عزل وكتم واهانة؟

ومين يعتذر لنا عن تلاتين سنة قضي فيهم على زراعتنا وصناعتنا واقتصادنا؟

ومين يعتذر لنا على المجتمع اللي تحول الى الرجل الاخضر بسبب تطبيق بنود كامب ديفيد الاقتصادية والسياسية؟

ده احنا لو بقالنا تلاتين سنة تحت القصف ما كانش الخراب بقى في البلد بالطريقة اللي احنا عايشينها بعد تلاتين سنة تحت قصف معاهدة السلام

اسرى؟

قريت بنود كامب ديفيد؟

عفا الله عما سلف...دي أحد بنود كامب ديفيد

المعاهدة بتجب ما قبلها وما بعدها من قوانين ومعاهدات

يعني حق الاسرى دول ح يتاخد عند ام لالو

ما تعرفهاش انت ام لالو دي

ما جاتش لسة عندكوا في لبنان

ويا رب ما تيجي ابدا ابدا ابدا

ربنا ياخدها اساسا

Anonymous said...

مصر هي امي

ان شاء الله ربنا يسهل واقدر اجي

Anonymous said...

مايك

بص

هو احنا طول عمرنا مش بنجيبها البر

وطول عمرنا ربنا بيسترها معانا

وده اخر امل لينا

Anonymous said...

نواره ....كيفك
أنا معجب جدا جدا بأسلوبك فى الكتابة وكنت بأسأل هل ليكى تجارب فى كتابة السيناريو والحوار للسينما ... لو كانت ليكى الرغبة فى التعاون فى هذا المجال.. فدة هايكون شئ جميل جدا
على فكرة أنا بأعمل فى واحدة من كبرى شركات الإنتاج السينمائى
وأنا شايف إنك موهبة جامدة جدا فى هذا المجال ..وليكى مستقبل بارع إن شاء اللة
ياريت تردي عليا في اقرب وقت علي الايميل ده motazelsherif@hotmail.com

Anonymous said...

موضوع رائع جداً ومناسب للطرح الجاد في تلك الفترة ...

لي عودة للتناقش فيه ...

ارق تحياتي

Anonymous said...

عزيزتي نواره يسعدني تصفح مدونتك الجميله
هم يعملون الان بمبدا فرق تسد والشاطر يفهم ويفوت عليهم الفرصة والا كل الدول ها تتحول عراق

Anonymous said...


اللـــه يا نوارة
من كتر هوسي بالكمبيوتر ظنوا أنني أتحدث إليه
لا يعلمون أن وراء هذه الشاشة فضاء شاسع تتحرك فيه الكلمات لتصنع حياة.

هكذا كان صدى كلماتك،،،
الله يا نوارة

عزت هلال

Anonymous said...

معتز الشريف

نورتنا وانستنا

انا رديت عليك في الميل

Anonymous said...

صاحب البوابة

لو اعرف ان الموضوع ده ح يخليك تزورني كنت اتكلمت فيه من زمان

Anonymous said...

همسات

والله احنا عندنا ناس مننا مجانين بيقولوا : الفتنة الطائفية والمذهبية فريضة على كل مسلم!!!!!!!!! إيه رأيك؟

وبيزعلوا مني لما باشتم

Anonymous said...

استاذ عزت هلال

انا كمان اللي عندي افتكروني مجنونة

عشان لما شفت اسمك عندنا اتنططت من الفرحة