أنا حاطة بوست التوقيعات من يوم 12 مارس الساعة اربعة الا ربع، دلوقت الساعة اتنين وست دقائق صباح يوم 14 مارس يعني فات على البوست ده اربعة وتلاتين ساعة وواحد وعشرين دقيقة، دخل لي فيهم بالظبط الف وخمس مائة وخمسين نفر. ده غير اني بعت البوست ده على المجموعات، يعني حوالي الف وخمس مائة تانين قروا البوس، ما وقعش من حوالي اللي تلات الاف نفر دول غير 147 في الخطاب الموجه للقلل المنتحرة و135 في الخطاب الموجه لنقابة المحامين، يعني حوالي خمسة في المية وقعوا على البيان الاول واربعة ونص في المية وقعوا على البيان التاني.
اللهم لا اعتراض، بس ممكن أعرف ليه؟ وليه هنا مش اعتراض وانما استفهام حقيقي. بجد ليه؟ ح تقول لي البيان مش ح يعمل حاجة، طيب برضه ما وقعتش ليه؟ يعني بفرض ان القلل المنتحرة ونقابة المحامين رموا البيان في الزبالة، برضه توقيعك على البيان ح يضرك في ايه؟ ح يجهدك في ايه؟ في احتمال مثلا تسعة وتسعين في المية انهم يرموا البيان في الزبالة، وفي احتمال واحد في المية انهم يقروه، طيب بلاش، فيه احتمال واحد من مية في المية انهم يقروه، لا مافيش احتمال خالص انهم يقروه، ممكن اعرف برررررضه ليه ما بتمضيش؟ يعني مثلا ح تتسجن عشان مضيت على بيان بيطالب بمحكمة دولية للتحقيق بشأن الاسرى؟
ايه يا شباب، يا رجالة، يا حريم، يا شيوخ، يا كهول؟ فيه ايه؟ مالكوا؟
هم اللي ماتوا دول ايه؟ قطط؟
كلاب؟
دبان؟
ناموس؟
هاموش؟
ما حدش مات خالص؟
ما حدش اتذل خالص ولا اتهان ولا اتعذب؟
يعني ح تقول لي مثلا ما الحكومة بتعذبنا وبتهينا وبتموتنا، طيب نعم؟
يعني هل ده يعفي اسرائيل من جريمتها؟
يعني عشان فيه الف ماتوا في عبارة يبقى مش مهم 250 ماتوا اسرى؟
هو بالعدد مثلا؟
طيب يعني ما دول مهمين ودول مهمين، عدم توقيعك على العريضة ح يجيب حق اللي ماتوا في العبارة؟
بينما توقيعك على العريضة ح ينسينا حق اللي ماتوا في العبارة؟
وللا مثلا دول ماتوا من زمان؟
واحنا قلبنا ابيض
والحي ابقى من الميت
وكلب حي ولا سبع ميت
واللي فات مات واندفن،
ورقصني يا جدع.
فين الغلط؟
انا لو نزلت بالبيان ده في العشوائيات عند الناس اللي ما بتقراش ولا تكتب ح اجمع مليون بصمة.
الاسرائيليين اقل بيان بيمضوا فيه بيبقى مليون.
آه عشان كده ربنا بينصرهم.
والله يستاهلوها، بالهنا والشفا عليهم،
بالهنا والشفا عليهم دم اسرانا،
بالهنا والشفا عليهم دم اطفالنا ونسوانا
بالهنا والشفا عليهم كرامتنا
وارضنا
ومالنا
وغازنا
وبترولنا
وقطاعنا العام
والخاص
والاراضي اللي بيشتروها، بالمناسبة بيشتروا اراضي كتير في مصر، عشان بس ما حدش يقول على الفلسطينيين باعوا ارضهم.
بالهنا والشفا عليهم من النيل للفرات
يستاهلوها،
بيشتغلولها
ما بيستنوش حكومة ما عندهاش ادنى انسانية تتحرك لهم
ما بيسمحوش اساسا ان يبقى عندهم حكومة لا انسانية
وخلينا احنا نمضي ضد الدنمارك
ونرشح سيدنا محمد في استفتاء اهم شخصية تاريخية،
ايه ده صحيح؟
منزلين سيدنا محمد عليه الصلاة والسلام انتخابات؟
وعاملين له دعاية انتخابية؟
ومدخلين النبي المرسل في منافسة مع ماركس وجورج واشنطن واينشتاين وغاندي وهرتزل كمان؟
طيب بقى بمناسبة ازدراء الاديان
هو ازدراء الاديان ده بالكلام وللا بالافعال؟
يعني هو فيه ازدراء لدين محمد اكتر من ترشيحه في استفتاء زي ده؟
هو فيه ازدراء لدين محمد اكتر من الصمت على مذبحة لا انسانية لو كانت مصر عملتها في اسرائيليين كنت انا بنفسي وقعت ضدها وطالبت بمحاكمتها؟
هو فيه ازدراء للاديان اكتر من انك مستخسر – يأسا بقى وللا خوفا – انك تمضي على المطالبة بحقوق انسانية؟
لا بقى ده يارب فعلا ارواحهم تطارد كل اللي شاف البيان وما وقعش.
الساكت عن الحق شيطان اخرس يا شباب
ما تقعدوش تندبوا بقى وتقولوا لنا بنتـ....في الاقسام
ده اقل واجب وعلى رأي المثل...اللي يعلق حبل في رقبته ما يزعلش لما حد يجره منه.
تحديث:
الأغنية إهداء لنتيجة التوقيعات
33 comments:
ويوفق كل المخلصين
جهدك محمود ومشكور واتمنى يا رب يوفقك
الطيب
أنا حسبت السعرات الحرارية التي بيصرفها الانسان وهو بيوقع على العريضة .. طلع حاجة بسيطة كتير ..يعني لا تقارن بأي عمل اّخر ..بقى ما بعرف شو الحكاية يا نوارة ..أنا كمان مستغرب
عزيزتى بالراحة على نفسك وما تزعليش ده العادى واللى البيوت بتربى عليها عيالها الخنوع والذل والمهانة وانا ليا صديقة قالتلى عارفه لو اسرائيل دخلت مصر وجات قعدت فى بيتنا برضو هاشرب الكولا وهاشترى منتجاتهم
والادهى من كده الجمعة قبل الماضى فى صفحة الاهرام الاولى دجاج كنتاكى حقفقت ارباح عالية اوووووووووى تفتكرى ليه علشان الناس عندنا ناس جدعان اوووووووى وليهم فى المقاطعة والله يا اختى انا حاسة قريب اووى هيجيلى انفصام فى الشخصية لانى حاليا بأعيش حالة غريبة عايشة على المدونات اللى بتقول حاجة كويسة والمواقع الاخبارية والناس اللى باعرفهم اسيب الجهاز بس واتكلم مع صحبتى احس اننى فى دنيا تانية
يبقى تتوقعى ايه اااه تقريبا ابدت اخرف صح اسكت على رايهم ايه انتى مجنونة وانتى مالك هتصلحى الكون معدتش فاهمة ولا حتى عايزة افهم
ايه الرغى اللى انا فيه ده
سلام جبتلك صداع معلش بقى
غلبانه و تعبه نفسك والمشكله ان برده مافيش حد هيمضى يعنى من الاخر كده الناس مش مكسله الناس مش هاممها اصلا انها تمضى ودى حقيقه لازم نعترف بيها يعنى المجتمع اصبح سلبى يعنى بدال الضرر ماجاليش خلاص طز فى الباقى يعنى انا الى كنت موتهم الناس دلوقتى هاممها تتفرجلها على قنات الناس ولا ميلودى ولاستار اكاديمى ولا فيلم سكس يبدوا اهتمام كبير مع الحاجات الى فيها شتايم ونميمه و تجريح فى الاخرانا عن نفسى مش مقتنع بحكايه الامضاء بس يعنى انت بعتهالى على المسنجر حتى ذوقيا انى ماكسفكيش مضيت مش عارف يعنى ايه خير الناس خلاص مابقتش بتحس كده بس عموما عادى ده المتوقع من الشعب بعد الصدمه الاخيره الى انا اخدتها فى الشخص المبجل الى انت عارفه مين هو طبعا وكلامه الحلو الموزون ولا اجدعها وطنى خلاص عادى توقعى كل شىء فكرتينى بواحد صاحبى بقوله هو الشعب ده مش هيعمل ثوره قالى ثوره ايه ده اخره يضرب عشره سلام و عاوزين نشوفك.يحيى
بالمناسبه فعلا مافى حدا ولا توجعى فى دماغك من اصله ولا تندهى على حد علشان بخخخخخخخخخخخخخخخخخخ انتهى الامر.يحيى
العدد فعلا قليل جدا
حوالي 195 واحد بس
دة احنا لو بنلم علشان نعمل عملية
للواد محمد عطية بتاع ستار اكاديمي علشان يتقلب راجل
كان نص مصر صوتت ولطمت كمان
اختي الكريمه
مع انى العريضه تخصكم ولكن لو علمنا بها لم
نكن نقصر
على فكرة ليس كل معاض انسان جيد
فمثلا المعارضه عندنا
يترأسها انسان خائن وتضم حزب طالما
خرب ودمر با اسم الدين
عموما جميل العتب بين الاحبه
فيروز علمنا مع من ستذهب اما اما انت فمع من
كوني بخير
حامل المسك
www.mafhm.jeeran.com
هههههههه
عجبني تعليق انا جعان
---
انا شخصيا صوت
يا دهوتــــــــي
بس حد سمع
و لا حيسمع؟
مظنش
عدد التوقعات هيزيد بشكل اسرع من الايام الماضية من الأن
ما لجرح بميت ايلام
يا اختاه
متى ستكتشفين الحقيقه؟
نحن موتى
موتى
كل العرب موتى
كل العرب خرجوا من التاريخ
كل العرب يعيشون بقوانين الموتى مقطوعى الالسنه مبتورى الايدى مشلولى الجسد
لا يغرنك كلمات هنا او هناك
لا يغرنك شرفاء يصيحون احيانا
ليسوا هم العينة المثالية
اذهبى الى النجوع والكفور
الى العشوائيات والخرابات
الى المقاير والجبانات
الى السجون والمعتقلات
انظرى الى القاتل والمقتول
انظرى الى السارق والمسروق
انظرى الى الضارب والمضروب
هذا ميت وذاك ميت
الكل ميت
انظرى الى مبارك وجماله
انظرى الى الوليد وروتاناته
انظرى الى ترك وكلابه
انظرى الى عبد الله وربعه الخالى
الكل ميت
ميت
انظرى الى بلد اطفاله اطفال شوارع
انظرى الى بلد يمد قاتليه بالطاقه ويبنى لهم خطوطه وانابيبه
انظرى الى بلد يقسم نفسه بنفسه جنوبا وشمالا ودارفورا
انظرى الى بلد يقتل الاف من مواطنيه اضعاف ما يقتله محتليه
انظرى الى بلد يحكمه مجنون
انظرى الى بلد يمنع نساءه من قيادة سياراتهم
انظرى الى بلد يلقى ملايينه فى مواخير اوروبا وتحت اقدام عاهراتها
اقسم اننا ميتون
طلبت من بعض المواقع الاجنبية استضافة لينكات التوقيع التى ارسلتها بالتدوينة السابقة , بعضهم رفض والبعض وافق واتأمل فى زيادة التوقيعات
=================================
الصورة التي تنقلها لا أختلف معك عليها فهي صورة صادقة
ومن سنة تقريباً كنت في لندن زيارة للعائلة بتلك الآونة
وكان يردد على مسامعي نفس هذا الكلام وأنه لاحياة لمصر بشكل كنت الوحيد أمام جبهة عريضة تحبطني
وتعمل على كسر شوكة أملي
وكنت كمن يصرخ في البرية
حتى كان ما كان أي نعم الوضع هو من سيء الى أسوأ ,,,,
ولكن صدقني لدي أحساس أن دوام الحال من المحال
حتى لو طال ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, الزمان
وانا أؤمن بمقولة وظاهرة
ان احلك ساعات الليل ظلاما هي التي تسبق بزوغ الفجر ....
يا عزيزتي مع احترامي الشديد و الله
وتقديري بحرقتك علي اهل بلدك و كرامتهم
بس و ليس القصد احباطك
توقيع عرائض شفقة علي الانترنت
او ارسال ايميلات لوزير الخارجية او امين الجامعة العربية او غيرهم
للاسف
اصحابها مبيعرفوش يدخلو عليها ازاي
ولا حتي السكرتارية بتفتحها
و انا اعلم ذللك تمام المعرفة
فقد عملت لاكثر من هيئة سيادية وحكومية و عارف ان الايميل بالنسبة للناس دي
ضرب من الزندقة و فنون السحر
فافضل طريقة لتحريك الماء الراكد هي الوصول للاعلام
كما حدث في برنامج العاشرة مساأ
وللعلم ما اذيع كان بعلم مسبق من الداخلية المصرية
وباذن كمان وتم مراجعة مادة الحلقة كاملة قبل العرض
يا سلام ياسلام عليكي يا نواره مواقف ايه جباره!!! لا بجد والله مشكوره علي كل مواقفك ,بس بصي ان وقعت علي ك الحاجات دي لو اتقبض عليا هاقولهم عليكي ,ههههه
أنا راسلت كل الايميلات الموجوده بس من دلوقتي حبتدي استخدم أكتر من ايميل شخصي في الارسال لهذة العناوين مرة أخري
تحياتي لكي
بصي يا نوارة ... يوم الجمعة الجاية ... شوفي كام واحد مصري ومصرية حيصوت ويؤيد ويعضد ويساند محمد القماح
علشان تعرفي ان هي دي مصر يا عبلة
مش حيوقعوا علي بيان للاسري اللي اسرائيل قتلتلهم
الشباب عندة حاجات اهم
مصر في خطر ... قماح يمكن يضيع
فوقوا بقي
اه صح محمدش القماح صح فكرتنى ده بيقولك البنات خلصت كل رصيدها تصويت علشان الواد القماح يكسب وكمان علشان على السعودى الوهابى لازم مصر دوله الامن والوسطيه تغلبه و تطلعه بارات الاكاديمى امال ايه وده يجى اليوم الى القماح يكسب فيه لقب اهم اكادميه فى الشرق احااااااااا قال برنماج تليفزيون واقع بقى يتقال عليه اهم اكادميه فى الشرق يلا بقى مودرن اكاديمى تحاسب على سمعتها هنا انا مراره امى اتفقعت.يحيى
جاءنا بيان الان من الاخ الرفيق عمرو اديب علي القاهرة اليوم
يناشد الشعب المصري بضرورة التسويت مش التصويت لمحمد قماح ابن الفلاح
بناء علي مئات التليفونات اللي وصلت البرنامج
ابشروا
الأخ طيب
أشكرك جدا على مشاركتك
جو
شفت الهنا اللي انا فيه؟
آه يا خويا الظاهر خايفين يخسوا
أماني
أحسن بكرة يطلع لنا ريش ونكاكي
يحيى
والله لولا الواحد خايف من حساب ربنا كنت كبرت زي ما انت بتقول
أنا جعان
طيب ممكن يصوتوا عشان ملايين الجعانين في البلد؟
الاخ حامل المسك
اشكر مشاركتك، ولو اني واخدة على خاطري شوية من حكاية الموضوع يخصكوا دي، ده اسمه كلام برضه هو اللي يخصكوا يخصنا واللي يخصنا يخصكوا، وللا ايه؟
سمباتيك
لو الصويت عالي وكتير ان شاء الله يسمعوا
حنتكلم
ربنا يخلي تفاؤلك يا رب
لحد دلوقت ما زادش غير مائة وستة بس
هارملس
لا احنا مش موتى بقى، بلاش نقول كده احسن من كتر ما بنقولها صدقناها
ابن ناصر
يا سيدي انا عارفة انها لا مواقف جبارة ولا نيلة وانت شفتني ادعيت بطولة وللا قلت ده موقف جبار؟
اساسا هو ده اللي غايظني، حتة اسم ح تلطعه على عريضة
لو الموقعين عليها الف ح تترمي في الزبالة
لو الموقعين عليها عشرة الاف ح تتقري وتترمي في الزبالة
لو الموقعين عليها مليون ح تخض كل اللي حتوصله
لانهم - وياللعجب - بيتخضوا من الرأي العام يا سيدي
مافيش حد ما عندوش اهتمام بالرأي العام غير الحكومات العربية، عشان هم عيانين مش عشان ده الطبيعي
مايك
يخليك ليا يا رب
انونيمس
عمرو اديب اتكلم على العريضة بجد؟ وللا انت بتضحك عليا؟ والله لو فعلا اتكلم عليها يبقى يستاهل الشكر الكبير، بس يا رب يسمعوا كلامه
وغلاوتك
طالب عمرو اديب الشعب المصري بحرارة شديدة كما ابدي اعجابة الشديد البرنس القماح ابن الفلاح
شكلك متابعة ستار اكاديمي
يا خيبتي التقيلة
اتولدت هابلة
وعايشة هابلة
وح اموت هابلة
انت عارف انا فهمت ايه؟
افتكرتك بتقول لي عمرو اديب طلب من الشعب المصري انه يصوت على عريضة الاسرى
ياااااااااا لااااااااااااهوتيييييييييييييييييييييييييييييييييييييي
بقولك ايه نواره فى حاجه عاوز اورهالك انا كتبتها لو فاضيه ادخلى على المسنجر ولو ربع ساعه عاوز ابعتلك حاجه.يحيى
انا منضم ليكة .. بس موش عارف امضى فين
محمد شحاته
عاجبكم كده؟ حرام عليكم حتجننوا الوليه؟ أمضوا بقى خللى عنكو دم!!
اعتقد ان السلبية باتت ميزه في نفوس المصريين
لم يعد المصري قادر الان علي ممارسة الحياه بشكل طبيعي
كيف له ان يعيش في الديموقراطية وهو الذي لا يعرف معناها
كيف له ان يكون انسان فعال
عندما يتملكه شعور انه انسان مهمش
عالة علي المجتمع
غير منتج
الانسان مصري الان اصح جثه هامده
اظن ان المتكلمين بلسان الديموقراطية
سقطوا في اول امتحان لهم
لم يوقع اي منهم
الخوف مازال يملئ القلوب
الحل الوحيد هو تنقية القلوب
تحياتي
واخيراااا خيتي نواره , موقعك اله فتره ما بنقدر نفتحه و انا افتكرت انه مشكله عنا باجهزة الشغل و البيت كمان
اكتشفت انه لا كل من حاول يفتح البلوج كان يحصل ع كلام للاسف عبري و الظاهر انه بهدله حتى اليوم فتح بصعوووبه جدا الظاهر في حجب عنه او اشي والله اعلم
المهم الشباب هون عنا استحمسوا للفكره و نزلو بشعار امنح من عمرك ما شئت لمن شئت لكن لا تنسلى من منح عمره للقضية ... و انت القضية
و بالتوووووفيق و معكم تحياتي
و ما تستغربي التجاهل للعريضه لانه لسوء الحظ تزامنت العريضه مع ضروره للتصويت لطلاب ستار.... بطيخ
تحياتي
نوارة
هاي
حبيت أمضي و أرمي السلام
لا تعليق على أي شيئ
فكما الارض تعاني احتباساً حراريا
أنا أعاني احتباساً كلامياً
ههههههههههه
كان الله في عونك
cehata
تمضي فين ازاي؟
اسم الله على مقامك في البوس اللي تحت البوست ده
اشكرك مقدما
believer
انتش فين يا خويا سايبني كده لوحدي
ادم المصري
بلاش ابوس ايدك البرمجمة العصبية السلبية دي
لما نقعد نقول احنا ميتين ح نموت فعلا
ولما ينتشر الاعتقاد باننا شعب جثة هامدة ما حدش فعلا ح يعمل حاجة
انا فيه اتنين كنت ح احب على جزمتهم وما رضيوش يمضوا عشان: ولااااااا ح تعمل حاجة ولو انا مضيت غيري مش ح يمضي...يبقى على ايه؟
بلاش كده والنبي
ندىىىىىىىى
بيطلع لك كلام عبري من مدونتي
اشتاتا اشتوت
امشي يا عفريت
اعوذ بالله من الخبث والخبائث
ربنا يقطعها لغة هي ودولتها
لولا
عندك احتباس كلامي؟
عاجبكوا كده خرستوا لي صاحبتي؟
انا رفعت جزء من وثائقى قتل الاسرى المصرين شكيد عندى فى البلوج
بصيغة WMV
لليحب يحمل
أنا أكتر حاجة بتعجبنى فيكى إنك مقبله على الحياة!!! أقبلى كمان و كمان!!! :)
أدم المصري:
فيه مثل أنا مقتنع بيه " لا يستطيع ظلام العالم بأكمله أن يطفئ ضوء شمعة واحدة"
لو يأسنا، أحسن لنا كل واحد يروح يقف فوق قبره لغاية متيجى ساعته
خيتي نوارة , قبل شوي بحكي مع زميل الي ايام الجامعه زميل قبل عمر يعني ,, المهم بخبره عن العريضه ضحك و قالي لمين نوقع ما شوفي الحكومة اكم من شب اعتقلت لانهم محجتجين ... هل رح يكون المجتمع الدولي ارحم من الحكومة ... لما حكيتله اه استغرب و حكالي انتي لساتك مجنونه .... ع كلن انا ما استغربت الاعتقال و من ضمن الي اعتقلو اشخاص بعرفهم و بحترمهم و بتنمى انه ينصلح الحال
هو حالنا مش رح ينصلح؟؟
شكرا على التجاهل والتعتيم
بصي ياستي الموضوع لا هو سلبية ولا سعرات حرارية ومجهود ولا حتي ستار أكاديمي انتم مافكرتوش أن الموضوع بمنتهي الوضوح أن الممتنعين عن التوقيع فهذه العريضة وماشابهها وأنا منهم ع فكرة لا يعترفون أصلا بهذه المنظمات والنقابات و الأمور الوهمية دي بصراحة احنا ف عالم لا يحترم أو يعترف إلا بالقوة والقوة فقط هي الي بتجيب الحقوق الضايعة مش العياط والشحتفة علي أعتاب المؤسساتوإلا لو أنا غلطان تقدري تقوليلي حزب الله مضوا كام عريضة زي دي عشان يستردوا أسراهم ولا الشعب الأوكراني أو الجورجي صوت كام مرة ع النت قبل مايطلعوا بثوراتهم البرتقالية والفحلقي بلاش الأيام دي هو الخميني قبل ما هو والشعب الإيراني يقعوا الشاه من علي عرشه انضم لنقابات ولا رفع قضايا فين ؟؟بلاش ده وده إسرائيل نفسها مابتدتش الصوت العالي والضغط ع الرأي العام إلا بعد ما دخلوا فعلا بعصاباتهم وظبطوا مع إنجلترا ورستقوا نفسهم تمام التمام بعد كده مش قبله ابتدوا يبعتوا إيميلات ويلعبوا لعبة الرأي العام
ما أود أن أقوله ياست الكل أن القضاء والقانون والنقابات وخلافه دي أسلحة في لإيديهم و موجهة لصدورنا مش العكس وعايزك تبصي ع تسعة أعشار القضايا اللي ليها علاقة بالسياسة وحتي العشر الباقي الي بيحكم فيه غصب عنهم قاضي بيخاف ربنا بيرمو الحكم ف أقرب صفيحة زبالة وقضية خيرت الشاطر أقرب مثال ده بالنسبة للقضايا ونقابة المحامين أما الأمم المتحدة والمحكمة الدولية فأنا عارف انك بتحبي تهزري وبصراحة اعتبرتها نكتة حلوة منك هههههههههههههه
ختاما ومن غير إحباط أكتر عايزين فعلا نفكلر ف أساليب عملية عشان ناخد حق أمواتنا وأحياءنا اللي ميتين بالحيا ف البلد دي وسيبك من مواضيع التصويتات والإستفتاءات والقضايا والعالم الوهمي الي هما عايزينا نندمج فيه وهما يعملوا الي هما عايزينه وأخيرا الخلاف ف الرأي لا يفسد للود قضية ولكي خالص إحترامي ومودتي علي مجهودك وإخلاصك الذي لا شك فيه
النهاردة 19 و فات 5 أيام أو أكثر و لسه 408 اللي وقعوا بجد أنا مش فاهمة و الله بس حسبنا الله و نعم الوكيل
و كمان العريضة بتاعة المحاميين من غير auther
وكمان هتتلغي لو الراجل اللي كتبها لم يكمل البيانات
طيب نعم
ايه بقى نعم فيه ايه؟
هو صحيح مفيش فايدة
Post a Comment