أنا طبعا مدمنة حرية رأي
ومش شايفة أي سبب أو مبرر يخلي "البيني إيدمين" على رأي اللمبي
يصادروا على بعض ويمنعوا أي إنسان إنه يعبر عن نفسه
حتى لو بيقول كلام حقير
زي مثلا إن واحد مؤمن بدولتين دولة صهيونية ودولة فلسطينية
أهو ده بيني آدم حقير
بس هو حر
عايز يبقى حقير يبقى حقير
وأنا ليا أسبابي إني أقول عليه حقير
وأسباب موضوعية جدا
يعني مثلا المؤمن بوجود دولة صهيونية ده حاجة من اتنين
يا إما بيني آدم عنصري، وموافق على الفكر العنصري الصهيوني
وأعتقد إن أي حد عنصري أكيد حقير يعني
وللا دي بقى كمان عليها خلاف؟
يا إما بيني آدم منسحق ذليل شايف إن العنصرية حاجة مقرفة
بس بقت أمر واقع، وبيتعامل بمنطق الأمر الواقع
والحقيقة بقى إن مافيش أحقر من العنصري
غير اللي بيتعامل مع ما هو ضد مبادئه بوصفه أمر واقع
يعني أنا آجي أحط على راسك براز حمير مثلا
وأكتفك ويفضل البراز على راسك خمس ست ساعات
لحد بقى ما تاخد على ريحته وتتعامل معاه على إنه أمر واقع
وحتى بعد ما أفكك تمشي وبراز الحمير على راسك
والناس تقول لك يع
تقول لهم ما خلاص ما هو بقاله يجي يومين على راسي بقى
لازم أتعامل مع الأمر الواقع
وأما تيجي تسرح شعرك تحافظ على دايرة البراز اللي على راسك
ماهو أمر واقع بقى
وتبتدي تغير القيم اللي انت طول عمرك مؤمن بيها
واللي تتلخص في إن براز الحمير حاجة مقرفة
وريحته وحشة وما ينفعش يتحط ع الراس
ولما يجي واحد يقول لك كده
تقول له: ما تبطل الكلام العنتري ده
واتعاملوا مع الأمر الواقع
وبطلوا بقى تقول لنا ثوابت
مين قال إن براز الحمير ريحته وحشة
بالعكس إحنا لينا مصلحة في إن براز الحمير يبقى على راسنا
ولعلمك براز الحمير بيطول الشعر وبينعمه
وبعدين لما بينشف على راسك بتاخد عليه ويبتدي يخش في مسام الراس
وح يخليك أذكى وأنبه بكتير من دماغك دي
إنما تقعد تقول لي أنا إنسان وما ينفعش أحط على راسي براز حمير؟
ده كلام عفى عليه الزمن
بطلوا الشعارات دي بقى
إنت كمان لازم تحط براز حمير على راسك
لأن براز الحمير خيار استراتيجي
ما احنا عشنا طول عمرنا رافضين براز الحمير يتحط على راسنا
عملنا ايه غير إننا اتكتفنا واتهانا واتبهدلنا وفي الاخر برضه حطوا براز الحمير على راسنا
مش لو كنا قبلنا من الاول اننا نحط براز الحمير من غير مقاومة
كنا حظينا بشروط أحسن من دلوقت؟
مش يمكن مثلا كانوا سبخوه
طب احنا بقى احسن واللي الراجل الامير اللي حط براز الحمير على دماغه طواعية
ياريتنا كنا سمعنا كلامه
اهم سامحين له انه يحط برفان عشان يخفف من ريحة براز الحمير اللي على راسه
احنا ولا حتى مسموح لنا نستحمى
مع اننا وعدناهم اننا نلبس بونيه عشان براز الحمير ما يتشالش من على راسنا
لبسونا البونيه وما رضيوش يخلونا نستحمى
وكانت النتيجة ان براز الحمير اللي على راسنا كمكم
وعفن
وريحته طلعت أكتر
التاني بقى اللي حط براز الحمير على راسه بالمحادثات
سايبينه يحط راسه في الشمس
يا بخته
البراز نشف على راسه وما كمكمش
احنا بقى ح يفضل البراز طري وبيسيح على وشنا وريحته بقت مقرفة
بس برضه الحمد لله
احسن ما يدهنوا جسمنا كله بيه
تيجي تقول له ثوابت يقول لك: مافيش حاجة اسمها ثوابت
ده كلام متخلف
العالم كله بقى متبرز دلوقت
وانت اللي مصمم تتحنتف لي؟
والله اللي بيتكلم بالمنطق ده هو حر
يعني ما ينفعش تسجنه ولا تقتله ولاتشنقه
بس السؤال بقى اللي بيطرح
هي ايه حكاية ضرب الثوابت المتتالية دي؟
وليه كل اللي بيضرب ثوابتنا بيبقى فخور قوي
يعني ايه الشجاعة في ضرب ثوابت أمة بتاخد بالقباقيب والشباشب من كل حتة
وكل واحد فيهم عامل لي ثوري وراجل
شوية يشتم في ربنا وفي الأديان
شوية يشتم في وحدتنا الوطنية ومشاريعنا القومية
شوية يمتدح إسرائيل وأمريكا
يعني مفهوم إن دي ناس عايزة تلحق لها لحسة من قعر الطبق
وشايفة العالم كله نازل علينا بالجزم
وعايزين يلهفوا لهم قرشين
وفيه ناس مش عايزة تلهف قرشين
بس عايزة تعمل ثورية ببلاش
عايزة تبقى متمدنة ومتحضرة
وبما إنهم متخلفين فعلا
وبما إن الخواجات اللي عنيهم زرقا وشعرهم أصفر الشيك بيقولوا الكلام ده
يبقى أكيد هي دي الثقافة والحضارة
ثقافة خرا الحمير وحضارتهم
ويبقى ماشي فخور قوي انه على راسه براز حمير
ولما تقول له : إخص الله يقرفك
يبص لك من فوق لتحت ويقول لك يا متخلف
يا رجعي
عايزين ترجعونا لورا
أيام ما الناس المتخلفة كانت مش بتحط خرا حمير على راسها
اللي يغيظ في ده كله
مش اللي حاطط خرا حمير على راسه
الناس اللي بتعمل باللو وهيصة وبوليكة عشان تسجن وللا تفرق صاحب خرا الحمير عن مراته
ويقعدوا يصرخوا
سنتصدى لخرا الحمير
لن نسمح بأن يسير واضع خرا الحمير على رأسه في الشارع
الله
يا سيدي ده خرا حمير وانت مش عايز تحطه على راسك
ما تحطوش
لو شفت واحد حاطه على راسه ابعد عنه
اشتمه
تف عليه
قول له: إفففففففففف
حاول تنصحه بالحسنى
ان شالله ترجع في وشه
لكن عايز تقتله وللا تسجنه ليه؟
مش كفاية ان على راسه خرا حمير وكمان فخور بيه
وفجأة تلاقي واحد جايب أي حد من اخوانا بتوع خرا الحمير
وماسكه من قفاه: ياللا ياد بينا ع القسم
عملك إيه؟
حاطط خرا حمير على راسه
وانت مالك؟ هو حطه على راسك انت؟
يعني إيه؟ ماشي بخرا الحمير على راسه في الشارع؟
وانت مالك؟
وفجأة يتحول صاحب خرا الحمير إلى بطل قومي
ويبتدى كل أعضاء قبيلة خرا الحمير ومعاهم شوية ناس عندهم الحس الأدنى من العدالة
يا سيدي وانت مالك؟ فيه حد بيسجن واحد عشان حاطط خرا حمير على راسه؟
يا سيدي تجاهله ولا كأنه موجود ابعد عنه
والتاني: أبداااااااا يا يشيل الخرا من على راسه يا ح اقتله ح اقتله
ويتحول خرا الحمير الى قضية للنقاش
والطبيعي إن الناس تتعاطف مع الراجل اللي حاطط خرا الحمير على راسه وماشي في حاله
والطبيعي إنهم يبتدوا يسألوا يا ترى ليه حاطط خرا حمير على راسه
ما يمكن يا جماعة خرا الحمير حاجة كويسة
ما تيجي نجرب
وفجأة نلاقي البلد كلها ماشية حاطة خرا حمير على راسها
وكل واحد بيقول وروني بقى ح تعملوا ايه فيا
ما هي بطولة ببلاش وجاية له على الطبطاب بقى
وكل ده بسبب الحشري الغتت اللي هو راخر عايز بطولة ببلاش وبيتشطر على صاحب خرا الحمير
وهو أساسا محطوط على راسه خرا بقر وخنازير كمان
لامؤاخذة
15 comments:
منهجك غلط .. مش معنى أن حد اختلف معاكى فى الرأى يبقى تسفهى رأيه أو تحقرى شخصه ..و ألا بتديله الحق هو كمان يعبر عن رفضه مش لرأيك بس .. لكن بتسفيه شخصك .. المنهج مغلوط ,, و اتباع المنهج ده من أساسه كان سبب رئيسى فى تخلف العرب بوجه عام .. يعنى مثلا بنرفض الأحتلال .. ده شىء جميل .. بس نرفض كل أشكال الأحتلال .. زى احتلال مصر لليمن .. أو احتلال ليبيا لتشاد .. أو احتلال العراق للكويت .. و ده على سبيل المثال .. لكن لأننا بنسيب المبدأ و نركز فى معارك أشخاص .. تلاقينا بقى بكرهنا الطبيعى لموشى ديان مثلا و تقديسنا لعبد الناصر و القذافى و صدام .. نقوم نرفض احتلال و نقبل احتلال مثيل برضه ..
منهج المعارضه ليس الهجوم على الشخص أطلاقا .. لكن مواجهة التفكير بالتفكير
لو أديتى لنفسك الحق تقولى على أنسان أنه حقير .. لازم تستحمليه لو قال عليكى كلمه قبيحه .. لمجرد اختلافه معاكى فى الرأى
ااااااااااادم المصرىىىىىىىىىىىى
لا بجد أنا النهاردة امي داعية لي
شوية زيارات زي الفل
نورت بجددددددددددددد
خلاص يا اختنا
لكم دينكم ولى دين
بس افكرك
انى باكره اسرائيل وامريكا والعنصريين والملحدين والمرتدين الخ
مثلك واكثر
وكلامى على الاسلوب لا المبدأ
ارجو الا تكونى فهمتى غير ذلك
واذكرك ايضا ان الشتائم لا تحتاج ثقافه ولا فكر ولا منطق ولا حجه ولا اى شئ
واى انسان يستبدل المنطق بالشتائم مش حيلاحق على الردود
ومؤكد لن يستفيد احد
تحياتى
من غير ما الدمعه تفر من عينيك
ومن غير هابش ولا مهبوش
lastknight
معلش أنا مش معترضة على اعتراضك على منهجي
انا بس عايزة اعرف ايه دخل حرب اليمن وموشى ديان وعبد الناصر في الموضوع
بالمناسبة يعني انا مش باحب عبد الناصر مش لسبب غير لاني باكره الظلم
سواء اللي قام بيه عبد الناصر او موشى ديان
بالرغم من ان عبد الناصر له انجازات انا ما اقدرش انكرها
وبالرغم من ان ما حدش يقدر يزايد على اخلاصه
بس انا مش باشوف تبرير للظلم حتى لو اللي قام بيه خالد بن الوليد نفسه مش بس عبد الناصر
وباكره الاحتلال سواء من مصر او من السعودية او من امريكا
واسرائيل مش احتلال ده كيان عنصري
وانا باكره العنصرية
سواء كانت عنصرية عربية او عبرية او شرقية او غربية
ايه دخل ده في اني شايفة ان الانسان العنصري حقير
لا حقير
سواء عنصري عربي او عبري
وانا حرة اشوفه حقير
وبعدين مين قال لك اني مش باتشتم؟
انت مش بتشوف المدونة وللا ايه يا باشا
ده انا باتشتم ع السبحة
ومش بامسح غير الالفاظ اللي ممكن تخدش حياء القراء
او لما قارئ يشتم قارئ تاني
لكن الشتيمة كلها باسيبها
عاتشي يعني
ويا اما ارد
لما يبقى ليا مزاج
لكن لما ابقى محتقرة البني ادم خالص مش بارد عليه اساسا
على فكرة
زمااااااااااااااان
ايام شبابي
كنت باقول : مش من حقي احقر انسان حتى لو اراءه وتصرفاته وكلامه حقير
في النهاية هو انسان وده لوحده يستحق الاحترام
بس الحقيقة بعد بقى ما كبرت وعاشرت ناس فعلا حقيرة لقيت اني لا من حقي لما انسان يبقى له اراء حقيرة وتصرفات حقيرة وكلام حقير اني اقول عليه حقير
والا اللي بيعتمد العنصرية كمبدأ له في الحياة سواء النازيين الجدد او الصهاينة او حتى بعض العرب ده يبقى ايه غير حقير
يعني اللي يتهياله ان ربنا نقاه هو وشوية ناس معاه وميزه بالميلاد عن بقية خلق الله مهما كان هو شرير ومهما كان غيره طيب ده يبقى ايه غير متخلف وغبي وحقير؟
وبعدين يا سيدي انا لا طالبت بسجنه ولا بقتله مثلا
انا قرفانة منه من حقي
وللا ايه؟
وانا لا باحتقر جنس ولا لون ولا نوع
انا باحتقر اللي افعاله حقيرة
ومش بارد عليه اساسا
واحد مثلا يقول لي: الفتنة الطائفية دي احسن حاجة حصلت لنا واحنا لازم نعمل فتنة طائفية ونموت المختلفين معانا عشان نطهر مجتمعنا من المنحرفين في العقيدة ولازم نزكي الفتنة الطائفية على قد ما نقدر لو كنا فعلا عايزين ندخل الجنة!!!!!!!!!!
طب انا بقى باسألك
ده اسمه ايه؟
ده يترد عليه بايه؟
ما تقوليش غبي ولا متخلف
ده واحد بيقول "الفتنة" الطائفية
وهو عارف قول الرسول الفتنة نائمة لعن الله من ايقظها
لكن بيأولها بطريقة تخدم مصالحه
يبقى ايه ده؟
حقير ده وللا مش حقير؟
اللي يضحي بأهله عشان شوية دولارات
حقير وللا مش حقير؟
انا عن نفسي ما عنديش استعداد اهدر طاقتي في اني اتناقش معاهم
ولا كمان اعمل منهم ابطال واضطهدهم عشان يعملوا شهدا على قفايا
وده رايي يا اخي
مش بااااااااااارضه
موضوع جديد أتحدث عنه علي صفحتي أتمني منك المشاركة فيه وهو يدور حول الإجابة علي هذا السؤال بماذا تفسر وجود الأديان والعقائد في تاريخ البشر؟؟؟
الفتنه أشد من القتل ده صريح النص القرآنى .. و بالتالى السعى بالفتنه على أساس عنصرى هو معادل أن لم يكن أشد من القتل .. أسرائيل كيان عنصرى .. صاحب الفتاوى بتكفير من هم ليسوا من جماعته عنصرى .. لو التصريح اللى اتقال على الأنبا بشوى فى أنه منع المسيحيين يتبرعوا بدمهم عشان المسلمين مايجريش فى دمهم دم المسيح .. لو التصريح ده صح يبقى بشوى عنصرى ..
و العنصريه أشد من القتل .. متفق معاكى جدا .. لكن أذا كنا أحنا اللى بنطالب باحترام الأنسان لمجرد كونه أنسان .. حتى لو اختلفنا معاه فى الرأى .. مش أدعى بينا أننا نكون قدوه فى الأختلاف و الخلاف ؟
مسألة الطواغيت اللى ذكرتهم من عبد الناصر للقذافى لصدام كلهم عملوا نفس الغلطه .. أختلفوا فى المبدأ مع أشقاء ليهم .. و هاجموهم و احتلوا أرضهم ..
و مش مشكلتى القاده الطواغيت .. لكن مشكلتى هى المرض الأجتماعى اللى شعوب الطواغيت دى عانت منه .. يعنى كل شعوب الطواغيت ببساطه قبلت تعتدى على آخرين لمجرد تعاطفهم مع القائد الطاغوت .. مع أنهم فى الحاله دى كانوا فى منتهى العنصريه .. عملوا نفسى اللى أسرائيل اللعينه بتعمله .. بتحتل شعب و تقهره و تسلبه أرضه بحجة التفوق .. يعنى بالعنصريه
نحارب العنصريه شىء رائع .. لكن أحنا كمان لازم مانبقاش عنصريين
و على فكره .. كان دمك خفيف و انتى مذعوره .. بس دمك تقل قوى و انتى بتفرشى الملايه
شرفينى كتبت موضوع جديد تاااافه للغايه .. باحاول أعوض شويه الكئابه اللى كنت فيها الموضوع اللى قبله .. الحقى هزرى عندى شويه قبل ما ارجع كئيب تانى
الزملاء الكرام اتطلع الأن على المشاركات واستنتج عدم اعطاء نتجية واضحة من النقاش .
العنصرية لها تصنيفات كثيرة والأن كل زميل يتحدث عن تصنيف مختلف عن ما بادر به الزميل الأخر .
ماذا نناقش ؟
عنصرية يفردها عدو تحت مسمي التطبيع , ام عنصرية طغاة التاريخ , الفصل العنصرى,عنصرية التجنيس , عنصرية المهاجرين , عنصرية طائفية
؟ !!!!!!
كما هو الحال فى أوروبا وفى كل مكان من العالم تستخدم العنصرية كوسيلة لتوجيه أنظار المواطنين بعيداً عن الأسباب الحقيقية للمشكلات الاقتصادية التى تواجههم والناتجة عن الفساد وانعدام مبادئ الشفافية والمساواة والمحاسبة. والمجتمعات العربية ليست استثناء من ذلك
اين النقاش ؟؟؟؟؟؟؟؟؟؟ لكى اجد طريقى بينكم ؟؟؟؟
صاحب التعليق الثاني
ارجو منك ان تحترسي لنفسك فجميع ردوك تشير الى انك في طريقك لطلب اللجوء الى ايران أو السعودية أو اللجوء لعلاج نفسي مكثف وهذه نصيحة لكل من اندهش وابدى اعجابه بطريقتك في التحقير لأصحاب الرأي المخالف لك
صحيح انك تسامحتي ولم تطلبي لهم السجن أو القتل ولكنك فعلت ما هو أكثر من ذلك بالقتل المعنوي
أرجو منك التخلص من النرجسية التي يتحلى بها أصحاب العقائد والثوابت التي يثبت يوميا انها الطريق الوحيد للهيستريا التي تعاني منها وكذلك من اتفقوا معك أو ابدوا اعبجابهم بعقريتك في التحقير غير المبرر
يعنى انت قعدتى تقولى براز طول المقال و فى الاخر جيتى و قولتى خرا؟ معلومه بقى وصفه الخرا بالكزبره شركه سنسلك هتعمل منها وصفه جامده جدا وهتطرحها فى الاسواق خليكى قاعده كده فى الالفيه التانيه و الناس دخلت الالفيه التالته.يحيى
حنتكلم
والنبي لما تلاقيه ابقى قول لي عشان اجي معاك في النقاش احسن انا برضه مش لاقياه
الاخوة الانونيميسات
مش تخليكوا رجالة كده وللا ستات وتوروني نفسكوا؟
ههههههههههههه
واحد منكوا بيتهمني اني صاحبة ثوابت
هاهاهاهاهاهاها
هي دي بقت شتيمة؟
مش قلت لكوا؟
ومستغربين اني في البوست باقول ح يجي واحد يقول لك: يا متخلف عايز ترجعنا لورا وقت ما كان الناس مش بتحط خرا على راسها
آه يا سيدي
أنا صحابة ثوابت متخلفة
وما عنديش اي استعداد إن اللي يختلف معايا في الثوابت يقيد بأي شكل
لأن دي من ثوابتي
ان الانسان لا يقيد ولا بالسجن ولا بالتهديد المادي او المعنوي
بس كمان انا حرة في رأيي في الناس
انت مش قلت عليا نرجسية
شنقتك مثلا؟
قلت عليك متخلف؟
مش قلت لي اصحاب الثوابت من امثالك؟
هههههههه
هي بالنسبة لك شتيمة
بس بالنسبة لي مديح وسلمى وسندباد
بس غريبة اني من اصحاب الثوابت المتخلفين ومع ذلك متقبلة عصبيتك وتشنجك ومقدراه
وانت اللي بتحتقر الثوابت لانها بتقيد حرية الانسان مثلا مش متقبل ان غيرك يتمتع بحرية انه يبقى عنده ثوابت
يا خوفي لبعدين اللي الخرا على راسهم هم اللي يسجنونا عشان مش عايزين نحط خرا على راسنا
خرا الجمير ده بعد ما حطوه علي راسهم
هياكلوه سندوتشات
هو ده التطور الطبيعي للحاجة الباردة
ما هو البرود يا عزيزتي مالوش حدود
برافو عليكي... السخرية أحسن طريقة تجيب نتيجة دلوقت، صدقيني انتي بسخريتك وتشبيهك اللذع المتهكم ده بينتيلي حاجات أنا ما كنتش شايفها قبل كده، وسيبك من أي حد يقولك غير كده
كراكيب
اه وربنا تصدق
الخوف بس ان السندوتشات دي تتعمم وما نلاقيش اكل في البلد غيرها
احمد شمسي
شالله يخليك يا ذوق
جبهتنا العاليه
ماهو ياأما نحط .... حمير
يانشرب ... حمير
يانسمع نهيق الحمير
أو يمكن ننهق زى الحمير
ياتطلع لنا ودان حمير
أو يمكن تطلع لنا ديول حمير
و راح ننتهى بالتأكيد
بالمشقلب نركب الحمير
تعرفى لما الحمير بتركب الحصين
ايه اللى بيحصل؟؟؟
بيجيبوا و لا مؤاخذه
عيال ...... بغال
أنا بأقول نجرب الجاموس
علشان فيه كمان ميزة
ان عنده..... قرون
سلامات....طيبون
Post a Comment