ح أحاول أكون مؤدبة على قد ما أقدر
امبارح جاني خبر لطيف إن خيرت الشاطر وناس تانية تم الإفراج عنهم
بلغني إن المحكمة أصدرت الحكم ببرائتهم والإفراج عنهم
وإن القاضي تعمد إنه يقرا الحكم علنا قدام ضباط الأمن
طبعا قلت: بعد ما صادروا أموالهم؟ ياللا مش مهم يعني كانوا عايزين فلوس
طب ما كانوا يقولوا، هو فيه حد في مصر ح يعز عنهم حاجة؟
لسة واصلني خبر إن خيرت الشاطر أعيد اعتقاله
فور إصدار الحكم لصالحه
حطوه هو ومحمود أحمد أبو زيد أستاذ الجراحة بطب القصر العيني،
والمهندس أيمن عبد الغني، والكاتب الصحفي أحمد عز الدين،
ومصطفى سالم "محاسب"، والمهندس ممدوح الحسيني،
وياسر عبده أمين عام نقابة تجاريين الجيزة، والدكتور عصام عبد المحسن أستاذ الكيمياء الحيوية بكلية الطب بجامعة الأزهر،
والدكتور فريد جلبط الأستاذ بكلية الشريعة والقانون بجامعة الأزهر،
وصادق الشرقاوي "رجل أعمال"، والمهندس محمود المرسي،
وفتحي بغدادي مدير مدارس المساعي، وسيد معروف المدير بشركة عمر أفندي،
والدكتور صلاح الدسوقي أستاذ التشريح بطب الأزهر، وجمال شعبان محاسب،
ومحمد حسن مهنا
كل دول صدر الحكم ببرائتهم
وكل دول اتحجزوا لمدة أربع ساعات
قالوا: وماله بيعملوا الإجراءات
وفوجئوا إنهم بيترحلوا على السجن تاااااااااني
آه أنا نسيت إن الإخوان هم اللي ورا سفاح المعادي
وعلى فكرة بقى
أنا شاكة إنهم هم اللي ورا احتلال العراق
الدكتور مصطفى الفقي
بيقول إن أمريكا وإيران والقاعدة هم اللي قتلوا السفير المصري
نسقوا كلهم مع بعض واتفقوا مع الزرقاوي يقتله
وبكرة يكتشفوا إن الإخوان ضالعين في قتل السفير المصري
وممكن يكون السفير المصري نفسه اتفق معاهم كلهم عشان يقتلوه
وعلى فكرة موجة البرد اللي حاصلة دي من ترتيب الإخوان
هم اللي بردوا الدنيا عشان يرهبوا الناس ويخلوهم ما يخرجوش من البيت
وأنفلوانزا الطيور
أنفلوانزا الطيور مخطط إخواني طبعا
عشان حسن البنا ما كانش بيحب الفراخ
وتقل دم العيال اللي في ستار أكاديمي
برضه مخطط إخواني
أصلهم إرهابيين وعايزين يكرهوا الناس في الفن
وهم اللي وزوا كريم يكتب الكلام بتاعه في المدونة
وهم اللي أعدموا صدام
وهم اللي عملوا مذبحة حلابجة أصلا
وهم اللي عملوا كارثة تسونامي
وهم اللي طقشوا القطارات في بعض
وهم اللي ربطوا العبارة في حبل وشدوها قامت غرقت
أصله تنظيم إرهابي إرهابي
مجرم مجرم
الضفادع البشرية بتاعتهم هي اللي سلتت العبارة في البحر
وهم اللي عملوا السحابة السودا
وهم اللي بيحرقوا الرز
أصل سيد قطب ما كانش بيحب الرز
وهم اللي غرروا بأولمرت وخلوه يضرب لبنان
وهم اللي خطفوا شاليط
وهم السبب في هزيمة سبعة وستين
وتاريخهم أسود
هم السبب في زلزال اتنين وتسعين
وهم السبب في السيول
والقاضي اللي حكم ببرائتهم مش عارف مصلحته كويس
ومسيره يراجع نفسه ويعرف إنه غلطان غلطان
ويندم على عملته السودا
هو أصله مش عارف الناس دي لو خرجوا
بعد ما اتسجنوا واتبهدلو
وفلوسهم اتصادرت
ممكن يعملوا إيه؟
دول ممكن يروحوا البيت ويناموا
ولعلمكوا لما بيناموا بيشخروا
ولما يشخروا ح يزعجوا زوجاتهم وعيالهم
وممكن طفل رضيع ما يعرفش ينام كويس
وممكن يقوم مفزوع من شخيرهم
وممكن الفزعة دي تجيب له القلب
أو السكر
أو ضغطه يعلا
وساعتها، ح يعيش طول عمره بمرضه
وممكن مرض القلب ده يخليه ما يعرفش يتجوز
وممكن لما يكبر يحب بنت الجيران
وفي الحالة دي، ولأن أبوه شخر وهو نايم، وجاله القلب على إثر هذه الفعلة الشنعاء
مش ح يقدر يتجوز البت فتنة بنت الجيران
اللي هو بيحب التراب اللي هي بتمشي عليه
ويروح لأبوه يقول له : حرام عليك حراااااااااااااام عليك ضيعت مستقبلي
ويرمي نفسه في النيل
ولما فتنة تسمع بانتحار حبيبها تقطع شرايينها
وامها لما تشوفها سايحة في دمها تتجنن
وتدخل مستشفى المجانين
وجوزها يستندل معاها
ويحجر عليها وياخد فلوسها ويتجوز بيهم سكسكة الرقاصة
ويطرد عياله، أخوات فتنة، من البيت
ويجيب الرقاصة تعيش معاه
ويشتري بيرة وجمبري
وياخد قرص فياجرا
وتجيله أزمة قلبية
ويموت
بعد ما يكون كتب كل فلوس مراته للرقاصة
والرقاصة تاخد الفلوس
واخوات المرحومة فتنة يتشردوا في الشوارع
وواحد منهم يبقى القشاش
ويختسب العيال الصغيرة ويخلص عليهم
ويخطف العيال
وعيل من العيال دول يطلع إنه حفيد القاضي اللي حكم ببراءة خيرت الشاطر وزملائه
وفي اللحظة اللي ح ينهار فيها القاضي
يجيله صوت ضابط الأمن وهو بيقول له: كما تدين تدان يا سعادة القاضي
هييييييييييييييييييييه
دنيا
No comments:
Post a Comment