المرة دي برضه عن حسن نصر الله
والله بقى أنا حرة
أنا مش باحب أتكلم عن الحاجات اللي بتضايقني
خصوصا اللي ما اقدرش أعمل لها حاجة
ثم إن مدونتي اسمها جبهة التهييس
وما ينفعش الواحد يهييس في المتهييس
يعني ما ينفعش أتكلم عن التعديلات الدستورية في مصر
لأنها تتحدث عن نفسها
والحقيقة إني ما أقدرش أنافس الحكومة المصرية في تهييساتها
وعشان كده باحترم نفسي لأن المقارنة مش ح تبقى في صالحي
الحكومة المصرية أستاذة في التهييس وكلام من قبيل:
والبتاع ده
والعراق ممكن يبقى فيها أسلحة دمار شامل "أصل العراق واسعة"!
والصحفية هويدا متهمة بحفظ نسخة من الدستور المصري على الكمبيوتر الشخصي بتاعها
والتعديلات الدستورية واحد كان اسمه عزت الحمار غيره وسمى نفسه مدحت الحمار
ثم أنا باحب أقعد في الحتة اللي بتبعث علي الأمل
عشان كده باحب اتكلم عن حسن نصر الله
زي ما باحب أقعد في جنينة
واحد بعت لي يقول لي ما معناه: أنا مش فاهم إيه اللي عاجبك في حسن نصر الله
بس عشان خاطر انتصر على إسرائيل؟ يا سلام هو ده سبب؟!
وده معظم الكلام اللي بيوصلني من الناس اللي مش بتحب حسن نصر الله:
ما تخليش حربه على إسرائيل وانتصاره عليها يخدعك ويغرر بيكي!
وأنا من موقعي هذا
باعلن لكل الناس دي
إني مش ممكن أحب حسن نصر الله عشان السبب التافه ده
فيه أسباب أخرى جوهرية عقائدية فكرية هي اللي بتخليني أحبه
على رأسها سبب جوهري عقائدي
ألا وهو إن شنبر النضارة بتاعه لايق على وشه
ومش ممكن واحد مؤمن وموحد بالله
يرضى يلبس شنبر نضارة مش لايق عليه
لأن ده تشويه لخلق الله
ثانيا: بيلبس خاتم شيك قوي
عيني ح تطلع عليه
ثالثا: بيلف العمامة بتاعته بشكل مظبوط
فيه ناس بتلف العمامة بطريقة منكوشة مما قد يسيء للإسلام والمسلمين
رابعا: ألدغ في الراء
وده بيفكرني بواحدة كانت من أعز صديقاتي
وكانت لدغة في الراء
وكانت البنت الحقيقة أخلاق
مما يدل بالقطع إن حسن نصر الله أخلاق
أما موضوع انتصاره على إسرائيل ده وتحريره للجنوب
فده موضوع هامشي
حاجة مش مهمة خااااالص
ومش جوهريةانتصاره لا يعني شيء طبعا
بيتقال في وسط الكلام كده
أصل إيه الإعجاز يعني؟
ما احنا كل يوم بننتصر على إسرائيل
دي حاجة عادية خالص
بتحصل على طول
وأنا اتجرحت جدا من سوء ظن الأخوة بيا
اللي افتكروني باحبه لهذا السبب الثانوي
كمان موضوع الوحدة الوطنية
وتوحيده لصفوف المعارضة ضد حكومة خاينة بشهادة إيهود أولمرت ده برضه مش سبب
ثم إن الاعتصامات السلمية والإضرابات
لإسقاط حكومة السنيورة الفاسدة المنفردة بالقرار المتعاونة مع أمريكا علنا
اللي على اتصال بإسرائيل
علنا وفي عز الحربوموقف السنيورة في أثناء الحرب بل موقفه قبل الحرب
اللي أعطى الضوء الأخضر لإسرائيل لضرب لبنان
والسرقة والنهب عيني عينك
الاعتصام ضد الحكومة دي بهدف إسقاطها خطأ كبيروأسلوب مش حضاري
وخيانة
وعمالة لصالح إيران وسوريا
ليه؟لأن الحكومة دي قضاء الله وقدره
إزاي بقى ناس بيقولوا على نفسهم مؤمنين يعترضوا على قضاء الله؟
ثم اللبنانيين مش أحسن مننا
اإيه يعني الحكومة حرامية؟
يا سلام هو ده سبب لإسقاطها؟
إيه يعني حكومة خاينة ومتعاونة مع أمريكا وإسرائيل؟
يا سلام، طب ما كل الحكومات العربية كده
وآدي احنا مستحملين وساكتين
خلاص بقى هم اللبنانيين اللي على راسهم طرطور؟
ما يستحملوا زي ما احنا مستحملين
إيه حكاية تحرك المعارضة دي؟
وتتحرك ليه؟طب الحركة ممكن تخلي أكواب كتير تتكسر
وممكن الحركة تعمل لهم انزلاق غضروفي
وممكن يفقدوا وزن
حركة إيه وبتاع إيهما تخليهم زي المعارضة بتاعتنا كده
حلوة وأمورة وتدين وتشجب من البيت
من خرج من داره اتقل مقداره
المفروض يبصوا لنا ويعملوا زينا كده
احنا مثلا، المعارضة عندنا بتعمل إيه؟
اسمعوا يا لبنانيين علكم تستفيدوا
كلنا متضايقين من التعديلات الدستورية
ومن الفساد والرشوة
ومن بيع الغاز بتاعنا لإسرائيل حاجة ببلاش كده
عملنا إيه؟إيه السؤال ده؟
ما أنا قلت لكوا
متضايقين
متضايقين
بس خلاص
متضايقين وبس
فيه حاجة انتوا؟مش كفاية يعني؟هي دي شوية؟
لما الواحد كده يعكر دمه ويتضايق ويأفئف
تسوى كام دي؟مش بنعرض صحتنا للخطر؟مش بناكل في نفسنا؟
مجهود ده وللا مش مجهود؟مش فيه عصبية طالعة؟
المفروض تعملوا زيناأمال احنا عندنا ناس متضايقة منكوا ليه؟
عشان بتعملوا دوشةإيه لزومها دي؟
إذا كان الكلام من فضة فالسكوت من ذهب
عمالين كده: رغي رغي رغي
وتحركات
واعتصامات
إيه الوش ده
ما تهمدوا شويةعايزين نتفرج على الماتش
ما تقعدوا كده كل واحد في بيته وتدعوا عليهم
وربنا إن شاء الله ح يستجيب لكوا
إحنا المعارضة عندنا بتعمل بمبدأأصبر على جار السو
يا يرحل
يا تجيله مصيبة تاخده
هي دي المعارضةإنك تلاقي نفسك بينك وبين نفسك كده معترض
ومتضايق
وح تطق
لكن لما تبتدي تتحرك عشان تغير اللي مضايقك
تبقى عميل
وبما إن حكومتك عميلة لأمريكا وإسرائيل
فأنت أكيد عميل للي بتكرههم أمريكا وإسرائيل
مين يا ربي مين؟آه سوريا وإيران
ما هي أمريكا بتكره دول
ويمكن تكون عميل لشافيزوبرضه معقول تبقى عميل لكوريا الشماليةأمال بتتحرك ليه؟
ما تخليك قاعد جنبنا كده نونس بعض
لو زهقانين من القعدة احنا ممكن نجيب لب وفول سوداني وناخدكوا ماتش كورةأو سينما!
الحقيقة أنا شخصيا قرفي من المعارضة المصريةأضعاف أضعاف قرفي من الحكومة
مش بس عشان هم فعلا مش عايزين أي تغيير ومستمرئين إنهم يسبوا ويلعنوا وخلاص
بس عشان لا بيرحموا ولا عايزين رحمة ربنا تنزل على غيرنا
طب هم قاعدين على.....لامؤاخذة
ومش عايزين يعملوا حاجة
غيرهم في بلد تانية بيتحرك عشان عايز يغير الواقع اللي ما يرضاهوش إنسان عنده كرامة على نفسه
هم زعلانين ليه؟
وللا بقى هو عادي إن الناس تقبل ضرائب فوق الطاقة
وفساد فوق الوصف
وخيانة فوق الخيال؟
على فكرة الظاهر إن دي ثقافة أقصد ثقافة الندب ورثاء الذات من غير ما واحد يعمل أي تحرك
عشان يغير الأشياء اللي مضايقاه في حياته
بدليل إن لما واحد مثلا بيقدم مذكرة في مديره عشان أهانه وللا خصم له ظلما
الناس كللللللها بتقف ضد الموظف مش المدير
ولما واحدة بتتطلق عشان جوزها بيضربها أو بيخونها
الستات بيقفوا ضدها بالذات اللي بيعانوا من نفس اللي هي بتعاني منه ومستحملين
ولما واحد تخبطه عربية وهو بيعدي يقولوا: وهو إيه اللي خلاه يعدي الشارع؟
وأي أذية بتلحق بمظلوم
بيلوموا على المظلوم مش الظالم
لأن الفكرة المسيطرة عليناإننا لازم نتحمل كل الظلم
وما نعملش أي حاجة عشان نغيرهونقعد زي اللي غرق دراها (غرق محصول الذرة تبعها يعني للتوضيح)
نعيط ونندبلأن ده اعتراض على قضاء الله وقدره
وأكيد فيه حد له مصلحة في التحرك ده
حد تاني غير نفس الناس اللي بتتحرك
لأن مش معقول الناس دي عايزة تتحرك من نفسهاأمال احنا مش عايزين نتحرك ليه؟
يعني هم عايزين حاجة احنا مش عايزينها؟
مش معقول طبعا
وبس
No comments:
Post a Comment