Tuesday 9 January 2007

تحيا جمهورية التهييس الشعبيةةةةةةةةةةة العظمى

زعلانين قوي من تهييسي



يا سلااااااااااااام



أنا دلوقت حاطة إيدي في وسطي ومطلعة لساني



يا سلام يا سلام يا سلام




طب بلاش أنا باهييس




طه




والراجل المحلل السياسي اللي طلع في الإل بي سي يقول:




الملف النووي الإيراني تمثيلية عملاها أمريكا مع إيران




عشان تعمل من إيران بطلة




والعرب يلتفوا حواليها




"لأن القاعدة الاستعمارية التي كانت تعتمد فرق تسد



قد تغيرت الآن، فأمريكا الآن ليس من مصلحتها




إحداث الفتنة بين السنة والشعية وبين المسلمين والمسيحيين




بل على العكس



الولايات المتحدة الأمريكية هي المستفيد الأول من وحدة المسلمين



والوحدة بين المسلمين والمسيحيين وذلك لتحكم سيطرتها عليهم جميعا"




طبعا أنا ما فهمتش ليه يعني تحكم سيطرتها؟




يمكن هو فاكر ح يلتفوا حول إيران دي يعني





حي يتلموا بربطة المعلم ويروحوا يحاوطوا الحدود الإيرانية




من كل "جيهة"؟!




وبكده يتجمعوا في مكان واحد




قوم أمريكا ما تتمشورش بقى وتسيطر عليهم زي ما هم كده




الغريب يا أصدقائي الصغار إن فيه ناس




من جمهور الحاضرين اقتنعوا بكلامه! طه يعني حرم التهييس عليا انا بقى؟





بلاش




كان فيه كابتشن بيرد عليا هنا ع المدونة




وبيقول لي ان الحكومة قفشت بتوع الإخوان




إكمن دهين صفقة بناتهم عشان يمرروا التوريث




وكتاب الله ما فهمت منه كلمة




عموما اهو موجود ع المدونة اللي يفهم يبقى يفهمني ينوبه فيا ثواب





طه، بلاش





أخيرا، وليس آخرا، ألاقي لكوا واحد



طالع في البيت بيتك




قال لك ايه




قالك هلبت صدام مش هو دهون اللي اعدموه




ازاي بس يا عم الكتكوت




قال لك صدام كان بشامة وعلامة وطلعة بسامة




إنما دوت اللي أعدموه ما كانش بشامة ولا علامة





وإن اللي أعدم ده كان شبيه صدام




طب بقى أنا ما احبش المزايدات في التهييس




يعني هلبت ولابد من كل بد إني




أبني على الحقائق اللي وصلتني مؤخرا شوية تهييسات مستكبلية




إيه؟ طبعا الوزير صدان مش هو المعدوم لامؤاخذة




بل بالعكس





اللي أعدموه ده الملك فهد



أيون، الملك فهد مامتش، دولم كانوا معتشكلينه في السرداب



لحدت لمن بقى شبه أنور وجدي في أمير الانتكام




قوم أخدوه ولبسوه وش وأعدموه مكان صدان



كمان أصلا بقى صاحبتي قالت لي إن الجزيرة هي اللي عاملة 11 سبتمبر




وبوش وبن لادن شركاء في الجزيرة



ليه بقى؟



إكمن الجزيرة جات لها حسنة كبيرة قوي بعد أحداث سبتمبر





وبعد كدهوت، بوش اتفق مع الناس في العراق يمنعوا الجزيرة من التغطية في العراق




عشان يخلي الناس يحبوها





كمان بن لادن متجوز رغد بنت صدان




وعايشين في أمريكا




وليلاتي سهران مع بوش يلعب كونكان




وقناة العربية شركة مابين صدان وبلير

قول لي بقى بخصوص عركة تشموز اللي قامت ما بين إسرائيل ولبنان
وأنا أقول لك يا سيدي
شوف بقى
الحرب دهين كانت بأوامر من أمريكا
وحزب الله وإسرائيل وأمريكا كانوا متفقين بناتهم كلاتهم عشان يقوموا العركة دهين
ليه بقىىىىىى؟
المراكب الجيد للساحة السياسية
يجد إن المواصلات غليت في مصر في وقت حرب تموز
وده معناتو ايه؟
معناتو ان امريكا هي اللي خلت الحكومة المصرية تغلي المواصلات
عشان بوش له أسهم في شركة النقل العام المصرية
قال لك طب نلهي المصريين إزاي
نعمل لهم عركة جنبهم عشان يتلهوا فيها
قوم احنا نغلي المواصلات ولا من شاف ولا من دري
أفكاااااااااااار تكتيكااااااااااااااااااات
طب إيه بقى اللي قلب المعارضة ع السنيورة
قال لك حسن نصر الله متجوز كوندوليزا عرفي
والواد السنيورة الأمورة كان عايز يعلقها منه
بدليل إن قناة المنار كانت دايما تركز على البوسة اللي ما بين السنيورة وكوندي
طب إيه اللي حارقهم كده؟
قوم نصر الله قال له: بقى عايز تعلق المزة مني
طب خد



كمان السادات ما اتقتلش




دولم عملوا له عملية تجميل وخلوه يمثل واحد تاني



مشهور برضه عارفينه



اسمه إسماعيل هنية



ثم إن القذافي اتقتل من عشر سنين




واللي موجود ده مش القذافي



ده جيهان السادات لابسة وش



والملك حسين ما ماتش




ده عايش في أفغانستان




بيمثل إنه داد الله بتاع طلبان




وللعلم بقى




جمال عبد الناصر هو أبو مازن




وجمال عبد الناصر لسة عايش




وكمان هو في الأصل مش مصري



ده تايلاندي




والصين بعتته عشان يعمل ثورة في مصر




ضد الملك فاروق




والملك فاروق ده كان رضيع



لما الملك فؤاد لقاه على باب الجامع

لأنه ما كانش بيخلف




وكل عياله دولم من على أبواب الجوامع




وأيمن الظواهري




هو رئيس الاستخبارات الأمريكية الحالي




وبيسجل شرايطه دهين



في أستوديون الجزيرة فرع أمريكا




وإيه تاني يا سيدي لما إنت



آه





عدي متجوز بنت بوش وعايش معاهم في البيت الأبيض





وقصي متجوز بنت شيراك



الغير شرعية




وعايشين في قصر الإيليزيه





طبعا ح تلاقي ناس جهلة يقولوا لك باستظراف



وده طبعا غير الحلواني




لكن الحقيقة اللي هم ما يعرفوهاش




إن قصر الإليزيه الحلواني اللي عندنا




هو قصر الإليزيه الحقيقي الأثري



واللي في فرنسا هو التقليد



ولو عندكوا مخ فكروا




مين أقدم؟ الفراعنة وللا النورمانز؟




أيون شاطر الفراعنة طبعا




الفراعنة دوكهمة كانوا في فرنسا وللا في مصر





أيون




يبقى مين اللي القصر بتاعه أقدم



المصريين وللا الفرنساويين ولاد امبارح




ما تفكروا يا بشر




والتهييس إذ يعوووووووووووووووود




يالضيعة البعوووووووووووووووووض

1 comment:

Anonymous said...

هاي نوارة ازيك علي فكرة انا معجب جدا باسلوبك في الكتابة وعايز اسالك سؤال ياعني هل ليكي تجارب في كتابة السيناريو وياريت لو يحصل بيننا تعاون في الموضوع ده انا بالمناسبة شغال في احدي اكبر شركات الانتاج في مصر ولو انتي مهتمة بكتابة السيناريو يا ريت تردي عليا في اقرب وقت ممكن علي الايميل motazelsherif@hotmail.com
انا جاد جدا في الموضوع ده فياريت تردي في اسرع وقت ممكن
معتز الشريف