لا انت القرد

من امتى واحنا عندنا النعرة المذهبية اللي طرأت علينا في مصر؟

سألت نفسي السؤال ده وأنا عمالة اسب والعن

في حكومات الخليج اللي جات على الدبابات الانجليزية

وفي سبيل الكرسي والبترول مستعدة تتفرج بتلذذ على المسلمين وهم بيدبحوا بعض

والفتنة دي دايرة فين يا بت يا نوسة

دايرة في العراق

مين اللي عملها يا بت يا نوسة

ايه السؤال الغبي ده؟ امريكا والحكومة السعودية ودول الخليج طبعا

لا يا بتش يا نوسة مش قصدي

قصدي مين اللي بينفذها

آه، قولي كده يا بتش يا نوسة، العراقيين ليه؟

والعراقيين بيعملوا كده ليه يا بت يا نوسة؟

والله ما عارفة يا بت يا نوسة؟

وفجأة ظهر غسان بن جدو في الجزيرة

مستضيف واحد من التيار الصدري

وواحد من جبهة علماء المسلمين

أنا الشهادة لله، في الاول كنت باحب الاتنين،

ليه بقى، اكمن الاتشنين كانوا بيقولوا لا للفتنة، كانوا بقى

دلوقتي هم الاتنين مولعين الفتنة

طب يا بت يا نوسة ما تقعدي تتفرجي يمكن تعرفي هم بيعملوا كده ليه

لا يا نوسة ما تستهبليش، في الحرب الأهلية مافيش ظالم ومظلوم ولا معتدي ومعتدى عليه

في الحرب الأهلية الكل مجرم

زي ما قال الرسول صلى الله عليه وسلم: القاتل والمقتول في النار

بس اقعدي بس يمكن تفهمي يانوسة

انت شايفة كده يا نوسة

امال يا نوسة

حاضر يا نوسة

الحوار بين الاتنين دار كالآتي:

التيار الصدري: نحن نستهدف الاحتلال فقط

جبهة علماء المسلمين: نحن أول من دعا لاستهداف الاحتلال فقط

التيار الصدري: الفتنة الطائفية صناعة أمريكية

جبهة علماء المسلمين: أظن أنه أمر مفروغ منه أن الفتنة لا تصب سوى في مصلحة الاحتلال

التيار الصدري: بالطبع محاكمة صدام لم تكن شرعية، ولكنه مجرم ويستحق القتل

جبهة علماء المسلمين: بالطبع صدام مجرم ويستحق القتل ولكن محاكمته لم تكن شرعية

التيار الصدري: نحن نأمل في توحيد الصف المسلم لنقف ضد الاحتلال يدا واحدة

جبهة علماء المسلمين: لنقف ضد الاحتلال يدا واحدة يجب ان نوحد الصف المسلم

وراس غسان بن جدو في النص زي كورة البينج بونج

قالهم ما معنا طيب يعني انتوا عايزين توحدوا وانتوا عايزين توحدوا طب يعني ما تقفوا جنب بعض

وايه يعني المشكلة

جبهة علماء المسلمين: المشكلة ان التيار الصدري ياخد دعم من ايران وايران تساعد الامريكان

التيار الصدري: ايران مالهاش دعوة بينا احنا عراقيين،

انتوا اللي بتاخدوا دعم من السعودية اللي بتكفرنا وبتزرع الفتنة بين المسلمين

والسعودية هي اللي حاطة قواعد حربية لامريكا في ارضها مش ايران

جبهة علماء المسلمين: لا ايران بتقول لولاها ما كانتش امريكا في افغانستان والعراق

واحنا مالناش دعوة بالسعودية

احنا اول ناس دعينا للوحدة

التيار الصدري: لا احنا

الجبهة: لا احنا

التيار: لا احنا

الجبهة: لا احنا

لحد ما يدخل غسان بن جدو: انتوا الاتنيييييييييييييين

طيب ما تتصالحوا بقى وتبطلوا تموتوا في بعض

التيار الصدري: احنا مش ممكن نسمح لحد انه يفرق بينا وبين السنة احنا كلنا عراقيين

بس احنا بندافع عن نفسنا

هم اللي ضربونا الاول

جبهة علماء المسلمين: يا سلاااااااااااام لا انتوا اللي ضربتونا الاول

وشكلهم بقى عامل زي العيال:

مش انت اللي عضيتني

وهو انا عضيتك ليه؟ مش عشان كنت بتشد شعري

ايوة انا شديت شعرك عشان انت بطحتني في راسي

انا ما بطحتكش انا ايدي خبطت فيك غصب عني

يا سلام انت كنت بتضحك مع ابن الجيران عليا

انا؟ وربنا ما حصل، انتوا اللي كنتوا بتهزروا وانا كنت باضحك لكوا

انت اللي ابتديت بالضرب الاول

لا انت

لا انت

لا انت

لا انت

لا انت لا انت لا انت القرد

لا انت لا انت لا انت القرد

لا انت لا انت لا انت

القرد القرد القرد القرد

القرد القرد القرد القرد

الليل الليل اللي يا ميمون

وكمان الليل واكون ممنون

ولما الشعب يتحول لميمون

يبقى ابن كلب اللي ما يرقصوش