شفتوا اللي حصل؟ البتش هويدا طه مصورة الجزيرة،
هي اللي فبركت فيديوهات التعذيب في أقسام مصر،
وأجرت ممثلين كومبارس،
عشان يمثلوا إنهم بيتعذبوا،
الداخلية قالت كده، يعني هي الداخلية ح تكدب؟
نعم؟ إيه ح تكدب وللا إيه؟
الصحفية هويدا طه بتقول إنها قدمت خطابات رسمية لوزارة الداخلية
والوزارة تعاونت معاها عشان تسجل الشرايط
وبعد ما سجلت الشرايط وكله تمام
صادروها في المطار، الشرايط طبعا مش هويدا،
ودلوقت بيحققوا مع هويدا بالتهم الآتية:
الأولى تصوير لقطات من شأنها الإضرار بالمصالح القومية للبلاد،
والثانية حيازة ونقل صور مخالفة للحقيقة وإعطاء وصف غير صحيح للأوضاع في البلاد
طبعا، أصل مصر مستهدفة
يجي واحد يقول لي: طب والداخلية ليه تتعاون في الأول مع هويدا وبعدين تقبض عليها؟
يا باش مهندز إنت بتتعامل مع أذكى جهاز مخابرات
فاكر محمود يس لما استدرج مديحة كامل وبعدين قال لها:
ده الهرم وده النيل دي مصر يا هبلة؟
هم بس كانوا بيشوفوا آخرها إيه لامؤاخذة
هم مش نايمين!
وللعلم بقى، البتش هويدا دهين تشبقى قريبة التوربيني،
أيوة، وكمان، الاتنين في تنظيم واحد
تنظيم اسمه : يا مفتري منك لله
التنظيم ده بيهدف إلى تشويه سمعة مصر
من خلال عمل فضايح ويقول لك دي شكاوى المواطنين
طب المواطن من دول لو يعرف مصلحته ما يفضحش نفسه
ربنا قال الستر
يعني الظابط اللي بيغتصب مواطن
لما تحصل فضيحة مين اللي ح ينضر؟
الظابط؟
أبدا، ده ظابط ما يعيبوش حاجة
انما المواطن هو اللي ح يتفضح
وسمعته ح تتوسخ
والسمعة اذا راحت ما بترجعش تاني
مين ح ترضى تتجوز المواطن ده؟
مين راجل ح يرضى يناسب عيلة فيها مواطن اغتصبه الضابط؟
أما بالنسبة لدور التوربيني في تنظيم يا مفتري منك لله
فالتوربيني هو اللي شال الجزرة بتاعة القطر اللي عمل حادثة
وهويدا صورت شكاوى المواطنين المصريين والعرب
من الشرطة
بعد ما اخدت اذن من الداخلية
بس هي كده خبطت في الحلل
والدنيا زي الخيارة
يوم في إيدك
ويوم في .....السلطة
عموما هم أخلوا سبيلها بكفالة عشرة آلاف جنيه مصري فقط لا غير
والله كتر خيرهم
قلبهم كبير
No comments:
Post a Comment