هجمة غربية
تحاول تحطيم مثلنا وقيمنا وتقاليدنا العريقة
ممثل الهيومان رايتس ووتش جه مصر وقال إيه بيعترض على التعذيب في مصر
وبيطالب الحكومة المصرية بأنها تلتزم بميثاق حقوق الإنسان
عايزين يهددوا سيادة مصر
عايزين يفرضوا سياسيتهم علينا
عايزين يخلوا البلد أردغانة
وعايزين الحكومة تسيب البلد من زمان
بس هم مش ح يسلموا ويسيبوا الأمانة ولا بالبوليس والنيابة كمان
والشهادة لله رئيس الوزراء بتاعنا رد على ممثل الهيومان رايتس ووتش
بس ايه رد مفحم
قال له: إذا كان بوش لا يلتزم بمواثيق حقوق الإنسان
فلماذا ألتزم بها أنا
قوم الراجل ما حطش منطق
والنهاردة هو وناس كتير من منظمات حقوق الإنسان الخواجات
قال إيه عاملين مظاهرات ضد معتقل جوانتانو
شوف يا خويا الكهن
طب وهم مالهم
عيالنا وسايبينهم عند الأمريكان يربوهم
وأبوها راضي وأنا راضي
إذا احنا صحاب الشأن ما بنجيبش سيرة
ومش ح نجيب خليهم يتعلموا الأدب
وخللي أمريكا تشيل عنا شوية
احنا ح نربي مين وللا مين
دول مليار ونص ناقصين تربية
احنا لازم نقف وقفة من اللي هي كده
لازم نتصدى للهجمة الغربية اللي عايزة تفرض سيطرتها علينا
وعايزين يحطموا - بجرة قلم - تراثنا الطويل
من التعذيب
ويقول لك انتهاك حقوق الإنسان قال
دي عيال مجرمة
عايزين حش رقابيهم
عايزين المية تجري في العالي
عايزين يسيطروا ع السلطة
وبعدين شوية إرهابيين
احنا مضطرين نعذبهم
امال يعني ح يعترفوا ازااااااااااااااي؟
ما بتاع هيومان رايتس ووتش ده
لو كان ظابط
وشغلته يحقق مع مقاصيف الرقبة دول
ويغلب معاهم في الأسئلة
والمقروصين ما بيعترفوش
ما كانش قال البقين الحمضانين دولم
ويقول لك نقفل جوانتانمو
طب ده سماحة السيد دونالد رامسفيلد
حفظه الله
قال لك العيال دي عايشين عيشة ما كانوش يحلموا بيها
الجربانين الجرابيع
بنييمهم على سراير
ونأكلهم تلات مرات في اليوم
وعندهم ملعب كورة
وبيخلوهم يصلوا
وعشان تعرفوا بس طيبة قلب أمريكا
بيحطوا في كل أودة قرآن كريم
صحيح بيشخوا عليه بعد كده
بس يعني المحقق اتزنق
وقاعد يحقق مع الارهابيين بقاله ساعات
وايده مش فاضية بيشتغل
يعمل ايه يعني
يعملها على روحه؟
وبعدين يا سيدي العلم في الراس مش في الكراس
يا سلام
عشان واحد مرة وللا مرتين وللا مية تلاتة وخمسين مرة
شخ ع المصحف خلاص؟
الدنيا خربت؟
وبعدين تعذيب ايه اللي بيعذبوه لهم
عشان يعني بيظبطوهم؟
بدل ما نقول لهم كتر خيركوا؟
الواحد منهم قاعد في السجن مدة
ودي حاجة يعني زي الاكل والشرب
ومافيش ستات
خلاص الموجود يسد
هي دي خلق اساسا الامريكان يبصوا لها
دول حتى بياخدوا فيهم ثواب
ويقولوا لك أصل بيسيبوا عليهم الكلاب
إيه العيال الخرعة دي
بيخافوا من الكلاب؟
أمال عاملين لنا فيها إرهابيين
وعتريس
وبلوة سودا
وشوف بقى
العيال القارحة مساجين جوانتانمو
اللي عايشين عيشة ما كانش يحلم بيها ابوهم اللي اخر كلمة قالها
طعمية
قال ايه بينتحروا
يا قهري يا قهري على المحن يا قهري
يا عمي دول اصلهم ناس مدمنين قتل
لما ما لقوش حد يقتلوه
راحوا مموتين نفسهم
وكل ده ليه؟
عشان عايزين يشوهوا سمعة الامريكان
الامرا
السكرة
اللي يتحطوا ع الجرح يطيب
والامريكان من طيبة قلبهم حاولوا ينقذوهم
بس اصل دي عيال مجرمة مجرمة
ما تسيبوهم يغوروا في داهية
ويقولوا لك عاملوهم كاسرى حرب
هم عايزين يخربوا الدنيا
ويبوظوا المواطنين ع الحكومات
ايه يا خويا الدلع المرء ده
امال ح يطلعوا من السجن رجالة ازاي؟
عودهم ينشف إزاي؟
يستحملوا اللي ح يشوفوه بعد ما يرجعوا بلادهم إزاي؟
قال حقوق إنسان قال
بلا مسخرة ومرقعة ومياصة وقلة أدب
No comments:
Post a Comment