متفرقات

يا عيني يا فاروق، يا حرام، قريتوا يا بوز الاخص انت وهو، اهو الراجل اتكسر بخاطره، ولايهمك يا روقة، تعالى عندنا تاكل لقمة وترمي عشرة، ترمم مسرح وتحرق عشرة، وما تبقاش بعد  كده تمشي ورا عوكل وتمسح جوخ لحد تاني، اهو شوفوا، عوكل استأذن له من اسرائيل واسرائيل اخدته على خوانة برضه، عشان بس يعرف ان رأيه في اليهود غلط، احنا ناس ولاد اصول برضه ومش ح نعايره، انا مش عارفة عوكل ح يصدق امتى اننا ولاد اصول؟

----

انا رحت مسجد ابو زهرة في مصر الجديدة عشان اتأكد من الخبر ده لان ابو امير شككني وقال لي: يا سلام بقى انت عايزة تقنعيني ان فيه امل؟ :) اه يا ابو امير فيه امل، رحت وسألت بتاع الامن اللي في الفيلا اللي قدام المسجد، هو صحيح حكى لي قصة حياته ورأيه في الملكية والثورة ووراني صور عياله وقال لي كل واحد متخرج من ايه مع اني ما سألتوش عن اي حاجة من دي خالص، بس في الاخر طلع كل اللي كتبه المصري اليوم حقيقي مية في المية، واللي خلا الناس تقوم عليه والستات تزعق وتحسبن عليه انه قارن ما بين الشيعة واليهود

-----

ايه لبس العيد ده؟ الناس لابسة ايه في الشارع؟ ايه البنطلونات الرجالي الجينز اللي العيال موسخينها بالطباشير دي؟ وايه ملابس عروسة البحور اللي البنات لابسها كلهم دي؟ فيه ايه؟ :) يارب يسعدهم يا رب

إيه ده؟

ميدو جاب لي الخبر ده

المصلين كانوا ح يضربوا الامام عشان بيشتم الشيعة؟

انا مش فاهمة حاجة، هو قال لهم ايه عشان يقوموا عايزين يضربوه؟ ده لازم هطرس في الكلام جامد قوي، دي مش حاجة معتادة ان الناس تتجرأ على الامام مالم يكون مخرف كبير، عايزين نعرف قال لهم ايه؟ اللي يعرف حد ساكن جنب الجامع يطقس لنا كده، ده واحدة قالت له: "حسبي الله ونعم الوكيل فيك دي مش خطبة عيد" وراجل كبير قال: ارموه على الارض بدل ما يبوظ علينا صلاتنا!!! ايه ده؟ يخرب بيته هو عمل ايه؟ الجامع اسمه ابو زهرة في مصر الجديدة، حد يشوف لنا الموضوع ده

هي كل الناس دي شايلة في قلبها من فاروق حسني؟

تحديث: امريكا تدخلت عشان تدعم المنافسة البلغارية، نهارنا مدوحس لو رجع لنا مكسور الخاطر، ح يطلعه فينا
هههههههههههه حرام عليكوا، والله انتوا ناس وحشة، اولا ما اقولكوش على كمية التليفونات اللي جات لي عشان: انت بتدعمي نظام مبارك؟ قال ايه؟ عشان باقول فاروق حسني ربنا يسعده ويبعده، وجو دخل يقول لي يعني يا نوارة هي مصر عدمت ناس بتفهم؟ هو عشان مصري وخلاص ما عندكوا البرادعي مثلا، وللا كنتوا بقى تبعتوا اللمبي

اولا انا طالبة سحب الاهانة اللي لحقت باللمبي يا استاذ جو، ده مثلي الاعلى، وباستعير من حكمته ومقولاته التاريخية كتير.

ثانيا: يا سلااااام بقى لما فاروق حسني يروح ده ح يدعم النظام المصري دوليا؟ طب خدوا دي بقى: النظام المصري ثابت بثبات اسرائيل، وش كده، مش فاكرين لما كوندوليزا رايس بوخت على عوكل، وشارون بنفسه لم بؤجته وراح على واشنطن يقول لهم إلا عوكل، ده حبيبي، ويلزمني؟ فاكرين وللا بننسى؟ وشوية الناصحين دول اللي راحوا لامريكا يقولوا لها انا ممكن انفخ لك شفافيفي والبس لك بدل رقص حمرا وما اقولش لا على اي زبون، والغلة اخر النهار كلها بتاعتك بس سيبيني اعمل ديمقراطية وتنمية، إتألشت واتباعت وتم احتواءها من قبل امريكا لصالح النظام المصري، عشان دي مش نصاحة يا روح خالتك انت وهو. دي غباوة، لأن مافيش حاجة اسمها تتساب تعمل ديمقراطية وتنمية وتقول انا مستعد اخدم مصالح اسرائيل زي ما انتوا عايزين، مش كفاية انك تطبع وتخلف من اسرائيل، اسرائيل من مصلحتها وامنها القومي انها تبقى الدولة الوحيدة المتقدمة في المنطقة، وتبقى الدولة الوحيدة اللي فيها شبه ديمقراطية في المنطقة، وتبقى الدولة الوحيدة الممثلة للحضارة الغربية في المنطقة، يعني ايمن نور وسعد الدين براهيم بدون ذكر اسماء لما قالوا انا مستعد اعمل عجين الفلاحة، وابقى مش بس مخلب قط، ده انا ابقى القط نفسه ما كانوش بيثبتوا حسن نواياهم، دول كانوا رايحين ينافسوا اسرائيل على حجر امريكا، وده مش مسموح بيه، الشيء الوحيد المسموح بيه ان الدولة المجاورة لاسرائيل يبقى فرق التقدم اللي بينها وبين اسرائيل نص قرن على الاقل، وتبقى دولة فيها فقر، وقهر، وديكتاتورية، وتبقى مش مستقرة، والدولة تبقى ملبوخة في مصايبها، وفوضى، يعني يبقى الحال على ماهو عليه، هو ده مصلحة اسرائيل. ولو اتغير حسني وجه نظام تاني مستعد يماين مع امريكا مش ح يفرق غير في تغيير الوشوش. فشيلوا امريكا من دماغكوا خالص وبطلوا لحس لجزمتها، مشششششششش ح تساعدكوا، ووجود فاروق حسني من عدمه مش هو اللي ح يحلي النظام في عين امريكا، امريكا مبسوطة مع النظام ومتستتة ومتهنية، وبتاخدكوا في حضنها عشان توسخكوا زي ما وسخته وما يبقاش حد فيكوا له عين يفتح فيه. انسوها بقى، انسوها زي ما نسيتوا اهم قضاياكوا واصلكوا وفصلكوا وتاريخ بلدكوا. التغيير يا ييجي منك ومن ارتكازك على قاعدة شعبية واثقة فيك وتستحمل انت وهم نتائج اختياراتكوا يا تقعد بقى تقمع بامية وما توجعش دماغنا.

(ده بالنوسبة للي كلموني النهاردة عشان يقولوا لي كده بتدعمي النظام دوليا، ده ولية اللي يراهن على الدعم الدولي)

ثالثا: بالنوسبة لملحوظة جو بإنه حاجة ح تعر مصر مش ح تشرفها، آه، بس ده ممثل النظام، وكما ذكرت له في التعليق، ده نظام الكبير اللي فيه بيعمل زيارة مفاجئة لكارفور، دي الادمغة اللي في النظام ده، فاروق حسني ده المفروض انه المتعلم اللي فيهم، طب نعمل ايه؟ ده مرشح النظام، يعني ح يجيبوا واحد بيفهم منين؟ ح يفتروا على ربنا؟ والله لو عندهم احسن منه ما كانوا عزوه علينا، وانا عايزاه يمشي بقى، انا ما يهمنيش اليونسكو ولا صورتنا في اليونسكو ولا ما يسمى بالدعم الدولي، دي ناس نصابة عايزة تمص دمي، هم ما ارتكبوش في حقي كل الجرايم دي عشان يعوضوني عنها، يروح لهم، هو بيحبهم وهم بيحبوه، اهو نغير وشوش، يمكن ييجي اي حد تاني، اذا ما نفعش يبقى على الاقل ما يضرش، اي حاجة، اي حاجة مختلفة، وش جديد يبعت رزق جديد، ده انا وعيت على الدنيا لقيته، ثم هو لو اسرائيل والسعودية موافقين عليه يبقى خلاص، انا بس كل اللي يهمني انه لما يروح يبقى زي قلته، ما يعملش حاجة خالص، لانه اي حاجة ح يعملها ح تبقى ضدنا مش في مصلحتنا

طبعا عشان يثبت ولاءه، بس يروح، يروح بقى شوية عشان النفس

بس جو بيقول لي ح يجيبوا زاهي لحواس؟ ده ح يمنعنا نمشي في الشارع عشان ريحتنا، زاهي لحواس؟ على رأي نادية الجنسي: لاااااععععاااااااااااا

ملحوظة: ايه المحبة دي كلها يا روقة اللي لك في قلب الناس، انت ما تتخيلش الناس اكلت دماغي قد ايه عشان قلت يروح اليونسكو، ههههه، ربنا يديم المعروف

هيهيهيهيهيييييييي احسن يا اوباما

عمالين يقولوا له يا بلاك يا نيجر من ساعة ما جه، الاسرائيليين يعني، كل اللي بيعمله عشانهم ده ومافيش فايدة، واربعة في المية بس شايفينه في صفهم، هم عايزين ايه اكتر من اللي هو عامله؟ لا يا عيني واحنا اللي فرحانين بيه عشان بيدينا بالجزمة بس من غير سب دين
والله احنا غلابة قوي يا سيد
بس ايه حكاية اسود اسود، هم يعني اللي كانوا شق اللفت؟ ماهم لونا، او افتح مننا بشوية صغيرين، بالذات اللي كان بيقول عليه اسود في الفيديو ده

ايطالو-اراب

ه مطرب ايطالي مشهور قوي اسمه ماسيمو رانيري، له اغاني كتير قوي حلوة، ودي غنوة اسمها سكانيلاتيللا، واضح فيها تأثير الموسيقى العربية، ولو مش بتهتم تفهم الكلام قوي قد ما بتهتم بالموسيقى والصوت دوروا على اغانيه، حلوة قوي، وصوته معجزة

هو فاروق حسني تبع الوهابيين كمان؟

انا ما اعرفش مدى صحة كلام الراجل ده، بس فعلا اقوى نفوذ في العالم الاسلامي هم آل سعود زي ما اسرائيل اقوى نفوذ في العالم الغربي

وهو شكله كده مش ناوي يعمل حاجة، قعد يبوس في رجلين الاسرائيلين ويستسمحهم ويتكلم عن الهولوكوست! احنا ح نفضل ناصبين العزا العالمي ده كتير على ضحايا الهولوكوست؟

وفاروق حسني لو راح ح يعمل ايه؟ اهو ده اللي انا مش عارفاه

ده خلاص مرشح مصر، زي المنتخب القومي كده ما اقدرش اقف ضده، بس انا قلقانة منه، حاسة انه ح يسخر اليونسكو للتوعية بالهولوكوست، وفوائد البكاء على الهولوكوست، وتبقى مصيبة لو الراجل ده طلع كلامه صح وفوق انه يخدم على مصالح اسرائيل يخدم على مصالح آل سعود كمان، وهي تمشي يعني، دول معاهم نفوذ دولي ودول معاهم فلوس بالهبل وهو صاحب مبادئ زي ما انتوا عارفين. ثم انا خايفة يروح يفضحنا هناك، يارب ما يعملش كده، وللا يعمل، خليه يروح يحرقهم ماهم يستاهلوا

انا بقى عايزة اعرف، فيه ناس مش عايزاه يروح اليونسكو ليه؟ انا عايزاه يروح، على الاقل نترحم احنا شوية يعني، مش احسن ما كانوا يبعتوا زاهي لحواس؟ اهو فاروق حسني على الاقل بيعرف يتكلم كلمتين على بعض بدل ما لحواس يروح يكلمهم عن نفسنا وريحتنا، وده منصب شرفي، واهو اسمه مصر برضه اخدت رئاسة اليونسكو، وفي نفس الوقت ح نخلص بقى احنا هنا، ماحدش ح يتحرق تاني ان شاء الله، واثارنا تاخد اجازة شوية، ويمكن اللي ييجي بعديه يهتم شوية بالاثار الاسلامية، لاني كنت قعدت مع طلبة كلية اثار وقالوا لي ان الدولة مهتمة بس بالاثار الفرعونية وهم صوروا اثار اسلامية مهمة جدا نايم فيها ناس والمجاري مغرقاها (ياباي يا فاروق، للدرجة دي يا اخي؟) انا باحب فيلم ملاكي اسكندرية، اصل لسة شايفة اعلانه دلوقت. المهم يعني، ربنا يسعده ويبعده، ويارب ما يفضحناش، وللا يفضحنا بقى، ماحنا مفضوحين خلقة ربنا، بس تبقى مشكلة انه بسبب انبطاحه يمكن الاسرائيليين والوهابية اكتر ماهم متمكنين، ودي مش مخاوف سياسية والله، بس الاتنين خطر على الثقافة، الاسرائيليين بيزوروا تاريخهم عشان يعملوا ان اليهود هم اللي عملو كل حاجة، والوهابيين بيطمسوا تاريخنا اصلا عشان نطلع احنا مالناش لازمة في الحياة، هم ايه؟ متجوزين في السر؟

غارة على حدودنا

اولا: الظاهر روسيا ح تعمل مع ايران اللي عملته معانا في سبعة وستين

احنا بقالنا خمسين سنة في الهم ده، يارب يطلعوا الايرانيين ناصحين ويتعلموا من اخطاء اللي قبلهم

ثانيا: انا مش عارفة هم ايه الظيطة اللي عاملينها دي؟

ثالثا: ايمان بدوي بعتت لي خبر بيقول ان اسرائيل بتعمل مقابر جماعية تحسبا لضربة نووية، هم بيستهبلوا وللا ايه؟ ماهم عارفين ان ايران ما عندهاش نووي

رابعا: غارة جوية اسرائيلية على الحدود المصرية

يا جدعان هي البلد دي مالهاش صاحب؟ حدودنا تنضرب كده ولا كأننا اهل الكهف؟

والمناورات اللي اتعملت قبل كده كانت جزء منها داخل حدودنا في البحر المتوسط

طب ما يسيبونا في حالنا يعني

البوست السادس، اصل مش جايلي نوم

زاهي لحواس ح يسمح للمصريين بزيارة الاهرامات

!!!!!!!!!!!!!!

مناطق الآثار تستقبل زوارها في العيد
والسماح للمصريين بزيارة الأهرامات


كتب - أشرف مفيد


أكثر من‏150‏ موقعا ومنطقة اثرية في جميع المحافظات تستقبل ابتداء من اليوم زوارها لقضاء أيام العيد حيث قام المجلس الاعلي للآثار بعمل الاستعدادات اللازمة لتسهيل الزيارة علي المواطنين بالتنسيق مع العديد من الوزارات والهيئات الأخري‏.‏ ويقول د‏.‏زاهي حواس الامين العام للمجلس الأعلي للآثار‏:‏ تم السماح للمصريين بزيارة منطقة الاهرامات بسبب اغلاق هضبة الاهرام التي يجري تطويرها حاليا ويتم بالتنسيق مع شرطة السياحة اخلاء أية مجموعات تسئ للاهرامات من حيث ممارسة الالعاب أو العبث بقيمة الأثر باي شكل من الأشكال‏.‏ وتيسيرا علي المواطنين تقرر تواجد مديري المناطق والمواقع الاثرية ابتداء من الصباح وحتي نهاية اليوم لضمان الحل الفوري لأية مشكلة طارئة‏.
--------
رمضان ولى هاتها يا لساني: بقى يا لاهي لغواص ح تسمح لنا ندخل بلدنا؟ وح تعين لنا بوليس عشان يراقبنا واحنا بنزور اثارنا؟ وقبل كده قال انا مش باسمح للمصريين بزيارة الاثار عشان نفسهم مضر على الاثار؟ نفسنا وحش من كتر ما بنشهق في الملوخية
انت يا عم التربي انت بتعمل ايه في حياتك غير عمال تنبش في قبور الناس وتطلع جتتهم وتفرج الناس عليها لما في الاخر ح تتسخط شكمان عربية منفس من كتر اللي بتعمله في الميتين ده؟ وانت بقى اللي نفسك طالع منه عناقيد عنب وسبايط موز؟ لما كنت لازق لاوباما وعمال يكلمك بقرف وزهقان منك؟ يا ترى كان شامم ايه عشان يكلمك كده؟ احنا نفسنا ده طالع منه ايه غير فول وبصارة وطعمية؟ يعني زي اللي كان بياكلهم اللي بنوا الاهرامات نفسهم، يعني كل الناس نفسها حلو وحنين واحنا اللي نفسنا طالع منه بواجير جاز؟ احنا نفسنا اوحش من اللي بياكلوا صراصير وفيران؟ ها وايه كمان؟ وقدمنا وحش على الاهرامات؟ وعينينا وحشة على الموميات؟ ومن جوانا غباوة وبنبر على التماثيل، ومعانا بسم الله الرحمن الرحيم بيكسر الازاز..انت يا عم انت واعي بتقول ايه وللا انت مش مسئول عن كلامك؟ لو ربنا ابتلاك بعاهة في مخك يطلعوا لك شهادة عشان ما نآخذكش بعد كده على هطرستك، احنا برضه ناس عندنا رحمة وكله الا المرض، ربنا ما يكتب على حد اللي انت فيه
حد يخيط له بقه ده، مش كفاية فضيحة لاس فيجاس؟‏

جولة في العالم الاسلام

حبيت اشوف العالم الاسلامي بيعيد ازاي لفيت لفة على التلفزيونات

قطر: جايبة مسرحية مصري بطولة احمد بدير

سوريا: اخبار عن بشار الاسد

لبنان: كله اغاني فرايحي، سبحان الله، اللبناني لبناني حتى لما يبقى المنار: ينعاد عليكن تارارارام، ينعاد عليكم تارارارارارام، ينعااااااد عليكم ترارام (ده مجرد فاصل)، قناة لبنانية تانية جايبة بحيرة البجع، وباقيين مهيصين برضه

البحرين: مجاميع كتيرة (بتاع ستمية وخمسين واحد كده) واقفة في الصحرا بتطبل وتغني وترقص

السودان: برضه واقفين في الصحرا بيطبلوا ويغنوا، بس هم خمسة بس، واقفين بترتيب الطول، تلاتة لابسين ابيض وواقفين في النص واتنين لابسين اخضر الطويل واقف على اليمين والقصير واقف على الشمال، وما بيرقصوش

كردستان: جايبة الكاميرا الخفية الامريكاني

الكويت: الاولى الكويتية جايبة مسلسل امريكاني والتانية كارتون امريكاني

العراق: بيعيطوا على ستنا فاطمة، ايوة ستنا فاطمة بنت سيدنا محمد عليه الصلاة والسلام

دبي: بيتكلموا في التليفون، مش فاضيين

ابو ظبي: جايبين مسلسل سوري

ايران: اخبار.. اخبار... اخبار، وبعدين اخييييرااا: برنامج اخباري للتعليق على الاخبار، وشكلهم بيستعدوا لحرب فعلا، ربنا يستر

الاردن: جايبين مزة ملبسينها عسكري وحاطين لها تلاتة كيلو مكياج ومخلينها تغني اغنية حماسية

ليبيا: عيال صغيرة لابسين اخضر بيغنوا للعيد والقائد

المغرب: لسة ما ابتدوش اصلا

السعودية: انا مش باتكلم على الخمسة وتسعين في المية من الفضائيات الممولة من السعوديين، انا باتكلم عن السعودية: السعودية الاولى: مسلسل كوميدي سعودي بطولة واحدة اسمها انتصار شرشاح، التانية: بيتكلموا عن الاكل السعودي بالانجليزي، السعودي تي في: واحد بيقول العقل السليم في الجسم السليم

عمان: من الواجب علينا يا اولاد ان نحافظ على صحتنا لانها نعمة من الله تبارك وتعالى

برنامج اطفال، بس على فكرة حلو، وفيه قيم كويسة ومعمول بطريقة لطيفة

وعاملين اعلانات توعية على انفلونزا اتش وان اف وان

اليمن: عيال صغيرة لابسة بدل وبيصوروا زي اغاني شكري ابو عميرة كده

مش لاقية تونس والجزائر، مع انهم كانوا بيجولي قبل كده، صحيح ما كنتش ح افهم، بس كنت ح احس

فلسطين: فيه الفلسطينية عمالة تكتب على الشاشة: قناة الوحدة الفلسطينية، وقناة فلسطين جايبين برنامج اطفال

مصر: مذيع بيقول: احنا النهاردة عايزين نتكلم عن العيد، واهم حاجة في العيد الكحك

تكبيرات

الله أكبر الله أكبر الله أكبر

لا إله إلا الله

الله أكبر الله أكبر

ولله الحمد

الله أكبر كبيرا، والحمد لله كثيرا، وسبحان الله بكرة وأصيلا

لا إله إلا الله وحده

صدق وعده

ونصر عبده

واعز جنده

وهزم الأحزاب وحده

لا إله إلا الله

ولا نعبد إلا إياه، مخلصين له الدين ولو كره الكافرون

اللهم صلي على سيدنا محمد، وعلى آل سيدنا، وعلى أصحاب سيدنا محمد، وعلى أنصار سيدنا محمد، وعلى أزواج سيدنا محمد

وعلى ذرية سيدنا محمد وسلم تسليما كثيرا

انا مش شايفة غير نادية الجندي في جرب الحواسيس

النهاردة ابتدوا يضربوا سامية فهمي، ومنة شلبي مش عارفة تنضرب كويس وتتخرشم صح وتترمي على طول دراع الممثل اللي بيضربها وتترزع في الحيطة، مش عارفة تقول: لااااعااااا، وهي مغطية الكاميرا بكفها كله ومع ذلك لوزها باينة من بين صوابعها. حتى لما بتقع على الارض مش بتتهبد زي ما نادية كانت ح تعمل

مافيش حد كان مناسب للدور ده غير نادية الجنسي، خصوصا بقى لو طلعوها في السن ده حامل، ونبيل يفضل زي ماهو شريف سلامة ويبقى هو زميل نادية الجنسي في الكلية، يا سلاااااااام، كان ح يبقى مناسب قوي لجو الخيال العلمي بتاع المسلسل، والجمل الحوارية، كلها كلها بتاعة نادية الجنسي: الرصاصة اللي ضربته بيها طههههرته وعملت منه بطططلللللل... انتوا العدووو انتوا اللي اختارتوا لنفسكوا ككككدددده من ايام دير ياسين واطفال بحر البقر. دي كانت ح تقول في الجمل دي قوالة، وكانت ح ترقص بقى مع شلومو وتعمل احلى كلام، وشلومو كان ح يحاول يراودها عن نفسها، ثم ان شلومو ده كان لازم يبقى سعيد عبد الغني، ازاي ما عرضوش الادوار ده عليهم؟ مع ان الطقم كله بتاعها: نادر جلال، وبشير الديك، وطريقة تمثيل احمد صيام: يا حبيييبببييييي، الورق اللي المخابرات المصرية بتسيبهولها على مستوى: خالتي بتسلم عليك، ماما جولدا، الاود الاسمنتية الكبيرة اللي مليانة عساكر اسرائيليين، الموسيقى التصورية الاسرائيلية اللي بتظهر اول ما يروحوا تل ابيب، المشهد الاخير اللي كلوز على وش سامية وبعدين ديزولف على علم مصر، بس نسيوا يحطوا صوت السادات او عبد الناصر، ماهي نادية اكيد كان ليها بصمتها

العمل ده فاشل فاشل فاشل

هو فيه كشري من غير صلصة؟ فيه عبد الحليم حافظ من غير بلوزات هاي كول فتافيت السكر او على الاقل قمصان مشجرة بياقات تستخدم كفوطة سفرة في بعض الاحيان؟ فيه احمد ماهر من غير عياط بالدموع حتى وهو بيمثل هولاكو؟ فيه استظراف من كتر غلاسته يضحك من غير زكية زكريا؟ فيه اغراء يعلم العفة ويتوب ابليس ويخلي كزانوفا يترهبن وراسبوتين يحج من غير نبيلة عبيد؟ فيه رقصة الشلاليت المميتة اللي تخليك قاعد متوتر وخايف على مناخير واحد من الجمهور من غير نجوى فؤاد؟ فيه أغنية اطفال "ثقافية" لتعريف الاطفال بالمزز ورجليهم من غير صفاء ابو السعود؟ يبقى مافيش جاسوسية من غير نادية

حركة سوزان مبارك تنجح فى نشر ثقافة السلام

ودي نشرتها على انهي منشر دي؟

على منشر سواقين الميكروباص اللي روحهم في مناخيرهم وكل لما تكلمهم يطلعوا لك الكرباج واخرها واحد دهس صحفي نزل يتخانق معاه

(الراجل بيقول: قلت له ابعد لادوسك قام ما بعدش..يعني الراجل عداه العيب يعني)

وللا العشوائيات اللي اي حوار بسيط بيبقى بالسنج؟

وللا في منشر الناس اللي بتحرق البيوت على غيرها؟

وللا عند الناس اللي ماشية تأفئف وتخانق دبان وشها في الشارع؟

فين السلام ده؟ اللي شافه يسلم لي عليه والنبي

وللا ثقافة الجبن والخنوع والخوف من الهوا واستقوا الغلبان على الاغلب منه عشان مش قادر على اللي اقوى منه بقى اسمها ثقافة سلام؟ ايه حرقة الدم دي في العيد؟

سعد نبيهة بيعيد عليكوا من طبق الكحك

وبيقول لكوا ضروري تتفرجوا دلوقت على قناة ميلودي افلام، حصريا: فيلم بطولة امينة رزق ومحسن سرحان وابنهم طالع كمال الشناوي

وبعدين استحموا حماية العيد

واتفرجوا على الغنوة دي، انا بحبها

الخطة الصاروخية الامريكية الجديدة تخدم اسرائيل في مواجهة ايران

من عند عرباوي

هو مش انا قلت كده امبارح؟ انا كنت باهبل ما كانش قصدي ابقى خبيرة اشتراطيجية؟

يا انا ربنا حط عليا النباهة فجأة قبل ما اموت بشوية عشان ما يبقاش نفسي في حاجة، يا اما للدرجة امريكا ما بتحترمش ذكاءنا، اكيد الاولانية طبعا، لان امريكا بتحترم كل الناس زي ما انتوا عارفين

هم المجاهدين دماغهم انضف؟

غالبا بتبقى دماغهم انضف

"لا يَسْتَوِي الْقَاعِدُونَ مِنَ الْمُؤْمِنِينَ غَيْرُ أُوْلِي الضَّرَرِ وَالْمُجَاهِدُونَ فِي سَبِيلِ اللَّهِ بِأَمْوَالِهِمْ وَأَنفُسِهِمْ فَضَّلَ اللَّهُ الْمُجَاهِدِينَ بِأَمْوَالِهِمْ وَأَنفُسِهِمْ عَلَى الْقَاعِدِينَ دَرَجَةً وَكُلًّا وَعَدَ اللَّهُ الْحُسْنَى وَفَضَّلَ اللَّهُ الْمُجَاهِدِينَ عَلَى الْقَاعِدِينَ أَجْرًا عَظِيمًا"


بص بقى مفضلهم بايه؟
"دَرَجَاتٍ مِنْهُ وَمَغْفِرَةً وَرَحْمَةً وَكَانَ اللَّهُ غَفُوراً رَحِيماً"


طب المغفرة والرحمة عارفينها، الدرجات دي ايه؟ الى جانب درجات الاخرة طبعا، هل فيه بقى درجة في الدنيا؟ انا باسأل مش بافتي، بس بالاحظ ان مخهم نضيف قوي، انضف من اي حد تاني، كنت قريت يا اما عند ابن القيم يا اما عند ابن كثير مش متذكرة ان العلماء لما كانوا يحتاروا في مسألة فقهية يبعتوا يسألوا أصحاب الثغور، يبقى الجهاد بينضف مخهم فعلا؟ طب بينضفه ازاي؟ هل مثلا الواحد لما بيبيع الدنيا ما يبقالوش اطماع فيها بيبقى تفكيره اصفى؟ هل مثلا مواجهة الموت المستمرة بتخلي الواحد دماغه انشط؟ بتحفز حاجة في التفكير؟ هل عشان مش شاغلين اود كتير في مخهم بالسفاسف اللي مخنا بيعج بيها؟ مش عارفة، انا عارفة بس ان مخهم حاجة تانية غير مخنا وخلاص، تلاقيهم يقولوا كلام كده يفاجئك بس تحس انه كومن سنس بس ما كانش خاطر على بالك ولا حاجة يعني، ما كنتش ح تقولها، ما تعرفش بيجيبوا الكلام ده منين ولا طريقة التفكير دي ازاي؟
:)
شفتوا حسن نصر الله النهاردة؟ قال كام حاجة كده فاجئوني بصراحة، زي مثلا ان السلاح النووي حرام، انا طول عمري مش مرتاحة من جوة نفسيتي للسلاح النووي ده ولا نفسي يبقى عندنا، بس فعلا السلاح النووي افساد في الارض، اول مرة اخد بالي، سواء استعمل، ولو ما استعملش تضييع فلوس، المفروض كل اللي عنده سلاح نووي مش ح يستعمله، طب مش الناس الجعانة اولى بالفلوس دي؟ مش الناس اللي بتشتغل وبتدفع ضرايب اولى انها تستفيد بيها في حاجة انسانية تخدمهم وتخدم الاجيال الجاية من بعدهم؟ ولو ح يستعمله اكيد ح يبقى حرام حرام حرام، حتى لو بيدافع عن نفسه ضد ابليس ذاته، لان فيه حيوانات ونباتات وحتى تربة الارض اللي من حق الاجيال الجاية انها تستخدمها كلها ح تتدمر، فناء للبشرية يعني، ومش فناء برحمة، ده امراض واوجاع واهوال ماحدش يتمناها، كارثة تاريخية، مين يحب يعمل كده في الانسانية الا اذا كان شيطان

فضائح امن الدولة فى معبر رفح اثناء فتحة شهر 9

الرسالة دي وصلتني من ايمان بدوي عبر الميل

هي معتصمة على المعبر ومهندس مصري نشرها على مدونته  

لو تعلمون ما في رمضان لتمنيتم أن تكون السنة كلها رمضان

انا مش عارفة السنة دي بالذات رمضان مأثر في مشاعريني وسنتمنتالياتي كده ليه؟ مع انه كان متعب بصراحة السنة دي، وقبل ما ييجي كنت خايفة منه قوي، بس اهو جه وخلص، مش عارفة ليه عمالة اسمع الغنوة دي واعيط
اول سنة اعمل كده في حياتي كلها

لو تعلمون ما في رمضان لتمنيتم أن تكون السنة كلها رمضان

هوبا تيتو مامبو

انا كنت عارفة انها ح تنضرب، كنت عارفة، ومن كام شهر جالي الهسهس ده وما تفهمش ميدو جايب الثقة دي منين يقول لي: ما تقوليش ايران ح تنضرب لبعدين الناس تقول عليكي مجنونة

وطبعا اول ما شفت البوم اسامة بن لادن الجديد (اللههههههه يررررحححححمهههه) جاي لنا من العالم الآخر ولقيته بيوجه رسالة للشعب الامريكي ويقول لهم انا عملت كده عشان دعمكم لاسرائيل قلت بسسسس، هم بيعملوا كده عشان عايزين يأهلوا الرأي العام لدعم اسرائيل، يبقى اسرائيل ناوية تعمل حاجة، ايه الحاجة اللي ممكن تعملها اسرائيل حاليا دلوقت؟ 

وقطعا ده كان شريط لشحن الرأي العام الامريكي لصالح اسرائيل، واللي سمع الشريط قال ان الكلام معقول، اقصد اللي سمع الشريط من العرب، قال ان الكلام معقول، طبعا، وهو ده المقصود، ان الكلام يبقى معقول بالنسبة لنا، لكن بالنسبة لهم المرحوم اسامة بن لادن عدو، والمجتمع الامريكي مسيطر عليه المسيحية الصهيونية، (راجع كتاب أمة اليمين) وبالنسبة للفلاحين والناس العادية دعم اسرائيل ده واجب ديني (ده في المسيحية الصهيونية بس عشان ماحدش يروح يمسك في المسيحي اللي جنبه، مافيش في العالم حد بيفكر كده غير الامريكان) تخيلوا مثلا شارون قبل ما يترمي الرمية دي قال لنا: انا ح اضربكوا عشان بتصلوا الجمعة... احنا؟ لا احنا ممكن نبطل صلاة الجمعة عادي، طب تخيلوا احنا من خمسين سنة لما كان عندنا كرامة وبن جوريون قال لنا ح اموتكوا عشان بتصلوا الجمعة، ح يبقى رد فعلنا ايه؟ 

خلاص، خلاص، ح نعمل ايه؟ ح نعمل ايه يعني؟ يعني هي ح تيجي اغلى من العراق؟ خلاص، الراجل مدي شورت نوتيس، بيقول لو ما عرفتوش توقعوا النظام الايراني لحد اخر السنة ح نضرب

وعشان بس مافيش معتوه يجيب اللوم على نجاد (ده احنا ح نسمع احلى كلام من هنا لحد شهر ديسمبر) الواحد لازم يقول الحق والمستحق والمستخبي والمستنيل على عينه، الناس دي مش ماشية في الحياة على ما تفرج كده زينا، مافيش عندهم تخطيط بأقل من عشر سنين قدام، يعني ضرب افغانستان ما كانش سببه حداشر سبتمبر لانه متخطط له من قبلها بعشرين سنة، وراجعوا بقى الواشنطن بوست نفسها وشهادات عملاء السي آي إيه. وبيحسبوا لكل حاجة، وبيدوها توقيت محدد، وبيحسبوا كل الاحتمالات المعقولة واللي مش معقولة ابدا كمان، وبيحطوا خطة لكل احتمال، حتى اقل الاحتمالات ورودا، الشهادة لله، انا مش عشان باكرههم افتري واضحك على نفسي، لا هم منظمين، وبيخططوا. يعني ضرب ايران في التوقيت ده متخطط له من ايام ما نجاد ده كان بالشورت

خلاص، ح نعمل ايه؟

توقعوا بقى:

1- اوباما مش ح يعمل حاجة خالص، واحتياطا هو جدد الدرع الصاروخي اللي في اوروبا واللي بيستهدف ايران، يعني وقت اللزوم ح يتدخل لصالح اسرائيل، بس ده احتياطا، غالبا هو عامل حسابه ان اسرائيل تخلص، ولو ما عرفتش تخلص ح يوجد اي حدث او اي حجة، امال القاعدة دي جددها ليه؟ ودلوقت بالذات؟ لكن مبدئيا كده كل اللي ح يعمله كده: تؤ...كدهو برضه يا قمر؟ تصاحبني ع القمر؟ وتسيبني معاه وتمشي لا حس ولا خبر؟ يا خبرررررررررررر، كده برضة يا قمر؟

2- الشهرين الجايين بقى اسمع احلى كلام عن الروافض المجوس الكفرة واستلم احلى فيديوهات واحلى رسايل على الميل بتاعك، وممكن فجأتن تلاقي لك شيخ طلع من البلالا يتكلم عن موقف الشيعة من حديث الافك، او ان الشيعة لما بيتوضوا ما بيغسلوش رجليهم، او ان الشيعة مسلطين على السنة ناموس كبير بابرة نحاس، ونتدهك احنا بقى في الجدل العقيم ده لحد ما الحرب تقوم، ويا سلام بقى،يا سلام لو واحد منهم طلع يستفز الشيعة ويقول لهم: الحسين كان غلطان

3- حسن نصر الله ح يتشتم، ما تسألنيش ليه؟ بس هو ح يتشتم وخلاص، كتير، زي ايام الشرشحة بتاعة يا شيخ قرد وقلة الادب دي

4- الحكومة المصرية ح تساعد من تحت لتحت، او يمكن من فوق لفوق زي ايام غزة الله اعلم، تطلب زي ما تطلب، بس بعض ممن يسمون انفسهم بالمعارضة المصرية ح تلاقيهم عاملين صدى صوت للمعارضة الايرانية، ح تعمل ايه المعارضة الايرانية؟

5- المعارضة الايرانية قبل واثناء الحرب ح يبقى لها دور كبير في ضرب الجبهة الداخلية وح يقعدوا بقى يشتموا في نجاد ويشيطنوا نجاد لانه هو السبب في الحرب دي وهو السبب في الخراب والدمار وهو السبب في خرم الاوزون وهو السبب في الاحتباس الحراري واحتباس البول كمان، وهو اللي جاب السرطان للاطفال اللي في مستشفى سبعة وخمسين تلاتة سبعة وخمسين وح تلاقي هنا بقى مطبلاتية كتيييييييييييييييييييييييير قوي، هنا في مصر بالذات دونا عن كل الدول العربية، يقولوا الكلام ده بالظبط ويكرروه زي البغبغانات بحيث تبقى الحكومة بتساعد من تحت لتحت، او من فوق لفوق، والمجتمع المصري ما بين متدينيين بيتكلموا عن الروافض الكفرة وما بين مش متدينيين بيتكلموا عن النظام القمعي اللي تسبب في الحرب، اشمعنى؟ عشان برغم من كل الهم اللي احنا فيه ده، مصر مهمة، مصر مهمة قوي، ورأي الشارع في مصر مهم، لكل الناس، وكل الناس شرق وغرب بيسألوا عن رأي الشارع المصري

احنا مهمين قوي كده ليه؟

والنبي ياخويا ما اعرف، الناس مخمومين فينا، وجزء كبير من اضعاف النظام الايراني انه يحس ان مالوش صدى في الشارع العربي (والمصري بالذات-انا باقول الشارع مش الحكومات) في اثناء مواجهته اسرائيل، لانه اصلا مسود وشه مع المعارضة وماسكين في شواشي بعض عشان المعارضة بتكرهنا، اه، بيكرهوا العرب وبيحتقروهم، وحاسين ان ايران بتقدم تضحيات لناس قلالات الاصل ناكرين فضلهم وجميلهم، زي منطق بتوع مصر اولا كده (المعارض الايراني اللي كان بيراسلني قال لي: احنا عادينا اسرائيل اول ما قامت الثورة وعملنا سفارة لفلسطين وعادينا العالم عشانها واول ما قامت الحرب بينا وبين العراق عرفات وقف جنب صدام ضدنا...اممم هو احنا باين قلالات الاصل فعلا)، ولما ايران تبقى في حرب والشارع العربي بيقول لهم يا روافض او يا نجاد يا نظام الملالي انتوا السبب في الحرب على بلدكوا، ده يسهل المهمة على البديل اللي عايز يوقعهم عشان يتحالف مع اسرائيل وامريكا ضد العرب لاننا "قلالات الاصل" وما نستاهلش كل التضحيات وانهم يعادوا العالم عشان خاطرنا

( امال تفتكروا هم معاديين العالم ليه؟ مين يعني السبب في ان العالم كله ضدهم؟ يعني لو ايران بكرة اعترفت باسرائيل - زي ما المعارضة عايزة - وضربت طناش على يوم القدس وبلا فلسطين بلا وجع دماغ، وفضل نظام "الملالي" تفتكروا ايران ح تفضل تحت الحصار؟ وتفتكروا، مش بقى امريكا واوروبا، تفتكروا اي نظام عربي ح يعاديها؟ وللا الامارات ح تسأل عن الجزر وللا ح تعبرها؟ ده ح يبقوا حبايب وجزر ايه؟ وقول له يا صاحبي وحبيبي قول له يا صاحبي وحبيبي اللي في جيبك في جيبي الللللي في جيبك في جيبي على رأي شريهان)

والمعارضة بتاعة: لا غزة ولا لبنان نحن فداك يا إيران. صوتهم ح يعلا مع قلة ادبنا احنا هنا

خلاص بقى

خلاص

ح نعمل ايه؟ ما نزعلش بقى، كل اللي يجيبه ربنا كويس، ما نزعلش، نحمد ربنا على السراء والضراء، واللي عايزه ربنا ح يكون

طب ايه يعني لو ايران انضربت وللا ولعت حتى؟ 

يا لهوتيييييييييييييي، مش عايزة اقول مش عايزة اتخييييل

خلاص بقى، خلاص، كل اللي يجيبه ربنا...احم، اذا ما كانش كويس يبقى على الاقل نستاهله اكيد 

حد ملاحظ ان وكالة عطية بتدافع عن الاخوان؟

هي مش بتدافع، بس هي مقدماهم على انهم بني ادمين، واحنا كلنا عارفين ان الاخوان مش بني ادمين ولا حاجة، ثم ان انا ما توقعتش كده بصراحة عشان كده ما اتكلمتش عن المسلسل من اول رمضان

هو الحقيقة فيه اسباب تانية، لان المسلسل عن قصة خيري شلبي بس سيناريو وحوار واخراج رأفت الميهي، ومارضتش اعمل دعاية للمسلسل احسن حد يقول لي انت بتنافقي الاستاذ بتاعك، فسكت، خصوصا ان واحد مرة دخل يستظرف على اهلي لما جبت سيرة رأفت الميهي مرتين في المدونة. انا متابعة المسلسل وعاجبني قوي، قوي يعني، لانه مش مسلسل، مختلف خالص عن المنهج بتاع المسلسلات اللي احنا واخدين عليها، وده سبب تالت خلاني ما اتكلمش عنه عشان مش كل الناس ممكن تتقبل غير المألوف

هو طبيعة رأفت الميهي انه مش بيطلع شخصيات شريرة ابدا، كل شخصية ولها اعذارها ولها الجانب الانساني بتاعها، حتى الحرامية والنور والقوادين اللي طالعين في المسلسل، بس مطلع شخصية قيادي اخواني (المفروض ان الاحداث بتدور في الخمسينيات وهي ملحمية فيها جانب صوفي) وشخصية القيادي الاخواني، زي الاخوان اللي بحق وحقيق، مش زي اللي بيطلعوا في التلفزيون، وشخصية محبوبة من كل سكان الوكالة، حتى الطبال اللي بيساعده على الهرب. طبعا فيه مواقف كوميدية تفطس من الضحك زي ان واحدة من السكان قالت انها بتتبرع للسيدة زينب فقبضوا عليها بتهمة انها بتدي فلوس لزينب الغزالي، وقبضوا على ولادها الاتنين المعاقين ذهنيا عشان قالت لهم دول اخوات قام محضر الجلسة غلط وكتب: دول اخوان: "بدل ما يكتب اخوات اخرها طبق وفيه حتتين لحمة كتبها سلطانية وفوقيها حتة لحمة واحدة". وواحد بنته اتجوزت اخوانجي فراح هو وصاحبه يفضوا البيت من اي حاجة تجيب لهم تهمة وهم بيفتشوا صاحبه طلع مصحف وقال له: ايه ده؟ مصحف؟ نهارك مدوحس، انت عايز تودي نفسك في داهية؟ ولما قفش بنته التانية ماشية مع واحد وكان ح يضربها صاحبه قال له: سيبها، ماهو مش ممكن تبقى اخوانجي وبنتك مشيها بطال، سيبها تعمل اللي هي عايزاه

واضح ان رأفت الميهي نفسه مش واخد باله ان التلفزيون المصري رفض المسلسل بتاعه عشان السبب ده، هو صدق التقرير بتاعهم يا عيني، كتبوا يقولوا ان المسلسل دون المستوى الفني، على رأفت الميهي يعني، دون المستوى الفني على شغل رأفت الميهي

:)

انا مش عارفة المسلسل ح يتعاد تاني امتى، لانك لو ما تابعتوش من اول حلقة مش ح تفهم حاجة، ح تلاقي عفاريت، وسحرة، وناس بترقص، وناس بتصلي، مش ح تفهم، لازم يبقى من الاول متابع حلقة حلقة، وهو بيبتدي بايقاع هادي ويفضل كل حلقة يسرع يسرع، فدلوقت هو في اسرع حالاته لانه قرب يخلص

هو طبعا كون ان المسلسل مطلع الشخصيات كلها انسانية دي حاجة تمشي مع الحرامية والقوادين لكن ما تشميش مع الاخوان، انا فوجئت، لاني عارفة ان رأفت الميهي المفروض انه يبقى مثقف، وطبعا كلنا عارفين انك عشان تبقى مثقف تعمل ايه؟ تشتم الاخوان، ده الف باء الثقافة يعني، امال ح تعمل ايه يعني؟ ح تقرا لا سمح الله؟ وليه التعب؟ ما تشتم الاخوان وتختصر وح تلاقي الثقافة هبطت عليك من حيث لا ترجو ولا تحتسب، الثقافة دي اصلها رزق ومفتاح رزق الثقافة شتيمة الاخوان، وفضلت مستنية كل حلقة عشان اشوف الزنبة اللي ح يفقعها في الاخوان، ما لقتش، عادي، تصوروا، مطلعهم ناس عادية، وبني ادمين يعني، بيحسوا وبيفهموا وكل شخصية لها عيوبها ومميزاتها بشكل مستقل مش استمبات، ومش مخليهم يرفعوا حواجبهم ولا يكشروا ولا يتآمروا على امن البلاد وصالحها، وكل واحد فيهم له اسباب للانضمام للاخوان، والاسباب وجيهة، ولما اتقبض عليهم متعاطف معاهم عادي زي اي انسان لما يتقبض عليه وكده يعني

سبحان الله

وانا اللي كنت فاكرة رأفت الميهي مثقف؟ كان بيخمني

هي الحاجة نوال السعداوي عايزة مننا ايه في نهار رمضان كده؟

مش بافتح المصور لقيتها في وشي، عمالة تقول أمي علمتني التفكير وابويا علمني الحرية، حسستني انها ولدت في فرنسا ونشأت وترعرعت في ايطاليا واخدت شهادتها الثانوية من جبال الالب

بقى فيه فلاحة في الدنيا ما بتفكش الخط ح تقول لبنتها: "إن الله هو الحرية" لما بنتها تقول لها المدرس ضربني عشان سألته مين اللي خلق ربنا؟ ايه المعر ده؟ يعني الست في اوحش الحالات ح ترنها علقة تانية وفي احسن الحالات ح تقول لها: معلش يا ضنايا، خدي عسلية 

ثم مين ابو العلاء المعري اللي قال:  

سكان العالم قسمان: قسم لهم دقون وليس لهم عقول وقسم لهم عقول وليس لهم دقون

ابو العلاء المعري قال كده؟ يا سبحان الله، اول مرة اعرف ان بق ابو العلاء المعري نازل على رقبته دوغري كده من غير دقن، مين الناس اللي مالهمش دقون دول، يمكن قصده اللي عندهم لغد كبير قوي بحيث تبقى دقنه مدفونة في... ايه ده؟ ده قالها في انهي عصيدة دي؟

وابو العلاء المعري قال سكان العالم؟

لا، واللي روى بيت الشعر العبقري ده عن ابي العلاء المعري هو السيد الوالد، الحاج سعداوي، قال الحاج سعداوي في الارياف من حوالي ييجي تمانين سنة كده قال لبنته، في الارياف: .. لا يمكن ان يفرق بين الناس على اساس الجنس او الجنسية او اللون او العرق او العقيدة

دي متربية في الريف الانجليزي؟ لا والله، ولا الريف الانجليزي في اول القرن اللي فات كان فيه حد بيقول الكلام ده

الله، هو مش جان بول السعداوي وفرنسوا سجان عبد الخالق دول اللي كانوا ختنوها وعملت لهم فضيحة من كام سنة ايام حملتها على الختان وازاي قهروها وجوزوها وهي عيلة وودوها عند البلانة تسلخها زي الفرخة، مش هي كانت كتبت كده من حوالي خمستاشر سنة في نفس مجلة المصور دي والله، فجأة كده بقوا بيقروا شعر شيلي وبيحضروا حفلات سيمفونية ويرقصوا سالسا؟