مبدئيا: طوني بلير اتحشر وبيقول لنا اجلوا الاستنخابات... مين الحمار ده؟ صنعته ايه يعني؟ هو مال امه؟
ثم... أأمن حاجة لضمان الديمقراطية ان شاء الله، اننا نعمل انتخابات، وبعدين نكتب الدستور
ولما نكتب الدستور، الجيش بتاعنا حيبقى وضعه زي سابق، يعني حبة علينا وحبة عليه، يعني مش حنتدخل في مالياته، وهو ما يتدخلش في سياستنا
الحقيقة اقتراح ان جيش مصر يبقى زي جيش تركيا يرقى الى الخيانة العظمى
الجيش المصري عقيدته حماية الوطن وسلامة اراضيه وحماية الشعب.. الجيش التركي زي الداخلية، شغلته حماية الدولة والنظام، الجيش التركي انقلب على الديمقراطية اكتر من مرة، الجيش التركي له صلاحيات حماية علمانية الدولة والدستور لإن اتاتورك عمل انقلاب.. الاتراك ما بيعملوش ثورة كل تلاتين سنة زينا... ما بيعملوش ثورة خالص، اللي بيقلب نظام الحكم هو اللي حقه يبقى له الصلاحيات
واللي قلب نظام الحكم عندنا هو الشعب.. وبالتالي هو اللي يبقى له الصلاحيات
الجيش وقف جنب الشعب يوم 11 فبراير، وعشان كده ما قبل 11 فبراير احنا ما نعرفش عنه حاجة ومش عايزين نعرف عنه حاجة، واللي بيهدد بفتح ملفات ما قبل 11 فبراير مش عايز يفتح الملفات دي الحقيقة، هو عايز يقعد الجيش لحد ما يعمل معاه الصفقة الآتية، بمساندة وموافقة من امريكا
انا حالخص لكم الموضوع ايه بالظبط على لسان واحد قال لي كده في وشي وما اتكسفش يصارحني، والحمد لله ان كان فيه شاهد قاعد، الحكاية وما فيها كما يلي:
رحنا للشخص الفلاني ده، انا وصديق، ضمن لفة كنا بنلفها بحثا عن الاجماع الوطني وتوحيد الصف. الشخص الفلاني ده الظاهر انه اهم مما يبدو.. ده شخص يبدو انه حد مالوش سلطات كتير، وفيه ناس بتثق فيه، بس يعني مش الموفي ستار ولا حاجة، لكن هو هو نفس الشخص ده قابلته كذا مرة وقال لي على كذا حاجة بعدها بيومين لقيتها بتتحقق، بعدها بشهر لقيتها بتتحقق، بعدها باسبوع لقيتها بتتحقق، طبعا انا واحدة سليمة النية، نقية السريرة، مرهفة الانف والاذن والحنجرة قلت سبحان الله.. راجل عنده بعد نظر
بس بعد اللي هو قاله، ثم اللي عرفته بعد كده، يبدو ان الراجل ده بعيد النظر، طايل الايد، مسموع الحس مشرئب الفلنكات شلولخ، وهو ما يفسر التكبر اللي كان بيكلمنا بيه
قال لنا الآتي:
اهم حاجة فك الارتباط بين المجلس وبين الاخوان، دلوقت المجلس متخوف من فتح الملفات المالية بتاعته، ففريق القوى الوطنية اللي مش اخوان المفروض يقدم للمجلس حاجتين، اول حاجة انه ما يتحاسبش ماليا، تاني حاجة ان يبقى له سلطات حماية علمانية الدولة والدستور فهو كده حيلاقي نفسه كسبان، ودي حتبقى قضية اجماع وطني... من غير الاخوان طبعا. والاخوان حيضطروا يسكتوا والا حيبقى قدامهم انهم يواجهوا الجيش وهم مش حيواجهوه
انتهى
ههههههههههههههه
اجماع وطني من غير الاخوان ده بيبقى فيه مين؟ انا وتلاتة صحابي صح؟
طبعا انا ما اعرفش صاحبي اللي حضر معايا حيزعق لي اني قلت الكلام اللي دار ده ولا لا.. بس عادي يعني، علقة تفوت ولا حد يموت بجملة خنقته مني، المهم اني احذر من خطورة الكلام ده، لإنه خطر على مصلحة الوطن وعلى مصلحة القوات المسلحة وعلى مصلحة الثورة وعلى مصلحة اي حاجة في الدنيا وما بيصبش غير في مصلحة امريكا
اولا: الفرق بين القوات المسلحة المصرية وبين الداخلية زي ما قلنا ان القوات المسلحة بتحمي الشعب والوطن والداخلية بتحمي النظام، واحنا عايزين نعيد بناء الداخلية بحيث انها تحمي الشعب مش تحمي النظام، مش اننا نغير عقيدة الجيش بحيث يبقى الداخلية والجيش ضد الشعب لصالح النظام
ثانيا: يعني ايه الاخوان حيضطروا يسكتوا والا حيواجهوا الجيش؟ هي بقت كده؟ تهديد بالسلاح يعني؟
ثالثا: عجبك ولا ما عجبكش المؤسسة العسكرية المصرية مؤسسة وطنية.. وطنية يعني ايه؟ يعني ولاءها للوطن مش للدولة. وده اللي نفعنا. وده اللي احنا عايزينه يستمر.. ولازم يستمر، ليه؟ لإن بقى بجد مصر ليست تركيا، احنا شعب بيعمل ثورة كل تلاتين سنة:
1882
1919
1952
1977
2011
يعني على الفين حاجة واربعين عيالنا حيعملوا ثورة كمان.. 1882 كانت هوجة عرابي، شعب وجيش، 52 كانت اعتصامات شعبية ثم الحركة المباركة للجيش، 77 السادات نزل لنا الجيش وفضل يبوس في الناس والناس تبوس فيه، 2011 مبارك نزل لنا الجيش فخلعه، بس تغيير عقيدة الجيش بالطريقة دي - وهو ما تسعى له الولايات المتحدة بقالها تلاتين سنة وما عرفتش في عز ايام المخلوع - حيخلي عيالنا لما يعملوا ثورة سنة 2046 الجيش يضربهم، لان شغلته يحمي الدستور بقى.. مش يحميهم هم
يعني مبارك ما يعرفش يغير عقيدة الجيش واحنا اللي نغيرها له بعد الثورة؟
رابعا: ماحدش عايز يفتح ملفات الجيش المالية.. الرغي ده مجرد تهديدات لاجبار الجيش انه يفضل قاعد، لكن ساعة الجد ما عملنهاش قبل كده ومش حنعملها، دي حاجة كده زي المادة التانية، ماحدش قابل اي تغيير فيها
خامسا: احنا في التوقيت الحالي لنا وضع حرج.. احنا موقعين اتفاقية حاطانا كلنا في مزنق ابن كلب، واللي يقرا ويكيليكس يعرف ان الجيش فضل يتحايل على الضغوط الامريكية من خلال تذرعه بالرغبة الشعبية، وولاء الظباط الصغيرين، وعقيدته اللي تنص على حماية الوطن فقط... و"كان على عيني والله يا امريكا... بس ما باليد حيلة بقى وآدي الله وآدي حكمته، لو نفذنا اللي بتقولي عليه الظباط الصغيرين والشعب المصري اللي ولاءنا له حينقلبوا علينا.. والله لنسيبها لكم ونستقيل ومنكم للناس بقى، احنا مافيش في ايدنا حاجة نعملها"... وشغالين على كده بقالهم تلاتين سنة، وده اللي نفعهم وخلاهم ما يشاركوش في الحرب على الارهاب، ويفضلوا يتدربوا على الجبهة الشرقية، وما يتعاونوش عسكريا مع اسرائيل.. الخ الخ الخ.. تعالى انت بقى لبس الجيش بتاعنا في الحيط واديله صلاحيات تعريه قدام امريكا: على عينك فين بقى؟ ما انت عندك صلاحيات اهي، استخدمها ونفذ اللي احنا طالبينه ماذا والا حطربقها والله..
سادسا: ايه الهوس بتركيا ده؟ ايه تركيا دي معلش؟ انتوا صدقتوا نفسكم؟ ايه تركيا؟ ايه تركيا؟ ايش جاب لجاب يعني ما تخلوناش نقول كلام شوفيني، هي تركيا عملت ثورة عمرها؟ احنا كل ما حد يكلمنا نعمل ثورة، ايه الشعب اللي زاهد في الحكم ده؟ يعمل ثورة وعايز غيره يحكم ليه؟ وبعدين الشعب ملزوم يحمي قواته المسلحة، مش يعريها قدام الاجانب
يا اما بقى عايزين تعملوا العمايل دي في الدستور يبقى تلغوا اتفاقية كامب ديفيد.. مش تعدلوها، تلغوها... خالص، لان ده اسمه تسليم اهالي ده
السلطة تبقى في ايد الشعب
حماية الدستور مهمة الشعب
حماية القوات المسلحة وعقيدتها مهمة الشعب
البلد دي بلد الشعب ومافيش مؤسسة مهما علا شأنها يبقى لها سلطة على الشعب، الشعب هو اللي له سلطة على كل المؤسسات وهو حر فيها يفردها ويتنيها، بفلوسه وشقاه وضرايبه وتعبه، وبمزاجه بيسيب حاجة ويقول مش عايز اعرفها، وبكيفه يقول لا كده ما ينفعش... ما تحكموش على رقبته حد.. ابدا، مافيش غير ربنا بس هو اللي يتحكم على رقبته، ولا عايزينا نبقى زي الجزائر؟
واللي خايف من الشعب بقى يروح
ايه يا اخواتي ده؟
هو الشعب ده عفريت بيطلع لكم بالليل؟
النخبويين خايفين من الشعب لينتخب الاسلاميين
والجيش خايف من الشعب لينتخب لهم واحد خاين يعمل فيهم اللي عمله مبارك
وامريكا وبلير خايفين من الشعب لينتخب لهم واحد ضد اسرائيل
بالنسبة للنخبويين، يقدروا يشوفوا لهم شعب تاني مدام احنا مش لادين عليهم... والشعب ده ينتخب اللي هو عايزه، والبلد حتتعمل زي ما هو عايز، وبطلوا تفضلوا تقولوا حنبقى ايران.. يا كدابين يا كدابين يا كدابين يا كدابين.. احنا حنبقى ايران؟ هو فيه بلد في الدنيا فيها محجبات بيرقصوا في زفة في الشارع غير عندنا؟ حنبقى ايران ازاي يعني؟ حيعملوا ايه؟ واحنا من امتى بنسمع كلام حد اصلا؟ البنات بتلبس حجاب لوحدها، لو الدولة طلعت قرار بفرض الحجاب البنات كلها حتمشي بالمايوه في الشارع... ويافطة ممنوع الوقوف قطعيا اللي تحتها عربيات راكنة صف اول وتاني وتالت وعربية كارو تشهد على كده... حيعملوا لنا ايه الاسلاميين؟
والمسيحيين اللي خايفين من الاخوان.. وحياة اعتصام ماسبيرو اللي عملتوا فيه قسم رجالي وقسم نسائي ولما جيت اولع سيجارة فضحتوا امي وواحدة ست لابسة تايير اسود وطرحة سودا وجزمة ريم سودا قالت لي: احنا في مكان محترم يا انسة اطفي السيجارة، فيه ست محترمة تشرب سجاير؟ وكمان قدام الناس؟
انا؟
طب بذمة النبي انت بالذات الاخوان حيعملوا فيكي ايه اكتر من اللي انت عاملاه في نفسك؟ حبست لي دمي وقعدت اقول يا رب جوزها يكون بيخونها مع طوب الارض وهي مسودة عليه عيشته كده، بعد شوية جوزها جه ياخد منها ساندوتشات عبر الحاجز اللي بين الحريم والرجالة وشفته بقى الحاج... يخون مين؟ ده يوم ما يحب ينحرف حيتفرج على ليلى الشايب في قناة الجزيرة
طب الاسرة دي السلفيين حيصوروهم من كل الزوايا ويكتبوا تحت صورتهم: اسرة من اهل الجنة، ويعلقوها على المنبر
بالنسبة للجيش اللي خايف منا ننتخب له حد خاين يعمل فيه اللي مبارك عمله فيه
طيب على فكرة احنا عمرنا ما انتخبنا حد خاين.. احنا خلعنا الخاين.. اللي عمرنا في حياتنا ما كنا انتخبناه، لا هو ولا الخاين اللي قبله، ومش احنا اللي يتخاف منا فيما يخص الخيانة دي ابدا.. ابدا.. ده احنا فللي
بالنسبة لامريكا.. نعم؟ مين دخلكوا علينا اودتنا واحنا بقميص النوم؟ ايه دول اصلا؟
-------
الاخوان بيتصرفوا بغباوة؟ عادي.. طول عمرهم، بس لهم حق النصيحة علينا
حوار الدستور اولا ده حوار فاكس وما حدش مهتم بيه ولا يهم اي حد من الناس، بس فيه خطورة ان امريكا تضغط في سكته والناس بتوع الدستور اولا صوتهم عالي، ما بيوصلش للشارع، لكن بيوصل لبلاد الفرنجة
ضغط بلاد الفرنجة مالوش اي وزن لو الشارع صاحي
والشارع مش حينزل يقول: الدستور مش اولا
العودة لقضايا الاجماع الوطني هي الاساس
فيه قضايا اجماع وطني كتير جدا، زي الامن الوطني، الداخلية، الحد الادنى والاقصى للاجور، محاكمة مبارك اللي ضربوا عليها طناش، استرداد الفلوس، حتى ممكن المجلس العسكري يساعدنا ويعمل بالونة من بالونات الاختبار، زي مثلا انه يقول انه حيفرج عن جمال مبارك مثلا.. قوم الناس تسخن، كده يعني، لاغونا، انشالله حتى فتح المعبر بشكل طبيعي يا اخي، ولما قضايا الاجماع الوطني صوتها بيعلا الخوازيق اللي بتزرعها امريكا بتتلاشى، خصوصا ان البرادعي حلها حل لطيف وكويس ورخيص وابن ناس وقال نعمل وثيقة فوق دستورية.. اهو عداه العيب اهو الراجل، حتى لو مش عاجباك يا سيدي كل المواد اللي هو اقترحها، نتناقش فيها، انما من حيث المبدأ وماله، اظن دي تخرس بتوع الدستور اولا خالص.. ولا هه؟
كل الاطراف دلوقت غلطت... واما البشر يتفرقوا تلقي السما بتنفض.. كده السما انفضت كده
يوم 8 يوليو جاي، وعايزين نعمله للداخلية، بلا دستور اولا بلا دستور ثانيا بلا دستور خالص... احنا عشنا 18 يوم من غير دستور، حصل ايه؟ انجلترا عايشة من غير دستور
احنا حنولع في امه الدستور ده.. مش عايزين حد يمضينا على كومبيالات، من النهاردة مافيش دستور.. احنا الدستور.. احنا الدستور
وبلا اسلامية بلا علمانية بلا نيلة
احنا نتكلم في التفاصيل ثم التفاصيل ثم التفاصيل، تفاصيل بناء الدولة دي، عايزينه يبقى ازاي؟
اول تفصيلة: عايزين وزارة الداخلية بتاعتنا يبقى شكلها ايه؟
ومن هنا لحد 8 يوليو الاخوان يبطلوا غباوة والا حيلبسوا في الحيط، والقوى الوطنية الاخرى تبطل حركات قرعة واتصالات مش تمام، والنشطاء يسيبوا الجيش في حاله، هو من ايد الشعب دي لايد الشعب التانية بس انتوا وضحوا للشعب نفسكوا يعني وهو يكلمهولكوا... احنا عايزين نستعيد قدرتنا على الحشد
وعايزين حوار مجتمعي في تفاصيل بناء الدولة، مش عناوين لا تودي ولا تجيب ولا لها اي اثر مباشر على حياة المواطن وعاملة كده كأن حد بيحاول يجرنا نمضي على كامب ديفيد تاني
لا يا عم يفتح الله.. ما بنمضيش على ورق، احنا بنايين مش كتبة
نبتدي باعادة بناء الداخلية اول حاجة، ونحشد ليوم 8 يوليو على كده، ثم ننتقل بقى الى تفصيلة اخرى، الناس مش حتتصالح عشان قلبها على البلد، الناس حتتصالح عشان مصلحتها، والاخوان من ناحية، وبقية القوى الوطنية من ناحية تانية بيضروا بمصالحهم هم المباشرة... وانا عارفة انهم ما تهمهمش مصلحة البلد، بس مصلحتهم في خطر، وحسبي الله ونعم الوكيل
اه نسيت
بالنسبة للمسيحيين.... ماحدش يعملهم حجته، المسيحيين مش عايزين حاجة غير يصلوا بس، على فكرة، سيبوا لهم كنايسهم، وسيبوهم يبنوا كنايس ويفضلوا يصلوا يصلوا يصلوا... ما بيعملوش حاجة في حياتهم غير الصلاة، ما تسيبوهم يصلوا، اهي بركة
