Wednesday 3 November 2010

بخصوص رئاسة تحرير ابراهيم عيسى للكرامة مكان الاستاذ عزازي

 تحديث:
ده بيان حزب الكرامة عن الموضوع اللي حصل
اللي هو مش موضوع اساسا.. 
-------------

التعليق الوحيد للي حصل من اول امبارح بداية من برنامج القرموطي، مرورا ببيان الاستاذ عزازي - وهو شخص كلنا بنحبه وبنحترمه واولنا ابراهيم عيسى - وانتهاء بتقديم الاستاذ عزازي لاستقالته.... كل ده وماحدش لحد دلوقت من الصحافة فكر يتصل بابراهيم عيسى، ولا ابراهيم منصور، ولا اي حد من المغامرين الخمسة، بالرغم من ان المغامرين الخمسة مصدر معلومات اول واي حاجة جديدة بتحصل ابراهيم عيسى بيوافيهم بيها، التعليق الوحيد المناسب هو الآتي:
واحد ماشي الساعة تلاتة الصبح على الطريق الصحراوي قام العجلة نامت، نزل، بص حواليه لقى فيلا بعيدة، مشي ناحية الفيلا وهو عمال يفكر في نفسه: دلوقت اروح اخبط على الفيلا دي، حيفتح لي راجل بالبيجامة، والنوم في عينيه، وحيقول لي: عايز ايه، حاقول له مساء الخير حيقول لي قول صباح الخير، اقول له انا اسف على الازعاج، يقول لي لو كنت اسف ما كنتش خبطت على الناس في ساعة زي دي، حاقول له اصل العجلة بتاعتي نامت، حيقول لي نعم يا روح امك؟ حاقول له اصل مافيش حواليا... حيروح مزعق ويقول لي: اما انك حيوان صحيح، دي فيلا يا افندي، بيت، مش محل بتاع كاوتش، انا مال امي عجلتك نامت؟ حاعمل لك ايه؟ ده وقت تخبط فيه على الناس؟ مش عارف حتى تشيل معاك استبن مدام مسافر متأخر كده؟ وتخبط على الناس في وقت متأخر زي ده؟ ايش عرفني انك مش حرامي؟ قتال قتلا؟ نصاب؟
وهو بيفكر كده راح حاطط ايده على الجرس راح فاتح له راجل بالبيجامة والنوم في عينيه وبيقول له: عايز ايه؟
راح صاحبنا قال له: مش عايز من وش امك حاجة.. ينعل ابو شكلك
--------------------
ويالا بقى.. كل واحد عمل باي باي من بعيد لابراهيم عيسى بقى متربي معاه، وكل واحد نشروا له رسالة في بريد القراء بقى: كنت باشتغل في الدستور زمان وعارف الجو هناك من جوة شكله ايه، وكل واحد عمال يفتي ويألف
لو فيه حاجة، حتتنشر في موقع الدستور
وقبل ما تتنشر في موقع الدستور حيعرفها اصحاب الشأن على الاقل، ولا حتى حيبقوا سامعين بيها
هو جابر القرموطي ده مش عارف يتصل باي حد من الدستور؟ اي عيل صغير كان حيدله
ده ايه القرف ده ياربي، هو فيه كده في الدنيا يعني؟ يعني الناس مطعونة في كرامتها، ومرفوتة من شغلها، وفيهم اللي نايم في الشارع، وكل يوم والتاني شغلتهم في الحياة انهم ينفوا: والله ما اخدنا فلوس، والله ما سعينا للبيع، والله ما عملنا صفقة سرية، والله دفعت الحساب بتاع العشا اللي كان فيه رضا ادوارد، والله ما تهربنا من الضرايب، والله ما اشتغلت في الحياة، والله ما حاكتب في الوفد، والله والله والله
طب والله ماهو معلق بقى على الموضوع ده

15 comments:

سواح في ملك اللــــــــــــــــــه- said...

نفسي اعرف انتي تاعبه دماغك ليه الموضوع خلص فهمتي ولا نقيب صحفيين ولا الكرامه ولا الكلام ده كله الدستور(( تفرق دمه بين القبائل)) لفهمي بقي

hala said...

اول الازمه قرقعتي دماغنا بابراهيم عيسى عشان اقالوه بطريقه مهينه ...قلنا ماشي ..لانه عيب المثقفين يتصرفوا بهذه الطريقه المشينه مع زملائهم
ولان حضرتك مقرقعه دماغنا بالصحفيين البيعيطوا ومش لاقيين شغل وقاعدين عالرصيف ومتمرمطين مش لاقيين حد يبص لهم
طب ...اذا همه مش قد العمله اللي عملوها وبعدين انتي جرجرتيهم وراكي وحلفتي ايمان مغلظه ..لازم نرجع الدستور وفوقها ابراهيم عيسى ...اذا انتوا مش قد المسؤليه .....لييييييش تخربي بيت الصحافييين الغلابه ؟؟؟؟؟
كان لازم همه يكونوا اوعى من كده ويعرفوا كييييييف يحافظوا على ماء وشهم بدل هالبهدله
ششششوفي يا نواره انتي المسؤوله عن خراب بيتهم ومرمطتهم
وخليتيهم يعيطوا ......عشان هيك اكيد رح تصدعي راسنا بالصحفييين الممرمطين
اذا انتوا مش قد هالعمله ليييييييش تعملوها ؟؟؟؟
جالكو القرف

mido said...

@hala

ايه يا هالة ده انا مش فاهم تعليقك و ايه علاقته بالبوست اصلا؟
:))

Unknown said...

ربنا رازقني بالمعاتيه

سواح في ملك اللــــــــــــــــــه- said...

اه واللهي عندك حق الطيور علي اشكالها

Unknown said...

وبتقع هنا ليه يا عم لا مؤاخذة الحمامة؟

سواح في ملك اللــــــــــــــــــه- said...

برضه عندك حق ياست الحدايه الهبل ليه ناسه برضه

Unknown said...

كله اتحط سبام بقى

انا ناقصاكوا، قاعدين على المؤخرة ايدكم في المية الباردة وعمالين تدونا تعليمات

هو يا تلتوا يا تحكموا على الناس يا تدوا اوامر زي عبد السلام النابلسي

حاجة وسخة

ابراهيم عيسي=طه حسين الجديد said...

سلام للجميع
يا نواره انا شفت حلقه في مره للقرموطي كان جايب عبدالله كمال كان عبدالله عامل مشكله لصحفي والنقابه مدخله وفيلم هندي كده مش عارف القرموطي بيقوله ايه كده زي الناس بتقول انك موجه من الحكومه وده سؤال منطقي واجابته المنطقيه اه بتوجه من الحكومه
راح شاخط في القرموطي وزغرلو بعينيه ولقيتلك القرموطي مبقاش سمكه بقي فرخه...زبطه بلدي وكش كشه غريبه حاجه كده فظيعه والنبي تدورو علي الحلقه دي وتشوفوها يا جدعان فعلا ربنا خد مننا كل الرجاله و عطانا ابراهيم عيسي وانا بدخلو علي الفاس دايما افكرو بالموضوع ده علي صفحه البرنامج ده واحد بياكل عيش وهجاس وجاهل وتاني مره ربنا يخليلنا ابراهيم عيسي
واخيرا يا ست نواره انا مش متخيل ان نواره نجم المدونه بتاعتها فيها حد بيكره ابراهيم عيسي الصراحه يعني اتصدمت في صحابك علي فكره انا فكرتي دايما علي اللي بيكره ابراهيم عيسي انه مخبر

ابراهيم عيسي=طه حسين الجديد said...

بقولك ايه يا نواره المقال جامد وللتذكره الاغنيه لنجم الكوميديا عادل الفار
مين سا عامود
مين اللي سرق العمود
دي الترجمه
انا بشتغل نفسي كتييييير محدش بيشتغلني والمزيكا بتعلي لما تيجي الحته بتاعه محدش بيشتغلني عشان تحسسك بقوه الشخصيه
ههههههههههههههههههه

ابراهيم عيسي=طه حسين الجديد said...

ممكن اعرف هو عمر طاهر واسامه غريب مكتبوش ليه؟؟؟؟؟؟؟؟؟؟؟؟؟
انا تاني مره اسال وانتي لو مجوبتيش دماغي هتروح لافكار زباله
بلييييييييز

مش فاهمه said...

مافهمتش حاجه يعنى ابراهيم عيسى جاى مكان عزازى اللى ادوله شلوت و لا مش جاى معلهش اصل مخى تخين شويه

Unknown said...

مش فاهمة

بصي يا ستي،
الحكاية ومافيها ان وقت ما ابراهيم اتمنع بتوع الكرامة، بما فيهم الاستاذ عزازي، راحوا مشكورين يتضامنوا معاه ويعلنوا مساندتهم له، ومن ضمن الكلام اللي اتقال: جرنال الكرامة تحت امرك يا ابراهيم في اي وقت
وعزازي قال له: اسيب لك كرسي الرئاسة وتيجي انت تبقى رئيس التحرير

الطبيعي ان ابراهيم يرد: متشكر قوي يا جماعة، ده شيء يشرفني، وعمري ما حانسى وقفتكوا جنبي، الناس المحترمة بتبان في الشدة

وخلاص.. انتهينا

كده يا بنتي يبقى الكرامة عرضت وابراهيم قبل؟

يعني انا دلوقت لما انطرد من بيتي وتقول لي يا نوارة انا حاروح اقعد عند امي واديك شقتي فاقولك متشكرة ده شيء يشرفني يبقى حتسيبي لي الشقة وانا قبلت اسيبك شقتك؟

الموضوع خلص لحد ما قلت لك، وابراهيم مشي في حياته عادي وبيحاول يطلع مطبوعة ورقية ان شاء الله وابتدينا نشتغل في الموقع الى اخره

يا بنتي يوم ما الموقع بتاعنا اشتغل، اذ فجأتن نلاقي لك القرموطي طالع يقول الكلام ده

واذ فجأتن اليوم اللي بعده نلاقي لك عزازي مطلع بيان يقول حترموني وحتخطفوا مني رئاسة التحرير

والبيان اصلا موقع الدستور نزله عشان يوضح ان مافيش حاجة من دي، واصلا صاحب قرار ان البيان ينزل على الدستور كان ابراهيم

بس هو زهق واتخنق، مش كل يوم يتهم اتهام ويطلع يدافع عن نفسه، يعني مرفوت من شغله وكمان كل يوم فيه اتهام ضده؟

راح تاني يوم برضه عزازي مقدم استقالته

راح الكرامة طلعوا بيان ان الموضوع مش كده، وان ابراهيم يسري كان بيدعو لاكتتاب عشان صحيفة والكرامة قالوا انهم مشاركين، مش بالجرنال، بالاكتتاب

ودي حقيقة فعلا ابراهيم يسري عمل كده، وفعلا فيه قوى وطنية قالت مشاركين

النهاردة تاني عزازي عمال يقول حيمشوني ويجيبوا ابراهيم

ابراهيم عيسى مش حيروح الكرامة ابدا، وما فكرش ولا ثانية انه يروح الكرامة، الحكاية من اولها كلام تضامني وهو شكرهم عليه

مش فاهمه said...

ميرسى يا نوارة على التوضيح بس اسمحى لى حأتقل عليكى مش كل الناس تعرف خبايا المواضيع و مش كل الناس بتعرف تدخل على النت تعرف الأخبار و موضوع ان ابراهيم مش كل شويه حايطلع يوضح و يتكلم مش مقبوله دلوقتى معلهش يجى على نفسه و كل شويه ينفى او يقول ماحصلش زى ما فى الأول قعد مختفى مده و البدوى و غيره عمالين يلوك لوك عليه صدقينى موضوع شغل الفنانين النص كم لما يقولوا لك خلى الأشاعات و الناس تتكلم و الأشاعه حاتموت لوحدها احنا مش مستحملين بجد عايزين توضيحات و كلام واضح و لا لبس فيه علشان حالة الغموض و الضبابية دى اعصابنا مابقتش مستحمله و كويس انك عايشه فى مطبخ الأحداث فمش عيب توضحى لنا الأمور دى احنا دماغتنا تعبت مش كفايه منى الشاذلى و ضيوفها اللى بقوا يفقعوا المرارة لدرجه ان الواحد بقى بيقلب يبص على رولا خرسا تخيلى وصلت ببنا نتفرج على رولا خرسا ده كتير بجد كتير

Unknown said...

اه.. شفتي منى الشاذلي يا عيني
الاول كنت متغاظة منها بس دلوقت ابتدت تصعب عليا