Wednesday, 24 November 2010

نداء طائفي بشدة: المسلمين ما يتدخلوش في خناقة المسيحيين والامن


تحديث: 
المظاهرة قدام الكنيسة انفضت، وكان بعض انصار مرشح الاخوان المسلمين شاركوا المسيحيين في الاحتجاج، والمسيحيين وهم بيختموا المظاهرة هتفوا عاش الهلال مع الصليب، وهم دلوقت قدام ام المصريين
------------------
وبعد ما أخدت كل الاحتياطات لطرد الارواح الشريرة من المدونة اقول بفخر: الاقباط المرة دي رجالة واجدع ناس وشكلهم فكرني بعمال المحلة، وربنا ينصرهم
تحديث
:
هي صحيفة الشروق تبع حملة الحزب الوطني؟
اصلها كاتبة كلام غريب قوي، كاتبة تقول ان مرشح الاخوان ومرشح الناصري "حاولوا اجتذاب اصوات الناخبين" بانهم تظاهروا مع الناس اللي بتنضرب وتتقتل في الشارع! بينما "حاول مرشح الوطني امتصاص" توتر الازمة
ايه ده بقى؟ دي تغطية صحفية؟ طبعا ييجي واحد يقول لي ما الاخوان المسلمين دخلوا اهو امال بتقولي المسلمين ما يتدخلوش ليه، اقول له لا، ما هم مش مسلمين.. مش مسلمين مصريين عاديين يعني، ده حتى محمد حسين يعقوب بيقول عليهم مش مسلمين، حتفهموا احسن من محمد حسين يعقوب
الاخوان المسلمين يتدخلوا انتوا ما تدخلوش برضه، شباب من اجل كاميليا دول يخفوا من وشنا خالص تماما
--------------------

انا طبعا ممكن امثل واتشحتف واقول كلنا ابناء وطن واحد وكدهون، بس مش طالبة معايا تمثيل، المسلمين ما يتدخلوش بجد خالص في خناقة الامن مع المسيحيين
ليه؟
عشان المسلمين لو اتدخلوا حيبرروا للامن، ما سبق وقلت احنا شعب عميل بطبعه زي ما الامريكان شعب عميل بطبعه للسي اي ايه احنا عملاء بطبعنا لامن الدولة، وده سر التشابه الغامض ما بين المصريين والامريكان واللي كل الناس في كل الدنيا ملاحظاه الا احنا
المهم يعني
المواجهات دي لو بين عمال وامن، بين فلاحين وامن، بين مسلمين وامن، ما كانش ولا مسلم برر طبعا وكان الامن حيبقى ابن كلب يقتل الناس ويضربهم، بس بما انه بين المسيحيين والامن وعشان كنيسة كمان فاكيد المسيحيين هم اللي غلطانين المرة دي، طيب انا مش حاتناقش على فكرة في موضوع ان المسيحيين عايزين يبنوا كنيسة بالغصب اصلهم واخدين ترخيص بناء مبنى خدمي وحولوه كنيسة، اصلهم استخدموا عنف، وكل الكلام الامني الجميل ده اللي الداخلية قالته على خالد سعيد ومسلمين كتير حيقولوه على المسيحيين
طبعا وائل خليل حيزعق لي ويقول لي انت متشائمة وليه تقولي على الناس كده ده الناس طيبة وغلابة وغصب عنهم وكده بس عادي يعني انا اتعودت على زعيقه ما بقتش اتخض زي الاول
بس انا طالبة معايا واقعية، يا سيدي انا مش حاحاول اعالج كراهيتك للمسيحيين، خالص يعني، خصوصا يعني انهم راخرين زيهم زي اي مصري عملاء للامن بالسليقة زي حضرتك بالظبط وعندهم تصور ان الامن شغلته يحمي البلد ومأثر فيهم مسلسلات الجاسوسية زيك بالظبط ومنه لله صالح مرسي في اللي عمله في الشعب وما تجوزش عليه الا الرحمة فما فيش مشكلة يعني 
بس ممكن ما تدخلش؟ لا بالخير ولا بالشر، وما تقولش حاجة، لا تقول خيرا ولا شرا اصمت احسن 
مش انتوا كنتوا زعلانين ان الامن بيضرب المسلمين وبيقبض عليهم وبس، اهو ضرب لكم المسيحيين وقتلهم كمان، مبسوطين بقى دلوقت؟ اتبطوا بقى ، مش هم كانوا قعدوا يقولوا يا جمال حتبقى الريس خطف بناتنا مش كويس، اهو الامن بتاع جمال وابوه ضربهم وقتلهم اهو، اتبطوا بقى، مش قفل لكم القنوات الدينية السلفية بتاعتكم؟ اهو مش عايز يسيبهم يصلوا اهو، اتبطوا بقى
ما تدخلوووووشششش خاااااالص، حتدافعوا عن الامن؟ مش ده الامن اللي بيقبض على الاسلاميين وبيقفل القنوات الدينية وبيمكن النصارى عباد الصليب من البلاد وسايب لهم محلات الصاغة والصيدليات؟ ما تدافعوش عنه بقى، سيبوهم مع بعض، من حيث ضرب "النصارى" اللي انتوا بتحبوه قوي اهو حصل عشان تهدوا، ومن حيث ان اللي بيعمل لكم الشغلانة حد تاني فهو الامن اللي اكيد مش محتاج مساعدتكم ولا مساندتكم معاهم اسلحة وقمع وقهر وكل حاجة، يعني تدخلكم مالوش لازمة خالص، مش حيساعد في حاجة، اتبطوا بقى، اتبطوا، عشان حتى شكلكم ما يبقاش اوسخ من ماهو وسخ وتبقوا واخدين صف الامن ضد ناس عزل اتقتل منهم واحد وربنا يستر على بقية المصابين
 ده اخطار بس للغالبية المسلمة مؤقتا كده لحد ما عمرو خالد يغسل اللي حسان والحويني عملوه فيهم على الاقل حيخلي عندهم رحمة شوية، بس لسه الراجل بادئ قدامه سنة كده على ما يعلم الناس تتعاطف مع ناس مقتولة 
اما نشوف احنا بقى حنعمل ايه في المصيبة السودا دي 
الشهيد اسمه ماتريوس  جاد شاكر وفيه مصابين كتير ربنا يستر، الامن المحترم بيولع في البلد، بعد كده حد يقول لي مش الامن هو اللي بيعمل الفتنة الطائفية حارمي امه من الشباك ، ولاد الـ... كل ده عشان التصويت على الانتخابات الاحد الجاي وعايزين يعملوا بوليكة على ما التزوير يعدي؟ ده ايه الوساخة دي؟  لا ونازلين بنفسهم عشان طبعا هم لموا السلفيين فمش عارفين يستغلوهم في هاذوها الوقت الحرج ومحتاجين بسرعة يعملوا فرقيعة، يقوموا يقتلوا واحد؟ يقتلوا؟ طب على الله القتيل ده يعدي بالساهل زي قتلى نجع حمادي، المرة دي الامن بذاته هو اللي قاتل الناس انا شايفة بعيني على الجزيرة اهو الامن ماسك بنادق في وش الناس ولا كأنه اسرائيل في وش الفلسطينيين والناس عمالة تحدفه بالطوب
ولو ابن كلب قال لي المسيحيين حدفوا الامن بالطوب وهم اللي استفزوا الامن حاقول له صح، والفلسطينيين كمان بيعملوا كده، واسرائيل بتدافع عن نفسها زي ما الامن 
بيدافع عن نفسه
مش طالبة معايا ولاد كلب خالص في الكارثة دي
انا اعصابي بايظة خالص ومش حمل اي سفالة وانحطاط، اديني اهو تحسبت لكل الوساخة اللي ممكن تتقال عشان ماحدش ييجي يطرش هنا
--------------
بالنسبة للناس اللي هم بني ادمين عادي يعني وبيحسوا وعندهم دم، احنا حنعمل ايه؟ انا مخي اتشل مش عارفة اعمل ايه
--------
تحديث وانا باكتب البوست: القتلى وصلوا لاربعة
ابوس ايد المسلمين ما يتدخلوش، ابوس ايديكم ما تدخلوش ابوس ايديكم ما تدخلوش بصوا
بصوا بقى
الموضوع بقى فيه دم وقتلى
كان نفسي يبقى عندي عشم واقول اتدخلوا وساندوا المظلوم الاعزل المقتول، بس انا مش باحب اشتغل نفسي، انا عارفة انكم مش حتعملوا كده، طب على الاقل ما تدخلوش 
طب
طب
طب اصلا بقى الموضوع ممكن يتطور لو انتوا اتدخلتم ممكن يتفاقم ويوسع وتتحول لمواجهات فظيعة وامريكا تدخل تحمي الاقلية، يرضيكم بقى كده، والنبي ما تدخلوش
اه.. كلمة والنبي حرام
طب استحلفكم بالله يابن حلزة ما تدخلوا خالص
-----
تاني، الناس اللي عندها رحمة شوية، حنعمل ايه؟ الناس بتموت في الشارع

18 comments:

محمد صبرى said...

الحقيقة تعمدت ادخل عندك مخصوص فى التوقيت دا,عشان اقرا اللى كنت متوقع أقراه هنا. يعنى تقدرى تقولى رغبة فى موازنة الشحنة الطائفية جوايا-اللى كتير من الأقباط مسئولين عنها زيهم زى بعض المسلمين برضو-و يعنى افتكر انه بمعايير كتيرة اوى دعم الأمن اللى مشرد المصريين كلهم هو دعم للفكر المتشدد بين الأقباط , اللى انا شخصيا بتمنى محوه و بشوف انه بينمو يوم بعد يوم

.........

مش هدخل فى تفريعات من اى نوع , و لا حتى بخصوص حسان و لا الحويني , و على كل حال هما مش اكتر من بشر قابلين للنقد و التقييم ,, انما فيه جملة واحدة فيما كتبتك مردودها سلبي جدا و افتكر هتجيب نتيجة عكس اللى انتى عايزاها, و هى

"طب اصلا بقى الموضوع ممكن يتطور لو انتوا اتدخلتم ممكن يتفاقم ويوسع وتتحول لمواجهات فظيعة وامريكا تدخل تحمي الاقلية، يرضيكم بقى كده"

لأن الناس الكارهة و المشحونه فى مصر بغض النظر عن موازيين القوى افتكر انها بتتمنى اليوم اللى تواجه فيها قوات امريكا مواجهة مباشرة على الأرض

*معاكى بتمنى اليوم اللى يكون فيه دعم الحقوق متبادل بين الأقباط و المسلمين و افتكر الكل عارف امتى ممكن يكون فجر اليوم دا...حاليا مفتكرش ممكن تأملى او تتوقعى أفضل من حياد المسلمين , على أمل انه العقلاء من النشطاء الوطنيين يلاقوا جو مناسب يسمحلهم بفضح أصول و جذور فتن عاصفة من النوع دا

مش فاهمه said...

نوارة مش طبيعى اللى بيحصل مش طبيعى نفضل نطبطب و ندادى مش حاينفع المسيحيين غلطانيين المرة دى و القيادات بتاعتهم غلطانه و الكورة فى ملعبهم ماينفعش اطلب من الناس العاديه ما يتأثروش وهم الأكثر و اترك القيادات اللى ممكن نأثر فيهم
الدنيا مابقتش ابيض و اسود يعنى مش على طول الأمن غلطان و متجنى امال زمن الفتنه اللى احنا فيه ده بيقى اسمه زمن فتنه ازاى لازم الأمور تدخل فى بعضها و تتشابك المسئوليات و ماينفعش افصل المسببات الموضوع فيه تراكمات كثيره و ماينفعش اقول احنا اللى قاعدين على النت حانعمل ايه لأ لازم العقلاء و اللى بيفهموا و اللى فى ايدهم قلم و صوتهم مسموع لازم يتناقشوا و يقعدوا مع بعض و زى ما من خمس سنين فهمى هويدى نادى بعقد اجتماعى جديد ماينفعش الدنيا تتساب للأمن بس يحل و يربط خلاص ماعرفش بقه دعاة يقعدوا مع البابوات ولا حد زى ابراهيم عيسى ولا عمنا الفاجومى ولا سليم العوا و لا جمال اسعد ولا مين ولا مين ينزلوا للناس و يعملوا مؤتمرات شعبيه مش نافعه البلد حاتولع حريقه و عيالى - اقصد الولاد الصغيرين عموما - اول ناس حاتنضر انا خايفه على مستقبلهم و مش عارفه اعمل ايه البلد ما بقتش بلدى
بجد الموضوع حايولع حريقه و مش عايزين حد يقعد يعيد و يزيد و ينتصر لرأيه لأ كلنا لازم ندرك احنا رايحين على فين بجد فيه مسيحيين عقلاء علقوا فى مواقع كتير ان اللى حصل ده غلط كبير من جانب القيادات الكنسيه بجد عايزين كلنا نعرف اننا رايحين فى داهيه رايحين كفايه احباطات و سودوايه عايزين بصيص امل انا مش لاقياه بس نفسى اشم ريحة امل شكلى حأموت قبل ما ده يحصل

جبهة التهييس الشعبية said...

صح
المسيحيين غلطانين عشان عايزين يصلوا زي الناس ولما الامن انكر عليهم كده ثاروا لكرامتهم لازم يفضلوا كده خيخة وولاد وسخة ويهتفوا لمبارك وابنه

زي ما حماس كده غلطانة عشان رمت صواريخ

وزي ما عمال المحلة غلطانين عشان حدفوا الامن بالطوب

دايما المجني عليه هو الغلطان طبعا وما ينفعش نطبطب وندادي بقى

الامن تصرف بحكمة وعقلانية وقتل ناس، والتصرف السليم انه كان يرمي قنبلة نووية على ناس عايزة تصلي

عايزة تصلي

حسبي الله ونعم الوكيل

انت لو فرشت في الشارع عشان تصلي والامن قتلك كنتي رضيتي حد يقول عليك كده؟

محمد صبرى said...

فلتت منك روح واحدة انا :D

نهاية أو خلينا نقول بداية مشجعة اوى,أنا عن نفسي متوقعتهاش بصراحة,بس بامانة و الله فرحان بيها جدا, بس اتمنى يتأسس عليها عمل يدعم استمرارها ,لأن الناس -من كل الأطراف- اللى بتعمل من أجل الظلام دءوبة فى عملها و اى تراخى و اقتناع بس بمبادرت جميلة من النوع دا مش كفاية ابدا

محمد صبرى said...

يا نوراه على فكرة الموضوع مش مبسط اوى كده .. اقولك حاجة, مع كل الآراء الفقهية اللى بنسمعها ضد بنا الكنايس, عندى ثقة داخلية انه فيه شيء مش مضبوط و انه مش معقول يبقى مباح لنا مصاهرتهم و متاح ليهم الصلاة فى مساجدنا و يكون بنا مكان للصلاة محرم ..اكيد فيه هنا رابط مفقود أما بصرف المقصود من منع بنا الكنايس لمنع الأنشطة غير المعلنة لبعض الكنائس زى ما هحصل و هيحصل فى احتجاز المتحولين الى الاسلام ,او لسبب اخر بالضرورة يكون مرفوض من العقل و بالفطرة اما انه يكون المقصود منع العبادة فده محال نصا و عقلا يعنى

انا عن نفسي مقدرش اقتنع بحرمة بناء مكان للصلاة مهما كان عدد- الفتاوى غير المستساغة بالنسبالى- انما اسمحيلى اقولك انه فعلا فيه خلل فى بعض القيادات الكنسية المسيحية, دا واضح اوى و مفروض مناقشته , يجوز التوقيت فى اللحظة دى مش مناسب ,و يجوز مناقشة موضوع من النوع دا مفروض تبقى فى اطار اشمل هدفه اقرار حقوق الأقباط و برضه حقوق المسلمين كمواطنين مصرين

استخدمى البالتوك و انتى تعرفى انه الاضطرابات اللى حصلت و اللى ممكن لسه تحصل فى الشارع دى مش من فراغ ,و افتكر انتى عارفة كويس انه فيه قيادات قبطية بتوظف الدين و مشاكل دور العبادة و ما شابه -اللى هى مشاكل مفهومة و مطالب مشروعة- لاهداف و اجندات لا مشروعة و لا وطنية

utopia said...

نوارة
الموضوع مش بناء كنيسة ده حقهم مش عايزة فصال
بس والنبى ياشيخةبذمتك ودينك لو الكنيسة
ما نظمتش المظاهرة دى كانت حصلت اصلا؟؟
اللى صعبان عليا الناس مش الامن ولا قيادات الكنيسة الموضوع شكله مساومة والحق نفسك واهبر امتياز للكنيسة قبل الانتخابات ولما ماحصلش اطلع يا ابنى انت وهو مظاهرة
ولان الامن بتاعنا حمش وماينفعش يبان دراعه ملوى دور ضرب النار فى الغلابة
ولما الكنيسة والاخوان معاهم شاطرين وبيعملوا مظاهرات علشان مصالحهم الضيقة
مش اولى يعملوها للمطالبة بالاصلاح
بدل المظاهرات المينى بتاعة النشطاء؟؟؟
الكل عاجبه الوضع الحالى ربنا ينتقم منهم كلهم
حسبى الله ونعم الوكيل فيهم وفى الامن
وربنا يرحم اللى مات

H Mohsen said...

إليكم هذا الاقتراح ، نجيبوا الاخوان المسلمين كلهم ونربطوهم بحبل ونولوعوا فيهم علشان الحكومة تستريح ونجيب ساويرس يستريح والدنيا كلها تستريح ، يا جماعة مش معقول، اسرائيل ما بيتمش معاه كده ، كله هجوم على الاخوان ، حاجة فعلاً زادت عن الحد ، الحزب الوطنى والحكومة عندها استعداد انها تولع فى البلد علشان نجاحها فى الانتخابات أو وجودها....مفيش دم خالص

جبهة التهييس الشعبية said...

h mohsen

انت لازم يرفدوك من الاخوان، حاكلم اي حد فيهم اقول له في شخص ما بيجمعش زي يونس شلبي عايزينه ده ولا تباصوا بيه السلفيين احسن؟

حد هاجم الاخوان هنا؟ احنا عمالين نقول ان الاخوان اخدوا موقف مشرف وشاركوا المسيحيين في المظاهرة

ده انت غريب الشكل والشأن والمنظر

المهم يعني لازم اكلمهم يرفدوك

H Mohsen said...

إلى جبهة التهييس الشعبية ، واضح انك اللى مش مجمع ومش فاهم ، يظهر ان أنا اخدت مقلب فيك أو فيكى ، روح يا شيخ واللا روحى يا شيخة الله يعمر بيتك.

مش فاهمه said...

يانوارة ماحدش قالهم مايصلوش ماهم بيصلوا و الكنيسه بتلالى يوماتى و ماحدش هوب ناحيتهاالمشكله انهم بالعافية عايزين يعملوا مشكله من لا مشكله الناس دى الكنيسه بتستغلهم و بتستخدمهم وقود للفتنه ليه مش وصلالك الفكرة دى الوضوع ده اتكرر قبل كده فى الصعيد لما القساوسه اعتدوا على الأراضىاللى جنب الكنيسه
نوارة رجاء الموضوع اكبر و اعمق فيه ناس بتتلاعب سواء بالمسلمين او بالمسيحيين من بره هى دى المشكله ماينفعش الأبيض و الأسود فى القصه الزرقا دى

أبو هاجر said...

إلى السيدة المحترمة مش فاهمة
انا اتابع أسهماتك الهادئة وفي كل مرة يتأكد لي نواياك الطيبة والصادقة
لكنك أيتهاالسيدة المحترمة تتعاملين مع القضايا السياسية بعقلية الجمعيات الخيرية.
السياسة لا علاقة لها بالبر و الإحسان وأصحاب النوايا الطيبة ، إنها مصالح وحسابات الربح الخسارة
وحتى ست الكل التي ، كعادتها ، رفضت الرد على طلب التوضيح ، رغم ذلك ستظل ست الكل ، قلت هي الأخرى سقطت في النزعة الشعبوية و الحماسية و الكثير من الانفعالية، لأن المسألة أعمق وأبعد من كلمة تقال هنا أو هناك في لحظة هيجان .الصليب يا نوارتناالعزيزة لا يتعايش مع الهلال بشكل صحيح وأبدي إلا في ظل دولة ديمقراطية علمانية
دولة المواطنة والمواطنين الأحرار الذين يتعاملون مع الدولة كافراد كذوات مستقلة عن أي انتماء طائفي أو عشائري.
عندها يا نوارة يصبح الحديث عن الهلال و الصليب
وعن علي وعمر من مخلفات الماضي.
رغم زعلي منك لك اجمل وأصدق التحيات
محمد نور الدين

Riham said...

السلام عليكم

أولا أعلق علي الموضوع نفسه : طبعا رفض تام لتعامل الامن مع الموقف .. لكن ده هو أسلوب الامن المصري في التعامل مع أي شكل من أشكال المطالبين بالحقوق

نعمل ايه ؟ معرفش بس أكيد البداية اني أقول بصوت اني ضد اللي حصل ده .. شئ مرعب أني أشتغل مع زميلي المسيحي و هو شايف سكوتي التام عن اللي حصل في نفس الوقت اللي بعلق فيه عن أي ظلم تاني .. يعني من الاخر أضعف الايمان هو نفس اللي بعمله في كل موقف .. انا مش موافق .. تعسف الامن ظلم فيه بني أدم مات و هو ينضم بجدارة لقائمة ضحايا الامن اللي احنا كلنا
مسؤلين عنها بشكل أو بأخر

نقطة فرعية .. و مبدئيا انا مش سلفية .. لكن فيه أي مصدر لقول الشيخ يعقوب علي الاخوان مش مسلمين .. معلش للخروج عن الموضوع لكن انا دورت علي يوتيوب لقيت كلام تاني خالص
http://www.youtube.com/watch?v=MqxavNm_y8s
فأحب بس اني اعرف المصدر .. زي ما قلت أنا مش سلفية لكن علي قلة ما سمعت لهم لم أجد ما يتطرق الي عباد الصليب و أشياء من دي فأحب أعرفها لان ده بيتكرر كتير في كتاباتك دون الاشارة للكلام نفسه
ثالثا انا اتفق معاكي في مصادرتهم علي الرأي الصائب لنفسهم لكن ده مش معناه اني اتبع نفس المنطق بأني أغلطهم في كل ما يقولون .. لهم رؤية تانية اختلف معاها أكيد لكن ده مش مبرر بحكم مطلق علي كل اللي بيتقال انه غلط .. اسمع و ما اتفق مع عقلي فمن الانصاف اني أقول انه صح و ما أختلف فيه أرفضه لكن من غير حكم مطلق علي الاشياء

شكرا

Riham said...

السلام عليكم

أولا أعلق علي الموضوع نفسه : طبعا رفض تام لتعامل الامن مع الموقف .. لكن ده هو أسلوب الامن المصري في التعامل مع أي شكل من أشكال المطالبين بالحقوق

نعمل ايه ؟ معرفش بس أكيد البداية اني أقول بصوت اني ضد اللي حصل ده .. شئ مرعب أني أشتغل مع زميلي المسيحي و هو شايف سكوتي التام عن اللي حصل في نفس الوقت اللي بعلق فيه عن أي ظلم تاني .. يعني من الاخر أضعف الايمان هو نفس اللي بعمله في كل موقف .. انا مش موافق .. تعسف الامن ظلم فيه بني أدم مات و هو ينضم بجدارة لقائمة ضحايا الامن اللي احنا كلنا مسؤلين عنها بالسكوت

Ahmed said...

أتفق مع محمد صبري يانوارة وده السبب اللى خلاني أدخل عشان أرد.
بالفعل التهديد المخفي بأميركا سواء بسوء نية أو حسن نية هيساهم في احتقان النفوس المسلمة وتجاوز بعض المسيحين خصوصاً رجال الدين المتجاوزين منهم وبيعيشوا على الصراع والفتنة زي اللى في الفريق التاني بالضبط.
وكلام زي ده هيدي للمسلم المُحايد زقة عشان يبقى في جهة المتشددين .. والمتشدد أصلاً هيزيد تشدده.
لأن في النهاية إحنا مشكلتنا مع المسيحين هي مشكلة الاستقواء والتصعيد المدعوم من أجهزة الأمن والحكومة لبث الفتنة وعشان المسلمين والمسيحين يولعوا في بعض أو على الأقل يتلهوا في بعض.

نهاية الأحداث النهاردة والتدخل الإيجابي للمسلمين كان خبر طيب وهيقلب الترابيزة على الحزب الوطني في توقيت لا أرى له وصفاً إلا أن من اختاره لقتل المسيحين هو رجل أو جهة قد تربعت وتدورت أيضاً على قمة جبل الغباء العالمي.

أنا متفاءل خير إن الحادثة دي تكون نقطة نور يفوق فيها المسيحين ويتأكدوا إنه بيتم التلاعب بيهم زيهم زي المسلمين بس كل واحد بطريقته.
كمان أتمنى أن يُساهم ذلك فيما أتمناه وتبطل بعض القيادات الدينية المسيحية مسح الجوخ للحكومة ونفوق لبعض كإخوة نستظل بسماء واحدة ويجمعنا بورش وأرض واحدة وطلقات مطاطية وغير مطاطية من نفس النوع اللى هو الأميركي المُحترم اللى اتبعت للحكومة عشان تضرب الشعب كله بالجزمة مع توزيع الرصاص بالتساوي بين شقي الأمة.

أتوقع إن الحكومة تهرول من بكرة لحل المشكلة وامتصاص غضب المسيحين وفجأة هيطلع التصريح بالبناء فجأتن كدا.
ياريت الإخوة المسيحين يفرحوا بالكنيسة لكن مينسوش اللى اتعمل فيهم ولا يتضحك عليهم بجزراية الكيلو منها بربع جنيه لولا إن الحكومة في إيدها كل الجزر.

بإذن الله خير

مهندس حر said...

هقولك حاجة واحدة .. ما تبقيش تطلبى فى البوست إن محدش يعلق بكلام ماسخ لأن واضح إن الناس بتفهم ده على إنه دعوة لطرطشة الكلام الماسخ ..

أما تعليقى على الموضوع فحسبى الله و نعم الوكيل فى الإخوة المعلقين

مش فاهمه said...

الأخ ابو هاجر متشكره جدا على حسن ظنك بى و اناايضا اتابع مشاركاتك هنا و احييكى على روحك الطيبه و معاك ان الوضوع ماينفعش ينظر اليه من وجهة نظر واحده فعلا المسلمين و المسيحيين يعانون فى البلد و بعض الطلبه اللى بينتموا للأخوان او الجماعات الأسلاميه بيتنفخوا فى المعتقلات لكن يا حرام مافيش حد بيروج لقضيتهم ولا بيعتكف علشان يجيب لهم حقهم ولا يمنع عنهم المحاكمات العسكريه ولا بيقوم المجتمع الدولى علشان يضغط على النظام بتاعنا ماينفعش نبص بعين واحده للى بيحصل ماشى معاكم ان المسيحيين بيعانوا علشان دور العباده بتاعتهم بس اهم طلعوا و ضربوا مبنى المحافظه والدنيا اتقلبت و محامى البابا بيقول معاهم حق وده رد فعل على الأحتجاز طيب يعنى و الطلاب بتوع الأخوان ولا الجماعات الأسلاميه ولاد كلب مثلا ماينفعش العدل للجميع و المساواة للجميع مين بايده يغير ده كله احنا بقه لما نفهم بعض و نقدر وجهات نظر بعض حانعرف نقود التغيير حتى ولو بسيط لكن مافيش داعى نبسط الأمور و يبقى ناس عايزه تصلى و النظام بيمنعهم ماينفعش يا جماعه
طيب اقسم بالله بعد كل صلاة الجامع اللى قدامى بيتقفل بالضبه و المفتاح و راجل بقه اللى يقول عايز الجامع يتفتح يصلىفيه اعمل ايه بقه اعمل مظاهرة و اقول عايزين الجوامع تتفتح يا كفرة بجد فعلا الظلم واحد وواقع علينا كلنا و التعصب موجود فى الجانبين و تأثير القيادات المسيحيه اقوى تأثيرا اعتمادا على اقباط المهجر ماينفعش بقه اقول احنا نستاهل علشان اغلبيه و هم مايستاهلوش علشان اقليه مين اللى وضع التقسيم ده كلنا فى الهم مصريون
طب انا باقترح ان البابا يتولى امر الطلبه المقبوض عليهم من الجماعات الأسلاميه جايز يعرف يطلع العيال دول اللى فيهمنهم بقاله سنين و سنين محبوس بدون محاكمات

مش فاهمه said...

الأخ ابو هاجر متشكره جدا على حسن ظنك بى و اناايضا اتابع مشاركاتك هنا و احييكى على روحك الطيبه و معاك ان الوضوع ماينفعش ينظر اليه من وجهة نظر واحده فعلا المسلمين و المسيحيين يعانون فى البلد و بعض الطلبه اللى بينتموا للأخوان او الجماعات الأسلاميه بيتنفخوا فى المعتقلات لكن يا حرام مافيش حد بيروج لقضيتهم ولا بيعتكف علشان يجيب لهم حقهم ولا يمنع عنهم المحاكمات العسكريه ولا بيقوم المجتمع الدولى علشان يضغط على النظام بتاعنا ماينفعش نبص بعين واحده للى بيحصل ماشى معاكم ان المسيحيين بيعانوا علشان دور العباده بتاعتهم بس اهم طلعوا و ضربوا مبنى المحافظه والدنيا اتقلبت و محامى البابا بيقول معاهم حق وده رد فعل على الأحتجاز طيب يعنى و الطلاب بتوع الأخوان ولا الجماعات الأسلاميه ولاد كلب مثلا ماينفعش العدل للجميع و المساواة للجميع مين بايده يغير ده كله احنا بقه لما نفهم بعض و نقدر وجهات نظر بعض حانعرف نقود التغيير حتى ولو بسيط لكن مافيش داعى نبسط الأمور و يبقى ناس عايزه تصلى و النظام بيمنعهم ماينفعش يا جماعه
طيب اقسم بالله بعد كل صلاة الجامع اللى قدامى بيتقفل بالضبه و المفتاح و راجل بقه اللى يقول عايز الجامع يتفتح يصلىفيه اعمل ايه بقه اعمل مظاهرة و اقول عايزين الجوامع تتفتح يا كفرة بجد فعلا الظلم واحد وواقع علينا كلنا و التعصب موجود فى الجانبين و تأثير القيادات المسيحيه اقوى تأثيرا اعتمادا على اقباط المهجر ماينفعش بقه اقول احنا نستاهل علشان اغلبيه و هم مايستاهلوش علشان اقليه مين اللى وضع التقسيم ده كلنا فى الهم مصريون
طب انا باقترح ان البابا يتولى امر الطلبه المقبوض عليهم من الجماعات الأسلاميه جايز يعرف يطلع العيال دول اللى فيهمنهم بقاله سنين و سنين محبوس بدون محاكمات

سامح said...

ربنا استجاب لدعاء السلفيين
اللهم اضرب الظالمين بالظالمين
:على الهامش
حتى محمد حسين يعقوب بيقول عليهم مش "مسلمين
قلها فين دي؟