Thursday 4 November 2010

عزيزتي قائدة المركبة

بما انك مش حتاخدي حق ولا باطل في الشارع بالاسلوب المتبع، وبما ان لو حصل خلاف بينك وبين ايتها راجل في الشارع الناس حتغلطك وتقف جنبه 
فيه طريقة انا شخصيا باتبعها وجايبة معايا لحد دلوقت نتائج مذهلة:
اعملي ما بدا لك، وساعة الجد قولي للشخص اللي كسرتي عليه ولا خطبتي له العربية: معلش سواقة ستات بقى
ياااااا ما تتخيليش السعادة اللي بتترسم على وشوشهم، مهما تعملي فيه، وانت مضطرة تعملي كده سواء انت غلطانة او هو غلطان، لو هو غلطان حتتبهدلي لو قاوحتي، لو انت غلطانة حتتبهدلي وتدفعي فلوس، طب وليه، اعملي زي ما باقولك
اخبطي له العربية، شلي امه وهو مستنيكي تركني، اكسري عليه، زنقي عليه، امشي بالراحة وشليه، او امشي بسرعة وافزعيه، على حسب مودك، ولو اتخانق معاك ابتسمي، وبربشي نص بربشة وقول بصوت رقيق: معلش.. سواقة ستات بقى
وبعدين انت كده بتكسبي فيه ثواب، عشان انا مش قادرة اقولك كم السعادة الخرافية اللي بيبقى فيها الزميل قائد المركبة اول ما بيسمع الجملة دي، من اول سواق التوك توك مرورا بالميكروباظ والنقل العام والتاكسي والروري وانتهاء بالملاكي، كلهم بلا استثناء بتحصل لهم حالة انهيار اول ما يسمعوا الجملة دي، وترتسم ابتسامة رضا وسعادة وفخر على وشوشهم، بجد يو ويل ميك هيز داي، وحيروح بيتهم سعيد جدا، انشالله تكوني مدغدغة له العربية، دي نصيحة مجربة
ومدام عرفتي كلمة سر تقدري بمنتهى الراحة تبلطجي في الشارع كما يحلو لك
بس على الله بختك المدوحس ما يوقعكيش في واحد زي وائل خليل، يتعصب لما يسمع الجملة دي ويقولك: مالها سواقة الستات؟ هو فيه سواقة لابسة بنطلون وسواقة لابسة جيبة؟ وبعدين مالهم الستات؟ انت ازاي تبصي لنفسك بصة زي دي؟ ازاي تفكري بالطريقة دي؟ ازاي ترضى على نفسك انك تحقري منها كده؟
وحيستلمك بقى، بس عموما ده نوع مش موجود كتير يعني، في الاغلب لو وقعتي فيه اعرفي ان انت اللي نحس

20 comments:

واحد said...

جاااااامده موووووز
اللعب على وتر المجتمع الذكورى

خواطر شابة said...

شكرا على النصيحة الغالية

مش فاهمه said...

باعملها و جايبه نتيجه هايله و باضيف عليها كمان معلهش اصلى لسه متعلمه سواقه جديد
بس اللى بيجننى الناس اللى فى الشارع مش اللى سايقين لما يصدروا لك قفاهم و يعدوا و مايبصوش عليكى من اساسه دول بقه عايزين الحرق

Anonymous said...

هههههههههه
حلوه

هراء لا داعى له ..... said...

D: D:

ابراهيم عيسي=طه حسين الجديد said...

عزيزي قائد المركبه
اللي تتاسفلك اديها علي دماغها اديك عرفت الخطه
وايه الحكايه المدونه
هتقلب لكي يا سيدتي
طب علي ايه يا نواره ما احسن
تسميها للنساء فقط
بجد والله احنا عاوزين مساواه

ابراهيم عيسي=طه حسين الجديد said...

وبعدين إيه الدكاترة اللي كتروا في حياتنا وكلهم بيشتغلوا في غير تخصصهم دول؟
والله انت جدعه انك كتبتي عالمعلم في الموقع بتاع الدستوور
اديلوو اديلو

ابراهيم عيسي=طه حسين الجديد said...

انا بسال سؤال رخم جدا وبساله كتير جدا لدرجه ان السؤال نفسه خلاص مش عايز يطلع في المدونه تاني بس انا هطلعوا برخامتي برضو
فين الغريب وعمر طاهر فين مقالاتهم في الموقع الدستور الالكتروني
بلييييييييييييييييييييييز

Ahmed Mohamed said...

مش كلهم هطل زي النوع الاول
ومش كلهم زي النوع الثاني(هطل بس علي شياكه )لانه في الحالتين سابك بردو ودخل في موضوع تاني
لان فيهم الي ممكن يسب للعربيه والي راكباها والي علمها
والي والي والي لحد امنا حواء الي هي خرجت ادم من الجنه

drkishk said...

نظريه برده
بس فى حاله ان السائقه تكون حلوه
لو كانت اللى بتسوق مش حلوه
هيقولها هيا فين الستات دى

Unknown said...

لا اللي حيسب الستات لحد امنا حوا ده لازم يدور في ميوله الحقيقية ويتقبل نفسه زي ما هي ههههههههههههههه

عموما انا ماشية في الشارع بالجملة دي ولحد دلوقت نتائجها ممتازة

سبهللة said...

عسل يا نوارة

ولاء نابلسي said...

طيب الأوغاد _الرجالة_ اللي زيي, اللي سواقتهم على قدهم وكلّ 53 متر يعملوا خطأ "قيادي", يقولوا ايه للأوغاد التانيين اللي بيعرفوا "يقودوا" لمّا يكسروا عليهم أو يخبطولهم حاجة؟

ولاء نابلسي said...

طيب الأوغاد _الرجالة_ اللي زيي, اللي سواقتهم على قدهم وكلّ 53 متر يعملوا خطأ "قيادي", يقولوا ايه للأوغاد التانيين اللي بيعرفوا "يقودوا" لمّا يكسروا عليهم أو يخبطولهم حاجة؟

wahat_alshohada said...

يا سلالالالالالام دة اللى يقع مع واحد زى وائل خليل يبقى هو اللى ظبط يومة و ياخد تليفونة و يبقى على اتصال لان الناس اللى زى وائل وتفكيرها تقريبا كلهم
ماتوا مقتولين :)

basma bahaa said...

ههههههههههههههههههههههههههههههههه جامدة جدااااا

Unknown said...

لى فكرة سواقين الميكروباس بيعملوها من مدة
يفتروا يوتغابوا وبعدين لما تيجي تكلمهم يقولولك معلش يا بيه
ما انت عارف اننا بهايم :D:D:D

مَلَكة said...

أنا شخصيا لو قابلت واحد زي وائل خليل
هعتبر نفسي محظوظة إن شالله ادفع له 10 ألاف جنيه تمن تصليح عربيته اللي انا بهدلتها!

مَلَكة said...

أنا شخصيا لو قابلت واحد زي وائل خليل
هعتبر نفسي محظوظة إن شالله ادفع له 10 ألاف جنيه تمن تصليح عربيته اللي انا بهدلتها!
مش كل يوم الواحد بيشوف حد بيفكر كدة

جتها نيلة اللي عايزة خلف زي رجالة الزمن الاغبر ده

هبه حازم said...

حلوة
اول ما اجيب عربيه اكيد هجربها