الثلاثاء القادم بدء المحاكمة الشعبية ووقفة احتجاجية ضد اقتحام المسجد الاقصى

الثلاثاء القادم، يوم ستة اكتوبر، الساعة اتناشر الضهر في نقابة المحامين ح تبدأ المحكامة الشعبية لمصدري الغاز لاسرائيل ان شاء الله، وبعدها الساعة واحدة الضهر ح تبقى وقفة احتجاجية، على سلم النقابة طبعا :)، احتجاجا على اقتحام مسجد الاقصى

انا عندي شوية ملاحيس:

1- مافيش داعي للاهتمام بعلي سالم، انا مش فاهمة ايه سر تسليط الضوء على الجربوع ده بعد ما كان مرمي في مزبلة التاريخ، مين اللي طلعه من الزبالة ونفضه وحطه على الترابيزة؟ ياريت اللي طلعه يرجعه مكانه على ما اروح اجيب ازازة الديتول، ده واحد لا هو ولا نوال الزعبلاوي لهم اهمية ولا مفروض يبقى لهم اهمية

نوال الزعبلاوي راخرة راجعة بقوة والظاهر راجعة من برة مدّفية كويس

2- انا محرجة جدا اني اقول اللي ح اقوله ده، بس مضطرة: حد يذكر لي واقعة واحدة تنم عن ان التعامل مع اسرائيل مفيد للبلد دي، ماحدش عاد يتكلم عن الاسرى اللي اتقتلوا وضحايا بحر البقر، احنا من هنا ورايح ح نتكلم على اللي عملته فينا اسرائيل بعد اتفاقية السلام، مش هي دي اللي بعتت لنا فراخ مسممة سنة 92 وقتلت كل اللي اكلوها؟ مش هي دي اللي بعتت لنا تقاوي مسرطنة عمالين يشحتوا على ضحاياها دلوقت؟ مش هي دي اللي بعتوا لها البذور تعالجها جينيا قامت خلت الزرع يطلع من غير ثمر ومن ضمنها ثمار القطن وخربت بيت الفلاحين؟ مش هي دي اللي لسة من كام شهر مهددة السد العالي بتاعنا؟ مش هي دي اللي بعد ما سعد الدين براهين عمل قرد لامريكا عشان تستغنى عن عوكل وبالفعل ابتدت مجهوداته البهلوانية تجيب نتايجها وماحدش لحق عوكل عند امريكا غير شارون؟ مش هم دول اللي مقعدين عوكل على قلبنا لدلوقت؟ ومع ذلك كل شوية والتانية يلسعوه على قفاه قدامنا عشان يهزأوه ويقلوا قيمته؟ يعني فارضينه علينا وحتى مش عايزين يهنونا عليه، مش هم دول اللي كل شوية القناصة بتوعهم، بدون اي سبب منطقي، ينشنوا على المواطنين في رفح كنوع من انواع التسلية؟ مش هم دول اللي من غير ما نعمل لهم حاجة، وبرغم كل ندالتنا مع الفلسطينيين نزلوا هبد ورقع في حدودنا وكل شوية يضربوا حدودنا ولسة ضاربينها في المناورات بتاعتهم من كام يوم؟ ووصل بينا الذل والاهانة ان بعض الناس تقول: يعني هم ضربوا الحدود بس ما دخلوش جوة! واقتحموا مجالنا الجوي وخرقوا اتفاقية كامب ديفيد اكتر من مرة لما ضربوا جوة حدودنا؟ مش هم دول اللي حاولوا يشتروا حدودنا وشواطئنا من خلال وكلاء مزيفين؟ وكانوا ح يشتروا ميدان التحرير كمان؟ واحنا ساكتين، بلاش ده كله، مش هي دي اللي عملنا لها عجين الفلاحة ونوم العازب عشان تعدي فاروق حسني واخدتنا على خوانة وغدرت علينا في اخر لحظة بعد ما نكلت بالراجل وقعدت تعصر فيه اربع جولات؟ مش دول اللي فضلوا ورا دول منابع النيل عشان تقلل حصتنا من النيل؟ احنا كنا عملنا لهم ايه عشان يعملوا فينا ده كله؟ ما احنا كافيين شيرنا خرنا وفي حالنا، هات بترول يا زكي قدرة يجيب زكي قدرة، قب بالغاز يا زكي قدرة يقب زكي قدرة، اقفل على الفلسطينيين يا زكي قدرة يقفل زكي قدرة، لحد ما وصل الامر ان بعض من اللي مسميين نفسهم معارضة تعهدوا عند امريكا انهم يرعوا مصالح اسرائيل لو جم بدل عوكل، طيب بيسرطنونا ويسممونا ويعطشونا ويضربونا ليه؟ وبيهددوا السد العالي بتاعنا ليه؟ احنا كنا عملنا ايه؟ ده كل ده واحنا عاملين مقاطعة شعبية، وكللللللل ده بعد ما بقالنا اكتر من تلاتين سنة عاملين معاهدة سلااااام، بعد ما خلعنا من العرب وعملنا معاهم شغل منايفة وقلنا لهم امكوا في العش وللا طارت، بعد ما قلنا لهم نو مور وور، مش بنحاربهم ولا بنهددهم بالحرب اصلا، امال لو فتحنا الباب على البحري وعدينها ح يعملوا فينا ايه؟ ح اعيد الكلام اللي قلته في احد التعليقات:

احنا دولة ضعيفة، احنا بلد هشة، واجهوا الحقيقة، احنا بلد مش عارفة تلم زبالتها من الشارع، مش عارفة تعالج شوية عيانين من غير شحاتة، مش عارفة تحل مشكلة رغيف عيش من غير ما تنزل الجيش يأكل الناس عيش، وقالوا الجيش ح يحل مشكلة الزبالة، الجيش ح يلم الزبالة، عشان الدولة مش عارفة تلمها بعد ما انضحك عليها من الشركة الايطالي وانا وانتوا لسة بندفع لهم فلوس، مش عارفة تطلع رخص لسواقين الميكروباص، مش عارفة تلم البلطجية من الشارع، مش عارفة تعمل شبكة صرف صحي وبتقول ان الناس هي سبب انفجار المواسير عشان بياكلوا كرات!!!! اي والله العظيم، مش عارفة تحط سبت زبالة وللا تجيب كناس في الاماكن السياحية قامت منعت المصريين من زيارتها، مش عارفة تسيطر على انفلوانزا الطيور، مش عارفة تعمل حاجة خالص، خالص، ربنا ساترها معانا بالبركة، احنا مش حمل اننا نفتح الباب على البحري لناس كل ما يلاقوا خرم صغنن يدخلوا لنا منه تعبان اصفر بالرغم من كل حسن النوايا اللي عمالين نظهره ده احنا اتخانقنا مع سوريا توأمنا اللي احنا وهم كنا زي اللب والسوداني كده ما يفترقوش عشان خاطر يرضوا عنا، ومافيش فايدة، لو هجموا علينا بالتطبيع مش ح نعرف نعمل لهم حاجة، ده حربهم اسهل واضرارها اهون من التطبيع معاهم، مش عشان حربهم سهلة، بس على الاقل عشان ح نعرف راسنا من رجلينا، انما التطبيع ح يبقى لسع على القفا ونيجي نتدور مش ح نلاقي حد ورانا، وكلام مجموعة كوبنهاجن السافلة، سافلة فعلا، بتاع: انتوا ما عندكوش الشجاعة تطبعوا مع اسرائيل (قذرين قوي، قوي يعني) خلينا نعتبره صحيح، اه، ما عندناش الشجاعة، ايه الشجاعة في اننا نرمي نفسنا في سرطان وتسمم وتعطيش وتهديد لا ينقطع، عشان ايه؟ عشان شعرهم اصفر وعينيهم ملونة مثلا؟ اذا كان الجعانين واقفين على حدودنا مش عايزين نفتح لهم وبنقول لهم سيبونا في حالنا احنا فينا اللي مكفينا، نقوم نفتح على نفسنا ابواب جهنم؟

على فكرة، الكلام اللي فوق ده وسخ قوي، قوي يعني، بس الواحد مضطر يقوله، الزبالة ملت البلد، واحنا مضطرين نتعامل مع الامر الواقع، مافيش مجال اننا نتكلم عن المبادئ والاشياء التي لا تشترى، لا مؤاخذة يا عم امل دنقل، ماعدش ياكل الكلام ده، احنا ماشيين نقول يا حيطة داريني