والله لفتت نظري يا عوكل يا خويا

تحديث لا بد منه:

من حيث انه خايف، اه خايف، من حيث انه ح يمشي لا مش ح يمشي، عشان جاتلي تعليقات واتكلمت مع ناس، من ضمن الناس اللي كنت باتكلم معاهم واحد بيقول لي: يتصدروا له قانون يا نوارة خلينا نخلص... مش ح نخلص

اولا: مهم جدا نعرف الكلام جاي من مين، الكلام جاي من عماد اديب باستصدار قانون يعفيه من المحاسبة لو عايزينه يمشي وما يجيبش ابنه. عماد اديب صديق شخصي له بيقول له يا محمد عشان تبقوا عارفين يعني.

ثانيا: هو فعلا عايز يستصدر القانون ده، بس مش عشان ما يجيبش ابنه

من امتى عوكل بيوعدنا بحاجة وبيعملها؟ فاكرين ايام اضراب اربعة مايو لما جه تسعة وعشرين ابريل ادا الناس علاوة تلاتين في المية ولما اضراب اربعة مايو باظ يوم خمسة مايو رفع البنزين خمسة وتلاتين في المية؟

عادي، ده المعتاد، ابتسم انت في المنوفية حضرتك

هو عايز يستصدر قانون يحميه ويحمي ابنه من المسائلة وبررررررررررضه ح يجيب ابنه، اول ما القانون ده، لا قدر الله، يتم استصداره، عشان عادي، هو متعود يسحبنا من ايدنا بالراحة واول ما نديله ضهرنا يلسعنا على قفانا

انتوا مش حاسين وللا ايه؟ ما ورمش؟ انا شخصيا قفايا ورم... ما اعرفش بقى انتوا من كتر الضرب ممكن يكون نحس؟

وماحدش يستهين بانه خايف من الشعب، ايوة خايف منه وشاف بعينه صورته وهي بتدهس بالجزم، وعارف اننا بنكرهه، وعارف ان فيه ناس كتير تتمنى انه يتحاكم، وعارف انه عامل جرايم

بس ده مش معناه انه عايز يمشي ولا ما يجيبش ابنه، ده معناه انه عايز يأمن نفسه وابنه بزيادة

ثالثا: على فرض ان طرح عماد اديب صحيح، انا بقى عندي يقعد كمان عشرين سنة على قلبي لحد ما يسري عليه اللي بيسري على كل حي (وللا ايه؟ وللا هو مش حي؟) ولا اني استصدر قانون يعفيه ويعفي كل من ييجي بعده من المحاسبة

وبرضه ماحدش يقول لي: ماهو بيتحايل على القانون، لما يبقى فيه قانون يدينه وهو يتحايل عليه تختلف تماما عن ان يبقى فيه قانون بيقول له: اسرق براحتك

رابعا: ما تستهونوش بكلام عماد اديب، عشان ده كلام عوكل نفسه، ده الناطق باسم شخصه المعظم

وما تصدقوش عوكل، عوكل دايما بيضحك علينا

وما تستهونوش بالشعب عشان هو فعلا يخوف... الظاهر عوكل بيفهم في الشعب المصري اكتر منكوا

عوكل شكله عايز يطلقنا وخايف نطالبه بالنفقة فبيقرفنا عشان نعمل خلع

باعت لنا رسالة مع عماد اديب يقول لنا: سيب وانا اسيب

قال ايه "كل رئيس" مضطر انه يختار خلفه عشان يضمن انه ما يتحاكمش، هذه الحكمة الغراء جات لنا على لسان عماد اديب واللي ما يعرفش ده صديق شخصي لعوكل، ما يتهياليش ان فيه حد ما يعرفش

يعني عوكل جاي لنا بالمفتشر يقول لنا، اضمنوا لي اخرج انا والعيال نضيف يا اما والله اسيب عليكوا فرانكشتاين

للدرجة دي عارف هو عامل ايه؟ ايه يا ناس اللي بيتقال لنا ده؟ احنا قاعدين في بلد وللا في الجبل مع المطاريد؟ وعايزنا عشان خاطر عيونه نطلع له قانون يخرجه بالسلامة ومش مهم بعد كده نلبس في مين

مش كده؟ بعد ايه؟ بعد ايه يا عوكل؟ بعد ما خربتها؟ بعد ما سوست البلد وخوختها وسبتها للامريكان يتغلغلوا في كل خلية فيها والبلد ما بقتش بلدنا خلاص؟ تولع بقى، يجيلنا سعد الدين ابراهيم، يجيلنا اسامة الغزالي حرب، يجيلنا المهبوشة ام كدش اللي لا محصلة ست ولا راجل وهي الدليل الحي على صحة نظرية داروين، يجيلنا جدري مالكش دعوة، دي شغلانة الامريكان يحطوا الحاكم الاقليمي اللي يعجبهم، انت الحمد لله جبت ضرفها وعملت اللي عليك وعايز ترتاح بقى وتسلم شعلة الخراب لجيل الشباب، وبتهددنا بالعاهة المستديمة اللي بليت بيها البشرية؟ طب اللي قبلك والناس بتترحم عليهم من غير اي مناسبة لمجرد انهم ماتوا واحنا من عادتنا اننا نترحم على الميت حتى لو كان خط الصعيد وريا وسكينة وانت حضرتك زهقت مننا واستكفيت وعايز تمشي

لا بقى يا سيدي، تموت وسطنا زي ما التانيين ماتوا وسطنا وخلاص، عشان على الاقل تلاقي حد يترحم عليك من غير مناسبة برضه

هو انت خربتها قاعد وعايز تخربها ماشي؟ انت ايه؟ يا اخي احنا لو بينا وبينك دم ما كنتش عملت كده

ثم ايه "كل رئيس" مضطر.. ده فين يعني؟ كل رئيس فين؟ في مصر صح؟ طب ايه قولك يا عوكل ان انت الظاهر فعلا الخوف سيطر على مخك وما بقتش تعرف تكتك زي زمان؟ عشان احنا ما جاش على بالنا نحاكمك

تصدق؟ انت دلوقت اللي لفتت نظرنا انك تستاهل تتحاكم على المعاهدات اللي وفقها بعت البلد، وعلى فزعتنا لما نعرف ان ناس رافعين قضية عشان ميدان التحرير متباع لهم، وعلى سرطنة اكلنا، وعلى بيع بلدنا، وعلى الفتنة الطائفية اللي خلقتها وكل شوية تزكيها، وعلى شهداء المواصلات برا وبحرا وجوا، وعلى تسديدك لرزقنا: اللحمة فيها حمى قلاعية، الفراخ فيها انفلوانزا، السمك فيه تلوث، قوم حتى يا راجل الفول والطعمية تحط لنا فيهم مجاري؟ وعلى تكبيلك للبلد بديون بفوايد مركبة وتخطيطك لهدم كل بناها التحتية عشان البلد تفشل في سداد الدين يقوم البنك الدولي يضع ايده على بنيتنا التحتية ويديها لمستثمرين اجانب وانت تاخد كومشن، وعلى تلويثك لهوانا وسمانا وتبوير ارضنا، ده انت فضيحتك وصلت لالكس جونز، وعلى كل اللي عملته، اللي ما يتوصفش باقل من انه جرائم حرب ضد الانسانية

وتصدق بقلبنا الابيض ما كناش واخدين بالنا انك ينفع تتحاكم، انت بقى عشان عارف انت عامل ايه وخايف من المحاسبة، وعارف انت مخلف ايه وبتهددنا بيه

ومش عاجبك اعملي خلع يا اما والله كل يوم علقة

انا طالبة توضيح عاجل من الاخوة المنايفة، فيه كده في الدنيا؟