الحقيقة انا ما توقعتش المشاركات تبقى بالكثافة دي، ياااااه، ده الناس شايلة ومعبية يا جيمي، دول كأنهم ما صدقوا يا قلب امهم، حنفية واتفتحت ما بقتش عارفة اسدهم ازاي
وبقت بقى مش عارفة، اكتب الاسئلة على طول، وللا اقول كل واحد قال ايه؟ انا قلت احط اللنك اللي عليه المشاركات وانتوا تشوفوا
واليكم دون ادنى تدخل مني ولا حتى بتصحيح اخطاء الكي بورد.... مصر تسأل جمال مبارك، ايش عرفك انت:
إيش عرفك بخريج جامعة أو تعليم متوسط مش لاقى شغلانة لا بشهادته و لا من غيرها و معندوش واسطة؟
إيش عرفك بواحد أبوه إترفد من شغله و مابقاش يقدر يصرف عليه و لا على إخواته فإضطر يسيب المدرسة و يدور على رزقه فى الشوارع؟
إيش عرفك بمهندس خبرة خمس سنين لأ و بيشتغل و بشهادته و قطاع خاص و مع ذلك مرتبه ما يجيبلوش شقة لو حوشه كله 15 سنة؟
---
سؤال بسيط لو سمحتي
هو مش جيمي برضة ممته نصها انجليزي و نصها مصري؟
يعني جيمي 75% منه بس مصري
و على حسب معلوماتي ان اللي زيه لا يصلح ان يكون عسكري في الجيش اصلا فكيف يصبح القائد الاعلى للقوات المسلحة و هو 25% منه انجليزي؟
سؤال اصغر
هل جيمي عند بسبور انجليزي؟
----
وانا هاضيف من عندي كمان :
ايش عرفك انت باحساس شاب لسه في العشرينيات وقلبه حزين وعنده احباط ويأس الدنياكله راكبه وتشوفه تديله 100 سنه.
اتقتل طموحه وكل الابواب مقفوله في وشه هو ومفتوحه علي مصراعيها للتافهين والاغبياء والفاشلين
ومطلوب منه يكون انسان كوووووووول وميحقدش علي ولاد الناس الواصلين علي الرغم من تفوقه وكم الشهادات العليا وكورسات اللغه والكمبيوتر اللي واخدها لكن مش عارف يلاقي مكان محترم يقبله للعمل فيه وكل ده لسبب بسيط لأنه معندوش واسطه واسطته دراسته وعمله الجاد ودول موصلهوش لاي حاجه...
-------
ايش عرفك انت بواحدة ست عجوزة ماتت في سريرها وحيدة بتبكي ان ولادها كلهم مش جنبها عشان راحوا الخليج بعد ما ضاقت بيهم الدنيا هنا عشان يعرفوا يستروا نفسهم
ايش عرفك انت باوضة وصالة ساكن فيها 3 اسر بملحقاتهم
ايش عرفك انت بناس ساكنة في عشش كل 10 اسر ليهم حمام واحد مشترك
ايش عرفك انت بواحد ولا واحدة عزيز النفس مش لاقي يأكل عياله ويسترهم وبيستعفف ومش هاين عليه نفسه يشحت
ايش عرفك انت بناس بتموت عشان مش لاقيين تمن الدوا
ايش عرفك انت بينا انت مش مننا على فكرة
---------
إيش عرفك
انت وانت اللي قابض علي نفسنا بعد المتعوس ابو كلت مدلدل اللي مسكك البلد دى ان فيه 10 مليون معاق اللهي اللي فيهم يجي فيك يابعيد انهم مبيشتغلوش ولا ليهم تأمين صحي محترم ولا سكن يلهم ولا جوازة تعفهم ايش عرفك انت وانت عامل فيها فرعون تيت اوى وعامل فاهم البلد جتنا نيله في حظنا بعد ما السادات خمنا وجابك
------
ايش عرفك انت بحالنا وحال عيال وعمال المصانع في بلدنا
ايش عرفك ومين فينا اصلا عاوز يعرفك
من الاخر خليك بعيد لانك متشرفناش رغم اننا نشرفك
---------
ايش عرفك ب 5 ماتوا مخنقوين من السحابه السوداء وناس عندها ربو و ازمات حتى الهواء النضيف مش عارفين يشموه؟
ايه عرفك بواحد عنده الكبد و استسقاء وبيعملوله بزل كل شويه و بيلف على التامين الصحى علشان يلاقى الدواء و لسه بيشتغل لاخر نفس علشان يوفر لولاده لقمه؟
ايه عرفك بمعنى انك تكون مصرى ابن مصرى شريف وتتعامل معمله الكلاب فى القسو ولو حد طلع بسبور امريكانى ؟؟
ينضربله تعظيم
ايه عرفك عن شاب باع الى وراه والى قدامه علشان يركب قارب فى البحر علشان ياكل اكله نضيفه؟
ايه عرفك باكل مسمم بالمجارى و انت بتاكل الاورجنك؟
ايه عرفك بواحده غلبانه بتحط القرش على القرش علشان تجيب خلاط لجهاز بنتها احسن الجوازه حتبوظ؟
انا بصراحه لو انفتحت مش حسكت خلى الى فى القلب فى القلب بقه
------
ايش عرفك انت بواحد ساكن فى عشة
يصحى من نومه ويكون فطاره صخرة تقع عليه تدفنوا تحتهاو مقدرتش تطلعه, عمرك صحيت من النوم؟
ايش عرفك انت باحساس ام مستنية ابنها يرجع من غربته هو وابنه من السعودية و الحوت ياكلهم فى البحرو الحوت ياخد 7 سنين,عمرك حسيت بالظلم ؟
ايش عرفك بام تانية ابنها نازل يعيد عليها ويولع فى قطار. عمرك ركبت قطار؟
-----
ايش عرفك بـ شباب كتير بيدرسوا حاجة مش طايقنها لمجرد ان مكتب التنسيق رماهم فيها ؟؟
ومع ذلك بيذاكر وبينجح بيتخرج
ايش عرفك بطلبة الانتساب المشوخين من الدكاترة وادارة الجامعة اللي عاملاهم سبوبة بصرفوا بيها علي الجامعة وكل شهر زيادة في الرسوم واخرها مفيش حضور علشان انفلونزا الخنازير
ايش عرفك بواحد طالع عينه علشان يحوش 95 جنيه اشتراك نت من الزبالة وفي الاخر السنترال يتعوج ويقوله خطك مش نافع روح غيره
ايش عرفك بأربعة جيران مشتركين مع بعض في وصلة نت علشان الاشتراك عالي
ايش عرفك بموظف شاطر وعنده 24 سنة وشغال 15 ساعة بمرتب 600 جنيه مع العلم بأن صاحب الشركة مليونير
ايش عرفك بالبنات اللي بتبيع نفسها وشغالة جرسونة في كافيه علي البحر علشان الف جنيه مع العلم ان كهم مؤهلات عليا
ايش عرفك ب بنت اتجوزت من واحد خليجي اكبر من ابوها واتطلقت وعي مجبتش 25 سنة
عايزة تاني ولا اكتبهم في بوست عندي ؟؟
--------
أسمحولى ابأه أنانى شويه
أيش عرفك أنت
بخريج هندسه حاسبات وأهله طفحوا الدم فى كورسات علشان ياخد أكبر شهادات تقنيه فى العالم وبيتفرج على أعلان (أشتغل أى حاجه لا القطر يفوتك)
ومطلوب منه 25 الف جنيه علشان يتعين فى الحكومه ؟!!!!!
------
ايش عرفك انت
ايش بلدي بمسامير
وايش فينو بنص جنيه
واللي يايش ياما يشوف
اللهجة معدلة عشان ماننساش الربع الانجليزي
-----
طيب هحاول أشارك معاكم :
أيش عرفك أنت بشاب ترك تعليمه وبيشتغل في شغله مالوش أي دعوة بيها علشان يقدر يعيش في بلد أنت بتطمع تحكمه ؟؟؟
أيش عرفك أنت بنظام الكفيل اللي بيستعبد شباب بلدنا في الخليج وبيذلهم ؟؟؟
أيش عرفك أنت بشباب نفسهم يعيشوا كبشر في بلدهم ؟؟؟
أيش عرفك أنت بشباب كتير أنتحروا علشان شافوا من كرم نظام حكام أبوك كتير ؟؟؟
أيش عرفك أنت بشباب بيسب ويلعن في اليوم اللي أهله خلفوه فيه علشان حاسس أن خير بلده مش لأهلها ؟؟؟
أيش عرفك أنت بشباب ماشيين مع بعض ويوقفهم ظابط معفن بـ 50% ويقول لهم طلعوا بطايقكم ؟؟؟
------
ايش عرفك انت بواحد ولا واحده بيركب له 3 او اربع مواصلات علشان مافيش حاجه اسمها هيئة النقل العام او دور للحكومة فى المواصلات و سايبين عليهم سواقين الميكروباصات البلطجيه و بتوع التكاتك
ايش عرفك انت بعيل فى اعدادى مش بيعرف يقرأ و يكتب لأن تعداد الفصل بتاعه 60 تلميذ و بيروح 3 فترات دراسه تخيل عيال تروح الساعه 7 تخرج على الساعه 10 بيضحكوا على مين
ايش عرفك انت بالستات اللى بيتروح للفرارجيه علشان يشتروا كيلو رؤوس و اجنحة فراخ يعملوا عليهم مرقه ياكلوا بيها
------
ايش عرفك بالغلابة الفقراء اللى بيسترزقوا بالبيع فى المترو وكل شوية الامن يجرى وراهم و يسحبهم علشان يزهقوا و يتحولوا لحرامية؟
ايش عرفك بأم الايتام اللى بتدور تشحت علشان جوزها كان عامل سريح مالوش معاش؟
----------
ايش عرفك بالملايين اللي هجوا بره مصر و كتير منهم مش عايز يرجع تاني
ايش عرفك يعني ايه تكون بتشرف على بناء و تشطيب شقق و انت مرتبك ما يسمحلكش تحلم بأوضة حتى مش بشقة
ايش عرفك لما تكون بتمضي على مستخلصات للمقاولين بملايين و مرتبك 500 جنيه و الرشاوي بتتعرض عليك يومياً و انت تقول لأ رغم انك عارف إنك لو فضلت تحوش مرتبك 50 سنة مش حتعرف تتجوز و لا تجيب حق شقة و لا شبكة و لا مهر و لا فرح
على فكرة أنا فاكر إني كنت قريت في جرنان الدستور من زمان إن جمال و علاء معاهم جوازات سفر بريطانية
لأنهم أخدوا الجنسية البريطانية من مامتهم سوزان اللي أخدتها من أمها الممرضة من مقاطعة ويلز
---------
انتهت المشاركات ولم تنته الاسئلة
المدون اللي عايز ينقل عنده الاسئلة والحملة ياريت
9 comments:
هستاذنك انقل التدوينه في احد المنتديات والممدونات
يصيبك الاعياء الشديد وأنت تبحث عن سبب واحد لعدم غضب المصريين فتعثر على مئة مبرر بل قد تقابل سبعين مليونا من الأبطال المؤجلة بطولاتهم إلى حين .. أما متى يأتي هذا ( الحين )؟ فالاجابة لا يعلمها إلا رب العرش العظيم.
تقول لنفسك قد يغضب المصريون لو حدثتُهم عن مستقبلهم في ظل وجود سبعة ملايين عاطل عن العمل سيتضاعفون بعد خمس سنوات! أو قد يغضب المصريون لو نشرت أمامهم تفصيلات ما يحدث في أقسام الشرطة والسجون بموافقة صريحة من السيد رئيس الدولة. أو قد يغضب المصريون عندما تجتاح الوطنَ أمراضٌ وبائية طاعونية تهلك الحرث والنسل وتقتل عدة ملايين طفل سممتهم نفايات دفنها أحد أصدقاء جمال مبارك تحت الأرض الزراعية أو ألقتها المصانع في مياه النيل.
هي الاسئله دي كلها اجباري والا في اختياري
خالوها اجباري
بس هو مافيش السؤال الشهير
انتييي اشتغللللليييي اييييييه فالد
هي هتبقي عيش بس
بكره ياخدوا مننا الحلاوه
وهتبقي كمااااااااان عيش حاف
هههههههههه
*تحياتي
dr lecter
ايوة ارجوك انقلها على اوسع نطاق
Al
ربنا ما يوريك اللي احنا فيه
دنيا
هههههههههههه
الارزاق على الله
إيش عرفك إنت بإحساس واحد ماشي في الشارع خايف اللي يطلع عليك بمطواة ولا الي يشدك إحم ولا اللي يدوسك بالعربية عشان ماحدش بينفذ القانون ولا تدوس على سلك كهربا عريان ولا ابنك يقع في بلاعة مفتوحة؟
أنا نقلت التعليقات عندى
هو الراجل ده مابيحسش خالص كده
لكن يحس ازاى ما هو ايش عرفه
احب ان ابدى اعجابى الشديد ببلاغة وفصاحة من جاء" بكلشية" (مايحكمش).الكلمة مزدوجة المعنى وساخرة ومختصر مفيد
السؤال المُحَيّر والذي لا يجد تفسيرا منطقيا عند كل علماء النفس والاجتماع ولو كان بعضهم لبعض ظهيرا هو: كيف أن كل مصري يعرف أن عهد .. مبارك هو أسوأ عهود الحكم في التاريخ المصري الحديث، وأن المشهد المصري أصبح حالة من البؤس والكمد والغم والحزن والفقر المختلط بمهرجان نهب الوطن، وتهريب خيراته، وتدمير اقتصاده، وتغيير عادات وسلوكيات أطيب شعوب الأرض لتتحول إلى فهلوة وبلطجة، ومع ذلك فإن الخنوع يسري بسرعة الصوت في كل خلايا الجسد المصري المسجى أو الخاضع أو الساجد أمام ساكن القصر الجمهوري؟
باستثناء قلة نادرة من الشجعان والفرسان والنبلاء فقد انحرفوا جميعا، تقريبا، وسلكوا مسلك الجبناء والصامتين والعبيد المستكينين أمام رجل واحد وأسرته !
... عجبي
صباح الخير يا نوارة التصميم خلص
ايش عرفك انت
Post a Comment