الامن باعت لي واحد من الاضيشه يهددني

مش الاخ اللي دخل يقنعني ان التعامل مع امريكا وطنية طلع امن؟ اه والله، وبعد ما نتع قلبي في المناقشة ورص الكلام اللي مالوش اي معنى وانا بهبلي عمالة اقرا الكلام بجدية واذ بي أوفوجأ انه ابتدى يقول لي اتهامات امنية وبعدين اذ فجأتن راح مهددني وافصح عن نفسه في التعليق ده

وعشان ما تتعبوش نفسكوا في الكليك التعليق اهو

المعلم برعى صاحب القهوة said...
يانوارة بنت نجم احترمى نفسك واتكلمى بأدب مع الناس هنا من فضلك لا فيوم من الايام يكون مصيرك مصير الاخ بتاع حماس فى غياهب سجونا المصرية العتيدة التى لم تفتح خصيصا الا لامثالك لانك بكده ممكن تغلطى فى حد مهم يوديكى ورا الشمس وهناك برد يابنتى وانا خايف عليكى قلة الادب والسفالة لاتدل الا على بيئة صاحبها ، وياريت بلاش ضعف النسوان ده وتردى على اسئلتى كان بالذوق بدل الشتيمة لانى أساسا مش فاضى أعلق واضيع وقت مع واحدة فاضية لاوراها شغلة ولامشغلة ، وسلميلى علعروبة ، الا بصحيح انتى مصرية أساسا ؟ يعنى عندك كده انتماء للبلد وبتحسى زينا يعنى ؟

--------

لا وفاتح مدونة وبتاع عامل تموين مظبوط، بنصاحته فاتح المدونة الشهر اللي فات، وبنباهته كاتب بوست يوحي لك انه ضد جمال مبارك وتدخل على البوست تلاقيه بيقول ان جمال مبارك ح يطور البلد، وبعدين تدقق في البوستات شوية، ظابط ظابط يعني، الهيبة باينة برضه

طب وتاعب نفسك وبعدين تنسحب من لسانك كده؟ انا بقى ما ضحكنيش في ده كله غير "اتكلمي بادب مع الناس هنا" هنا فين؟ في مدونتي؟ الله الله الله، هي المدونة مسكونة وللا اييييييييه؟ انا فاكرة انا فيها لوحدي يا ح الظابط، انتوا هنا بقالكوا كتير؟ طب مش كنتوا تقولوا كنا عملنا معاكوا واجب؟ شاي، قهوة، ازوزا، كونيااااك مشروب الفتاة المهذبة؟

وانت بقى من الاخوة اللي تبع "مصير بتاع حماس" شخصيا؟ اهلا وسهلا، شرفت وآنست

وبالنوسبة لسؤالك يا ح الظابط هو انا مصرية وللا لا؟ دي حاجة تقدر تسأل فيها السجق المدني، بس اكيد انا عندي انتماء يوزنك انت والباشا بتاعك والباشا بتاع الباشا بتاعك والباشا بتاع الباشا بتاع الباشا بتاع الباشا بتاعك لحد اتخن باشا قاعد على قلبنا، واذا كان غسلوا لك مخك وفهموك ان المرمطة تحت رجلين امريكا والوقوف مع المحتل ضد المقاومين ده انتماء وفهموك انك لما تدخل مدونات الناس يا تقنعهم ان امريكا حلوة يا تهددهم انت كده بتخدم الوطن يبقى هاجر امريكا يا ننوس انت والباشا بتاعك والباشا بتاع الباشا بتاعك والباشا بتاع الباشا بتاع الباشا بتاعك وحلوا عن سمانا بقى لوجه الله تعالى، عشان النفس، سامعني يا عم الكتكوت، دي بلدنا احنا، وانتوا مش اكتر من كلاب نظام، ييجي واحد يقول لكوا يمين تهوهو يمين، يموت الواحد ده (وكلنا بنموت) وييجي واحد مكانه يقول لكوا شمال تهوهو شمال، ولو كنت موجود ايام بتاع العروبة كنت هوهوت مع العروبة عشان هم علموك كده في الكلية، اللي الراس الكبيرة تقوله لا ممكن ينزل الارض ابدا، امال هم بينقوكوا جايبين خمسين في المية ليه؟

واللي انا اعرفه ان السجون المصرية معمولة للناس المحترمة، فاذا كنت شايف اني محترمة لدرجة انك تقول لي السجون المصرية معمولة لامثالك فميرسي ليك كتير على المجاملة الرقيقة دي، وانت مش فاضي ليه؟ وراك كام واحد تعذبه يا ح الظابط؟

حاضر ح اسلم لك على العروبة، وانا متشكرة عن اعطائي فكرة للتهمة اللي بتحضروها لي، ههههه بجد؟ ح تتهموني باني متحالفة مع العروبة ضد مصالح مصر؟ ههههههههههههه والله تعملوها

طب ياللا يا عم الامور... روح قول للباشا بتاعك انك غبي وكشفت نفسك بسرعة، خليهم يبعتوا غيرك

-------

ملحوظة: انما مناورات النجم الساطع دي بسم الله ما شاء الله جابت لي ناس رتب هنا في المنطقة، مرة اكرم زكري القيادة الوسطى المركزية، ومرة ح الظابط... هو الكلام عن الموضوع ده حساس كده؟ طب ما كل الناس يعني بتتكلم عنه، ما الاهرام بيتكلم عنه، والجزيرة بتتكلم عنه، والسي ان ان بتتكلم عنه، ومحمد بيتكلم عنه، وحسين بيتكلم عنه، لو مش عايزين حد يتكلم عنه ما تعملوها سرية

------

VISITOR ANALYSIS
Referrer http://cairo-voice.blogspot.com/
Host Name
IP Address 196.221.166.45 [Label IP Address]
Country Egypt
Region Al Qahirah
City Cairo
ISP Rt-adsl-project
Returning Visits 0
Visit Length 16 hours 11 mins 43 secs
VISITOR SYSTEM SPECS
Browser IE 7.0
Operating System WinXP
Resolution 800x600
Javascript Enabled
دي معلومات الجهاز بتاعه من الكاونتر ومدة زيارة المدونة ستاااااااااااااشر ساعة، قاعد على مدونتي بقاله ستاشر ساعة، وده طبعا لانه مش فاضي، هي ايه ار تي ايه دي اس ال بروجيكت دي؟ عمري ما سمعت عنها