Tuesday 30 November 2010

وهنا تحضرني قصة


حزب الوفد اخد تلات مقاعد، اخر انتخابات كان عنده ست مقاعد
اخد تلاتة دلوقت حاليا
زمان السيد البدوي قاعد دلوقت يقول: اين اشيائي؟ اين اشيائي؟
انا رأيي ان حسني مبارك منوفي وقالك واحد خدامة زي ده ماينفعش الواحد يعول عليه، نديله الخازوق ونرميه زي الكلينكس مدام واطي قوي كده
لكن ميدو له رأي سديد جدا... إن حزب الوفد فقري، اللجنة كان فيها تزوير لمنير فخدي عبد النور والقاضي اكتشف التزوير ودونا عن كل اللجان ده الوحيد بقى اللي طلع عنده ضمير
ويقول ميدو جزاه الله عن الامة الاسلامية كل خير:
الدواير مسيطر عليها تربيطات اكبر من الحزب, اخرهم يغضوا الطرف عن البلطجة و يسيبوه و هو و شطارته بس البدوى طلع كاحول
كلام سديد والله يا ميدو
وهنا تحضرني قصة، حدثت بالفعل، قريب واحدة صاحبة ماما زمان كان ابن العمدة، وواد اهبل قوي كل سنة يسقط، جه العمدة قال للمدرسة مش معقول كل سنة يسقط تنجوه يعني تنجحوه ده ابن العمدة
وبما انه نبيه بزيادة، فحطوا له ورقة الاجابة
قعد يزق في اللي قدامه: حازم حازم..
فالتفت له حازم: عايز ايه يا زفت؟ ما هم حاطين لك ورقة الاجابة اهي
فأجابه ابن العمدة: ايوة يعني نعمل فيها ايه؟ نحط لها اسئلة؟
ولسه فيه اعادة.. على الاعادة بقى حيروحوا يشيلوا الكنب والكراسي من الحزب، ولو طعن حيحجزوا على عفش بيته
ده الراجل قال الانتخابات تمت بنزاهة وشفتشية، حيعمل ايه اكتر من كده
خلاص بقى، ماحدش يشتمه تاني يا شباب، الضرب في الميت حرام

Sunday 28 November 2010

ولهذا ولكل هاتيك المجالي تحال اوراق الشعب المصري المسكين الى فضيلة المفتي

ومن ثم، موقع الويكي ليكس اتهيك عليه
انا براخرة قلت الحركات الوسخة دي ما يعملهاش البيت الابيض ولا حتى الاسرائيليين، مافيش دين ام تافه في هاذوها العالم غير الخرا اللي احنا عايشين فيه، وعشان كده احنا مرميين في زبالة التاريخ، ينضرب بالرصاص علينا في الشارع وماحدش يسأل فينا، انتخاباتنا تتزور وماحدش يسأل فينا، نتفرم ونطحن وماحدش يسأل فينا، عشان اصل الايرانيين معمولين من دهب واحنا معمولين من خرا
لا سوري
عشان مبارك هو اللي معمول من دهب ونجاد هو اللي معمول من خرا
كده معادلة تبقى اصح
انا بس مش مزعلني غير ان صورتنا عند الناس غير حقيقتنا خالص، الناس عمالة تقول المصريين خانعين وراضيين ومتنيلين، هو احنا عشان ما بتنصورش واحنا بننضرب ويطلع تلاتينا نبقى خانعين، العالم كله ضدنا اساسا عشان رئيسنا معمول من دهب... واحنا معمولين من خرا

القبض على احمد البرماوي وضربه، واربعة ماتوا، واتصلوا بشركات الانترنت




بعد قراءة الفاتحة لأوراح الشهداء كل اللي بيحصل ده شغال، ما تتخضوش
1- احنا اتأكدنا ان نظام مبارك هو نظام احتلال بدليل الدعم الدولي التقريني اللي واخده، السي ان ان بتتكلم عن انتخابات هايتي والجزيرة بتقطع على اللي بيتهم مبارك بالتزوير ومش ناقص غير شنخوا الصينية تقول مبارك رمز الديمقراطية
2- ادينا عرفنا مين عدونا من حبيبنا، حزب الوفد بيشهد بنزاهة الانتخابات (اديكوا شايفين الفيديوهات) ومصطفى بكري قال الامن مش هو اللي زور الانتخابات معدومي الضمير هم اللي زوروها هههههههههههه كويس كويس خلي كل واحد يبان
3- مبارك اللي مظبط العالم ما عرفش يهزم الكام عيل اللي نازلين يصوروا بموبايلاتهم ومش مستنيين حاجة من حد والناس تحركها كويس، السويس وبلطيم وبني سويف متقفلين والناس عاملين مظاهرات وقالبين الدنيا
4- الاخوان قدموا تضحيات تحترم وتتقدر وهم جدعان وفضحوا النظام، والعيال نزلت تصور جدعان
واذا ما كانش فيه فايدة غير ان الاوساخ يتكشفوا ويبانوا على حقيقتهم كفاية


عدد القتلى وصل 13 قتيل







أعيد وأكرر، ماحدش معانا خالص، المصريين لوحدهم والحزب الوطني مستفرد بيهم
بس على فكرة.. اجدع ناس، اي والله العظيم، اجدع ناس ومش محتاجين مساعدة من حد احنا جامدين قوي، مش تهريج، المصريين واقفين لوحدهم قدام قوات الاحتلال اللي واخدة دعم عالمي واحنا قدها وقدود
ونعلمكم الرجولة يا عالم يا وسخة

من بني سويف، قام مرشحا الحزب الوطني هشام الوكيل واشرف الشيمي ببني سويف بإغلاق اللجان بالسلاح في قريتي ميدوم وميمون وهناك العديد من الاصابات

قال مستشار السفارة الأسبانية،إن ما شاهده بالدوائر يبرهن على قدرة الحكومة 
المصرية على إدارة العملية الانتخابية بشفافية
يعني ولاد التيت يكتبوا عننا في الفورين بوليسي: اقصر طريق لصوت الناخب المصري معدته، ولما نتقتل في الشوارع يقرنوا على النظام؟ 
------------
لمتابعة الانتهاكات والتزير رجاء مشاهدة هذه القناة
اعود واكرر: مافيش مخلوق في العالم واقف جنبنا ولا حتى بينقل صوتنا
طيب يا بني ادمين.. افتكروا بقى يا مصريين موقف العالم القذر معانا شرق وغرب

بلطجية الحزب الوطني


احمد البرماوي خرج بالسلامة، وطالب اعدادي اتقتل، عدد القتلى وصل لعشرة الآن
كل وسائل الاعلام العالمية، بما فيها الجزيرة، متواطئة علينا، احنا مالناش غير ربنا يا شباب




انا كنت عارفة انه مش حيعدي على خير وما فتحتش النت ولا التلفزيون عشان مش عايزة اعرف ولا اسمع، قوم الناس بتحاصرني برضه وتبعت لي رسايل على الموبايل
احمد البرماوي اتقبض عليه وهو بيراقب الانتخابات في واتضرب في قسم المحلة دمنة
بيقولوا في اربعة ماتوا؟
طيب، انا دلوقت باتصل بلينك 
16333
عشان اشتكي ان المواقع دي محجوبة
ونمرة تي اي داتا
19777
عايزة الكل يتصل ويشتكي من حجب المواقع، هم طبعا دلوقت لاطعيني وعمالين يقولوا لي: عميلنا العزيز جميع مندوبينا مشغولين الآن
استنوا  اهو رد
قال لي افتحي اي مواقع تانية مش بتفتح معاكي؟ يبقى هم بيعملوا تصليحات 
هههههههه
ما عرفتش ارد عليه عشان انا تقنيا خايبة، بس مش مهم ارد، حتى اللي مش حيعرف يرد يتصل وياكل دماغهم لحد ما يطلقوا سراح المواقع

ياللا
هو مافيش مشكلة من حجب المواقع لان جمال عيد حاطط لكم اللنكات البروكسي اللي تقدروا تتابعوا منها
بس كلوا دماغهم بشكل عام يعني 

Saturday 27 November 2010

بمناسبة جمعة الغضب

متهيالي ده كلام وراي سديد محتاج تفكير خصوصا انه بناء عن تجربة هو عملها بنفسه قبل ما يدعو الناس لها

Friday 26 November 2010

ماذا تفعل الأنظمة المزورة في يوم الانتخابات؟


by Mohamed Waked

علمتنا التجارب التي مررنا بها، وكذلك تجارب الدول الأخرى، أن الأنظمة المستبدة عامة ما تتعامل مع يوم الانتخابات بشكل شبه نمطي. وأظنكم تعرفون جميعا جوهر هذا التعامل من واقع خبراتكم الطويلة به، والذي يعتمد على آليات تزوير محددة باتت مكررة مثل "اللبانة الممضوغجة،" مثل تسويد بطاقات الاقتراع، وتزوير بطاقات الانتخاب، وتقفيل الصناديق، والتلاعب بالنتائج، وغير ذلك مما تعرفونه جيدا.
لكن الأنظمة المزورة تواجه خطرين آخرين عليها أن تتعامل معاهما ببعض الحنكة ليس فقط في ذلك اليوم وإنما في الفترة السابقة عليه أيضا، وهما تجريس الإعلام للنظام والفعاليات الجماهيرية المناهضة له في الشارع. وتتعامل مع الخطر الأول بتشديد الرقابة على الإعلام حتى وإن تطلب ذلك إغلاق ٢٥ قناة تليفزيونية قبل الانتخابات بشهر كامل، وطرد رئيس تحرير صحيفة مستقلة ومحورية بعد شرائها من مالكها، وإيقاف عدد كبير من الإعلاميين، وعقد الإتفاقات مع القنوات الاقليمية التي تؤثر في الساحة المحلية بشكل مناهض للنظام--وكل ذلك لترتيب الساحة للتزوير بالطبع.

وبالنسبة للفعاليات الجماهيرية، تقوم هذه الأنظمة بزيادة جرعة البطش في يوم الإنتخابات وطوال الفترة السابقة عليه أيضا، وإن تطلب ذلك تلفيق قضايا مخدرات للنشطاء لتخويف الآخرين، ضرب المتظاهرين بالنار لقيامهم بما كان يمكن القيام به في فترة أخرى، إعتقال الالاف من مؤيدي مرشحي المعارضة وتجميد أموالهم وإغلاق محلاتهم، وإطلاق العنان للبلطجية والمسجلين خطر لتحجيم فعاليات مرشحي المعارضة في أثناء فترة الحملة الانتخابية وخاصة فيوم الانتخابات نفسه، وغير ذلك مما تعرفونه أيضا.

فكل هذا يحدث بوتيرة عالية منذ شهر تقريبا في مصرنا المحروسة من طرد إبراهيم عيسى من الدستور وأون تي في، إيقاف قناة أوربيت وإنهاء برنامج عمرو أديب، والتهديد بوقف برنامج العاشرة مساءا، وتلفيق قضية مخدرات للزميل يوسف شعبان، وإطلاق النار على مظاهرة الأقباط أمس مما أدى لمقتل رجل وإصابة العشرات (وهو ما يكشف حد الاستنفار الأمني الموجود بالبلد الآن لأن هذه المظاهرة كانت لتمر بدون قتلى في أي وقت آخر)، والإتفاق الأخير مع قناة الجزيرة الذي لم يحيدها في هذا الصراع فقط وإنما ضمها لصف النظام تقريبا، أو على الأقل ضمها لفترة محددة، وغير ذلك الكثير.

لكن يبقى خطر الفعاليات الجماهيرية وإمكانية أن تصل بشكل أو آخر لجمهور واسع عبر الإعلام البديل والإجتماعي، وهو نوع من التجريس لا يستطيع النظام المزور التعاطي معه رلا في يوم الإنتخابات نفسه. وهنا تقوم هذه الأنظمة ببعض الحيل النمطية أيضا لمواجهة النشطاء وإعلامهم البديل الذي أصبح السبيل الوحيد المتاح أمام نشطاء المعارضة الآن للتعبئة والتحريض ضد النظام المزور وتجريسه، بعد أن تقطعت بهم السبل الأخرى، منها:

١) اعتقال نشطاء المعارضة الرئيسية في الليلة السابقة على يوم الانتخابات، وخاصة من يلعبون دورا أساسيا في تعبئة الناس للذهاب للإقتراع.
٢) اعتقال النشطاء الرئيسيين المشاركين في عملية توثيق الانتخابات أو مراقبتها في الليلة السابقة على يوم الانتخابات، أو في الصباح الباكر في أثناء ذهابهم للمناطق المخصصة لهم، أو حتى تعطيلهم في ساعات ذروة العملية الانتخابية لمدة ساعات محددة بإختلاق الذرائع المناسبة لذلك.
٣) حجب أو تعطيل الدخول إلى المواقع الرئيسية والمدونات بشكل مفاجيء، ولا سيما الشبكات الاجتماعية التي تنقل الصور والفيديو ومواقع الأخبار المحلية المستقلة، وإذا ما تطلب الأمر يمكن تبطئة الانترنت كلها لمدة ساعات قليلة بشكل يثير أقل شكوك ممكنة، وهو ما حدث في أكثر من دولة مؤخرا.
٤) تعطيل خدمة الرسائل القصيرة بطريقة او اخرى وحجبها عن أفراد بعينهم لدرء قدراتها التعبوية في الساعات الحرجة، ويقال أن النظام المصري رتب لذلك بالفعل.
٥) إعاقة بعض خدمات الإنترنت عبر الهاتف النقال بطريقة او اخرى، وتخريب البريد الإلكتروني أو صفحات الفيس بوك أو التويتر لفئة مختارة من النشطاء عن طريق القرصنة أو ما شابه ذلك في يوم الإنتخابات.
٦) إرهاب الصحفيين ومراسلي التلفزيون في الشارع في أثناء تغطيتهم لأحداث اليوم ومصادرة الأشرطة منهم.
٧) تفريق كل الأفراد الذين يحاولون التجمع في الشارع بالقوة أو تعطيلهم طوال مدة الانتخاب إذا ما تطلب ذلك--أو حتى إعتقالهم إذا ما
تطلب الأمر ذلك.
٨) إيقاف كل من يحمل كاميرا في الشارع ومصادرتها منه، أو على الأقل التحفظ عليها حتى نهاية اليوم—نفس الشيء بالنسبة للأجهزة الإلكترونية الأخرى مثل أجهزة الكمبيوتر المحمولة والهواتف الذكية...
٩) تعطيل جميع الناخبين من الوصول إلى صناديق الاقتراع في المناطق التي تكون خسارة النظام بالثلاثة فيها مؤكدة عن طريق اللعب في كثافة حركة المرور، أو تبطئة النقل العام، أو حتى بأسلوب "ما ينفعش تخش من هنا، لو سمحت لف من ورا" الخ.
١٠) وفي المناطق التي يكون الحزب المزور أكثر ثقة في إحتمال نجاحه يمكنه أن يكتفي بإيقاف ناخبي المعارضة فقط (بدلا من الكل) من الوصول لصناديق الاقتراع بأي وسيلة ضرورية، بما في ذلك إستخدام القوة الغاشمة، والسماح بوصول فقط لمن لديهم بطاقة عمل من مرشح الحزب الحاكم إلى الصناديق—وكما قلت في النقطة السابقة، يمكن تعطيل الكل عن الوصول في الحالات التي يتأكد فيها خسارة الحزب من أول اليوم.
١١) استخدام البلطجية لتخويف الناس الذين لا يحبذ إعتقالهم والإعتداء عليهم إذا تطلب الأمر.

السؤال الذي يفرض نفسه الآن هو ماذا ستفعل المعارضة حيال ذلك؟ وكيف سيواجه النشطاء سقوط بعض المواقع للقرصنة بشكل مفاجيء لدى بعض الناس في حين سيستطيع آخرون رؤيتها (على حسب الشركة)؟ أو أن يكتشف بعضهم أنهم لا يستقبلون رسائل الأس أم أس في حين يستقبلها آخرون، أو آنهم لا يستطيعون الدخول على الإيميل، إلخ؟ أو أن الإعلام العالمي والمستقل والأقليمي قرروا جميعا أن يدلسوا بما لم يكن بتوقعه أحد نظرا لحسابات معينة أكثر أهمية لهم؟ هل سيتعلم النشطاء طرق التعامل مع البروكسي سيرفر لأول مرة في حياتهم في هذا اليوم؟ وماذا نتعلم من أحداث الأمس: هل سقط موقع الدستور أمس لقرصنة وفديين كما يقال الآن، أم أن هناك أصابع أخرى تتدرب على دراسة ردود الأفعال على شيء ربما تحتاج إليه قريبا؟ ألم يحدث ذلك في وقت مشحون وتعبوي بما يعطي فرصة مثلى للتدريب ودراسة ردود الأفعال--وخاصة أن متابعي هذا الموقع هم من المجموعات التي سيحاول النظام إحتوائها في هذا اليوم؟ أم أن الموقع تعرض بالفعل لقرصنة من قبل الوفد كما يقولون وأن حدوث ذلك بعد نشره أول أخباره عن أحداث العمرانية بدقائق ما هو إلا صدفة؟

إن فرصة هذه الآليات في النجاح تكبر بقدر ما ينجح النظام في أخذ المعارضة على "خوانة،" وهو الفخ الذي تتقن المعارضة المصرية الوقوع فيه، فهي دائما غير مستعدة، ودائما ما تؤخذ على خوانة. وربما كان أفضل لنشطاء المعارضة الذين ينون التفاعل مع الانتخابات على الأرض أن يركزوا على التجريس فقط لا غير، لكنهم للأسف يظنون أنهم سيتمكنون من إنجاح مرشحين بعينهم في إنتخابات مزورة سلفا بالأساس، ويعضهم يظن أن للحظة الانتخابات قدرة في تعبئة الجماهير أكبر بكثير من طاقتها الحقيقية. لو كان التجريس هو هدفهم (وهو الهدف الواقعي الوحيد) لوجدتهم الآن مستعدين للتعامل مع هذه الاحتمالات (في حدود إمكانيتهم طبعا)، لكنهم لم يطوروا تصورات
وإمكانيات بديلة، ومثل هذه الإمكانيات لا تتبلور بين يوم وليلة

تحديث: كتبت هذه المقالة منذ ثلاث ساعات تقريبا وفي خلال هذا الوقت القصير جدا قامت شركة فيس بوك بالفعل بإلغاء خاصية التدوين على صفحة "خالد سعيد" (والتي كانت تخدم ٠٠٣ ألف مشترك، وهو ما يعني أن أخبار التزوير كانت ستصل إلى ٠٠٣ الف مواطن عن طريق الإعلام البديل) وألغت كذلك الصفحة الخاصة "بوحدة الرصد الميداني" والتي كانت ترصد بالفعل إنتهاكات إنتخابات مجلس الشعب بدعوى إنتهاك شروط الخدمة وكلاهما من الصفحات المركزية في معركة يوم الأحد القادم. هذا يعني أن المعارضة فقدت أدوات إعلامية كانت تصل إلى ٠٠٣ ألف مواطن مرة واحدة، وأن عليها أن تبدأ في بناء هذه الأدوات التراكمية من جديد، وهو ما يعني بدوره أنها لن تستطيع الوصول لعشر هذا العدد قبل يوم الأحد القادم. لقد بدأو بالفعل في الهجوم ولديهم تظبيطات أكبر من إغلاق هذه الصفحات بكثير.

Thursday 25 November 2010

هذا وقد اعترف القتيل بكل ما نسب اليه من تهم ووقع على اقواله قبل دفنه

النيابة جابت المصابين بعربيات الاسعاف عشان تحقق معاهم
والمحامين اتمنعوا من الحضور مع المتهمين اللي هم المواطنين العزل اللي انضرب عليهم ذخيرة حية
احنا بنتابع تطورات اللي حصل مع المحامين من عند مالك على التويتر، والمحامين عاملين مظاهرة، اه والله، المحامين عاملين مظاهرة لانهم مش عارفين يحضروا مع المتهمين
والتهم الموجهة للناس اللي انضرب عليها نار: 
تجمهر بالمخالفة للقانون واللوائح بغرض التعدي ع القائمين ع تنفيذ القانون”1 احكام القسم من الباب الثاني من قانون العقوبات"
2-استعمال القوة والعنف حال كونهم حاملين اسلحة وقد ارتكبوا بناء ع ذلك الجرائم التاليه
أ-الشروع في قتل بعض افراد الشرطة مع سبق الاصرار والترصد
ب-احراز واستعمال عبوات مفرقعه بدون ترخيص من الاجهزة المختصة
ج- التخريب عمدا في المنشئات العامة بغرض ارهابي
د-تعطيل وسائل النقل البري عمدا
ه-سرقة المنقولات المبينه وصفا بالاوراق والمملوكة لوزارة الداخليه
ي-احراز واستعمال سلاح ابيض دون مسوغ


هذا وقد توفي قتيل العمرانية باسفكسيا الخنق بعد ان اصيب بعيار ناري خرج على سبيل الخطأ من بندقية احد الصيادين في جورج تاون واتضح ان القاتل من اقباط المهجر
وقد تم تجديد الحبس للقتيل مية وخمسين سنة على ذمة التحقيق بعد أن اعترف بكل التهم المنسوبة إليه ووقع على أقواله قبل الدفن


ملحوظة: اي كلب مش حينزل له تعليقات
بس كده




Wednesday 24 November 2010

تحية واجبة

هتاف المسيحيين المصريين في العمرانية: عاش الهلال مع الصليب عايزين حقوقنا



الناس دي حصل فيها كده عشان عايزة تصلي
عايزين يصلوا بس

تحية لارواح الشهداء، الصحة بتقول واحد بس اللي مات، والكنيسة بتقول اربعة، والاهالي بيقولوا عشرة
الحقيقة حتبان على بكرة واكيد الصحة مش حتقول الحقيقة، بدليل ان الداخلية قالت على نفسها انها تعاملت "بعقلانية" مع الحدث! قاتلين ابرياء او على الاقل بريء وبيتكلموا عن العقلانية، واستغلوا بلطجية عشان يحدفوا طوب على الناس وكان باين قوي انهم بلطجية، دول مش اهالي ابدا، لو اللي ضربوا ليلى سويف في الجامعة طلبة غيورين يبقى الاشكال دي اهالي
وتحية للابطال اللي تصدوا للامن وهم عزل وما خافوش وما جريوش دفاعا عن حقهم في الصلاة زي كل عباد الله
وتحية لمرشح الاخوان المسلمين وانصاره اللي شاركوا المسيحيين المظاهرة، طبعا تحية لمرشح الناصري بس مرشح الناصري كان متوقع يعمل كده، لكن الحق يتقال مشاركة الاخوان في المظاهرة فارقة، وهي اللي خلت المسيحيين يهتفوا عاش الهلال مع الصليب
واسفخص على الامن اللي تحول لقوة احتلال ومنظره في الصور يشبه منظر الجيش الاسرائيلي وهو بيضرب الفلسطينيين، واسفخص على الامنجية اللي بيتكلموا زي الصهاينة ويبرروا قتل الابرياء
التغيير محتاج تضحية، وابطال العمرانية قدموا ارواح ودم، اللي الكره والطائفية عمت قلبه وخلته مش قادر يتضامن معاهم، على الاقل يحل عنهم، بس الناس كانت حلوة المرة دي، كل الناس، اقصد كل الاهالي مسلمين ومسيحيين، حتى اللي طلعوا علقوا في الجزيرة من المسلمين قالوا كلام كويس مع ان تقرير الجزيرة كان زي الطين
وزي ما قلت لهم على التويتر، انا مش وائل خليل بيصعب عليا الناس، انا مفترية، بس الناس المرة دي كويسة، واحسن مما كنت اتوقع بكتير، لان فيه ظروف ومتغيرات وضغوط مرت عليهم ما تؤديش للنتيجة دي، والنتيجة دي بالنسبة لي مرضية جدا وطظ في رويترز اللي تجاهلت مشاركة الاخوان المسلمين وبعض الاهالي المسلمين للمسيحيين في المظاهرة وما جابتش غير سيرة البلطجية وقالت عليهم مسلمين يشاركون الامن في قذف المسيحيين بالحجارة
طظ فيهم لانهم ما يهمنويش
اللي يهمني ناسي 
وربنا يرحم الشهداء ودمهم مش حيروح هدر ان شاء الله 

نداء طائفي بشدة: المسلمين ما يتدخلوش في خناقة المسيحيين والامن


تحديث: 
المظاهرة قدام الكنيسة انفضت، وكان بعض انصار مرشح الاخوان المسلمين شاركوا المسيحيين في الاحتجاج، والمسيحيين وهم بيختموا المظاهرة هتفوا عاش الهلال مع الصليب، وهم دلوقت قدام ام المصريين
------------------
وبعد ما أخدت كل الاحتياطات لطرد الارواح الشريرة من المدونة اقول بفخر: الاقباط المرة دي رجالة واجدع ناس وشكلهم فكرني بعمال المحلة، وربنا ينصرهم
تحديث
:
هي صحيفة الشروق تبع حملة الحزب الوطني؟
اصلها كاتبة كلام غريب قوي، كاتبة تقول ان مرشح الاخوان ومرشح الناصري "حاولوا اجتذاب اصوات الناخبين" بانهم تظاهروا مع الناس اللي بتنضرب وتتقتل في الشارع! بينما "حاول مرشح الوطني امتصاص" توتر الازمة
ايه ده بقى؟ دي تغطية صحفية؟ طبعا ييجي واحد يقول لي ما الاخوان المسلمين دخلوا اهو امال بتقولي المسلمين ما يتدخلوش ليه، اقول له لا، ما هم مش مسلمين.. مش مسلمين مصريين عاديين يعني، ده حتى محمد حسين يعقوب بيقول عليهم مش مسلمين، حتفهموا احسن من محمد حسين يعقوب
الاخوان المسلمين يتدخلوا انتوا ما تدخلوش برضه، شباب من اجل كاميليا دول يخفوا من وشنا خالص تماما
--------------------

انا طبعا ممكن امثل واتشحتف واقول كلنا ابناء وطن واحد وكدهون، بس مش طالبة معايا تمثيل، المسلمين ما يتدخلوش بجد خالص في خناقة الامن مع المسيحيين
ليه؟
عشان المسلمين لو اتدخلوا حيبرروا للامن، ما سبق وقلت احنا شعب عميل بطبعه زي ما الامريكان شعب عميل بطبعه للسي اي ايه احنا عملاء بطبعنا لامن الدولة، وده سر التشابه الغامض ما بين المصريين والامريكان واللي كل الناس في كل الدنيا ملاحظاه الا احنا
المهم يعني
المواجهات دي لو بين عمال وامن، بين فلاحين وامن، بين مسلمين وامن، ما كانش ولا مسلم برر طبعا وكان الامن حيبقى ابن كلب يقتل الناس ويضربهم، بس بما انه بين المسيحيين والامن وعشان كنيسة كمان فاكيد المسيحيين هم اللي غلطانين المرة دي، طيب انا مش حاتناقش على فكرة في موضوع ان المسيحيين عايزين يبنوا كنيسة بالغصب اصلهم واخدين ترخيص بناء مبنى خدمي وحولوه كنيسة، اصلهم استخدموا عنف، وكل الكلام الامني الجميل ده اللي الداخلية قالته على خالد سعيد ومسلمين كتير حيقولوه على المسيحيين
طبعا وائل خليل حيزعق لي ويقول لي انت متشائمة وليه تقولي على الناس كده ده الناس طيبة وغلابة وغصب عنهم وكده بس عادي يعني انا اتعودت على زعيقه ما بقتش اتخض زي الاول
بس انا طالبة معايا واقعية، يا سيدي انا مش حاحاول اعالج كراهيتك للمسيحيين، خالص يعني، خصوصا يعني انهم راخرين زيهم زي اي مصري عملاء للامن بالسليقة زي حضرتك بالظبط وعندهم تصور ان الامن شغلته يحمي البلد ومأثر فيهم مسلسلات الجاسوسية زيك بالظبط ومنه لله صالح مرسي في اللي عمله في الشعب وما تجوزش عليه الا الرحمة فما فيش مشكلة يعني 
بس ممكن ما تدخلش؟ لا بالخير ولا بالشر، وما تقولش حاجة، لا تقول خيرا ولا شرا اصمت احسن 
مش انتوا كنتوا زعلانين ان الامن بيضرب المسلمين وبيقبض عليهم وبس، اهو ضرب لكم المسيحيين وقتلهم كمان، مبسوطين بقى دلوقت؟ اتبطوا بقى ، مش هم كانوا قعدوا يقولوا يا جمال حتبقى الريس خطف بناتنا مش كويس، اهو الامن بتاع جمال وابوه ضربهم وقتلهم اهو، اتبطوا بقى، مش قفل لكم القنوات الدينية السلفية بتاعتكم؟ اهو مش عايز يسيبهم يصلوا اهو، اتبطوا بقى
ما تدخلوووووشششش خاااااالص، حتدافعوا عن الامن؟ مش ده الامن اللي بيقبض على الاسلاميين وبيقفل القنوات الدينية وبيمكن النصارى عباد الصليب من البلاد وسايب لهم محلات الصاغة والصيدليات؟ ما تدافعوش عنه بقى، سيبوهم مع بعض، من حيث ضرب "النصارى" اللي انتوا بتحبوه قوي اهو حصل عشان تهدوا، ومن حيث ان اللي بيعمل لكم الشغلانة حد تاني فهو الامن اللي اكيد مش محتاج مساعدتكم ولا مساندتكم معاهم اسلحة وقمع وقهر وكل حاجة، يعني تدخلكم مالوش لازمة خالص، مش حيساعد في حاجة، اتبطوا بقى، اتبطوا، عشان حتى شكلكم ما يبقاش اوسخ من ماهو وسخ وتبقوا واخدين صف الامن ضد ناس عزل اتقتل منهم واحد وربنا يستر على بقية المصابين
 ده اخطار بس للغالبية المسلمة مؤقتا كده لحد ما عمرو خالد يغسل اللي حسان والحويني عملوه فيهم على الاقل حيخلي عندهم رحمة شوية، بس لسه الراجل بادئ قدامه سنة كده على ما يعلم الناس تتعاطف مع ناس مقتولة 
اما نشوف احنا بقى حنعمل ايه في المصيبة السودا دي 
الشهيد اسمه ماتريوس  جاد شاكر وفيه مصابين كتير ربنا يستر، الامن المحترم بيولع في البلد، بعد كده حد يقول لي مش الامن هو اللي بيعمل الفتنة الطائفية حارمي امه من الشباك ، ولاد الـ... كل ده عشان التصويت على الانتخابات الاحد الجاي وعايزين يعملوا بوليكة على ما التزوير يعدي؟ ده ايه الوساخة دي؟  لا ونازلين بنفسهم عشان طبعا هم لموا السلفيين فمش عارفين يستغلوهم في هاذوها الوقت الحرج ومحتاجين بسرعة يعملوا فرقيعة، يقوموا يقتلوا واحد؟ يقتلوا؟ طب على الله القتيل ده يعدي بالساهل زي قتلى نجع حمادي، المرة دي الامن بذاته هو اللي قاتل الناس انا شايفة بعيني على الجزيرة اهو الامن ماسك بنادق في وش الناس ولا كأنه اسرائيل في وش الفلسطينيين والناس عمالة تحدفه بالطوب
ولو ابن كلب قال لي المسيحيين حدفوا الامن بالطوب وهم اللي استفزوا الامن حاقول له صح، والفلسطينيين كمان بيعملوا كده، واسرائيل بتدافع عن نفسها زي ما الامن 
بيدافع عن نفسه
مش طالبة معايا ولاد كلب خالص في الكارثة دي
انا اعصابي بايظة خالص ومش حمل اي سفالة وانحطاط، اديني اهو تحسبت لكل الوساخة اللي ممكن تتقال عشان ماحدش ييجي يطرش هنا
--------------
بالنسبة للناس اللي هم بني ادمين عادي يعني وبيحسوا وعندهم دم، احنا حنعمل ايه؟ انا مخي اتشل مش عارفة اعمل ايه
--------
تحديث وانا باكتب البوست: القتلى وصلوا لاربعة
ابوس ايد المسلمين ما يتدخلوش، ابوس ايديكم ما تدخلوش ابوس ايديكم ما تدخلوش بصوا
بصوا بقى
الموضوع بقى فيه دم وقتلى
كان نفسي يبقى عندي عشم واقول اتدخلوا وساندوا المظلوم الاعزل المقتول، بس انا مش باحب اشتغل نفسي، انا عارفة انكم مش حتعملوا كده، طب على الاقل ما تدخلوش 
طب
طب
طب اصلا بقى الموضوع ممكن يتطور لو انتوا اتدخلتم ممكن يتفاقم ويوسع وتتحول لمواجهات فظيعة وامريكا تدخل تحمي الاقلية، يرضيكم بقى كده، والنبي ما تدخلوش
اه.. كلمة والنبي حرام
طب استحلفكم بالله يابن حلزة ما تدخلوا خالص
-----
تاني، الناس اللي عندها رحمة شوية، حنعمل ايه؟ الناس بتموت في الشارع

Tuesday 23 November 2010

ماركس اند سبنسر جاي مصر

لا دي مصيبة، ومصيبة كبيرة، ده من اكبر الممولين لاسرائيل
انا فاكرة لما كنت باروح لندن وانا حلوة كده كان العرب اللي بكروش يخشوا يشتروا من ماركس اند سبنسر وبعدين وهم خارجين يغيروا الكيس عشان ماحدش يعرف انهم اشتروا من اسرائيل
لا هو اسرائيل بجد يعني
بس الحمد لله، العرب خلعوا برقع الحيا، ومش بس ما بقوش يغيروا الكيس، بقوا يجيبوه في بلدهم

انا حاكتب عن الموضوع ده باستفاضة بس رجاء الدخول على اللنك ده واللنك ده 
اهو ده يا شباب اللي يستاهل انه يتقفل اكتر من سانسبري
حتلاقي اوساخ كتير يقولوا كلام وسخ، حنتكلم عليهم ونرد عليهم بس افضي مخي بس، بكرة بس ان شاء الله على خير

Saturday 20 November 2010

اسكندرية تقوم ثورة في انصاص الليالي وانا عايزة انام





بداية المصادمات والاعتقالات في صفوف الاخوان المسلمين في كذا محافظة مصرية
اسكندرية بقى.. طبعا يعني هم دول حينضربوا ويسكتوا؟ بس ده وقت ثورة يا اسكندرية انا عايزة انام
هنا مصادمات الامن ضرب الناس بالمطاطي والقنابل المسيلة للدموع
قام الاهالي جريوا ورا الامن بالسيوف والامن هرب منهم هههههههههههه طب ليه قلة القيمة دي يا ح الظابط وتهزأوا نفسكم مع الاسكندرانية اللي اكيد ما جريوش بالسيوف وهم ساكتين يعني سمعوكوا اصوات ما كنتوش تحبوا تسمعوها، مافيش اخوان ولا غير اخوان، الاسكندراني اسكندراني، وتسهرونا احنا بقى
اللي مش قادر يشوف الفيديوهات على الفيسبوك حاحملها لكوا وانقلها على اليوتيوب ان شاء الله
اجلي الثورة شوية يا اسكندرية لحد ما انام لي ساعتين بس

Friday 19 November 2010

الحزب الوطني والحزب الوطني الديمقراطي

لقد استندهشت جدا لما فيه بعض الزملاء علقوا بيقولوا لي الحزب الوطني بتاع مصطفى كامل مالوش علاقة بالحزب الوطني بتاع السادات
لأول مرة الساداتيين ممكن ينفعونا في حاجة عشان حيبقوا متابعين لخطابات السادات وعارفين هو قال ايه وهو بيأسس الحزب
السادات لما رجع الاحزاب قال انه بيعيد إحياء الحزب الوطني وفقا للمبادئ اللي اسسه عليها الزعيم مصطفى كامل، بس طبعا السادات لازم يضيف لمسته كالعادة وقال بس احنا حنسميه الحزب الوطني الديمقراطي ايمانا منا بالديمقراطية والمش عارفة ايه، والهجايص بتاعته دي وقعد يرط كتير قوي في خليط الافكار والابتكارات بتاعته، المهم يعني البؤرة الاساسية للكلام انه قال ان ده حزب مصطفى كامل مع لمساته هو واضافاته العبقرية المعتادة يعني
ازاي حد يقول لي مالوش علاقة من قريب او بعيد بحزب مصطفى كامل؟ اذا كان يقصد انه مالوش علاقة على ارض الواقع بحزب مصطفى كامل فده حقيقي، وده كلام ينسحب على حزب الوفد كمان، ومش من دلوقت، من ساعة اعادة الاحزاب تاني، وتأسيس بعض الاحزاب اللي ما كانتش موجودة او استعارة اسماء احزاب وتأييفها من اللي كانت قبل الثورة، لكن الشاهد ان السادات قال ان الحزب الوطني الديمقراطي امتداد لحزب مصطفى كامل ورط كتير قوي في موضوع مصطفى كامل والمفروض ان الساداتيين والناصريين عارفين كده، ورط كتير في ان نقطة الانطلاق: لو لم اكن مصريا لوددت ان اكون مصريا، وقعدوا شوية ماسكين في الجملة دي وبعدين شالوها، الظاهر لما لقوا ان الجملة دي وسعت منهم، بعد شوية بقى الحزب هو السادات والسادات هو الحزب وبعدين مسك صولجان الفرعون وبعدين مبارك بقى والعسل بتاعه
بس حتى مبارك اول ما مسك برضه رجع قال مصطفى كامل.. انتوا ناسيين ليه؟ ده فيه فترة الناس كرهت مصطفى كامل من كتر ما لزقوا فيه الحزب يا قلبي، انا مش باتكلم عن الواقع المعاش، انا باتكلم عن التصريحات اللي اتقالت واللي المفروض انها ملزمة للحزب ودلوقت لحسها وما بقاش يجيب سيرة مصطفى كامل خالص عشان الراجل حيورطهم في حاجات مش حابينها هم، والسادات اكتر من مرة اشار لان مصطفى كامل كان يجوب العالم من اجل قضيته الوطنية في اشارة يعني ان السادات زيه وكان بيجوب العالم اللي هو اسرائيل وامريكا، والناصريين اياميها اتريقوا عليه وقالوا بيجيب سيرة مصطفى كامل ليه دلوقت هو مش السادات كان بتاع كفاح مسلح واغتيالات سياسية وكان ضد الحلول السياسية؟ (اه.. السادات كان كده قبل الثورة والله، كان راديكالي زي ابو مصعب كده ومؤمن ان اللي يتفاوض مع الاحتلال لازم يتم اغتياله وكان ضد حزب الوفد ههههههههههههههههه والنبي الدنيا دي عجيبة) بعدين بقى قال احنا كنا بنكافح عشان نساعد المتفاوض وكان كلام غريب وجديد عليه، وان مصطفى كامل كان بيعمل توعية عالمية مش بيتفاوض، وهلولة كانت، ماهو كل حاجة كان يعملها كان لازم تصاحبها هلولة، طب احنا عايزين نوثق بقى خطب الرئيس السادات وتصريحاته من دار الكتب ومكتبة التلفزيون اذا نفع عشان شكل مبارك نسانا الدنيا واللي فيها، وانا ملاحظة ان فترة السادات هي الاقل توثيقا، ما بين ناس بتكرهه ومش عايزة تسمع همسه، وما بين ناس بتحبه وعايزة تغطي عليه، وماحدش بيهتم يجيب خطبه، ولا تصريحاته، مع ان خطب عبد الناصر كلها موجودة، اشمعنى بقى؟ فترة السادات فترة مهمة جدا، وحاجته موجودة في دار الكتب، اقصد الخطب بتاعته كانت بتتنقل في الصحف كلها - بالشتيمة اللي فيها - بالنص في الصحف التلاتة، غير انها كانت بتتعاد تاني يوم على القناتين وفي كل محطات الاذاعة، يعني الراجل نفسه كان مصمم يسمع كل نملة في جحرها هو كان بيقول ايه؟ طب حرام دي زي وصية الميت، ما نلم للراجل حاجته يا جدعان ده كان رئيس مصر انتوا بتتعاملوا معاه على انه كومبارس صامت ليه؟ الساداتيين مش حيلموا له حاجة عشان حيتكسفوا من الشتايم الكتير اللي في الخطب، بس المفروض حد يلم كل الخطب بحياد وينزلها بالتسلسل الزمني لأن دي فترة مهمة وهو الله يرحمه كان بيتكلم كتير قوي وكتر الكلام خلاه يلزم نفسه بتصريحات معينة، وبعد كده الظاهر كان بينسى ولا ايه فيقول تصريحات تانية عكسها وكان عسل يعني، مش حتزهقوا منه وانتوا بتلموا له، وانا شايفة ان خطبه اهم من خطب عبد الناصر بكتير، لأن عبد الناصر كان بيخصص الخطب للمبادئ والشعارات فمتبقاش عارف اللي بيقوله ده له علاقة بالواقع ولا نخع، عامل زي جداريات الفراعنة كده، عارف ان الكلام بيتسجل ومش عايز يتسجل عليه حاجات تبينه اي كلام، ولو ان له خطبة بيقول فيها انا في ليلة واحدة قبضت على تمنتاشر الف، بس مش عارفة فين الخطبة دي، بس دي غلطة واحدة، لكن السادات كتير كان بينسى ان الكلام بيتسجل وينطلق ويخصص الخطب للخناقات فده يديك فكرة عن اللي كان بيحصل على ارض الواقع، ومن خلال شتيمته لخلق الله كلهم تقدر تعرف الناس كانت بتقول عليه ايه ساعتها
بالنسبة لخطب مبارك فمافيش داعي لتوثيقها... لا بجد، باتكلم جد، مش حتعمل حاجة خالص، كأنك فاتح التلفزيون بعد ما الارسال خلص وبتسمع وشششششششششششش

السراسوة

بتاعة احمد صبري ابو الفتوح، هي ناس كتير قروها بس اللي لسه ما قرهاش تستاهل تتقري
الرواية اسمها السراسوة من جزئين، بس ما تتخضش من حجمها حلوة وحتعدي هوا

Thursday 18 November 2010

يا واد يا دودو يا جااااااااامدددددد

أنا كنت قررت إني ما انقلش مقالات من موقع الدستور وبس احط اللنك عشان تدخلوا على الموقع يقوم يعمل ريت عالي بدل ما تستسهلوا وتقروا المقال هنا
بس انا مضطرة اخون موقع الدستور وانقل المقال الجامد ده.. ايوه كده يا شيخة ايوه كده يا دعااااااء
بس بصوا، عشان ما احسش بتأنيب ضمير، السيدة في ضهركوا، برضه دوسوا على اللنك هنا، عشان كل ما الناس بتدخل اكتر كل ما كده بيساعدوا الدستور اكتر
وحاولوا كده تدخلوا اكتر من مرة وتعملوا ريفريش وبتاع
المقال اهو


دعاء سلطان تكتب: لماذا يمنعون منى الشاذلى بعد أن صنعوها؟!


لا ينقصنا الآن إلا أن تخرج علينا لبنى عسل لتؤكد أنها ممنوعة بسبب مواقفها السياسية!


هى ليست مزايدة على الإطلاق، ولكنه فقط مجرد فضول.. ما الشعور الذى ينتاب باقى الإعلاميين الذين يظهرون على شاشة التليفزيون بمختلف قنواته الرسمية والخاصة، عندما يجدون تضييقا ومنعا يقع على إعلامى آخر، بينما يتم تركهم هم دون أى منع أو تضييق أو مساءلة؟!
ألا يسأل بعضهم – على الأقل من الجادين منهم- لماذا يتركونى أنا ويمنعون غيرى؟!


قد تكون إجابة السؤال السابق معروفة.. على الأقل يعرفها الإعلامى نفسه، ولكن كيف سيبرر هذا الإعلامى للناس – على الأقل بعض ممن يملكون قدرة على التحليل المنطقى منهم- كونه متروكا يقول آراءا تبدو جريئة، ويهاجم شخصيات عامة تبدو مهمة؟
أعرف أن الناس تنبهر بجرأة الإعلاميين على بعض الوزراء، وتتعاطف مع "الصعبنة" و"الشحتفة" التى يستدعونها على أحوال الناس وعيشتهم المزرية، لكنى حقا أرغب فى خدش لحظة شديدة الخصوصية فى حياة بعض الإعلاميين وأتمنى أن أشاهدهم وهم يقفون أمام المرآة.


بالتأكيد يصدق كثير منهم نفسه، ويرى نفسه أسدا مغوارا يخوض غمار القضايا الصعبة، ويسير على أشواك المسائل السياسية المحرجة، خصوصا عندما يستضيف مسئولا يكرهه الناس ويكرهه من عينه مسئولا عليهم، ثم يظل يعصره ويجزره بلا هوداة أو رحمة.. هنا يشعر المذيع أنه أشجع الشجعان، وهنا أردد دوما: "الضرب فى الميت حرام"، فهذا الإعلامى يستأسد على جثة هامدة.. مكروهة من الناس، فيثير الهجوم عليها النشوة فى نفوسهم ويتشفون فيها، بينما ينتشى المذيع بدوره لأنه جريء ولا يهتم بأحد، ويقول للأعور إنت أعور فى عينه، رغم أن أى عيل صغير فى الشارع إذا قال لهذا الأعور: أنت أعمى، فلن يقترب منه أحد، بل وسيجد من يسانده من أناس عاديين مقهورين وغلابة.. هؤلاء هم اللاعبون على السيرك والمستفيدون دائما من المناخ الإعلامى المؤسف، فهم أذكياء.. يهاجمون وينفعلون بقوة ضد "الحكومة" بداع أحيانا وبدون داع كثيرا.. المهم الدوشة.. إنهم ملكيون أكثر من الملك عندما يحصلون على الإذن بالهجوم أو يعرفون أن من يهاجمونه لا ظهر له، لكنهم أبدا لا يقتربون من الخطوط الحمراء ويبتعدون عنها بحذر مبالغ فيه.
هناك طبعا من يرى نفسه فى مرأة نفسه قزما فعلا، فيقرر أن يبذل قصارى جهده محاولا الانتفاخ لملأ الكرسى الذى يجلس عليه و"البدلة" التى يرتديها، والأهم ليقنع ولى أمره ومن أجلسه أمام كاميرا التليفزيون أنه جدير بثقته، فيهاجم من يهاجمون أولى أمره ضمانا للاستمرار وتدليلا على ولائه.


وفى المقابل يبذل كثير من الإعلاميين قصارى جهدهم لتجميل صورتهم، لأنهم لم يتصوروا أن الصورة ستبدو قبيحة هكذا.. يعانون معاناة ضخمة فى فن التحايل ليتخلصوا من قيود شوهت صورهم أمام أنفسهم، وتهدد بتشويهها أمام أنفسهم، ويحاولون بكل قوتهم الاقتراب من الخطوط الحمراء، ولكن بأدب من يعرف أنه يستأذن لمجرد الاقتراب منها، لتأتى التعليمات الفوقية، والتى بالتأكيد تفوق قدراتهم على "المقاوحة" ويتم تقليم أظافرهم، وهؤلاء هم الأشرف بين الإعلاميين الموجودين حاليا.. إنهم يحاولون ويكافحون، ولكن القيود أقوى منهم.. يملكون شرف المحاولة، ولن نطالبهم بنيل شرف التقاعد، فلا هذا حقنا، ولا نحن قادرون على تحمل عبء قطع أرزاقهم، وأرزاق أبنائهم.. إنهم يحسبونها جيدا، وغالبا يسهل كشفهم، ودائما سنتعاطف معهم.
أما المتهورون فهؤلاء لا تعنيهم صورتهم فى مرآة الناس.. إنهم لا يحسبون حسابا سوى لضمائرهم، ولا شيء يفوق لديهم راحة نوم هاديء بلا كوابيس تأنيب الضمير، وهؤلاء يحصلون مقابل راحة ضمائرهم على وسام المنع وجائزة تكميم الأفواه.


قد يرى الإعلاميون أنفسهم بصورة أكثر صدقا مما ذكرنا، وقد يرون أنهم أجمل مما رأينا، قد نكون حادين فى الحكم عليهم، لكننا حقا نرغب فى التوغل داخلهم للكشف عن طبيعة شعور الإعلامى.. سواء المذيع أو الصحفى، عندما يتم منع وتقييد زميل له، لأن صوته مؤثر وغير قابل للترويض، بينما يتم السماح لهم هم فقط بقول أى شيء فى إطار مسرحية يدرك الإعلامى دور الرقابة فيها، ويتصور المشاهدون أنه خرج عن النص وكسر القيود، فى حين أن الإعلامى هنا ليس أكثر من أسد يزار فى قفص.. قد يتمرد أحد أسود القطيع على خطة المدرب، لكن السوط بالتأكيد سيعيده إلى القطيع بكل سرور وخنوع.. إننا نقدر مجهودهم ونشكرهم عليه، لكننا فى الحقيقة لا نحترم إلا الأسد المتمرد، فكيف يرون هم أنفسهم، وكيف ينظرون إلى زملائهم الذين يعانون التضييق حينا والمنع حينا وقطع سبل التواصل الصادق مع الناس فى كل الأحيان.. هل يعرفون أنهم يعيشون ويتعايشون فى أدوار مكتوبة لهم بعناية.. هل يصدقون أنفسهم، ويصدقون أنهم ينقلون نبض الشارع والناس خلال هذه المسرحية.. هل الأشرف أن ينسحبوا أم الأشرف أن يقتنصوا بعض المكاسب من هامش حرية خانق ومؤسف وشديد الضيق؟



كتبت هذا المقال بعد إبعاد إبراهيم عيسى من قناة 
OTV 
ولم أتمكن من نشره بسبب إقالته بعدها مباشرة من منصبه كرئيس تحرير لجريدة الدستور في نسختها الورقية، والإجابة على تساؤلاتى جاءت عملية جدا، فقد بدأ الإعلاميون فى التحرك، ويبدو أنهم أصيبوا بالخجل من منع زملاء لهم، بينما مازالوا هم يصولون ويجولون.. كيف يصدقهم الناس، بعد أن منعوا آخرين بسبب آرائهم.. لم أك أتصور أن لدى بعض الإعلاميين رغبة كامنة فى رسم صورة غير حقيقية عن أنفسهم، فها هى منى الشاذلى تحتجب وتفتعل ضجة ليخيّل إلى الناس أن برنامجها سيتم منعه.. يبدو أنها أدركت أن الشرف الوحيد الذى يجب أن يناله المرء فى مثل وضعنا الحالى هو أن يتم منع الإعلامى، فلماذا لا تستغل الضجة وتعمل فيها ممنوعة؟!


منى الشاذلى ستعود وستبقى كما كانت دائما إعلامية تتلعثم كثيرا وتستجيب دائما للتعليمات.. تستضيف البرادعى لتبكته وتبكت من يناصرونه، وتستضيف فى أزمة الدستور السيد البدوى لمدة ساعتين ليصول ويجول ويكذب، فلماذا سيمنعون منى الشاذلى إذن؟! تهاجم حسن نصر الله وتبكى على شهيد حرس الحدود الذى قتلته حماس – كما ادعوا- وبالمرة تهاجم حماس.. ثم تهاجم الجزائر مثلها مثل كل غوغائى شارك فى هذه الأزمة القذرة بيننا وبين بلد مسلم عربى شقيق.
(ما قالتش ليه انها اتصلت بيا واتكلمت وحش على ابراهيم منصور وابراهيم عيسى عشان توقع الناس في بعضها؟ أنا حاموت واعرف هي عملت كده ليه؟ ممكن اتفهم رغي الستات وجرجرة الكلام، بس الكلام ده لو هي متعودة تكلمني او صاحبتي، لكن ليه عملت كده؟ فيه ناس بتقول ان جات لها تعليمات تعمل كده، بس انا زي ما اكون مش مستوعبة او مش مصدقة، انا سوف احسن الظن واقول ان فيه حد كلمها وقال لها الكلام ده وهي حبت تتأكد مني.. بس حبت تتأكد مني ازاي؟ دي قالت لي ان ابراهيم عيسى هو اللي قايل لها شخصيا الكلام ده... مش عارفة، بس لحد دلوقت مش عارفة استوعب برضه ومش لاقية تفسير)
إنها تخدم أهدافهم أكثر مما تخدمها هناء السمرى، فهى محبوبة وقريبة من المشاهدين "وشبه المعارضة اللى بجد"، بينما الأخرى تظهر لأسباب أخرى، ربما لا يعلمونها هم شخصيا، ولا أعتقد أن أحدا من عائلتها هى شخصيا يرى أنها مذيعة مقبولة.. منى الشاذلى إذن صنيعتهم، ولا يمكن لأحد أن يمنع خلاصة اختراعه.


أجمل ما فى الموضوع أننى اكتشفت فى منى الشاذلى بعض من الذكاء، فقد استفادت كثيرا من فكرة الترويج لمنعها، وآثرت الصمت ولم ترد – هناك تعليمات لجميع معدى البرنامج بعدم الرد على أى صحفى فى أى سؤال حول موضوع المنع- الخطة نجحت حتى الآن، فقد صنعت منى الشاذلى لنفسها بطولة لم تكن تتخيل أنها ستحصل عليها.. فبذكاء – يبدو أنه الجزء الفطرى فيها- عرفت أن الترويج للمنع هو شرف فى حد ذاته، فلماذا لا تحصل عليه وإن كان مجرد شائعة، فلنستمر فيها، وإجازة العيد ستزيد من حرارة الشائعة، لتأتى العودة ساخنة بموضوعات عن الانتخابات تملى عليها كما ستملى على غيرها.. فقط سيسمح لمنى ببعض من التجاوز، فهذا هو دورها في المسرحية.. قليل من التجاوز لا يضر، وهى تعرف جيدا أصول الخروج عن النص وقواعده.. منى الشاذلى جددت تعاقدها مع دريم منذ أيام قليلة.. لن تتركها دريم ولن تترك هى دريم، فاهدأوا.. لن يبقى على المداود سوى منى الشاذلى وبقية إعلامى الدولة الرسميين.


لا ينقصنا الآن وفى نفس الإطار سوى أن تعلن لبنى عسل أو تروج أو تلمح – من بعيد لبعيد- ببلاهتها – أقصد براءتها – المعهودة أنها ستمنع من الظهور على الشاشة بسبب موقفها السياسى! هذه ستصبح نكتة حقيقية!
(وتامر حسني)
أو أن يصرح الأستاذ الذى يظهر مع هناء السمرى بأنه مهدد بالمنع أو أن يقسم شريف عامر الذى يعمل فى تليفزيون السيد البدوى – ولا تنسوا شحاتة والنبى- بأنه تلقى اتصالا هاتفيا يحذره من تجاوزه للخطوط الحمراء.. والليالى الحمراء وأى حاجة فيها حمراء، فالقناة اسمها "الحياة حمرا".


النقطة المضيئة الآن أن هؤلاء يعرفون جيدا أن مجرد استمرارهم حاليا هو اعتراف كامل وصريح منهم بأنهم أعوان لكل ما يحدث فينا من فساد، بل وإنهم مروجين له.. هم مرض عنهم، ويبدو أن بعضا من الخجل قد أصابهم، فلماذا يرضون عنهم رغم أنهم – عاملين نفسهم مع الناس حتى إن لبنى عسل بتتشحتف كل يوم على أحوال الناس- يهاجمون الحكومة، بينما يستبعد ويمنع ويقهر أصدقاؤهم الإعلاميين الشرفاء.. إنهم فى أعماقهم يعلمون أن من يمنع حاليا هو الشريف الوحيد بينهم، وأرجوكم لا تستلموا للمسلسلات والمسرحيات المعدة سلفا.. أرجوكم لا تصدقوا المسلسلات التى تؤلف عن المنع، فالصفقات تعقد خلف الستائر.. لا تصدقوا إلا من تم منعه فعلا.
-------------
إيه رأيكوا؟ عشان بتقولوا عليا قوية ومفترية، اهو ربنا وراكوا الانسان لما يبقى قوي وجبار ومفتري بيبقى شكله ازاي، حطتهم كلهم بين سنانهما ومخمضتهم هههههههههههههههههههه احسن احسن احسن احسن عشان يبطلوا محن بقى ويسيبونا في حالنا، هو المنع كمان الناس بتتحسد عليه؟

Monday 15 November 2010

كلمة ابراهيم عيسى في مركز الدراسات الاشتراكية

اولا: كل سنة وانتوا طيبين
ثانيا: معلش اليومين دول مشغولة شوية
ثالثا: حصلت لي تغيرات فسيولجية غريبة جدا، بقيت اسمع عبد الحليم حافظ وفريد الاطرش، انا اتجننت كده رسمي
رابعا: يوم السبت اللي فات 13 نوفمبر ابراهيم عيسى ادى محاضرة مهمة جدا عن الصحافة، وشايفة ان مهم قوي كل الناس تتفرج عليها مدام كل واحد بقى يعجن في الصحافة حتى اللي دي مش شغلته، على الاقل يبقوا عارفين اساسيات، وانا صورت الكلمة وغبت ده كله عشان كنت باحملها، بس مش عارفة الجزء السادس بيعمل ايرور ليه، فقلت انزل الاجزاء كلها واحاول مع الجزء السادس تاني كده 
المهم بقى اني مش عارفة تليفون مصطفى بسيوني ولا ميله بتاع مركز الدراسات عشان اوصل له الفيديوهات لانه طلبها مني
فيه كمان لقاء لسه بيتحمل مع قناة الجزيرة، انا مش عارفة قناة الجزيرة نزلته ولا لا ومنتجته ولا لا فقلت اصوره برضه استحوياطا
اتفضلوا الفيديوهات


















ادعوا لي بقى اعرف احمل الجزء السادس من غير ما يعمل ايرور واجيبهولكوا
كل سنة وانتوا طيبين تاني.. وربنا يستر ما الاقيش نفسي باسمع صباح كمان

Wednesday 10 November 2010

محصورا: نموذج للعقود التي توقعها قناة الحياة مع العاملين

انا عايزاكوا تقروا العقد ده، وقد حصلت عليه من جهة موثوق فيها، وتشوفوا الباشمهندز اللي بيشغل الناس بالسخرة كاتب ايه
طبعا ييجي واحد يقول لي: طب والناس توقع ليه؟
الناس بتوقع عشان محتاجة شغل، والناس بتوقع عشان عادة مش بتقرا قوي العقود، الشهادة لله انا واحدة من الناس عمري ما اقرا، بس نصيحة لوجه الله ماحدش يوقع على عقود تاني، اتاري بقى صحفيين الدستور ربنا نجدهم انهم ما وقعوش عقود
وانا باقول للصحفيين اللي راحوا لرضا ادوارد بعد التسوية ما يوقعوش حاجة من غير ما يجيبوا محامي شاطر وثقة يقرا العقد ويقول لهم يوقعوا ولا لا
لبعدين يمضيهم على عقد زي ده 



زي ما انتوا شايفين، الشروط الجزائية على الطرف التاني، اللي هو اللي رايح يشتغل، حقوق الملكية الفكرية، واي شغل تعمله، من حق القناة، مالكش اي حقوق غير المرتب اللي بتاخده، برجاء التمعن في العقد لحد ما افضى له وافندهولكوا بند بند
بس المهم يعني اولا ماحدش يتعاقد مع قناة الحياة، خالص يعني، دي عقودهم
رضا ادوارد ماحدش يمضي له على ورقة بفرة على حاجة، دي ناس تسرق الكحل من العين
ثالثا، الحمد لله ان الدستورجية مش ماضيين عقد وان ابراهيم ما مضاش عقد، لو كان ماضي عقد زي ده كان زمانه اتشيع
طبعا انا مش حاتكلم عن الجانب اللا اخلاقي في العقد، بمعنى اني مش حاقول البيه المعارض بيعمل عقود سخرة 
لان عيب يعني الكلام ده وماسخ، لا هو بيه ولا معارض ولو مش هو اللي يعمل عقود سخرة امال مين؟ 

ايه الغلاسة دي؟ :(( الحزب الوطني شال بورنامجه

 تحديث:
عملت سيرش على اسم الورقة يمكن الاقيهما في حتة تانية اللي هي: ركائز الرؤية الاستراتيجية للحزب الوطني الديمقراطي لقيت النتائج اتنين الله اكبر في اللا مؤاخذة وواحدة موقع الحزب الوطني ولو دخلت على الصفحة تلاقيهم شالوها
هههههههههههههههه، انا باهزر معاكوا... هاتوا بوسة بقى


انا كنت باغش من البي دي اف بتاع بورنامج الحزب الوطني عشان اسلخهم في سلسلة مقالات بعنوان الله اكبر في اللا مؤاخذة، كتبت اول مقال، تاني مقال، جاية دلوقت بابص على اللنك لقيتهم شالوه :(( ايه الغلاسة بتاعتهم دي؟ طب يعني هم لما يخبوه مش مش حنعرف نتريق عليهم؟ وبعدين حد يخبي برنامجه عشان مش عايز حد يتريق عليه؟ هههههههههههههههههههه ده انتوا تحف والله

Friday 5 November 2010

الساعة بألف جنيه والحسابة بتحسب

 تحديث:
هم سايبين موقع الدستور دوت اورج ومهيكين على دوت نت، يعني لو فتحت دوت اورج حتلاقيه شغال ان شاء الله
وان شاء الله حننزل بسيرفرات تاني، خليهم يدفعوا فلوس بقى هم مش معاهم فلوس مش عارفين يودوها فين؟ 
-----------
نقلنا على الفيس بوك... حيوقعوا الفيس بوك بقى؟ تقدروا تشوفوا موقع الدستور على الفيس بوك وتعلقوا وتقروا مقالات عيسى وكل حاجة 
شادي عيسى قال لي دول بيتكلفوا في الساعة الف جنيه عشان يوقعوا سيرفر واحد.. قشطة، احنا بقى حنشغل عشر سيرفرات وخليهم يدفعوا عشرتلاف جنيه في الساعة، احنا حنقلعهم مالط
----
فيه قلق عند الكاتدرائية، واحدة من اللي واقفين برة قالت لي لقوا حاجة، بس البوليس مشاني وقال لي مافيش حاجة، وواحد قال لي لا ده تور جوة
مش عارفة ايه الحكاية
-------
زميلتي المنقبة في الشغل بتقول لي ان بقى فيه ناس بتقف تشتمها في الشارع، قشطة يا شعب، تف على المسيحيين وشتيمة للمنقبات، عظيمة يا مصر

احنا حنفضل ساكتين بقى على البلطجة الانتنرنتية دي؟

ايه بقى؟ يعني هم حيهزمونا بالبلطجة بتاعتهم دي؟ انا سألت جيمي وقال لي الهجوم على السيرفر ده شغل على تقيل قوي خارج عن سيطرتنا احنا
بس فيه ستميت وسيلة نفضحهم بيها
اولا جيمي اقترح انهم يقدموا بلاغ بس هم شايفين انهم حيشتكوا الداخلية للداخلية؟ 
طيب، احنا ما ينفعش نبلغ
ما ينفعش حد يعمل تريسينج للجهة اللي بتعمل كده ويعرفها لنا ونهيك عليهم بدل ما يهيكوا علينا؟
انا طبعا باهلوس انا مافهمش في الشغل الفني، لكن دي مجرد اسئلة، لو حد لقى ان السؤال خزغبلي مايهزأنيش، مجرد سؤال يا كابتن
طيب مافيش حاجة نعملها؟ اصل مش معقول يعني، اكيد فيه حاجة تتعمل
لو سمحتوا اللي عنده اقتراحات سيبهالي هنا في التعليقات، اي اقتراح ما يستهيفش اقتراحه، سواء اقتراح له علاقة بالدعم الفني، او انشالله يبقى هاكر ويقول لنا نعمل معاهم ايه، او حتى وقفة احتجاجية لقراء الدستور، او سندوشتات حلاوة بالقشطة
اكيد فيه حاجة تتعمل يعني، مش ممكن يعني جهاز دولة بحالة ماسك موقع وعمال يعمله بسيسة واحنا بنتفرج
للدرجة دي الموقع ده خطير؟ يعني الموقع ده دونا عن الفيس بوك والتويتر والمدونات والجايكو وكل الحاجات دي ده بالذات اللي خطير لدرجة انهم يصرفوا الفلوس دي كلها عشان يمنعوا الناس تقراه؟
طب وهم حيشنقونا ونسكت لهم يا ريا؟
نعمل اي حاجة.. اللي عنده اقتراح يتفضل

ده ايه الظرف واللطف ده كله



لقد تفوق في هذا الفيتيون على "خادم الحرفين" و"خسارة كبيرة لاسرائيل وخسارة كبيرة للبتاع ده" و"كل الشيعة ولاءهم لايران وستين في المية من العراقيين شيعة" ولما قال لواحدة من السياح: "اي سبيك لندن" ده غير بقى: عندك عيال؟ ايوة يا ريس.. طب متجوزة؟
كل ده كوم، وانه اول مرة في حياته كلهااااا يتكلم عن العبارة يتريق عليها.. حلوة حلوة جميلة

تغيير دومين الدستور بسبب هجمات القرصنة

الدومين اتغير بقى الدستور نت
دستور اورج ده اتضرب خالص
انا مش مصدقة نفسي على فكرة.. ايه ام الجنان ده؟ هم اتجننوا؟ ايه ايه ايه؟ ده موقع، مالهم؟ انا عايزة افهم هم عايزين ايه دلوقت؟ 

Thursday 4 November 2010

فيتيون كويس جابهولي تامر موافي

عزيزتي قائدة المركبة

بما انك مش حتاخدي حق ولا باطل في الشارع بالاسلوب المتبع، وبما ان لو حصل خلاف بينك وبين ايتها راجل في الشارع الناس حتغلطك وتقف جنبه 
فيه طريقة انا شخصيا باتبعها وجايبة معايا لحد دلوقت نتائج مذهلة:
اعملي ما بدا لك، وساعة الجد قولي للشخص اللي كسرتي عليه ولا خطبتي له العربية: معلش سواقة ستات بقى
ياااااا ما تتخيليش السعادة اللي بتترسم على وشوشهم، مهما تعملي فيه، وانت مضطرة تعملي كده سواء انت غلطانة او هو غلطان، لو هو غلطان حتتبهدلي لو قاوحتي، لو انت غلطانة حتتبهدلي وتدفعي فلوس، طب وليه، اعملي زي ما باقولك
اخبطي له العربية، شلي امه وهو مستنيكي تركني، اكسري عليه، زنقي عليه، امشي بالراحة وشليه، او امشي بسرعة وافزعيه، على حسب مودك، ولو اتخانق معاك ابتسمي، وبربشي نص بربشة وقول بصوت رقيق: معلش.. سواقة ستات بقى
وبعدين انت كده بتكسبي فيه ثواب، عشان انا مش قادرة اقولك كم السعادة الخرافية اللي بيبقى فيها الزميل قائد المركبة اول ما بيسمع الجملة دي، من اول سواق التوك توك مرورا بالميكروباظ والنقل العام والتاكسي والروري وانتهاء بالملاكي، كلهم بلا استثناء بتحصل لهم حالة انهيار اول ما يسمعوا الجملة دي، وترتسم ابتسامة رضا وسعادة وفخر على وشوشهم، بجد يو ويل ميك هيز داي، وحيروح بيتهم سعيد جدا، انشالله تكوني مدغدغة له العربية، دي نصيحة مجربة
ومدام عرفتي كلمة سر تقدري بمنتهى الراحة تبلطجي في الشارع كما يحلو لك
بس على الله بختك المدوحس ما يوقعكيش في واحد زي وائل خليل، يتعصب لما يسمع الجملة دي ويقولك: مالها سواقة الستات؟ هو فيه سواقة لابسة بنطلون وسواقة لابسة جيبة؟ وبعدين مالهم الستات؟ انت ازاي تبصي لنفسك بصة زي دي؟ ازاي تفكري بالطريقة دي؟ ازاي ترضى على نفسك انك تحقري منها كده؟
وحيستلمك بقى، بس عموما ده نوع مش موجود كتير يعني، في الاغلب لو وقعتي فيه اعرفي ان انت اللي نحس

Wednesday 3 November 2010

بخصوص رئاسة تحرير ابراهيم عيسى للكرامة مكان الاستاذ عزازي

 تحديث:
ده بيان حزب الكرامة عن الموضوع اللي حصل
اللي هو مش موضوع اساسا.. 
-------------

التعليق الوحيد للي حصل من اول امبارح بداية من برنامج القرموطي، مرورا ببيان الاستاذ عزازي - وهو شخص كلنا بنحبه وبنحترمه واولنا ابراهيم عيسى - وانتهاء بتقديم الاستاذ عزازي لاستقالته.... كل ده وماحدش لحد دلوقت من الصحافة فكر يتصل بابراهيم عيسى، ولا ابراهيم منصور، ولا اي حد من المغامرين الخمسة، بالرغم من ان المغامرين الخمسة مصدر معلومات اول واي حاجة جديدة بتحصل ابراهيم عيسى بيوافيهم بيها، التعليق الوحيد المناسب هو الآتي:
واحد ماشي الساعة تلاتة الصبح على الطريق الصحراوي قام العجلة نامت، نزل، بص حواليه لقى فيلا بعيدة، مشي ناحية الفيلا وهو عمال يفكر في نفسه: دلوقت اروح اخبط على الفيلا دي، حيفتح لي راجل بالبيجامة، والنوم في عينيه، وحيقول لي: عايز ايه، حاقول له مساء الخير حيقول لي قول صباح الخير، اقول له انا اسف على الازعاج، يقول لي لو كنت اسف ما كنتش خبطت على الناس في ساعة زي دي، حاقول له اصل العجلة بتاعتي نامت، حيقول لي نعم يا روح امك؟ حاقول له اصل مافيش حواليا... حيروح مزعق ويقول لي: اما انك حيوان صحيح، دي فيلا يا افندي، بيت، مش محل بتاع كاوتش، انا مال امي عجلتك نامت؟ حاعمل لك ايه؟ ده وقت تخبط فيه على الناس؟ مش عارف حتى تشيل معاك استبن مدام مسافر متأخر كده؟ وتخبط على الناس في وقت متأخر زي ده؟ ايش عرفني انك مش حرامي؟ قتال قتلا؟ نصاب؟
وهو بيفكر كده راح حاطط ايده على الجرس راح فاتح له راجل بالبيجامة والنوم في عينيه وبيقول له: عايز ايه؟
راح صاحبنا قال له: مش عايز من وش امك حاجة.. ينعل ابو شكلك
--------------------
ويالا بقى.. كل واحد عمل باي باي من بعيد لابراهيم عيسى بقى متربي معاه، وكل واحد نشروا له رسالة في بريد القراء بقى: كنت باشتغل في الدستور زمان وعارف الجو هناك من جوة شكله ايه، وكل واحد عمال يفتي ويألف
لو فيه حاجة، حتتنشر في موقع الدستور
وقبل ما تتنشر في موقع الدستور حيعرفها اصحاب الشأن على الاقل، ولا حتى حيبقوا سامعين بيها
هو جابر القرموطي ده مش عارف يتصل باي حد من الدستور؟ اي عيل صغير كان حيدله
ده ايه القرف ده ياربي، هو فيه كده في الدنيا يعني؟ يعني الناس مطعونة في كرامتها، ومرفوتة من شغلها، وفيهم اللي نايم في الشارع، وكل يوم والتاني شغلتهم في الحياة انهم ينفوا: والله ما اخدنا فلوس، والله ما سعينا للبيع، والله ما عملنا صفقة سرية، والله دفعت الحساب بتاع العشا اللي كان فيه رضا ادوارد، والله ما تهربنا من الضرايب، والله ما اشتغلت في الحياة، والله ما حاكتب في الوفد، والله والله والله
طب والله ماهو معلق بقى على الموضوع ده

الف حمد الله ع السلام يا ريس... وحشتنا

Tuesday 2 November 2010

نعمل تحت القصف

بيان قصير من العاملين في موقع الدستور: نحن نعمل تحت القصف
خليكوا معانا.. احنا فعلا محتاجين مساندتكم، ومالناش اي هدف غير اننا نعمل شغلنا عشان نقدم الخدمة الصحفية لمستحقيها، وهم القراء وبس
-------------
بالنسبة لتصريحات البرادعي... هيييييه
طيب، احنا عندنا في الشغل واد فتاي كده، طول النهار يفتي، وواحد تاني اهبل منه طول النهار يسأله في ارائه، الواد ده من كتر الفتي بقى يقول كلام حلزوني، يعني مثلا يقول: تسعين في المية من النساء الاوروبيات باي سيكشوال
- يا عم انت ايه العجن ده؟ جبت منين الكلام ده؟
- من الشات
من الشات، عنده اتنين واربعين سنة، وعيلين طوله، وبيعمل شات مع اوروبيات بطريقة توضح له انهم باي سيكشوال وكمان فاكرهم ان دول كل النسوان اللي في اوروبا
مرة واحدة زميلتنا اتجننت علينا كده، هي عندها حساسية واحنا كلنا مدخنين، راحت مصوتة ومعيطة وجايبة لنا الامن المهم يعني كان يوم عظيم، وده دخل فجأتن كده عشان يحلل الموقف: يا جماعة اعذروها، جالها ماستربيشن في الرؤية.
فجرت مثلا
انا واثقة ان البردعاوية دلوقت جالهم ماستربيشن في الرؤية، بس انا مش عايزة يجيلكوا ماستربيشن في الرؤية يا شباب
البرادعي ما كانش اكتر من صورة، وعمره ما كان له لازمة، انتوا اللي لكوا لازمة، وعملتوا شغل كويس، وعملتوا حركة، ومافيش حاجة جدت، كل اللي جد هو تأثركم النفسي، لكن على ارض الواقع هو فعلا ما كانش له حضور، هو ما كانش معاكم عشان يتخلى عنكم، يا سيدي شيلوا صورته وحطوا مكانهما صورة الهلال مع الصليب، هي حتفرق كتير؟ انتوا ما عملتوش اي حاجة غلط، كل اللي عملتوه كان كويس، وجرا ايه يعني لما قعدتوا شوية تحبوا واحد مالوش وجود، طب ما انا باحب فيروز، وباحب رشدي اباظة، وكنت باحب اللحمية بتاعة مصطفى قمر، عادي يعني، عادي، ما تضايقوش من حاجة، مافيش حاجة حتتغير، التغير الوحيد انكم كنتوا فاكرينه حيعمل حاجة ومستنينه يمشي في الجزمة الاول، وما مشيش، وطلع بايع الجزمة، بس انتوا مش معلقين اي حاجة فعلية عليه، عادي، عادي والله، انتوا بتشتغلوا وبتجمعوا توقيعات، وبتعملوا وقفات، وكل حاجة، وهو يطلع يقول امر لاشين، وحيفضل يقول امر لاشين، حاجة اتغيرت بعد التصريح ده؟ 
طب ايه رأيكم كده احسن؟ اه والله، عشان بقى ما تقعدوش تستنوا حاجة، تفضلوا تشتغلوا زي ما انتوا كده، وما تستنوش حد ولا حاجة، قوم الشغل يتراكم ويعمل حاجة مفيدة
هو صحيح ابراهيم اتمنع والدستور اتخرب من تحت راسه... بس عموما انا حسبي الله ونعم الوكيل، وكمان رب ضارة نافعة، لو ما كانش اللي حصل ده حصل ما كناش عرفنا ان الدستور ارض الرجال، ويمكن هم نفسهم ما كانوش عرفوا في نفسهم ده، ثم ابراهيم عيسى طول عمره معدنه بيلمع في المصايب، اصله برج العقرب... كل برج العقرب هات لهم مصيبة واتفرج عليهم وهم بيلعلعوا، وما تبانش نضافتهم ومعدنهم الطيب الا في المصايب، في حالات الركود والاستقرار بيبقوا لا يطاقوا، عشان بيبقوا عاملين زي لواء اركان حرب متقاعد وعمال يقرف في عياله ويوقفهم طابور الصباح صفر انتباه.. اه والله، واحنا مش زعلانين ولا حاجة، احنا حنكمل شغل في الموقع وحنطلع الجرنال وحنفضل كده نحارب عشان نعمل الصح
وانتوا كمان ما تزعلوش، والنبي ما تزعلوا ولا تضايقوا ولا تحبطوا، عادي والله عادي، انتوا عملتوا الصح، وعملتوا جهد، وحتفضلوا تعملوه زي ما انتوا، هو انتوا كنتوا بتعملوا له ولا بتعملوا لنفسكوا وللبلد؟ خلاص، حتكملوا عادي، ماشي؟ عادي جدا، كأن مافيش حاجة حصلت
انسوا بقى الموضوع ده واسقطوه خالص من مخكم
ما تقعدوش بقى تجيلكم ماستربيشن في الرؤية، لا تجيلكم حالة انكار، ولا تجيلكم حالة احباط، عاااادي، تكملوا شغلكم عادي، هو كان نافعكوا بايه؟ اذا كان على تويتاته حيفضل يكتبها ويعمل حوارات ما قالش انه حيبطل يتوت 
---------------
عايزين نتفاعل مع البديل ونقول لهم الحاجات الحلوة اللي عملوها عشان يتشجعوا، ولو فيه ملاحظات برضه قولوا لهم، اقصد يعني مش تقروا وتفرحوا وخلاص، ابعتوا لهم وشجعوهم وكده، هم كمان بيغزلوا برجل حمار وهدفهم انهم يعملوا شغلهم، انا عجبني قوي الموضوع بتاع البدون، ودي مشكلة حتى في الكويت، وفي دول عربية كتير، بس عندنا مش بيتكلموا فيها، والموضوع اللي بديل عامله حلو قوي

مبروك للبديل :)

في نفس اليوم موقع الدستور رجع وموقع البديل اشتغل
والمطبوعات الورقية ان شاء الله جاية... هو احنا حنروح من بعض فين يا امن الدولة؟ ده انت حتى غيرت سياستك التحريرية وصفوت حجازي زعلان منك
تسوى التعب والبهدلة، المهم الناس تعمل شغلها بما يمليه عليه ضميرها، ولو عشان تحقق الهدف ده يطلع عينها، مش كتير طلعان العين على الهدف، هو الواحد لو مش حيعمل شغله كويس وبذمة وضمير ويبقى واثق انه يقدر يقابل بيه ربنا، يبقى عايش ليه؟

Monday 1 November 2010

باطل باطل باطل

رحت النقابة متأخر، والدنيا كانت زحمة طلع ترابانتيني في الطريق، كلمت عبد المنعم لقيته بيقول لي احنا طلع تلاتينا يا نوارة لما تيجي لما تيجي
دخلت النقابة لقيتهم مجتمعين والاستاذ جمال فهمي بيتكلم وبيهديهم وبيقول لهم انه معاهم، والبنات بتعيط والشباب باصين في الارض وحاطين روسهم بين كفوفهم، بعد كده اتكلم الاستاذ  صلاح عبد المقصود وقالهم انا متفهم حالتكم ومش زعلان منكم، الظاهر شتموا مجلس النقابة كمان هههههههههه
وبعدين الاستاذ ياسر رزق ابتدى يتكلم معاهم في مطالب اللي حيستمروا في الاعتصام
ايه اللي حصل يا شباب؟
اللي حصل ان زي ما اتفقوا امبارح حضروا ورقة عشان يضمنوا تفعيل السبع شروط للناس اللي حتروح، لان مافيش حاجة تضمن ان العيال يبقوا في امان لما المولد ينفض ويبقوا تحت ايد ادوارد
قام جه رضا ادوارد ودخل مع مكرم وما رضيوش يدخلوا جمال فهمي وياسر رزق وراحوا ماضيين على طول وطلعوا
المهم كده التسوية بقت نهائية خصوصا فيما يخص غير المعينين، لازم غير المعينين يروحوا، وغير المعينين النهاردة قعدوا يعيطوا، والوليد اسماعيل كان في حالة انهيار تقريبا، ولما كلمته في ضرورة انه يروح عشان يحصل على التعيين سابني من غير ما يرد عليا وهو بيعيط ومشي، ومنى سليم قالت لي: حاسة اني في الكوشة مع العريس اللي طول عمري باحبه، وفجأة النور قطع وبدلوا لي العريس بواحد باكرهه والناس كلها عايزة تكمل الدي جيه والبوفيه وتكتب الكتاب وانا اخر واحدة بيفكروا فيها وقعدت تعيط
طب انا ايه وجع القلب ده؟ وقاعدين يقولوا لي كلميهم عشان يروحوا.. طب انا ما اقدرش بقى.. ده وجع قلب شديد عليا
بالنسبة للمعينين كلهم حيرفضوا الرجوع وحيكملوا اعتصام لحد ما النقابة تجيب لهم التسوية
العيال لما لقوا الاتفاق اتمضى بدون مناقشة الورقة اللي مقدمينها ومن غير حضور جمال وياسر قعدوا يهتفوا باطل باطل قام النقيب عمل لهم فلفل شطة ورقص لهم ههههههههههه اه والله، وبعدين عمل لهم على دقنه حركة استنوا عليا دي وقال لهم ابقوا شوفوا مين اللي حيجيب لكم حقكم
بس اتكلم في العاشرة مساء وضحكني وصعب عليا والله، قال مش معقولة كده فيه لياقة يعني  دول امبارح بالليل قعدوا يقولوا لي انت احسن نقيب ههههههه يا عيني..
طب هم عملوا لك ايه مش لائق يا سيادة النقيب؟ قالوا باطل وخلاص، تقوم تعمل لهم فلفل شطة وترقص لهم؟ وكمان انت اللي زعلان؟ 
كاميرا العاشرة مساء هي الكاميرا الوحيدة اللي صورته وهو بيعمل فلفل شطة، بس ما اذاعتهاش طبعا
عادي في المعادي.. لا وايه؟ وبعد ما جابوا سيد البدوي يكدب ساعتين قبل كده، الليلة يا عمدة جايبين منير فخدة عبنور.. بس الظاهر التزنيق عليهم جامد، لان منى الشاذلي جات لها حالة تهتهة خرافية وهي بتقدم منير فخدة عبنور وقعدت تبص في السقف عشان تلاقي الكلام اللي ما يزعلش حد
سمعت ان منعم اتكلم في تسعين دقيقة، بس مش عارفة قال ايه
قعدت ازعق لهم ان ولا موبايل صور النقيب وهو بيعمل فلفل شطة قالوا لي هو حد كان متوقع انه يعمل كده؟ 
انا مش صعبان عليا غير المصور، العيال قالوا له مش حتتذاع، قالهم على رقبتي، حتتذاع يعني حتتذاع.. يا حبيبي يابني
المهم الخلاصة يعني، ان فيه عيال غير معينين وبرضه مش قادرين يروحوا.. اففففففففف مش عارفة اعمل ايه؟ بصراحة مش قادرة انا عن نفسي احاول اقنعهم بحاجة زي دي خصوصا وهم عمالين يعيطوا بنات وولاد.. بس برضه قدامهم فرصة يتعينوا، مش عارفة
يارب ابراهيم يطلع الورقي بسرعة ويلم عياله اللي اتبعتروا دول
الله يخرب بيتك يا سيد يا بدوي
الله يخرب بيتك.. الله يخرب بيتك انت ورضا ادوارد
ايه ده؟ ايه اللي عملوه ده؟ لو ابطط العش واكسر القش يبقى منظر جميل يا اصدقائي الصغار ويفهم الزغاليل اني فيل جبار فيبطلوا التهليل والرقص والمزمار.. اتبطط يا عش.. اتكسر يا قش
حسبي الله ونعم الوكيل فيهم.. حسبي الله ونعم الوكيل... تسوى كام دموع العيال النهاردة؟ تسوى كام قهرتهم دي؟ انتوا شايفينهم معتصمين، مش شايفين ابوهم وامهم بيقولوا لهم ايه في البيت، ولا الناس بتقطمهم ازاي؟ ولا كسرة نفسهم لما يفكروا انهم حيرجعوا ياخدوا مصروف من اهاليهم، ولا حتى اللي ما عندوش اهل ياخد منهم مصروف، وفي نفس الوقت مش قادر يا نفيسة مش قادر، ده منى سليم النهاردة قالت: احنا صحفيين شاطرين، ليه يتعمل فينا كده؟
يادي الغلب ياربي
حسبي الله ونعم الوكيل.. حسبي الله ونعم الوكيل، انا نفسي افهم ايه ده؟ ايه اللي زفت الطين عمله ده؟ يخرب بيت ايديه اللي اتنجست بدم الابرياء على بيت حزب الوفد على بيت الوحدة الوطنية اللي وحدت البدوي وادوارد على كسر قلب العيال دي
-------------
تعليقا على تهديدات القاعدة لينا.. انتوا مال ابوكم بينا؟ احنا ناقصينكم؟ ما تغوروا بقى في داهية تشوفوا البلاوي اللي بتعملوها في الدنيا ايه وتسيبونا في حالنا