Wednesday 8 December 2010

نداء إلى كل مواطن صالح: ما تخافش من المخبرين المخبر عرة


ده مش اول انسان يتقتل في الشارع قدام الناس وماحدش يتدخل ولا يحوش عنه
ما ينفعش كده يا ناس
انا عارفة ان الناس بتخاف، بس خايف من ايه؟ دول اتنين مخبرين، وانتوا عشرميت انسان في الشارع وهم موقفهم ضعيف لأنه مش قانوني
1- المخبر مش مفروض يقبض على الناس في الشارع، لو لقى انسان اشتبه فيه المفروض يراقبه ويبلغ في القسم انه اشتبه في فلان وخط سيره كذا ومحل اقامته كذا، مش اول ما يشوفه في الشارع ينزل عليه يعني مثلا القتيل ده كان عليه حكم واتلغى لانه اتصالح مع البنك
2- المخبر مش معاه سلاح.. وما يقدرش يستخدم سلاح اساسا ضد المارة في الشارع، وبعدين يا سيدي هو مش معاه سلاح ولو معاه سلاح يبقى تبلغ فيه لأنه مش مفروض انه مسلح
3- تحت اي ظرف مش مفروض ان المخبر ينزل عجن وضرب في الانسان اللي بيقبض عليه، لما يشده من هدومه حاجة، ولو ان ده مش قانوني، ولما ينزل عليه ضرب لحد ما يفيص في ايده دي حاجة تانية، ما تقنعنيش ان اول ما حط ايده عليه موته، ده قعد يضرب فيه على الاقل تلت ساعة عشان يعرف يطلع روحه ده لو ضاربه بالرصاص مش حيموت في ساعتها
ماذا تفعل حين تمر من شارع وتجد ان انسان ما يتم سحله:
1- فين النسوان؟ اخصصصص على نسوان مصر.. اي ست معدية ترقع بالصوت كده: يالهوي يالهوي يالهوي.. بقية الستات حيرقعوا بالصوت وراها
2- المارة حيتلموا على صويت الستات
3- الشارع المصري مليان بغال واكلين كشري وفول.. يرموا جتتهم على الواد اللي بينضرب عشان يحوشوا عنه
4- تلات بغال تانيين يمسكوا في المخبرين - ده اذا فضل المخبرين واقفين لسه وما جريوش، لانهم لو لقوا الشارع اتلم عليهم حيجروا على فكرة - المهم يمسكوهم وهاتك يا عزق فيهم... بس ماحدش تاخده الجلالة ويموت المخبر، عشان بس ما يعملوش شهدا علينا وينضربوا لما يبان لهم صحاب
خلاص كده
البني ادم المشتبه فيه في ايديكوا، والمخبرين ما قتلوهوش، تاخدوا المخبرين والمشتبه فيه وتطلعوا على القسم بربطة المعلم لو يعني القانون واخد حده معاكم... وانا بصراحة لو مكانكم اهربه، يعني حيكون عامل ايه الواد يعني؟ لو عملته كبيرة قوي قوي ويستاهل فعلا عليها عقوبة مش حتلاقيه ماشي في الشارع اساسا.... حتلاقيه عضو مجلس شعب
فاهدوا كده واطمنوا، مافيش حد من اللي بيتجرجروا على الاقسام يستاهل اساسا يتجرجر
اه....... نسيت حاجة مهمة قوي
لما تمشي جنب الحيط مش حتسلم.. ليه بقى؟ لأن المارة لما وقفوا يتفرجوا على الراجل وهو بيموت بعد شوية البوليس جه لمهم عشان هم شهود، وزمانهم بيتعذبوا دلوقت، ادعوا بقى ماحدش منهم يموت

10 comments:

حسن على said...

هل كونت الداخلة فرق اعدام جديدة على طرقة المالكى وبينوتشية ؟؟؟؟ فى كل يوم قتيل بسبب حقراء المخبرين, هل هناك "تعميم" اوامر ادارى بالقتل عند الاشتباة؟؟؟؟ هل تحولت الشرطة المصرية الى عدو الشعب رقم واحد؟؟؟ اية الحكاية بالظبط (هىء) والربط؟؟؟؟؟؟؟؟؟؟

بهيج الشرير said...

والنبي ياأبلتي أنا عندي إقتراح! إيه رأييك لو نخطف نسوان وبنات العيال صبيان العهري بتوع الداخلية دول، سواء كانوا ظباط، مخبرين، أو معرصين؛ وبعدين نصورهم بالفيديو في أوضاع مشينة وقليلة الأدب وبعدين نوزع الفيديوهات بالمجان في المساجد بعد صلاة التراويح

ويكا said...

انا لا قادر استوعب ايه اللى الشرطه بتعمله ده ، ولا قادر استوعب ايه السلبيه اللى بقت فى الشعب دى .

وان كان الحال ده موجود طول عمره للاسف فى البلد دى من زمااااان ، الفراعنه والمماليك والانجليزى وغيره وغيره.

اللهم اصلح حالنا

-_- said...

هو ليه المخبرين و امناء الشرطة بيتاعملوا مع كل الناس بمبدأ ان اللي قدامك ده واد عربجي ابن كلب اضربه و طلع تاريخه لغاية ما يديلك 20 جنيه و ييجي معاك القسم

utopia said...

ولدي نصحتك لما صوتي إتنبح
متخفش يوم من جني ولا من شبح
وإن هب فيك عفريت قتيل إساله
مدافعش ليه عن نفسه يوم ما اندبح

الاخ بهيج الشرير : اقتراح
جميل ماقدرش اقول حاجة عنه

Ahmed Mohamed said...

اي حد هيعلق آماله علي الشعب يبقي عبيط جدا ولسه معرفش انه اكيد في مصر

بلال فضل كاتب عن خوف وانعدام الشهامه لدي المصريين
الكلام ده حصل مع المجرمين
فمبالك بالمجرمين تحت مسمي وظيفي اسمه المخبرين

لو مخبر واحد امسك فيه واربطه علي العامود
لو مخبرين اتنين ومش هتقدر عليهم عور واحد فيهم واجري محدش هينفعك لا في الشارع ولا في القسم

لو كتير بقي واتمسكت فريح نفسك وامشي معاهم وربنا معاك

في نقطه مهمه جدا لو جريت متنسش انك هتبقي في نظر الناس حرامي وبيحاولو يمسكوك ومن هنا سوف تتأكد ان لسه في مصر ناس عندها شهامه وهتموت من الضرب لو اتمسكت

اقولكم مفيش حل غير انك تقتله قبل ما يقتلك انا نفسي حصلي كدا بس مع امين شرطه اسمالله وفتحت دماغه والهرب مكنش حل جيد مع الموقف ده غير اني راضيت امه ودفعتله 200 جنيه ...في القسم

مش فاهمه said...

نوارة فيه حاجه محيرانى قوى بجد المخبرين لو مش فى اوقات شغلهم بيبقى شكلهم ازاى بيبقوا شبهنا ولا شبه حد تانى يعنى انا اعرف منين انهم مخبرين مش جايز ناس بتتخانق مع ناس و الأتنين كالعاده بيبقوا عايزين الحرق
لأ بجد انا متربية فى المنيل بس كان فيه مكان اسمه المنيل القديم كله بلطجيه و شبيحه و لما بيمسكوا فى بعض لازم تلزمى الصمت والا تطولك مطوة ولا حاجه
علشان كده باقولك اعرف منين ان ده مخبر مش من مخبر و بعدين هو مش المخبر شبه اللى كانوا فى مسرحيه شاهد ماشافش حاجه كده يعنى زيهم زى السمكريه و الكمساريه و العالم دى
المشكله مش فى المواطن الصالح اللى لما يشوف مخبر يمنعه نفسى مانتعاملش ان الناس ابيض و اسود الموضوع معقد اكتر من كده احنا فى فتنه و فى لخبطه المشكله فينا كلنا كلنا مسئولين و كلنا ملطوطين و كلنا موالسين و كلنا منافقين و كلنا نستحق اللى احنا فيه و زياده

Unknown said...

الغالبية الساحقة من الشعب المصرى ناس فاسدة مزورة جبانة تعشق الموت فى ظل الذل والهوان - لا تفتح فمها ولا تنصر سوى الطغاة بدءاً من إللى قاعدين على كراسى الحكم وحتى المخبرين ولا حضرتك مش واخدة باللك ولا إيه إن مافيش حد فى البلد دى بيسأل فى حد ولا بيرد ظلم عن حد ولا بيدافع عن حق - المصؤيون إللى إنت وأن متخيلنهما خلاص بح - الصنف النضيف الشهم ده شح إلى الأبد - لدى الرجال ولدى النساء - والدليل تزوير انتخابات 28 نوفمبر 2010 - فمن الذى نفـّذ َ التزوير سوى بسطاء فاسدين والمخبرين من هذا الشعب إللى الواجد فيهم مستعد يبيع أبوه وأمه بخمسين جنيه؟ والا دول ناس ولاد كلب تانين مستوردين من إسرائيل إللى زوروا الانتخابات؟ الرهان على غالبية هذا الشعب والـ 88 مليون خيال مآتة أصبح رهان خاسر فقد كشفت لنا الانتخابات وأكدت لنا أننا شعب ذو غالبية قبلية همجية جاهلة مافيش حاجة بتفرق معاها غير هبل مباريات كرة القدم - عدد المحترمين الفاعلين فى الحياة فى مصر لايزيد عن مائة ألف مخلوق وباقى الـ 88 مليون كلهم خيال مآتة ومجرد أونطة والعدد فى الليمون - الشعب إللى غالبيته أشد فساداً وخنوعاً من الحكومة هو شعب فاسد - فترة صلاحيته انتهت من زمان - عليه
العوض ومنه العوض فى غالبية أهل مصر - أنا اتسرق منى مقررى الدراسى التخصصى فى جامعة القاهرة فى عز الضهر الأحمر وأنا الوحيد المتخصص فيه - عايزانى أقف حنب واحد بينضرب فى الشارع وأنا محدش وقف جنبى فى سرقة جهدى العلمى والبهوات الأساتذة الزملاء الأرازل شجعوا السرقة فى الجامعة عينى عينك وكتبت للصحافة فلم يكلف صحفى واحد خاطره ويرد عليه ولو بكلمة أو ينشر شىء عن موضوعى - يقولك إيه فضوها سيرة - مصر غرقت وأكلها سمك القرش من ساعة كامب ديفيد - وهو ده إللى كان مطلوب من كامب ديفيد إن الناس تقول الريس باع يعنى هو جت عليه أنا إللى مش حابيع - الأخ فى مصر دولقتى بيبع أخوه فى ثانية

Unknown said...

هل تغير المصريون منذ 1798 حين جاء نابوليون بونابارت ودخل بخيوله الأزهر؟ ربما تغيروا فى الشكل وليس فى المضمون - وإن كان فبالقطع للأسوأ - فالمماليك الجدد يحكمون مصر والتعليم لم يؤتِ ثِمارَه ولم يُنجز فى الشعب وعدَه لأنه تعليم زائف قام بتحويل الأساتذة إلى متسولين لدى طلابهم ، أما تربية الناس لأولادهم فقد اختفت من البيوت إذ ظنوا أن المدارس سوف تربّى أبنائهم ، فتوقعوا ما تستأهلون فقد حجزتم مكانكم الدائم فى آخر طابور البشر على سطح الكرة الأرضية

Widiman said...

طلب الحصول على الجنسية المصرية

http://www.facebook.com/topic.php?uid=32847763293&topic=15268