Sunday, 19 December 2010

توضيح

الاوشاعة اللي طالعة عن ويكيليكس انها ما نزلتش حاجة عن اسرائيل دي جات منين؟ رجاء الدخول على رسائل السفارة الامريكية في تل ابيب والاطلاع على الوثائق، واللي نزلنا جزء منها هنا مترجم، اللي بتقول ان اسرائيل خايفة من جولدستون وان امريكا طمنتهم انها حتعمل كل اللي تقدر عليه عشان التقرير ما يصعدش لمجلس الامن، وانها طلبت من مبارك انه يأمر وزارة الخارجية بعدم فتح الملف النووي الاسرائيلي، واعترفت بانها هي اللي عملت الانقلاب في ايران وجندت عناصر من اتحاد الطلبة الايراني والمعارضة الايرانية، وانهم هم اللي دعموا فريق 14 اذار في انتخابات لبنان بفلوس السعودية، ونتانياهو وهو بيقول مش حندي الفلسطينيين ارض هم مش عايزين غير ياكلوا حنأكلهم ونشغلهم بلقمتهم، وكلام داجان عن ضرورة الانتباه الى ان العرب بيكرهوا ايران لاسباب طائفية مش عشان الخطر النووي ولازم ينموا الاسباب الطائفية دي، وكلام بيريز حين قال: الد اعداء اسرائيل هم ايران وحماس وحزب الله ويجب أن ندول هذا العداء ثم ننسحب نحن من الصورة ليواجه العالم اعداءنا، وكلام الامريكان عن ان الاسرائيليين دايما عايزين غيرهم يخوض لهم معاركهم، وكلام اسرائيل عن عدم رغبتها في المشاركة في مواجهة مع ايران ونتنياهو وهو بيقول مافيش داعي للضرب حلفاءنا من المعارضة جاهزين والانتخابات على الابواب واذا ما عرفوش يسقطوا النظام على الاقل يسقطوا احمدي نجاد بانهم يعملوا عليه انقلاب، اهو اهو، يعني عارفين انه حينجح ومدبرين له انقلاب اهو ونتنياهو وداجان قايلين كده بعضمة لسانهم، والخلافات اللي بين القيادات الاسرائيلية إبان حرب لبنان، واعتراف اسرائيل بانها اتهزمت في حرب تموز، واعترافهم بأن حرب تموز هي كمان اللي خسرتهم الحرب في غزة، وكلامهم عن ضرورة فصل سوريا عن ايران وتقديم الرشاوى لها عشان تستجيب، وكلامهم عن عدم استعدادهم لتقديم اي تنازلات بشأن ملفهم النووي، وضرورة تفوقهم النوعي العسكري عن بقية بلاد المنطقة، واقرار الامريكان بده، ووعد الامريكان لهم بأن مبارك حيضغط على ابو الغيط عشان ما يتكلمش في الموضوع ده تاني، صحيح كل الوثائق التي تخص إسرائيل ملطوط فيها العرب بس ويكيليكس واسانج مالهمش ذنب على فكرة في لطة العرب يعملوا لنا ايه اذا حكامنا خونة؟ ده ذنبهم يعني؟

ده اولا
ثانيا، هو لسه ما نزلش كل الوثائق

ثالثا، مين اللي متخيل ان اسرائيل عندها اي اسرار اكتر من اللي هي بتقوله، دي ناس بتحرق العيال الصغيرة في وضح النهار، انتوا عايزين تعرفوا عنها ايه اكتر من كده؟ يعني ايه المفاجآت اللي كنتوا مستنينها من وثائق اسرائيل اكتر من اللي انتوا شايفينه؟ ولازم تراعوا انه ما نزلش وثائق توب سيكريت، يعني اللي نفسكوا فيه مش حتلاقوه ولا حتى في وثائق مصر لانها مش وثائق توب سيكريت ومع ذلك فيه وثيقة في السفارة في مصر عمر سليمان قبل الحرب على غزة بسنة ونص.. سنة ونص، بيقول للادميرال: السلطة الفلسطينية لازم ترجع غزة ومش حترجع الا "بسحق" حماس والصواريخ لازم تقف واحنا مش حنطالب اسرائيل بوقف اطلاق النار الا لما حماس تبطل ضرب صواريخ
فاهمين الكلام؟ ساعتها ما كانش فيه نار اساسا عشان مصر تطالب بوقفها؟ فاهمين حاجة؟
كنتوا عايزين تسمعوا ايه؟ كنتوا عايزين تسمعوا الاسرائيليين وهم بيقولوا: يالا نحضر سمكة القرش عشان نرميها على مصر؟ طب هم مش حيقولوا كده، عشان اساسا مافيش حاجة اسمها يسعروا سمك قرش ويرموه عندنا ده هبل ده
اما كلام اسرائيل عن ان الوثائق لم تضر بها.. وايه يعني؟ ماهي لازم تعمل كده؟ لم تضر بها ازاي وهي فضحت عملاءها؟ وهي لو عايزة تبقى على عينك يا تاجر كانت اعلنت زي ما فضلت تشكر مبارك طول حرب غزة لما خليتنا كلنا عبارة عن تمانين مليون مبلول من الكسفة، ايه يعني لما قالت كده ما النظام المصري راخر بجح وقال نفس الكلام وقال صورتنا زي الفل.. وهم الاتنين صحاب وتلاقي نظامنا هو اللي نصح نتنياهو بالكلمتين دول ومذكور في الوثائق ان "نتنياهو يثمن أراء الرئيس مبارك" امال حيقولوا اتفضحنا؟ ماحدش قال حاجة، ده حتى نجاد ما قالش: شفتوا بقى مش قلت لكوا المعارضة جاسوسة؟ لان ده مش مصلحته، قال: ابدا ولا في اي حاجة من دي واحنا كلنا سمنة على عسل..ماهو لازم يعمل كده، امريكا متجننة عليه عشان امريكا قوة تقدر تجيبه، ومش خايفة تقول انها خايفة من الوثائق لان ما عندهاش حاجة تخاف منها، اللي خاف بجد هو اللي قال انا ما خفتش، وبعدين هو فيه حاجة تضر بمصالح امريكا وتنفع مصالح اسرائيل؟ لو فاكر ان امريكا واسرائيل حاجتين منفصلتين اقرا الوثائق لو سمحت... اقراها كويس

واستنوا الوثائق مش كلها نزل
والرحمة بقى شوية.. ارحموني بقى شوية
انتوا تيجوا في المؤامرة اللي بجد وتقولوا مافيش داعي للتخوين ولما ما يبقاش فيه مؤامرة تدوروا على المؤامرة؟ انتوا معمول لكم عمل؟
هو ربنا عرفوه بالعقل ولا بمشط الرجل ياناس؟ الراجل طالع دينه وعمالين يدوروا له على كل بت عاكسها وكل بت علقها عشان مش لاقيين له ذلة يمسكوه منها، ده كده متآمر؟ متآمر ويتفضح الفضيحة دي؟ متآمر واهبل؟ طب اكل ايه وشرب عليه مية
ومع ذلك نستنى
الله اعلم، يمكن جوة السجن ضغطوا عليه، يمكن يستجيب للضغط، يمكن ما يستجيبش، احنا مانعرفش، حيبان من الوثائق اللي لسه حينزلها اللي نزله لحد دلوقت كويس، حنشوف اذا حيغير سياسته في الوثائق اللي حتنزل بعد كده نقوم نعرف انه ضغط عليه وهو في السجن واستجاب، ولا حيستمر زي ما كان يبقى نمسك الوثائق ونحللها
مش عشان اكتشفتوا ان حاكمكوا جواسيس تجيلكم حالة انكار وتقعدوا تقولوا مؤامرة
ايه يا اخواتي ده؟

7 comments:

utopia said...

يسلم فمك انا اتجننت من البنى ادمين دوول
بجد حرقولى دمى
اول مرة اشوف ناس معمول لها غسيل مخ بالطريقة دى

سامح said...

ما احنا عارفين من الاول ان احكامنا خونة ، ايه الجديد؟
كمان الوثائق اقل من اللي في دماغنا يعني انا كنت متخيل العمالة المباشرة يعني في اليوم الفلاني دفعنا للرئيس
الفلاني مرتبه قلنا لا انا عاوز زيادة او هددنا الامير الفلاني قلنا : ينفع كده ده انا بتاعكو
كمان صراحة تشويه السنة واظهار الشيعة
مش داخلة دماغي نوهائي

Mostafa said...

انا نفسي لما حضرتك تترجم بقيت الوثائق اللي هاتنزل تترتب كلها وتتحط فب كتاب وياريت يتعملها تحليل سياسي ينزل معاها في الكتاب علشان في معلومات كتير متفرقه لو اتحطت جنب بعض هاتوري الناس الصورة اوضح بكتير

ياسر said...

رؤساء هلاهيل خونة فسدة وقتلة ومكشوفين وملعونين جراثيم ووباء وغباء وذمم مخروبة وبلاعات شرابات مقطوعة وعيش عطن وعفن ووشوش بجحة ورخمة ونطعة وسمنة ملسلسة

Ahmed said...

خدي الخبر ده يانوارة
خبر حلو للدستور الأصلي
عن راجل صربي قتل قرش في شرم الشيخ
نط عليه وهو سكران فطسه
عقبال اللى في بالي
المصدر
http://www.nypost.com/p/news/international/hammered_head_shark_dies_7ASb5azven0jSyqx4DfvaN

أعتقد أن الحكومة ممكن تجتمع بالراجل الصربي ده وتتعلم منه طريقة صيد القروش...والحمد لله إحنا عندنا نواب الخمور والقمار وسميحة وسميرة كمان.

lastcrazyboys said...

اييييه اللي انتي جايبـاه ده وسايبه الريس عمال يصول ويجول زي ابو تريكة ايام مجده ..وبيضرب خصومه
في مكتل

وبيقولك "كلنا كنا فقــراء..!؟؟ أومال انت دلوقتي ايه يا ريس..!؟

الرئيس مبارك "خلى بتوع البرلمان الموازي يتسلوا "

على رأي عادل إمام ..اترقى شوييية ابقى رئيس جامهوريييية

Ebn 5aled said...

carlos latuff
agmad fanan fel 3alam

http://twitpic.com/3e81m9