Thursday, 23 December 2010

I love Anarchists :)


اهم هم دول..


شفتوا طيبين ازاي؟

زملاؤنا في الارهاب.. ايوه بقى احنا عالم ارهابيين واللي مش عاجبه يولع بجاز وسخ ويطلع يجري والنار والعة فيه نص ساعة على الطريق الزراعي لحد ما تيجي مقطورة تشيله تحدفه على الترعة يموت غرقان
يا قهلا وسهلا بالزملاق الارهابيين من القنارقيين، والنبي ونستونا بدل ما احنا قاعدين في الارهاب لوحدنا كده والدنيا كلها نازلة فينا هبد ورقع وقتل وبمب فسفوري وكمان زعلانين مننا وبيشتمونا، يعني ضرب ضرب وكمان فيه شتيمة، مش حارمينا من حاجة، اهو تيجوا تتهبدوا معانا، الهبدة ام ودنين يشيلوها اتنين، بسم الله.. اي مساعدة في الفشل احنا حاضرين، احنا كده اتكتب علينا سجايرنا تبجى واحدة، انتوا تفرقوا بمبة ما تموتش حد احنا نفرقع بمبة ما تموتش حد ونموت احنا الاتنين عادي..  بس قشطة، الاناركيين مش بيتكشفوا بسهولة، مالهمش لبس معين، مالهمش لون معين، لونهم مش بني زينا يعني، ما بيصلوش، مالهمش عزيز، ما ينفعش تعمل لهم بيبي على كتاب الاناركية ولا ينفع ترسم لهم ميخائيل باكونين ولا وليام جودوين وتتريق عليهم ويزعلوا ويغمن عليهم، مش حيزعلوا، الحمد لله بلطين وحياخدوا لنا حقنا، ما بيقولوش اساسا انهم اناركيين.. ورونا بقى حتمسكوهم ازاي 
الاناركيين اجدع ناس
انا مش عايزة ندالة من المسلمين خالص، اديني باحذر اهو
اه.. اصل ده طبع انساني وسخ
بعد حداشر سبتمبر الافرو امريكان قالوا: الحمد لله.. لقوا حد يكرهوه غيرنا، ونزلوا علينا هبد ورقع عشان فرصة ليهم انهم يندمجوا بالاسلوب القذر ده اللي هو "احنا معاكوا اهو.. شايفين؟ حبونا بقى" اتعلموا العليمة الوسخة دي من الميكسيكانز، والباكستانيين بيعملوا مع العرب نفس الحركة الوسخة، والهنود بيعملوا مع الباكستانيين نفس الحركة الوسخة
اظن بقى ماحدش ياخد خمسين قفا على سهوة.. صح؟
لا.. نستجدع بقى.. نستجدع مع الاخوة الاناركيين دول منهم اسانج حبيب قلبي روحي روحي روحي روحي
ما نعملش حركات واطية والنبي، الناس جاية ونس معانا يعني، وبعدين دول طيبين قوي، قوي، اللي عرف اناركي واحد في حياته يعرف الناس دي قد ايه طيبة طيبة الفيل.. طيبين لدرجة تخليك تعيط ومتعاطفين مع ناس كتير ما يخصهمش في حاجة بس عشان غاويين ينكدوا على نفسهم
الاناركيين فلة.. خدوا بوسة :xxx
ملحوظة، بعض التعريفات:
الارهاب: هو أنك تزعل على روحك لما تتقتل ولا تحتل ولا تتسرق ولا يطلع تلاتين ميتين اهلك في الحياة وتقول لروحك: هي موتة ولا اكتر؟ ما انا كده كده ميت ميت 
اللي مش ارهاب: 
الباب الاول:
تبقى قوة عسكرية، أو رأسمالية، او دولية، وتطلع ميتين اهل الناس بفلوسك
مثال: 
تسرق الناس وتجوعهم في اسبانيا واليونان وروما وسويسرا عشان تعبي كرشك- 
-تحتل الناس، الدول ذات الاغلبية الاسلامية بالتحديد، حيث ان الاسلام دين ارهاب اساسا والناس دي تستاهل تموت، وترمي عليهم قنابل عنقودية او فسفورية او مدمرة للملاجئ من اللي بتخرم الارض 
الباب الثاني:
يتعمل فيك كل المذكور آنفا وتسكت
هذا وبالله التوفيق

15 comments:

ياسر said...

طاب مين الاناركيين دول؟؟

medahosni said...

يموت الزمار وايديه بتلعب

lastcrazyboys said...

سرقة حذاء علاء نجل الرئيس المصري حسني مبارك !

تقبــل الله :)

Kabil said...

ياسر الفوضوى هو البنى ادم اللى بيحارب السلطة متمثلة فى الدولة و بيؤمن بالحرية حرية الانسان فى مجتمع بدون تسلط بدون دولة متغولة و طبعاً الفكرة لها وجود عند جزء من اليسار كهدف نهائى لكن فيه برضه رأسماليين بيدافعوا عن الملكية و اناركيستس

Kabil said...

ياسر الفوضوى هو البنى ادم اللى بيحارب السلطة متمثلة فى الدولة و بيؤمن بالحرية حرية الانسان فى مجتمع بدون تسلط بدون دولة متغولة و طبعاً الفكرة لها وجود عند جزء من اليسار كهدف نهائى لكن فيه برضه رأسماليين بيدافعوا عن الملكية و اناركيستس

ياسر كامل said...

ههههههههههههههههههههه
خطيرة خطيرة خطيرة
جبتيها منين دى

Bienveillant أوفياء مصر d'Égypte said...

JULIAN ASSANGE's Wikileaks have massively documented what we already know about those horrible bloody boys and their dirty pages of that hate hat range.

Thank you very much indeed globalist boy of this age, thank you dear good boy of Mr, ASSANGE.

Nous pouvons vraiment être très content - et en plus très fiers probablement - pour détruire la foule rage de ceux abominables sanglés crêtins dingues, mabouls maniaques et cinglé gros singes.

عُقاب said...

ادي اللي بيجيلي منك يا نوارة

العالم دي طلعولي في الحلم

بس اسانج مكانش موجود الحمد لله
كان هيبقى موقف سخيف

هههههههه

ألا هو الواحد يبقى فوضوي ازاي
يا اختي


سؤال كمان
هل يمكن اعتبار
V
in V for vendetta

http://www.youtube.com/watch?v=8TLD3Z6sJWA

an Anarchists ?

ahmedelebyary said...

http://www.tayyar.org/Tayyar/News/PoliticalNews/ar-LB/assange-wikiliks-pb-71228278.html
الغامضة التي أوقعت مؤسس ويكليكس
كان لازمته ايه يا اسانج

One said...

هو سؤال عبيط شوية بس ليه الحكومة الامريكية مأنكرتش الوثائق و ريحت دماغها؟
يعني هل اسانج معاه ادله ان دي فعلاً وثائق حقيقية؟

Bienveillant أوفياء مصر d'Égypte said...

Here's the statement the best of that nest:

Without truth, history will certainly repeat. The same wars, in this time of universal deceit.

Telling the truth has become a revolutionary act. So I salute those who disclose the necessary facts

Bienveillant أوفياء مصر d'Égypte said...

W M D = Weapons of Mass Destruction

soreal said...

@ one, one word, integrity.
@nwarah, killer video. assange is so cool :P

محمد صبرى said...

ههههههههه
لا مفتكرش انه المسلمين هيقفوا معاهم خالص

غالبا هيبقوا افروامريكان و باكستانيين و هنود و كل الحاجات اللى حصلت قبل كده خمسين مرة دى هتحصل للمرة الواحد و خمسين
:D

دون اكتراث said...

والله حاجة عجيبة فعلا ايه اللي حاصل ايه الذلة اللي ماسكينها عليه رأس الهرم الفاسد بتاعنا عشان يسكت علي كل الاهانة والاستخفاف ده ارجوكم ايه اللي ماسكينه عليه علشان يطاطي بالشكل ده ارجوكم حد يقولي