Thursday, 9 December 2010

شقانا ووجع قلبنا يا ولاد الحرامية

الدول الاسكاندنيفية العظيمة، مثلها مثل كل دول الغرب، بتبعت صناعتها للصين عشان العامل عندها مكلف وله حقوق كتير بتوجع دماغهم، وانتاجه اقل لان عدد ساعات العمل بتاعته اقل، وعليه فالصين بتكسبهم اضعاف اللي ممكن يكسبوه من العامل بتاعهم، وده اللي بيخليهم يعرفوا يعيشوا كويس، ويدفعوا للعامل اللي قاعد عاطل اعانة شهرية ما يحلمش بيها باشمهندز ولا ضاكتور مصري قد الدنيا
اغلبية الدول الاسكاندنيفية - جنة الله على الارض - مشاركة في قوات التحالف اللي بتحتل افغانستان والعراق وطالعين لهم بسبوبة كويسة من الموضوع ده
بالمختصر، الدول الغربية بشكل عام، ومنها دول سكاندينافيا عايشين عوالة على غلابة العالم
كل ده ماشي وشغال يا عم... كلوا وانبسطوا، واحنا حسبنا الله ونعم الوكيل، اللي عند ربنا ما بيروحش ان ما كانش في الدنيا يبقى في الاخرة
انما ان السويد تكلف فلوس لمرتبات ظباط شرطة، ومية وكهربا في المحاكم، ومرتبات قضاة، ومصاريف على سجون، وبلاغات دولية، عشان تعقد جلسة لجوليان اسانج تقول له: قالت لك طلعه ما طلعتوش؟
لاااااااااااااااااااااا كده كتيييير قوي
كده كتير
يا اولاد الحرامية ده الصين بتشغل اطفال تحت سن خمس سنين بعدد ساعات هلامية من غير اكل ولا رعاية صحية ، ستات شرق اسيا، يا بتوع حقوق المرأة بيقعوا ميتين وهم بيشتغلوا في الصناعات اللي انتوا بتبعتوها يا عالم يا منافقة يا نصابة يا كدابة
طب راعوا مشاعرنا
عاملين قوانين تضمن للعامل انه يعمل الباديكير على حساب صاحب العمل بفلوسنا وبدمنا وباحتلال اراضينا واستغلال عمالنا ماشي
بتعملوها قضية دولية وتفرسونا ليه؟ ده احنا الستات عندنا بتشتغل في العتالة عشان تصرف على جوزها المدمن
طب قشطة
على فكرة بقى ده مالنا ودي ثرواتنا وبترولنا وشقى ناس غلابة زينا ومال مسروق من مواردنا واراضينا المحتلة ودي جتت ناسنا الميتة بالقنابل
لينا فيه بقى
كل موظفة في العالم التعيس المأكول المذموم من بتوع: خلصني بقى صاحية من تمانية الصبح وعندي جرد بكرة من ستة
كل بنت اتقال لها بعد خمس ست سنين من التفعيص والبوس: صدقيني انا ما استاهلكيش انت تستاهلي احسن مني
كل مخطوبة اتقال لها في التليفون: انت مالك انا فين؟ انا مش قايل لك ما تسألنيش السؤال ده تاني؟
كلهم يعملوا لجوء جنسي وعاطفي للسويد
وبكده مش اقل من مليار راجل في الدول النامية والصاعدة حيطلبوا في الانتربول
ومش عايزة الاخوة الزملا الرجالة يفتكروا اني عايزة انتقم منهم.. ابسلوتلي، صدقني يا صاحبي، العيشة في سجن السويد انضف واحلى واجمل واشيك بكتير من ام الشقة المعفنة اللي انت قاعد فيها دلوقت وبتقرا البوست
على الاقل حتشم هوا نضيف وتخلص المدة وتخرج وتعيش وتشوف نفسك وحياتك بقى
ع البركة
هجوووووووووووووووووووووووووم

11 comments:

torero said...

لو سمحتى ادينا تفاصيل ترجمة ويكيليكس اللى ما اتنشرتش فى الجرائد

احب اقولك ان من ضمن الفروق الجوهرية بيننا وبين الناس اللى عايشين فى اوروبا والدول المتقدمة انهم بعرفوا يكدبوا بكل شياكة
لكن احنا هبل و عبط و سطحيين ولسه بنحب و نصدق الناس الغنية اللى شكلها حلو و برئ

يوميات شحات said...

مرسي

ابراهيم عيسي=طه حسين الجديد said...

انا مش فاهم حاجه
اغيثوني

Nicholas Urfe said...

عجبني البوست يا نواره ،، تسلم ايدك ..
هنزله عندي عالفايس بوك مع اسمك

أبو هاجر said...

ست الكل ألف تحية
عودة ميمونة لأني كل مساء أطرق باب المدونة وماحدش يفتح و لا يرد .س لأنني كنت سأطلب منك مشاهدة لقاء في التلفيزيون الجزائري وبعد مايئست سألت الجيران قالوا هي مسافرة عند ويكليكيس قلت سأترك لها ورقة تحت الباب لكن وحدت الباب محكم الإغلاق قلت سانتظرها أمام الباب حتى تعود فقالوا ستتأخر شوي فزعلت وقلت تغور نوارة في ستين داهية
هذا اولا أما ثانيا
أيه الكلام العنيف و الخشن في وصف أرق وأنبل المشاعر بين البشر، تفعيص مرة وحدة.
معلهش ست الكل كلامك في ظاهره نقد اجتماعي لكنه يحفي نزعة أصولية تخوف
اما ثالثا وهو الصح
الخواجايات يا ست الكل لما الوحدة منهن يسألها واحد او يناقشها أويصحح لها بعض القضايا ترد عليه وتشكره يعني بالمصري الفصيح أو بالبلدي
ما تعطلوش الطرشة
لهذا يا ست الكل فالهجرة إلى الشمال ليست دائما جنسية أو عاطفية.
لكن تلك الصورة بالطرحة الحمراء تساوي كل خواجايات اوروبا وامريكا
هل تعلمين لماذا ؟لأن الطرحة تحمل في طياتها الكثير من الرموز و الدلالات و المعاني : دفء الانتماء ،وعبق الروح وحرارة المشاعر التي جعلت تلك المرأة تعمل عتالة و تفق إلى جانب زوجها حتى اذاابتلي .هذه المشاعر يقتقدها صقيع وبرودة مشاعر الخواجايات
لك اجمل وأصدق التحيات

koko wawa said...

وعجبي....
بس ايه دخل ويكيليكس في النسوان الشقيانه في التفعيص
[ااي دونت اندرستاند]

أبو أمك said...

أكيد سجن السويد مهما كان حلو مش أحلى من سجون مصر
هنا من السجن للشهادة للجنة على طول

mostafa said...

اجمل مافي هذه السطور رغم اباحية الكلمات التي تزعج الاستاذ ادوارد المؤدب هو انك لم تسقطي كغيرك من(المثقفات)
في فخ الفمنيسم ورايتي ما وراء(ارجو ان ما وراء دي ما تزعجش ادوارد))
رايتي ماوراء الحديث الاخرق عن حماية حق النساء بل ان البعض علي الفيس بوك يتحدث عن البنت التي قبض علي الرجل بسببها انها كانت تستعد للذهاب لفلسلطين لمساعدة الفلسطينيين يعني الواد بتاع ويكليكس مش بس ابن كلب فلاتي ومغتصب ده كمان بيعطل مسيرة تحرير فلسطين
تحياتي

محمد صبرى said...

وعجبي....
بس ايه دخل ويكيليكس في النسوان الشقيانه في التفعيص
[ااي دونت اندرستاند

....

العلاقة يا كوكو -حسب نوراه - انه مصاريف محاكمة مؤسس ويكيليكس -زيها زي بقية مصاريف رفاهية اهل الشمال-هى من شقى اهل بلادنا و على حساب فقرنا و تعاستنا و عنوستنا ,و اكيد شقا النسوان و تفعيص البنات من اوضح مظاهر التعاسة و العنوسة و الغلا اللى سبِّبه نهب ثرواتنا لصالح رفاهية الشمال و محاكمة مؤسس ويكيليكس

:D

محمد صبرى said...

اجمل مافي هذه السطور رغم اباحية الكلمات التي تزعج الاستاذ ادوارد المؤدب هو انك لم تسقطي كغيرك من(المثقفات)
في فخ الفمنيسم ورايتي ما وراء(ارجو ان ما وراء دي ما تزعجش ادوارد))
رايتي ماوراء الحديث الاخرق عن حماية حق النساء

....

مصطفى عجبنى اوى اوى تعليقك

Ebn 5aled said...

wikileaks
video mem channel bettabe3 el web beso5reya w tahyees shwaya bas malhash fel seyasa

http://www.youtube.com/watch?v=7bRI5r4rfHE&feature=player_embedded