Tuesday 21 December 2010

ده الزلزال ارحم

انا حاكلم اسانج اخليه يجيب وثائقكم التوب توب توب سيكرت عشان تسكتوا بقى
اسمع يا سيدي:
وأكد سامح سيف اليزل على أن مصر لن تقطع علاقاتها مع إسرائيل على الإطلاق بسبب هذه الأعمال التجسسية، التى لن تؤثر فى شىء، موضحا "عملية جمع المعلومات بين مصر وإسرائيل متبادلة مستمرة، فيوجد لدينا جواسيس فى إسرائيل ولكنهم أكثر حنكة من هؤلاء الذين يتم كشفهم".
ههههههههههههههههههههههههه يا راااااجل.. ومخبيهم تحت السرير؟
طب انا اعمل ايه دلوقت؟ اعمل ايه؟ النوبة اللي فاتت (شوفتوا النوبة دي.. ياااا قديييمة فشخ) المهم، النوبة اللي فاتت الراجل يقول للادميرال احنا قلنا لايران احنا زارعين عندك جواسيس، ويا باشا اي وقت تحبوا تعملوا فيه زغزغة لاستقرار ايران احنا تحت الطلب، وما شافهومش وهم بيسرقوا شافوهم وهم بيتحاسبوا، ولجل الغباوة كل الناس تعزي ايران في ضحايا التفجيرات والوحيدين اللي ما عزوش ايران مصر واسرائيل، حتى امريكا عزتها، يعني ده لو مش انتوا اللي عاملينها بتشككوا الناس فيكم
والنوبة دي - النوبة تاني - النوبة دي يتكشف عندنا شبكة جواسيس ما بينا احنا وسوريا ولبنان، بدل ما نعمل زي الناس العاقلة ونقطع نفسنا ونشحت عليها ونقول للعالم شايفين احنا غلابة ازاي؟ شايفين احنا بتوع سلام وهم ولاد وسخة بيسلطوا علينا جواسيس ازاي، نقول لهم: لااااا ده احنا عندنا هناك جواسيس وجواسيس جامدة كيك
طب اقطع دراعي من لغلغوه ان كان لنا جواسيس في اي حتة في الدنيا ولا حتى في بوركينا فاسو، ماحدش حيرضى يشتغل معانا حنفضحه
وجواسيسنا الاكثر حنكة دول بقالهم تلاتين سنة من ساعة السلام ما اتكشفوش؟ الا كل الناس لها جواسيس في اسرائيل حتى حزب الله، وسمعنا عن ناس منهم اتكشفوا ده امريكا كشفت جواسيس لاسرائيل عندها، واسرائيل كشفت جواسيس لامريكا عندها، وعمري ما سمعت عن جاسوس مصري واحد اتكشف من ساعتها، واحنا بقى اكثر حنكة من الموساد والسي اي ايه.. صح.. صح يا حاج، واديك قلت لهم خليهم يدوروا بقى.. لو فيه انسان واحد كان عنده ذرة شك في اننا ممكن نكون اكثر حنكة - وطبعا ده تأثرا بصالح مرسي الله يرحمه ويسامحه على اللي عمله في الشعب - دلوقت خلاص.. مش ممكن حد يصدق بعد الكلام ده ان عندنا كابرتاية نتغطى بيها في التخشيبة
احترسي نفسك يا اسرائيل.. احترسي نفسك.. احنا اكثر حنكة وحنشأمظك شأميظ شأميظ كده، وعندنا جواسيس جامدين آخر حاجة، ولو مش مصدقانا احنا ممكن نديكي اساميهم عشان تعرفي اننا مش كدابين يعني ولا فنجرية بق ولما بنقول بنعمل، عندك مثلا احمد سبايدر ده اكبر جاسوس وبطل قومي في التاريخ 
لا.. انا عايزة اسانج يتصرف لي معاهم الناس دي

13 comments:

جلال كمال الجربانى said...

ربنا يستر على أسرائيل من جواسيسنا

محاولة للتفاؤل said...

هههههههههههه عندك حق والله و يا ريت تتوسطي لنا عند الأخ آسانج يشوف شغله معاهم
جتهم نيلة عالصبح...أغبيا أوي يعني

عُقاب said...

يعني لو حصل في يوم و طلع حمار يعتقد انهم مخلصين و بيحبوا بلدهم

حتى الحمار ده مش هيقدر ينكر انهم بهايم

يعني بجد على رأي عمرو سلامة

البلد دي نقصها اصوات ضحك الجمهور المتسجلة اياها
و يبقى اكبر سيت كوميدي في التاريخ

Haytham Alsayes said...

مجموعة من رجال العته المنغولي واكبرهم عمدة كفر المزاريطة
دة بقي كبير المعاتيه

ربنا يولع فيهم

lastcrazyboys said...

انتي تخرررسي خاااالص
!!!
جاية تقوليلي احنا لينا جواسيس في اسرائيل وازاي ماتكشفش منهم ولا واحد لحد تشلوقتي .. هو فيييه أصلاً "مسؤوم رفيع المنحنى" وكان ماسك منصب حساس -والمفروض انه سري- يقدر يقول :أيوة اصل احنا لينا جواسيس في اسرائيل ..في الوقت اللي اسرائيل نفسها بتنكر معرفتها بالناس اللي معترفييييييين

سندالنوبي said...

يا ست الكل دي اثيوبيا قامت ببناء سد عارفة يعنى سد يا نهار ابيض و جماعتنا اتفاجؤوا بيها

Boneta said...

انتي تكلمي لهم عزرائيل افضل اهو يريحنا من اشكالهم الغبيه عالم ماعندهاش دم صحيح قال لينا جواسيس !!ياخي روحوا اتنيلوا علي خيبتكم ومين اعمي النظر ده اللي يوافق يشتغل لصالحنا ؟احنا مش عندنا جواسيس احنا عندنا هبل وعتهه بعيد عنك
): (:
تقبلي تحياتي

اسكندرانيه موووت said...

يانواره ياختشى شكلك كده نظرك ضوعوف وعايزلك نضاره انتى مش شايفه جواسيسنا الللى ماليين اسرائيل اسم النبى حارسه وصاينه رأفت الهجان والا اللى ربنا يديلو الصحه وطوله العمر ادالعدى عادل امام دول كتشير كتشير اوى اوى انتى بس اللى مش واخده بالك دول بكره هينصفونا والنبى وهيجيبولنا اخبار زى الفل انشاء الله

Ahmed Mohamed said...

هههههههه
نفس العبط ده اتقال في العاشره مساء في احدي الحلقات وكان موجود واحد كدا اصلع عشان يبان انه ذكي و نبيل فاروق علي اساس انه علي قديمو بقي
ادهم صبري و دونا كارولينا

ابراهيم عيسي=طه حسين الجديد said...

عاجل الموساد الاسرائيلي لسيف اليزل
نشكركم علي حسن تعاونكم معنا
ها ها ها

ياسر كامل said...

ههههههههههه
خلاص يا ستى نخلى كام جاسوس مصرى يسلموا نفسهم عشان تصدقى ان لنا جواسيس عندهم
وليه يعنى مش مصدقة
عندنا نقص عمالة فى الجواسيس؟؟؟

دون اكتراث said...

صباح ومساء الخير عليكي وعلي كل المدونين الجامدين اوي يا جماعة وربنا يفتح عليكو انا جديد يا جماعة في التدوين بس بجد انتو بتعملوا عمل كبير قوي قوي وتفخروا بيه امام اولادكم وبناتكم ان شاء الله واخص بالذكر نجيبة العباقرة وسليلة الوطنية الاستاذة /نوارة
وسلامو عليكو جميعا
علي فكرة انا جديد ومحدش يضحك عليا

Unknown said...

يا جماعة احنا مالناش غير اسرائيل اللي بتخاف على مصالحنا وما عليك من الجواسيس والكلام الفاضي ده
دول شوية عيال عاوزة تعكر صفو العلاقات المتينة بين الشعبين الشقيقين
عييييييييييييب عليكم