Thursday 16 December 2010

رجب طيب أردوغان، أول زعيم تركي سني في التاريخ يحضر احتفالات عاشوراء

هو أول رئيس وزراء تركي منذ تأسيس تركيا الأتاتوركية، يحضر احتفالات الشيعة بعاشوراء
وهو أول زعيم تركي سني في تاريخ جزيرة الأناضول يحضر احتفالات الشيعة بعاشوراء
ولأول مرة في تاريخ تركيا تحضر كل الاحزاب التركية، بما في ذلك احزاب المعارضة العلمانية، احتفال الشيعة بعاشوراء
جدير بالذكر أن اردوغان اتشح بالسواد وردد في خطبته الكلمات الأخيرة للإمام الحسين قبل استشهاده، وبكى كل الحضور، ثم ردد لبيك يا حسين، كما أنه وعد بمراعاة المذهب الشيعي في المناهج الدراسية الدينية، ودي برضه حاجة غير مسبوقة في تاريخ تركيا من ساعة ما ربنا خلق جزيرة الاناضول اساسا
يذكر إن امبارح في احتفالات حزب الله بعاشوراء اللي القى موعظة اليوم التاسع كان شيخ سني، ناسية اسمه
ويذكر ان سوريا امبارح عملت مؤتمر الوحدة الاسلامية المسيحية
ويذكر ان السيد حسن نصر الله امبارح قال بأن عنده معلومات مؤكدة بأن المخطط الرئيسي اللي بتركز عليه امريكا واسرائيل للمنطقة دلوقت هو خلق الفرقة بين المسلمين والمسيحيين لإنهاء الوجود المسيحي الشرقي من المنطقة، والفتنة بين السنة والشيعة لضعضعة الوجود الإسلامي في المنطقة عشان اسرائيل تكسب تحالف السنة ضد الشيعة، وبعد ما تخلص عليهم (تخلص على السنة، لأن إسرائيل بتخلص على حلفائها مش على أعدائها) تتنقل على التحالف مع الشيعي وتخلص عليهم، بمعنى تضعضعهم وتكسر مقاومتهم
وانا باصدقه، مدام قال عندي معلومات مش مجرد تحليلات يبقى معلوماته صح، عمره ما كدب قبل كده كدبة واحدة من ساعة ما ظهر في حياتنا، وقال انه عنده معلومات ان الفتنة الاسلامية المسيحية في مصر اسرائيل اللي وراها، ومدام قال كده يبقى هو كده، هو مش بيكدب
الخلاصة
اي حد حيسعى في الفتنة بين المسلمين والمسيحيين وبين السنة والشيعة هو بالنسبة لي اسرائيلي، حاجز لسانه من لغاليغه

12 comments:

utopia said...

كل سنة وانتى طيبة يا نوارة
الكلام كله صح الصح ولا يعلى عليه
وبلال فضل الايام دى بيقول نفس الكلام
على اشعال اسرائيل للفتنة
والسيد نصر الله فعلا عمره ما كدب حتى على اليهود
بس المنطلق عند اردوغان بيتهيألى له علاقة بانضمام تركيا للاتحاد الاوروبى
لان الحجة بتاعة الاتحاد هى الاضطهاد الدينى فى تركيا
ربنا يستر الاغبيا عندنا كتير وما بيصدقوا

محمد نور الدين said...

ست الكل ألف تحية
على مهلك على مهلك يا نوارة الجزائر منذ الإستقلال وهي تحتفل بعاشوراء ،بل أكثر من ذلك هو يوم عطلة رسمية يعني اليوم الخميس في الجزائر عطلة رسمية لكل الدوائر الحكومية .علما أن الجزائر مسلمة مية بالمية، وسنية مية بالمية ،ومالكية مية بالمية .وهل تعلمين يا ست الكل ان الجزائر كانت شيعية أيام الفاطميين .وهل تعلمين يا ست الكل أن الأزهر شيده الجزائريون يعني نحن بناة الأزهر.
.أسمعي هذه النكتة تنطبق عليك يا نوارتنا لما كنا طلبة في الجامعة كنا نتهكم على البعثيين ونقول أن البعثي لما يخطب في بغداد أو دمشق يقول كلنا عرب :العراق بلد عربي، سوريا بلد عربي ،مصر بلد عربي، حتى الجزائر بلد عربي
لأنكم لما تتحدثون عن العرب و العروبة لا تتعدى الهلال الخصيب ومصر ويمكن الخليج
واتحداك إن كنت تعرفين كلمة واحدة باللهجة الجزائرية في وقت كل الجزائريين بخاصة النساء يجيدون بل يتقنون اللهجة المصرية عندكم مثلا الممثلة التونسية هند صبري فهي تجيد
اللهجة المصرية أكثر بكثير من المصريات. لكن يا نوارة لا احد يقدر عليكم في المزايدات
ورغم كل ذلك ستظلين دائما اجمل وأروع
نوارة

Unknown said...

انا ما باتكلمش على الجزائر

انا باتكلم عن تركيا
وكاتبة اول زعيم تركي سني

عشان بس تركيا لها باع طويل في التعصب المذهبي :)

Unknown said...

وعلى فكرة انا عارفة كل اللي قلته على الجزائر :)

محمد نور الدين said...

ست الكل أنا عارف انك عارفة
لكن الكثير لا يعرف يا نوارة .
لكن لماذا ردك كان جاف
ومختصر:
انا ما باتكلمش على الجزائر

انا باتكلم عن تركيا
يعني ماترديش ولما تردي على مضض

لك أجمل و أصدق التحيات يا أجمل نوارة

Unknown said...

انا آسف لأني مش فاهم بس انت من كذا يوم نعتي أردوغان بالحرامي بناءاًعلى ترجماتك الرائعة لوثائق الويكيليكس و النهاردة بتحييه على ما فهمت.مع الوضع في الإعتبار أني مش مصدق الإتهامات اللي اتوجهت له لحد ما تثبت بصورة قاطعة لأنها مش متسقة مع مواقفه.

سامح said...

هل ممكن في يوم نلاقي الاستاذة نوارة لابسة اسود وفاتحة دماغها وبتولول لبيك يا حسين
مش بعيد

السنة حلفاء اسرائيل ؟!!
و الشيعة اللي هيطلعوا قرآن جديد عليه النجمة السداسية بيحاربوا اليهود
http://www.al-mehdyoon.org/frontpage.html

Unknown said...

ابو هاجر

لا انا ما ردتش بجفاف ولا حاجة، انا كنت باوضح انا قصدي على مين

بالنسبة لعبد الرحمن

وانا ليه احبه ولا اكرهه

من حيث انه اتهم بانه حرامي فدي تهمة موجودة في الوثائق وعليه انه يثبت عكسها

من حيث انه نقل تركيا في مربع مختلف ونقلها نقلة نوعية ده حصل

من حيث انه له علاقات باسرائيل ده برضه حاصل

من حيث انه بعت طيارة لاغاثة اسرائيل وفي نفس الوقت ما بعتش طيارة لبتوع قافلة الحرية تنقذهم وهم في المياه الدولية وضرب الاكراد اكتر من مرة ده حصل برضه

من حيث ان حزب العمال الكردستاني بيشتغل مع اسرائيل دي حقيقة

ومن حيث ان الاكراد المدنيين اللي هو بيقتلهم مالهمش ذنب برضه دي حقيقة

ومن حيث انه اول رئيس وزراء تركي في التاريخ يحضر عاشوراء ودي خطوة لتجميع الناس ضد الطائفية ده برضه حصل

مش فاهمة ايه مشكلتك انت بقى؟

هو ده يقرب لك حاجة؟ ده سياسي

لما يعمل حاجة وحشة نقول له وحشة

لما يعمل حاجة حلوة نقول له حلوة

الحقيقة ان اردوغان سياسي بيعمل حاجات تعجبني وحاجات ما تعجبنيش

لكن هو مش جاسوس، وعنده ولاء للدولة ونفسه يعمل حاجة لتركيا تخلي لها ذكر في التاريخ

ده مش واحد متقدم لي

ده سياسي، ما تشخصنش الامور ويا يبقى اردوغان وحش يا يبقى اردوغان حلو

الحلو على طول الخط ما بيبقاش سياسي، بيبقى مناضل

والوحش على طول الخط ما بيبقاش سياسي،
بيبقى جاسوس

لكن السياسي لا مناضل ولا جاسوس

Unknown said...

أنا معنديش مشكلة ولا حاجة كل ما هنالك إني حبيت ألفت النظر إن ما ورد في وثائق الويكيليكس على أهميتها العظيمة لا يجب أخذه كله على عواهنه وما أفتكرش إن كلامي كان بيدل على الشخصنة. ولو عندي مشكلة فحتبقى إن إسمي عبد الحميد مش عبد الرحمن.

Unknown said...

ههههههههههههههههههههههههههههههههههههههههه

لا مؤاخذة يا عبد الرحمن
معلش السن بقى

ماهو ممكن يبقى حرامي
وممكن ما يبقاش
بس ما كانش فيه داعي ابدا يبعت طيارة لاسرائيل
بما انه ما بعتش حتى طيارة لمواطنين اتراك تم الاعتداء عليهم في مياه دولية وكان يقدر يتدخل في المياه الدولية وهم عمالين ينضربوا قدام عينينا

يا راجل ده انا حطيت الروب على كتافي وكنت حانزل من كتر ما انا كنت منهارة واللي فوقني ماما وهي بتقولي انت رايحة فين؟ قلت لها رايحة لهم، قالت لي ايوة يعني رايحة لهم فين؟ انت عارفة هم فين دلوقت دول في غزة، حاطة الروب ورايحة غزة؟

هو ما عرفش يبعت لهم طيارة تنقذهم في المياه الدولية؟ انا مقدرة ان موقفه ضعيف، وانا ما باكرهوش الراجل والله العظيم انا باحترمه جدا والراجل اسمه حيتكتب في التاريخ عمل حاجات كتير كويسة

بس هو بعت طيارة لاسرائيل وهو مش مضطر والطيارة اللي بعتها جات بعد الكلام اللي جه في وثائق ويكيليكس اللي ممكن ما يبقاش صحيح وممكن يبقى صحيح الله اعلم بس هو عليه بقى يثبت انه مش حرامي حيث انه بعت طيارة على طول بعد الوثائق

وانا بصراحة مش مسامحة اي حد بعت طيارة لاسرائيل والموضوع ده جرحني جدا، خصوصا ان لبنان كانت بتتحرق وماحدش حتى كلف خاطره يجيب سيرتها غير ربنا بس نزل عليهم مطر طفا لهم الحرايق

انت بتقومني على الراجل ليه؟ انا ما باصدق اروق له عشان انا شايفة انه مفيد وان كنت مش ميتة عليه حب يعني، بس شايفة انه راجل مفيد ومخلص لبلده
ما تقعدش بقى تفكرني بالحاجات اللي مضايقاني منه

Unknown said...

يوه

ده انا قلت لك عبد الرحمن تاني

قصدي عبد الحميد

او غير اسمك بقى ههههههه

Unknown said...

ههههههههههه